|
|
 رسايل شوق بالموبايل
|
توقفت المراسلات بيننا ( شقيقي) وهو في بلاد الغربه
فأرسل كاتباً عبر رسائل الموبايل
بالله لو مُمكن حَرف .
أو نُقطه . . أو هَمزة ألف .
أوشده نون . . مجزومه حتماً بالحذف.
أوشوله وأفتح قوس كبير
أملاه بي حرف العَطِف.
الفتحه ما محريه فيك . . الضمه بتجيب الولف.
الكَسره جر للشوقو ممنوع من صرف.
بالله رن . . الحال بدن رن بنكشف.
وكتبت:
ما بنكشف . .
شان الحروف مسروفه بي شوقك سَرِف
ورجاي أن تسمح ظروفل أصوغا ليك حرفاً حرف
لو بالألف . .
آلفتو شوقك . . والله ما أحلي الولف
بالباء . .
بريد سيرتك نضار جوّايا زي زرع الجرف.
بالتاء . .
تعال لو مره شوف شوقاً نحل أوصالي بس ناتف نتِف.
ونواصل
|
|
 
|
|
|
|
|
|
|
|
Re: رسايل شوق بالموبايل (Re: عمار الهادي)
|
كتب قائلاً:
لمّ تجتاحني العواطف . .
ؤألقى نيل أشواقي جارف . .
والحنين جوايه عاصف . .
ببقي خايف . .
مصطلكم مريوق وطايف . .
أمشي شقيش ماني عارف ؟
فارد أحضاني وبغني . .
(مافي حتي رساله واحده . . بيها أطمّن شويه)
وكتبت:
لمّ تجتاحك عواطف . .
أبقى متأكد وعارف . .
إنو جرح الفرقه نازف . .
إنو شوق الشوفه جارف . .
وإني أنساك ما بصادف . .
أصلو شوقك فيني خالف . .
ولمّ يتأخر بريدي ..أبقي عارف . .
ببقى خجلان وأبقي آسف . .
ونواصل
| |
|
|
|
|
|
|
|
|
|
Re: رسايل شوق بالموبايل (Re: عمار الهادي)
|
قال
بالله يا هدهد سبأ
بي سرعه طير أحكي النبأ
طير وعدي السكه لهفه
واحضن النيلين برأفه
وأروي شوقك ضفه ضفه
وأهدي للحبان سلام
أنزل هناك وأقدل فرح
قول ليهم الحال إنصلح
وريهم التلفون فتح
قلت
بالله يا الطير الخداري
ودع جناك مشواري طارئ
مرسال مهم لي زول هناك راجيك وحاري
يمم شرق مرات كمان ميل شمالي
واوضل بلد بنياو عالي
تلقاو هنك لالوبو بين إيديهو جاري
اغري السلام وريهو كيف الشوق حفر في الجوف مجاري
قول ليهو عيدنا هو يوم لقاك ماتنسي بس خليك طاري
| |
|
|
|
|
|
|
|
|
|
Re: رسايل شوق بالموبايل (Re: عمار الهادي)
|
كتبت:
شُفت الليل وكِت عَتمه . .
لمّ تلالي فوقو نجوم .
شُفت النيل عِصير يتهادي شاقي الصحرا . .
وجوقة طير ماشه وجايه فوقو تحوم .
دا زي رنة رساله تجيني من تالاك . .
مستعجل عليها أقوم.
و رد قائلاً:
إنت كمان . .
حصل في يوم مرقت عَصير . .
وشُفت النيل يداعب في جني الوزين.
سمعت حصل أنين الساقيه لمّ تنوح . .
تهز أنّة حشا العاشقين.
سمعت وشفت حالة وجد في درويش . .
يشيل الليل ويتولّه هَسِيس ورطِين.
دا كان حالي . . وكت رنة بريدك جات
رسالة أصدق الرانين.
ونواصل
| |
|
|
|
|
|
|
|
|
|
Re: رسايل شوق بالموبايل (Re: عمار الهادي)
|
رسايلكم بالجد جميله ورقيقه جداً ..... أشياء لا تشتري ذكريات الطفولة بينك وبين أخيك.... شكرا علي ردك الرقيق وانا اواصل في القراءة ... علي انني أحسست في رسالتك الاخيرة احساس اقل ... علي الرغم من ان رده عميق ... هاهاهاها
| |
|
|
|
|
|
|
|
|
|
Re: رسايل شوق بالموبايل (Re: عمار الهادي)
|
بتونسك لمن أكون في الليل براي
أستحضرك لمن أهم ويزيد أساي
(لمحة برق) بلقاك معاي
عقبان أروق أنجم واتلبب صفاي
أتوسدك أرخي الرسن بارد حشاي
ألقي الحنين . . أتمغي زين
أشبع يقين . . أسند قفاي
ونواصل آيدكم معانا
| |
|
|
|
|
|
|
|
|
|
Re: رسايل شوق بالموبايل (Re: عمار الهادي)
|
طِريتك . .
ما طِريتك . .
إنت في كل التفاصيل الدقيقه ديمه حاضر ما بتغيب.
إلا مرات بكتر الشوق العلي
ببقي شايفك في الحقيقه ما خيال بحضر ويغيب
ببقي داير الليل يجي . .
ويبقي نص الليل ملاذ
في خشم بابنا بنصنقر . .
وفوق سفنجاتنا بنكوع . .
في إمور الدنيا نحكي بالكتير.
ولي مفاهيما بنفلسف بي امانه وبي ضمير. . . .
غايتو أعرف حاجه واحده إني مفتقدك كتير
| |
|
|
|
|
|
|
|
|
|
Re: رسايل شوق بالموبايل (Re: عمار الهادي)
|
يا علي الهادي ..
يا علي .. يا صاحبي .
شوقي و شوق عمار ليك كمثل هذين ( و أشار ) .
ثم سيرتك ياخي خضرا ..
يا علي الذي في اليمن .
شايف كيف شخنا و بقينا بس ناس شوق ساكت !!
عليه نتوكل و عليه ننقرش كل يوم بواقي ذكريات و ناس و أمكنة و روايح .
سلام يا عمار عليك ..
و على علي الهادي السلام .
| |
|
|
|
|
|
|
|
|
|
Re: رسايل شوق بالموبايل (Re: Emad Abdulla)
|
علي طريقتك
عماد يا صاحبي
نشتاقه وهو يقول
تخيّل زول مشربك في حبال الغربه تب مكتوف
موكّر في ( بِوِيت ) قحلان وفاقد فيهو إسم ولوف
وزاد مصرانو هايج من لهيب الجوف
وشقيش وين ينوخن إبلو ما معروف
تخيّل كيف يكون لو جاتو من تالا البعزو حروف
| |
|
|
|
|
|
|
| |
مدثر محمد عمر
Emad Abdulla
فيس بوك
تويتر
انستقرام
يوتيوب
بنتيريست