|
|
 عندما إتهكرت يا موقع .. كركرت* رشيدة
|
رايتها في التبروقة* جالسة
واياديها مرفوعة ومفتوحة كدفتي كتاب
منخرطة في دعاء عميق
سمعتها تبتهل :
{ يارب انصر بكري ابوبكر وعجل بعودة الموقع
حتى ارتاح من بركوتا ويتلهي عني }
كانت تلك لحظة فارقة
أو يمكنك إعتبارها رشة ماء بارد
كتلك التي تطير الفي راسك
وتفوقك
دعائها ، وابتهالها العميق صحاني
ف واضح انا أرهقتها جدآ بنزقي وضيقي
طيلة ايام الإنقطاع
سألتها : في شنو؟
مالك ؟
وبالجد انا ماكنت عارف بالضبط كده عملت أو هببت شنو
ما جاوبت
لكن واصلت ادعيتها:
{ بركة سيدي ومولاي سودانيز يرجع ونرتاح منك }
نرتاح منك ؟
لي شنو وسويت ليك شنو ؟
ياخ كرهتنا البيت
كنت مرتاحة اديره بمزاجي وأعمل الفي مزاجي
لغاية ماشفتك اليومين ديل متحكر معانا ومكرهنا
أفتح مسلسل { لامكان لاوطن }
تغيره إلى الجزيرة ومرات العربية
تتابع أخبار مكرورة
امشي للخاسر الأكبر
البستفيد منو في برنامج الرياضة
تجي تغير عشان برشتونة*
اتونس مع صاحبتي* في التلفون
ترخي أضانك تتسمع
وكمان بدون خجلة ، تعلق
وكمان بقيت تعمل الحاجات البعملا انا
تتصل بالتومات ودينا
واليوم* شايفاك متصل بي ساندرا تبارك ليها يوم ميلادها
وبدون ماتنسق معاي ، يعني نظام عايز تحرجني معاها
من متين يا حسين ؟
في شنو ؟ سألتني
مافي حاجة ، بس لقيت عندي وقت فقلت اساعدك في مهامك شوية
لا ، شكرآ ،، ماعايزة أي مساعدة منك
خليك في دائرة إهتمامك وخليني لإهتماماتي
انا بجيي أقعد معاك اليوم كلو في النت ؟
ماهو سودانيز اونلاين هكرو وماممكن ندخل
كر*
قالتها بأسف حقيقي
وحزن ما بيغباني
وقالت: اتارييييك!
ده كلو ماكنتو عارفو
كنت قاعد في نفس الولية
لولا ان سمعتها بتنده وتدعي
لما عرفت
ولتحطم راسي بطلقة داوية
او إنخلعت بخلع
------------------------
*
- كركرت : اي قالت كر { مشروحة فيما بعد }
- التبروقة : وبرضو ممكن تقولو التبروكة
وهي مصلاية السعف البتشبه البرش
- برشتونة : هكذا تسمي نادي برشلونة ، إزدراءآ به وكراهة في الكورة
- صاحبتي : اها دي مصيبة أخرى قد أحكي عنها ذات يوم
- اليوم : 18 أكتوبر يوم ميلاد ساندرا
- كر : بضم الكاف وكلكم سمعتوها من امهاتكم { رضي الله عنهن وارضاهن }
وهي بالإضافة لإستخدامها المعروف تستخدمها مرات للتشفي
و نواصل
|
|
 
|
|
|
|
|
|
|
|
Re: عندما إتهكرت يا موقع .. كركرت* رشيدة (Re: أبو ساندرا)
|
إسترجعت الحاصل
فعلآ ، لقيت نفسي كترتها
ومتداخل في تفاصيل البيت والحياة اليومية
التي لم اكن اعيرها كثير إهتمام
مما اعطى { العدو الكامن } الفرصة
للسيطرة على مقاليد السلطة
ومفاتيح الحركة في البيت
في ربقة إنشغالي بالعام وبالتواصل عبر الإنترنت
والتداخل في المواقع الإسفيرية
تخليت عن مهام رئيسية في البيت
ولأن الطبيعة لاتعرف فراغآ
تدخل { قوى الشر } لتملاء الفراغ الكائن
ورويدآ رويدآ دانت الأمور لها
| |
|
|
|
|
|
|
|
|
|
Re: عندما إتهكرت يا موقع .. كركرت* رشيدة (Re: mahitab barakat)
|
ماهي يا حبيبة المساحات الجميلة وصعبة
مشتاقين
شفتي؟؟
عمل ما عارف
لكن عليك الله قرطي على برنامج حماية الشهود
قولي لي رشيدة القصة دي في صالح مشروع الحبس الإنفرادي
