|
منتصر عبدو يتزوج عبر سودانيز أون لاين ،، ومن ورانا يا بكري
|
وأنا أهم بلملمة أطرافي في نهاية مباراة الأمس بالرياض على نهائي كأس الاستقلال ، والذي فاز به فريق الكلاكلة ،، فإذا بشاب وجيه يتقدم إليّ ويمد يده بالسلام ، ويسألني عن بقية مجموعة سودانيز أون لاين ،، مددت يدي في اتجاه جلسة الزملاء تمبس ، شتات ، معتصم دفع الله ، اسماعيل وراق ، صديق الموج ،، ثم انشغلت قليلا بالحديث مع بعض عضوية رابطة الصالحية الرياضية ، ومجموعة القناة الإخبارية السعودية ،، وعدت لأنضم إلى مجموعة البورداب ، فإذا بالشاب الوجيه يأتي إلينا ويسلم علينا واحدا واحدا ، ويعرفنا على نفسه ،، منتصر عبدو ،، واضح من لكنته ومن سحنته ومن اسمه أنه حلفاوي ،، لكنه لم يمنحنا فرصة للتحليل بل قالها فورا ، أنه حلفاوي ،، حتى هذه اللحظة كنت أعتقد أن الأخ منتصر سيفاجئنا بأنه أحد بورداب الرياض المختفين ،، لكن فضّل إرسال مفاجأة أخرى ، قال منتصر : يا جماعة أنا تزوجت من موقع سودانيز أون لاين ،، فوقف كل الذين كانوا جلوسا ،، وفتح اسماعيل وراق عينيه من هول المفاجأة ، وانتفض تمبس يتساءل : اتزوجت منو يا خوي ؟ أما صلاح شتات فقد فقر فاهه من هول المفاجأة واكتفى معتصم بابتسامته الصافية ،، وللمفاجأة ، كان الغتيت صديق الموج يعلم رأس الخيط ،،( بكري حقو ترفد صديق الموج عشان بتآمر على سوانيز أون لاين ) ،، قال منتصر : والله يا جماعة أنا بكلمكم جد ،، أنا حبيت ، وخطبت ، وعقدت ، على واحدة أخدت إي ميلها من سودانيز أون لاين ، وراسلتها ودخلت معاها الشات ، إلى وصلنا مرحلة عقد القران ،، تساءل تمبس بخوف ووجل : أسمع يا خوي ، ما تقولينا هي منو ؟ حاولت أن أنبه تمبس إلى أنّ منتصر أصبح نسيبا لنا ولا داعي للغلظة معه ، لكن تمبس بلغ مرحلة تطاير الشرر من العينين ، وهو يقول بصراحة : يا خال ، ما في هظار في الجيكس ،، وتخرج من صلاح شتات ضحكاته تلك ، مختلطة ببعض حديث : يا خال ما تخلي الراجل ده يجاوب على سؤال تمبس .. ويعيدنا اسماعيل وراق إلى الجادة بنزعته التنظيمية : يا جماعة إنتو أصلا الراجل ده ما أديتوه فرصة عشان يتكلم ، والله يا ود قاسم إنت دائما فاشل في إدارة الجلسات .. طيب يا منتصر يا أخي اتكلم وورينا عندك شنو .. وبهدوء شديد يرد منتصر : يا جماعة ، مش في حاجة اسمها دليل الخريجين في سودانيزأون لاين ؟ وعلى طريقة الجوقة قلنا جميعا : أيوة .. قال منتصر : أنا بقت دخلت دليل الخريجين ده ،، ولقيت واحدة مسجلة هناك ، خريجة 2002 ، قمت سرقت الإي ميل حقها ،، ورسلت ليها رسالة ،، وبعدين استمرت الرسائل إلى أن تزوجنا ،، طيب يا منتصر ، إنت لسة ما شفتها ؟ لا ،، ما شفتها ، بس طبعا شفت الصورة وأهلي شافوا الأصل ،، أما الونسة طبعا اتونسنا كتير ،، هدأ روع تمبس ، حين اكتشف أن العروسة لا تنتمي للبورد ، وإنما تنتمي إلى فرع آخر من قبيلة سودانيز أون لاين ،، وبارك الجميع لمنتصر عبدو وعروسته زيجتهما ، وتمنينا لهما حياة زوجية سعيدة ،، والغريب أن منتصر وتمبس طلعوا أولاد حي واحد .. وقلت لمنتصر : إنت يا منتصر أكيد جيت فتشت عننا وتعرفت علينا باعتبارنا أهل العروس ،، فرد منتصر : بالضبط كده ،،
وهكذا يكون البورد وطنا لنا نحن ساكنيه ،، ووطنا لغير ساكنيه أيضا ،،
|
|
|
|
|
|
|
|
Re: منتصر عبدو يتزوج عبر سودانيز أون لاين ،، ومن ورانا يا بكري (Re: ودقاسم)
|
ودقاسم الكبير تحية أكبر منك
( و ناسبنا البورد .. و بقينا قرايب .. و ناسبنا البورداب و بقينا حبايب ) الأغنية دي مسروقة من فيلم ريا و سكينة ..
