|
|
 عرس ود أمونة في الشايقية
|
عرس ود أمونة في الشايقية
الأسطورة بسيطة: آمنة أختي الكبيرة تزوجت من حسن علي شايقي عسكري ببوليس مروي وإنتقلت من أرقو لتعيش بمروي . أولا، كان وقتها كارثي أن تقترن الدنقلاوية أو المحسية بالشايقي! وثانيا ، أن ترحل من أرقو لتعيش بمروي ، وكأنها عبرت الأطلنطي أو ما وراء البحار!! والآن محمد ود أمونة عاد من السعودية بعد سنين مضنية جمع فيها الهللة وراء الهللة ليتزوج بمروي. وكنت علي موعد مع الزمان الأخضر لأشاهد أول عرس لي بالشايقية! والحقيقة لله العرس عند الشايقية يا بلاش!!!! أها يا فنانين الشايقية أبقوا عليها عشرة!!
الزين والعديل
بركة لينا الجيتا
والجرتق حرير
مربوطة فيه السوميتا
الشاب الأصيل
ست البنات مالقيتا
*****
تسلم يا الأمير
بيك العروس تتهنا
بالمال والعيال
ليك القلوب تتمني
شوفوا يا عيال
محمد وليد أمونة
في جبينه الهلال
في إيديهو ضامي الحنة
*****
وأمونه في وسط العرس تتني
زي بنات عشرين
تتفدع شمال ويمين
وزغرودة الفرح
واحدة ووراها إتنين
من جوف الضمير الرنّة
وفي إيدها اليمين
ورقة أم خمسين
الليلة الفرح عندي
الليلة العريس ولدي
خلوا السهر يطحنا
الليلة يوم سعدي
يلا يا شباب للصباح نتغنا
هزوا يا عيال
فوق وليد أمونة
في جبينه الهلال
في إيديهو ضامي الحنة
*****
الريحة أم عبير
معطونة فيها الحنة
والخمرة أم فتيل
عود روائح الجنة
والشمعة فوقها تسيل
زي سواقي النيل
تروي الغريب وأهلنا
بالزين والعديل
عريسنا الأمير ده حبابه
يهزوا بالمنديل
ديل العزاز أصحابه
وأمونة في وسط العرس تتني
الليلة يوم عيدي
الليلة ليلة الحنة
*****
زينة بهجة ونور
زي ليالي العيد
حفلة علي الطنبور
مع الحسان الغيد
عرضة ورقصة جيد
زي فرحة العصفور
بالعش الجديد وسعيد
*****
وأمونة بتوب الحرير تتني
فرحانة بيها الزيطة
فرحانة بيها اللمة
وركوب العيال في الحيطة
يا الله تستر الحال
خلي الفرح يتما
يا بركة الصلاح
أهل الكتاب والسنة
بي بت الحلال
إنشاء الله العريس يتهنا
بالمال والعيال
ليه القلوب تتمني
محمد وليد أمونة
في جبينه الهلال
وفي إيديهو ضامي الحنة
إبراهيم عبد العزيز عثمان-الدوحة
[email protected]
|
|
 
|
|
|
|
فيس بوك
تويتر
انستقرام
يوتيوب
بنتيريست