|
|
 للمتزوجـون فقـط..زوجـي يحـب امـرأة غيـري!!
|
منذ الاشهر الاولي لزواجنا بل ومنذ الشهر الاول اكتشفت ان زوجي العزيز يحب امرأة غيري..
هالني ما اكتشفت بل دعوني اقول انه قتلني..
هل الزواج يقتل الحب..؟هل صحيح ان الحب وفي اللحظة التي يدخل بها الزواج من الباب يفر عبر النافذة؟
قال لي زوجي انه اكتشف وبعد زواجه مني انه يحب واحدة اخري هي انا قبل ان يتزوجني..
ثم مرة اخري فأجاني بانه اكتشف ان عقلي اشبه بعقل(سخلة)وكان يعتقد وخلال معرفته بي والتي سبقت زواجناان عقلي افضل من عقول كثير من الرجال ناهيك عن النساء..
ثم مرة ثالثة اخطرني اني وقبل الزواج كنت اجمل وارق واكثر جاذبية مما انا عليه الان,حتى انه كثيرا ما كان يردد علي مسامعي (حقو الواحد يقابلك برة البيت) لانه يعتقد انني وخارج المنزل اكون اكثر جمالا واهتماما بنفسي مما هو عليه الحال في المنزل..
|
|
 
|
|
|
|
|
|
|
 Re: للمتزوجـون فقـط..زوجـي يحـب امـرأة غيـري!! (Re: صباح احمد)
|
| Quote: واهتم بعملي اكثر مما اهتم بزوجي وبيتي وطفلي المنتظر.. |
هنا مربط الفرس ، ورغم أنني أشك بل ومتأكد بأن هذا البوست فقط لمعرفة أراء الناس ولا يمكن أن يكون زوجك قد تغير وتحولت مشاعره عنك خاصة وأنت تنتظري مولوده الأول ... ولكن ساقول للرد فقط بأن المرأة فعلاً تتغير بعد الزواج وتصبح أهتماماتها بالرجل قليلة جداً ويبقى شغلها وصديقاتها وماشابه ذلك أهم عندها من الالتفات إلى حوجة زوجها إليها ، فهي لا تتزين ولا تتجمل إلا عند خروجها من المنزل وتظل في المنزل بملابس غير جميلة وشعر منكوش ودون طيب ولا مكياج وهلموجرا ..... . وعادة ما يقارن الرجل بين مشاهدته لزوجته في المنزل ومايراه من جمال وزينة للنساء في الطرقات وعبر الصحف والمجلات والقنوات الفضائية .
لذا نصيحة مني لكل الاخوات هنا وهناك بالاهتمام بأزواجهم أكثر واكثر وأن تسمعه دائماً عبارات المدح والحب وأن تتجمل دوماً له طوالة اليوم وتهتم بنفسها وجمالها وتلبس ما يعجبه لا مايعجبها هي وتتمكيج وتلبس الملابس الخاصة لا العامة لانها تدخل الفرح والسرور في قلب الزوج ، وكمان تبطل نقه ماشي وين وجاي من وين ؟!! ومثل هذه الاسئلة السخيفة التي يمقتها الرجل .
مع خالص أمنياتي لكل الاخوات المتزوجات بحياة زوجيه هنيئة مليئة بالسعادة والمال والاولاد .
مودتي
عماد
تسحيبة :
ربنا يحلك بالسلامة وتجيبي ليهو طفل سليم ومعافي وجميل ، ويجي المولود الأول ذي ما يحب هو ولد ولا بنت ( علشان ما يقول جابت بت وأنا عاوز ولد ) أصله الرجال نقتهم في الحته ديه عييييييك . 
| |
|
|
|
|
|
|
|
|
 Re: للمتزوجـون فقـط..زوجـي يحـب امـرأة غيـري!! (Re: صباح احمد)
|
سلامات الأخت صباح,,
| Quote: ثم مرة اخري فأجاني بانه اكتشف ان عقلي اشبه بعقل(سخلة)وكان يعتقد وخلال معرفته بي والتي سبقت زواجناان عقلي افضل من عقول كثير من الرجال ناهيك عن النساء.. |
بس اوعى ردك كان يا عتود ولا يا تيس
هذا يحدث أحيانا اى أن نكتشف اوجه الإختلاف
بيننا ولكن من الطبيعى أيضا أن يجد الناس
وسيلة للإتفاق و تسيير الأمور فالحياة تختلف
بعد الزواج وبعد مواجهة الواقع الحقيقى,,,
ومن الغباء التفكير فى فض الشركة لأننا إكتشفنا
الفرق بين ما قبل وما بعد الزواج ,,
لن يجد الإنسان من يتفق معه تماما وفى كل الأمور
ولكن النظرة وإحترام الآخر والتفكير فى العطاء
قبل الأخذ قد تجعل عواصف الإختلاف تمر بسلام,,
وفوق كل ذلك القناعة بما لديك...
تحياتى
| |
|
|
|
|
|
|
|
|
|
Re: للمتزوجـون فقـط..زوجـي يحـب امـرأة غيـري!! (Re: صباح احمد)
|
ألأخت/صباح..
السلام عليكم..
أسعدنى طرقك لهذا الباب..وفتحك لهذا البوست..وأتمنى أن يسير فى الطريق الصحيح..حتى تعم الفائدة..
وأن يثرى ألأخوة وألأخوات البوست بالشىء المفيد..والتجارب ..حتى نستفيد ونفيد..
