|
|
 مشاهد و إشكالات يومية
|
سأحاول أن اكتب مشاهدات يومية و احكي لكم حكاوي عن أشياء حاصلة هنا في السودان و سأحاول أيضا أن ابتعد عن السياسة قدر الاستطاعة, سأحاول, مشاهدات يومية عن حال البلد عامة و عن مدينة ود مدنى خاصة التي بها ولدت,, و التي هجرتها سنينا عديدة و اعادتنى إليها الأقدار, مدنى التي بها اعمل الآن و عن حنتوب التي بها اسكن, كل يوم مشهد جديد... نبدأ بمشهد الخريف و قولوا يا لطيف
|
|
 
|
|
|
|
|
|
|
 الخريف و قول يا لطيف (Re: اسامة الخاتم)
|
مشاهدات خريفية من مدينة زراعية
( أو هكذا كان من المفترض أن تكون)
ود- مدنى الرائعة.. و من قلب مدنى السوق الكبير اكتب لكم, أرى امامى حافلة متهالكة تحاول أن تجد لها موقف عشوائي ( طبعا الموقف الاصلى هو أيضا عشوائي) مكتوب على جنبها – مدنى شلعوها-- فاضل يتم الناقصة و يكتب الكيزان.. ما علينا
أول البارحة نزلت مطرة مصحوبة برعود أو في الحقيقة كانت تلك هي ونسه السوق في اليوم التالي إنها رعدة و صاقعة واحدة نزلت على أجزاء رحمة من رب العباد بعبيده
تلك الرعدة جهجهت الكبار قبل الصغار.
مدنى طين و دا ما نبز يا جماعة إنا اقصد انو واطاتها طينية و هاك يا زليق.
الساعة 6 مساء و إما بتاع الخدار و الطعمية – قدام مطاعم حسن جاد الله انزلق امامى شاب محترم يلبس جلابية كانت نضيفة—بتاع الخدار
و سيد الفرن و أنا على استحياء ضحكنا... مدنى لزيزة يا جماعة
| |
|
|
|
|
|
|
|
|
|
Re: الخريف و قول يا لطيف (Re: اسامة الخاتم)
|
بمناسبة الخريف
دى آخر ايامه هنا و القصة نشاف شديد مع انو ايام العيد نزلت مطرة صلحت الجو شوية
واحد ظريف علق و قال: ياخى دى سخانة عجيبة, تعرف لو رمضان كان لسه شغال ما اظن فى زول كان صام.
عموما الجو فعلا مسخن و الشمس زى القربت مننا و اوشكت تلامس الجباه
مش مرة وردى غنى و قال:
الشمس فى السماء كالشراع... تعانق ( وخلى لى بالك من تعانق دى) الحقول و المراع
(و الخطير هنا ) و اوجه العمال و الزراع................ يا عينى
اها انا شايف انو فى عناق شمسى حاصل الايام دى
قولوا يا لطـــيـــف
و نـــــــــــــــــــواصـــــــــــــــــــل
| |
|
|
|
|
|
|
|
|
|
البنوك و ما أدراك ما البنوك (Re: اسامة الخاتم)
|
أيام العيد أعاده الله عليكم و انتم بألف خير , بتحصل ربكة في البلد و الأسواق و حركة النقل و المواصلات و الشفع و النسوان مع الرجال, مثلا جارنا ح يعيد مع نسابتو فى امدرمان و جارنا التانى ماشى كسلا لانو اول عيد بعد وفاة عمة زوجته و أهلها بى هناك كلهم , و الجارين ال 2 ما قادرين يقنعو زوجاتهم انو مافى قروش لى دا كلو, إشكال حاصل , فى النهاية بعد تدخل الأجاويد اتحسم الامر لصالح الزوجات و القروش اتدبرت من مصروف البيت و العيال, ما علينا دا ما موضوعنا, ايوا.. البنوك.يا هو دا الموضوع
الشى الجديد انو البنوك صرفت بطاقات الصرف الآلى للناس و دا شى جميل, اها نقوم نجى لماكنات الصرف و دى براها قصة لوحدها, ح تغشى ليك كم مكنة كدا قول زى 3 عشان تلقى واحدة شغالة و دى اصلا( المكنة الشغالة دى) ح تاخد ليك زى يمكن نص ساعة كدا( ما كلهم طبعا) حتى ترمى ليك حاجة و اغلب الاحيان بطاقتك و قروشك و احتمال انت زاتك تبقى فى خبر كان.
