|
|
|
 Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: saber alhawatti)
|
اخونا صابر
سجل عندك... واحده فراعيه.....
دخلتها سنة السيول والامطار
وكانت فرحانه انها حتنزل اول يوم للجامعه....
وطبعا فى اليوم داك خاضت اول يوم من بحرى
وتانى بى شارع النيل لغاية مادخلت
وقعدت ....فى بنش حقوق بطينها ...
وكترابتها فى مدرج فيه 3 الاف طالب وطالبه .....
ومن حسن الحظ لقتهم كلهم على نفس الشاكله  
الذكريات تطول وتطول .....
وعد منى بالرجوع....للبوست الحنين
بتاع ناس فريع البان ده
وكتر خيرك ياصابر لانه اكيد حيجوا ناس طولنا
ماعارفين دروبهم ...ووين ودتهم الظروف....
معاك بنتظر وبنادى
| |
 
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: ناهد بشير الطيب)
|
[ شكراً أستاذتنا ناهد بشير الطيب
الواحد مشتاق فعلاً للكثير وأتمنى نلاقى البعض فالفرع أمنا الحنينه
تخيلى ياناهد إحنا كنا فى كلية التجارة وفى مدرج الكيال المشهور كنا آلاف ( العدد كم أنا ماعارف ) وبالرغم من الزحمة وكل مرة الكهرباء قاطعه ــ وفى يوم من الأيام , كنا مجموعة من الأصدقاء بدأت فكرة صغيرة وكانت عبارة عن صفحتين من ورق الفلسكاب كتبنا جريده صغيرة وكانت من يومها مولد جماعة الجو الرطب وكنا ( عبدالباسط عبدالرحمن وهو الآن مدير كبير ببنك البركه وأكرم وهو كمان باحد بنوك الأمارات وعبدالله البشير جبريل وهو الآن رجل الأعمال المعروف وشاعر غنائى من أغنياته المشهورة أغنيه مدد التى غناها ترباس ـ ومحمد إبراهيم قسم السيد ومصطفى الخال وكمان طويل عنقوق وهو عمر أحمد عمر الإمام وأمين وصلاح ود الحاجه وحافظ وخطاب وسلك وعمر الفرنساوى وعبدالرحمن ود الأبيض كان دائما بيقول ـ اللا كيف !! ... ومن الأخوات ست أبوها من الثورة وأمل أبراهيم من الصافيه وهويدا مختار وإيمان عمر وناديه جبره وناديه الشعبيه وسلوى بت مدنى) وكانت تجربتنا فى الجو الرطب من أنجح مجموعات الشعر الحلمنتيشى بالفرع
وأستمرت جماعة الجو الرطب وتواصلت أجيالها أين أنتم أيهاالجيل الأول للجو الرطب ـ
فأنا الصابر ود الممكون فأنتم فى البال والخاطر
كان أيام جميله وحلوة
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: saber alhawatti)
|
اخوناصابر
واختنا سناء
بتذكركمان طول السنة.... ونحن لافين من مبنى للتانى
من حقوق واداب نطقها لى تجارة........
اغلبية زملاءنا القروا معانا وكنا جيران برضو فى الصافيه نجوى حسين
وهاله وسميه مهدى وسهير رمضان والفاتح وعلى رمضان ...ونهى من امدرمان
وهيام شارع الاربعين ...واسامه المذاد وعبدالباقى من البشاقرة ...
وعبدالسميع من القطينه ....وريم على ابوسن ...ومنى الشاذلى امدرمان
وكنا مابنفتر ابدا ياهم معانا يانحن معاهم...جزء مننا تجاره وجزء حقوق
والمدرجات تلقى فيها ناس حقوق مع ناس تجاره وناس تجاره مع ناس اداب
بتذكر فى ماده فى سنة اولى اسمها (اجرام وعقاب) بتاعة الدكتور هشام ابو الفتوح
وكنا جداد وبرالمه لسه ...والماده فيها باب كيف هو شكل المجرم راسه اضانه
يدينه اطرافه ....وعاملين فيها شاطرين ومجتهدين والجماعه خلاص
حيقبضوا على المجرم من سنة اولى ....البجى ماشى كله جنبنا نحلل في
شكله ده مجرم ولا لا ....
جماعة الجو الرطب كانت بتمتعنا واعتقد انه كان معاكم ربيع طه ....وحدباى
وكانت ايامها فرقة عقد الجلاد...كل يوم والتانى بتتحفنابى(ايدينا ياولدايدينا للبلد)....
ايام الامتحانات ....يبدأ الجرى ...الكتب والتصوير والبطاقات ...والمكتبه
والقرايه ...نهاجر ليها هناك فى مبانى معهد الكليات التكنلوجيه حاليا جامعة السودان
تلقى الفراعه قاعدين فى اخر المعهد الحته دى الفراعه مسمينها (امبده)...وحته هاديه
للقرايه ......
وكدى ارتاحوا شوية وبجيكم راجعه....
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: ALazhary2)
|
الأخ الفراعي / صابر
سلام واحترام ،،،
يا سلام علي جامعة الفرع والايام التي قضيناها فيها ومدرج الكيال
والذهاب من تجارة لاداب والجو الرطب والايام المفتوحة وقيادة المظاهرات
وباصات الروابط وبوش الاستاد والسجون .