.................
| Quote: ثم مرة ثالثة اخطرني اني وقبل الزواج كنت اجمل وارق واكثر جاذبية مما انا عليه الان,حتى انه كثيرا ما كان يردد علي مسامعي (حقو الواحد يقابلك برة البيت) لانه يعتقد انني وخارج المنزل اكون اكثر جمالا واهتماما بنفسي مما هو عليه الحال في المنزل.. |
....
فى نظرى..هناك أعباء زائدة للمرأة العاملة المتزوجة..وقد تمر ظروف للمرأة قد تقصر تجاه زوجها من
واجبات..أو أولادها...فيجب علينا أحيانا وجود العذر لها إذا كان الطرفين على فهم لهذا الوضع..
لذا الزوج الغير متفهم لطبيعة زوجته..يجد أن زوجته تهتم بعملها..أكثر..ويحس بالغيرة..
والمرآة غالبآ ما تتزين لخروجها للعمل أكثر من التزين لزوجها وهذا خطآ..
أهم ما فى الحياة الزوجية السعيدة..
ألأحترام..
الحب..
ألأخلاص..
إلتعاون..
إذا توفرت هذه المقومات..نجحت الحياة الزوجية .
لى عودة بأذن الله..
مودتى..
إسماعيل محمد أحمد عباس....
| |
|
|
|
|
|
|
|
|
|
Re: للمتزوجـون فقـط..زوجـي يحـب امـرأة غيـري!! (Re: ismeil abbas)
|
Quote: منذ الاشهر الاولي لزواجنا بل ومنذ الشهر الاول اكتشفت ان زوجي العزيز يحب امرأة غيري..
هالني ما اكتشفت بل دعوني اقول انه قتلني.. |
ياخية انتي مخلياهو يوصلك مرحلة الاستسخال (سخلة) ليه؟
ما خلاص قبل الاربعين يوم كان تفضي السيرة دي ..
وتكملي باقي خبيزك عند اهلك..
ولا شنو؟
| |
|
|
|
|
|
|
|
|
|
Re: للمتزوجـون فقـط..زوجـي يحـب امـرأة غيـري!! (Re: صباح احمد)
|
Quote: لذا الزوج الغير متفهم لطبيعة زوجته..يجد أن زوجته تهتم بعملها..أكثر..ويحس بالغيرة..
والمرآة غالبآ ما تتزين لخروجها للعمل أكثر من التزين لزوجها وهذا خطآ..
|
هذا جزء من المشكلة ..... وضع أخي إسماعيل يده على بدايات الجُرح .... في البرأج مثلاً أن الرجل الجوزاء يتوقع أن تتغير له زوجته ماً على مستويي الشكل والموضوع ..... ثقافة الزواج عند الكثيرين هي غاية بحد ذاتها .... ولابد أن هذا الزوج يستحق الإحترام والتقدير لتنبيهه لمشكلة قد تحدث مستقبلاُ آملاُ من زوجته أن تعامله كما بعهود الحُب بينهما فهو لايحب غيرك ولكن يحبك بغير ما تدبدين الآن ...(كلام مُلخبط موش ؟؟؟؟)
| |
|
|
|
|
|
|
|
|
|
Re: للمتزوجـون فقـط..زوجـي يحـب امـرأة غيـري!! (Re: صباح احمد)
|
الأخت صباح ....
موضوع جميل وهادف جداً ..
فهو يا صباح صرخة وتنبيه للمقبلين على الزواج قبل المتزوجين ..
لأن المتزوجين خلاص تورطواً ولم يبق لهم من حل سوى أبغض ما أحل الله ,,,
يا أختي ويا إبنتي الفتاة ...
كوني حقيقية وصادقة مع من سيكون زوجك مستقبلاً ولا تتجملي أكثر مما يجب ..
حتى لا ينخدع فيك وتأتي النتيجة عليك بعد زواجكما...
أخي المقبل على الزواج ..
أبحث عن أسوأ ما في خطيبتك قبل أن تتزوجهاوأبحث عن إمكانية أن تتوافق مع ذلك ...
وأبحث عن أجمل وأفضل ما لديها بعد أن تتزوحهاوغض الطرف عما يسيؤك ...
فالحكاية مباصرة .....
بعدين يا صباح اليومين دي في موضة مصححي لغة عربية ...
جكاية للمتزوجون دي ما تشوفي ليها حل .. أعمليها المتزوجين لأن اللام دي بتجرك وتجر المنتدى ده كله ,,,
والله يلم فيك عماد عبد الله إلا يخلي ريحتك طير طير ...
هو ريحة الطير ماله ....!!
| |
|
|
|
|
|
|
|
|
|
Re: للمتزوجـون فقـط..زوجـي يحـب امـرأة غيـري!! (Re: صباح احمد)
|
الاخت صباح
السلام عليكم
لا تزعلى اختى ان قلت لك ان زوجك على حق هو يحب امرأة اخرى
هى انت قبل الزواج عندما كنت جميلة فى كلامك
انيقة فى ملبسك تشاركه الفكرة وتحليل الامور برويه وصبر
يا اختى المرأة السودانية ونكون صريحين تتحول للاسوأ بعد الزواج وانجاب الاطفال
تتحول حياتها مابين العمل والاطفال ونظافة البيت ويصبح الرجل وهو عماد حياتها شئ ثانوى
اما الرجال لا تفرحوا انتو كمان كان لكم الدور الاكبر فى هذا الامر باهمال البيت والزوجه .
بقليل من الترتيب والتعاون معا فى كل هموم الحياة الزوجية ستكونى عزيزتى حواء السودانية انت الملاذ والنجوى
سيرى فيك العقل الكبير الذى يزداد نضجاوالانثى الاكثر جمالا .
