|
|
 حكاية البت الصارت وردة ( مرة اخري )
|
من ضحايا الهكر هذا النص
ولأنه من النصوص العزيزة اعيد كتابته مرة أخري
إنتو سمعتوا حكاية البت الصارت وردة
كان في مرة من المرات
وكنت بغط في نومة عميقة
وجوة النومة حلمته
بأني بغط في نومة عميقة
وجوة النومة أنا كت حلمان
جات ( نادوس )
ووقفت جنب الشجرة
وكانت شجرة غريبة شوية
أول حاجه هي كانت نخلة
وفجأة إتقلبت شجرة حنة
وكان زارعنها جوة النومة الأولى
وضلها رامي لغاية النومة التانية
وكان في الأولى بتثمر ( ويكة )
وجوة النومة التانية تشيل قندول ( الدلكة )
.... حاجه ....
نرجع تاني بداية القصة
جات ( نادوس )
ووقفت جنب الشجرة
الكانت نخلة وفجأة إتقلبت
شجرة حنة
ولمن عرفت إني مبحلق فيها
قامت هي براها إتقلبت ( وردة )
وكان الدنيا ضلام
وكان الصيف يادوب في بدايتو
ومافي غمام
وكان الموية بعيدة شوية
وخفت البت الوردة
تموت عطشانة
وإتخرته وصرته سحابة
ولامن جيت بي قصادا
نزلته مطر
تقوم يا زول البت ماتصدق و (شربتني )
وجوة الوردة
لقيتلك نوسة فرحته
( أجمل حاجة تلاقي حبيبتك جوة الوردة )
إتونسنا قرينا شعر
وبرضو حكيتلها عن
البت الصارت وردة
وفجأة صحيتلك من النوم
وقلنا نكمل باقي الونسة
جوة النومة الأولى
وتاني صحيتلك من النوم
وكانت أبيخ صحية تلاقيني
وإتمنيت لو أرجع أنوملك تاني
وجوة النومة أنوملك تاني
وجوة النومة أنوملك تاني
وجوة النومة أنوملك تاني
وأسكت أنوم
وأيي إتنين في الدنيا بحبوا بعض
تقوم يا زول البت طوالي
تفرهد وردة
ويللا الود يتبخر ويبقي سحابة
وينزل مطرة
ولامن يلقي حبيبتو
يقوم يحكيلا حكاية البت الصارت ( وردة )
|
|
 
|
|
|
|
|
| |
rosemen osman
حاتم شناب
فيس بوك
تويتر
انستقرام
يوتيوب
بنتيريست