|
|
 مناكفات زوجــــــــية
|
نحن معشر المتزوجين كثيرا ما ننصح غير المتزوجين بالدخول إلى عالمنا ، ونسمي عالمنا هذا ( القفص الذهبي ) ، لكن الكثير منا يعرف أنه قفص ، لكنه مطلقا ليس قفصا ذهبيا ، بل ربما يكون قفصا حديديا ، ، ولعل الذين كانوا صريحين وواضحين مع أنفسهم هم الذين خرجوا من هذا القفص بأقل الخسائر ، وهجروه إلى غير رجعة ، والبعض ظن أن الأمر متعلق بالشريك ، وأن تغيير الشريك ربما يولّد واقعا جديدا يعود بهذا القفص الحديدي إلى حالته الذهبية المفترضة ، لكنهم سرعان ما يكتشفون أن الحال هو الحال ، وأنّ تعديله هو المحال ،، لكن التعايش مع هذا الحال ليس مستحيلا ، بالرغم من أنه في كثير من الحالات يكون صعبا ويحتاج إلى قدر كبير من الوعي المتبادل والتنازلات المتبادلة ، وقبول الهزيمة والنصر على أنها حالات مد وجذر طبيعية لا ثابت فيها ،،
تمتلئ الحياة الزوجية بالمناكفات ، وتكثر حالات الاختلاف بين الأزواج ،ويتبع ذلك العكننة والحرد والتغاضب وربما تمتد آثار ذلك إلى الفراق ، أو الخصومة الممتدة كأخف الضررين . والمناكفات الزوجية في كثير من الحالات تتشابه خاصة بالنسبة للقادمين من ثقافة أو خلفية اجتماعية واحدة ، وتتلون بلون المستوى الثقافي لكلا الطرفين ، وقد تجئ فطيرة أو قوية بقدر مستوى ضحالة التفكير أو عمقه . والمناكفات الزوجية لا تعرف التفرقة على أساس النوع أو الفئة العمرية ، لكن الأفراد هم الذين يحددون نوعيتها واتجاهاتها ، فهي إذن خليط بين المكونات الشخصية والمكونات الاجتماعية ،، لكن هناك فوارق بين الجنسين فرضها المجتمع الإنساني بحكم التسلط الذكوري العام والذي أتاح للرجل فرصا أكبر من تلك المتاحة للمرأة ، وجعل كلمته هي الأعلى ، وصوته هو الأعلى ، فقبل كل تهمة يتهم الرجل بها المرأة واعتبر المرأة مكمن شر ، محبة للفتنة والتآمر ، وجالبة للنحس والنكد ، وللأسف فقد استسلمت الكثير من النساء لهذا الحكم وأصبحن يعشن ويستمرأن حالة استلاب يصعب الخروج منها ،، وكانت نتيجة ذلك العديد من المناكفات الزوجية ، والتي تتهم فيها المرأة دائما بقلة العقل ، وفي نفس الوقت بالمقدرة على ممارسة الضغط والخديعة والمكر ،، ويتم تحميلها الجزء الأكبر من إثم هذه المناكفات ، ويسير الركبان بحكاياتها وتتناولها القصص والمسرحيات والقفشات ، ، وكثيرا ما توضع المرأة مكان الكائن الطفيلي الذي يحاول الاعتماد على غيره ، وفي نفس الوقت يحاول الإضرار به .
وكمثل على هذا أورد القصة الشهيرة المتداولة ، حيث قيل أن امرأة كانت تنكد يوميا على زوجها ، وأصرت أن لا تتخلى عن عادتها هذه أبدا ، فما كان من الزوج إلا أن اشتكاها إلى المحكمة ، فلما استدعاها القاضي ، وسألها ، قالت له أنها لا تستطيع أن تتخلى عن عادة أحبتها ، وأن مزاجها لا يكتمل حتى تنكد على زوجها ، وإن لم تفعل فإنها ستعيش حالة نكد مستمر طول اليوم . فاتفق معها القاضي على تقلص فترات النكد ليصبح من حقها أن تنكد على زوجها يوما ، وتتركه يوما ، ، فما كان منها إلا أن اشترت طبلا ، وجاءت لتمارس النكد على زوجها يوما ، وفي اليوم الثاني تقرع على الطبل وتغني ( بكرة النكد ... بكرة ) .
وهناك مسببات عديدة للمناكفات الزوجية ، منها ما يسببها الآخر ، بعيدا كان أو قريبا ، ومنها ما يسببها ضيق سعة الصدر لأي من الزوجين ، ومنها ما يسببه ضيق الأفق ، وضبابية الرؤيا ، وعدم الشفافية والوضوح ، ومنها ما يسببها سوء الفهم ، ومنها ما يسببها السلوك الشخصي لأحد الزوجين ، ومنها ما يسببها الاستفزاز ، والمزاح ، والانشغال عن الطرف الآخر ، والانصراف عنه أو إهماله ، والتنصل المستمر عن المسئوليات ، والتنصل عن كل أو بعض ما تم الاتفاق عليه . ولتربية الأولاد ومشاكلهم أيضا دور في إثارة المناكفات الزوجية .. وهناك بالطبع عوامل اقتصادية تؤثر في العلاقات الزوجية وتهزها ، فمن أهم ما يثير المناكفات الزوجية الفقر ، وتغير أنماط المعيشة في المجتمع المحيط ، وعدم الاستقرار الوظيفي لأحد الزوجين ، والتفاوت في دخليهما ، والتصاق صفة البخل بأحد الطرفين .
