|
لحظة يا ناس الغنا ... سأجــــــــــرب فيكم
|
حبيبتي غنوة ريد وترياق للحزانى وسقيا لي جوف العطاشى وهدهدة ريد لليتامى
بي ابتسامتا العنيدة تقيف توزع فينا ريدة في الوسامة وفي قواما وفي قناعاتا الجديدة دعوة للشوق اللي غاب وفرحة بي الأمل اللي آب وسنين عذاب ترحل بعيد تصبح سراب
وحبيبتي غنوة ريد وترياق للحزانى وسقيا لي جوف العطاشى وهدهدة ريد لليتامى
في الرؤى الحالمة وهنية وفرحة أعراسنا البهية وفي صباحنا وفي مسانا لي الصبايا ولي شبابنا تهدي شلالات فرح وبي ابتساماتا الندية وخفة الروح الشجية تنثر أزمان المرح وترحل أيام الشقا الممزوجة بي لوعة جرح
وحبيبتي غنوة ريد وترياق للحزانى وسقيا لي جوف العطاشى وهدهدة ريد لليتامى
في سجاياها الفريدة في حناياها البعيدة فرحة للطفلة المريضة وعافية لي كل الغلابة وفي خطاها البشتهيها ريدة تطرق كل باب وغيمة للأرض اليباب تغشى زهراتنا الحزينة في قرانا وفي المدينة تمسح أيام العذاب
وحبيبتي غنوة ريد وترياق للحزانى وسقيا لي جوف العطاشى وهدهدة ريد لليتامى
|
|
|
|
|
|
|
|
Re: لحظة يا ناس الغنا ... سأجــــــــــرب فيكم (Re: ودقاسم)
|
الاخ ودقاسم طبعا انا اخر من يفتى فى الشعر لكن قصيدتك دى "ملقمه عديل" جاهزه مويه و نور,,,, خاصة
Quote: في سجاياها الفريدة في حناياها البعيدة فرحة للطفلة المريضة وعافية لي كل الغلابة وفي خطاها البشتهيها ريدة تطرق كل باب وغيمة للأرض اليباب تغشى زهراتنا الحزينة في قرانا وفي المدينة تمسح أيام العذاب |
| |
|
|
|
|
|
|
Re: لحظة يا ناس الغنا ... سأجــــــــــرب فيكم (Re: ودقاسم)
|
ود قاسـم يا حبوب مع غنيوتك إتذكرت زمن سمح...منتدى مركز شباب أمدرمان و منتدى الحروف و إتحاد شعراء الأغنية ...زمن الزمن نصف زين كنا نسمع بعضنا {تجاربنا} و يجود علينا الحضور بآراء ناقدة عرفت وقتها ب{السمكرة} أي أنهم يسمكرون مع الشعراء المبتدئين قصائدهم بتبيان مواضع الخلل الوزني أو المعنوي أو {البنيوي} أو ما شابه...و أثبتت تلك الطريقة أنها أفضل ألف مرة من التدريس الممل للكتب القديمة, فالسمع و القراءة -برأيي- هما المدخل لصقل التجربة.
| |
|
|
|
|
|
|
Re: لحظة يا ناس الغنا ... سأجــــــــــرب فيكم (Re: الطيب بشير)
|
الطيب أبو البشير أخاف ناس مركز شباب أم درمان لو مشيت ليهم يقولوا لي : زمانك فات وغنايك مات ،، وأنا عشمان في الغنايين الما ماتوا ،، بعدين يا أخي ما تسمكر معانا ،، وممكن بعدين يقولوا كلمات فلان وعلان ،، وكان فيها رزق نتقاسمو ،، لك التحية والمحبة
| |
|
|
|
|
|
|
Re: لحظة يا ناس الغنا ... سأجــــــــــرب فيكم (Re: الجندرية)
|
الجندرية أنا مالي ومال تنزيل الأغاني ، تمبس وأحمد سعيد قريبين جدا ، بالتلفون ، بالسكة ، أو أرسل شتات ، أو معتصم دفع الله ، أو محمد الشيخ ، كلهم أولاد أختي ،، والمسألة تنقضي زي لمح البصر ،، لا وشنو ،، كمان تمبس الأيام دي بيجمع لي في تسجيلات ما حصلت ،، بس الغنية حقتي دي كان لحنوها وغنوها أهلا وسهلا ، وكان ما لحنوها أنا بلحنها براي ، وبكوّن فرقة من فوزية وفدوى وطلال وزياد وقاسم ونأجر مسرح قاعة الصداقة ليلة كاملة ونقدمها من هناك ،، وبعد ما نخلص نعمل شكلة ونفرتك الحفلة ، بعد ما نكون استلمنا الفلوس ، ، أنا كلمتك من بدري ، كلمي عثمان وما تحضروا اليوم داك عشان ما تتفلقوا ..
