|
|
|
 Re: ود الباوقــة جمــع يا اخــوانا (Re: Al-Shaygi)
|
بعد ما جهزت السلب لربيط الشوالات فوق السبت تجي تقول لي الفارهه؟؟؟
الشايقي ..
يا اخوي حطب شنو وسلب شنو انت قايل نفسك في سوق تنقاسي . فك السبت الفوق وخلى العربية
تاخد راحتا مالك مشقيها عليها .
اها عبد اللطيف وصل ولا لس ..
ود الباوقة
| |
 
|
|
|
|
|
|
|
|
Re: ود الباوقــة جمــع يا اخــوانا (Re: الطاهر عثمان)
|
كدي يا شباب قبال من اجيكم واحد واحد وان شاء الله يوم شكركم ما يجي..... دعوني احكي لكم مسيرة الثلاثة سنوات مع الكامري ..
طلعتها جديدة من الوكالة عام 2006 ويشهد الله يوم واحد غلتت علي مافي . بالعكس انا مرات قاعد اغلت عليها رغم محافظتي عليها ومضارفتي عليها . كل يوم خمسي عندها غسلة في المغسلة بالشامبو والصابون
وكل نهاية شهر حمام ( بستم ) وكل 5000 كيلو غيار زيت وكل ثلاثة غيارات زيت غيار سايفون . المطبات من جبتها ما وقعت في واحد .
حاولت مرة فتحت الرديتير حلفت بالتكتلا ما تشرب موية ثلاثة سنوات قاعدة على موية اليابان الخدرا . حنستها ان شاء الله تشرب ليها جغمة واحدة ابت كلو كلو . قلت يا جماعة اغرغرا لكن في النهاية حنيت عليها وتركتها .
جمعت المبروكة وعافي منها لله والرسول ثلاثة سنوات...
لا برطمت...
ولا طنطنت..
ولا فرنبت ...
ولا نتعت ..
ود الباوقة
نواصل
| |
|
|
|
|
|
|
|
|
|
Re: ود الباوقــة جمــع يا اخــوانا (Re: JAD)
|
Quote: لا برطمت...
ولا طنطنت..
ولا فرنبت ...
ولا نتعت ..
|
بس فى فراق كامريك العزيزة يا ود الباوقة
انتة
برطمتة
وطنطنتة
وفرنبتة
ونتعتة
لكنى أحمد لك انك احتسبتة( احتسبت )
لا يضيع الحلال يا ود الباوقة
| |
|
|
|
|
|
|
|
|
|
Re: ود الباوقــة جمــع يا اخــوانا (Re: مصدق مصطفى حسين)
|
الف حمدالله عســلامـة، وتانى خلى المفتاح فى جيبك دائمـا.
شيل ورقـة وخليها فى الطبلون.. أكتب فيها:
الأخ الحرامى،
لو داير قروش نديك
لو داير شغل أفتش ليك حاجة حسب مهاراتك
لو داير إقامة ما بقصـر معاك تب
لو داير تعرس أدينا خبر والواجب بنقوم بيه
لو داير مشوار ساى بنوصلك حتى الرياض (إنتو وين بالمناسبة؟)
وخلى الكلام بينى وبيك، بس خلى لينا العربية دى، ودا وعد رجال.
أخوك سيـد العربية.
| |
|
|
|
|
|
|
|
|
|
Re: ود الباوقــة جمــع يا اخــوانا (Re: إسماعيل وراق)
|
السرقة كانت في يوم 8-12-2008 في تمام الساعة الحادية عشر ( ص ) ذهبت الى المغسلة
بغرض غسل جاكيت ( الدنيا برد ) طبعا .
وقفت السيارة بالقرب من باب المغسلة وتركت المفتاح بداخلها وهي مبطلة والمسافة بيني وبينها
متر ونصف وناولت عامل المغسلة الجاكيت وانا على الباب وفجاة سمعت صوت المحرك يدور لالتفت واجد
شاب عمرة لم يتجاوز 22 سنة يرجع بها الى الخلف وعندما استعدل بها لوضعية الهروب وقفت امامه
بحجة تعطيله او التشويش عليه ولكنه ظل يتقدم ببطء نحوي وانا امام السيارة وباصراره في المخارجة
رايت ان اخارج نفسي واتخارج فافسحت له الطريق وظللت اتابع السيارة الى ان اختفت عن نظري.