ولأنني منذ سنين طويلة أعيش الحالة التي أطلقنا عليها ( الاغتراب ) وهي حالة الهجرة الطوعية التي اخترناها أو دفعنا إليها فأصبح حالنا كحال الصياد الذي فتح القمقم ولم يتمكن من السيطرة على ما خرج منه ،، أو كالساحر الذي غلبه سحره ، ( تسوي بي إيدك يغلب أجاويدك ) وظللنا نعيش في غربتنا بعقلية ( كان غلبك سدّها ، وسّع قدّها ) .
سأجعل هذا البوست مفتوحا ، بمعنى أنني سأضيف إليه ما استطعت من الأمثلة التي تحدث وتتكرر ، وآمل أن يضيف الزملاء إليه ما يستطيعون ، لكني لا ألتزم بالرد على مداخلات الزملاء ، وليس بمقدوري أن أوجد الحلول ، أو أتبنى حالة لأدافع عنها أو أنفيها أو أثبتها ، وكل ما يلامس حياة أفراد فيما يكتب في هذا البوست هو فقط محض صدفة ، وصدقوني أنني لا أعرف شيئا عن الحياة الخاصة لزملاء المنبر أو أسره ، ولا أعرف حتى الحياة الخاصة لكثير من أصدقائي المقربين ، لكن ما دفعني للكتابة أن حالات الملل تكثر وحالات الفرقة والانهيار تزداد وحالات القرف تتمدد ، وحالات الحب الزائف تكاد تعلن عن نفسها ، وحالات الهروب من الزواج من الجنسين تتكاثر أيضا .
ويا عزابة ما تزابوا ..... الليمون مفرهد دابو
|
|
 
|
|
|
|
|
|
|
 Re: مناكفات زوجــــــــية (Re: mohamed elshiekh)
|
اخوى ود قاسم
باين اليومين ديل العيون إحمرت واختنا فوزية وصلت الحد
من إجتماعاتك الكتيرة ، وكان رجعت البيت هاك يا كومبيوتر
لكن ده حالن نسوى شنو ؟ ويا محمد الشيخ ما تكون جبان
الحاجة دى بى حسناتها وسيئاتها ماتقعد تخت لينا العذر
فى إنك ما عارف ، دق صدرك يا خوى ولابد من شكل حتى لو
بقت من زمن الصحابة .ولى عودة يا اخ ود قاسم
| |
|
|
|
|
|
|
|
|
|
Re: مناكفات زوجــــــــية (Re: ودقاسم)
|
و الله يا ود قاسم فتحت موضوع مهم
و كويس إنك فتحتو هسي لأنو أم بشير مشت المدرسة يادوووووب
شفت كيف
نظرية سيك سيك معلق فيك
العزوبية ما بتشكر و الطلاق بشتنة لكل الأطراف و التدبيل لا أعرف دليل واحد لمدبل ناجح! تطير عيشتنا نسوي شنو؟
و الله يا ود قاسم كلام جاااادي كدة
أحسن من العرس مافي تب
و الحياة الزوجية -بدون تنظير- يجب أن تقوم على التنازل من طرفين يسعيان ليصبحا واحدآ فمثلآ زوجتي أتت من بيت {تطبيقي} فيه أربعة مهندسين و طبيب و لم تسمع الشعر يقرأ حيآ إلا بعد زواجنا! أها باقي ليك دة سبب أنا أقوم بيهو الدنيا ؟ بعد ست سنة معاها صارت تناقش في الأدب بقدر يرضيني و من جهة أخرى هي كلما غفلت منها ألقاها فاكة ليها جهاز إلكتروني و مطلعة مصارينو و أنا و حياتك يا غالي كنت بلخبت محل الديسكيت و السي دي لعهد قريب
فالفكرة برأيي {تقريب وجهات الفهم} لا تطفيش العازبين , فراق المرة صعب عديل أنا أسبوع واشنطن الدخلها فيني ما بتمرق تاني , دحين تبادلوا النكد مع بعض و لا تنسى نصيب الأسد منه حسب الفهم السوداني للرجالة و اسمح لها أن يقوم عليها جنها من وكت للتاني و استحمل طعم البيتزا الكريه و لو غلطتك مهببة أدخل البيت بهدية سغيرونة ولو توكة تسريح و لو غلطتك بسيطة كمان ما تكتر الإعتذار بس قول ليها في زول إتصل بي؟ و لا الولد جا بالبص و لا مشيتي ليو؟
يو نو حاجة كدة تكسر التبويزة و خلاص الموضوع إنتهى
| |
|
|
|
|
|
|
|
|
|
Re: مناكفات زوجــــــــية (Re: الطيب بشير)
|
Dear all
well as a personal experience, most of those whom i know who got married are seperated now
people now are getting married to seperate....
so i dont see any good reason why to get into this in the first place
it is better to stay like this and after when u reach like 50 or 60 then get into this because at that time ma 7atkoon farga ma3ak ba3ad da
so i totaly agree with mohammed alsheikh
older people tell us to get into this marriage thing but what we see from those whom are married make us think like 100000 time before doing such a thing.. so why should we
i need an answer please, and a good answer please not like it is something that we have to do it sooner or later so we better do it now... we still have a life to live..why get into the cage of konta ween?? o masheet ween...
| |
|
|
|
|
|
|
|
|
|
Re: مناكفات زوجــــــــية (Re: abuguta)
|
الأخ العزيز ود قاسم
تحياتي
ديننا الحنيف يدعو الزوجة و الزوج ( على حد سواء ) بالرحمة و المودة بينهما. و أن يكون الود و الإحترام هو الطريقة الوحيدة للتعامل.
