|
لما حلمك يكون أكبر منك
|
مرات الواحد بيحلم وبيسرح وفجأة يكتشف ان حلمه أكبر منه...
أنا لست كاتبة ولا سياسية...مواطنة عادية جدا...بتحلم بوطن جميل وشعب راقي... من وأنا صغيرة كنت عايشة في أحلام..أفتكر كل الناس طيبة وانه كل الناس ماشة صح...وأستغرب لما ألقى حاجات ما ماشة صح... كبرت شوية لقيت انه الدنيا فيها الصح والغلط..فيها الكعب والكويس وحسيت بالحزن...وده أول حلم لقيته أكبر مني... في المرحلة دي حاولت أهضم الواقع وبديت أشوف الغلط وأغيره...أو أحاول أغيره...كنت مقتنعة انه ايدعلى ايد تجدع بعيد...اكتشفت انه مرات ممكن تلقى ايدك براها ومرات حتى لو معاك ايدين تانية ما بتجدع أي حتة...المشكلة انه كل مرة بلقى روحي براي البحاول..والناس بتتفرج...وفي عيونهم نظرات غريبة...يمكن شفقة..يمكن شماتة..ما بعرف...ماعرفت الا انه ده تاني حلم لقيته برضو أكبر مني... حاليا...بقيت خايفة..من انه حتى أفكر في تغيير ...أو أفكر أصلا...خايفة لأبطل أحلم وأتمنى...خايفة لأبطل أهتم بالحولي ...ويبقى زيد زي عبيد زي نطاط الحيط... ولي عودة...وآسفة على ركاكة الأسلوب بس ده الجواي من غير تزويق...
|
|
|
|
|
|