يا زول والله رجعتنا لزمن جميل جداً جداً
التحية لكل الفراعة
والتحية للإخوة بكلية حقوق ولكل دكاترة كلية حقوق
أختنا ناهد بشير الفراعية لقد تقابلنا في القاهرة عند تحويل الجامعة الي النيلين
حاول تتذكري وانت قادمة من السعودية نشوف ذاكرتك كيف تقبلي تحياتي واحترامي
والتحية والتقدير لك أخي صابر على هذا البوست ولكل خريجي الفرع
أبو كريم ( حقوق الفرع سابقا )
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: الفاتح خليل الفكي)
|
Quote: أختنا ناهد بشير الفراعية لقد تقابلنا في القاهرة عند تحويل الجامعة الي النيلين
حاول تتذكري وانت قادمة من السعودية نشوف ذاكرتك كيف تقبلي تحياتي واحترامي
|
لاحولاااااااا الفاتح بى ذات نفسه معقووووووول ازيك ياخى ....كيف مااتذكرتك
سنة القاهرة دى زاتها السنة الاتجهجهنا فيها نحن الفراعه....كنا فى رابعه ...والجامعة اتغيرت لى نيلين.....والطلبه بقوا ماعارفين يعملزا شنو.....
واختك فى السعودية ....واتلخبط علينا هل حنمتحن من وين جامعة القاهرة فرع الخرطوم فرع القاهره
ولا نمتحن من النيلين ....ومواعيد اجازتى من السعودية ماظبطت معاى فى انه امتحن نيلين ...
وقررنا نمتحن مع ناس فرع الخرطوم لكن فرع القاهرة ...وكان معانا محمد.. هسى بقى محامى كبير...واتذكرت الجرى الجريناه هناك من مسجل لى دكتور لى كتب ...لى مكتبه ...واوراق امتحان...
المهم كيف اخبارك ومبروك البنيه ولا الوليد .....وامهم كيف ....والوالد خليل....والوالده ...
ياااااااااااااصابر فى بوستيك السمح ده.. لميت لى ترا فى واحد نحمد الله ...ونشكر فضله
التانى...... يااااااااارب يكون بقى هسى والى .....ولا وزير ....(مغروووضه فيه)
اخونا صابر
انشاءالله تكون متذكر الفول فى الاستاد ...فى الكراسى المكسره ديك ......
ونقعد نستنى الصحانه لمن تفضى عشان تفطر....
... نحن فى شلتنا كان عندنا واحد زميلنااسمه اسامه الله يديه على قدر نيته
بيطلع من المحاضره من 8 ونص عشان يمشى يحجز صحن للفول فاضى...
ويقيف فى الصف ....وكان شرطه انه عبدالسميع يشرح ليه المحاضره بعد مانفطر...
وانا اكتب ليه فى دفتره ....الملخص....ونهى وريم يشتروا ليه البارد ...
.ونحن طبعا بقى مضمون فطورناتلقانا نمشى على مهلتنا .....والناس دى تجرى جرى
........ياربى لو كان
الجوال ده زمان فى ......كان زميلنا ده جننا بيه..ياخوانا ماتجوا ماخلاص الفطور
ده برد ....خاصة وانه بيزعل بسرعه....ونلقاه ماكل تلاته عيشات حاااااف...
لغاية مانصل ليه ....
برضو بنقول ليكم راجعين ان مد الله فى الاجال
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: ود المايقوما)
|
اختنا / ناهد بشير
كيفك الحمد لله انا بخير وترانا جارين في الدنيا دي والحمد لله الواحد مواصل علاقتو بالاخوان
الفراعة في السودان والموجودين هنا وكل ما امشي اجازة بحاول اقابلهم والله في واحدة من اجازاتي
مشيت الفرع ( النيلين حالياً ) والله ندمته علي مشيتي تغيير كامل في كل حاجة حتي الطلبة والافكار
تغيرت ولم اجلس فيها اكثر من خمسة دقائق وتخارجت طوالي وقلت الله يرحم ايام الفرع .
لقد عملت فترة في السودان محامي واستلمت التوثيق والان معاكم في المملكة
الوالد انتقل لرحمة الله نسأل الله ان يرحمه ويغفر له
والوالدة بخير والحمد لله والود الشقي دا ولدي كريم ربنا يخليهو والجميع بخير
تحياتي لاسرتك الكريمة ولكل الاهل والاخوان
معليش يا صابر أخوي عملنا البوست حكاوي تقبل اعتذاري
وتاني نقول التحية لكل الفراعة
أبو كريم
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: tayseer alnworani)
|
ياسلام على جامعة القاهرة فرع الخرطوم ـ أجمل أيام حياتى شكلت شخصياتنا ـ كانت
بالرغم من أعداد طلابها نسيجاً كاملاً ومتكامل ؟؟
ياناهد بمناسبة فول الأستاد كان عندنا زميلنا محمد إبراهيم قسم السيد ( عشب ) ده
كان مابيحضر المحاضرة الأولى مهما كانت !! وكان بيجى من حى العمدة مع ناس مشتركين مع
بتاع بوكس وطوالى من باب تجارة على الأستادمباشرة يقوم يجهز الفول والبوش أحياناً وكان
طلبه الوحيد إنه نشرح ليه المحاضرة و الفيها شنو وكان بيقول لينا أشرحوها لى كلام سوق !!
يعنى ماعاوز أى حاجة تقيله حاجة خفيفه وكده !!!
