|
Re: اي زول مشتهي البلد يجي هنا .... ( يوجد حنين ) (Re: الكيك)
|
الكيك سلامات يا عمنا وتشكر علي المرور
Quote: لكن قول لى احمد محمد بيناوى الناظر والدك ؟ وهو وين الان ؟ |
احمد محمد بيناوي عمي وهو الان بقريتنا ( امكي ) بصحة جيدة والحمدلله بالمناسبة التميرات الفوق ديل من الجنينة حقتو
لكن نقول ليهو منو .. ؟
خالص الود
| |
|
|
|
|
|
|
Re: اي زول مشتهي البلد يجي هنا .... ( يوجد حنين ) (Re: الطاهر عثمان)
|
الاخ ياسر شكرا لك علي راحة اليد الطاهرة
أمد طويل لم نصافحها ولم تصافحنا
وده الخلاني فيهو أقول
Quote: الآن .. استودع باحتك النبيلة بالاسف فانا لم يعد لى خاطرة الرجوع وانت قد اغلقتنى مثل جدول جرف قديم ثم حدثت عنى نيل عشبك ان اجف اهواك حين زلازل الدنيا وسلاسل الاصفاد على كل كف منذ انا وانت والغلط البرىء نوصد مزلاج باب من نهارات التعب لنبتدأ الولف آه ..كم ارهقتنى انت بالتهاب جرحك الممدود فى حمى السفر كم اتعبتنى وانا ابتاعك خوفا" واحترازا" ومنفى وحين اعود اجد اعتبارك فى كل بيت اسفا" يعلمنى النواح اجد انتباهك فى الشوارع والممرات البسيطة .. لنفترق ... انا فى زمن القناديل افترقت غادرتنى ايام هجعتى الجميلة على فناء الدار والرمل البسيط حين فناء حزنى فناء دارى وحين ولوج الناس طيبون وخيرون اباشر فى وجوههم وجهك السمح الطلق
انا احترق
دخنت فيك حشاشتى وافنيت القوافى جميعها لكى استرد محبتى واستعيضك من جراح ولكنك حين اكتمالك فى مسامى اغتربت علمتنى كيف اكون وحيدا" كيف اسامر ظلى ادفن وجهى عند خطاى قبلتنى وما اشتفقت ودعتنى مليون ميل مربع اودعتنى سر الحقائب والتذاكر والمطارات السفن ثم وعدتنى ان القاك فى باحة الجرح الوطن اين جرحك ياوطن ؟؟ ومن اين لى ان التقيك وانا كم مرة التقيتك فى انتباهى واغتفالى وماوصلت ؟؟ كم مرة رددت اسمك فى دمى فاطل وجهك من مدى تذكرت القوافى والمسافة والمطر والعشب الندى تذكرت الشعر المسيج بالخمور وعينان مثل بساتين الشمال تستديم لحاظها فى الكأس بلمعة البسم الحبور انا كم بكيتك باسما" وغنيتك خلف اصوات النحيب وامتطيت اغترابى صهوة من الجلد الصبور انا حين التقيك فجاءة يرك على قلبى عصفور صغير تصطفق الجداول والمواسم والحقول اعود مشيا"... لست ادرى اعود لاخبىء فى شفتى قبلة عشقك الاستوائى الخجول اضاحك النجوم القافلات مسير عام وان رنت اذنى لحنا يحضرنى وجهك من سقط الشمس نورا" يأبى الأفول احبك لاجدال فيك الصباح ووجه امى تخبز لى دعاءا" فى تلافيف الرغيف لتزيل عنى غبن العساكر والسؤال فيك الحبيبة والمساء ونجمة السعد البعيد عينان من وجع ومنفى وكرنفالات وعيد لجج من الاسرار تفصح ولاتبوح عينان شيدت الحروف جميعها فى مقلتيها بلاصروح واسكنت القوافى الشواطى والسفوح عينان ان هى ابسمت عرفت شرايينى الندى واحقلت دناى بالوعد الصبوح الآ استودع باحتك الجميلة بالاسف استودع ولا ابوح خذ رمالك من جبينى خذ صباحك ووجه امى خذ مساءك والحبيبة ولتبقى لى كل الجروح |
| |
|
|
|
|
|
|
Re: اي زول مشتهي البلد يجي هنا .... ( يوجد حنين ) (Re: Yassir Bainwi)
