|
حكاوي الفنانين مع الفنانين وتعاليقهم بين الحقيقة والاشاعة والخيال..
|
حكاوي ونكات وطرائف (جني وجن كلمة طرائف دي وخصوصا لمن يقولوا ليك قول لينا موقف طريف مر بيك )كتيرة يتناولها الناس عن الفنانين الفنان فلان قال كده والفنان فرتكان علق لي الفنان فلان بي كده منها ما هو حقيقي ومنها ما يطلع في شكل اشاعة ومنها ما يتم تلصيقه على الفنان بافتراض شخصيته ... انا متاكد إنو في قصص كتيييرة عن الفنانين البيسخروا او يعلقو تعليق لطيف او لذيذ او شامت عن الفنانين التانيين ولا يخلو البعض من التريقة ..
انا بصدد فتح باب المزاد للاخوة العازفين وإن كان الموقف حساس بس اكيد الغرض منو شي من الجو اللطيف والضحك البرئ واللهو المباح (الجااااااااااااااااااااااااااااااااااااك)..
قالوا زيدان ابراهيم مرة بيعمل في بروفة في نادي الفنانين وبعدين بين كل اغنية واغنية في باقة عرقي داسيها هناااك بيمشي يشيل ليهو منها جوغمة ويجي يواصل.. كل ما يرجع ليها يلقاها نقصت كتييير يقول ليهم معقولة يا جماعة انا سكرت قدر ده ؟؟؟؟ في اخر مرة لقا الباقة قربت تكمل قال يا جماعة العرقي بتاعي ده البيشرب منو منو ؟؟؟ عبد القادر سالم قال ليهو انا شااااايف اللمين عبد الغفار كل ما تخت الباقة بيجي يشيل ليهو منها بقة ويمشي.. زيدان فووووووووووو مشى ليك على اللمين عبد الغفار وهو بيصل في نضارتو كده ويعدد بي أصابعينو : شووووف يا اللمين ..تشششي الريد تشيييل ودو انا ما عندي معاك قضية لكن عرقيني ده ما تشيل منو :D:D:D:D:D:D:D
تخريمة : بالله ما يجي زول يقول لي يا عمر وده قذف للفنان زيدان وهو لا يسكر ولا اللمين بيسكر انا قلت ليكم القصص دي متداولة بين ما هو اشاعة وبين ما هو حقيقي العندو قصة يجي يحكي والما عندو شكررررررا للوعظ..
|
|
|
|
|
|
|
|
Re: حكاوي الفنانين مع الفنانين وتعاليقهم بين الحقيقة والاشاعة والخيال.. (Re: عمر الفاروق)
|
في نادي الفنانين طبعا الناس بتقعد مجموعات مجموعات فقالوا مرة ترباس قاعد مع مجموعة من الفنانين قام جا ماشي فيهم الفنان القلع عبد الحفيظ .. ترباس طبعا معروف بي جدعاتو التحت تحت ومطعاناتو البي البارد ديك .. فجأة رفع صوتو وقال : بالله ياااا جماعة انتو البيت الناصية زي التاني ناصية ؟؟؟؟؟ في إشارة منو لي محاولة القلع تقليد ترباس.. القلع رد وقال ليهو : انا البيت التاني ناصية عملتو جدجد وما ساكن في الايجار كدي انت اسكن في الناصية وتكون ملكك .. في اشارة لي انو كمال ترباس بعد طنقعتو دي ساكن في بيت ايجار !!!!