من قصائد الجو الرطب ( ابيات من قصيدة أخونا عمر أحمد عمر الإمام ) قصيدة
عملها فى واحدة زميله قالت تعليق علينا وكنا ماشين مع بعض ( ناس الجو الرطب ) وعمر
كان طويل وزميلتنا قالت طويل عنقوق ده !!! بالرغم من إنها كانت قصيرة جداً
وسمعناها ليك ؟؟؟ وإتعملت القصيده فى يوم واحد وكان اليوم التالى هو يوم الإثنين
مواعيد الركن الأسبوعى للجو الرطب بكلية التجارة .. وطلبنا من زميلاتنا فى المجموعه
يقوموا يدرقوا البنيه دى عشان تحضر الركن وفعلاً جماعتنا نجحوا فى دعوة الزميله
ومطلع القصيده...
تقولى على طويل عنقوق
وكل مايوم بذيد لـ فوق
مالك إنتى ياضقلايه يابربندى ياخازوق ... الى آخر القصيد !!
وهنا سمعنا صرخة من صاحبتنا .. الليلة وووب !!!!!
ومن يومها تحول إسم عمر أحمد عمر الإمام الى طويل عنقوق
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: saber alhawatti)
|
الإخوة والأخوات الفراعه
الأخت الأستاذه / ناهد .. فول الأستاد كان حاجة ثانيه ..لكن بالله رايك شنو
فى الفرع والأركان الكانت مدورة قيها أدب وسياسة خاصة أيام ألإنتخابات ؟؟
لكن ركن الجو الرطب يوم الأثنين من كل أسبوع كان بذيد دخل ناس الكافتيريا
فى كلية التجارة وناس أركان السياسة والإنتخابات غيروا مواعيدهم لأننا طرشقنا
ليهم الكثير من أركانهم ـ ياسلام على الفرع ياسلام !!
الأخت سناء كلامك صاح الحمدلله إحنا إتخرجنا فبلما يقوموا يخرمجوا إسمها
فيا أختى العزيزه حتى ناس المواصلات والتكاسه ما واقع ليهم الأسم !!!
الأخ/ ود المايقوما ... ياسلام على دكتورة منى بتاعت الإقتصاد !!!
الأخت / تيسير النورانى .. بالله إنتى دفعت كم ؟؟ ممكن نكون دفعه وحتى لو مانفس
السنة برضو إحنا أولاد دفعه واحده مش فراعه ؟؟
الأخ/ الفاتح ـ مشكور ـ ياراجل الكلام بتاع الجماعه ( من عل ) خليك منـو !!
دى نرجسيه قبيحه ومابستحق الرد عليه فالخيال الحره موجوده فى الحياة العمليه !!!
خريجى فرعنا الحبيب أنا وين ؟؟ وين إنتــو ؟؟
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: saber alhawatti)
|
بذكر في الفرع ..... ستات السندوتشات .....السلطة السوداء بالطعمية والشطة الخضراء ...... الله ...... من الطرائف إنو نحن في تانية حقوق كان في بت من بنات كوستي (كسارة) كسر الجِن ..... في يوم الإنمتحان كان معاي صديقي (علي طيبة) قلت : على أخلع ليك الزولة دي ؟؟؟؟؟ ... قال لي كيف ؟؟؟؟ قلت تعال وتابعني في كل ما أقول .... مشينا سلمنا عليها..... ووقفنا جنبها وتجاهلناها وقلت ليه (بغمزة) : على قريت الجريمة المستحيلة ....تردد لكن إنتبه للغمزة وقال لي : كييييف دي أهم حاجة ........... حسينا بأضانين وقعوا بيناتنا ..... وسقتوا ومشينا .... أها لفينا زي كم دقيقة كدا وجينا لقيناها عرقانة ... وتقلب في الصفحات بخلعة ..... وتسأل الزملاء عن الجريمة المستحيلة ولمن يقولوا ليها ماعارفينها تزيد (خُلعة) ......طبعاً ما كان في المقرر حاجة إسمها الجريمة المستحيلة
أحمد موسى دفعة 1990
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: Ahmed musa)
|
جامعة القاهرة الفرع
الساقية التى اهرب لزكرها كلما ران على قلب حزن فتغسلني وتفرج همي .....
دخلتها من عام 1983م ممنيا نفسي عند البوابة بصحبة فاتنات من كل لون فقد قيل لي ههنا مرتع الصبايا الفاتنات وملتقى العاشقين ,,, فولجت بعد ان تاكدت من شياكة هندامي من باب الاداب متبرلما ابحث عن مدرج كلية الحقوق , ترددت في ان اسال صحاب الطبلية العند الباب (عم التوم ومؤذن المسجد طبعا المسجد تحول الان الي كافتيرا) فدخلت متلفتا انظر يمنة وشمالا عسى ان اجد وجه صبوح فاساله (الم يرد في الاثر اقضى حوائجكم عند الصبوح) ولكنهم هنا كثر يارب من اسال ,,, كلما قلت هذه لاحت الثانية فمكثت اتدحرج من واحدة الي اخرى حتى اصطدمت بجريدة حائطية , رفعت عيني نظرة اليها وقع عيني على ركن الجريدة الايسر بخط عريض
اطلقوا سراح الطلاب المعتقلين
اطـــــــلقوا ســـــراح خالـــد محي الدين ,,,
أطلـــــلقوا ســـــراح كوبيــــــــــل ,,,
وفي الزاوية اليمن الشرارة صوت الجبهة الديمقراطية
وقفت مدهوشا ثم رفعت نظري لا طالع ما كتب في هذه الوريقات فطفقت اقراء فيها من اولها الي اخرها ,
ولم افق الا على صوت بلكنة حلفاوية يعلوا قائلا بسم الله وبسم الشعب العربي , وردد هذه الابيات
الوحش يقتل ثائرا
والارض تنبت الف ثائر
يا كبرياء الجرح لو متنا
لحاربت المقابر
حتى يعود القمح للفلاح
يرقص في الحقول وفي البيادر..
