|
|
 سيناريوهات : معاش !!
|
صحيفة الرأى العام
عدد الجمعه الموافق 22 مايو 2008
موقع الكاتب : www.alfatihgabra.com
إستيقظ (أستاذ خلف الله) فى صباح ذلك اليوم على صوت زوجته (صفية) وهى داخل المطبخ تعد فى (شاى الصباح) :
- معاشكم ده صرفو ما قرب؟ البيت ليهو إسبوع (فرطاقه) ما فيهو
فرك (أستاذ خلف الله) عينيه متثائبا ونهض جالسا على السرير، قام بزح التربيزة الخشبية الصغيرة التى أمام السرير جانبا بعد أن قام بلبس (نضارت النظر) ثم بدأ فى ضبط موجة الراديو (الترانسستر) على إذاعة أم درمان حتى لا تفوته نشرة (الصباح) أو (نشرة الوفيات) كما كان يسميها .
وهو فى طريقه نحو (الحمام) إستند (أستاذ خلف الله) على ضلفة شباك شباك المطبخ المفتوحه وقال مخاطباً (صفية):
- قلتى ليا المعاش مالو؟
- قلت ليكا معاشكم ده بيصرفوهو ليكم متين عشان البيت ليهو أسبوع عدمان (الفرطاقه) ؟
- والله يا صفيه على كيفهم مرة يوم سته فى الشهر مرة يوم عشرة ، ما معروف
- عليك الله ده هسه إسمو كلام بعتو عمركم ده كلو عشان القريشات دى وكمان يقعدو يماطلوكم فيها ؟
- والله يا صفيه القروش دى التقول الجماعه ديل مدننا ليها صدقه وما إستقطعوها مننا – يصمت ثم يواصل – إنتى فى ده كدى أمشى الحمام وأجى أحكى ليك !!
بعد دقائق قضاها (أستاذ خلف الله) فى الحمام عاد ليجد (صفيه) وقد وضعت أمامه (كبايت الشاى) الأحمر
- (السكر) بتاعك بتاع (السكرى) خلص الليله أخت ليك معلقه صغيرونيه من السكر العادى ده
- خلاص ختيها نعمل شنو؟
- (تتذكر أن الحاج كان عاوز يقول حاجه) : اها قلت ليا شنو ؟ ناس معاشاتكم ديل مالهم ؟
- آآى تتصورى يا صفيه قروشنا بتاعت المعاشات دى مدورنها شئ إستثمارات وشئ مشاريع وشئ تجارة؟
- الناس ديل ما بخافو الله ؟ إنتو عملتو ليهم توكيل؟ طيب وأكان هسه التجارة دى خسرت قروشكم راحت؟
- والله دى مفروض تكون أمانه عندهم وما يتصرفو فيها لكن تقولى شنو؟
-والله دى محن ، معقول الزول يتصرف فى الأمانه من راسو ساااكت
فى هذه اللحظة يسمع صوت عربه تتوقف قرب الباب ثم بعد برهة قليلة يدق الباب ، تتجه حاجه (صفيه) لتفتح الباب بعد أن تقوم بإرتداء الطرحه التى كانت على كرسى المطبخ ، تقوم بفتح الباب تفاجأ بوجود عربه ذات لوحات حكومية صفراء وأخرى عربه (كوريه) حمراء صغيرة ثم عددا من العربات الصغيرة الجديدة الأخرى التى تصطف فى صف طويل وشاب صبوح الوجه يرتدى بدلة سفارى ذات لون (كاكى فاتح) ونظارة (شمسية بنيه) يخاطبها قائلاً :
- السلام عليكم يا حاجه
- أهلا يا ولدى
- لو سمحتى يا حاجه ده بيت الأستاذ (خلف الله فضل) ؟
- أأى بالحيل
- ممكن لو سمحتى بس تندهيهو لينا
- أيوه ممكن يا ولدى دقيقه واحده
يخرج أستاذ (خلف الله) مرتديا سروال طويل و(عراقى بلدى) ممزق عند الكتف الأيمن بصورة لا تخطئها العين
- مرحب أهلا وسهلا إتفضلو
- لا شكراً يا أستاذ شكرا جزيلا الحقيقه نحنا مستعجلين شويه لانو مفروض نغطى كل المعاشيين فى المنطقه بتاعتكم دى
- (فى إستغراب) : إنتو من المعاشات ؟
- أيوه يا استاذ و ...
