شاهدت اعلام الهلال والمريخ متعانقة فى سماء ام درمان العندنا فى السودان ده ياناس الاعلام صحافة وتلفزيون ماهو هوس وكفاية صدعتونا بحكاية الهوس الكروى نحن من قمنا بندخل الكورة وقعدنا فى المدرجات الشعبية وفى المقصورة ومرات كمان دخلنا ملح بين الشوطين بعدما يمرقوا ناس كده ما بتحملوا الهزيمة والناس تكورك ليهم .. مرقوا .. مرقوا وفى ناس كمان ما بعجبا الا تقيف فى السلك .. عالم عجيبة وما اظن تلقاهم الا فى السودان وكنا كمان مع الجماعة البشاغلوا البوليس وبنكورك ليهم ملح .. ملح .. اقعد يابتاع الملح عشان طبعا هم بخشوا الكورة مجانا انا هلالابى مما فتحتا عيونى ديل وعرفتا حاجة اسمها كورة وهلال مريخ لكين اصحابى المريخاب كتار ويعلم الله ما بتكيف الا نخش الكورة سوا هلالاب ومريخاب نتغالط ونكاوى بعض للطيش وما بنوفر اى مجهود عشان نغيظ الطرف الاخر وكت ما نلقى الفرصة لكننا بنخش الكورة سوا وبنطلع سوا وكمان بنقع سوا فى صايد المريخ ولا فى صايد الهلال .. الساهلة بس وبنشجع ونعمل السبعة وذمتا وما فى زول بقول ليك بغم يازول عينك فى راسك امشى شتت شوف ليك رشاشات ااقعد معاهم ولا صهاينة لكن ممكن تحصل اجتكاكات بسيطة يعلم الله ما بتفوت حد الدعابة والنكتة ومرات كتيرة بنقعد فى صايد الموردة خلف المرمى الجنوبى عشان نسمع ناس محمد حامد الجزولى بغنوا للهلب ونستمتع مع الاغنيات البالفوها القارقير ويشهد الله مرة شفتا حامد بريمة زاتو مركلس بهناك وبيضحك مع اغانى المورداب الشيقة الليل اليل ياجمال الليل احمد سالم وعبد السلام عصمت والنور ثبت الكلام الليل الليل ياجمال الليل وللاغنية حكاية وهى تروى عن فترات زمنية بعيدة ايام الهلال سجل الثلاثى الموردابى احمد سالم وعبد السلام وربطوها بفترة زمنية اخرى فى الثمانينات عندما اراد الهلال تسجيل عصمت الامتداد والنور وكانا من ابرز لاعبى الموردة فى ذلك الوقت حكاية الكورة فى السودان والوسط الرياضى حكاية طويلة ووسط ليهو اعرافو وتقاليدو وناس بتخش الكورة بمزاج عشان يقضوا وكت ويشجعوا فريقم البحبوه لكن بدون تعصب ولا بونية ولا شلوت مهما كان الغلب حااااار امس بليل تابعت تقرير ضمن برنامج مساء جديد عبر قناتنا المحبوبة النيل الازرق وجرى الحديث خلاله عن الهوس الكروى تخيلوا فى التقرير شاهدت اعلام الهلال والمريخ متعانقة فى سما ام درمان وربى ما شفت لون ازرق الا ومعاهو احمر نجمة وهلال نجمة وهلال وفى التقرير بتاع الهوس المزعوم قالوا واحد هلالابى جاب توب لى مرتو وقال ليها اه رايك شنو فى التوب ده قامت قالت ليهو .. سمح زى العجب .. اها زولنا الرشاشة قام طلقا امساك بمعروف او تسريح باحسان وكل زول يمشى يشوف عجبوا وين هسى ياجماعة منو الماعندو فى البيت صهيونى كده ولا رشاشة عامل ليهو ابو الدنان وحاميهو العشا حق بعد الكورة ياخ حتى الناس الما عندهم