التفت الي مكان الصوت وجدت جوقة من الطلاب والطالبات بعضهم وقوفا وكثر جلوسا وفي الوسط يقف طالب
يتحدث حشرت نفسي في وسطهم وبدأت استمع وانا في قمة الاندهاش لصوت يعارض نظام جعفر النميري ويتحدث بقوة عن مأساة شعبنا فتسمرت واقفا الي ان انفض جمعهم بعد ساعتين او اكثر , وقد بلغ العطش بي مداه (الم اقل لكم اني برلوم فلم انتبه الي الكافتيرا ولا لثلاجات المياه) فعدت الي البيت لاكمل بجثي عن المدرج في اليوم الثاني ,,
اواصل ...
حاشية :
خالد محي الدين ,, عضو الجبهة الديمقراطية جامعة القاهرة فرع الخرطوم من ابناء عطبرة ظل لاكثر من ثلاث سنوات معتقلا ,, لم اقابله في الجامعة الا مرة واحدة , وكذلك كوبيــــــل
__ صوت المتحدث في الركن كان الطالب محمد الفاتح بيرم ,, (تخرج من كلية الحقوق , ويعمل الان بالمحاماه)
(عدل بواسطة عمار عبدالله عبدالرحمن on 04-25-2008, 09:15 PM)
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: saber alhawatti)
|
كنا جالسين فى يوم من الأيام فى وسط كلية التجارة وكانت الكهرباء قاطعة
وكان الأخ/ مصطفى الخال بيحكى فى نكته ـ كانت نكته جميلة جداً ـ طبعاً كمية من الضحك
حصلتفى نهايتها لكن كانت المفاجأة إنه فى شلة من البنات كانوا قاعدين قريب مننا
طلعوا متابعين النكته من قولة تيت ـ وإستمروا فى الضحك أكثر مننا ــ
قام صاحب النكته أخونا مصطفى الخال وبى كلمات لشلة البنات بعد ماخلصوا الضحك
غلب عليها شوية تمتمه :
( ع ع ع على مس مستمعينا فى فى الأقاليم مراعات فروق الوقت )
حقيقة كل اللحظات فى الفرع جميله جميله !!!
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: saber alhawatti)
|
سجل عندك استاذنا صبري
طارق الامبن فراعي 87------91
يعني دخولي للجامعه كان في سنه تخرجك منها
وجامعه القاهره الفرع او الحنينه السكره
زائدا احياء الخرطوم العريقه وبعض من سنوات معهد الموسيقي والمسرح
هو اغلب ما شكل شخصيتي بعد ذلك وايامها هي اجمل واغلي وامتع ايام حياتي
كنت انوي للمصادفه اعداد بوست عن الحنينه السكره لكن الحمدلله الماعملتو
لاني اراك اولي بذلك بما يتوافر عندك من المعلومات التاريخيه خاصه
تحباتي لك ولكل الفراعه وساحاول التركيز علي ماشهدت من الانشطه الثقافيه والفنيه
والسياسيه في تلك الفتره واتمني ان يساهم كل فراعه المنير بذلك للتوثيق
هذا مع محبتي وتقديري
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: طارق الأمين)
|
ياسلام يا طارق يافنان ــ طارق الأمين أنت كلك زوق
وفعلاً إنت فنان فنان ــ والفراعه أهم ديل ياناس ـ الفراعه الناس
الفنانين ـ ونبض الشارع وصوته وبسمته
وبدأنا العد ـ يلا قولوا واحد ـ طارق الأمين !!
شكراً طارق لدخولكم الجميل والمهذب والكلمات الطيبه والمؤثرة
وأنا معاك ـ فأنا لى الشرف الكبير أن أقدم معك ولك ماتطلبه
من معلومات لمذيد من التوثيق ـ وهذا البوست هديه
لك ولكل أبناء أمنا الفرع أرجو أن تقبلوه منى ؟؟
فكلنا لجامعهة القاهرة الفرع فداء ...
وستبقى جامعة القاهرة الفرع فى كل الأزمان !!!!
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: ود المايقوما)
|
Ahmed hanin
تحياتى ـ إنت عرف الأيام ديك الفول كان فول مش لعب
وكانت نديه جبره بعدما يقوم محمد ( عشب ) بتجهيز صحن الفول الكبير داك ـ تقوم
تعمل ليك لمسات فنانه كده وتخلط ليك الفول بى قعر رغيفة التوستا الطويلة وحارة
تعرف بعد داك أول قرمه من رغيفة التوستا ديك بتكون أطعم لقمممممممممممممه
ود المايقوما
سلام ـ سلام فراعى خاص فى جو رطب !!!
يا أخى ديل كانوا ديل كانوا جامعه وكمان مش جامعه وبس !! ديل حكومه عديل كده !!!