مبروك لإبن العم منتصر و عروسته السايبرية .. و بيت مال و عيال و بالتوفيق .. طبعا بعدين يا منتصر أولادك حيكونلا أخوان بالنت مع بقية المتزوجين عبر النت ( زى أخوان بالرضاع ) .. أما المال لو جرى في إيدك .. فنحن و بكري شركاء في الأرباح فقط .. و ود قاسم ليهو ( زيادة بحق المناولة )
| |
|
|
|
|
|
|
Re: منتصر عبدو يتزوج عبر سودانيز أون لاين ،، ومن ورانا يا بكري (Re: ابو جهينة)
|
والله ياخال الواحد اصلو ما يقدر ياخد راحتو معاك في حوارات حيوية زي دي ... انا كان عارف كده كان منتصر ده سقتو علي الجمب وفكيت فيك الموج . وشتات ومعتصم..
منتصر بيعمق فكرة البورد الوطن وبيعمق فكرة انو المساحة اتعدت اكتر من كونها مساحة سايبيرية لي واقع معاش بنمارس فيهو وجودنا بكل واقعيه.. غير منتصر كتيرين استطاعو انهم يهزمو الفكرة دي ودي تجربة جديدة تضاف للرصيد الاجتماعي بالبوردالعناصر فيها خارج نطاق العضوية المعروفة والمتفق عليها .. ولي ملاحظة صغيره برضو عن وجود سودانيز أون لاين في الخارطه الاجتماعية بالرياض من خلال المشاركات المختلفة في كل الفعاليات الاجتماعية من خلال الدعوات المعنونه بأسم المجموعة.. والتركيز علي المجموعة وتسليط الضوء وفتح مجالات مختلفة للحوار . اهني منتصر ومدام منتصر .. وتمنياتي ليهم بحياة زوجية سعيده .. وزي ما ذكرت ياخال انو منتصر للصدفة الغريبة طلع ود جيرانا الحيطه بالحيطة .. نسبة لي صلتو بي اسرة معانا في نفس الحي العريق المورده. وعلشان كده سارعته اني اشيل تلفوناتو علشان اعرف الوصفه السحرية بتاعت دليل الخريجين دي .. ( فاتت علي كيف ما عارف )
وبالمناسبة دي ياخال البلقاهو ( بيزازي ) في دليل الخريجين بي هناك ( بعوقو ) برانا اعصابنا بايظه الايامات دي
| |
|
|
|
|
|
|
Re: منتصر عبدو يتزوج عبر سودانيز أون لاين ،، ومن ورانا يا بكري (Re: tmbis)
|
تمبس كيفك أنا متأكد أنك لا تزال تحت تأثير الصدمة ،، Quote: منتصر بيعمق فكرة البورد الوطن وبيعمق فكرة انو المساحة اتعدت اكتر من كونها مساحة سايبيرية لي واقع معاش بنمارس فيهو وجودنا بكل واقعيه.. |
بس أظنك يا تمبس تتذكر فرحة منتصر بلقائنا ، هذا أكثر ما شدني في كل الموضوع ،، يعني حتى زوار سودانيزأون لاين يعرفون قيمة أن المنبر يمثل وطنا ،، ربنا يوفقكم يا منتصر ويهنيكم ،،، يارب ويا تمبس حالة الاحتكار دي أحسن تتخلى عنها ، عشان ما تجيك يوم شغلة توقف قلبك ،، وربنا يحفظك من كل شر ..
| |
|
|
|
|
|
|
Re: منتصر عبدو يتزوج عبر سودانيز أون لاين ،، ومن ورانا يا بكري (Re: ابو جهينة)
|
الغالي أبوجهينة أشكرك على التهنئة نيابة عن منتصر ، وهو شاب وسيم ووجيه ، وأنيق ، ويستاهل كل خير ،، وقد تعامل معنا بأريحية وبشفافية عالية ، حين قلنا له أننا سنكتب قصته في البورد لم يتردد مطلقا ، وأعطانا الضوء الأخضر ، واسمه بالكامل ،، وما دام حق المناولة يدينا زيادة فإننا سنسعى لمزيد من المناولات ..