امبارح مشيت اصرف لقيت الحساب فاضى .. شى عجيب جدا, اها بعد مداولات مع ناس البنك و غلااط شديد اقتنعو بانو فى قروش اتسحبت من مكنة ما.. و ما وصلنى منها شى, الشى العجيب طلبو منى انى انا امشى اقنع ناس مكنة البنك التانى بالموضوع دا. طبعا انا برضو زى العوير مشيت و هناك حصل نفس الغلاط و المداولات و رجعت تانى لبنكى الاول, يا سادة احنا حالتنا صعبة, هنا اتدخل مدير البنك فى موضوع زى دا اللى اصلا ما محتاج لى دا كلو. اها قالو لى اكتب حكايتى دى فى طلب و انتظر زى يومين و مافى مشكلة. التلتلة دى كانت امبارح.
الليلة الصباح اتصلو بى ناس البنك تانى
البنك: الو السيد أسامة
إنا:اهلا, خلاص القروش رجعت الحساب( تفاؤل شديد)
البنك" لا لا طبعا ( شوف طبعا دى) احنا عايزنك تجى تانى عندنا هنا لانو فى طلب كدا مفروض تانى تملاه عشان نرسلو الخرطوم.و بعد داك تنتظر كم يوم كدا
طبعا انا بى عوارتى مشيت تانى و كتبنا الطلب و غايتو
تفتكرو تانى ح يحصل شنو؟.
الملاحظة انو انا هسى مفلس... قال بنك ال.... قال, من بكرة ماشى اشترى لى سحارة ادس فيها القروش على قلتها و اشترى لى كمان عكاز عشان البد بيه للحرامى
دا طبعا لمن ناس البنك يفرجو عن قروشى......... يا عالم
يا جماعة بلدنا دى بهجة و عديـــــل كدا
(عدل بواسطة اسامة الخاتم on 10-07-2008, 03:44 PM)
| |
|
|
|
|
|
|
|
|
|
مدنى بعد العيد (Re: اسامة الخاتم)
|
خمـــــــــــــــول شديد و ركلسة مبالغة
وفيات كتيرة و المقابر بقت ضيقة
سخانة و جو مولع نار
شوية هواء و كتاحة
كهرباء قاطعة
و البلد فاضية
السوق تعبان
الناس مفلسة
المـــوز كتير جدا
الشمس قوية
الاسعار كما هى ما نزلت
و الناس صايمين الستوت
ونسة فى الكورة و اوكامبو
الناس زى المنتظرة حاجة.. هى شنو ! الله اعلم
و نــواصــل
| |
|
|
|
|
|
|
|
|
|
ناس الاوقاف و الضرايب و .. و... و... (Re: اسامة الخاتم)
|
سلامات
طبعا فى ود مدنى زى الخرطوم و المدن الاخرى بتلقى ليك مبانى قديمة كدا و اخرى حديثة مكتوب عليها أوقاف, انا زمان كنت قايل انو الوقف دا ما عندو علاقة بالحكومة, لكن هسى اتضح انو الوقف حكومة مية المية,
فى واحد من مجمعات الاوقاف دى فى مدنى انا شغال فى مكتب فيه, رغم انو المكان دا مستاجرو من صاحبو الا انو صاحبو عندو اشكالات مع ناس الاوقاف( ناس دى حقيقة) لانو فى اليوم بجيك اكتر من واحد بقول ليك انا من الاوقاف, وطبعا عايزين دايما قروش, لصالح منو الله اعلم... يمكن للحكومة. اصلو احنا يا جماعة حكومتنا تعبانة و دايما مفلسة وما بتقدر تعيش الظاهر الا بمد اليد لى اى زول حايم فى السوق ان شاء الله فرش ليه منديل
ناس الاوقاف ديل شباب طوال جدا و لحوحين جدا
ياخى طيب ادينا اى حاجة و ما تخاف بنديك ايصال( تزكرة السينما افضل منه) ما علينا
هنا لازم تفاوض ناس الاوقاف و تصل معاهم لدرجة الصحبة.. كدا احتمال لو ناس الضرايب و الزكاة و ناس الترخيص و العوائد اضافة لى ناس النفايات ادوك فرصة.. احتمال بعد داك شغلك يمش.