الموضوع كبير برجع ليك تانى
| |
|
|
|
|
|
|
|
|
 Re: للمتزوجـون فقـط..زوجـي يحـب امـرأة غيـري!! (Re: صباح احمد)
|
الاستاذه / صباح أحمد
صباحك زين
______________________________________
بخــــــــــــتو يا صباح
أنو زوجتوا تدى فرصة يرتاح من حبها ,,,, في زوجات بفضلوا تاعبات القلب
كويس أنوا بشوف غيرك حتى لو فّيك
بعضهم أعمي لانها بتبقي كل البشوفهم ولو........ شاف
فتقع لى حكاية .............ما بتشوف العين بشوف الـ 
================================================================
فتك عافية يا أستاذه
| |
|
|
|
|
|
|
|
|
|
Re: للمتزوجـون فقـط..زوجـي يحـب امـرأة غيـري!! (Re: صباح احمد)
|
| Quote: يشكو من انني اصبحت كثيرة (الزعل) وقليلة الصبر واهتم بعملي اكثر مما اهتم بزوجي وبيتي وطفلي المنتظر.. |
صباح.. حبابك يا صديقة..
و حباب الأصدقاء و الصديقات هنا..
مذكرة برأي مخالف: مخصوصة عشان الإخوة غير المتزوجين
اول بالتبادي كامل تضامني مع الأخ الكريم زوج اختنا صباح ..و اقول ليهو اقطع في جلدك..و الزم الصبر شوية..و يا ما بكرة الموضوع يبقى ذكريات و تريقات..و ترجع الونسة الدقاقة زي ما كانت..لكن في المحطة الفيها انت الآن (بالمناسبة اسمها محطة قنب راكز)..و لو ما قعدت ليها كويس .. بتقع ..و البيت ذاتو بيقع..و اتوقع بعد شوية القصة تجيب ليها طين من البحر و فول اخضر نص الصيف (غايتو انا قالوا لي دايرين تراب من طين بحر كوكب المريخ عديل كده..و اليوم داك ياخوي الطأء كانت قاب قوسين أو ادني من خشمي -معليش شفايفي دي نخليها للشعر و كده)..و بعد شوية يطلعوك عندك صنان..و عفن عفانة السنين..و لو شافوك ح يطرشو عديل كده (الطراش: هو القئ..و ندعو مواطنينا في الأقاليم الغير سودانية مراعاة فروق اللغة و كده)..
اها يا شباب..ويا شابات.. معليش انا القصة باصرتها من تفصيلة تانية.. و بديت انسج سيناريو.. أنو انا بتعامل مع زولة في لحظة معينة..و اخير انتظر و ما اقول كلام.. لغاية ما اختنا صباح ربنا يحلها بالسلامة..و تفرح بمولودها المنتظر..و بعدين نجي نشوف حكاية "زوجي يحب امرأة غيري"..
و كلام جدجد.. دايرين لينا مراكز استشارات نفسية و طبيه و صحية.. تدرس الناس الجداد كيفية الإستعداد و التعامل مع مثل هذه اللحظة..و هي لحظة واصلة بالحيل..و كل زول يبل راسو..
اما من هنا..و من البوست ده.. من باب اشاعة ثقافة السيكلوجيا الإجتماعية و الفردية في تكوين الشخصية السودانية.. الناس ما تنسى ..برضك تناقش معها كيمياء الوحم..و التحولات الفيزيولوجية و الكيمائية و البيولوجية .. و السيكلوجية .. اللي بيمروا بيها الناس في مرحلة (كترة الزعل.. قلة الإهتمام..و انتظار المولود المنتظر)لأنها مرحلة مهمة للغاية..ويا جماعة بصراحة ما تصلحوا الكلام و تملسوهو لأخوانا غير المتزوجين.. اخير تختوها ليهم طاخ.. عشان يعرفوا حاجة..ولا كلامي ده اعوج؟
كبر..
(متزوج طبعا..)
| |
|
|
|
|
|
|
|
|
|
Re: للمتزوجـون فقـط..زوجـي يحـب امـرأة غيـري!! (Re: Kabar)
|
المحترمة صباح
أسئلتك كلها مشروعة
لكن
هل سالتي نفسك هذه الاسئلة :
هل انا السبب لتغير زوجي?
هل قصرت في منحه الحب /الاهتمام الذي يريده لذلك ذهب الي أخري?
هل تغيرت كثيرآ عما قبل الزواج ?
ماذا يريد مني زوجي?
حكمة اليوم
الزوج كالطفل الصغير يحتاج للاهتمام والرعاية والحب والا ...
| |
|
|
|
|
|
|
|
|
|
Re: للمتزوجـون فقـط..زوجـي يحـب امـرأة غيـري!! (Re: PLAYER)
|
صباح
المتزوجين ياصباح
هو ماشي ليه لغيرك بكره تصبح نفس الشئ !!
أصلوا ماقبل الزواج قطعا يتغير بمتغيرات عديدة وهذة هي الحياة والمرأة هي المرأة وأهتماماتها تظل أهتمامات إمرأة والرجل يجب أن تتغير نظرته بإحتمالات التغير الإجتماعي نحو مرحلة جديدة ولا يهمل واجباته وبذا تبحر مركبهم نحو كل الرياح وبها الأهل والزوجة والأبناء وهالة الحب تصبح
ضوايا بصباح أحمد وكل النساء الأمهات والزيجات والحبيبات شقايق الرجال.
