|
|
 يا حضرة القاضي
|
This poem is a part of a long peom was wrote by Mr. Mondog Ali Al-Azhari in www.abritabag.net/vb by the same name
يا حضرة القاضي
قُبّال تقوم تمشي
استسمِحَك كِلّمةْ
إنّ القضية عُمومْ
مُحتاجِة لي حِكمةْ
أنا بعرفكْ عادِل
حَاشَاكَ تِنخَمّا
لا بتقبل الرَشوة
لا ناقِص الزِمّةْ
أنا مُش أكيد .. لاكِين
زي الكلام ناقص
الجلسة كيف تمّتْ ..
ولسه الكلام في الزُورْ
شايفنُّو ما انتمّا ؟؟
لو يسمح القاضي
أنا زول بسيط زي ناس
في الجانب الشرقي
زي أغلب القاعدين
قِدامنا في اللّمّةْ
وعارف البحرِّق جُوف
زولاً تَرّك بلدو
مَرّتُو .. وكمان وَلّدُو
عاش عُمرُو جوّا الخوف
حتى الضِحِك حَرَدُو
ما بعرِف الحَجَّةْ
لا الشيخ . . ولا بعرف
داك ناقص الهِمّةْ
العَاق لوالدِينو
لا رَاعَا حقّ أُمّو
لا شِيب أبوهو البان
مِن لَفّةَ العِمّةْ
ياما الرسول وصّى
يا العُشرةَ بالمعروفْ
أو فُرقة بالحُسْنى
والراعي مهماً كان ..
يا حضرة القاضي
برضَك بيكون إنسان!!
ياما الرُجال بشقُوا
في الغُربة شان لُقمةْ
أو يرضُوا بالحِرمان
لَمّن يجي الراتب
شان يَبْعَت الكِردان
لي مَرتو في الأعياد
أو يبعت الهِدمةْ
وعرقهُم السَخْنان
فوق الجِباه وَحْمَةْ
كيف يعرف الشبعان
يعني إيه ( أزمةْ !! )
مولانا لو تسْمَحْ
عُمرّك عِرِقْتَ في يوم
وكت الشمش تحمى؟
عُمْرَك لَبَستَ خفيف ..
وبرد الشتا الأعمى ..
تنهش في عظمَك .. زي
ضبعة .. وكلاب الحي
ما تنهش اللحمةْ !
والناس تعيش بين بين
لا جاز ولا جازولين
لا حبّة انبسلين
وبين كُلّ كام عشرين
تلقى البيموت بالكوليرا
والحَصْبة واليرقان
والموت أكيد رحمةْ !
بين العقارب شُوك
واتحدا لو تلقى
واحد فقير ماشي
بسفنجة أو جزمةْ !
يا حضرة القاضي
دي قضية الأمّةْ !!!
* * * *
يا حضرة القاضي
أنا لو حتسمع لوّ . . .
شايِف حقوق الناس
بتضيع باسم الدين
دستور ومؤتمرات ..
قانون وسُلطة سَوّ
مولانا ما تقول لي
( قانون .. وما قانون )
ما أصلو رأس المال
قانونو بتلولوّ
أنا كُنتَ في المشروع ..
جيت من هِناك للتوّ
أنا شُفتا ناس تزرع
بطيخ ويوسفندي
بلح وتَمُر هِندي
دُوم .. ونَبَق .. لالُوب
قُطنو الفَتَق يادوب
ورِيحة الطَلِح في الجوّ
تَرْبالَة يا مولاي
سُترة .. ودَوَام الحال ..
يا قاضي .. دِيمة مُحال
* * * *
وفي الجانب التاني ..
( غير المزارعِيّة )
يا حضرة القاضي ..
شُفتَّ الوُشوش تلّمِع
في بدلة كِاكِيّة
نديانة زي عُشّرَة
ساعة النِهاريّة
ماسكِين في إيدهُم سوط
وفي التانية زُهْرِيّة
مُصحَف صغير للجيب
يا حضرة القاضي
أنا ما كَشَفتَ الغيب
بس ميّة في الميّة
ديل هُمّا ناس العِيب
فِقَرا ومُرابية
عز الشمش .. والناس
ما لاقيه طاقية
تلقى الكلاب تضحك
وهي ماسكة شمسية
آسِف إذا اتماديت
بي كِلمة سُوقيةْ
يا سِيادتو - لو تسمح -
أنا - باختصار - شايف
إنو الغلط واللوم
راكب حكومة الشُوم
والسُلطة في الخُرطُوم
تُجار كراسي القصر
شُلّة حراميّةْ
باسم الشعب .. والشعب ..
غافل .. عن النيّة
صرفونا عن أرزاقنا
بالبحث في الأسبابْ
خمّونا بالبترول
وحرب الجنوب يادَابْ
ده مُسيّلمة الكزّابْ
جايينا بالدبّابْ
والاسم حُريّةْ
الثورة والأحزابْ
بعث وشيوعيةْ
دي حكومة شعبية
اللجنة شعبية
الثورة شعبية
والشعب شعبية
هُو البدفع الديّةْ !!
كِمِل الكلام يا دَاب
وباقي الكلام فاضي
يا حضرة القاضي
Hisham Adam
06/11/2005
|
|
 
|
|
|
|
هشام آدم
فيس بوك
تويتر
انستقرام
يوتيوب
بنتيريست