قرشي منصور .. وما ادراك ما قرشي منصور.. الزول دا شفتو زمااان في برنامج نجوم الغـد .. وحضرت ليهو حلقة في النيل الأزرق برضو غنا فيها غناء غريب جدا من نوعية الناس البتلحن الغناء الغريب .. وبتغنيهو .. تلحن الغناء الغريب ما مشكلة .. بس كمان تغنيهو وتمتع بيهو الناس الحولينك .. دي حاجة غريبة قرشي منصور .. زول فنان تشكيلي ومصمم ولواان .. وغناي ولحــان .. وأخو أخوان عبد الله داش كان شابكني .. ياخي قرشي جا السعودية والزول دا لازم نجيبو الرياض هنا .. أقول ليهو كويس يقول لي ياخي قرشي دا زول فنان .. وطبعا نا ما عارف قرشي دا منو ولا متذكرو .. وطبعا الفانين البتوصفو عن طريق الفنانين ديل صعب انك تتخيلهم ما لم تلاقيهم والعين بتشوف .. عبد الله داش ايضا فنان ريشة .. ولون .. وكلمة. أول أمس .. يوم الجمعة بالرياض اتلمينا لمة بتاعت دبرسة يوم جمعة وبكره المدرسة .. في بيت صديقنا المنبري اكتشافنا الجديد .. عمر أحمد صلاح شتات في لبجنة التنظير والاستماع .. عبد الله داش .. شارك بي ملف صوتي .. اتنجر في نفس اليوم .. معتصم دفع الله .. ضيف شرف القعده .. مع انو استلم الوضع .. ولو شوية كدا كان احتمال يغني زاتو عمر أحمد .. استضافنا في صالونه العامر .. في يوم خلق نفسو براهو ما اظنو يتكرر شخصي الضعيف .. اصطحبت كاميرا التصوير .. فهذه من اللحظات السعيدة جدا .. يجب ان توثق لما يكون في عود .. وفي شباب حلوين .. بتعرف تقرا وتسمع وتغني .. ممكن بعداك تتخلق اي حاجة تاني .. حتى لو كانت غير مدبره. قرشي منصور.. من ابناء مدينة مدني الجميلة التي تعودت ان تلد النجوم .. لكن تفشل في المحافظة عليهم .. فهاهو قرشي منصور .. طير مهاجر آخـر احتضنته الرياض .. وللجمال في بلادنــا الصبر والسلوان ..
04-27-2008, 08:07 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: يا علاء الصبر غلبني وانت عارف طرش الكمبيوتر بتاع المكتب بس لو دا قرشي ود مدني الكان في اليمن ورجع السودان تكون غرتنا لي صرتنا
امــاني .. والله تصدقي هو زاااتو .. بي كل حاجاتو السمحة ديك .. بلاي لاقيتيهو في اليمن وخليتوهو طلع منكم ساكت كدا ..؟ اوعه تقنعيني انو ما غني ليكم بالعود ..؟
Quote: الزول دا غنا في عرسي ( اقيس محاسنك ) و( مدني الجميلة ) والفيديو قاااااعد امشي احولو سي دي وانزل ليكم الاغاني دي
اقول ليك حاجة .. ليك علي كمان .. مدني الجميلة دي تتغنى ليك .. واقيس محاسنك بمن السعودية واليمن دقة سريعة .. السي دي .. كان فكيتيهو عكس الهواء بيوصل .. كدي جربي فكيهو ..
04-27-2008, 09:15 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: يا تامبا تعال في مسنجر ولا تلفون ولا (تعال بالعندكـ تعال) عاوزكـ
يا خــدوري .. اسمع عليك الله بعدين .. إنت الليلة الاحد قاعد في البيت مش كدا .. يا مشركين وحياتك يا خدر ياخدر ما عندي ماسينجر في الاجهزة القدامي دي كلها .. بالليل، خليها بالليل بعدين في البيت
شوف لي معاك موضوع قرشي دا شنو عليك الله ..
04-27-2008, 09:35 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: يا علاء ما جننتنى جن أنا قلته عمنا منصور عنده واحد من أولاده اسمه قرشى وأنحنا ما عارفنه وكمان نجم.
يا حمـد .. صاحبنا عماد ببو .. كنا مسمنو عماد الدين منصور .. على اسم اخوي عماد قبيل بكتب في اسم قرشي .. كتبت قرشي منصور يونس .. يعني اديتو ليك التابعية طوالي .. بعدين عبد الله داش كل مرة بكلمني عنك حتى ظننت انه سيوررثك .. داش وقرشي وباقي المجموعة دي يا حمد شياب حلوين عديل كدا سندهشك في قادم الايام .. وكان محظوظ اللقى لي زول يصلك الحجل بالرجـل وخلي الباقي علي .. ياسر طيفور المهمش سالتو منك قبل كم يوم .. شايفو قطع الخبر طبعا اكيد ماكلمك .
04-27-2008, 08:48 AM
awad okasha awad okasha
تاريخ التسجيل: 07-15-2007
مجموع المشاركات: 3876
تمبس ياخ بالغتا عديل .... قرشي في الرياض ليهو فترة ... وتكون اول جلسة امبارح بس ..؟؟؟ ( خلاص امرقي مني ) ما هي ذاتا العملتا فيني ... المدام التقول كانت سامعانا ... اجي الرياض بجاي هي ( تولد ) بهناك .. تعرف في الجلسة اياها مع قرشي ... طلعنا بخلاصة بالاجماع كده ... ( قرشي اعلن الوفاة الدماغية للدهشة لدينا ) ... ما عاد يدهشنا شئ بعد الذي سمعناه .. ده زول مسكون بالجمال والشجن .. وغناهو ( بيبشتن ) و ( يتلتل ) ... ويعمل شنو كده ما عارف .. ياخ امسكوا في الزول ده قوي ... لانو في خطط لجذبه خارج الرياض ..
داش ياخ ينعل ...
04-27-2008, 02:46 PM
tmbis tmbis
تاريخ التسجيل: 10-19-2002
مجموع المشاركات: 24862
Quote: وتكون اول جلسة امبارح بس ..؟؟؟ ( خلاص امرقي مني ) ما هي ذاتا العملتا فيني ... المدام التقول كانت سامعانا ...
يا ود عكاشة .. والله كان مرقت واللا ما مرقت .. غايتو فاتك يوم دولي يوم الجمعة .. ما كان فيهو تنظير كتير .. على خفيف كدا غنا قرشي بينما التزم الجميع الصمت .. غنا قرشي واعاد توازن الكفة .. المايله .. بفعل انعدام القعدات الطابعه الغنا الزي دا دي ما اول مرة يغني قرشي .. غنينا كتير .. وفي شغل الكورال بتاع عزة السودان اضاف لمساتو ... ولسه عندنا مشاوير كتيرة خلاص
بعدين منو القال ليك لجذبه خارج الرياض .. دي جبتها من وين ..؟ .. قاعدين نرتب ليهو في الاوضاع .. وإن شاء الله الأمور تسلك اخسر ليك فينا اربعاء وخميس وجمعة وتعال صلح نفسياتك الغنائية .. على ضمانتي ..