وشوف أ.د.عاطف عبيد ـ رئيس الحكومة ؟؟؟؟؟ بالله مش الفراعه معاهم حق يكونوا مميزين
ولا رأيك شـنو ؟؟؟؟؟
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: saber alhawatti)
|
الأخ صابر
وجميع الفراعة
والمتداخلين البحبو الفراعة
محمد الواثق عبد الحميد او ((الفلاتي)) كما يحلو للجيع ان ينادوني به
دفعة 87 - 91 قانون
يعني دفعة طارق الأمين
والله طارق ده ما عرفتو دفعتي الا بعد ما طلع دليل الخريجين
من رابطة ودنوباوي والعمدة
لنا ذكريات رهيبة
حبينا وعرسنا - من آداب قراية القاب -
مشاكلنا مع رابطة الثورة في الإنفصال
مشكلتنا مع الإتحاد حول انفصال ناس ام درمان شرق - ابوروف وبيت المال من الرابطة
السكرتير الأكاديمي كان حسن علي حسن قبال ما يبقى رئيس الإتحاد في السنة البعدها
وكلام كتير جداً نخلي في كل مداخله شوية
ده للترحيب والسلام
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: saber alhawatti)
|
Quote: يا جماعه تتذكروا لى عمى( سيد) الراجل المصرى إبن البلد
حارس بوابة كلية التجارة الصغيرة بإبتسامته الصباحيه لكل دخل
الى الكلية عند الصباح ؟؟؟ كمان عبدالعليم الفلاح المصرى البسيط
وهو يؤدى مهامه بكل نشاط فى إعادة ترتيب كراسى مدرج الكيال المشهور ....
|
ياسلااااااام كيف مابنتذكره ياخ ......
وبتذكر لمن نكون دايرين اى حاجه .....
بكل بشاشة وش ....بيقول ليك جدا انتى تامرى
بس هاتيلى كباية شاى ساده ...وللاولاد كان بيطلب منهم سيجارة
ياحليلوا .....ياربى هو وين هسه ......
شكرا صابر
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: saber alhawatti)
|
كانت لنا ايام .. لن ننس ذكراها ...
ايام مميزة وجميلة ومليانة احداث منذ ان وطأت قدمي مدرج الكيال بزحامه وضجيجه ..
حتى حفل التخرج الذي اقيم بقاعة الصداقة في يناير 1993م ...
ولنا عودة لذكريات فول الاستاد .. والرحلات المكوكية ما بين مباني التجارة والآداب ... وسندويتشات القولدن قيت ...
والمشوار الكارب من المواصلات في نص السوق العربي بصحبة قراطيس الفول والتسالي ... وشمارات الاصدقاء ...
انا من ناس المدرج الصغير ... مدرج الاقتصاد ..
ــــــــــــــــ
شكرا يا صابر ... اعدتنا لذكريات اجمل الايام ...
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: saber alhawatti)
|
أخى العزيز الحواتى سعدت كثيرا بالمبادرة التى قدمتهاوفتح هذا البوست حتى تلتقى نبضات حروفنا
لتحكى تواصل الأجيال وتعبر عن إعزازنا لهذه المنارة التى أسرجت لنامنافذ من الضوء شكلت وجداننا
الإجتماعى والسياسى والعاطفى والإنسانى والثقافى
أحى جميع أبناء جامعة القاهرة فرع الخرطوم الذين بادروا بالمشاركة فى هذا البوست وقد تعزر علينا
المشاركة بصورة مباشرة بعد أن ضن حبيبنا الغالى بكرى بشرف العضويه بالرغم من مخاطبتى له عدة مرات
ومنذ أكثر من عام ولازلت شايل العشم
أخى صابر والآخرون كان لى شرف الدراسة دفعة إجتماع خريج 74 عجوز مش كده تلك الدفعه الرائعه والتى ودعها
الدكتور الفاروق ذكى يونس وعيناه تغرق فى الدموع وكنا محظوظين أن يشارك فى تقديم المعرفة والعلم لنا
أساتذه من جامعة الخرطوم ( عباس أحمد . عبدالغفار محمد أحمد .وفتح الرحمن على ما أذكر كانت مادته ديموغرافى
وكان رئيس قسم الدراسات الإجتماعيه جامعة الخرطوم ) ومن الأساتذه المصريين الدكتور صمويل والذى كان يعتمد فى
كل مادته على كتب الدكتور أحمد الخشاب وقد حدث بيننا صدام عندما ذكرت له ذلك وكان نتيجتها ملحق فى مادة
العلاقات العامه فى سنة التخرج وبوظ علينا درجة التخرج والعالم العلامه بروفسيرالفاروق والذى كنا نحرص جمعيا
على حضور محاضراته خاصة وأنه كان يبسط مادته ويربطها بالبيئه المحليه والمفردات والشخوص المتعارف عليها فى
الحراك اليومى الإجتماعى وحتى الأحياء وفقا لمدلول الماده ومعانى المصطلح العلمى والأكاديمى
( الجزء الأول من رسالة الأخ / محمد سعيد أحمد درويش ـ العين ـ الأمارات / إجتماع خريج 1974 )
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: saber alhawatti)
|
كانت الجامعه تعج بالحياة خاصة تلك الفترة التى واكبت الطغيان المايوى ولا زلت أذكر
المناضل الكبير إدريس عوض الكريم رئيس الإتحاد وهو يوجه خطاباته الثوريه فى اللقاءات
التى يتم التنظيم لها واللقاءات الأخرى الغير معد لها مسبقا ولكن كانت وليدة مواقف سياسيه
معينه يتم التنبيه لها بقرع الجرس الكبير العتيق الموجود فى الساحة للإعلان عن موقف معين