| |
|
|
|
|
|
|
Re: لحظة يا ناس الغنا ... سأجــــــــــرب فيكم (Re: haneena)
|
حنينة يا خواجية يا ظالمة ،، سمسرة الخواجات كلها ما كفتك ، جاية على عشرة بيوتي ديل تسمسري فيهم ؟ شوفي يا حنينة أنا حاليا أمارس نوع من الابتزاز والترهيب ، أهدد بإنشاء فرقة ، وإن لم ينجح الابتزاز فسألجأ للسمسرة وأكيد مش ها نديها لسمسار غيرك ،، بس المشكلة جنّك قروش ، ما عارف أسوي معاك شنو .. والمشكلة أنو صاحبي الموصلي غائب ، وخدر لازم ياخد الإذن من بارعة ،، وبارعة مشغولة بغسيل العدة ومسح السيراميك ،، وفعلا مشكلة ،،، بس برضو أنا مش ها أتنازل بسهولة ،، أنا ودقاسم ،، مش أي حد تاني ،،
| |
|
|
|
|
|
|
Re: لحظة يا ناس الغنا ... سأجــــــــــرب فيكم (Re: ودقاسم)
|
تعرف ياودقاسم.. زى ما قال الطيب بشير، شوية سمكرة وبوهيه وناس التجانى حاج موسى يروحو شمار فى مرقه، لاتقول لى مظاليت الهوى ولاتقول لى اظلط من ظلط..بالمناسبة دى قراية واحد اخونا اسمو الفنوب.. وبعدين حنينة دى طوالى دايرة تدخل سمسره، ما تخلو الناس تاكل عيش يا ناس ال fish&chips
| |
|
|
|
|
|
|
Re: لحظة يا ناس الغنا ... سأجــــــــــرب فيكم (Re: bushra suleiman)
|
بشرى سليمان ممكن تورينا كيف أكلت عيش من الشغلانة دي ،، اتهيالي إنها ما بتجيب همها ،، حنينة عايزة سمسرة ، والطيب بشير عايز يسمكر ، وطبعا عايز حق السمكرة ، وبشرى مطلوب منه التسويق وطبعا عايز حق التسويق ، والموصلي وخدر عشان ينتبهوا للبوست ده عايزين اتصال تلفوني وده طبعا بالقروش ، والمشكلة الأكبر ،، كلام رجاء ،، قالت شنو حكاية الرومانسية دي الأيام دي ؟ تصور زوجتي كانت طول الفترة دي نايمة وما جايبة خبر ،، قام سؤال رجاء ده صحاها من نومتها ،، أمبارح سألتني : صحي شنو حكاية الرومانسية دي ؟؟ يا جماعة أنا بطلت الموضوع ده ، وتاني لو شفتوني كتبت كلام زي ده اقطعوا لساني ،، أقصد أصابعي لأنني أتكلم بها معكم ،،
| |
|
|
|
|
|
|
Re: لحظة يا ناس الغنا ... سأجــــــــــرب فيكم (Re: صديق الموج)
|
صديق الموج مالك مطول الصفحة كده ، حافظ على الباندويدث بتاع الراجل ، لأنه يحتاج لباندويدثه تماما كما تحتاج أنت لباندويدثك ،، عارفك جديد وما عارف حكاية الباندويدث ،، ولأحمد الريح حكمة يقول فيها ( ودقاسم يقتل الباندويدث ويمشي في جنازته ) يا أخي والله كتر خيرك شبهتني بصلاح إدريس ،، حقيقة أنا مفتون به ،، ليس كشاعر ، ولكن كمغترب اغتني ،، يا أخي