طبعا فى ناس تانين اسمهم الغفراء و ديل الزا ناس.. عايزنكم تدفع ليهم بس كدا. و بس كدا معناها انت تدفع مقابل لاشى... يعنى لا بتشوف غفير و لا غيرو.. لكن برضو احسن ليك تدفع.. يمكن و انا بقول يمكن لو ما دفعت تجى بكرة تلقى محلك مفتوح شارع
يا جماعة ما قت ليكم بلدنا لزيزة
ناس المحلية عندهم جيوش من الجنجويد.. هى اقصد المحصلين راكبين دايما مواتر و شايلين طبلهم,,, يا تتفاهم معاهم يا يطبلوك. ودى طبعا فيها قطع عيش..
فى كمان ناس الموية و ناس الكهرباء و ديل ناس بشوات. احسن تختاهم لانو عايشين فى ابراج عاجية
طبعا ما ننسى اعمامك الكبار فى السوق و ديل لازم تخلق معاهم علاقة اسرية عديل كدا لانو لو دا ما حصل بشموك و زباينك بطشو بعدها
السوق هنا عايز ليه متطلبات جديدة و عجيبة ما ممكن تلقوها فى كتب الاقتصاد
البند العام: مافى زول بدفع قروش للحكومة يا اسامة: دى قالوها لى لمن كنت ماشى اعمل الرخصة.
دى الظاهر السياسة العامة و ما بين كر ناس المحلية و ناس الضرايس و الزكاة و ناس النفايات وفر اصحاب المحلات بتضيع البلد و الاسواق بتيقى شى عشوائى.. دا كلو لى فايدة منو؟ المرة الجاية ح احكى ليكم عن ستات الشاى و زباينهم الدائمين و الدائنين و المديونين
يا اهلنا ما قت ليكم بلدنا لزيزة
و نـــواصـــل
(عدل بواسطة اسامة الخاتم on 10-08-2008, 04:50 PM)
| |
|
|
|
|
|
|
|
|
|
ستات الشاى (Re: اسامة الخاتم)
|
صباح الخير ايها الناس حول العالم
و صباحاتكم بيض..
طبعا هذه الايام مافى اى نشاط اقتصادى... الناس مركلسة بعد اجازة العيد( ركلسة اجبارية)
عشان كدا بلقى لى وقت انى احكى ليكم
حكاوى تميل الى الظرافة ما امكن و مافيها اى قصد لى اى زول.
ستات الشاى:-
طبعا رغم انهم مجموعين فى فئة واحدة لكن مختلفين عن بعض برضو
ح احكى ليكم عن اتنين
ست الشاى حاجة زينب الحبشية و عن ست الشاى السودانية محاسن
فى طبعا قانون احتكار للزباين هنا
ناس محاسن براهم و ناس زينب براهم, و اياك واحدة فيهم تشوفك شايل ليك كباية شاى من التانية
دا لو حصل بحصل زعل و مشاكل ايوة و الله
الاشكال انو زينب بتزبط كباية الجبنة شى خرافى و محاسن خبرتها قليلة فى حكاية الجبنة دى
اها طبعا زولكم من رمضان بقى كييف بتاع بن و جبنة. الصباح بفتح الباب المطل على حاجة زينب و براحة كدا بطلب كباية الجبنة و بشربها بالدس و لمن اتكيف حتى افتح الباب التانى و اسلم على محاسن
ستات الشاى عندهم هنا ميزات كتيرة و مهمة نذكر منها
1- علاقات.. اكتر فئة عندها علاقات فى السوق( ودى بتنفعك مع ناس الضرايس او الضرائب و الباقين)
2- الوصايا مثلا يا زينب انا مارق و جاى لو جاء فلان خليه ينتظرنى او علان شيلو من كدا و كدا
3- التلج: طبعا عربية التلج بتجى بدرى و اغلب الوقت ما بجو نهائى. اها هنا ست الشاى بتمسك ليك كتلة التلج لحدى سيادتك ما تشرف
4- الفكة( و دى ما عايزة شرح) بتنفع فى الزنقات لانو دايما بكون الباقى فيه اشكال
و حاجات تانية كتيرة...