- (مقاطعاً) : شنو قررتو تجيبو لينا المعاش لحدت البيت ولا شنو؟
- والله يا حاج (الدوله) أخيراً ممثلة فى (وزارة المعاشات) قررت تجازيكم على عمركم الأفنيتوهو فى خدمة البلد دى وتديكم الوضع المفروض يكون
- طيب إتفضلو كدى جوه شويه
- والله يا حاج ما بنقدر عندنا لفه على كل المعاشيين الفى منطقتكم دى ، شوف يا أستاذ معالى السيد (وزير المعاشات والضمان الإجتماعى) قرر إنو يمنح كل واحد من المعاشيين عربيه (أتوس) هديه عشان يتحرك بيها لأنو الحركه بقت يا دوبك وكمان يدوهو (فيلا) جاهزة فى (مخطط المعاشيين) فى شارع مدنى عشان تنتهووا من قصة الإيجارات دى ،
- (فى إندهاش) : طلعو الكاميرا يا أولاد ، الكاميرا إنتو خاتنها وين؟
- كميرات شنو يا حاج؟
- لا يعنى عاوزين تقولو ليا إنتو ما برنامج (الكاميرا الخفيه) ؟
- يا حاج إستهدى بالله والله نحنا لا بتاعين كاميرا لا خفيه لا تلفزيون نحنا من المعاشات وعشان تعرف وتتأكد من الكلام ده أقرأ العربيه دى مش مكتوب فيها (وزارة المعاشات والضمان الإجتماعى) !
- ويعنى شنو ما ممكن أى زول يكتبا ؟
- خلاص يا حاج عشان تتأكد إنو كلامنا ده صاح أهو ده (مفتاح العربيه) الحمراء ديييك وأهو ده الورق بتاعها وكمان أهو ده الورق بتاع (الفيلا) وشهاده البحث بتاعاتا وكلهم بى إسمك والبيانات دى كلها شلناها من ملفك العندنا !
- (تغرورق عينا أستاذ خلف الله بالدموع) : معقولة بعد الظلم الشفناهو ده وتأخير الصرف والزحمة والإستقطاعات الغير قانونيه والقريشات الشويه ديل الدوله تحس بينا وكمان تجازينا قدر الجزاء ده ؟
- يا أستاذ أنتو خدمتو البلد دى وأديتوها احلى سنين عمركم ده اقل شي البلد تعملو ليكم
( ثم مواصلاً) معليش يا حاج أمسك حاجاتك دى أحفظا كويس ونحنا نستأذن منك نمشى عشان ورانا ناس كتيرين ذيك كده ماشين عليهم وبكرة لازم تحضر ألإحتفال العاملنو فى الساحه الخضراء عشان يوزعو ليكم فيهو (شهادات البحث) بتاعت الفلل
- لكن ما أكرمناكم بى حاجه
- لا مرة تانيه يا حاج شكرا ليكم
قام الضيوف بالركوب فى العربات التى إنطلقت فى (كنفوى) طويل أثار الغبار فى ذلك الحى الذى يسكنه أستاذ خلف الله والذى ما أن إنقشعت سحابته حتى وجد أستاذ خلف الله العربه الأتوس الحمراء تقبع فى مواجهه منزله فذهب ينظر إليها وهو غير مصدق لما يرى ، ثم نده على (صفيه) التى كانت تقبع خلف الباب طيله تلك المده والتى ما إن توسطت الشارع وهى تتجه نحو استاذ خلف الله الذى كان يقوم بفتح باب العربه حتى أطلقت زغروده أفاق على أثرها جميع سكان الحى الذين جاءوا مهنئين !