التشكيلة دى الحكاية بتبقى مسيخة وبايخة معقولة يعنى البيت كلو يابى العشا والفول يبور ولا كمان الناس كلها تجى اخر الليل بى نفس مفتوحة كايسة العشا بع ما الحاجة قفلت البيبان وطفت النور ولملمت العدة لازم زول يضرب الفول بزيت السمسم والتانى يهضرب بقون فلان الحماهو النوم وبيتو القوا قالوا برضوا فى واحد كده وده اظنو مريخابى بعد الكورة جا خاشى البيت المرة هلالابية ختتا ليهو فى حنانو قبال ما يغير هدمتو وقالت ليهو بشماتة ووي وووي غلبناكم فقام صاحبنا فرد صاحبنا بدون تاخير وووي ووويى طلقناكم يابتاعين الهوس اقول ليكم حاجة .. ياخ قوموا لفوا كده بتاعت ود البشر ى الروكة حقتنا نفسا قايم واى حاجة .. لكنها حلا وحمااااااار ما الحمار حق المريخ .. حق البطيخ يتبع ياطلوح هلاريخ وكده
11-19-2008, 11:52 PM
ابراهيم محمد موسي ابراهيم محمد موسي
تاريخ التسجيل: 10-25-2008
مجموع المشاركات: 1089
لكين ياابو خليل لقيتك .. كده .. اصلى جبتها لى فى التلت بما انك لاعب كرة طايرة صاقعة ااى وارغو والهلال حارقوا الزول البغنى ده ياهو حبيبنا الجنيد من اشهر مشجعى المريخ من زمن بعيد يعنى مش من الصهاينة الجدد شفتا الجنيد ده بى طبلتو دى كان يوماتى قاعد معانا فى المسطبة حقتنا قدام البيت وفى جيبو كيس السعوط يناكفنا ونناكفوا وبعد داك نقوم سوا نضرب البوش والادجة رفرفرين ولا تلاتة ومش الجنيد براهو مسطبتنا ياخوى انا بهلاليتى دى كانت زى لون الطيف .. اخوى صلاح مريخابى صاقعة وهو الوحيد فى البيت احماااار لكنو بعشرة ياخى ده من النوع البرجى عالم الرياضضضضضضضة يوماتى المهم ياابو خليل فى مسبطتنا الفاتحا على شارع الزلط دى كانت لامة اولاد الحلة حمر وزرق ناس صديق حمدتو وامير الجمرى ومجدى بركية وعوض عمر وبكرى الخليفة والهلالاب القاطعين ناس مرتضى الجمرى وعبد الغفار وكمال وبدرالدين وود عبودوالفاضل ومجذوب حميدة واخرين قدلايسع المجال لذكرهم والتشكلية دى يمكن تضيف عليها من برة ناس محمد همزة الكوارتى ونادر ابراهيم مالك وابراهومة ومانديلا ومنصور عبد الرحيم ومحمود صالح ومالك جعفر وعبد المجيد عبد الرازق وياسر عايس وناس نهضة المريخ اجمالا واخرين لهم العتبى قد لاتسعفنى الذاكرة كلنا كده بى ربطة المعلم كنا بنقعد سوا نتغالط ونتناقش ونتعارك بالكلام مرات لما الواحد يتزنق يرجع التاريخ ولما عايز يبقى لايوووق يقوم يتكلم عما سيكون حاجة كده زى الجدل البيزنطى وحياتك ياابرة ديل كلهم مافى زول فيهم يوم حرد القعاد مع الناس عشان الهلال ولا المريخ نقعد نقوم على كيفنا هلاريخيون بلا حدود الكورة ما بتبقى لينا سبب عشانا نتخاصم ولو عملناها بنبقى زى ماقال ابراهيم حسين يخاصم يوم ويرجع يوم
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عامر تيتاوى
ابراهيم محمد موسي
فيس بوك
تويتر
انستقرام
يوتيوب
بنتيريست