|
|
 أخي يستولي على الثروة
|
من وسط هدوء الفجر ينبعث صوت أمي قادما من الطرف الغربي لحوشنا العتيد .. تبدو أمي هذا الصباح ممتلئة بالحنق ، تخاطب بحدّة شخصا عاقلا يقف أمامها ، وتعنّفه على فعلة شنيعة ، وبدا لي من بعيد وكأنها تهم بضرب ذلك الشخص صاحب الفعلة الشنيعة ، دون أن يردّ هو حتى ولو بكلمة واحدة ..
الله يلعنك ، يا خايبة ، يا عايبة ..
تساءلت ، من هذه التي تعرّض نفسها للعنات أمي في هذا الصباح الباكر ؟ من هذه الأنثى التي رمتها أمي بالعيب والخيبة ؟ من هذه التي سبقت أمي لزريبة الغنم ؟ ومتى فعلت فعلتها التي تعنّفها أمي لأجلها ؟
كانت أمي قد قامت للتو من صلاتها ، وحملت مسبحتها في يدها ، واتجهت إلى زريبة الغنم ممنية نفسها بحليب وافر لتصنع لنا منه شاي الصباح . وكان الجو يميل إلى البرودة ، فنحن الآن في منتصف الشتاء . والغنم – في هذا الموسم - عادة ترقد ملاصقة لحائط الحوش عله يصد عنها رياح الشتاء ، أو تلتصق ببعضها البعض .
يا حاج ،، يا حاج ،،
هرول أبي ناحية زريبة الغنم من جهة انبعاث صوت أمي .
آآي يا حاجة ،، مالك ؟
ما قتّ ليك العنز دي بقت ترضع رقبتا ،،،
تاني الليلة رضعت رقبتا ؟
آآي والله ، ضرعا ما فيهو ولا نقطة لبن ،،،
والله أنا البراح فقدت الغنم ديل قبّال ما أنوم ، شايف ضرعا مليان لبن ..
أها ، هسة تعال شوفا ، مداينة الله ما فيها ولا نقطة .
نان منو القال ليك رضعت رقبتا ؟
عاد لبنا مشى وين ؟
يمكن رضعو واحد من الصخلان .
بري والله ، أخير توديها السوق تبيعا ونرتاح منّها ، مادام عابت وخابت ..
حمدت الله أن هذه اللعنات كانت موجهة لمعزتنا ، لكن غشتني سحابة حزن حين تخيلت أنها ستباع في السوق ، وربما لأحد الجزارين ليذبحها ويفرّق لحمها بين القبائل ،، وفي الضحى استمعت إلى أخي الأصغر وهو يلاعب ابنته الضغرى ،،،،
أها كيف الليلة شربتي لبنك كلو ؟
لا باقي لي شوية ، هسة بشربو .
يضحك أخي ، ويقول لابنته :
والله صحي لبن الماعز بسمّن الشفّع .. الأيام دي سمنتي ، لكن والله حبوبتك دي تعرف تمرقنا من البلد ..
سألت أخي :
إنت بتحلب العنز دي لأولادك كل يوم ؟
قال : أيوة ،، ومال إيه ؟؟
طيب يا أخي مش كان تكلّم أمك ؟
الزمن ده يا خوي ما في كلام ، ولا إذن ، بس تضحى بدري وتستولي على الثروة ....
|
|
 
|
|
|
|
|
|
|
|
Re: أخي يستولي على الثروة (Re: ودقاسم)
|
الخال ود قاسم
كان المفروض تكلم الحاجة ويكون في توزيع عادل للثروة .. وشكلواحايكون توزيع ساهل مادام هي ثروة فقط بــــدون سلطة
والحمد لله الخابت المعزة
ولك ودي
خالد
| |
|
|
|
|
|
|
|
|
|
Re: أخي يستولي على الثروة (Re: ودقاسم)
|
الخال ودقاسم ...
ما عارف ابداء ليك من وين بوستك دا يوجع قلب المشتاق، بالذكريات الجميلة للزريبة والحوش والتكل والنفاج والطاقة والحلة وما شابه ذلك، واجمل ما فيهو مخاطبة الامهات والجدات للغنماية والخروف والكديسة والحمامة والجداده وكل الحيوانات اصدقاء المنزل بمخاطبة اصحاب المنزل وجزء من ملاكه ياخايب وعايبة ويا .. ويا ، بالمناسبة ديل ذاتهم عندهم جزء في مسألة اقتسام الثروة والسلطة دي "بالتتابع"..| Quote: الزمن ده يا خوي ما في كلام ، ولا إذن ، بس تضحى بدري وتستولي على الثروة .... |
كيف نقـــسم السلطـة؟؟ ..
تخــــريمة:
شكلك كدا يا خال مفكر في الضحية والخروف من بدري والا ما كانت تصحي اصبحت تضحي بيني وبينك هي في النهاية تضحية.
| |
|
|
|
|
|
|
|
|
|
Re: أخي يستولي على الثروة (Re: ودقاسم)
|
العزيز أبو طلال
حلوة حكاية " العنز " أو البقرة التي ترضع رقبته!!! لكن الحكاية دي في بعض الأحيان صحيحية!!
أعجبتنى القصة. وهي تنطبق على كل مؤسسات مجتمعاتنا المتخلفة ابتداء من الأسرة حتى السلطة!!! فعلى مستوى الأسرة أخوك الكبير يمكنه ببساطة يحلب العنز ويبيع العجول والسخلان ويستولي على الثروة!! وعلى مستوى السلطة في السودان الناس البيصحوا بدري بيقلع السلطة!!
خالد
| |
|
|
|
|
|
|
|
|
|
Re: أخي يستولي على الثروة (Re: خالد فضل)
|
ودقاسم
معليش يا أبو طلال!! أصلي أنا في المكتب وبكتب على عجل وليس لدي وقت في كثير من الأحيان للمراجعة. عشان كدا بتحصل أخظاء في الطباعةز أصلا الواحد بدأ يخاف من حطاية البوست بتاع تدني مستوى اللغة في البورد!! فالعذر.
خالد
| |
|
|
|
|
|
|
|
|
|
Re: أخي يستولي على الثروة (Re: ودقاسم)
|
يا خال
تزكر لامن تمشي تشتري اللقيمات
وتكون متلفح بالفرده ووجهك اغبش وتتمسح بي زيت اللقيمات
وترجع تلاقي الشاي الساموطي منتظرك
وتزهج لامن يقوليك وقت المدرسة جاء خلاص
| |
|
|
|
|
|
|
| |
ودقاسم
waleedi399
خالد فضل
abas
فيس بوك
تويتر
انستقرام
يوتيوب
بنتيريست