قصة .. اسمها قرشي .. حكاية اسمها قرشي .. روعة اسمها قرشي .. قرشي محمد منصور .... من مدني حاضرة الجزيرة التي لا تعرف إلا الفن والجمال والإبداع .. ولد ليكون فناناً .. بالمعنى العريض لكلمة فن .. مغني .. عازف .. رسام .. تشكيلي .. مصمم وشاعر .. كل هذا ربما لا يكون مهماً .. ولكنك تقف أمام إنسان باتساع كلمة إنسانية .. الحضور الراقي .. الابتسامة الصادقة .. الذوق الرفيع والوجدان الحي .. في فترة وجيزة .. وجدتنا نقطع المسافات إلى حي الدرعية .. الحي الملكي القديم في مدينة الرياض حيث يقيم قرشي وداش .. مسافة تعلو وتهبط .. تعبر خلالها سهول ووديان وتمر بقلاع تاريخية حتى تصل .. لتجد قرشي بين اللوحات والعود والجيتار .. يستقبلك بلهفته الطاغية .. هناك .. يغمرك بمحبة ابن البلد الأصيل .. يكتب أشواقك مقاطع شاعرية .. ينقش أحزانك لوحات سريالية .. يرسم مشاعرك مدينة عاشقة .. الجلوس إلى قرشي .. جلوس إلى القصيدة في سيرها القاصد عبر الأزمان .. حوار مع اللوحة في بعدها الأزلي وتداعيها وتجاوزاتها .. ديالوج مع الأوتار .. مانالوج مع الألحان .. كل هذا .. وإن شئت أكثر ( يا ود يا ذوق .. يا شدرة شوق نديان ) جاءنا في زمن خاص .. تنكمش فيه جنبات الأرض وتتقلص أبعاد السماء .. جاءنا ونحن نغنى : (منو الحاحاك .. منو الناداك .. منو الرسمك خريطة شوق .. منو الوصاك ) فاحتفى بنا ورسم ليل أشواقنا فساتين مطرَّزة بالنجوم .. اتسع صدراً ليحتمل أوهامنا وشكوانا وأحلامنا المستحيل .. عندما نقول ( منو البقدر ينادي طيور السماء الفي الجو .. منو البقدر يقول يا لو .. ) .. كان يعزف (ايدي في أيدك نغني) .. وعندما نقول (وانادي عليك .. يا ........ انت التعب البيهو بنحيا ) ....... كان يقول : وحتى شمشنا الغابت في جواك .. ضياها اتجدد .. طلعت مَشْرِق من عينيك .. يردد صبحك وعصرك ) وعندما ننهار ونقف عند قبة الفضاء .. ونهوى .... ثم نهوى .... عندما يكون عالمنا في حداد .. ولا أحد .... كان يركع ويسجد .. يصلي لله أن نعود .. ذلكم هو قرشي .. جاءنا في زمن خاص .. وعاشه معنا بخصوصية .. جاءنا في زمن آفل .. رحل مع الجامبو 777 .. في اليوم السابع .. فرحلت أيام الله السبعة .. جمعة .. سبت .. أحد .. كل التواريخ .. لم تعد .. زمن ضاعت فيه الهوية ... نسينا الاسم .. شـ .. شتـ... شقا .. شوارد .. شواهد .. شئٌ كهذا .. لم نعد نتذكر!! كنا نقيم في مكان ما .. ملامحه حنطية .. جوار نخلة .. هبت عاصفة .. لا أرى .... من أنا ؟ أفرك عينيَّ .. لا شئ هنا .. ظلي اختفى .. هاتفي تركوازي .. أرقامه بنفسجية .. لا يقرأ؟ أتلفت في ذاكرتي .. أوراق متناثرة .. أسماء مبعثرة .. أسماً واحداً أعي .. نام في خاطري .. هلَّل في بكوري .. لوَّن مناظري .. توَّهج في أسطري .... أتذكره ! في زمن كهذا جاء .. زمن أشجّ وأبَحْ .. زمن تزرونا فيه الرياح .. وتمزقنا القنابل .. تاح .. ترح .. زمن الدمع المالح .. وجرحنا النازف ينتح .. تح .. تح .. في زمن كهذا جاء .. فأعاد ترتيب الطاولة .. ذلكم هو قرشي .. لوحة تلهم ألف زاوية للقراءة .. مقطع يحتمل ألف باب للتأويل والجمال .. وقصيدة تمتد إلى ما لا نهاية .. . . . .. أما أنت يا تمبوس .. هكذا .. وكعادتك دائماً .. تترصدنا .. تفضحنا تقعد لنا عند كل مقتل .. ولا ترعى فينا الله .. قتلتنا .. قتلك الحب والشوق يا هذا .. أما آن لنا أن نستريح .. أما كفانا شقاً ولطماً وردح ..؟
و.. تحياتي للجميع هنا .. ونلتقي .. صلاح / شتات
04-28-2008, 09:07 AM
tmbis tmbis
تاريخ التسجيل: 10-19-2002
مجموع المشاركات: 24862
شتــات .. صديقنـا .. في قرشي .. وصاحب تلاتة ارباع الكيكة القرشية .. وقع ليك في جرح قرشي فهو يجيد السكوت .. وأنت تحدثه عن احداثيات كل الجمال .. ولا تنسى أن ترفق صورك الجمالية .. اصبحت تتسلق هضــاب ومرتفعات الدرعية .. وتسلك طرقها الوعرة .. تركت معبد الطرقات من اشارة شارع مكة وتدخل يمين ..بقيت تكبر اللفـه .. عسل ولعل .. أن يبرد قلبك اتمنى لك صادقا أن يبرد قلبك .. يااارب قلبك يبرد ياارب برد قلب شتـات
ياخي دا ما سربعتو بس ... دا لحقتو امات طـــه .. غايتو انت محظوظ وما محظوظ ما محظوظ لانو فاتك الغنا السمح دا .. ومحظوظ لانو الكراسي كانت في شكل صوفـا .. حقت الصالون .. يعني لو قررنا كان نرحله من مكانه .. والله كان تشرب ما تروى ..
إنشاء الله ما ينفعكم . وأنا المسكين يوم الجمعة جاااي وجايب معاي كمان الكيك والتورته وسيرمس شاي كمان وجاييكم في البيت بي نفس قلتا نحتفل سوى بخطوبة معتصم وما عارف البلد خربانه بي هناك .
غايتو جنس غايتو
04-28-2008, 11:13 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: وأنا المسكين يوم الجمعة جاااي وجايب معاي كمان الكيك والتورته وسيرمس شاي كمان وجاييكم في البيت بي نفس قلتا نحتفل سوى بخطوبة معتصم وما عارف البلد خربانه بي هناك .
والله يا عمده ما بتقصر .. غايتو كيك وفات علينا .. تتخيل انا كنت في مشروع نوم من الخميس والجمعة .. وما غادرت البيت .. اصحى وانوم .. داش وشتات هم الفي وش المدفع .. لحدي المغربية تم انجاز هذه المهمة .. يعني لو اديته سلك قبال المغربية كان قلنا ليك توجه غربا بمحاذاة طريق الملك عبد الله وبنديك الخريطة .. الجايات اكتر من الرايحات .. اكتر من الرايحات فيما يتعلق بالتورتة والكيكه طبعا
تعرف يا تامبا التورته ما كان مشكلة تعرف المشكلة كان في أم حسام بعد ما عرفت انكم مافيشين أها قالت لي متورني من صباحة ربنا وقومي وأقعدي وجيبي وختي وفي النهاية كيكتي دي يعني باااارت خلااااص !! أها هسه البوريني رأيه فيها منو ؟! أها هسه أوديها وييين ؟ أها تعرف لما شفتها ليك زعلاااانه كده قلت ليها تعرفي كويس أنهم مافيشييين ( وانا طبعاً مغيوظ ) بس لزوم المجاملة ، أها قلت ليها أحسن حاجة في حديقة هنا جنب المكتب في شارع الثمانين خلينا نمشي نقعد هناااك ونخت التورته والكيك والشاي ده ونعملها قعده كده براااانا ، أها طبعاً ما صدقت وجري للحديقة غايتو مصائب قوم عند قوم فوائد . .