نواصل..
| |
|
|
|
|
|
|
|
|
|
Re: ود الباوقــة جمــع يا اخــوانا (Re: ود الباوقة)
|
طبعا في اللحظة دي خشمي كان ملح ملح . لكن خلال لحظات اشتغفرت ربي وانبت اليه وتوجهت
الى مركز الشرطة الذي لم يكن يبعد عن المكان سوى امتار قليلة . قابلت الضابط المسؤول
وحكيت له ما جرى . امرني بتصوير الاقامة ففعلت وقاموا قورا باجراء التعميم في كل المخارج
والمداخل لكافة مدن المملكة ومن هناك توجهت الى البيت وبقايا ملح قليل في خشمي . طبعا مفاتيح
السيارة معها مفاتيح اخرى من ضمنها مفتاح الشقة .
دقيت جرس الباب وفتحت لي ام العيال وما ان رأتني حتى بادرتني بالسؤال بسم الله الليلة مالو وشيك
دا محتوف كدا . رديت عليها وشيى بخير بس الختفوها سيارتي ..
نواصل
| |
|
|
|
|
|
|
|
|
|
Re: ود الباوقــة جمــع يا اخــوانا (Re: جعفر محي الدين)
|
اها صبحنا على يوم عرفة وتحول في هذا اليوم طعم الملح الذي في خشمي الى طعم الزغنبوت واليوم داك عيني ما شافت السهلة كلو كلو الا باليل ذهبت واستأجرت لي سيارة وكاورت في الوليدات ومشيت اشتريت ليهم هدوم العيد ..
اها يوم العيد داك سبحان الله ربنا نزل السكينة في قلبي ونسيت خالص عندي سيارة مسروقة..
نواصل
| |
|
|
|
|
|
|
|
|
|
Re: ود الباوقــة جمــع يا اخــوانا (Re: ود الباوقة)
|
اها يوم العيد كانت ضبيحة ودعمنا كنا معسكرين معاه . فبعد ان ضربنا الشيوو والشطوط . انقسمنا لي خمسة مجموعات كل مجموعة اتنين . واتفقنا على التفتيش في مناطق رأينا انه يمكننا ان نجدها فيها.
تحرك الرتل ومن ثم اخذ كل واحد مساره . استمر البحث حتى صلاة العشاء دون جدوى .
ود الباوقة
| |
|
|
|
|
|
|
|
|
|
Re: ود الباوقــة جمــع يا اخــوانا (Re: ود الباوقة)
|
نفس السيستم ..
ضرينا الشيوو والمرة دي كان عددنا زيادة شوية..
سبعة ارتال تحركت بسبعة سيارات واتجهنا في سبعة محاور غير محاور الامس واستمر البحث من بعد الغداء
وحتى الساعة العاشرة ليلا ولم نحصل على شيء
عدنا للبيت وشكرت الجميع لما بذلوه من جهد خارق واكتفينا بالتفتيش ورايت ان نستخدم سلاح الدعاء يا جامع يا رقيب وادعية اخرى زودنا بها اصحاب العلم والصلاح من الداخل والخارج بالاضافة الى دعاء اعضاء
سودنيزاولاين عبر بوست اخونا وحبيبنا عبد اللطيف بكري ..
نواصل
| |
|
|
|
|
|
|
|
|
|
Re: ود الباوقــة جمــع يا اخــوانا (Re: عواطف ادريس اسماعيل)
|
مرت الايام كالخيال احلام الى ان جاء يوم الخميس 18-12-2008 ذهبت الى السفارة
السودانية عند الساعة العاشرة والنصف لانجاز بعض المهام وطلعت منها الساعة 2.30
وكان من المفترض الخروج خارج الرياض لعمل يخص الشركة الا انني اثرت ان ارجع الى البيت
حيث انني معزوم سماية عشاء في نفس الليلة ومكلف فيها ببعض المهام . المهم وصلت البيت وتغديت
فضلت خيركم وبعد الغداء مياشرة جاءتني مكالمة من رقم جوال . المتحدث سعودي من خلال لهجته .