| |
|
|
|
|
|
|
Re: منتصر عبدو يتزوج عبر سودانيز أون لاين ،، ومن ورانا يا بكري (Re: ودقاسم)
|
طبعا الما قالوا ليكم ود قاسم ...حا اقولو ليكم انا ودقاسم قال لى منتصر بالله ممكن تقول لى الطريقة مرة تانية ياربى ود قاسم ده يكون قاصد شنو يا تمبس؟؟؟؟؟ ما الطريقة القادرية ..طريقة الزواج من خريجة عبر سودانيزاونلاين وقال لى يا ابو الامواج يا اخوى نحن مضيعين زمنا فى الشكل مالنا ما نمشى على الخريجات ديل..وانا جناح فوزية طبعا قلت ليه عيب يا خال ..لكن الله يستر..رايكم شنو؟؟بالله انفع اجج مشاكل؟؟
| |
|
|
|
|
|
|
Re: منتصر عبدو يتزوج عبر سودانيز أون لاين ،، ومن ورانا يا بكري (Re: ودقاسم)
|
حسع نقول شنو تلاقوا ود عمي وتخطب ليه وتزوجيه ونحن ما عندنا خبر ماكان العشم صديق الموج (الباشكاتب) انا ضدك وحأشجع فريق الموردة الموردة تلعب . . . . اول حاجة ليه ما علمتونا انو في مباراة وتانياً انا من مواطني الكلاكلة وكنت حاشجع فريقي العتاب هنا للخال ودقاسم والزعيم ودوراق كنا قضينا معاكم امسية ولا عصرية في الصالحية
| |
|
|
|
|
|
|
Re: منتصر عبدو يتزوج عبر سودانيز أون لاين ،، ومن ورانا يا بكري (Re: حمزاوي)
|
حمزاوي يا دفعة إنت من يوم البطيخة التقيلة الجبتها شايلها يوم بيت قرنفل وأمورك ما تمام ،، يمكن ياشقي الحال ( دي شايقية ) البطيخة قطعت فيك عرق ،، وبقيت ما بتشوف ،، مالك ما شفت البوست حق المباراة دي ؟ بعدين قطعت تلفونات خالص ،، ودعمك والله ورطتكم عديل كده ،، عروسته جعلية ،، يعني قمة أهل العوض ،، شيلوا شيلتكم يا الحلفاويين ،،
| |
|
|
|
|
|
|
Re: منتصر عبدو يتزوج عبر سودانيز أون لاين ،، ومن ورانا يا بكري (Re: Kostawi)
|
يا دوب نحن ما عرفنا الوصفة السحرية يا خال .. بس يا تمبس إنت وشتات ما تجو حائمين بي هناك بعوقكم .. تعرف يا خال .. علاقتي بي منتصر علاقة جميلة بدأت داخل الملعب فهو حكم كورة ممتاز .. وبما أني كابتن للفريق فأول حاجة أحتك بيها هي الحكم ومن هنا جاءت المعرفة .. وتعمقت وتوطدت بيانتا فإنتقلت من داخل الميدان إلى خارجه .. ومنتصر إنسان يجبرك على إحترامه بأدبه وأخلاقه العالية .. وأظنك لمست ذلك بنفسك وكل البورداب .. وأنا من هنا أرسل له التهاني الحارة ودعواتنا له بحياة زوجية سعيدة .. وكده يا خال أكدت لنا بحق أنك كبيرنا .. بس المره الجاية ماتنسى تكلم أخونا حمزاوي يجي يحضر مبارياتنا ..
| |
|
|
|
|
|
|
Re: منتصر عبدو يتزوج عبر سودانيز أون لاين ،، ومن ورانا يا بكري (Re: بكرى ابوبكر)
|
بكري الريس وابن أختي لك التحية ، وأجدد لك التهنئة على هذا العمل الرائع ( سودانيزز أون لاين ) فعلا هناك الكثير مما قدمته سودانيز أونلاين ، للمحبين وللعزاب ، وحتى للمتزوجين أمثالنا ، ودي حا أشرحها في وقت تاني ،، وتعرف يا بكري أن سودانيز أولاين منحت كتابها شهرة ، وعرفتهم بالمتابعين والقراء ، وقد قابلني أناس عديدون يسلمون ويعرفونني بأنهم تعرفوا على من خلال المنبر ،، بس ما قلت يا بكري ، ما حد دفع لك حاجة ؟ كلهم أكلوا وقشّوا خشومهم وسكتوا ؟؟
| |
|
|
|
|
|
|
|