مودتي
عماد
تخريمة : ياشتات الفيك إتعرفت والحمد لله أنه قرشي خلاك ترجع لينا بالسلامة .
Quote: حسبتك تنقر في دفوف شوقك وتطربني اتاريك كنت بتنقر في جدار سجنك عشان يرهف تشق صدري وتطير مني خلاص امرقي مني خلاص امرقي من جواي
قرشي منصور من الكائنات الجميلة انسان معبا فن .. مبدع من طراز فريد ، وكمان تشكيلي ومسرحي بارع اول مرة سمعتو عند صديقنا مامون حسين بحضرة داش وآخرين في حلقة النيل الازرق ، غنى كما يجب ان يكون الغناء
شكرا تامبا على هذا التوثيق دائما سمح وبتعرف درب الجميلين ... .. . شايف ليك معتصم بنفض في القميص كلما قرشي يقول (خلاص امرقي مني .. خلاص امرقي مني) قوليه اركز ياعريس
04-28-2008, 11:55 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: حلقة النيل الازرق ، غنى كما يجب ان يكون الغناء شكرا تامبا على هذا التوثيق دائما سمح وبتعرف درب الجميلين
يا بوعمير .. إنت من اسباب نجاح هذا اليوم عرفت كيف تصطاد هذا الجميل .. وكان ان كانت هذه الامسية حلقة النيل الأزرق بطرفي .. وبحاول انزل ليك منها عربون رد الجمال .. موعودين بي امسية تانية .. على الاقل علشان خاطر الزعلانين مننا ديل .. كن مستعدا
قرشي صديق الزمن الطروب ... حبيبنا وفردتنا زمنا مضي ونتمنى عودة ها الزمن .. قرشي وأخوه فتاح بتاع الجيتار وعصام بتاع الأكورديون .. وبقية الفرد . عمر جعفر .. منير .. عثمان على .. عز العرب .. شريف القصير ... بتاع الأورغن .. عبد الرحمن عبد الباقي .. طارق ماو بتاع الجيتار والضابط الإداري .. و و و و و
يا حليلكم ويا حليل أيامكم .. في بالي دوام ..
تحياتي يا تمبس للرائع قرشي وقول ليه لازم ألاقيك لمن أجي السعودية مروراً بمدينة الرياض للعمرة أو للسودان ...
04-28-2008, 01:41 PM
tmbis tmbis
تاريخ التسجيل: 10-19-2002
مجموع المشاركات: 24862
الحبايب الفوق ديل مش فرقة وبس .. ديل فيهم فنانين وأصحاب وعازفين من الزمن الجميل ... عمر جعفر الفنان المنطلق بقوة والذي ينبئ بقدوم عملاق سيكون له شأن عظيم .. عثمان على وعز العرب ومنير .. فنانين شباب مدفونين في مدني ويمتلكون خامات صوتية قوية وثابتة .. وحس فني عالي في الأداء .. بس بعيدين عن الإعلام .. شريف القصير .. طارق ماو .. منتصر سناده .. أبو الوفاء .. ياسر جنكيس . وعثمان دغيس ( هي ده ما أنا ظااااااااتو !!!) وغيرهم وغيرهم من العازفين المهرة بمدني .. ما يجمعهم حبهم للموسيقى وحبهم لعلاقات صداقة معافاة .. وكان بيننا قرشي منصور وأخوته وكلهم عائلة فنية لا يشق لها غبار ..
كنا كأننا أخوة أنجبنا رحم واحد .. هو رحم واحد .. إلا أنه ليس بالرحم البايلوجي .. رحم الصولفيج والأوكتاف .. والنغم والإيقاع .. والعشق الخرافى للغناء ..السمح !!
تحياتي مجدداً لقرشي .. يا بختكم بيهو .. وقوزل ليهو غني لينا أغنية أبو عركي المهجورة .. منو القال لي من أول أحب عينيكي كان ما ساي ..
ح تموت من الطرب ...! أراهن !!
04-29-2008, 01:50 PM
tmbis tmbis
تاريخ التسجيل: 10-19-2002
مجموع المشاركات: 24862
يا دغيس .. ياخي احي عبرك .. (النوته) الفوق دي .. كان عندي شلة انتحاريين زي شلتك دي .. ناس بتضرب مزيكا زي ما الله خلقه .. وحريفة كفر ووتر واهتمامات مريبه جدا .. اسماء كبيرة جدا حايمه الآن في الساحة .. اسماء كتيرة هاجرت وما معروفه وين ..؟! اسماء في حياتنا قرشي الله يديهو العافية اعاد تشكيل خليه مشابهة من الشباب ديل .. اهتماماتنا قريبه جدا لي بعض .. وإن كانت بتختلف في وسيلة التعبير .. الايام الجاية شكلها بيكون افضل إن شاء الله واكيد ح نواصل ليك الربط بينك .. وبينا .. وبين قرشي .. وبينك وبينا والأيام ..
Quote: منو القال لي من أول أحب عينيكي كان ما ساي .. ح تموت من الطرب ...! أراهن !!
.. يا دغيس ..شكرا على البخــره دي .. واوعدك انك تكسب الرهـان واوعدك انو اسمعك ليها في البوست دا ..
04-28-2008, 10:32 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
تعرف يا تمبس حاجاتكم الكتيييرة البتعملوها بي الكُرب ديك ما قاعدين نزعل منها .. والبتكلمونا بيها وما بنجيها برضو ما قاعدين نندم عليها وبنقول برضو نحن الغلطانين .. لكن تعرف يا مان بالجد في دي زعلت منكم !!! زمان الواحد كان بيقول إمكن عشان منقطعين منكم ما عاملين Update لكن الزول يكون معاكم كل يوم وناطي ليكم مفضّلاً لحظات من حياة العزوبية على لحظات أسرية وصلات رحم وفي النهاية تشختوا لينا !! دي ماااا بفوتها ليكم ..وانا زول دفاااااااااااان .. لا أستثني فيكم أحدا من معتصم وصلاح وعبد الله وقرشي زاتو .. خوة فرتق !!! تخريمة : ما تجوا تشبكوني قلنا تكون خايف من العيش أو راعينا لي ظروف دوامك .. بالجد زعلت ياخ ..
04-28-2008, 10:46 AM
محمد عبدالرحمن محمد عبدالرحمن
تاريخ التسجيل: 03-15-2004
مجموع المشاركات: 9059
Quote: زمان الواحد كان بيقول إمكن عشان منقطعين منكم ما عاملين Update لكن الزول يكون معاكم كل يوم وناطي ليكم مفضّلاً لحظات من حياة العزوبية على لحظات أسرية وصلات رحم وفي النهاية تشختوا لينا !! دي ماااا بفوتها ليكم ..وانا زول دفاااااااااااان .. لا أستثني فيكم أحدا من معتصم وصلاح وعبد الله وقرشي زاتو ..
بالله شوف قوة عين ا لزول دا .. ناس ماعايزين يعزموك الخفة ليك شنو ؟.. (الخفة الكتلت ام تفه)..
تمبس ..تحياتى ..