،،،،أبوقصى،،،،
| |
|
|
|
|
|
|
|
|
|
Re: للمتزوجـون فقـط..زوجـي يحـب امـرأة غيـري!! (Re: مجدي عبدالرحيم فضل)
|
بعد الزواج يقل إفراز هُرمون الذكورة عند الرجل وتقل كذلك هُرمونات الانوثة عند الأنثى !!!
ويتم إفراز هرمونات اللوم والنظر بمعيار تاني - وُهرمون الحاجات الكانت ساكنة وقت الخطوبة
وهاك يا شكل ونقاش ونقة في أتفه الأمور والحاجات !!! والكهرباء تعلى وتنخفض وووو.
دي ُسنة الحياة...
واحد أخونا خطب بدل ما أقول ليه مبروك قلت ليهو (( أها حا تضيف شنو جديد على البشرية؟)) ...
وحاجات تاني ما بتنقال
الموضوع جميل (( بس اليومين دي الكهرباء عندي في السماء))
هشام
| |
|
|
|
|
|
|
|
|
|
Re: للمتزوجـون فقـط..زوجـي يحـب امـرأة غيـري!! (Re: صباح احمد)
|
الاخت صباح الموضوع جيد ومهم
ولكل المتداخلين سلام مربع
اولا ياجماعه الفتاة السودانية حقو نتفق على انها برة البيت غير جوة البيت
وبعدين البت لما تلاقيها فى محل الشغل وتتعرف عليها من خلال الزمالة والعمل بتكون ياها فتاة احلامك وحتى لما تخش فى البداية علاقة وكدة بتطلع كل ما هو جميل من ادب وثقافة ورقى وانتقاد للعادات البناتية المتخلفة وهلم جرا ...... لكن اول ماتبدأ المسألة فى تعال البيت وتقوم تتقدم واهلك يجو ويتعرفوا وتبدأوا وضع تفاصيل الزواج تتحول تلك المرأة التى احببتها الى اخرى لم تكن تعرفها
باعتبار ان الفتاة تبدأ مباشرة مرحلة التحول للسودانوية الموغلة وتبدأ المقارنة بينها والاخريات ( عرسى دايراهو كدة ومفروض الواجب كده وكل تفاصيل العرس السودانى الذى لا يتناسب والواقع الماثل الان
هذه مرحلة ثم بعد الدخول لبيت الزوجية تبدأ الزوجة ممارسة التفاصيل الحياتية النكدية على شاكلة ( ماشى وين ؟ وليه اتأخرت؟ وكان معاك منو؟ والحته كان فيها بنات ؟ وعيييييييييييييييييييك اسئلة ما ليها حد ؟ ؟؟؟؟؟؟
مع انو برنامجك ياهو ذاتو ما اتغير
بعد داك اى حاجة تبدأوا فيها المناقشة بتكون واحدة تانية ما ياها الكانت بتناقش زمان بى عقل ومقياس راجح
بعد داك تجى البيت تلقاها واحدة تانية مكشرة ووشها مصرور وتحس انو ناوية ليك على مصيبة واول ما تاخد ليك جمة وتقول ترتاح شوية بدون كلام
تبدأ تنقنق انت خلاص جيت عشان ترقد انا من الصباح راجياك عشان اتونس معاك تقوم داير تنوم.... ليه من الصباح ما ضربت تلفون؟؟ ولاشبعان ونسة فى الشغل وما فاضى لى .... وبعد دلك تقول ليك جيب اللبن لانو انا حامل تقوم تجيبو ماتشربو بكرة تقوم ماتجيبو تقول ليك ليه ماجبت اللبن انت بقيت ما بتهتم بى
المهم بتبقى تفاصيل
لكن عشان النسوان مايزعلو برضوا لازم الواحد برضو يقدر مرات مرات انو المرة دى برضو عندها اهتمام بالتفاصيل البشوفها الراجل ما مهمة غايتو ربنا يلزمنا االصبر
وبرضو كويس يا صباح انوا بحبك كامرأة كانت زمان لكن حصليها هنا قبل ماتبدا مرحلة البحث عن صباح اخرى حقيقية خارج المنزل
| |
|
|
|
|
|
|
|
|
 Re: للمتزوجـون فقـط..زوجـي يحـب امـرأة غيـري!! (Re: مدثر محمد احمد)
|
عزيزي مدثر ... سلام مكعب !
ماقلته على الفتاة السودانية ، ينطبق أيضاً على الشاب أو الرجل السوداني ...!!
عمك ياخد البنية ، ويشكسها في شارع النيل ، وهاك يا مسك إيدين ، وينزل فيها قنابل من نوع أسلحة الدمار الشامل ...
أنا راجل جني جن زول يظلم ليه بت ...
أنا راجل ديمقراطي ... وغير متزمت ....
أنا بؤمن بحقوق النساء ....
أنا لا بسف ، لا بشرب سجاير ، لا بشرب خمرة ...
وأنا شغال في شركة ماكنة ... وعندي منصب كبير جداً ...ز
ويكون مستلف ليه عربية يقول ليها دي عربيتي القديمة ... وعايز أغيرها قريب بي هامر 2009 ......
وعندنا بيت الوالد في المنشية ... لكن أنا إشتريت شقة 4 غرف وصالون وثلاثة حمامات ومطبخ وبدروم فسيح .. وحأبدأ أفرشها أول الشهر ....