و لو ضاع الإحترام و الود و الرحمة و المودة من الحياة الزوجية ، ( فإن النكد ) لا داعي له ، يجب الإنفصال بهدوء شديد ( الإمساك و الإطلاق بالمعروف. )
و لكن للأسف ، بعض الزوجات يحبذن الإستمرار و هن يرفعن شعار ( أنا قاعدة ليك فوق قلبك عشان أقصر عمرك )
و بعض الأزواج يحبذ الإستمرار و شعاره ( حأوريك النجوم في عز الضهر لغاية ما تقولي الروب و تفرتقي بيت أهلك بهدومك اللي عليكي ).
و في كلتا الحالتين ( نجد الأطفال يعيشون في الوسط و كأنهم يتفرجون فيلما ناطقا بلغة غريبة عنهم بعد أن ضاعت هيبة الأب في عراك مستمر ، و ضاع إهتمام الأم بهم في محاولة لرصد حركات و سكنات الزوج.
و لنا عودة ببعض المناكفات
| |
|
|
|
|
|
|
|
|
|
Re: مناكفات زوجــــــــية (Re: shiry)
|
يا مهاجيييييييييير ده منو البغني ده؟؟؟
روعة,,,,زوعة.....زوعة
معليش يا ودقاسم ...هذا الاقتحام .. بحسن نية
سمعت الغنية قبل ان اقرأ البوست...لكن بجيك راجع اقراك
ما بتكون جايب ليك كلام هين
| |
|
|
|
|
|
|
|
|
|
Re: مناكفات زوجــــــــية (Re: ودقاسم)
|
Quote: تخرج من غرفة النوم وتترك الزوج يغالب رائحة الشرموط الإضافية التي انبعثت من ملابسها ، ،
|
أما مفتري صحيح
طيب هي مليانة بيهو و إنت ما عايز تستحملوا
لن يستطيب سكن الشركة هذه المرة صدقني
| |
|
|
|
|
|
|
|
|
|
Re: مناكفات زوجــــــــية (Re: الطيب بشير)
|
انا بفتكر إنفعالها ده طبيعى لانها كانت متوقعة إنها بتجهز
اكلة جامدة لى زوجها ،وبل كانت متوقعة إطراء ولمن لقت
العكس جن جنونها ، ويا ويلكم لو جبتوا سيرة امها حتى لو
قلت أمِك مرة طيبة !!1! الدّخل امى فى الموضوع شنو؟
| |
|
|
|
|
|
|
|
|
|
Re: مناكفات زوجــــــــية (Re: ودقاسم)
|
اتخيل لي المسالة كلها قايمة على الاختيار الصحيح للشريك
واكيد اصلا الحياة مليانة بكم هائل من التعقيدات التي تولد السقالة في اسلوب الحياة ، لكن لما يكون الاختيار صحيح التعقيدات دي بتكون مسالة يمكن تجاوزها يعني الاتنين ممكن يلطفوا الحياة
عشان الزواج ما يبقى زي ما قالوا برميل اوله عسل واخره بصل ، فهناك من يقلب البرميل من نهايته ويختصر جية السقالة والبصل
وهناك من يخلي الحياة لذيذة
| |
|
|
|
|
|
|
|
|
|
Re: مناكفات زوجــــــــية (Re: ودقاسم)
|
مهداة إلى جميع الرطّانة :
الزوجان برفقة طفلهما الوحيد زارا أقارب الزوج ، المضيفان أبناء عم من بلد الزوج الذي تزوج من العاصمة ، ، زوجها عندما يلتقي أهله يفضل مخاطبتهم بلسان قومه ( الرطانة ) ، حيت يفتقد دفء اللهجة في بيته ، هي لا تستغرب ذلك لأن والديها أيضا كانا يفعلان ذلك ، لكنها لم تتعلم منهما لهجة الآباء والأجداد ،،
وجد الزوجان ضيوفا آخرين عند المضيفين ، وكلهم يجيدون الرطانة ، ، وبعد السلام ، توقف الكلام بالعربي ، وبدأت اللهجة المحلية المليئة بالقفشات والملح ، وكثر الضحك ، لكن أختنا صامتة لا تعرف ماذا تفعل ،، الموقف كله بالنسبة لها مضحك ، مبك في آن واحد ،، هي كانت تتوقع ذلك ، لذا ترددت كثيرا في الاستجابة لدعوة زوجها لها لمصاحبته في هذه الزيارة ، ، كلهم أقاربها وأهلها ، لكنها تتحدث بلسان غير لسانهم ،،
حمادة ، حمادة ،، وين مشى الولد ؟
يأتيها حمادة مسرعا :
ايوة يا ماما ، نمشي ؟
ايوة يا حبيبي ، شوف لي أبوك ده بسوي في شنو
المضيفة :
شنو يا ام حمادة ما لسة بدري
تتنهد أم حمادة وترد بآخر نفس :
بدري من عمرك والله .
شنو يا أم حمادة ما تتعشوا معانا ، وللا القراصة ما بتنفع معاكم ؟
لا والله بس بدري على العشاء ، شكرا ليك .
طيب استنوا اشربوا الشاي .
لا ...لا ... معليش ، احسن نمشي ، الدنيا برد .
حمادة يعود ويهمس في أذن أمه :
ابوي قال ليك استني شوية نتونس .