| |
|
|
|
|
|
|
Re: حكاوي الفنانين مع الفنانين وتعاليقهم بين الحقيقة والاشاعة والخيال.. (Re: عمر الفاروق)
|
إشتهر الفنان مجذوب أونسة بعفويته الشديدة ، واشتهر الفنان محمد الأمين بردوده اللاذعة يقال أن الفنان مجذوب أونسة قد رزق ولداً بعد محموعة من البنات . فرح به فرحاً شديداً وجاء لدار الفنانين . صادفه عند الباب الفنان محمد الأمين فأخبره " الحمد لله المدام إتحلت وجابت لينا ولد " فبارك له . لف مجذوب أونسة على الفنانين الموجودين واحد واحد يخبرهم بخبره السعيد. وجد نفسه مرة أخرى أمام الفنان محمد الأمين فبدأ تاني يخبره " الحمد لله المدام ...... فقاطعه محمد الأمين
" معقولة يا مجذوب ..؟؟ خلال نص ساعة بس المدام لحقت تحمل وتتحل وتجيب ليك تااااني ولد ؟؟ "
| |
|
|
|
|
|
|
Re: حكاوي الفنانين مع الفنانين وتعاليقهم بين الحقيقة والاشاعة والخيال.. (Re: عاطف عمر)
|
Quote: قالوا زيدان ابراهيم مرة بيعمل في بروفة في نادي الفنانين وبعدين بين كل اغنية واغنية في باقة عرقي داسيها هناااك بيمشي يشيل ليهو منها جوغمة ويجي يواصل.. |
السادة المحامين و القانونيين العندهم نية يترافعوا نيابة عن الفنانين المشتومين أعلاه تحت المادة (159 إشانة سمعة) من القانون الجنائي السوداني بتاع سنة كم كدة ما عارف. أي معلومة تقود إلى المدعو عمر الفاروق أب لسان سليط دة أنا جاهز بس عمولتي بررررررررررررة كان دايرين محل شغل أخوهو الكبير بوديكم أخوهو التاني بوديكم بيتم بوديكم في السعودية بوديكم. آن الأن لشروق أبو الناس و مكسرين التلِج ليها أن تنتقمو ينتقِموا
لكن بيني بينك يا عمر والله دي لا فنانة لا حاجة
| |
|
|
|
|
|
|
Re: حكاوي الفنانين مع الفنانين وتعاليقهم بين الحقيقة والاشاعة والخيال.. (Re: 7abib_alkul)
|
الغالي الحبوب عاطف:
Quote: إشتهر الفنان مجذوب أونسة بعفويته الشديدة |
قالوا مرة مجذوب اونسة (وفي رواية رموها في حسين شندي) إنو جوهو ناس لي عرس يوم الخميس فقام ارتبط معاهم وشال العربون بعد يومين جوهو ناس تانيين لي عرس يوم الخميس برضو فقام نسى انو مرتبط فقام شال منهم عربون برضو .. اها يوم الخميس لمن جا يشوف جدولو لقا روحو مرتبط في عرسين في نفس الوقت فقعد ممحن وشايل هام وما عارف يسوي شنو في الورطة دي .. اها الساعة خمسة باب البيت دق ..مشى يفتح قام لقاهو واحد من جماعة العرس الاول وقال ليهو والله يا استاذ معليش نحن حا نعتذر ليك لانو حبوبتنا ماتت ولغينا الحفلة .. اها قام مجذوب بدون ما يشعر بدون ما يشعر قال ليهو : يا سلااااااااااااااام ياخ ده خبر جميييل جدا ً :D:D:D:D:D:
تخريمة: الحكاية دي انا حكيتا لي حسين شندي فقام نكرا وقال لي هي فعلا حصلت بي لي مجذوب اونسة ..
| |
|
|
|
|
|
|
Re: حكاوي الفنانين مع الفنانين وتعاليقهم بين الحقيقة والاشاعة والخيال.. (Re: DKEEN)
|
عمنا عامر ساكس عازف الساكسفون الراجل المخضرم ... عزف مع الكاشف وسيد خليفة ومروراً بحنان بلوبلو .. وإلى الجيل الحالي ... ربنا يمتعه بالصحة والعافية .. مرة قام اذن لصلاة المغرب ... وبعد شوية قام أقام الصلاة ... ولما الناس إصطفوا لأداء الصلاة ... قدموه بإعتباره الأكبر سناً .. فقام كبر وصلى بيهم .. وعند نهاية الصلاة قال .. السلام عليكم ....... السلام عليكم ، كلمات وألحان وأداء عمكم عامر ..!
| |
|
|
|
|
|
|
Re: حكاوي الفنانين مع الفنانين وتعاليقهم بين الحقيقة والاشاعة والخيال.. (Re: ABUZEEGH)
|
يا عمر والله انا خايف البوست ده حيكون من المواقف الطريفه - او الما طريفه- الحتحكيهابعد ده
" مره فتحت لي بوست في سودانيز اون لاين وبعدين قامو جماعه رفعو علي قضيه ....... " اها تم الباقي من عندك لكن قبل ما تتم اسمع نصيحه دكين ده ولو عندك حاجه بي اسمك في السودان اتخارج منها سريع سريع ويا حبذا لو قلت انا من الليله مريخابي خليهم يقلعو قروش جمال الوالي عشان الجماعه يحتارو
| |
|
|
|
|
|
|
|