|
|
 (زمن عثمان حسين)..قصيدة الدكتور مبارك بشير...
|
لملمت أطراف الغنا
وبشويش مشيت
لا شلت في الاخر معاك
هرج الدهب
لا الصاري في سقف
العمارات
والمحلات
والسواري
ولا دعاوي المطمئنين
للزمن
العاشوا خلين من تعب
براحة في
فرق الدقايق
والحقايق
اختفيت
مع انو شايل من
شتول المحبين البتامى
كل المشاعر
مستعدات لل(شجن)
أمرك عجيب
لا قلت بعرف في الكتاب
جرة قلم
لا طفت في
سوح المدارس
والمزازيك المهرمنة
بي علم
عرفت كيف
تملا البلاد الواقعة
بين خط طول وعرض
ناس في الشمال
ناس في الجنوب
ناس في الشرق
ناس في الغرب
تملاها بي فيضان نغم
أمرك غريب
كيف اصطفيت
هذا الكلام السمهري
كيف التقيت
تلك القصايد همها
تفرك قلوب العاشقين
هذي الأغاني
ما أغاني خفيفة
تغشانا وتفوت
تحيا وتموت
اخترت انت براك
نشيج المبدعين
ومنحتهم
في عز هجيرك
ووجعتك
بوح المزازيك المطرزة
بالحنين
بشويش مرقت
من البيوت الاهلة
بي أصحابا
جيرانك غمار الناس
زي طبعك
جميل المفردات
زي لبسك
كتير الاحترام
في مهنتك
كونك مغرد في
(ربيع الدنيا)
(حارم وصالك)
احتار (الفراش)
يا طائر عبورك
في البحر
حزمة قصايد
أم أغاني
في مسامحة الحبيب
مكانك
(عشرة الأيام)
(عشقتك وقالوا لي
عشقك حرام)
زمانك أخضر المشوار
(وحبك لا)
و(لالا الماخطر زول
على بالا)
فاكر قلبك الولهان
قلب خالي
وسرجت ألحانك
مشيت
خلوها تمشي
انها مأمورة جات
مأمورة تمضي
زي نظام كل المسافرين
في الحياة
رحلة عبور
يحيا الهوى
(مات الهوى)
بس اسألوها
على حوافي الأمكنة
كيف استطاعت في زمن
ستين سنة
تقلب مسار الأخيلة
تقطع نياط الأفئدة
ولما تصدح
(صدقينا)
في المساءات الحزينة
كل واحد يفتكر
انو صاحب الأغنية
كان شعر أو لحن
أو موسيقى
وصوت مدوزن
بالجراح المستحيلة
كل واحد لامن
(الشجن ) الملازم
في عوالم
من مظالم
ومن حروبات
يجتمع في أغنية
يدخل في (المحراب)
عديلة
سدلت في جديلة
انتو بس خلوها تمشي
انها مأمورة
بدت الحكاية المدهشة
من بخت تربال صغير
في (مقاشي)
ينضم السعف الموشح
بالعراجين التقول
(تيجان نجاشي)
وا شوقي لي حس
القطارات الزمان
دايما تجينا من الشمال
الفنجري
كل يوم تجيب
اصوات جميلة ومبدعة
تعمر مجالس للطرب
والانفعال العاطفي
(ما أروعه
ما أروعه
قدح الشرارة
ثم لاقى مصرعه)
جيت من هناك
بلد الطنابير
والعتامير
والضفاف الرايقة
وشلت الغناوي
من (الحقيبة)
الى (الجديدة)
من (الهوادج والجمال المخملي)
نحو (المداين)
والزمان الجاي في
حزمة معارف
وابتدارات
(الجمال السندسي)
يا (زمن عثمان حسين) ..
|
|
 
|
|
|
|
فتحي الصديق
فيس بوك
تويتر
انستقرام
يوتيوب
بنتيريست