قلنا ليكم الابداع فى الاصل (جزيراوى) نسبة للجزيرة من سرور والكاشف مرورا بود الامين وعركى ومصطفى سيد احمد ولعند قرشى دا ...ماشاء الله عليهو ..مع تقديرنا لامدرمان فى تقديمها لهذا الابداع لمختلف انحاء السودان .. (قصرت معاك؟)..
04-29-2008, 08:16 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: بالله شوف قوة عين ا لزول دا .. ناس ماعايزين يعزموك الخفة ليك شنو ؟.. (الخفة الكتلت ام تفه)..
يا محمد عبد الرحمن كيفك ...؟ ياخي صاحبك دا فنان .. بغني عديل كدا .. بس البلد ضيقة .. مفترض تحسن علاقاتك معاهو احتمال يوما ما .. تحتاج لي انك تكون كومبارس معاهو يا فردة كورس ..
Quote: قلنا ليكم الابداع فى الاصل (جزيراوى) نسبة للجزيرة
ما قصرت والله لكن غصبا عنك والله يا بوحميد مافي اي مشكلة .. ما بنختلف .. إلا لكن كمان .. نحن في أمدرمان في فحص الجودة .. والفنشن والتطشيز اقول ليك حاجة ..؟ خليني اجيبه ليك من الاخــر .. طالما فيها ابداع .. المورده هي الجهة الرسمية التي تقوم باللمسات الأخيرة في عملية صناعة النجوم وأظهارهم للاضواء .. يعني بي صراحة: الحركة عامله زي .. الواحد لما يجي يسافر بره السودان بالطيران .. لازم يسافر عن طريق مطار الخرطوم .. طبعا محمد الشيخ بيكون عندو مليون اعتراض على كلامي دا .. لكن نعمل شنـو .. دا الله ودي حكمتـو .. وحكمتو بالغه .. أما قرشي .. فهو قيمة جمالية خالصة .. ما ليها علاقة بالزمان ولا المكان .. ولا المناخ حاجة كدا مصنوعة لتكون في اي مكان..
Quote: زمان الواحد كان بيقول إمكن عشان منقطعين منكم ما عاملين Update لكن الزول يكون معاكم كل يوم وناطي ليكم مفضّلاً لحظات من حياة العزوبية على لحظات أسرية وصلات رحم وفي النهاية تشختوا لينا !! دي ماااا بفوتها ليكم ..وانا زول دفاااااااااااان .. لا أستثني فيكم أحدا من معتصم وصلاح وعبد الله
تعرف ياعمر والغريبة أنا كنت جاااي عندهم يوم الجمعة وجايب معاي حاجات حلوه كده قلت نحتفل بخطوبة أخونا معتصم أتاريهم لابدين بي هناك وأدوني مشواااار ساااااكت . ولما إتصلت على معتصم القتيت ده وقلت ليهو أنا جنب بيتكم أنتو وييين ما قال لي بس قال لي نحن بعيدييين قريب من جامعة الملك سعود وبس . بس تعرف برضو ما زعلاااان منهم لأني بحبهم بصورة غريبة جداً رغم جفاهم ده .
Quote: خوة فرتق !!!
أها دي بي صراحة كده يا أبو عمير ما بقدر عليها خاااااالص ، يا أخي ديل ناس ملائكة عديييل كده . وصعب جداً تتخلي عنهم حتى وهم بتخلوا عنك .
Quote: ما تجوا تشبكوني قلنا تكون خايف من العيش أو راعينا لي ظروف دوامك .. بالجد زعلت ياخ ..
معليش يا عمر علشان خاطر الهلال العظيم سامحهم المرة دي والمرة الجاااااية ( وهو في تاني جاية ) أنا بعلنها معك حرب عدييييل كده . بس المره دي سماااااح يا سمح ـ سمح ؟ ( سمح دي بتاعت نادية عثمان مختار ) . تمريرة : مبروك فوز الهلال الكبيييير وعقبال الكأس .
04-29-2008, 08:51 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: تعرف ياعمر والغريبة أنا كنت جاااي عندهم يوم الجمعة وجايب معاي حاجات حلوه كده قلت نحتفل بخطوبة أخونا معتصم أتاريهم لابدين بي هناك وأدوني مشواااار ساااااكت
والله يا عمده انا اشهد ليك انو روحك رياضية خالص .. وعمر احساس زي ما شايف اشتغله معنا دافوري اولاد الحــله .. وعصابه .. عصابه. يا شباب نحن نتفق .. قرشي للجميع .. وما لم يكن متاحا الجمعة الفاتت .. الخميس الجاي دا عادي جدا .. غايتو انا زول طريفي .. زول نصيحة العايز يسمع غنا السنين .. يحضر حالو الخميس الجاي .. إذا بيريد ..
04-28-2008, 02:01 PM
tmbis tmbis
تاريخ التسجيل: 10-19-2002
مجموع المشاركات: 24862
يا عمر الفاروق ياخ ما تعمل لينا فيها عمر احساس .. ياخي والله انا في برنامجي المعضي داك بتاع الخميس والجمعة زي ما عارف .. انا قلت عمر دا الجمعة دي ما عندو (عيش) علشان كدا بيكون مسردب في البيت .. كنت منتظرك لفترة طويلة .. بعداك كنا معزومين غدا بتاع خيانات .. بتاع مهارات فردية انا ومعتصم .. بعد ما رسلت معتصم في بعثة خارجية علشان يجيب لينا سلطة والذي منو قام اتغير البرنامج .. وغير مدرج ياخي إنت مفترض اكتر زول تكون ناقش انو الحاجات دي بتجي براهـا .. وشابكنا انا كنت فردة كورس .. لي ترباس وكنت في الكشافة ..؟ ياخي إنت ما كنت في الكشافة ولا اي حاجة .. طبعا تلقاك ما مصدق كلامي .. لكن والله الحركة دي حصلت بعد المغرب .. الخيانات دي السبب الرئيسي فيها داش .. ممكن تمسك في صلاح شتات دا صلاخية كدا لانو برضو عندو خبر وكان مسردب بيها والله انا ومعتصم وقرشي تستثنانا غصب .. على وعد انو نعمل ليك كيته بي شاي لبنه افتكر كدا ما عندك اي حنك بعد دا .. بس ملاحظة بسيطة .. انا ناوي اغير النغمة بتاعتي .. بلاي النغمة بتاعت العيش بتاعتك.. غيره عشان ما اورطك معاي ..
لا احس باي نوع من الحرج وانا اكتب لك هذا الرد لقناعتي التامة بفهمك لكل نقاطه.. علما بأني من القليلين الذين يروجون إلى عالم خالي من البيع للاخوان .. والخيانات .. بعدين ياخي انت سندي (والباك اب) بتاعي .. رايك شنو في البانر الفوق دا .. والله مفترض تجي تعمل لي حفلة عديل كدا..