و نــواصــل
| |
|
|
|
|
|
|
|
|
|
Re: مشاهد و إشكالات يومية (Re: اسامة الخاتم)
|
سلامات
فى السوق الكبير هنا فى ود مدنى
فى زى مليون محامى.. تقريبا كدا
و كلهم موثقى عقود و كدا
كتار جدا جدا
هؤلاء الاساتذة فوق انهم مؤهلين.. تحس بيهم احيانا تابعين لفئة التجار
بس مكاتبهم فيها ورق بدل الصلصة و السكر
انا المحيرنى انو مهنة المحاماة دى ناسا كتــار كدا ليه
لسة الكلام ما انتهى
| |
|
|
|
|
|
|
|
|
|
Re: مشاهد و إشكالات يومية (Re: اسامة الخاتم)
|
سلامات
لسة مع السادة المحامين الاساتذة
طبعا ما تفهمو من كلامى دا انو كلهم كدا, فى اساتذة فعلا محترمين و بشتغلو شغل قانونى زى الورد
انا قاصد الفئة التانية.. و للاسف اغلبية
شايلين ورقهم و اختامهم و هاك يا مبايعات و توثيقات, تقريبا نص مدنى باعوها للنص التانى
هم نفس الناس البائع و المشترى, يعنى عجلة لافة بين الناس
و الاشكالات بتحصل من السادة المحامين انفسهم
منافسات زى بتاعين الكورة و لو صلحناها شوية زى بتاعين السياسة
النتيجة انو العميل او الزبون بلقى روحو لافى فى دوامة
الحق عند منو؟ ما معروف
الحق هو الله
و نــواصــل
| |
|
|
|
|
|
|
|
|
|
الكسرة و الكسور (Re: اسامة الخاتم)
|
ستتات الكسرة
نساء مكافحات و الله الظروف في السودان بقت صعبة و تزداد صعوبة مع الأيام دايما المستقبل عند الناس كلها حول العالم بكون أفضل
المكان بصبح أفضل و حال الناس بمشي لي قدام أما عندنا هنا القانون دا ماساري .............. ما علينا
ستات الكسرة دايما تلقاهم في صف واحد الكسرة (تيك اوى)
و على السريع و على الطاير. بى شباك العربية مثلا
لكن ست الكسرة الجنبنا دى موضوعها موضوع تانى,. فى محل جنبنا كدا ناصية و فيه برندة بره زى الورد, كمان بى جوه فيه سيراميك و باب الومنيوم يقول يا ليل, كان مقفول ليه فترة. من كم يوم كدا ضربوهو جير و زبطو المدخل, انا قت يا سلام, شكلو الموضوع ح يكون افتتاح لى محل خطير, يمكن نت كافيه و يمكن شغل ابو أصل.
المفاجأة انو تم الافتتاح فعلا جيت يوم متاخر اول امبارح, لقيت السوق كلو بلحس فى ايدو و هاك يا شكير
خير يا جماعة
قالو لى المحل دا فتح كسرة و قراصة و ماسكاهو المرة دى, حاجة فنانة
انا ما متضايق, بس اتحسرت على السراميك و المحل الناصية لانو اتحول الى مكان لغسيل الصحانة و الإطباق, و ست الكسرة الموديرن برضو قاعدة برة فى بنبر وجوة فى الحلل فى الواطة و ود صغير كدا بغسل فى الصحانة... المحل شغال شغل تقيل ( الله يزيدها) مية مية
السوق كلو متكيف كانوا دى الحاجة الوحيدة الكانت ناقصة
أنا يا جماعة ما فاهم البلد دى
بس البعرفو انو الزا منها مافى
و تحيا القراصة بالسراميك
(عدل بواسطة اسامة الخاتم on 10-12-2008, 02:41 PM)
| |
|
|
|
|
|
|
|
|
|
سواق الحافلة (Re: اسامة الخاتم)
|
يومداك بالمساء كدا و الانوار بدت تضى و تنطفى فى السوق الكبير, كان فى كتاحة تكبر شوية شوية و تنقص شوية شوية.. الكتاحة شاغلتنا و غمزت عيونا.. ضلمت شوية و شاغلتنا تانى المرة دى بلكزة صغيرة طيرتنا,,.. و طيرت معاها حافلات حنتوب و الدباغة, فى الموقف اختفت الحافلات و اختفى معها بائعى المخلايات, طبعا يا جماعة الحكومة منعت اكياس النايلون فى مدنى- الجزيرة كلها افتكر- قالوا الحكومة حريصة على صحة المواطن و على صحة الماشية- عشان كدا طوالى منعو الاكياس و احنا صدقنا الحكومة( دا موضوع عايز ليه بوست براهو) ما علينا...