تتململ ، ولا تعرف كيف تتصرف ، لكن الضجر يلازمها بوضوح . تتأوه ، لكن الأخريات لا يأبهن بتأوهاتها ، والحديث ينساب دون توقف ، حتى أنه بدا لها أن الرطانة ربما تكون أكثر سلاسة من اللغة العربية ،، وتتعالى الضحكات ، وكأن قاموس الرطانة كله ملح ونكات ،، وهي تكاد تنفجر ، وكأن الكرسي الذي تجلس عليه لا يسعها ،،
خرجت من الغرفة التي كانت تجالس فيها الأخريات دون أن تحس بها أي منهن من فرط إسرافهن في الحديث والضحك ،، اقتربت من صالون الرجال والتصقت بالجدار ، ونادت :
أبو حمادة .... أبو حمادة ،،
رد أبو حمادة وهو جالس على كرسيه :
ايوة ، يا أم حمادة ، ما قلنا خليك شوية ، إيه الحكاية .
طيب تعال دقيقة .
مالك أوعى يكون في مشكلة ؟
يخرج هو والمضيف سويا ، ويقفان أمامها ، ويسألان بصوت واحد :
في شنو ؟
لا ..... لا ..... مافي حاجة والله ، بس عايزين نمشي .
يتراجع المضيف ، ويعود إلى الجلسة ، وأبو حمادة يتحدث إلى زوجته بمفرده :
في شنو يا بت الناس ، حصلت حاجة ،،
يا أخي الناس ديل ما عايزني أقعد معاهم .
كيف الكلام ده .
يا أخي ديل من دخلت لي يوم الليلة يرطنوا ويضحكوا .
طيب ما هم بيتونسوا ، اتونسي معاهم .
بس أنا ما بعرف أرطن .
ومالو ، اتعلمي .
يا أخي أنا ما اتعلمت من أمي وأبوي ، أجي أتعلم من الناس .
ومال أمنا وأبونا هم اللي علمونا في المدارس ؟ ، ما كلنا اتعلمنا من الناس .
يا أخي خلينا نمشي البيت أحسن .
يا بت الناس أنا ما صدقت لقيت لمة زي دي ، أقوم أخليها . وبعدين القراصة بعد شوية تدور .
يا أخي أنا مضطرة أمشي .
تمشي كيف ؟
أركب ليموزين وللا أضرب تلفون لأخوي يجي ياخدني .
لا ، والله الظاهر إنتي تعبانة شديد ، خلاص يلا نمشي . .
تعود هي لغرفة الحريم ، ويعود هو لصالون الرحال ، ويستأذن كل واحد منهما بطريقته . ووسط مراسم وداع حار غادرا بيت المضيقين واتجها إلى سيارتهما يرافقهما الشافع حمادة .
بدا أبوحمادة منفعلا ومتوترا ، ورجع الخلف بسيارته وكأنه ينوي الشر كله . وما أن وجه سيارته وجهتها حتى بدأ الحديث :
إيه الحكاية ، ديل ناس أهل ، ليه تعملي معاهم كده ؟
وأنا أصلا عملت شنو غلط ؟
كل ده ، وإنتي ما شايفة أي غلط ؟
يا أخي وإنت كنت شايف الحال الأنا كنت فيهو ؟
كان في شنو يعني ، ناس أهل اتقابلوا وبيتونسوا .
يا أخي ديل كانوا متضايقين مني خالص .
هم متضايقين منك ، وللا حضرتك ماعايزة علاقات معاهم ؟ أصلا إنتي ما كنتي عايزة تجي .
طيب أنا جيت ، وأهو إنت شايف النتيجة .
أصلا كل مرة إنتي بتجيهم زهجانة وبتطلعي منهم زهجانة ، لكن أنا ديل أهلي وما رايح أسيبهم .
والله على كيفك ، إن شاء الله تسكن معاهم بالمرة .
والله تعرفي أنا بس ما سمعت كلام الوالدة .
والله كان لازم تسمع كلام والدتك ، وما حد غصبك على شئ .
صحيح ، على الأقل ما كنت دخلت في مشاكل زي كده .
طيب هسة مافي حاجة راحت ، ممكن تمشي وتنفذ كلام والدتك .
بس ، بطلي الكلام الفارع بتاعك ده ، كلما ينبهوك لأخطائك دائما هو ده كلامك .
يا خي بالله وصّلنا البيت ، وما تعمل لينا حادث .
والله الواحد لو راح في حادث كان يكون أحسن من الإحراج اللي بيدخل فيهو مع أهلو بالشكل ده .
طيب وصلني أنا والولد وأمشي إنت في حالك .
يكون أحسن لو كل واحد يمشي في حالو .
شوف يا أخي لا تهددني ولا أهددك ، شوف اللي إنت عايزو وسويهو .
والله تعرفي لو ما الواحد بيحسب حسابات معبنة كده والله ما كان يتردد .
يا أخي لا حسابات ولا حاجة ، شوف اللي يريحك وريحنا من الجماعة بتاعينك ديل .
لا إنتي طولتيها ، لكن بوريك ، صبرك ، حا تشوفي .
خلاص ما في مشكلة .
يصلان منزلهما ، يصعدان الدرج ، ولا أحد منهما يكلم الآخر ، وحمادة لا يفهم ما يدور ، لكنه اختزنه في ذاكرته الصغيرة ، وهو يعرف تماما أن يوم الحاجة لهذا المخزون سيأتي .
| |
|
|
|
|
|
|
|
|
|
Re: مناكفات زوجــــــــية (Re: ودقاسم)
|
The Perfect Husband
There are several men sitting around in the locker room of a golf club after a round, showering and getting changed for the 19th hole. Suddenly a mobile phone on one of the benches rings. One of the men picks it up, and the following conversation ensues:
(H - Husband, W - Wife)
H - "Hello?"
W - "Honey, it's me. Are you at the club?"
H - "Yes."
W - "Great! I am at the mall two blocks from where you are. I just saw a beautiful leather coat. It's absolutely gorgeous!! Can I buy it?"
H - "What's the price?"
W - "Only $1,000."