والله المشروع أياه معطل من أيام محسن خالد واليومين ديل أنا في كسلا
حيث قصص الحب الأسطورية
خلينا ناكل عيش
نستنطق الشهود
وأباري ليك قعدات القهوة والودع
وفي مقولة أخرى الزار
المهم أعرف ليك كيف من هنا تشرق الشمس
| |
|
|
|
|
|
|
|
|
|
Re: عندما إتهكرت يا موقع .. كركرت* رشيدة (Re: أبو ساندرا)
|
Quote: رشود دي أنا ما كلمتها بالنوعين
وبالنوع الذي تنتمي إليه؟؟
لكن كلام القصير |
النوع الذي تنتمي اليه رشيدة
عارف
لكن ماتنسي نحن
أي أنت وانا
بيناتنا
ملح وملاح
وبناتنا
فماتجيبي لأخوك الهوا
من قرونو
بالمناسبة أول أمس جبت سيرتك في سودانيات
في الكرسي الساخن مع شوقي بدري
بتتذكري نقاشنا عن حكايات الحب في البلاد الشاهقة
بس ده كان جيبة سيرتك هناك
| |
|
|
|
|
|
|
|
|
|
Re: عندما إتهكرت يا موقع .. كركرت* رشيدة (Re: أبو ساندرا)
|
تعرف يا بركوتة
وحات الملح والملاح
والتومات وماهي الما بحلف بيها بالكضب
أنا قلت لي رشود الرجال نوعين نوع بيطلقو ونوع بيكتلو وبركات من النوع الثاني
لكن أتعارض لينا الملح والملاح والبنات الملاح
لكن أقول ليك حاجة
أنا موافقة على موضوع الحب في المدن الشاهقة
بس رشيدة تتولى برنامج حماية الشهود
لو وافقت نجي نقعد فرد إسبوع نكتب البحث كلو
وأنا امرق منها وإنت تدخل المحبس الإرنفرادي الإرادي
والتسويق نشوف محسن خالد
وبالعدم بسوقوا ليك براي إنشاالله جنب الجامع الكبير
وأنا ورشود ما عندنا مشكلة و ماهيتاب ذاتها معانا بنربي البنات ولما يبقوا للعرس
بنمرقك تمومة جرتق
لو موافق أرسل ليك الفصل الأول
بس أنقرع وأبعد عن رشيدة وخليها تدير مملكتها براها ولو إحتاجت مساعدة
أولاد بسم الله بيساعدوها بس إنت ابعد
| |
|
|
|
|
|
|
|
|
|
Re: عندما إتهكرت يا موقع .. كركرت* رشيدة (Re: شادية عبد المنعم)
|
Quote: بس أنقرع وأبعد عن رشيدة وخليها تدير مملكتها براها ولو إحتاجت مساعدة
أولاد بسم الله بيساعدوها بس إنت ابعد |
شادية بت امى
اولاد بسم الله ديل ياتن ؟
اجى يا يمة
كر وتانى كر
بركات
اولن شى البنية كل سنه وهى طيبة
وتعيش كدى يا يمة وتشوف وليدات وليداتا
لكن
نجم الدين صاحبنا الله يرد عافيتو
بقول النسوان زى ترمسة الشاى
واحدات بتعصرن
وواحدات بتلف راسن
لكين يارشيدة خسمتك ما تبقى واحدة فى ديل
خليك ماسكة الدفة قوى
وما تبقى (خيبة ) زى حالاتنا
نعمنى كان زيك وحات الله اخلى ليك ترامس مش ترمسة واحدة
واعصر والف
اعصريهو
لكن عصرة حنينة زى حقت امهاتنا
لانه حنين
ربنا يخليكم لبعض دايما
متحابين ومتحانين
وربنا يديم المحنة
| |
|
|
|
|
|
|
|
|
|
Re: عندما إتهكرت يا موقع .. كركرت* رشيدة (Re: سلمى الشيخ سلامة)
|
مراحب يا سلمى الشيخ
يا زولة إنتي ما بتعرفي بركوتا لمن يكون فايق وعديم شغلة
بعدين رشيدة دي سيدة منظمة ودقيقة ورقيقة وحكيمة
وأقول ليك حاجة مستحملة صاحبنا ده
وحكمة الله كل ما أجي أودرو
تحجزني وتبقى الأجاويد
غايتو بختو في شيخوخته الفريدة حتشرف عليهو رشيدة
أها يا بركات قلت شنو ؟؟
ابتدي الكتابة ؟؟
أوع تفوت الفرصة اليومين ديل أنا في كسلا حيث الحكايات حية
بس متمسكة بشروطي كاملة خاصة برنامج حماية الشهود
| |
|
|
|
|
|
|
|
|
|
Re: عندما إتهكرت يا موقع .. كركرت* رشيدة (Re: سلمى الشيخ سلامة)