هول الصدمة :
ما أن إنتهت جماعات المهنئين من الجيران والأقارب وبدأ الليل يرخى سدوله حتى جلست أسرة أستاذ خلف الله تناقش أمر هذه الثروة التى هبطت عليهم فجأة :
- والله العربية دى لا عندنا حوجه ليها ولا حاجتين حقو تبيعا تعمل عمليت (المويه البيضاء) الفى عيونك ليها زمن دى وبالمرة تعمل عمليت (البواسير)
- يا أمى كيفن مافى ليها حوجه يعنى يعنى عاوزانا ننزل من المواصلات راكبين الحافلات وندخل الفيلا بتاعتنا الأدوها لينا دى؟ بس معقوله ؟
- والله يا (أمل يا بتى) أبوكى ده كان قعد ليهو شهر شهرين تانى ياهو البقى عميان وعايز اليقودو أخير تبيعو العربية دى وتعملو بيها (صيانه) لى أبوكم ده .. التلتين سنة القضاها فى الحكومة دى (عشكبتو) بالحيل
- تلتفت ناحية إبنها- وإلا شنو يا عصام يا ولدى؟
- والله يمه كلامك صاح وكمان (الفيلا) دى مش عاوزه ليها عفش وحاجات ذى دى – مواصلا- غايتو أحسن حاجه إتخلصنا من الراجل سيد البيت (البراى) ده كل أول شهر واقف لينا فوق راسنا
- صدقت والله يا عصام يا ولدى هسه مدينا إنذار قال عاوز زياده من أول الشهر الجاى لكن الله غالب جات لينا الفيلا بتاعت المعاشات دى فى جرح
- حقو يا بوى قبل ما تبيع العربية نمشى بيها بكرة الحفل العاملاهو (وزارة المعاشات ) لتسليم شهادات البحث بتاعت مستحقين الفلل دى
- طيب خلاص يا عصام جهزو حالكم عشان بكرة نمشى بيها (الحفل) نستلم شهاده بحث (الفيلا) ومن هناك نغشى ود عمك (بشير السمسار) نكلمو يشوف لينا بيعه للعربية دى !
الإحتفال :
إمتلأت الساحه الخضراء بالحشود التى تمثل أسر المعاشيين بينما جلس المعاشيون فى صيوان ضخم ، كان معظمهم يرتدى نظارات نظر مقعرة بعد أن (راح النظر) فى النظرالمكاتبات والأوراق والملفات والمعاملات كما أن معظمهم كان يرتدى ثياباً بسيطة نظيفه ويحاول أن يسير متماسكا رغماً عن تقدم العمر وآثار الزمن
، اللافتات تزين أركان (الساحه الخضراء) وهى ترحب بمن أفنو زهرة شبابهم بذلاً وعطاء للوطن كما أن المكرفونات و(الساوند سيستم) تصدح بالأناشيد الوطنيه بينما كاميرات التلفزيون والقنوات الفضائية الأخرى تسجل حضورا متميزا وهى تقوم بنقل الحفل الذى دعى له أفراد السلك الدبلوماسى وأعضاء المنظمات العالمية
والوزراء والولاة والمحافظين وأفراد الأحزاب المشاركة فى السلطه
- بسم الله الرحمن الرحيم أيها الحضور الكريم وبعد أن إستمعنا لآيات من الكتاب الكريم فى هذا الحفل البهيج الذى تقيمه (وزارة المعاشات والضمان الإجتماعى) إحتفالا وإبتهاجا بتكريم من أفنو زهرة شبابهم عطاء وبذلا
لهذا الوطن
- (صوت) : تهليل
- (مجموعة أصوات) : لا إله إلا الله
- (نفس الصوت) : تكبير
- (نفس المجموعة) : الله أكبر
- (الصوت والمجموعه) : تصفيق حاد
- (مذيع الحفل يواصل) : الأخوة الحضور الكلمة الآن لصانع هذا الوفاء وهذا التكريم الكلمة الآن لمن أنقذ هؤلاء الكهول وكبار السن الذين ضحوا بسنوات شبابهم من عاديات الزمن ووفر لهم السكن المريح ووسيله التنقل السهلة حيث أصبحت أرجلهم لا تقوى على السير إلا حثيثا .. الكلمة الآن للسيد وزير (المعاشات والضمان الإجتماعى) – تصفيق-
- (صوت) : والله كتير يا وزير
- (مجموعة أصوات) : كتير كتير يا وزير
- (نفس الصوت) : والله كتير يا وزير
- (نفس مجموعة الأصوات) : كتير كتير يا وزير
- (الصوت والمجموعه) : تصفيق حاد
- بسم الله الرحمن الرحيم .. بسم الله الذى بحمده تتم الصالحات ..الأخوة الضيوف الآباء والأعمام والعمات المعاشيون .. هذا يومكم .. هذا يوم تكريمكم على ما قمتم به من جهد وبذل وعطاء طوال سنوات خدمتكم الطويلة التى أمتدت لعقود من الزمان ، لقد كنا نعمل أيها المعاشيون الأبطال فى صمت من أجل هذا اليوم وكانت الفلوس التى قمنا بإستقطاعها من مرتباتكم الضئيلة التى لا تكاد تكفيكم أمانه فى أعناقنا قمنا بإستثمارها خير إستثمار على مدار أعوام طويله حتى أينعت وكبرت وحان قطافها ، لقد سمعنا بآذاننا ما يروج له البعض من الموتورين والحاقدين وأفراد الطابور الخامس من أن (قروشكم دى) نحنا (مدورنها) فى السوق ومشغلنها فى (إستثمارات) وقاعدين نديكم (حقكم) كل شهر بعد (تأخير) وبالقطارة و(ملاليم) لا تناسب ما أودعتموه لدينا من (مليارات) ولكن الآن جاء الحق وزهق الباطل إن ....