H - "Well, OK, go ahead and get it, if you like it that much..."
W - "Ahhh, and I also stopped by the Mercedes dealership and saw the 2002 models. I saw one I really liked. I spoke with the salesman, and he gave me really good price .. and since we need to exchange the BMW that we bought last year..."
H - "What price did he quote you?"
W - "Only $60,000..."
H - "OK, but for that price I want it with all the options."
W - "Great! But before we hang up, something else..."
H - "What?"
W - "It might look like a lot, but I was reconciling your bank account and I stopped by the real estate agent this morning and saw the house we had looked at last year. It's for sale!! Remember? The one with a pool, English Garden, acre of park area, beachfront property."
H - "How much are they asking?"
W - "Only $450,000 -- a magnificent price...and I see that we have that much in the bank to cover..."
H - "Well, then go ahead and buy it, but just bid up to $420,000. OK?"
W - "OK, sweetie...Thanks! I'll see you later!! I love you!!!"
H - "Bye...I love you too..."
The man hangs up & closes the phone's flap. The other men are looking at him in astonishment and derision. The husband raises his hand while holding the phone and asks, "Does anyone know who this phone belongs to?" !!!!!
| |
|
|
|
|
|
|
|
|
|
Re: مناكفات زوجــــــــية (Re: ودقاسم)
|
استاذنا ود قاسم
حسب ما فهمت انه الزوجة لها جذور في الرطّانة ، يعني المسالة ما غريبة عليها خالص ، وحتى وان كانت لا تنتمي لهم فالمسالة ما معقدة ولا صعبة ، برضو ممكن تجامل اهل زوجها حتى وان كانت تجهل لغتهم وممكن بقليل من الدبلوماسية واللطافةتخلق معاهم موضوع ونسة مشترك ، وفي الاخر هم اهل زوجها وطفلهايعني عشان عين بتكرم الف عين وطالما هي احست انه زوجها يرغب في الجلوس معهم اكبر وقت ممكن ومبسوط في القعدة معاهم كان تقعد عشان خاطره ، وبهدوء ممكن برنامج الزيارة يكون حاجة ظريفة بالنسبة ليهابرضو .
| |
|
|
|
|
|
|
|
|
|
Re: مناكفات زوجــــــــية (Re: ودقاسم)
|
ودقاسم
تحية واحترام
بصراحة لك الفضل لاني والله ضحكت بصوت عالي بسبب المناكفة ذات الطابع النتن
في الواقع كنت اود ان اشارك من اول ما قريت النص الاول للبوست دا لانو لمست فيه مصداقية تعكس الواقع اشكرك على الطرح الجميل السلس
المناكفات الزوجية شئ لابد منه لان من المحال دوام الحال ومستحيل يدوم الود والحب على مدار الساعة لكن مقدار وحجم تلك المناكفات تكون مؤثرة على الحياة الزوجية عندما تكون اكبر واحجم من روابط الحب والإحترام والمودة فتميل كفة المناكفات وتصبح ذات صدارة قد تتكرر مرارا في اليوم الواحد فتصبح الحياة شبه مستحيلة
فقليل من المناكفات يلحق بالحياة تجدد وتستطيع إدراك قيمةاوقات الصفاء.. فتقدرها وتحافظ عليها
فبالنسبة لي اجمل الاوقات هي بعد المناكفات .. يعنى التنازلات والإعتذارات والتصافي ...
وكما أسلف البعض ان الحياة الزوجية هي نعمة من نعم الله علينا فيجب ان نحث كل الشباب على الزواج ....... فهو نصف الدين لان به حسنات كثيرة ومسؤليات عظيمة .. قدر ضئيل منها تحمل بعضنا البعض .. وتحمل اهل الزوج والزوجة .. وتحمل تربية الاولاد .. ووووووو
وتحضرني هنا قصة سيدنا عمر بن الخطاب وهو المعروف بالشدة القوة .. فقد كان يوصف بانه حين تحدث اسمع وحين ضرب اوجع لكنه رضوان الله عليه كان حليم وصابر على زوجه .. كما ذكر .. وقال الرسول الكريم صلوات الله وسلامه عليه انه إن صبر الرجل على زوجة متسلطة وصبر المرأة على زوج فاجر متسلط ما جزاءه إلا الجــــــــنة ......
دا طبعا مرتبط بأولويات الفرد منا
على العموم موضوع رائع ولك الشكر يا ودقاسم
سماح
| |
|
|
|
|
|
|
|
|
|
Re: مناكفات زوجــــــــية (Re: sama7-au)
|
العزيز جداً ودقاسم
| Quote: لكن التعايش مع هذا الحال ليس مستحيلا ، بالرغم من أنه في كثير من الحالات يكون صعبا ويحتاج إلى قدر كبير من الوعي المتبادل والتنازلات المتبادلة ، وقبول الهزيمة والنصر على أنها حالات مد وجذر طبيعية لا ثابت فيها ،، |
رغم أنني من فئة العزاب ولكنني تعايشت مع كثير من القضايا الزوجية وتفاعلت معها ورغم قناعاتي بأن الزواج ركن أساسي في المجتمع تتوافر فيه شتى الظروف ، أومن بأن دور الزوج والزوجة فيه كبير وشاق وزي ما ذكرت يحتاج لقدر كبير من الوعي المتبادل ، مع إحترامي لكل المتزوجين والمتزوجات وما يلاقوه من معاناة .
| |
|
|
|
|
|
|
|
|
|
Re: مناكفات زوجــــــــية (Re: معتصم دفع الله)
|
ود قاسم
قبل مدة كدة كنت فاتح لينا بوست عن الزواج والناس جو جاريين الأعمي شايل المكسر .. وحتوه وفتووه وقعدو معاك اسبوعين فى بيت العرس .. وصدقنا اللعبة وفرحنا .. بعد الكلام داك كلو تجـــي تقول لينا مناكفات زوجية وقفص حديدي وعكننة وحرد ومش عارف ايه .. حدد مواقفك عشان الناس دي تحدد مواقفه ... ما تقول لينا دا واقع وحقيقة وفقر ومزاج اسري وطقس عائلي .. ما بنفهم كلام زي دا
واذا ما دافعت كويس حانرفع القضية لي سلطات أعلي ؟
ولا عذر لمن انذر ..