وكم كانت تدور صراعات مع كلاب الأمن الموجودين داخل الجامعه وخارجها بغرض إعتقال الطلاب خاصة
طلاب الجبهة الديمقراطيه وكانوا كثيراً مايعانو وهم يسعوا لإعتقال رئيس الإتحاد الأخ إدريس وكان
دائما يتم تأمين مسارات خروجه ـ له الود والتحايا والسلام ولأخى وصديقى جعفر حسن عباس وكذلك
لجميع أبناء وبنات دفعتى
وسأعود لاحقا للحديث عن بعض الذكريات ( المسرح الجامعى ونشاط الإتحاد ورحلة الدفعه مع الدكتور
صمويل الى الجزيرة لتطبيق بحث حول دراسة علم الإجتماع الحضرى والريفى وأركان العوطف والشعر
ومجلات الحائط
لكم جمعياً مودتى ومحبتى ودعواتكم بكرى يتكرم على بالعضويه
الجزء الأخير من رسالة الأح/ محمد سعيد أحمد درويش / العين / الأمارات / إجتماع دفعة 1974
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: ناهد بشير الطيب)
|
( رسالة من جعفر العباس )
جامعة تاريخها راح فى لحظة أعتقد كانت جامعة بكامل مواصفاتهابدون أن أدخل فى التفاصيل والوصف
نأحذ مقتطفات من الزكريات والدمع يملأ عيوننا ما أحلاك وما أجملك ياجامعة القاهرة بالخرطوم ,
دخلنا فى العام 1985 عام الإنتفاضه العام الجميل وسأتطرق الى الجانب السياسى وقليل من الإجتماعى
وأسفى إذا خانتنى الذاكرة فى كثير من المواضيع.
الإتحاد يسيطر عليه الإتجاه الإسلامى ما أن تدخل الجامعه تجد صحف الإتجاه الإسلامى . الإتحاد يرحب بالطلاب
الجدد ووداع الخريجين غداً بحدائق أبريل ، القوات المسلحة تهزم فلول التمرد فى كده ـ قادة الإتجاه
الإسلامى معروفون فى كل مساحة داخل الجامعه . لا أنسى شخصين الفاتح عمر حسين والشهيد عبدالله جابر (ود توتى )
المتحدث اللبغ المؤدب . الشهيد الفاتح دخل بعدنا الجامعه وكان تقيا وعابدا اللهم أرحمه يارب العالمين
ووفاء الطيب جعفر التى أسمع أنها تقلدت وظيفة كبيرة فى الخرطوم
نتوقف قليلاً نجد صحف الجبهة الديمقراطيه الشرارة . المتاريس . ومن الشرارة يندلع اللهيب وتقرأ قصيدة لقاسم أمين :
كتلوك الناس القصر الساسه المبيوعين
البالا مغطى الساسه المأفونين
هناك نجد إعلان : الجبهة الديمقراطيه تقيم ركن نقاش المتحدث يكون عمر بشير الخليفه ( ود القضارف) المفوه
والذى يمكن تجلس فى ركن نقاشه ساعات ولا تمل وممكن يكون معتصم محمود ود كوستى طبعا ده كله بعد 1985
لاتذهب بعيدا يقابلك تجمع من الطلاب والطالبات مميزات بالثوب الأبيض ناس الأمه والأنصار مميزون فى كل شئ
لايجلسن إلا مع الطلاب الأنصار
لا يغيب عن ذاكرتى أبدا الطالبه ناديه عبدالرسول ودار النعيم المنا التى كانت عضو فى إتحاد الإنتفاضه
وهى من المرابيع وداللبيح ولا تنسى مكين تيراب أمين المال محجوز جبهة كفاح الطلبه وين إنتى ياتيسير النورانى
ووجدى صالح ومجدى عبداللطيف وكم هائل من أبناء المحس والدناقله يحدثونك عن القوميه العربيه وعن ميشيل عفلق
وصلاح البيطار كل شئ إندثر الآن وما أبعد بغداد وكأننى الآن أسمع تيسير تتحدث عن مشروع روجر اتقسيم الشرق الأوسط
لدويلات صغيره دينيه متناحره السلام لكم جمعيا من البعد المؤتمر الوطنى الأفريقى لايثقون بأحد فى الجامعه نشهد لهم
بتفوق أكاديمى فى كل الكليات الطالب ليلو ماكوير وجون كلمنت وذكريا ــ آه من الذاكرة تتعبنى ـ كان ليلو ماكوير
دائما يختار أجمل العطور ـ نسأله من وين دى ؟ لا ده سر أنا ما بكلم زول
لكم الشوق والتحيه ياناصريين ياسمر يوسف العبيد . محمد الفاتح بيرم ويا أبوعاقله السكرتير الأكاديمى لإتحاد
الإنتفاضه لكم الشوق وإن قابلنا بعض ربما لانتعارف من طول المسافه
الطلاب الإتحاديين ومحمد عكاشه رئيس الإتحاد وحياة بت الشماليه
من التنظيمات للروابط:
رابطةالصحافة ومشاكل الإنقسام بين مصطفى الناظر وأسامه السيد
رابطة المحس عبدالهادى الزبير . معتصم محمود
رابطة الإمتداد ناس سناء ولمياء
رابطة الإقتصاد وينك ياعادل سيدأحمد
رابطة دنقلا ناس أزهرى الحاج وعبدالقيوم
رابطة عطبره عبدالسر حموده
( رسالة جعفر العباس )
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: Salah Abdulla)
|
( رسالة من الفراعيه / أمانى أبوالحسن )
السلام عليكم أخ صابر ... دمعت عيناى وأنا أقرأ بوست جامعة القاهرة فرع الخرطوم
شكراً لك بقدرما أسعدتنى ... أنا خريجة إجتماع دفعة 1993 .. من رواد سور آداب
قضيت 4 سنوات الجامعه فى السور ( بعد المحاضرات طبعا) وفى آخر سنة رابعه دخلت
الجامعه وتعرفت على ناس جوه وتمنيت أن أقضى 4 سنوات أخر فى كل ركن من الجامعه ...