|
كتبت سلمى الشيخ سلامة:
Quote: بركات
اولن شى البنية كل سنه وهى طيبة
وتعيش كدى يا يمة وتشوف وليدات وليداتا
لكن
نجم الدين صاحبنا الله يرد عافيتو
بقول النسوان زى ترمسة الشاى
واحدات بتعصرن
وواحدات بتلف راسن
لكين يارشيدة خسمتك ما تبقى واحدة فى ديل
خليك ماسكة الدفة قوى
وما تبقى (خيبة ) زى حالاتنا
نعمنى كان زيك وحات الله اخلى ليك ترامس مش ترمسة واحدة
واعصر والف
اعصريهو
لكن عصرة حنينة زى حقت امهاتنا
لانه حنين
ربنا يخليكم لبعض دايما
متحابين ومتحانين
وربنا يديم المحنة |
يا سمرة يا واضحة
طالعت ساندرا تهنئتك لها وأمنياتك الطيبة
وكلفتني ان انقل لك حبها وإحترامها وإعتزازها
وبدوري أتمنى لك ولغاليتنا عزة كل الخير
ونشارك في فرحكن الإتنين في يوم واحد
وحلاتك وانت في ثوب الزفاف الأبيض كيتآ كده على اسيا ربيع
وكل الأمنيات الطيبة لصاحبك نصرالدين ودعوات بعاجل الشفاء
بس رشيدتنا لا بتتعصر لا راسها بيلف
مش المثل بيقول كل راجل بيعرف لي مرتو ؟
اها رشودتنا دي مدخلها المحبة او الإقتناع
يعني ندخل ليها من ناحية راسها عشان نقنعها ولو فشلنا
ندخل ليها من محنتها
فياها دي المحنة التي تمنيتي لنا دوامها ، آآمييين
اما بشأن عصرها لنا
فالله لا وراك
الزولة دي لا بتهيج ولا بترفع صوتها ولا بتغلط
أكثر حاجة ممكن تعملها بتعمل ماشايفاك ذاتو وبس
ودي يا سلمى { سعبة } خلاص
قصة ان يفتحو ليك ويتجاهلو وجودك ذاتو دي بتجنن
| |
|
|
|
|
|
|
|
|
|
Re: عندما إتهكرت يا موقع .. كركرت* رشيدة (Re: شادية عبد المنعم)
|
أهلا يا شدو
كتبتي :
Quote: أنا قلت لي رشود الرجال نوعين
نوع بيطلقو ونوع بيكتلو
وبركات من النوع الثاني |
أظنها سمعت نصيحتك وهسع داخلة معاي
في برنامج قتل بطييء
فالست رشود طاهية من الطراز الأول
ويدها طاعمة شديد
وعندها نفس في الأكل مبالغة
وتجيد كافة انواع الأطعمة بلدي وأفرنجي ومشاوي
ومتخصصة في صينية السمك بالقمردين
و
ثم تكرش صاحبنا حتى عاد بلا رقبة
ورويدآ رويدآ تراكم الكليسترول في الشرايين والأوردة
وصار جاهز لذبحة قلبية
هو الكتل ده إلا بالرصاص والصبغة والزرنيخ والمطوة
لله جنود من طعام شهي
| |
|
|
|
|
|
|
|
|
|
Re: عندما إتهكرت يا موقع .. كركرت* رشيدة (Re: أبو ساندرا)
|
قطع لسانك
والله لو ما حب رشيدة ليك وحمايتها ليك
كنت بقيت كفتة (بضم الكاف) في أيدي المغرضين
من أمثالنا
بس إنت ما تبقى بطيني وتباري مطايب رشود
بالمناسبة عشان نكون عادلين
شنو السوتو ليك رشيدة ما طيب؟؟
حتى شرها لو بقى عندها شر
زي ما قالت بنية مامون
ببقى خيرك
بس أنت قلل من البلع وكل شئ تمام
وأريتني بي موتك
دي إسمها الموت حباً
ياخ سلم لي على ماهيتاب
| |
|
|
|
|
|
|
|
|
|
Re: عندما إتهكرت يا موقع .. كركرت* رشيدة (Re: أبو ساندرا)
|
Quote: سمعتها تبتهل :
{ يارب انصر بكري ابوبكر وعجل بعودة الموقع
حتى ارتاح من بركوتا ويتلهي عني } |
يحمد لرشيدة هذا الموقف المبدئي الواضح
عندنا يتم التعامل مع تعاطينا المنبري حسب ظروف ومزاج السيدة المبجلة ( بعلتنا ) ،