مع تحياتي وتســلم ..
صـلاح / شتـات
| |
|
|
|
|
|
|
|
|
|
Re: مناكفات زوجــــــــية (Re: ودقاسم)
|
طبيخ أمي
تقترب ساعات العمل من نهايتها ، الزوج يشعر بالجوع فيعمد إلى سماعة الهاتف . يضرب الأرقام بسرعة مذهلة وكأنه يضرب أرقاما عشوائية ، ينتظر حتى يأتيه الصوت من الطرف الآخر ،،
أيوة يا حمادة ، كيفك ؟
كويس يا بابا .
أمك وين ؟
قاعدة .
أديني أكلمها .
طيب . ماما ، بابا عايز يكلمك .
أيوة يا مدام ، كيفك ؟
تمام الحمد لله ، وانت كيف .
تعرفي أنا جيعان خالص خالص ، عايز أجي البيت ألقى الأكل فوق السفرة .
حاضرين يا سيدي ، توصل بالسلامة .
طابخة شنو الليلة ؟
شنو يعني إنت ما عارف ؟
لا والله .
مش أمبارح أنا وأنت جبنا الملوخية سوا ؟
أها ... والله نسيت .. تصوري .
يلا بس سوق بالراحة وما تعمل ليك حادث وربنا يحفظك .
بلهفة ينتظر لحظة الانصراف ، ويهرول ناحية المصعد لتستقبله سيارته في موقفها المعتاد منذ التحق بهذه الشركة .
صوت وردي ينطلق من مسجل السيارة ، والمشوار إلى البيت ليس طويلا ، وهو دائما يتذكر وصية أم حمادة ،، لا تسرع .
فتح باب الشقة ، وصلت رائحة الملوخية إلى أنفه ، لكنه لا يشم رائحة قدحة التوم التي ارتبطت عنده بطبخة الملوخية ،،
غير ملابسه واتجه نحو السفرة ، فوجدها عامرة بالسلطة واللحم المحمر ، وطبق الملوخية يتوسط الجلسة . لكن أين وش الملاح ؟ أين القدحة ؟
قطع جزءا من رغيف وغمسه في طبق الملوخية ، ثم إلى الفم ، ، الطعم طعم ملوخية ، لكن كأنها رائحة الملوخية عندما تفركها بين أصابعك وهي في المزرعة ،،
أكل شيئا من السلطة ، وبعضا من اللحم ، لكن الملوخية فقد تظاهر فقط بأنه يأكل منها .
المدام أبدت دهشتها :
مالك ما أكلت الملوخية ؟ ما عجبتك وللا شنو ؟
لا والله ، اتخيلي أنا بتحصل معاي حالة غريبة جدا ، ألاقي نفسي فجأة انسدت .
غريبة والله ، يعني ملوخيتي كويسة ، بس إنت نفسك مسدودة ؟
آآي ، بس تعرفي لو كنتي سويتي ليها قدحة توم كانت تكون كويسة خالص .
يعني إنت شعرت بيها ناقصة حاجة ؟
لا ، بس أتذكر أمي كانت بتعمل دائما للملوخية قدحة توم .
يا أخي دي حركات نسوان عواجيز ساكت ، قدحة توم وكلام فارغ ،
لا والله هي كانت بتدي الطبخة شكل مميز وطعم مميز ، يعني أتذكر أمي كانت حريصة عليها .
يا أخي إنت والله حقو ترسل لي أمك دي تعمل ليك أكل وترسلو ليك .
ليه الكلام ده يا أم حمادة ؟
ما أنا شايفة كلما جبنا سيرة الأكل تقعد تقول أمي كانت ، وأمي فعلت ، وأمي تركت .
طيب ودي فيها شنو ؟
دي معناها إنو أنا ما بعرف أطبخ ، وإنو أمك بس هي الطباخة الماهرة .
لا والله ، ما كان قصدي ، بس الكلام بيجيب الكلام .
وهو دائما الكلام بيجيب نفس الكلام ، ما عندك سيرة غير أكل أمك ؟
طيب، مش أمي دي هي اللي ربتني ، وأنا اتعودت على طبخها من زمان .
خلاص من الليلة عليك بي طبيخ أمك ، خليها تجيب ليك طبيخ من هناك .
يا بت الناس الكلام البتقولي فيهو ده كلام ما صاح .
والله صاح ما صاح أنا قلتو ، واللي قلتو هو اللي شايفاهو .
طيب إنتي عايزاني دائما أقول ليك طبخك ممتاز ؟
لا ، بس طبخ أمك ده ما كل شوية تجيب سيرتو .
طيب ما أنا بطريقة لا شعورية بعمل نوع من المقارنة .
يا أخي مقارنة شنو ، هي المقارنة وين ؟
كيف ؟
يا أخي أمك البتقولا دي أنا ما أكلت عندها حاجة طاعمة خالص .
والله ؟
أيوة ، كلما نمشي ليها نلاقيها طابخة حاجة أكعب من القبلها .