انا كنت وسط الهبوب اللى بدت تروق شوية كنت بفتش للود بتاع المخلاية عشان اشترى واحدة بى الف اخت لي فيها عيش بى الفين.. ما لقيت الود ولا الحافلة الماشة حنتوب.. اها بعد تحريات كدا اكتشفت انو الحافلات بتقيف هــنــاك بعيد من الموقف و الناس تقوم تكابس الحافلة, و انت و حظك
ما قت ليكم بلدنا دى لزيزة
اها و بسرعة كدا لميت لى فى جريدة و بتاع العيش فارشو فوق درداقة كدا و بكورك وسط الحرب دى( رغيف سخن و جديد) اشتريت بى الفين 8 رغيفات بلدى و لفيتم بالجريدة.. بتاع العيش قال لى انا متذكرك( زمان مرة كدا جطت معاه فى الرغيف لانو الوقت داك كان ببيع رغيف لا جديد و لا كان سخن) قال لى المرة دى هدا سخن و جديد. قت ليه المشكلة ما الرغيف هسى المشكلة فى الحافلة وقف كدا و فكر شوية ثم نظر بعيدا و قام اشر لى و قال لى هديك واحدة هــنــاك اجرى اجرى هناك واحدة وقفت بعـيد. المطرة بدت تنقط الساعة كانت حوالى 7 و نص مساء, اها انا جريت فعلا و لقيت لى كمان مقعد قدام جنب السواق, الحافلة اتملت لمن دفقت فى ثوانى.. لكن السواق ما موجود, اختفى وسط الجموع. الحافلة كانت مدورة. و بدا البحث عن السواق.. جينا نضرب البورى.. طلع البورى ما شغال.. بعد فترة كدا و الناس اتضايقت و المطرة زادت شوية ظهر اخينا شايل ليه بطيخة. و ركب و كمان شاكل الناس
السواق: انتو مالكم الزول يعنى ما يشترى ليهو حاجة من السوق
نظر كل ركاب الحافلة تجاهى و كانهم يفوضونى اتكلم باسمهم و اشيل وش القباحة و بعد التوكل على الله قت ليه: ياخى ما انت شحنت و اختفيت و الناس دى اتضايقت. انت غلطان طبعا
السواق: انا اصلو ما بغلط و لا بعرف الغلط
انا: لا غلطان هسى انا تخلينى انزل اشترى لى حاجة.. بتنتظرنى.
السواق : لا طبعا ما ح انتظرك
انا: اشمعنى طيب ما انت زول و انا زول.
السواق : يا كابتن انا ما غلطان
انا: ايوة انا الغلطان انى اصلا اتكلمت معاك, الغلطان انا
وافق السواق على انو انا الغلطان و سكت الجميع و انطلق يهدر بنا على غير هدى, جرى شديد و زعل شديد
المهم وصلنا كبرى حنتوب بسرعة و كانت حنتوب غارقة فى الظلام. الهواء وقف و المطرة كمان لكن الكهرباء ما رجعت الا بعد ساعات طويلة, حمدنا الله على لسان خالد ولدى القال الحمد لله جابو الكهرباء, وكل واحد اتجه فينا بصمت شديد الى سريره داعين الله ان يديم علينا نعمة الكهرباء و نعمة سواقين الحافلات اللى لا بغلطوا و لا بعرفو الغلط
و دمتم
| |
|
|
|
|
|
|
|
|
|
Re: سواق الحافلة (Re: اسامة الخاتم)
|
Quote: ظهر اخينا شايل ليه بطيخة. و ركب و كمان شاكل الناس
السواق: انتو مالكم الزول يعنى ما يشترى ليهو حاجة من السوق |
الأخ العزيز/ أسامة الخاتم ..