الفرع أعشقها بقدرما أعطتنى يكفى أننى تزوجت منها .. أتمنى أن أسمع مايذيدنى فخرا
بهذه الجامعه من خلال خريجيها وما آلو إليه ... شكراً لإتاحة الفرصه
الرسالة من الفراعيه/ أمانى أبوالحسن / إجتماع دفعة 1993 م )
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: saber alhawatti)
|
فى يوم من الأيام كنا راجعين للكلية من الفطور متأخرين ــ مشينا الأستاد لقينا الفول
لكن العيش كان مافى وكانت فى أزمة ــ واحد من الشلة قال فى بيت من بيوت الإشلاك دى
بيبعوا الرغيف وفعلاً صاحبنا مشا وجاب لينا زيادة عيش ـ مما جعل الكثير من العيون ترمقنا
وإحنا( مجموعة الجو الرطب ) فرحانين بالدعم الرغيفى الذى وصلنا ـ وهاك ياتعليق ؟؟
لما وصلنا كلية التجارة بعد الفطور لقينا المحاضرة بدأت ودكتور التمويل قفل الباب !!!
فوقفنا فى شكل دائرة صغيرة مع بعض ــ وبعد دقائق إكتشفنا ليك إنه بدأ تجمهر حولنا ـ
الجماعه إفتكروه ركن من الأركان والأيام ديك البلد تغلى وكان فى أزمة رغيف شديده ـ
وحتى نعالج الموضوع بسرعه ( دفرنا ) أخونا أمين لوسط الدائره وأمين كان سريع فى معالجة
الموضوع وطوالى راح داخل ليك فى ركن وبدأ بــ :
أقدلى أقدلى وسكتى الخشامه وأنزلى فى العواذل كى .......... الى آحر القصيده
وتحول تأخرنا عن المحاضرة الى أجمل ركن من أركان الجو الرطب وكان من غبر إعداد
وبإرتجال شديد ... و لازال ذاك الركن فى الذاكرة حتى اليوم!!!!!!!!!!!!!!!
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: saber alhawatti)
|
Quote: المشكلة يا ناهد ..
الشقاوة البريئه ماراحت براها ياناهد .. الواحد هو ذاته بقى خاتنوا فى الركن !!!!
والجو الرطب بقينا نفتشه فى هواء المكيفات !!!! وكان الفريون نقص مافى مشكلة !!
المشكلة إنه تلاقى ليك باكستانى و يصلحو ليك !! ولو ما عرف يصلحو مامشكلة !!
المشكلة بقينا إحنا المشكلة ؟؟؟ عارزين جو رطب !!! وين الجو الرطب ياناس ؟؟ |
الجو (الرطب) مامالى بلدك..... جدة ....والمشكلة ما جدة ....المشكلة تلاقى ناس
زى ناس الجو الرطب وين ؟وان لقيتهم حتلقاهم هم زاتهم هم ولااتغيروا ؟
دى ماالمشكلة ...المشكلة انه لو لقيتهم اتغيروا ....هل حتقدر تتعامل وتضحك معاهم
وتجاريهم فى تغيرهم ......وان جاريتهم مامشكلة ...المشكله هل هم حيقدروا يجاروك
ويفتحوا ليك قلوبهم زى زمان......وان فتحوها وقول فتحوها وقرقروا وضحكوا ......
ضحكوا معاك دى ماالمشكلة ...المشكلة هل حيتذكروا ليك جو رطب ولا جاف ...
.ولا حيتذكروا زاتو هم ضحكوا ليه
| |
|
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: saber alhawatti)
|
Quote: وأنا أمنيتى أشوف لى صورة للجامعه فى وضعها الحالى !!!
الواحد لسه بتخيل الزحمة فى شباك المذكرات ؟؟ والناقص ليه شوية قروش ؟؟
|
الاخ صابر
فى واحد من الاخوة المتداخلين وعد بانه ينزل صور لجامعة القاهرة الخرطوم ...
وماجاء لغاية هسى ....نتمنى حقيقى واحد ينزل الصور هنا لاثراء البوست .....
اما بخصوص شباك المذكرات والكتب ....
اتذكرت الزحمة والكتب البتخلص وتستنى الكوتة الجاية من القاهرة....
والكتب بتذكر كمان كانت مدعومة ورخيصة جدااا
كان بالجد اى طالب بيقدر يشتريها ...
وفى حالة واحد ماعنده مقدرة لاى ظروف يعنى
كان بيمشى الادارة ويقدم طلب بنقصان قروشه او عدمها ...