(صوت) : جاء الحق وزهق الباطل إن الباطل كان ظهوقا !!
- (مجموعة أصوات) : جاء الحق وزهق الباطل إن الباطل كان ظهوقا !!
- (نفس الصوت) : جاء الحق وزهق الباطل إن الباطل كان ظهوقا !!
- (نفس مجموعة الأصوات) : جاء الحق وزهق الباطل إن الباطل كان ظهوقا !!
- (الصوت والمجموعه) : تصفيق حاد
- (يواصل) : نعم الآن أيها المعاشيون الأفاضل جاء الحق وعرفتو قروشكم دى كنا بنسوى بيها شنو وبنستثمرا ليكم عشان شنو وها نحن نسلمكم الأمانه واكتر ونوفى بما عاهدنا الله به ونقدم لكل فرد منكم (عربيه) لتقيل عثراتكم و(فيلا) لتسكنو فيها إلى آخر العمر معززين مكرمين والسلام عليكم ورحمة الله تعالى وبركاته !
(صوت) : تهليل
- (مجموعة أصوات) : لا إله إلا الله
- (نفس الصوت) : تكبير
- (نفس المجموعة) : الله أكبر
- (الصوت والمجموعه) : تصفيق حاد
- (مذيع الحفل) : والآن بعد أن إستمعنا إلى كلمة السيد الوزير يقوم سيادته بتسليم (شهادات بحث الفلل) بمخطط المعاشيين السكنى للسادة المعاشيين !!
(خلف الله) زيارة ميدانية :
قام عصام فى صباح اليوم التالى بغسل العربه أمام باب المنزل وتهيأ الجميع للذهاب لإستلام (الفيلا) رقم 234 بمخطط (المعاشيين) ؟ وصلت العربة الى (المخطط الفخم) وترجل أفراد أسرة الأستاذ خلف الله ليشاهدو الفيلا رقم 234 المخصصة لهم ، عند باب المخطط قابلهم (رجل الأمن) بزيه الأزرق الغامق المميز ، قام بمطالعه العقد وفى إبتسامة وظرف شديدين طلب منهم أن يتبعونه ، توقف رجل الأمن أمام أحدى الفلل التى كتب عليها فى لافته نحاسيه (فيلا رقم 234 – الأستاذ خلفالله فضل خلف الله – مدرس متقاعد) ، كانت (الفيلا) من طابقين تحيط بها (حديقه صغيرة) :
- معقول بس ناس المعاشات ديل يعملو لينا حاجه ذى دى ؟
- ما معقول كيف يا حاج خير البلد دى كلو ما من أكتافكم إنتو
- هسه دى نسكن فيها نحنا ديل ؟
- طبعن يا حاج هو إنتو هينين وإلا العمل القمتو بيهو للبلد دى شويه ؟
- (فى تردد) : ممكن ندخل
- كيف ما تدخلو إتفضلو البيت بيتكم .. الفيلا فلتكم يا جماعه إتفضلو !