متابعين .. واصـل ..
أخوك/ خالد الأرباب
| |
|
|
|
|
|
|
|
|
|
الهكرو بينا (Re: اسامة الخاتم)
|
الهكر مسخ لينا المواضيع
بقى خشمنا ملح ملح
ياخى معقولة بس تهكر بينا كدا
الواطة اصلا براها مسخنة و خشمنا ملح ملح
قال عشان بصحى قبل 6 و شاف امبدة و مايرنو.. يبقى لازم يهكر بالجماعة
يعنى دى حاجة غريبة انك تصحى بدرى و تشوف امبدة يا هكر يا حنكوش
ما تلاتة ارباع الشعب دا يا عاش فى امبدة يا جا مارى بمايرنو… شنو الغريب فى كدا البخليك تهكر بينا, و بعدين ياخى احنا ناقصين. خد مثلا : كهربتنا القاطعة ديمة… يعنى دى لو حصلت ليك ح تعمل شنو.. ح تنتحر مثلا, الناس زنبها شنو يا هكر افتدى.
ياخى لو انت ولد أرجل شوية و لو لسة بنية عليك الله اكبرى شوية
تانى بالله ما اسمع بى قصة هكر و هكرونى دى هنا..
انا غايتو عازمك مدنى لو بتعرف تصلها براك, عايز اعرفك بى جماعة كدا هكارين جدا هنا. تتبادلو الخبرات.. يمكن واحد فيكم ينفع, و دا ما تهديد.. دى دعوة و بدون هكارة
قال هكر قال.. هو فى هكر اكتر مننا
زهجتونا زاتو
| |
|
|
|
|
|
|
|
|
|
وضع صعب (Re: اسامة الخاتم)
|
في شي غريب حاصل في البلد( مدني يعنى) الناس ما عندها قروش, حصلت قبل كدا كتير
لكن المرة دى مبالغة, التجار الكبار وافقين مشلولين,و الصغار بسمعو كلام الكبار
في كلام كدا انو مافى كاش الموظفين مفلسين و كذلك العمال و المعلمين. مافى اى حركة.. في شنو؟
اى زول يقول ليك مافى شغل, البلد واقفة
يعنى أزمة المال العالمية حصلتنا هنا.. لو في زول عارف حاجة يقول
أنا غايتو عارف ... لكن ما ح أقول.
اتاكد و اجيكم
اها يا جماعة الهكر اخبارو شنو... لسه ما أتعرف...
لكم الياسمين و للحاقدين الرماد
| |
|
|
|
|
|
|
|
|
|
مكيف الموية (Re: اسامة الخاتم)
|
في واحد صاحبنا ظريف جدا, شغلتو مكيفات الموية, عندو كان ورشة فى السوق
و نتيجة للظروف الحاصلة قفلوها ليه ناس المحلية… قام فتح ليه واحدة تانية فى البيت..
غايتو شغال ما بطال.
المكيف الهنا قام بتصنيعه و تركيبه بعد جهد.. صاحبنا دا رفع المكيف فى عربية كارو
و وصف للكارو المكان وزيادة فى الاحتياط ركب موترو و مشى قدام الكارو
اها فى شارع كدا قريب من السوق شاف ناس المرور.. طبعا راكبين مواتر و جاهزين
حكى صاحبى فقال: انا يا اسامة لمن شفتهم ما كنت عايز ازوغ منهم…
لكن المكيف بتاعك مع الزول بتاع الكارو و انا اديتك مواعيد و انت راجينى بى هناك
يقومو الجماعة ديل يظهرو لى فجاة و انا موترى دا ما مرخص, يعنى ارخصو كيف يا اسامة هو المكيف بتاعك براهو بى 600 و ناس الترخيص بى 650, فقلت احتراما لعساكر المرور ديل انا احسن ازوغ هسى بشارع جانبى و اجيك اركب المكيف و بعد داك امشى اتفاهم مع الجماعة ديل,
اها خشيت بالزقاق دا و الجماعة الظاهر نوو على , سابو اى شى تانى و بقو فجاة تلاتة.