- فهى تدعو مثل دعاء رشيدة هذا وتتخير أوقات الإستجابة عندما تعتقد أن ( مشاركتي لها ) في بعض المهام المنزلية تعطيلاً لها وإضاعة لوقتها الثمين . ليس هذا فحسب بل تساعد الدعوات بـ ( جكة ) ، فهى تعرف الكتاب والكاتبات الذين أحب كتاباتهم وتعرف أنواع المواضيع التي تستهويني ، لذلك تراها تذهب للموقع وتتصفح وتأتيني متظاهرة بالفرح - طبعاً بغرض توزيعي -
" ألحق والله صاحبك / صاحبتك ....... عامل/ة بوست رهيب "
- لكنها وحين يقتضي المقام تواجدي معها - غالباً لغرض التسوق - لا ترحم الموقع
" ياخي بدل الكلام الفارغ والمشاكل الإنت مضيع وقتك فيهم خلينا نمشي نشوف حاجاتنا الضرورية "
صارحتها يوماً بأن موقفها المزدوج هذا يمثل قمة الإنتهازية فتجلت عبقرية الدفاع الغريزي عن المواقف في ردها السريع وكانها كانت متوقعة هذا التعليق
" لكنها إنتهازية حميدة "
بركوته
كل سنة وساندرا بألف خير
| |
|
|
|
|
|
|
|
|
|
Re: عندما إتهكرت يا موقع .. كركرت* رشيدة (Re: عاطف عمر)
|
أهلآ بالعزيز عاطف عمر
وشكرآ جزيلآ على التهنئة الرقيقة التي أسعدت كريمتنا ساندرا
وكلفتنا بأن ننقل لك تحياتها واعتزازها
عارف بوصفك الدقيق عن الفاضلة { بعلتكم }
ظننت اننا { انت و انا } متزوجين نفس الزولة
او زوجتينا شقيقات بل تؤام
فنفس الطريقة عندنا هنا
وبتتم بحرفنة عالية
بس على مين يا عاطف؟
فبذات الحرفنة أغرقناها في تفاصيل الموقع
فصارت متابعة للمعارك الإسفيرية وللشمارت
وغالبآ بتتخذ وضعية القاضي فتبريء هذا وتدين ذاك
وتفسر لصالح من تمتمزج كتاباته
او ينجح في ان يحنن قلبها ، العلى الهبشة
لكن وقعت في شر اعمالي
فكم يوم لقيتها مامدياني وش
ولا ريق حلو
بس كلمة وغطايتها ، وبإقتضاب
وقدرت ما حاولت أعرف سببها ، ماعرفت
فتذرعت بالصبر إلى حين إفصاح
وربك الكريم ما جعلني إنتظر طويلآ
فإذا بها تفاجئني بالسؤال:
- أسمع ،
{ تعرف ياعاطف ، الطريقة دي بالنغمة تلك الفيها تشديد على السين
بتخلي أخوك يقرب يشخ على نفسو }
قالت : أسسمع { لاحظ تشديد السين يا عاطف }
أنت البت الظريفة الحكيت لي عنها ديك ، ايه اخبارها ؟
قلت : البت ياتا { ولا اكتمك قلبي بقى زي النقارة }
قالت: ياخ البت ديك الوريتني صورتها
قلت : ما انا طوالي بوريك صور ن بنات ورجال
{ فعلآ بعرض عليها صور اصحابي مثلك لكن لزوم التغطية وبتاع }
قالت : البت الممشطة ام ضفاير ديك { قربت يغمى علي }
متبالدآ ومتغابيآ : مابتذكر ، غمغمت
قالت : مابتتذكااار { كده يا عاطف ، نظام : يا مستهبل }
غايتو جرس الباب رن
فتخارجت
حامدآ ربي وداخل في سلام حار مع الزائر
وطبعآ كان مندهش فتلك لم تكن طريقتي معه
وطبعآ برضو هو ماعارف السبب
نواصل
الآن وقت الصلاة
| |
|
|
|
|
|
|
|
|
|
Re: عندما إتهكرت يا موقع .. كركرت* رشيدة (Re: أبو ساندرا)
|
المهم يا عاطف
إكتشفت أن صاحبتنا بتودعنا الصباح وطوالي على الكمبيوتر
وسودانيزاونلاين
بتفلفل ليك الموقع ده بوست بوست
وبتركز على البوستات اللي بالأحمر
عشان بتكون متوقعة تلقى لي مداخلة
خاصة لو كانت مهببة
وعرفتها فتحت بوست القهقهة داك
وجات لوت لي بوزها
أحست حاجة تدخل الموقع بإسم حركي ما تكشفو ليها
وتهرجل زي ماعايز
وتاخد راحتك على الآخر
| |
|
|
|
|
|
|
| |
أبو ساندرا
mahitab barakat
سلمى الشيخ سلامة
عاطف عمر
waleed dawash
منتصر الامين
ابراهيم عدلان
فيس بوك
تويتر
انستقرام
يوتيوب
بنتيريست