خلف الله يشكر الوزير:
فى طريق عودتهم إلى البيت بعد أن قامت اسرة الأستاذ خلف الله بمعاينة الفيلا ذات غرف النوم الواسعه المكيفة والحمامات (السيراميك) الفاخرة والمطبخ (الإيطالى) كان الجميع فى حالة من عدم التصديق خاصة استاذ خلف الله الذى كان قد فقد الأمل تماماً فى القيام بصرف معاشه الهذيل فى موعده عند بداية كل شهر ناهيك عن هذا
(العز) :
- أنا لازم أقابل الوزير ده واشكرو لازم
- والله يا حاج وزيرا سكنا جنس السكنه الراقيه دى وريحنا من دفع الإيجار الحار ده وكمان ركبنا (الكورى) ده لااازم تشكروهو
- الساعه هسه كم يا عصام يا إبنى؟
- الساعه يا بوى إطناش ونص وخمسه
- خلاص من دربك ده وعلى وزارة (المعاشات) نمشى نقابل الوزير ده نشكرو
فى الوزارة :
دخل (أستاذ خلف الله) الى باب الوزارة فرأى مسؤول (الإستقبال) جالسا ممسكاً بسجارة وهو يتحدث فى الموبايل :
- السلام عليكم
- (فى لا مبالاة) : وعليكم السلام (وهو يبعد الموبايل عن أذنه قليلا) نعم أى خدمة؟
- لو سمحت يا إبنى بس عاوز أقابل السيد الوزير
- (فى لهجه تهكمية) : السيد الوزير حته واحده ؟
- طبعا يابنى مال يعنى حتتين؟
- وحضرتك تطلع منو بقى ان شاء الله؟
- (فى خجل) : انا ولاواحد.. انا فى الحقيقة يعنى اصلو مدرس على( المعاش )
ما ان سمع موظف الإستقبال كلمة (فى المعاش) حتى انتفض من مكانه ووقف على رجليه واطفأ سيجارته وقفل الموبايل ثم خاطب أستاذ خلف الله مرتجفا :
- سعادتك فى المعاش ؟ معليش يا استاذ ما تزعل منى ذى ما أهلنا قالو الما بعرفك يجهلك.. دقيقه بس سعادتك أتصل ليك بى سعادة الوزير (يرفع سماعة التلفون ويتصل) :
- سعادة الوزير معاك الإستقبال
- ...............................
- نعم سعادتك أنا اسف عارف انو سعادتك في اجتماع وزاري بس ده ياافندم (معاشيى) وعاوز يقابل سعادتك ... حاضر سعادتك حااااضر (ثم يضع السماعة)
- (فى فرح وترقب) : شنو؟ معقول سعادة الوزير ح يدينى الشرف ده وأقابلو
- تقابلو دى شنو يا أستاذ الوزير شخصيا حينزل دلوقت ويقابل سعادتك
لم يصدق أستاذ خلف الله إذنيه وهو يستمع لما قاله له موظف الإستقبال من أن الوزير شخصيا سينزل لاستقباله !!!ولم تمض دقائق معدودة حتى جاء الوزير مهرولا واخذ (استاذ خلف الله) بالاحضان بينما أصطف موظفو الوزارة يصفقون ويهتفون بحياته
- والله يا سعادة الوزير انا خجلان انو سعادتك نزلت واستقبلتني شخصيا
- ده كلام شنو البتقول فيهو ده ؟ أنت خدمت البلد عمرك كلو عاوزنى كمان أتلتلك وأخليك كمان تطلع ليا فى مكتبى ؟والا كمان تاخذ ليك مواعيد بعد شهر ؟
- والله سعادتك بس أنا كنت جاى اشكرك على العربية والفيلا والحاجات النحنا ما قدرها دى؟ والله بس كان أديتونا معاشنا ده فى مواعيدو كان كفايه
- تشكرنا ؟ دى قروشكم إنتو نحنا ما طلعنا حاجه من جيبنا .. ده عرقكم إنتو .. أمشى يا أستاذ وإستمتع إنت وأسرتك باقى حياتك وقول عاشت معاشات السودان
فى البنك :
خرج أستاذ خلف الله متجها إلى حيث تنتظره أسرته وما أن جلس على الكرسى حتى سألع إبنه عصام وهو يدير ماكينة العربه :
- من هنا نمشى على وين يا بوى؟
- كدى يا عصام يا ولدى ودينى البك أشوف (المعاش) نزل وإلا لسه إن شاء الله يكون نزل عشان أمك قالت فرطاقه فى البيت مافى
عندما دخل أستاذ خلف الله إلى البنك اتجه الى الشباك مباشرة حيث سأله الموظف :