Quote: يا بوعمير .. إنت من اسباب نجاح هذا اليوم عرفت كيف تصطاد هذا الجميل .. وكان ان كانت هذه الامسية حلقة النيل الأزرق بطرفي .. وبحاول انزل ليك منها عربون رد الجمال .. موعودين بي امسية تانية .. على الاقل علشان خاطر الزعلانين مننا ديل .. كن مستعدا
يازول مايهمك تانية وتالتة .. انا لاقي يوم الجمعة بدري وضمرة حاضر انت بس كبر الكوم وكتر السميعة وماتنسى عمر الفاروق يقوم يشخت ليكم تاني وخلي عمده يجي بطورتته ... .. . هاك دي ..(الحواس) لزوم دعم وكدا للشاعر محمد عبيد الفاضلابي والحان قرشي ذاتو
لما الحواس بحلمبهِن غبَّن من الجيه العِصير قلبن بقن يجن الضِهير خلن مدارسن الصباح ونزلن على السوق من شِهير ماشفتهن .. ياخي الزمانن في حويشاتن يحركن اردب العيش في القِمير لا نمه .. لا يحدرن جوير بطحانيات ليهن نسابه من الغرب جاراتِن البى جنبهن متشلخات واحدات خدر من الشرق قصاريات نعلاتن الجلد الخفيف حبوبتن من الشلك كايسلهن .. بحلمبهن وانا من نوير الحب بحب مشاي اذا فتح الدرب غناي اذا وقف الحرب ____________________________
على فكرة .. الشاعر الجميل محمد عبيد الفاضلابي بوردابي مختفي فله التحية
Quote: طيب يا تمبس ياخي يوم الجمعة دة يوم الدبرسة ... و بعد المسلسل اليومي في التلفزيون بيبتدي يوسخ و يزيد الدبرسة ... ليه ما أدريتونا خبر ؟؟؟
وإنت الصادق ياريس .. اضف لذلك صداع الجمعة البتبلع ليهو كرتونه بتاعت بندول وهو ولا هماهو والله ياريس عارفينك شيخ قبيلة .. ويوم الجمعة دا برنامجك ما بتمسك .. لكن كان حمي الوطيس .. قرشي دا في عضمو بنجيك بيهو .. اصلو لينا فترة والله من لمة معاك .. ليك نسخة فيديو والله ياريس محفوظة .. الليلة طبعا مافي ليها طريقة ... لانو عندي نسخة اصليه ما عملت منها كوبي لسه.. لكن حقك محفوظ وامانه في الرقبه ..
04-29-2008, 12:36 PM
tmbis tmbis
تاريخ التسجيل: 10-19-2002
مجموع المشاركات: 24862
Quote: يازول مايهمك تانية وتالتة .. انا لاقي يوم الجمعة بدري وضمرة حاضر انت بس كبر الكوم وكتر السميعة وماتنسى عمر الفاروق يقوم يشخت ليكم تاني وخلي عمده يجي بطورتته
بلاي ضمره سخشياً ..؟ والله يا عمر إنت ناوي ليك على حاجة .. ياخي عزالدين ضمره الله يحفظو ويديهو العافية .. عبارة عن اوركسترا كاملة متحركة .. متحركة بالاحساس الموسيقي العالي .. وبالاكاديميات .. لو استلم اي آلة موسيقية .. بيادبه ليك ادب النصوص .. كنت دائما بتمنى انو ضمره يتلم ليهو مع زول .. جوطو مرتبة زي قرشي دا .. وبعداك يللا الناس تقعد تشوف الناس ديل ح يعملو شنـو ..؟ يعني بي صراحة تاني قرفة بتاعت جمعة مافيشة .. .. محمد عبيد الفاضلابي ايييييك .. الزول دا كان هنا زمااان .. زماااان خالص ..
اشكرك للحواس يا بوعمير ... والنسخة القرشية الأولى جهزت امس بالليل .. الان في متناول يدكم.. على DVD لقيتني كيف عليك الله ..؟
تدينا الحواس .. نديك قلم الجــن
04-28-2008, 03:15 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
يا تمبس : اها شوفت نظرية الكشافة نجحت وأسة انا خلاص في لحظة تحنيكة تعرف من أولها حسيت إنو الحركة دي ما حركة أولاد أمدرمان والكلام ليك يا المنطط عينيك وطالما الشغلانة جابت ليها شاي بي لبن فأقول ليك حاجة ؟ قرشي زااااتو باص بعد ده وبلعبوا ليك زي الما حصل شي إن شاء الله الشاي ده أسمع معاهو الطيب أمبدة داش يا عمك وفي أول إختبار طلع زول بتاع دعايات ساي (فعلاً زي ما قلت صاحب أنامل دعائية) تخريمة : اولاد القلقالة ديل انا من زمااااان قلبي ما مرتاح ليهم
04-30-2008, 08:42 AM
tmbis tmbis
تاريخ التسجيل: 10-19-2002
مجموع المشاركات: 24862
والله يا عمر الفاروق .. احسنت طلعت روحك رياضية وبتتحنك بسرعة .. بالمناسبة دي الجماعة ديل اتفقوا يعملوا ليك عيد ميلاد .. بعدين ناس القلقالة ديل ما تعصر عليهم شديد كدا .. ديل عندهم جمعيتين هنا دا .. وكان قصدوك .. والله ابيعك زي الترتيب وانكر حنانك ..
04-28-2008, 03:37 PM
شتات شتات
تاريخ التسجيل: 05-03-2003
مجموع المشاركات: 1166
تمبا .. أخذتني ركابك أسيراً ذات ضياع .. إنْ تقتلْ .. تقتلْ ذا شوق .. إن تعفو .. تعفو عن أعزل .. وإن تسأل عن الحب .. فلك منه ما شئت .. لقرشي يشد الرحال وتضرب أعماق السهول .. ذلك أننا في رحلة على المجهول .. ربما المستحيل .. نبحث عن أشياء في رحم الجنون .. عن إجابة بلا سؤال .. عن سؤال أعرج في ذمة عصفور أوغل في أعماق رحلة الصيف .. كانت .. وكان الشاهد قرشي ..
لقرشي (تكبر اللفة) .. يتسع المنحنى مثل وشاحها الذي انفرد يومها كقوس قزح لفَّ حوله كل أقواس المدينة .. اتسع المنحنى ولم يتجاوز المحطات القديمة لديكم لأني لا أترك أشيائي خلفي .. كالنهر لا أنسى منابعي .. ولا أنسى ذاكرة الخريف عند قدوم الشتاء رغم التغولات والتجاوز والتعدي .. لم أخلق من طينة الأسى لكني أحتفي بحزني كفرحي . اتسع المنحنى ليحتوى قافية ضاعت في وتري .. كل ذلك وكان الشاهد قرشي ..
لقرشي طعم الدهشة .. الأذن الشفافة التي تلتقط ذبذبات البعد .. وتترجم كلمات الصمت عندما يكون الموقف اللغوي عاجز عن استيعاب هول المفاجأة .. أو عندما تتضاءل تفاصيل الاحتمال عن جلال .. عندها .. ينقلك قرشي إلى لوحة كثيفة الظلال تتميز بقوة الخطوط وحركة الألوان .. إذ لا تحتاج أن تصف سحب عينيها وهى تتوارى .. ولا أن تجتهد في قراءة الكلمة الأخيرة التي لم تقلها .. ذلك هو قرشي .. لقرشي قدرة على السماح تستوعب الفائض من القول .. لكثير مما لا يفهم .. إذ لا يسخر من المحتويات إن لم تكن في غلاف جميل .. ولا يفوته المعنى إذا تقاصرت وسائل التداول .. يستنسخ من الوردة حقل .. وينهل من كل نبع ليروي الزهر الذابل ويعتلي كل قمة لينادي عصفورنا الراحل .. ذلك هو قرشي ..
في زمان العاصفة .. كان وما يزال .. يصفِّي الغبار ليستخلص النسيم .. عندما توهَّجت المدينة في ذلك اليوم وألقت فتنتها بوقار وارتجفت أوصال الشجر .. عندما تدلت الثريات على استحياء .. وغنى القمر ( يا قمر على بابك نهارات الصبر واقفات) .. عندما تنازل الأبنوس ووضع النخل العجوز رايات الغرور .. عندما تقاطعت المحاور على النقطة صفر .. كان قرشي ..