بادرني بعد السلام . ايش اسمك . عمر . وايش جنسيتك . سوداني ...
نواصل
| |
|
|
|
|
|
|
|
|
|
Re: ود الباوقــة جمــع يا اخــوانا (Re: jini)
|
ثم استطرد قائلا يا زول معك الدوريات الامنية ساعتها خفقت دقات قلبي بسرعة 120 دقة
في الساعة . ثم واصل تعرف شارع معن بن زائدة يازول..
اجبته بنعم ....
عندك خمسة دقائق تكون عندنا....
كويس جدا . وحيث ان المسافة بيني وبين الموقع تستغرق اكثر من عشرة دقائق توكلت على الحي
وتحركت . الشوارع كانت خالية من الزحام نوعا . في الطريق دارت في رأسي العديد من التخيلات
كيف سأجدها يا ربي ومرت على العديد من الصور المتحركة في خيالي لوضعية السيارة بعد العثور عليها
مضروبة من الخلف . لا بها صدمة من الامام . القزاز القدام مكسر وكدا.
اخذت المنعطف يسارا ودخلت طريق معن بن زايدة وعلى بعد امتار قليلة كانت تقف سيارة الدورية الامنية
وبها عسكريان ...
| |
|
|
|
|
|
|
|
|
|
Re: ود الباوقــة جمــع يا اخــوانا (Re: MOHAMMED ELSHEIKH)
|
المهم وصلت السيارة وكانت تقف في شارع فرعي بجوار احد المنازل . نظرت اليها من الخلف ورايتها سليمة مية في المية وحيث انشغلت مع الشرطي بتكملة اجراءات الاستلام كلفت ابني محمد بالدوران حولها للتاكد من سلامة باقي اجزائها . وعاد الابن محمد ليؤكد لي كلو تمام عدا كسر في زجاج الباب الخلفي
غادرت الشرطة بعد ان شكرتهم على ما قاموا به من واجب تجاهي .
وبعد فترة وجيرة حضر نحوي اصحاب المنزل الذي وقفت بجانبه السيارة . وبعد حمدلة السلامة زكروا لي بان
السيارة كانت تقف مــــن ثاني يوم في العيد ولكن اليوم وجدنا الزجاج الخلفي مكسور لذا قمنا بابلاغ الشرطة ولولا كسر الزجاج للبست في الزقاق فترة طويلة .
الحرامي لم ياخذ منها اي شيء بس اخذ المفاتيح فقط وترك الابواب مفتوحة . عداد الكيلومترات يؤشر الى قطعه مسافة 105 كيلو متر فقط
السيارة لم تتعرض للتفحيط ولله الحمد ..
مال حلال وجمع ...
شكرا احبتي لكم جميعا ...
ود الباوقة
| |
|
|
|
|
|
|
| |
عبدالوهاب علي الحاج
محمد البشرى الخضر
العوض المسلمي
Magdi Ahmed Elsheikh
بشير أحمد
هضيبي علي سعيد
Al-Shaygi
الطاهر عثمان
ناهد بشير الطيب
علي الكرار هاشم
ابو جهينة
JAD
Hassan Makkawi
ناذر محمد الخليفة
NGABY AJOOZ
Faisal Habiballa
شهاب الفاتح عثمان
Abureesh
عاطف عمر
إسماعيل وراق
محمَّد زين الشفيع أحمد
جعفر محي الدين
عبدالرحمن الحلاوي
هجو الأقرع
عواطف ادريس اسماعيل
jini
المسافر
MOHAMMED ELSHEIKH
فيس بوك
تويتر
انستقرام
يوتيوب
بنتيريست