والله ؟
أيوة . إنت قول لي متين نحن دخلنا عليها ولقينا عندها حاجة بتعجب ،
والله ده كلام غريب جدا .
الغريب شنو ؟
الغريب إنك دائما كنتي بتعلقي وبتقولي ياسلام يا حاجة تسلم إيدك .
دي كانت مجرد مجاملات ، لا أكثر .
يعني شنو؟
يعني إنت اللي شفتو عندي ده ، أمك ولا ربعه ما كانت بتعرف تسويهو .
يا جماعة ، المرة دي الليلة مالها ، جنت وللا شنو ؟
والله إنت المجنون ، أنا نصيحة وواعية ، بس هريتنا ، طبيخ أمي ، طبيخ أمي .
والله حاجة غريبة ،
ولا غريبة ولا حاجة ، غريب الشيطان .
يعني ده رأيك في أمي ؟
والله شوف الواحدة كانت دايرة تستر حالها ، لكين الناس ما بتسيب حدي في حالو .
طيب ، هسي أنا أسيبك في حالك ، وبعدين نشوف ،
نشوف ..... نشوف ، ما في مشكلة ، قال طبيخ أمي ... قال .
| |
|
|
|
|
|
|
|
|
|
Re: مناكفات زوجــــــــية (Re: ودقاسم)
|
أمها جاييية
بلغ الحمل ثمانية أشهر ، لكن كل تقارير المستشفى لم تقنع الجهات المختصة بضرورة حضور الوالدة لولادة بنتها ،، الزوج تردد كثيرا ، وامتعض ، لكن الزوجة قالتها بوضوح :
إما تجيني أمي هنا ، وإما أمشي ليها أنا هناك .
طيب إدارة الجوازات رفضت .
والله أنا ما عندي مشكلة إذا أمي ما قدرت تجي أنا أمشي ليها .
ممكن أعرف ليه لازم تجي أمك ؟
يا أخي دي حاجة إنت ما بتعرفها ، دي حاجة بتاعة نسوان .
يعني شنو حاجة بتاعة نسوان ، هم النسوان عندهم حاجات خاصة بيهم .
أيوة طبعا .
ممكن أفهم أكثر !
يا أخي مثلا منو اللي حا يدق الريحة ؟ منو اللي حا يسوي البخور ؟ السماية منو اللي حايشرف عليها ؟ منو اللي حا يضيف الناس اللي بتجي تقول مبروك ؟
طيب ، مثلا جارتنا ولدت بدون ما أمها تجي ، الحصل شنو ؟
طيب إنت بي نفسك شفت الكان حاصل ، ما في ولا حاجة واحدة كانت صاح ،
أو كي ، هي في النهاية ولادة ، ما لازم تكون مسألة وجاهات .
لا وجاهات ولا حاجة ، لكن أنا أصلا ما بتقارن بي جارتي دي .
يا بت الناس كلنا بشر .
يا أخي ده كلام بتقولوا انتو الرجال عشان تمشوا علينا بعض الأمور ، بس أنحنا عارفين كويس .
طيب أنا مطلوب مني شنو ؟
مطلوب تجيب فيزة زيارة لي أمي ، وما تكتر الكلام في الموضوع ده ، عملت لي نفسيات يا أخي .
طيب ، طيب ولا يهمك .
الناس دي كلها بتشتري الفيز ، وإنت قاعد تقول لي الجوازات ما وافقت ؟
طيب إنتي ما شايفة إنو الولادة ممكن تكلفنا كتير خالص بالطريقة دي ؟
والله تكلف زي ما تكلف ، ما هو برضو أنحن بنلد زي ما الناس بتلد .
الناس كلها بتشتري فيز للأمهات عشان يحضرو ؟ لاحظي برضو في تذاكر وتجهيزات وغيرو .
شوف يا أخي ، الناس اللي بتلد من غير أمهات ديل يمكن مقطوعين من شدرة .
أأأه ، أنا ما عايز أتكلم عن الناس بالصورة دي ، لكن عايز أقول إنو المقطوع من شدرة على اللسة قاعد ضمن شدرتو كلهم بشر .
يا أخي الفلسفة دي ما بتنفع معاي ، وده ما موضوعنا .
طيب بكرة خليني أشوف موضوع الفيزة ده ز
ليييه بكرة ، ما إنت عارف ناس عصام عملوا الحاجة دي ، أضرب ليهو تلفون خلي يوريك من وين جاب القصة دي ، وكم دفع .
طيب شوفي لي تلفونهم .
يا أخي ما التلفون في النوتة وانت عارفو ، مالك بتلكك .
طيب خلاص أنا بشوفو .
ونواصل
| |
|
|
|
|
|
|
|
|
|
Re: مناكفات زوجــــــــية (Re: ودقاسم)
|
والله يا ودقاسم المسالة فعلا عايز طق الحنك وبعدين المشكلة في الشرموط املعفن والتركين المتبالية بيهو المسكينة وحدها اما هو زواج سياحة بالنسبة ليه اغسلو ليهو واحشوه ووالخ فيفترض ان يسعى في هذا الامرويتزوج او يشتري ليهو امة تشوف طلباتو واحيانا طلبات اهلو ، انا ماعايز ارددكلام الحبوبات بان -الراجل جزمة لوضاقت تطلع واجي مركوب-او كما قالت احدى الاوربيات الرجال جزم لانستطيع ان نمشي حفاة ايبدونها -المسالة اكثر من هذا الادب المتبادل وهو كثير عايزين نبحث في علاقة باقل الخسائر . حتما راجعة انشا الله.
| |
|
|
|
|
|
|
|
|
|
Re: مناكفات زوجــــــــية (Re: عشة بت فاطنة)
|
ود قاسم..سلامات ..عوافي.