|
يازول مالك علينا شن سوينا ليك ماتخلينا في حالنا قلبت المواجع سدر في الجوف وحيح واتندلت العين دموع ومراكبنا ماعدت شالجرفا العرقالعرق وشالا الريح والصفصاف وقف فرجة ونخلات الجرف جاها القيف والهدام هدم اللتر القبيل مرسوم دافن في الطين والجبادة كرنت وشرم الحرويل ونويح ساقية القدامية ما غنت والتمر حتا المغمول بعد دفيق والجزيرة نشف بحرا وقام الطرفا سد الشوف
| |
|
|
|
|
|
|
Re: اي زول مشتهي البلد يجي هنا .... ( يوجد حنين ) (Re: nourelhadi awad)
|
nourelhadi awad سلامات يا خينا
Quote: ومراكبنا ماعدت شالجرفا العرقالعرق وشالا الريح والصفصاف وقف فرجة ونخلات الجرف جاها القيف والهدام هدم اللتر القبيل مرسوم دافن في الطين والجبادة كرنت وشرم الحرويل ونويح ساقية القدامية ما غنت والتمر حتا المغمول بعد دفيق والجزيرة نشف بحرا وقام الطرفا سد الشوف |
ايه صح والله
خالص الود
| |
|
|
|
|
|
|
Re: اي زول مشتهي البلد يجي هنا .... ( يوجد حنين ) (Re: Yassir Bainwi)
|
هسي الناس مقيلا تحت التمر السالي دوبو والبنطون بالغرب والناس في الشرق مالية القيف والبحر ساكن ومركب الحواتية شاقة العرق وصوت المقداف ( سييق ... دف ) مع نضما بعيد زي كورال والبنوت هناك جنب حجار الشلال يشرن في الهدوم فوق الديس وياخدن عوما لي عند الدالة ويصدن وفرحين تندلت قفتا بالسعدة وقزت المنجل في قنقونة واتحزمت توبة والغنم راتعات فوق العصب وياكلن في السفير وحميدة معلق المحرات في الجرف وشنانق طاقتو ولاساعل والحال بسط
ياحليلك يابلد
| |
|
|
|
|
|
|
Re: اي زول مشتهي البلد يجي هنا .... ( يوجد حنين ) (Re: nourelhadi awad)
|
nourelhadi awad
Quote: وصوت المقداف ( سييق ... دف ) مع نضما بعيد زي كورال والبنوت هناك جنب حجار الشلال يشرن في الهدوم فوق الديس وياخدن عوما لي عند الدالة ويصدن وفرحين تندلت قفتا بالسعدة وقزت المنجل في قنقونة واتحزمت توبة والغنم راتعات فوق العصب وياكلن في السفير وحميدة معلق المحرات في الجرف وشنانق طاقتو ولاساعل والحال بسط |
سلامات ياخوي بالمناسبة انت من وين عشان نضمك ماغريب علي
خالص الود
| |
|
|
|
|
|
|
Re: اي زول مشتهي البلد يجي هنا .... ( يوجد حنين ) (Re: Yassir Bainwi)
|
Quote: وحات الله ما بنخلي ليهو البلد يبرطع فيها براهو |
الله يديك الفى مرادك دى اجمل جملة اقراها ودا عربون محبة بيناتنا من مجموعة ابن النخيل الطبعة الثانية قصة اسمها البندر القرية كانت وادعة ، فى موسم الخريف تبدا الافراح تغمرها ، الشجر يخضر كانه ولد لتوهّ ، الارض مكسوة بالنبت الاخضر من (ضريسة) وتبدو كان لم تنضج بعد ، البهائم ترتفع معدلات البانها وخصوبتها ، ترتع فى مروج بسطت خضرتها على المدى بطول القرية ، البيوت مسورة مزروعة حولها الخضروات التى يفيد بها اهل القرية يوميا من طماطم وخضرة وبامية كل بيت مزروعة حوله مزارع الرجلة والبامية والجرجير وحين تطورت الاساليب فى الطعام بات الطماطم والباذنجان من المزروعات الدائمة ، لكن البامية كان لها القدح