عندما اقتلعت الريح الخيام .. وأسفرت عن حزنٍ جسيم .. وعفت الديار محلها وتأبَّد غولها ورجامها .. وحلَّت بـ فيْد وجاورت أهل الحجاز وتباعد مرامها .. عندما نامت العيون على غصون جافة .. وعندما غنت عناصر السكون : ( في كل أمسيةٍ أحن إليك تدفعني اشتياقاتي .. في كل أغنية أنادي عليك متلفحاً جراحاتي .. في كل أمنيةٍ أمشي إليك منتعلاً عذاباتي .. وفي كل خطوةٍ إليك يا نخلــتي آتي ) ..... عندها كان قرشي .. فمن منا كان ضنينا ..
ونلتقي .. صلاح / شتات
04-28-2008, 03:49 PM
محمد سنى دفع الله محمد سنى دفع الله
تاريخ التسجيل: 12-10-2005
مجموع المشاركات: 10986
Quote: سلام ليكم ومودة نضرة لمن مفرهدة أزاهير ولي قرشي تحياتي وسلامي ومحبتي السلام يوصل يالبتسمعوا في الغنا الجميل
بنسمع في الغنا الجميل زيك يا السني .. شكل الحاجات اختلف من المرة الفاتت . لوجيتنا في دارنـا لوجدتنا اكثر جمالا بك .. وح نسمعك غنا غريب وعجيب خلاص .. راجينك نحن ودايرينك
05-04-2008, 10:50 AM
tmbis tmbis
تاريخ التسجيل: 10-19-2002
مجموع المشاركات: 24862
ايـا شتات: قوافلنـا ضلت طريقهـا إلى ذاك الوادي المخضر بهم .. نستدعي فيه ما تبقى لنـا من مؤلم الأمسيات .. ولحظات باقية .. ما زالت تحمل بعض من وميض البرق الخلـب .. وما زالت ابتسامتها تضئ .. تضي كلما استدعتها .. الحـان .. أو نغمة تلتها آهه .. تخرج من بين (اوكتاف) سلالم هذا المسكون بالانغـام .. (ينقطهـا) كما اتفقنا سمفونية عظيمة لفرح أت .. كل (مازورة) فيها تشكل (حقـل) من الشجـن .. صيغة ادبياته باحكام وربطت (برباط لحني) عميق الصلة وله من ملامحهـا .. شئ من شبـه ومن صلــة عذوبــه .. (ايقاعها) خطواتها الموزونة التي تتراقص بها داخل عمق غريب لا يحسه إلا ما به وجعـه .. ثم آهـ : كيف استطاع هذا القرشي .. وامسية الجمعة ان يحلموا لك كل هذه الفوضى .. ويعبروا بنا طريق هجرته قوافل الشوق ..؟
04-28-2008, 04:38 PM
جلال ناصر جلال ناصر
تاريخ التسجيل: 09-19-2006
مجموع المشاركات: 376
Quote: عليك الله داير اطلب الاغنيه الجميله الفوق دى (ولو نلقى تلك الحظات يرتاح بالنا كثيرا) وبهديها لكل الشباب فى الدويم ومدنى
العزيز جلال ناصر .. سلامات .. وجميلة الصدفة اللمتك مع قرشي منصور الجميل في كل تفاصيلو .. الغناي حد الدهشة .. امتعنا قرشي بلحظات الطرب الجميل .. وردم الفجوة بيننا وعذابات الغربة .. وهاهو الآن يعيدنا إلى ذكرياتك الجميلة .. هناك وذكريات هؤلاء الصحاب .. ح اطلب ليك الغنوة من قرشي مع سلامك الح يصل ليهو إن شاء الله .. واوعدك في اقرب فرصة الكلام دا .. ونسمعك ليها هنا دا ..
04-29-2008, 10:48 AM
ismeil abbas ismeil abbas
تاريخ التسجيل: 02-17-2007
مجموع المشاركات: 10789
Quote: أول أمس .. يوم الجمعة بالرياض اتلمينا لمة بتاعت دبرسة يوم جمعة وبكره المدرسة .. في بيت صديقنا المنبري اكتشافنا الجديد .. عمر أحمد صلاح شتات في لبجنة التنظير والاستماع .. عبد الله داش .. شارك بي ملف صوتي .. اتنجر في نفس اليوم .. معتصم دفع الله .. ضيف شرف القعده .. مع انو استلم الوضع .. ولو شوية كدا كان احتمال يغني زاتو عمر أحمد .. استضافنا في صالونه العامر .. في يوم خلق نفسو براهو ما اظنو يتكرر
ألأخ/تمبس..
إن شاء الله دائمآ متلمين فى ألأفراح..وهذه المجموعة الحلوة..ما شاء الله..مزيج جميل من الناس الحلوة
الرائعة..ألأضافة الجديد ألآخ/عمر احمد..ربنا يديهو الصحة..
بالجد قرشى منصور فنان..لم استمع له من قبل..ولكن باين عليهو..فنان بجد...
شكرآ ليك..وعلى حاجاتك الجميلة دى..كتر..وما تقصر.. مودتى..
إسماعيل محمد احمد عباس...
05-04-2008, 01:54 PM
tmbis tmbis
تاريخ التسجيل: 10-19-2002
مجموع المشاركات: 24862
العزيز اسماعيل عباس .. تشكر يا سيدنا .. وإنت دائما تعرف طريق الاشياء الجميلة .. قرشي تم ضمه للقافلة .. واحكمنا القبض عليه .. كقيمة جماليه تضاف للمجموعة ..ولن يقف في هذا الحد من الطموحات الجمالية .. ولا اخفي عنك سرا إن الايام القادمة ستشهد تحول فني ضخم جدا بدات معالمه في الأفق .. امسك الخشب يا سمعه .. وعينك بتشوف الجمال ماشي بي انغامــو..
أصدقائى الذين لهم القلب مشرعاً . البسيطــون كالضوء فى الأمسـيات المليحات . سحناتهم خضرةً من خميل ، كالبساتين ذات القطوف ، كالغسق البرتقالى الملامح ، إنهم يصنعون الفرح عندما تغلى الدحيةُ من حمل أثقالها ، يالها من حياة تضج بهم فى جمال، يغنون تسمع أصواتهم كالكنار يصلى صباحاً مساءً . يوازون غربتنا وغرابتنا ، ثم يبتدؤا نثرهم طيب ما عندهم ‘ إنهم هكذا دائماً مترفون . يا إلهى .... منذ ان كنت فى البدء لا شئ ، وللآن لاشئ ، كنتُ أحقق فى أن أكون قريباً من الشئ أو أن أدوُر فى فلكٍ يهتدى للمصاف الذى هم عليه ، ولكننى عازم على خلق معرفة حقيقية تفضح عن محتوى ما يكون ، عن كل ما فى الجمال من جمال ، وما أستدل به للوصول صبرى على رحلة البحث . حتى المغيب من الآن فى حوجةٍ للمزيد . فصديقى المغنى بديع ، وانى لأشــهد على ما يخبئ من إختلاف ، يومها قلت : يا .... يا جماعه ...
( دا صادر مننا الدهشه ووقِف بــ هــــناك ) مني وعني .. لعشره أعوام قادمات لم يحفزنى دافعٌ للإنشــداه . كل هذا الذى فيه نحن لنعمه . يا إلهى ....