- نعم أى خدمة؟
- والله بس جيت أشوف معاشى نزل وإلا لسه ؟
ان سمع الموظف كلمة (معاش) حتى قام بفتح وهو ينحنى مخاطباً أستاذ خلف الله :
- إتفضل إتفضل فى مكتب مدير الفرع أشرب ليك يا استاذ فنجان قهوة وحاجه بارده لحدت ما نطلع ليك معاشك
- والله بس يا غبنى عشان الزحمة وكده بس كنت عاوز ليا خمسين جنيه من المعاش ما عالرف رصيدى بيغطى وإلا ما بغطى بالله يابنى شوفو ليا (يمد له الدفتر)
- (يقوم الموظف بإدخال بيانات أستاذ خلف الله على الكمبيوتر) : والله سعادتك حسابك المبلغ القلتو ده ما موجود لأنو حسابك إتغير وبقى بالدولار ونزلت ليك فيهو 10000 دولار لأنو جاء قرار إنو يصرفو ليكم مكافأة نهاية خدمة بعد الصبر الكان صبرتوهو ، عاوز أسحب ليك منها حاجه ؟
ما ان سمع (أستاذ خلف الله ) عبارة 10000 دولار حتى اغمى عليه ووقع كاضم وهو يردد مامعقول .. مامعقول .. مامعقول وصوت من بعيد يأتيه :
- بس امشى أجيب ليك معلقت السكر ألقاك نمت تانى ؟ هو الما معقول شنو؟ إنو قروش المعاش تقطع؟ والله (معاشك) ده كان كفى لى يوم عشرة فى الشهر ما خلى حاجه ؟
|
|
 
|
|
|
|
|
|
|
|
Re: سيناريوهات : معاش !! (Re: الفاتح يوسف جبرا)
|
والله بالغت عديل المرة دي قلت لي عربية وبيت في شارع مدني وكمان الوزير ظاتو يجي نازل عشان ما يتعبوا بي طلوع السلالم.عارف يا استاذ الفاتح المشكلة انو الموظفين الباخروا المعاشات لغاية يوم عشرة في الشهر ناسين السفر وانهم حايشربوا من نفس الكاس لمن ينزلوا المعاش .
| |
|
|
|
|
|
|
|
|
|
Re: سيناريوهات : معاش !! (Re: الفاتح يوسف جبرا)
|
الاستاذ الفاضل الفاتح جبرا
السلام عليكم ......
الله يديك الصحة والعافية ويديك قدر نيتك يارب ....
دائما مابتتحفنا بالجميل ودائما مابتتحسس اماكن الوجع
وتذكرنا فى خضم مشغولياتنا بما كنا قد نسيناه ....او تناسيناه
ارباب المعاشات ....قدموا الكثير لهذا الوطن منهم ابى وابيك
وعمى وعمك واخوالى واخوالك .....نرى معاناتهم تستمر دوما
وشهريا .....اما كان من الاولى كما تفضلت وذكرت ....ان يجد هذا المعاشى الاهتمام
والرعاية من الجهات المسؤولة....تقديرا لهم وبقدر ماقدموه لذلك الوطن
لماذا لاتستفيد الدولة من خبراتهم وتجاربهم ...وكثير من الدول الاخرى
نجد انها تعد مركز للبحوث خاص بالمعاشيين ...وكيفية الاستفادة منهم ...
ذكرتنى واحد بنعرفوا ...(رحمه الله) من عمال السكة حديد سابقا بالخرطوم
كان يعانى من مرض السكر وعلى اثره تم قطع رجله اليمنى وبالتالى لم يكن
باستطاعته الذهاب الى مصلحة المعاشات لصرف معاشه
فكان يستعين بالتاكسى فى مرواحه وذهابه من الكدرو بحرى ويصرف معاشه
والطريف والمحزن فى الامر
انه يقوم باعطاء سائق التاكسى ماصرفه من معاش
ويرجع خالى الوفاض الا من بطيخة يشتريها من الطريق وهو فى طريق عودته لاحفاده
(رحمه الله)
خالص التقدير لشخصك الكريم
| |
|
|
|
|
|
|
|
|
|
Re: سيناريوهات : معاش !! (Re: ناهد بشير الطيب)
|
هكذا يكافأ من أفنوا حياتهم لبناء هذا البلد،
تجدهم في كل العالم يكرَّمون وفي السودان في كل واد يهيمون.
(أتوز)؟ (فيلا) ؟ والله في كل نوم يحلمون إلا بهذه.
لهم الله
شكرا أستاذنا الفاتح الرائع.
| |
|
|
|
|
|
|
| |
الفاتح يوسف جبرا
الزبير صالح الزبير
ناهد بشير الطيب
محمد المرتضى حامد
فيس بوك
تويتر
انستقرام
يوتيوب
بنتيريست