إلـى مفيد . . شهيد الإسفلت
مرثية لشهداء غـــرة رمضــان « طريق شريان الشمال » إلـى مفيد . . شهيد الإسفلت يا شاب يا راحل سلامات . . إزيّـك ؟ يا غيمة تشيل في عز الصيف مطر الحنيّة. . جوابات أفراح الناس . . أحزانا ومآسي أولاد الخرطوم يا جايب ليهم . . أشواق الأُمّات يا طير مجروح لفّيت بجناحك . . أحلى مسافرين يا الريشك نقّط . . (غنوات) خليت الغربة القاسية وقسيت غربتنا يالصوتك كان في الغيمة الهازلة مطرة بتتقدّل . . وهي نازلةْ على كيف الغيم ورتبتَ القسمات دي ملامح جاية . . ودي ملامح راحلةْ تشتاقلك كل بيوت الغربة والناس الخليتا في كُربة ويممت تجاه الأزرق صليت في الغيمة وجيت واقع خشيت التُربة . . . خشيت مُشتاق غذيّت كيمياء الأشواق وخليتنا سريع وعشقك . . ما كنتَ اتصوّر إنّو يكون سرّاق يا داب اتاوق . . اتلفّ على حيلو وبهدلنا . . وفــات يا موتِّر جينات اللون يا مُدسي في رحم . . الغيب ومُتلفف بعباية الكون! والكون . . من بعدك ما راق يا نسخة مُصغرّة من والديك طبق الأصل وحاشاك يا مفيد . . ما كنتَ قليل الأصل! لا عاق وأخيراً يا زول يا رايع دمك عِرف الاسفلت صاحبو شديد قدامك يا زول يا راحل كمين سكة تودي عليك دي مواني قزاز ومطارات . . وسكة حديد آآآآخ يا مفيد لو كان تتأخر . . لو كان تستنى . . لو كانت ( لو ) بتفيد ولو كان بالإيد كان صالحتك . . كان ختيتك على ظُلّة ريد يا زِينة بلح البركل يا لون تُوشِيقة أركل ما كان في إمكانا الأفضل فاعذرنا . . آسفين قصّرنا . . وما في إيدنا غير الدعوات وغير نكتب ليك . . ونبيع أحزانك . . نقبض فاتورة حلمك . . ونقايض بسُكاتك . . كلمات لاكين وحياتك يا مفيد سفرك حرّك عتمة نورنا هدّ بلونه الأسود . . لون الفرح البنكي لو كان تتاكى، وتحكيلنا عن حلمك . . وعن طير الشارع عن طين اللون . . وعن شجر النبق الفارع مين جابك من آخر الدنيا لي آخر الدنيا وخلاك في بالنا مضارع وخلاص!!! هل كنتَ بتهوى الاسفلت؟ هل كان حلمك مقدود .. حصحاص؟ هل كان بينقّط . . رصّاص أو قطران؟ شكراً . . آسفين وريتنا العيب الفينا علّمتنا إنو الخوف . . مالينا وإنو الناس . . مقامات وريتنا وشوشنا في راحة إيدك علّمتنا إنو الدم . . بيريدك ولونو تحدي يا شاب يا راحل أحلفك إنو رحيلك . . ماسك عصب الذكرى وشادد وتر الزات رابطنا عليهو شديد فتّحنا عيونا عليك ولقيناك . . جهجهتَ الجِيهة البي هناك وموانيك يا زول يا راحل موقف باصات مين سمّاك في الآخرة شهيد؟ مين غنّاك في كل بيوت العزا زغرودة تصاحب . . أحلى نشيد؟ لي مين يا مفيد الدنيا تدوم ومين . . بالطوب الأحمر راح يبني الظِل لو ظلنا ميّل . . مات آآآآه يا مفيد . . سلّمت عليك في الغيب شمّيت في عيونك ريحة الموت ريحة الزلط . . وزيت العربات حبيّتك من جوّا ورسمتك . . في قماشة القلب المحروق شجرة سنط . . وزهرة ياسمين ملّيتك في بهو الروح . . أسماء الأربعة وعشرين وعبيت في كل دقايق اللحظة لون السنوات وفي آخر حيطة الشوق علقت أولادك فهرس ولقيتني عليك . . من نفسك أحرص يا طيّب . . يا الغضبك ما بيبين علّقتَ في صدر الروح . . بخرة وخرزات وحوّطتك بي ياسين زفيتك من أول غنوة . . لي آخر نفس الموال يا راحل . . ما بقول ليك في رحم الغيمة: ( تعالْ ) ولا بقول ليك اشمعنا اخترت الآخرة . . مع إنو عيونا عشانك . . فيها مجالْ! وكيف يا مُركب . . غافلت المرسى ويممت شِراعَك نحو الغيم مع إنو قلوبنا حبالْ ياخي .. تعالْ ياخي . . تعالْ ياخي . . تعالْ حين شُفت الطير واقف بينات البرزخ وبينات بوابة العودة شُفت عيونك . . لامعة وحسيت . . وكإنّك مُتبسِّم ولم شُفت عيونك دامعة وحسيتْ . . إنّك – سِرّاً – بتوصي الناس القاعدين "خلوكم عشرة على الوالدة . . وبوسولي الأطفالْ" صدقني إذا بالغتَ . . أنا ما بتكلّم ساي . . حسينا بأنّك ماشي وجاي !! أوعك تتأخر هل تعرف . . إنو عذاب الناس العايشين وأولادهم ماتوا أفظع . . وأكبر!! كيف تتخيّل أُمّك؟! أُمّك بالزات!! يا حتّة لحمة في قلب المسكينة كيف تتحوّل سكينة لفيت شريانا عليك ومشيت ويتمطّ الشريان . . ياخوفي يقوم يتقطّع!! آآآآخ يا مفيد لو كان تتأخر . . لو كان تستنى . . لو كانت ( لو ) بتفيد يا زينة بلح البركل يا لون تُوشِيقة أركل ما كان في إمكانا الأفضل فاعذرنا . . معليش قصّرنا . . وما في إيدنا غير الدعوات يا شاب يا راحل الناس تتشابا على عينيك يكفيك النوم . . على راحت إيدي شيلتني هم . . أبكيك يا ماشي . . وكل خيوط الإلفة معلّقة فيك من يوم فارقت غبار الحِلّة والحِلّة بقت زي كوخ يا شاب يا الدّمك . . طالع بُوخ راوني بدمك وراوي شوارع العاصمة يا بذرة فاكهة في الأرض الجوخ حلفتك بشبابك اطلع خوخ اطلع من بين أحضان الغيم دفقني . . واسقيني أديني من الصبر السلوان جُغمات بديلك من شجر الحُرقة بلح الفُرقة يا نسمة شارع الريد ونور الطُرقة يا واحش كل الناس وواحشني وما تخاف عصفورك . . علمني السر شربني الموية الناشفة كيمياء الغيم وبرغم الريح الكاشفة النخلة تطوّح وتموت . . واقفة وما بتسمع . . آهات حلفتك . . بحنينك للبلد النايم بينات الصحرا . . والنيل العايم حلفتك بأوراق التوت والفرع القايم لساك . . صايم؟ هل كنتَ بتحلم . . إنو تطير تتلّم على الوليدات وتلاقي حبيبتك . . لِسّاك ؟ جهجهتَ الجِيهة البي هناك حرّقت حشاها يا مفيد وأولادك بوراك يوماتي يساسقو عليك يسألو منك في عز الليل النجمات بستنوك من تاني تعود وبتمنوك آآآآخ يا مفيد لو كان تتأخر . . لو كان تستنى . . لو كانت ( لو ) بتفيد يا زينة بلح البركل يا لون تُوشِيقة أركل ما كان في إمكانا الأفضل فاعذرنا . . معليش قصّرنا . . وما في إيدنا غير الدعوات هشام آدم محمد 4 ديسمبر 2005م

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]