وعييييييييييييييييييييك يسرح بي حنانها ذاتو
وأنقر شنو !! ... يكون الحنين عاطل عن العمل .... وساكن الشقلة ، وحق الصعوط ما عندو ، وبالليل يضرب موية الفول ويقعد في القعدة (نحل) ويضرب العرقي أبوحمار .. ويقوم كل يوم الصباح وشه ينعل قفاه .... عشان يبدأ دورة جديدة ... مع هدف آخر ليواصل قصفها بأسلحة الدمار الشامل ...!!!!
ودقي يا مزيكة ..... !!!
تحياتي ومحبتي
أبوفواز
| |
|
|
|
|
|
|
|
|
|
Re: للمتزوجـون فقـط..زوجـي يحـب امـرأة غيـري!! (Re: صباح احمد)
|
الأخت صباح ،، صباحك خير والموضوع شحمان جداَ كما يقول صديقنا خضر حسين ( رد الله غربته ) .
فى بداية الزواج ( قولى من اليوم الأول وحتى الشهر السادس تقريباَ ) تظهر بعض الإختلافات فى الافكار والرؤية والإهتمامات بين الزوجين كانت خافية شيئاَ ما أو خافية تماماَ أيام السحسحة والحب المثالى ،، فالذى يحصل فى هذه الفترة هى عمليات غربلة وتنازلات وتثبيت خارطة الطريق التى ستسير عليها قافلة الحياة الزوجية ،، وعندها يصمد من يصمد ويتكيف مع الواقع الجديد أو يحصل الشرخ الجزئى أو الكامل ،، هنا فى هذه النقطة يعتقد أحد الطرفين أو كليهما أن هنالك شىء قد تبدل أو شىء قد تغير لدى الطرف الآخر .
أعتقد جازماَ بأنه لا يوجد حب يستمر بنفس الوتيرة والقوة بين الزوجين رغم ما يدعيه الكثيرون بذلك ،، حتى أن أحدهم قال بأن الزوجان يتحولان فى يوم ما إلى أخ وأخت ( وتعرفون الشجارات الدائمة بين الإخوان والإخوات ) أكثر من زوج وزوجة وذلك بحكم التقادم .
خالص التحية ،،
ماهر
| |
|
|
|
|
|
|
|
|
|
Re: للمتزوجـون فقـط..زوجـي يحـب امـرأة غيـري!! (Re: Mahir Mohammed Salih)
|
| Quote: ثم مرة ثالثة اخطرني اني وقبل الزواج كنت اجمل وارق واكثر جاذبية مما انا عليه الان,حتى انه كثيرا ما كان يردد علي مسامعي (حقو الواحد يقابلك برة البيت) لانه يعتقد انني وخارج المنزل اكون اكثر جمالا واهتماما بنفسي مما هو عليه الحال في المنزل.. |
والله الموضوع ذو شجون ومهم جدا وبتحصل كتير ان يقع احدهم فى الحب بعد الزواج ، مع انو البوست للمتزجين بس لكن اسمحوا لى انا عندي ثقافة زواجية مابطالة،، فيما يبدو انو زوجك فى حالة ملل وليس هو فى مصيدة الحب ، عليه يمكن ان تلحقي نفسك ان احببت ، الرجل طفل بحجم عائلي فكما تعاملي الطفل عاملى زوجك اظن قصدي واضح
بعدين انت يا الفاروق"العذابي المندس" يا تتداخل يا ماتنظر كفاية تنظيرك فى الملل فى الحياة الزوجية
| |
|
|
|
|
|
|
|
|
 Re: للمتزوجـون فقـط..زوجـي يحـب امـرأة غيـري!! (Re: صباح احمد)
|
صباح الخير يا صباح و ضيوف صباح..
صدرت جريدة يومية قبل عدة أيام و على صفحتها الأولى عنوان مثير يقول :
(( زوج يؤدب زوجته بطريقة خاصة ))...
إتضح بعد داك إنو الزوج دا بيشكي من إهمال زوجته لزينتها في البيت..و إهتمامها بزينتها خارج المنزل...
رآها يومها تتزين و تتجمل لزواج صديقتها الأقرب..
فما كان منه إلا أن منعها من الذهاب..
إمتثلت المسكينة لأوامره ..و قرٌت في بيتها..
إنتظر سيادته لما مسحت كل مساحيق التجميل الفي وشها و لبست جلباب البيت و لفت شعرها و عملت كريم في وشها...و حلف عليها طلاق تمشي بالمنظر دا لنفس المناسبة!!!!
إمتثلت الزوجة - مرة أخرى - لطلبه و مشت المناسبة و كانت حكوة!
ما تتخيلوا القصة دي زعلتني قدر شنو؟
ليه التعقيد و التأديب دا كلو؟
لو الزوج قعد و إتكلم معاها بهدوء ما كان أحسن؟
تفتكرو بس الأزواج البشكوا؟
إنتو قايلين الزوجات ما عندهن شكاوي ؟
كم زوج فيكم قعد في بيتو بالبدلة و الكرفتة؟
كم زوج فيكم حلق شعرو و دقنو عشان خاطر عيون زوجته؟
كم زوج فيكم خلى السيجارة و لا السفة عشان بتضايق زوجته؟
كم زوج فيكم إتسوك و إتعطر للقاء زوجته؟
يا جماعة الخير...لو سمحتو..
الحوار..الصراحة...الوضوح..