زادو من وين ما عارف و معاهم مواتر سنيننة جديدة ,,
و انت عارف انو موترى دا موضة قديمة, زى ما قت ليك الجماعة سابو اى شى
و طاردونى مطاردة التقول انا رامبو! و احد وراى و التانى قدامى
و التالت و دا أشفت واحد لبد لى فى نهاية الزقاق.
انا: اها و عملت شنو؟
هو: يعنى ح اعمل شنو استسلمت طبعا. وفقت و حاولت اشرح ليهم موضوع الكارو
و المكيف بتاعك. مافى اى فايدة. غايتو حجزو الموتر و انا جيتك بى هنا
انا: و بتاع الكارو
هو: كارو شنو تانى انا لحدى هسى ما عارفو مشى وين
المهم يا جماعة تم تجنيد كم نفر كدا و بدا البحث عن الكارو الذى وجد بجوار اتحاد الفنانين.
تم تركيب المكيف و صاحبنا مش يفتش ليه عن واسطة للافراج عن الموتر المتهالك.
لسه طبعا الموضوع ما انتهى
و نـواصــل
| |
|
|
|
|
|
|
|
|
 أنا و الجيران (Re: اسامة الخاتم)
|
ايوا الجيران مش الحيرآن. جيرانا الورانا عندهم محل كدا بتاع تعبئة احبار و مرات بتحول لمبيعات كهرباء و يرجع تانى للاحبار, مرة اتغير تماما و قلب مطعم شعبى لحوالى شهر كدا, اصحابو اتنين " سهيل" و سحويل" دى الاسامى الحركية طبعا- فى الحقيقة الاسامى انتشرت فى السوق هنا و الناس نست اساميهم الحقيقية- اها سهيل بنسى اى شى ., يعنى لو جاك زيارة بنسى معاك نضارتو و موبايلو و قلم الحبر و احيانا الورق الشايلو معاه.. بنسى لدرجة ببدا يفتش السوق كلو, تلقاه قاعد قدام المحل( حاليا شغالين طباعة بحوث و صيانة طابعات_ دى آخر لافتة علقوها امبارح) نرجع لحبيبنا سهيل... قاعد قدام الدكان ينوح و يشاكل فى نفسو,, ياربى الورق وين و ياربى النضارة وين. و.. و...
سحويل حريف شوية .. بجى المحل متاخر يعنى زى 11 كدا , و طوالى بخش فى سهيل شمال و تبدا الحكاية
و بتحصل كل يوم على فكرة, اها يقوم سحويل بعد حوار عنيف مع سهيل يجيك برضو زيارة
عايزين الهوفر بتاعك دقايق
عايزين القلم بتاعك دقايق
عايزين الورق دا و الدباسة دى و كمان ادينا موية نشرب و ياخى ما معاك سيجار..
الدقايق حقت سحويل بتتحول لى ايام
القصة دى برضو كلو يوم
لكن سهيل و سحويل ناس طيبين جدا
محبوبين بى دا كلو. اكتر اتنين بعانو مع ناس الضرايب ومع المحلية
يوم محلهم مطبول و يوم فاتح, و يوم نص نص,
اخليكم شوية اشوف موبايلى .. سحويل لسه ما رجعو
طبعا استلفو عشان يضرب فى تلفون سهيل لانو رايح.. التلفون طبعا الرايح ما سهيل و لا شنو يا ربى !!!؟
| |
|
|
|
|
|
|
|
|
|
Re: مشاهد و إشكالات يومية (Re: اسامة الخاتم)
|
سلامات
المطعم الكان شغال.. تش
قفل ليه 3 يوم
ازمة المال العالمية.. حصلتنا هنا
او كانت هنا و مشت هناك
فى زول بعرف ليه محل تعليم لغة صينية فى مدنى
قال ززز كسرة.. قال
نــواصــل
| |
|
|
|
|
|
|
| |
اسامة الخاتم
Fathi Ali Mohammed
Khalid Saeed
فيس بوك
تويتر
انستقرام
يوتيوب
بنتيريست