لك الحمدُ .... والحمدُ .. والحمد إذا إننا لم ندبر له منذ حين ، ولكنه قد أتى كما شئتُ له . فكان قرشى وكان تامبا وكان عمر وكان معتصم وكان صلاح ببساطتهم سابقة الذكر كانوا عطر تلك المساحة فى الأمسيه والجماعه ( الزعلانيين ياااااخ معليش نعوضااا ليكم فى سمايتكم إنشاء الله ) قرشى دا فى مراتٍ سابقه قلت ليكم ( دا حكايه تانيه أصبرو لي أجيكم ليها بــ مزاج ) مزاجى المعــكّر رحل من زمان رحل خلاّ حال الســواد السهاد المِكحِّل عيون الرماد الرماد المُولعّ لهب ولأنه معى دائماً ، قاسمنى التوتر ، والقلق ، والضحك ، والصمت . كنت فخوراً به/هم إلى عالمى الذى لايعترف بالحدود يااااااه .... التردد يحاصنى فعلاً ....! كأنى أجد صعوبه بالغه فى أيراد كل الحقائق عن ما أعرف ...ما أحب صعب ... دا الزمان الكعب يا شتات ضيعوك..؟ مش كِدا .... يا خى خلى الحكايه وتعال نحكى نحكى ليك المِقصّـــر ضلوعك خبارا بتطقـــ..طِـق دموعك براها بترقــ..ـِرق لقيتك معسْـــم براك ...
مــــــــدني .. السني والمساح .. مدني عركي ومحمد الأمين .. مدني محمد الشيخ .. مدني قرشي محمد منصور ..
زي ما قال شتات .. (لم أخلق من طينة الأسى لكني أحتفي بحزني كفرحي).. وما أجمله الفرح عند الأصدقاء ولحظات الحنين .. كانت يداي قد فارقت الكتابة وضاع عندها ملمس الحروف .. وتفجرت الجروف وإخضرت سماؤاتنا وأطل الفرح ينقّر عند بواباتنا .. وتفتحت زهرة متبرجة تعلن عن حضور .. وما أجمله من حضور .. قرشي محمد منصور ودعواه للجمال .. وهو المسكون حد الإبداع والتطريب الأصيل .. كيف لي أن أكتب .. وأنا في حضرة هذه السيمفونية .. وزي ما ذكر عمر أحمد وغنى قرشي .. خلاص أمرقي مني .. خلاص أمرقي من دماي .. كيف للدهشة أن تفتر وتمرق في حضرة هذا الألق وهذا الحنين المارق من الجوف ..
يا أولاد الـ........... جاييكم تاني وتالت و ......
تمبس تمبس كبكبى...سلام تريان الشوكلاته حقتى ما تنفعك ..دى نمرة واحد.. بعدين اذا كان الحديث عن محض فنان صعب والحديث عن فنان متميز اصعب فالحديث عن قرشى ياخذ له مكانا بين الغول والعنقاء والخل الوفى.. استمعت لقرشى مرتين فى بث مباشر حى.. واستمعت له مرات كثيرة فى غناء معلب.. ملكات التطريب عن قرشى لاتنافس.. والولد بمسك لحون الكلام من قرونها.. عازف متمكن..يشجيك ويشقيك وانت تستمع الى طريقة عزفه.. حقيقى مثل قرشى ثروة.. وهو واحد من الذين نعول عليهم كثيرا لسند كتف الغناء الميل.. قرشى اتمنى ان لاتاخذك الغربه عن دنيا الابداع.. وان تعطر سماوات الرياض بالفرح.. وصية فى الزمة لى قرشى: اخشى حرمانى وراعى عامل السن ومرة مرة انفح عمك باغنية حقيبه كلما كان ذلك ممكنا فانا بها كلف وبكلماتها والحانها مفتون فهلا تكرمت.. الاوغاد ديل ما يقولو ليك خليك من طلبات صديق الموج البايخه زيو دى؟؟
عمر أحمد .. من ضمن أشياء كثيرة مفقودة .. كنا نبحث عنك .. بعض هذه الأشياء أنكرتنا لتقادم العهد .. إذ لم نجدد الصلاحية ولم نتوفر بما يكفي وفاءاً للحظة والمكان .. فتبددت نضارة الحقل على جفاء الفصول . بعضها تساقط لرداءة الجيوب وجهلنا بقيمة ما جادتنا به نفحات الطريق .. وبعضها – يا حسرتي – ما زال ممعناً هرباً نسرج له الجياد الصافنات .. نسكب له دمع الحجارة .. ونضع له بصمة في كل زاوية .. وفي كل محطة قطرة دم .. وعبثاً نحاول .
من ضمن أشياء كثيرة نبحث عنها .. وجدناك .. كلمة من الجملة الضائعة .. دانة من حبات العقد المفقود .. وجدناك .. كتاباً تتآلف عنده كلماتنا المتقاطعة .. فمنذ ألف ونحن نزرع الحروف في تربة الليل ولا تنبت إلا نجوماً عصيَّة وقمراً راحل .. فنعود إلى السنة الأولى في مدرسة الجهل .. ذلك أننا لم نهتدي يوماً (للنجم الذي يضئ درب القافلة) .. (كم كنا كثيراً لا نفهم .. لكنَّ الناظر لا يرحم) ..
وجدناك .. حُسناً يستوعب قبحنا .. فكم تعلمنا النوتة الموسيقية وفشلنا في صياغة الألحان .. كم تعلمنا النظم والكلمات وفشلنا في القافية .. كم هاجرنا في الأرض ولم ندرك نقطة الوصول .. ذلك لأننا نبكر في حين فنأسى ونتأخر احياناً فتنسانا الوعود .. ونخشى كما يقول نيوتن (أن يجف البحر قبل أن أبني قاربي) .
وهكذا .. تجدنا ننزل بخيامنا على ضواحيك على غير وعد .. ( بنا فرح حضري .. لكنا من صغرنا في صدرنا أحزان حرَّى بدوية ) .. فقط بلِّغ عنَّا لمن مضى أننا لم نجأر بالشكوى لكننا نئن من وجع الرحيل .. وأننا ما زلنا نبحث في أسماء المدن ولافتات المطارات وعناوين الصحف .. في وجوه المسافرين وحقائب القادمين .. في ريح الصبا والجنوب .. وأننا نراها في ابتسامة ملكات الجمال .. في الثياب الأنيقة .. في لفتات الجيد .. في القطيفة .. في الرخام .. وفي ملمس الحرير . وأننا نسمعها في "هنا امدرمان" .. في صوت المفاتيح .. في فرقعة الولاعة .. وفي صوت كوابح السيارة عند إشارة المرور .. وأننا نقرأها في الخواطر الجميلة .. في القصائد المخملية وفي عيون الغزلان ........ كل ذلك ولعلنا يوماً نهتدي ..
شكراً لك أخ عمر على احتمالنا فنحن قوم منقطع بهم .. وعفواً أن تجملنا كثيراً .. فنحن جزء من هذا الزمن الضائع .. جزء من زيفه .. جزء من كذبه .. بعض من شكه .. بعض من يقينه .. شئ من فرحه .. شئ من حزنه (الزمان فراغ ونحن الذين نملأه إما بالبكاء على اللبن المسكوب وتحويل لحظات هذا الزمان إلى حائط مبكى، أو بالانضمام إلى حالة الفرح الكونية الكبرى التي لا تحدها حدود .. الزمان محايد..! نحن الذين نصنعه بالأحداث. نحن الذين نختار انقباض القلوب وضيق الصدور فيتحول الزمن إلى نقمة..! أو نملأه بالحبور والفرح فيتحول إلى نعمة .. وبين الخطوة الأولى والأخيرة، تظل الأبدية تعمل بكفاءة عالية والركاب ينزلون ويصعدون بنظام كوني بديع وستظل المحطات مكتظة بكثير من الضيوف ) أو كما قال الراحل د. أحمد الربعي .