و قبل كل شي إحترام الطرف الآخر..!
| |
|
|
|
|
|
|
|
|
|
Re: للمتزوجـون فقـط..زوجـي يحـب امـرأة غيـري!! (Re: صباح احمد)
|
يا شمايل:
| Quote: مع انو البوست للمتزجين بس لكن اسمحوا لى انا عندي ثقافة زواجية مابطال |
انا لسة عند رأيي في غنو الموضوع ده تحديداً ما بيستحمل إفتاء غير من المتزوجين ..وحكاية عندي ثقافة زواجية دي ما بتخارج صدقيني ..
وعشان أكون معاك أكثر وضوح كيف سيكون حالك لو تعرّج البوست ووصل لمرحلة العلاقة الزوجية الجنسية ؟
برضو حا تكوني عند رأييك وتقولي عندي ثقافة زوجية ؟
الثقافة الزوجية يا شمايلأكرر ما قلت لك فيها فهي ليس ما قرأتيه في مجلة الكواكب ولا في زهرة الخليج ولا حتى في طبيبك الخاص ..
الموضوع تجربة تجربة تجربة ...
| Quote: بعدين انت يا الفاروق"العذابي المندس" يا تتداخل يا ماتنظر كفاية تنظيرك فى الملل فى الحياة الزوجية |
اسة انا تنظيري وين ؟ كل القلتو لي أختنا صباح إنو تعميم المواضيع أفضل من تخصيصها خصوصا في حالة الحياة الزوجية ..
يكفي إنو الواحد بيكون حذر جداً إنو يتناول خصوصياته مع أقرب الأقربين ناهيك من أن يتداولها عبر الإنترنت ..
وسيبونا من حكاية للإستفادة ونحن في القرن ال22 ونحن ونحن ونحن ..
ده من وجهة نظري طبعاً ولصباح الحق أن تأخذه أو ترفضه جملة وتفصيلاً ..
لكن يا شمايل بالجد الموضوع ده ما حقك إتخارجي منو وركزي لينا في قصصك البوليسية ديك ...
سمح ؟
| |
|
|
|
|
|
|
|
|
|
Re: للمتزوجـون فقـط..زوجـي يحـب امـرأة غيـري!! (Re: عمر الفاروق)
|
الفاروق
انت بتقول لصباح انها المشاكل الزى دى تتحلها بين الاتنين ولااعى لطرحها بين الناس مش قصدك كدا؟؟ صباح طارحة موضوع وفى اعتقادي انها مشكلة بتهدد البيوت وهى حاصلة بين كتير من الازواج ، يعنى مطلوب منك راى وليس تنظير
تانيً المسالة ما مسالة قيادة زى ما بتعتقد المسالة مداخلات وآراء تخدم البوست يعنى ما شرط اكون متزوجة عشان اقود البوست ، فانا بدلو بدلوي فى حدود معرفتي بالموضوع واحتكاكي باطراف
Quote: كيف سيكون حالك لو تعرّج البوست ووصل لمرحلة العلاقة الزوجية الجنسية ؟
|
ح يكون عادي وح ادلو بدلوي فى حدود اطلاعي واترك الباقي للمتزوجين ، ولا برضو حتقول لى الافلام البتشاهديها فى ميلودي وروتانا ديل زى مجلة الكواكب؟؟
| Quote: قصصك البوليسية ديك |
اى قصص تقصد
| |
|
|
|
|
|
|
|
|
|
Re: للمتزوجـون فقـط..زوجـي يحـب امـرأة غيـري!! (Re: صباح احمد)
|
غايتو صباح فكت فيكم البوست وزاغت .... إزيكم كلكم.
Quote: إتضح بعد داك إنو الزوج دا بيشكي من إهمال زوجته لزينتها في البيت..و إهتمامها بزينتها خارج المنزل...
رآها يومها تتزين و تتجمل لزواج صديقتها الأقرب..
فما كان منه إلا أن منعها من الذهاب..
إمتثلت المسكينة لأوامره ..و قرٌت في بيتها..
إنتظر سيادته لما مسحت كل مساحيق التجميل الفي وشها و لبست جلباب البيت و لفت شعرها و عملت كريم في وشها...و حلف عليها طلاق تمشي بالمنظر دا لنفس المناسبة!!!!
إمتثلت الزوجة - مرة أخرى - لطلبه و مشت المناسبة و كانت حكوة! |
ممكنونة ... كان تزعلي كان ترضي .... الزول ده أنا عافي منو .. وحقو الواحد يعمل ليهو تمثال.
في موضوع البوست: إذا كان للواحد أن ينصح، أنا شايف إنو الصورة حتتغير كتير لو الزوجة تعاملت مع زوجها معاملة الصديق. يعني تكون صديقته زي ما هي زوجته، ولا تلغي إحداهن الأخرى.
أعترف .... الموضوع يصلح لأن تكتب فيه مجلّدات
| |
|
|
|
|
|
|
|
|
|
Re: للمتزوجـون فقـط..زوجـي يحـب امـرأة غيـري!! (Re: صباح احمد)
|
شمايل:
| Quote: انت بتقول لصباح انها المشاكل الزى دى تتحلها بين الاتنين ولااعى لطرحها بين الناس مش قصدك كدا؟؟ صباح طارحة موضوع وفى اعتقادي انها مشكلة بتهدد البيوت وهى حاصلة بين كتير من الازواج ، يعنى مطلوب منك راى وليس تنظير |
عشاااااااااااااااااان كده قلنا تعمم وما تخصص ..
الأمور اللي زي دي يا اللخت ما بينفع فيها ذكر الجزء وأراد الكل ..يعني كتبت عن تجربة خاصة مفروض الناس تجي وتحل ليك مشكلتك في إطار الخاص ..عممتها الناس بتجي تشارك في إطار العام ..