المعلى فهى التى تجفف فى الصيف وتسحن وتدخر لوقت الحاجة حين يعز المطر والزرع يتشح بالغبار ياكلونها مع البصل والطماطم المجففة بدورها والبصل المجفف المدخر مفروكة مضافا اليها قليل من اللحم الجاف ، ومنهم من يقلى البصل ومنهم من ياكلها (بيضاء ) بات الان الجفاف ضيفا ثابتا ورمزا لحياة باتت كئيبة ، الحرقة اعترت القلوب والارض ، عائشة كانت فى كل يوم تفكر فى الرحيل الى البندر ـ :هناك الموية بالحيوط ، والكلام بالخيوط والكهرباء ,والعربات تجول الشوارع ليل نهار، اصوات لا تكل ولا تمل تتصايح عربات الاسعاف والشرطة فى مباراة مربكة لكن هنا عربة واحدة يملكها موسي ود ابراهيم ( وهسى امكن عشرين يوم ما يجى وكتين يجى ابنسمع عربيتو تعيط من بعيد )قالت لهم ـ : حتى السكر بقى قعر ماعون والبن وحيدو مدودو بى رويسى من عدم الجبنة ، الزراعة ابت بى الله واحد ، البير جف ، الموية ما بتنحمل فرقتا ، الحال واقف دوت ، تعالو نمشو من هنا ـ وين يمة ؟ ـ البندر ـ البندر محل الناس الكتار ؟والكتر ؟ ـ لا لا لا ، البندر لا لا يمة قالت السرة : ـ نان واطاتنا يمة ـ بنجو صادين ان الله كتب لنا حياة ـ لا لا يمة البندر يبلع بير يمة ـ لا لا يا احمد البندر ولا الجوع الهنا ـ يمة الجوع والموت من الجوع ولا الغريب الما بنعرفو نمشى نتهان هناك ـ لا لا مافى هانه هناك ، انى بنشتغل فى البيوت وانت بتلقالك شغلا ياكلنا لابدن تلقى ـ والسرة يمة خوفى كلو على السرة البنات وكت يمشن البندر ببقن غير ما كانن هنا ، يمة الله يرضى عليك الكلام دا اكتلى نارو هنا دا ـ ما بتجيها عوجة تحت عينى ـ يمةالبندر لا ، اخير الموت هنا من الجوع ولا البندر ، هناك يمة الذلة والهانة ونحنا ناس عشنا على ضراعنا ما بندور ذلة الرجال ، وسمعت من اولاد ناس شيخ بكرى جنس الذلة والمهانة ما بنقدر عليها يمة ، ـ ما تراهن شبعانين وتريانين قالوا فنزلت عائشة واحمد والسرة فى اطراف امدرمان ولكنهم لم يهناوا كما ارادوا ، فقد حجزوهم فى معسكرات كان خيرا منها البقاء فى القردود والموت جوعا اكثر رحمة فلقد صار الكلام مشحونا بالدمع والندم واللغة مشحونة بليت ولو ، والعيون التى كانت مشعة خبا شعاعها حتى الاحلام وادها الصمت وعائشة احتشدت بالدموع صباحاتها ومساءاتها حين ترقد تتجه الى السماء داعية ان تعود الى الارض التى احبتها والشجيرات التى حملتها الى جوفها الرمال
30 ديسمبر 1997 القاهرة
| |
|
|
|
|
|
|
Re: اي زول مشتهي البلد يجي هنا .... ( يوجد حنين ) (Re: سلمى الشيخ سلامة)
|
الغالية سلمي شكرا علي المرور وانا في غاية السعادة بصداقة امثالك
Quote: ـ وين يمة ؟ ـ البندر ـ البندر محل الناس الكتار ؟والكتر ؟ ـ لا لا لا ، البندر لا لا يمة قالت السرة : ـ نان واطاتنا يمة ـ بنجو صادين ان الله كتب لنا حياة ـ لا لا يمة البندر يبلع بير يمة ـ لا لا يا احمد البندر ولا الجوع الهنا ـ يمة الجوع والموت من الجوع ولا الغريب الما بنعرفو نمشى نتهان هناك |
ياخي دا حوار مجنون عديل بتاع زول شاف القصة دي قدامو عدييييل
خالص الود
| |
|
|
|
|
|
|
|