تعرف المسألة لا يمكن أن تكون خاضعة لمقاييس..والأنسان هنا حسب تجربته..
ولكن حياة العزوبية كريهة..وهن رحمة لنا..
وبعيد عن الجدية..
واحد قابل صديق بعد إنقطاع طويل.. ودار الحوار:
إزيك يا زول وين الحي بيك؟؟
والله أهو مع مصايب الدنيا والشقا.
مالك يا زول؟؟
والله إتزوجت والمرا ماتت في الوضوع.
لا حولة لله..البركة فيكم.
الله يبارك فيك..واتزوجت تاني وبرضو إتوفت رحمة الله عليها..
يا سلام البركة فيك والله لكن كدي تعال نسألك ..
إنت النسوان البيموتو ديل بتلقوهم وين؟
لك ودي..
| |
|
|
|
|
|
|
|
|
|
Re: مناكفات زوجــــــــية (Re: ودقاسم)
|
عرف الزوج من صديقه تكلفة الفيزا ، وتتبعها تكلفة التذكرة والرسوم والتجهيزات الأخرى ، وكل هذه الأمور تسير مع بعضها وتمثل أولوية واحدة عند الزوجة ، فهي مشروع لا يمكن تأجيل بعضه ولا يمكن قبوله ناقصا ،
أها ، لقيتو ؟
منو ؟
عصام
آي لقيتو ، بس الموضوع ده مكلف جدا ،
تاني رجعت لنقطة البداية ، ما نحن اتفقنا إنو الموضوع لازم يبقى ، مكلف أو غير مكلف .
طيب ... طيب ، مافي مشكلة بس التكلفة دي ما عايزة ترتيبات ، وخطة ، ومراجعة حسابات ،
يا أخي حسابات شنو ؟ إنت طول عمرك مقطع وما عايز تطلع من الحتة دي ؟
حتة شنو يا بت الناس ؟
يا أخي الناس دي كلها متحركة وشغالة ليل نهار ، إنت باقي لي على شغلة واحدة بس .
طيب أنا أصلا عندي وكت أشتغل فيهو شغلانية تانية ؟
دائما يا ها حجتك ، طيب ما تشوف الشركة دي تحسن ليك أوضاعك شوية .
أأأه ... هي المسألة مسألة إنو أنا أشوف وللا الشركة دي عندها نظام ولوائح وغيرو
يا أخي ما هو الناس دي كلها بتعرف تطلع حقها ، بس إنت ساكت ، وكلما سألناك من شئ قلت إمكانياتي ضعيفة .
طيب كدي خلينا في موضوع جية أمك .
أمي حا تجي يعني حا تجي ، بس إنت عالج أمورك .
طيب يعني المسألة ممكن تكلفنا قريب العشرة ألف .
وكتيرة علي أمي بالله ؟
لا .. أبدا هي مش كتيرة على أمي هي كتيرة على ظروفي أنا .
يا أخي إنت عايز ولادة مجان ، ما أصلها الولادة بتكلف .
طيب ، مافي مشكلة بس التكلفة تكون معقولة .
ما هو المشكلة إنت ما عرفت تعمل ليك واسطة وللا علاقات تحلحل بيها مشاكلك .
زي شنو يعني ؟
يعني مثلا كان ممكن يكون عندك صاحب في الجوازات عشان يساعدك .
طيب وبعدين يعني أنا في كل حتة أحتاج أعمل فيها إجراء يكون لي صاحب ، معناها أصاحب الدنيا كلها .
يا أخي إذا كان المسألة فيها مصلحة مالو ما تصاحب .
يعني علاقاتي كلها تكون مبنية على المصلحة وللا كيف ؟
يا أخي شوف نوع الكلام الخيالي ده شبعنا منو ، كل الناس دي شايفه مصالحها .
يا لطييييف ، أنا والله في ورطة كبيرة جدا جدا .
يا لا ورطة ولا حاجة ، خلاص سفرني أنا ألد عند أمي .
ودي حا تكلف كم ؟
والله ما عارفة ، جهز لي هناك كل حاجات الولادة وأنا مستعدة أسافر .
طيب ممكن نعرف شنو هي حاجات الولادة ؟
والله طبعا إنت عارف نحن ما عندنا أوضة نوم هناك ، وبكون عايزة لي مكيف كده ، وبعدين سراير كده للصالة ، وطبعا ملايات وسجادتين تلاتة ، والريحة , والبخور ، وطبعا عايزة تجهيزاتي الخاصة للولادة ، يعني قمصان نوم وأرواب ، وملابس داخلية ، وطبعا خمسة ستة تياب ، وحاجات البيبي ، يعني ملابسو ، وسريرو ، والبامبرز طبعا ، والرضاعات ، وحليب الأطفال ، وطبعا إنت عارف السماية والعوازيم ويمكن الناس هناك تطالبني بي حفلة .
طيب خليني بكرة أعمل دراسة مقارنة عشان أعرف أختار بين سفرك وجية أمك .
يا أخي إنت بتتريق على منو؟
لا والله ما بتريق ، لكن المسألة كده ... كده واضح إنها ما نافعة .
والله شوفو عندك ، وأنا كنت قلت ليك حملني .. وللا حملني .
| |
|
|
|
|
|
|
| |
ودقاسم
mohamed elshiekh
ترهاقا
الطيب بشير
Wad Ballal
Outcast
abuguta
ابو جهينة
مهاجر
shiry
nazar hussien
smart_ana2001
sama7-au
معتصم دفع الله
شتات
عشة بت فاطنة
فيس بوك
تويتر
انستقرام
يوتيوب
بنتيريست