صباح هنا طرحت الموضوع بي صورة خاصة وعليه مفروض يكون النقاش في إطار الخاص وده اللي ممكن يسوق البوست لي حتة بلّة ما يحلكم منها ..
| Quote: تانيً المسالة ما مسالة قيادة زى ما بتعتقد المسالة مداخلات وآراء تخدم البوست يعنى ما شرط اكون متزوجة عشان اقود البوست ، فانا بدلو بدلوي فى حدود معرفتي بالموضوع واحتكاكي باطراف |
والله يا شمايل ما حا تفهميني لكن كدي بس إنتي عرّسي وبعد داك حا تكتشفي إنو الكنتي بتكتبيهو لي الناس الوهم في سودانيز أون لاين (ناس عمر الفاروق) ده كان كلام تنظير سااااي وكما يقول اخوانا الهنود قرقر كتييير ماف فايدة نفر صديق..
| Quote: ح يكون عادي وح ادلو بدلوي فى حدود اطلاعي واترك الباقي للمتزوجين ، ولا برضو حتقول لى الافلام البتشاهديها فى ميلودي وروتانا ديل زى مجلة الكواكب؟؟ |
إييييييييييييييييك بالله إنتي من ناس مش حا تأدر تغمض عينيك ؟؟؟؟؟؟؟
لالالالا يا اللخت كان كده أكتبي ساي الحبببببببببببة ما بتجيك
إنتي ناس فيلم الساحر ومنّى شلبي وما ادراك ما هند صبري ومزكرات مراهقة ؟
ياخ والله يا شمايل اكاد أجزم إنك بتقري روايات طن من عبير !!!!!!
أفلام شنو وميلودي مييين وروتانا إيييه !!!!!
الموضوع كبييييير يا اللخت ..
تخريمة :
يا حبيبي يا أدهم بالقد وحشتني أوي أوي أوي ..هات بوسة وحياتك!!
لأ مش كده يا ناريمان خلّينا ندخل أوضتنا أحسن ..
يبدأ التصوير من أسفل القدم صعوداً لأعلى وصولاً لأدهم وهو ممسك بوجه ناريمان ويقبلها ..
إرتماء على سرير الدبل تنطفئ بعده الأنوار وينتقل المشهد لقهوة سي السيد ...
| |
|
|
|
|
|
|
|
|
|
Re: للمتزوجـون فقـط..زوجـي يحـب امـرأة غيـري!! (Re: عمر الفاروق)
|
صباح والمتداخلين
معليش بس اسمحوا لى ارد على الفاروق
والله يبدو انو الجدل معاك بيزنطي
وتتعمد ان تعرج عن اصل الموضوع
| Quote: ولا برضو حتقول لى الافلام البتشاهديها فى ميلودي وروتانا ديل زى مجلة الكواكب؟؟ |
مفروض تفهم انو انا لما كتبت ليك الكلام الفوق دا قصدى كان انو مجلة الكوكاب دى اساسا ما وقعت فى عيني ولا بعرفها، فطالما بتقول انو انا ماشة بنصائح مجلة الكواكب اكيد ح تضيف للقائمة قنوات الافلام العربية
معليش يا فاروق لو ماقادر تفهمني انا ما ذنبي
| |
|
|
|
|
|
|
|
|
|
Re: للمتزوجـون فقـط..زوجـي يحـب امـرأة غيـري!! (Re: صباح احمد)
|
| Quote: دا قصدى كان انو مجلة الكوكاب دى اساسا ما وقعت فى عيني ولا بعرفها، فطالما بتقول انو انا ماشة بنصائح مجلة الكواكب اكيد ح تضيف للقائمة قنوات الافلام العربية |
بركة العرفتي ميلودي وروتانا براك طيب!!!!
لأنو بي مفهومك بتاع الكواكب الما سمعتي بيها ولا بتعرفيها لو كان كتبت ليك :
يا شمايل يبدو أنك تشاهدين قناة ميلودي وروتانا ..
كان ردك حا يكون :
بري يا يمة يطرشني ويعمي جيراني كان سمعت بيهم قنواتك ديل..
أهو ماشين كويس معاك وحبة حبة حا نصل ..
تخريمة :
يا زولة انا عند رأيي الموضوع ده ما حقك وما بيشبهك وشهادتك فيه تدخل في باب التنظير زيّها زيّ مداخلاتي في السياسة والفن التي تدخل من باب التنظير لا المعرفة وعليه تخرج كلها مشاترة ..
البركة في الكورة ..
ليه تعملي فيّة كده يا حنان ؟
حرام عليك يا مدحت ما تؤلش كده انا بحبك وأبوس التراب اللي تمشي عليه وأاااادي أحلى حضن لأحلى مدحت ..تعال يا حبيبي خليني أضمك ..
يااااااااااااااااااااااه يا حنان وحشتيني وحشتيني وحشتيني أممممممممممها ..أممممممها ..اممممها ..
| |
|
|
|
|
|
|
|
|
|
Re: للمتزوجـون فقـط..زوجـي يحـب امـرأة غيـري!! (Re: عمر الفاروق)
|
أساساً الزواج بيجي بعد ما الحب
يكون طار في الراس و بدأ يطلع روح الحبايب
يقوموا يقرروا أن يتزوجوا عشان يتخلصوا من تعب الحب
فيكتشفوا إنهم إتخلصوا من الحب ذاتو.. وتبدا رحلة البحث
عن الفكاك و الشجعان جداَ بيعملوها و يتطالقوا
و الجبناء من أمثالــ بيقطعوها في مصارينهم و يموتوا
بعرستهم للنهاية
| |
|
|
|
|
|
|
|
|
|
Re: للمتزوجـون فقـط..زوجـي يحـب امـرأة غيـري!! (Re: إسحاق بله الأمين)
|
الأخت / صباح
شكرا لك على طرق هذا الموضوع الهام وبالتأكيد هو ليس تجربة شخصية لك ولكنه موضوع إجتماعي حياتي مهم حاولتي شخصنته في إطار براعة الصياغة لو لم يخنني الاحساس .
