|
|
 اغنية الحنين
|
اغنية الحنين :
(الرهد البقوقي دباسه
عاجبني جميع
قمريه وبلومه وناسه
الزول البعيده اكتافه من خراسه
خلاني مجنوناً مطقع كاسه ... ام عواني بت حسين)
ترا الجرح القديم تاورني زاد احزاني
طوّل ليلي حتى من الوجع بكاني
شان غلب البنات دردرني قام وداني
للبلد الميبس فيها نوحي لساني
إذاً دعني اصلي للمغيب
واوشح الأبنوس من ثوب الحنين بخرقتين
وغيمة هطّالة لفتي المرابع
قد توكأ في عصاه على امتداد الأفق يرنو للتمائم حالماً
بالجرتق المخروز والحناء والبت ام ضمير
ويهيم يرهف اذنه لبنية غنت علي الغرنوق
أوزغردت مثل الصهيل (الجاره عرّاقي بي زراره الغرينيق انا سائلة من دياره
الدنيا دي خاينه مالها يافريع البان الشايل النواره )
حجيني يابنيه
شان تعرفي البيا
انا كل اشواقي
لي نيمه مسقيه
اتكل عليها اساي
وأدي المزارعيه
من الفرح عودين
وعود من بياض نيه ...
عُدْ حيثما الفتك فيه مرابع
انت الغريب وإن ملكت ذليل
....
يابنيه حليني من الوحايح ديل
انا برضي قاليني جمر الوجيع بالحيل
انا كان تعرفيني
كل البكفيني
من حرقة البندر
جراري يبقى دليل
جراري يديني رحمان قليبي الطار
من الغلب والنار
الواقده في جوفي
كلما غشاني الليل
طرّاني حس تومي
يوم تعمر الصفقة
تغشي البيوت والصي
او تمطر ام بشار
لامن تجيب السيل
وان من مرق منك
ماطق اضناً لي حساً يرد الروح
وانا من فرق دربك
فارش الوجيع لحفات
متحزم الحرقة
لكني جايي عليك
سارج جواد الشوق
متدلي عتمورك
ياغرقه يامرقه
|
|
 
|
|
|
|
aseel el-amin
فيس بوك
تويتر
انستقرام
يوتيوب
بنتيريست