لو بتعرفوا ما تجيب لينا منو بعض المعلومات ،، وتنزل لينا بوست ( على لسان صلاح إدريس : كيف يغتني المغترب ؟؟) أنا بس يا ود الموج عايز الناس في بلدنا لما يفتحوا الرادي الصباح بدري وبعد ما يسمعوا الأموات في نشرة ستة ونص ، يسمعوا المذيع يقول والأغنية من كلمات محمد قاسم ،، ده كل الموضوع وأنا مش عايز أبيع ، أنا ممكن أدفع ،، أصلو يا صديق عندي خطة أنزل الانتخابات الجاية في دايرتنا ،، بالله لو عندك صاحب مغني أو ملحن خليه يفكر يساعدني في الدعاية الانتخابية بتاعتي ،، وكتر خيرك والله يا صديق ..
| |
|
|
|
|
|
|
Re: لحظة يا ناس الغنا ... سأجــــــــــرب فيكم (Re: ودقاسم)
|
اخوى ودقاسم تعرف الشغلانيه دى ما بتأكل عيش، برغم كل الغنا الكتبتو وسجل فى الا>اعة والتلفزيون والكاسيت، ماقبضت غير عشرين جنيه؟ اى والله عشرين جنيه فقط حقة اغنية يوسف الموصلى، وده كان فى زمن غابر، باقى الفنانين يسجلو الغنا ويقبضو نيابة عنا ولمان تلاقى الواحد بعد مده يقول ليك خليها على الله .. بعد داك قلنا احسن نشوف درب الاغتراب، ومن ديك وعييك.. حسى قلنا احسن نألف بالانجليزى ندى واحدة منها لى بريتنى اسبيرز واللا كريستينا اقوليرا أو جستن تمبرليك ، يمكن تضرب معانا وناكل عيش جد
| |
|
|
|
|
|
|
Re: لحظة يا ناس الغنا ... سأجــــــــــرب فيكم (Re: bushra suleiman)
|
الزميل بشرى سليمان تعرف يا بشرى كان جدي محمد قاسم كان رجلا شاعرا ومغنيا مشهورا بمنطقتنا ، وقد توفي في شبابه وترك سيرة عطرة بين الناس ، لكنه الوحيد بين جدودي الذي أورثنا الفقر ، فقد مات باكرا ولم يرث ، كما أنه كان يقيم حفلاته في ذاك الزمن مجانا ويسهر الليل فيبح صوته من الطمبور والغناء ، ولا يكسب إلا بضعة شبالات ،، ودائما يذكرني بالتروبادور في أوروبا القديمة ، كانوا يقرضون الشعر ويغنونه ويقدمونه للناس في الشوارع وفي الحدائق ، ولا يتكسبون من صنعتهم شيئا ،، بدأت بعض الكتابات باكرا ، وقد تسلط عليّ يوسف الطيب وإبراهيم السر وأبعدوني عن الكتابة لنتجه نحو المتع الأخرى ،، وما في داعي للدخول في التفاصيل ،، ثم عاودتني الحالة في بدايات الغربة ، لكن استعجالي الزواج لم يمنحني الفرصة كما أنني كنت أمل الكتابة باليد والقلم ،، والآن الكي بورد سهّل المسألة كثيرا ،، وزي ما قلت ما عايز قروش ، بس عايز دعاية انتخابية للانتخابات الجاية ،، عايز أكون برلماني ويمكن أكون رئيس البرلمان ذاتو ..
| |
|
|
|
|
|
|
|