عند الاستاذ محمد وبيديه ورقه للشباك وفعلا بيتم
صرف الكتب والمذكرات ليه بسرعه ....ولا انكر كمان دور
الاتحادات ووقوفها مع الطلبه ......فى دعمها ومساعدتها للطلاب...
ليتنى اتذكر وقفة الطالب احمد ...من الاتحاد ...حقيقى ناسية الاسم
مع طالب وطالبه فى موضوع صرف كتبهم ...وبطاقاتهم
اللذيذ فى الجامعه دى اغلب الطلبة بيكونوا قاعدين وحايمين برة المدرجات طول السنة
واول ماتظهر الكتب بتظهر الجديه ...وكان معانا زملاء وزميلات مابيخشوا
المحاضرات الا لما الدكتور يكون عايز يأشر الجاى فى الأمتحان او التركيز على شنو...
تلقى الحايم فى السوق بيجى.........والشغال ليه فى حتة يظهر ....واحنا طلاب حقوق تتملى الجامعه
بالظباط المنتسبين ...ويجوا داخلين بلبسهم المميز داك ...وهدوءهم وادبهم الجم فى تعاملهم ...وتبقى الجامعه مهرجان بس ....
وكانت لنا فعلا ايام .....
انت وينو الازهرى .....
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: ناهد بشير الطيب)
|
الأخت / ناهد
شكرا لمساهماتك الكبيرة فى هذا البوست وكذلك مداخلات الفراعه الأنيقه
الشئ الذى جعلنى فعلاُ أعيش أيام من الجامعه
المذكرات ــ المحاضرة الأخيرة التى يعلن عنها الدكتور والتى تسبق الإمتحان
وهاك يازحمه فى المدرج ـ والغايب يكلم الحاضر
ويظهروا ليك ناس ماشفتهم من فترة .. الشغال والمغترب ــ
ليه لا وهى فعلا جامعه فعلاً من رحم الناس من قلب الشارع
من معاناة الناس ــ كل ألوان الحياة معاشة حقيقة فى الجامعه
وفى المحاضرة الأخيره تعالى شوفى الحجز فى المدرج الواصل للمدرج أولآ تلاقيه حجز لباقى الشله
((((( كانت لنا أيام فى قلبى زكراها))))
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: saber alhawatti)
|
ياااا لتلك الأيام،
فهل ننسى أيام مضت
علما وأدبا وسياسة قضيناها...وكمان حباً
معقوووولة صابر شخصياً...والجو الرطب، وتجسيد للحظة من الزمن الجميل، أو ربما محاولة لإعادة انتاج ذلك الجمال،
ولكن كيف يتأتى ذلك أياها الصابر ...
فلشيء في نفس "جاغوب"، صدر مرسوم باعدام "الحنينة السكرة"، فقد صدر الحكم، حتى قبل أن يعرض على تلك المحاكم التي تعد على "طواريء"، أو أحكام عرفية...تخيل كنا نهتف كما هتف أباؤنا من قبل "إعدام طالب اعدام أمة"، فلا أدري لماذا صمتنا وقد علقت جامعة "بجلالة قدرها" على مشانق "سوء العلاقات بين البلدين"تخيل !!!!!!
فالقضية أكبر من مجرد تغيير اسم، وانما انشاء على أنقاض...
عفوا ان فتحت جرحكم، وتجاهلت أن هذا البوست افترعه -ربما اشتقاق من فراعة- صابر أحد الذين زينوا وجه الحنينة السكرة برسم ابتسامة عريضة.
واحد من أولاد "شلة أولاد كوستي" بتجارة
يا صابر بقية بياناتي بالبروفايل
وكن وضيوفك بألف خير
| |
|
|
|
|
|
|
|
|
|
Re: جامعة القاهرة الفرع.. منارة العلم والسياسة وشرارة المظاهرات..خريجيها هل ضاع إسمها أين أنتم (Re: nadus2000)
|
.فلشيء في نفس "جاغوب"، صدر مرسوم باعدام "الحنينة السكرة"، فقد صدر الحكم، حتى قبل أن يعرض على تلك المحاكم التي تعد على "طواريء"، أو أحكام عرفية...تخيل كنا نهتف كما هتف أباؤنا من قبل "إعدام طالب اعدام أمة"، فلا أدري لماذا صمتنا وقد علقت جامعة "بجلالة قدرها" على مشانق "سوء العلاقات بين البلدين"تخيل !!!!!!
فالقضية أكبر من مجرد تغيير اسم، وانما انشاء على أنقاض...
عفوا ان فتحت جرحكم، وتجاهلت أن هذا البوست افترعه -ربما اشتقاق من فراعة- صابر أحد الذين زينوا وجه الحنينة السكرة برسم ابتسامة عريضة
|
عبدالجليل ود كوســتى
صدقنى دمعت عيناي وهى تطالع حروفك الصادقه آه و آه يا عبدالجليل وآ.. فرعاه وآ ... فرعاه !!!!
| |
|
|
|
|
|
|
| |
saber alhawatti
ناهد بشير الطيب
سناء عبد السيد
Baha Elhadi
عمار عبدالله عبدالرحمن
ahmed haneen
البشير دفع الله
ALazhary2
الطاهر عثمان
الفاتح خليل الفكي
الزبير صالح الزبير
Ahmed musa
طارق عبد اللطيف نقد
ASHRAF TAHA
الطيب بشير
محمد الواثق
Motawakil Ali
Mohammed Ibrahim Othman
nadus2000
فيس بوك
تويتر
انستقرام
يوتيوب
بنتيريست