المرأة السودانية عموما والرجل السوداني وحسب بعض الاشكاليات الاجتماعية في الثقافة والعادات السودانية يواجهان مشكلة كبيرة فالزواج غالبا نفسيا هو خاتمة المطاف لأشياء كثيرة كالكلام المعسول والتجمل وممارسات الخطوبة المختلفة وهذا شائع في معظم الزيجات السودانية
الشيء الثاني والذي أشرتي له وأغفله المتداخلون هو أنك تنتظرين طفلا بمعنى أنك تعايشين فترة الوحم وهي فترة تغييرات فيسولوجية خطيرة تؤثر على مزاج وتصرفات المرأة ومعظم حالات الطلاق المبكرة تتم بعدم فهم الطرفين أو أحدهما لحساسية وطبيعة هذه المرحلة وكانت الحكيمات من جداتنا يأخذن بناتهن إلى بيوتهن ويبعدهن عن أزواجهن في هذه الفترة درءا لمشكل محتملة .
ومن الأخطاء الشائعة هي الولادة المبكرة للزوجين فقبل أن يفهمان بعضهما كزوجين ويعطيان نفسيهما الوقت الكافي للاستمتاع بالزوجية تحمل الزوجة وتتوحم وتتغير والزوج لم يشبع بعد من الاحساس بالحياة الزوجية فتبدأ المشاكل والاستسخال والاستحمار وغيرها من النعوت الشنيعة التي قد تحول البيت إلى شظايا منشطرة قد تلتئم وقد لاتلتئم أبدا .
وبصراحة وبدون زعل المرأة السودانية نادرا ما تتجمل لزوجها بعد الزواج كما هو الحال قبله لذلك غالبا يرى الرجل فيها امرأتين إمرأة أحبها قبل الزواج وأخرى يظل طول عمره لاهثا يبحث فيها عن المرأة الأولى ... لكن للحب بعد الزواج طعم حقيقي أفضل عنه من حب قبل الزواج لأن حب بعد الزواج هو حب الشخصية كما هي دون مقارنة مع شبح سابق لايعيش سوى في الانطباع ... وياجماعة المرأة معذورة فقبل الزواج تقضي ربما وقتا محددا مع زوجها المفترض وممكن تربط فيهو راسها وتتزين زينة إسلامية لو كان متدين وممكن تتزين زينة أفرنجي لو كان يحب ذلك ولا تنسوا أنها قبل لقاء خطيبها أو زوجها المفترض تقضي معظم الوقت أمام المرآة ... لكن بعد الزواج هو 24 ساعة معها وعلى كاهلها تسقط مجموعة من الواجبات ... طباخة ... كنس ... تنظيف عدة ... و... الخ من المهام ولاوقت لديها سوى لزينة على السريع ومع ذلك فالمرأة السودانية تحاول جاهدة تزيين نفسها حتى بالجلوس على النار ( حفرة الدخان ) ناهيك عن الأشياء الأخرى وعلينا نحن الرجال تقدير التضحيات والأهم فهم التغييرات الفيسولوجية التي تحيط بالمرأة كل شهر أو أثناء الوحم فذاك أمر ليس بيدها ولا بإرادتها ... ويارجال طولوا بالكم شوية .
أما النقة وأخواتها فهو أسوأ مافي المرأة السودانية
| |
|
|
|
|
|
|
|
|
|
Re: للمتزوجـون فقـط..زوجـي يحـب امـرأة غيـري!! (Re: صباح احمد)
|
ازيكم
والظاهر بقت علي حكاية المثل البقول(البيت محروس وستو تكوس)مع اختلافات بسيطة جدا في بعض الكلمات..ومع تقدير كثير للوضوح
وكتر خيركم كلكم علي المرور والجميل والمتعجل عند البعض لكن برضو جميل..
فالبعض لم يقرأ السطور جيدا فانا قلت ان زوجي يحب امرأة اخري هي انا قبل الزواج ولم اقل انه يحب امرأة ثانية هي ليست انا..
عموما الموضوع مهم ويحتاج مزيدا من البحث والتقصي
_______
وبجيكم بي رواااقة.. خايفة حلة الطبيخ تتحرق
| |
|
|
|
|
|
|
| |
صباح احمد
أيمن الطيب
ismeil abbas
حليمة محمد عبد الرحمن
صلاح أبودية
Ahmed musa
انتصار محمد صالخ بشير
Muna Khugali
Osman Musa
يوسف الولى
Kabar
PLAYER
مجدي عبدالرحيم فضل
معتصم محمد صالح
Hisham Ibrahim
صديق عبد الجبار
عمر الفاروق
mamkouna
Ashraf El Bagir
مريم بنت الحسين
فدوى الشريف
محمد أبوالعزائم أبوالريش
Abdulbagi Mohammed
إسحاق بله الأمين
طارق عبد اللطيف نقد
Al-Shaygi
فيس بوك
تويتر
انستقرام
يوتيوب
بنتيريست