|
|
 [B]لا يا باز بيــه[/B]
|
" موية الله ما بتنبي لكن الفيك عرفناها " يعني معقول أنه موضوع دارفور وقيام حركات مسلحة وتدخلات أجنبية وأممية ولا هجين كله فوق موية . كل المسؤولين أكدوا أن أسباب التدخل والتهافت على دارفور هو استهداف ثرواتنا البترولية ، يا أخي أمريكا ذات نفسها ما قالت موية ، وبتخطط من الآن لربط خط أنابيب دارفور بغرب افريقيا إلى المحيط ومنه وإلى امريكا فركة كعب . تجي تقول لي دارفور عائمة على بحيرة من الماء . أنا أفتكر كلامك ده فتنة وبنسف اتفاق ابوجا من الأساس لأنه كيف اتفاوض مع جماعة يقاتلون من أجل موية .
طيب Suppose (سبوس) إنه ابيي عائمة على بحيرة من ماء دايت (Diet) هل كان يستحق الأمر كل خمة النفس هذه وبرتكول ومفوضية وتدخل امريكا ، والله كان ابو كسكته قاليكم ودوها ولاية إمري وخلي فرانسيس وعرمان وإداوارد لينو يشربوا ما يروا . بعدين أخ باز أسف د. باز كان تقول مثلاً بحيرة من الماء الثقيل وده البجنن بوبي وهاك يا وكالة الطاقة الذرية وتفتيش وسيارات الـ U.N واجتماعات مجلس الأمن ، كفاية ايران يجي السودان المتوضى يحصل على مكونات القنبلة الذرية .
بعيدن يا " باز " بالرغم من تقديرنا لعملك الاستشعاري عن بعد والمسح الطبوغرافي والامكانيات الرادارية فهذا يخالف أحلام الأب فليب عباس غبوش والذي أكد بأنو جدودو زاروه في المنام في منطقة البركل وطبعا ديل ناس وراهم سبعة آلاف سنة حضارة أخطروه " تعرف يا فيليب إنت تحفر طوالي تحت وتبقى غني وشايف الصحراء دي كلها بترول " .
فنصدق مين ولا مين يا باز كلام جدودنا زمان ومعهم رأي عالمي كاسح يؤكد بترولية دارفور أم كلام ناس (ناسا) الطلع فشنك ويكفي ما قاله المهندسون (المائيون والمايوين) السودانيون في الندوة وأن ما قمت به ليس باكتشاف وإنما أمر قديم وفي بحيرة أكبر من تلك التي ذكرتها . وبعدين يا باز لو انته بتعرف الميه في سابع أرض ، ليش ريف مصر كله عطشان وناس " البرلس " ليش يشربوا صرف صحي وصرف زراعي أين ناسا يا باز ؟
وبعدين يا باز انت تعرف تماماً أن قيمة حامل السلاح تعتمد على قوته " الزيتية " وليس المائية يعني وزير زيتي ووزير مائي ما واحد حتى ولو كان المائي وزير اتحادي فبعد تقريرك هذا قطعاً سوف يعيد الشريك الأكبر حساباته فبدل ادوهم كبير مساعدين يبقى ادوهم وزير دولة برئاسة الجمهورية – شن طعمه – ما مويه ساكت . وعندنا في المأثورات بقولو ليك (الامتحان جا مويه) والضيوف ديل ناس مويه ما ناس أكل .. أدوهم مويس بس ، وبعدين الزول إسهل مويه ساكت .. وهكذا .
ولذلك يا أخ باز توقيت الندوة ومكانها في هذه الظروف لم يكن سليماً والناس على وشك لملمة الموضوع . والله يخارجك من حاملي السلاح ورافضي أبوجا ، لأنه طوالي حا يقولوا بأن هذه الندوة مدفوعة القيمة (سوداني وخليك سوداني) والغرض منها التقليل من شأن حملة السلاح والمصرين معروفين بحركاتهم دي لأنو الميه أهم والله إيه يا باز (المهم أنا إلتلو ما سمعش كلامي أأولو إيه) .
|
|
 
|
|
|
|
مدني العرضي الحسين
فيس بوك
تويتر
انستقرام
يوتيوب
بنتيريست