شكراً مرة أخرى .. وتحياتي لك وللأسرة الكريمة ..
ونلتقي .. صلاح / شتات
مصدق .. عمر فاروق .. عماد .. صديق الموج .. عبد المنعم عمر .. الــــــــــ موصول لكم ولكل من بالجوار هنا ــــــــــود
04-30-2008, 07:11 PM
humida humida
تاريخ التسجيل: 11-06-2003
مجموع المشاركات: 9806
ســألتك من بدايات الكلام ماتفــضح الأســرار .. ولزّمتك سُكات الليل ســهر صــبْاحي .. عذبْتك معــاى باّلحيل
وكلمّتك .. بــلا تشــتِت حنينك فيني أصلى برايا... جافل من وحيح الريد تعال يا صاحي .. يا مودّر نعاسك فى رؤى الأحلام تعال واسيني ..
نادي معاي ... ( يا لاحق سوابق الخيل ) لمن ردد معاي الصوت ... .. . حلم أول ... أقول ليك شئ ...!!!
نادتني من وحــي الصدى تاورني قلبي بإعتراف خشــيت هضاريب الكلام ودخلت من باب اليقين للمرحله الأولى ... ونهايات الكفاف خـشينى زي إحساس رهيف ما شفتي كيف متوسِــدك ... حيره وغواية ألف عام ما بتحتمل حُزنك عيونك لا ... فكاك مِنك أظن بقدر أكونك لحظة الغيم والندى مابين أشوفِك أو أحسِك مرحلات من فوضي قانونا النظام النظام الحالي بهبش كل خوف أو أيّ شــوف بــ..هــناك جــواك يا أمنيات .. دخلت على الجوف بالمسام يا أغنيات ... رقصت مع لحن المقام أديني مرسي عشان أقيف بلقاك فى الحالتين هُدى وأمليني قدره... وبوعِـدِك بقدر أهــشِك فى الضلام من غير كلام ... قادر أحبك حب عنيف
شتات ...
قرشى دا بودرك .... وانا قلت ليك ....!!
05-01-2008, 05:32 PM
bushra suleiman bushra suleiman
تاريخ التسجيل: 05-27-2003
مجموع المشاركات: 2627
Quote: معتصم دفع الله .. ضيف شرف القعده .. مع انو استلم الوضع .. ولو شوية كدا كان احتمال يغني زاتو
انت عارف يا صاحب .. زي الحاجات دي بتديك إحساس الفرح .. وبتحرك فينا حاجات حلوة كتير مدسية .. بفعل الغربة وإحساس الحنين .. بتودينا لحتات هناك .. قرشي رمى عليها حجر .. ونحن قلنا يا انت يا نغرق .. وكنا .. وكانت مثل هذه اللحظات ..
05-03-2008, 06:43 PM
Omayma Alfargony Omayma Alfargony
تاريخ التسجيل: 09-01-2004
مجموع المشاركات: 1434
الزول دا يا تمبس زول خليهو ساى غناى ولحاااااان ولن انسى له ابدا كرمه معاى وموافقته انى اغنى اغنية من اقرب اغانيه إلى قلبه صدفة وارجو انك تسمعها ليهو لأنو ماسمعها وبلغه السلام والتحايا هشام كمال الأغنية فى الرابط دا يا جميل http://www.esnips.com/doc/e62c28f1-2d56-4dbf-906c-437e0b73a5e7/be
شكراً كتير على الإطراء والكلام الجميل الذي أوشحتني به بخصوص الاغنيه ( يابنيه بتحدق فى الزمن القاوا ) هي من كلمات الصديق الطيب نور الدائم وألحانى الخاصه جداً التي أدخرها لسنين عجاف .. توزيع شقيقى عصمام محمد منصور . وعلى حسب ما طلبت منى سابقاً إنك تغنى الاغنيه فقط فى حفلات عامه او خاصه ، فلم يكن الاتفاق ان تضمها لاعمالك الخاصه لان أعمالي جميعها أفكر جدياً فى طرحها فى إنتاج يخص ( قرشى محمد منصور ) إذن انا سمحت لك فقط بغناؤها لا بتسجيلها وطرحها كعمل متنازل عنه
بعدين يا هشام فى بوست سابق قرأت وسمعت الاغنيه بأنها عمل جديد لك . وذكرت أنها من توزيع جعفر عبد القادر لكن الحقيقه ( لا ) للعلم أنها كما ذكرت سابقاً من قام بتوزيعها هو عصام محمد منصور وليست جعفر والبينا عامره
قرشى محمد منصور
05-08-2008, 08:06 AM
هشام كمال هشام كمال
تاريخ التسجيل: 05-14-2006
مجموع المشاركات: 1239
وألحانى الخاصه جداً التي أدخرها لسنين عجاف .. توزيع شقيقى عصمام محمد منصور . وعلى حسب ما طلبت منى سابقاً إنك تغنى الاغنيه فقط فى حفلات عامه او خاصه ، فلم يكن الاتفاق ان تضمها لاعمالك الخاصه
الاخ قرشى عساك سعيد 1-اولا فى ما يخص التوزيع فيا صديقى التوزيع الموسيقى هو تزييين اللحن الأساسى بالموسيقى اى أن التوزيع هو كل ما دون لحن الكلام، فالذى قام بعمل التوزيع الموسيقى لهذا العمل الذى بصوتى هو الأخ جعفر عبد القادر وليس شقيقك الذى قد يكون قد قام بتوزيعها بشكل آخر. 2- انا طلبتها منك بشكلب واضح وفى حضور الإخوان الشافعى وعثمان سر الختم لإغنيها وأنت ابديت الموافقة بدون تحفظات فماذا يعنى ذلك؟؟؟؟؟؟ اذا كانت كما قلت للحفلات فأنت سيد العارفين انو عندى رأى فى الغنا فى الحفلات حالياً نسبة لأن لسة بدرى الحكم على التجربة وهى محتاجة الكتير. 3- فى إتصال تلفونى معك اخبرتك بأنى سجلت الأغنية وحتى قمت بوضعها فى عدد من المنتديات السودانية ووعدت بإنك تسمعها مع صعوبة الإنترنت فى مدنى. فيا صديقى الفينا مكفينا وهذا بمثابة علان بتأسفى على الموقف ووعد بعدم ترديد هذه الأغنية ثانية. مع خالص الود هشام كمال
05-07-2008, 12:25 PM
Alsa7afa_30 Alsa7afa_30
تاريخ التسجيل: 02-06-2003
مجموع المشاركات: 6618
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
tmbis
خدر
الجندرية
.. يعني اديتو ليك التابعية طوالي ..
awad okasha
شتات
الزوول
عمر الفاروق
محمد عبدالرحمن
ابو جهينة
محمد سنى دفع الله
جلال ناصر
ismeil abbas
معتصم دفع الله
صديق الموج
humida
عمران حسن صالح
bushra suleiman
Omayma Alfargony
Alsa7afa_30
هشام كمال
فيس بوك
تويتر
انستقرام
يوتيوب
بنتيريست