|
*** أمى جــات ***
|
امى جات اليومين ديل مافى زول زى ضمه حاسة انى سابحه فى بحور المحنة ومحلقة فوق فوق السحاب باقى يا خوانى وخلانى امى جاتنى احمد الله ل..لى كم يوم شبععععععت نوم اشم فيها الصباح والعشية.. لا طريت الغربة ولا فرقتها .. ولا قعدت نص الليل احسب فى مدتها ولا سرحت بعيد خترت ليها هناك .. ولا وشوش قليبى ولا فر بى طروتها كانها طوت الاهل كلهم فى طرف توبها وجابتهم لى معاها حارساها وبعاين فيها وبسمع فى حجاها.. وفى نضميها وغناها مبحلقة احفظ فى حكمتها ممتعه عويناتى بى بهاها وفى عويناتها شايفه روحى لسه صغيرة بحبى وبتتاى.. وبتاوق يوماتى.. بعاين لا جوه عشمانه فى ضمة وبين بسيماتها شفت الفريق صباحية ومناغمة الجيران باكريه ومطايبة بى فوق الحيطان ومحنة موكره زى شعب الصرفان وبين مسيراتها لعبوا جهال الحلةعصرية .. واتلملموا الحبان .. وعكلت القهوه ام هبهان و الفناجين تراقص بخور التيمان الونسة عفوية والضحكه عفوية و بنوت فريقنا و اللمه فى ليلة قمرية فرحتى بيك يمه زى غيمه ضهرية فرت نسيماتها نديانة مروية ورشت مطيراتها رويانة حنية ***** فى زيارة عزيزة لى شرفتنى امى الحبيبة واختى الغالية غادة اتمنى لهن اقامة طيبة وعقبالكم يا احبة تشوفوا اهلكم ويشوفوكم بالسلامه ربى يخلى كل امهاتنا ويبارك لينا فيهن ويمتعن بالصحة والعافية
ويرحم الاموات منهن عذرا احبتى لو طال غيابى ...باقى مشغولة معاهم تحياتى للجميع اسماء الجنيد/ مسقط
|
|
|
|
|
|
|
|
Re: *** أمى جــات *** (Re: soma)
|
Quote: فى زيارة عزيزة لى شرفتنى امى الحبيبة واختى الغالية غادة اتمنى لهن اقامة طيبة وعقبالكم يا احبة تشوفوا اهلكم ويشوفوكم بالسلامه ربى يخلى كل امهاتنا ويبارك لينا فيهن ويمتعن بالصحة والعافية |
نفرح معك وانت جنب الأم .. الام نجيها صغار نجيها كبار فهي الأم وقلبها الكبير لم يتغير رغم تغيرنا ( كبرنا )...... الأخت اسماء الجنيد هنيئاً لك وندعو الله أن لا يفرق بينكم ويطول عمر امك تريها دوما في صحة وعافية أمامك ...
تحياتي لكل أم وتحياتي الخاصة لأمك
خالد محجوب
| |
|
|
|
|
|
|
Re: *** أمى جــات *** (Re: خالد علي محجوب المنسي)
|
Quote: الأخت اسماء الجنيد هنيئاً لك وندعو الله أن لا يفرق بينكم ويطول عمر امك تريها دوما في صحة وعافية أمامك ... |
اخوى خالد الحنين يعلم الله الشوق قمر دورين آميـــــــــــن يا رب العالمين جمعا ان شاء الله يا ود المنسى الموكر محنة طلتك بالحيل عجبتنى يا دخرى الحبان شاحده الله السعاده تبقالك رفيق طول الطريق والعافية تبقالك هدم يا ود العم وشكرا قدر فرحتى بى جية امى وسلامك وصل تب... والدعوات منها ليك ممتده لامن تصلك وتفوتك لى غادى شكرا أردب محنة
| |
|
|
|
|
|
|
Re: *** أمى جــات *** (Re: Elawad)
|
Quote: حمدا لله على سلامتهم يا أخت أسماء. و إن شاء الله ربنا يجعل أيامنا كلها سعادة و يحفظهم لينا و يعينا على برهم. |
اخى العوض تسلم من كل بلا ان شاء الله حبابك وتسلم على طلتك الجميلة يعلم الله زى كانك جيتنا بادرب وسلامتهم وطايبتهم بى محنة يديك الف عافية اخى العزيز صدقت والله .. نتمنى من المولى الكريم ان يعينا على برهم شكرا اخى العوض شكرا جروف وخدار قيوف
| |
|
|
|
|
|
|
Re: *** أمى جــات *** (Re: soma)
|
و أنا أقووووول سوما دي غاتسة وين يا خواني...؟ أتاريكِ غاتسة في حضن دافيء و وهيط.
ربنا يخليها ليكِ يا سوما..و يخليكِ ليها.. سلامي الكتييييييييير ليها و للغالية غادة. ربنا يسعد كل أوقاتكم... و إن شاء الله دايماً ملمومين في السمح.
| |
|
|
|
|
|
|
Re: *** أمى جــات *** (Re: soma)
|
العزيزة الغالية شاعرتنا اسماء الجنيد
لك التحية
الف حمدا لله على سلامة امك واختك وربنا يجمع شملكم دائما فى ارض الوطن الجميل وتنبذى الغربة وتطلقيها طلاق ثلاثة ... حقيقة زيارة احد الاقربين تجعل الحياة رائعة وجميلة ولها طعم ثانى فهى مع الشخوص تستدعى كل زكريات الطفولة وكل الحياة الجميلة السابقة فيعود الانسان كما كان صغيرا وخاليا من الهموم ..
هنيئا لك عزيزتى بهذه الزيارة وادام الله كل ايامك هناء وفرح وسرور
وسلمى لى عليهم وقولى للحاجة تدينا دعوات بالله تعدل حالنا وتفكنا من الغربة ....
مع مودتى
| |
|
|
|
|
|
|
Re: *** أمى جــات *** (Re: soma)
|
اختي اسماء حمد لله على سلامة امك واختك انا افتقد امي كثيرا فهي لم تفارق مخيلتي ولو للحظة ادعو لها ليل نهار توفيت وتركتني وحيدا ..كم كانت حنينة اذكر انها مدت يدها لي وانا اغادر السودان وهي تقول( سامحني يا صالح وانا مسامحاك) غفر الله لها ولوالديها ومتعكم بالصحة والعافية.
| |
|
|
|
|
|
|
Re: *** أمى جــات *** (Re: soma)
|
ربنا يخلليك امك ويخليها ليك ولاخواتك واحبائكم
___________ أَحِـنُّ إِلَى الكَـأْسِ التِي شَـرِبَتْ بِهَـا وأَهْـوَى لِمَثْـوَاهَا التُّـرَابَ وَمَا ضَـمَّا ـ المتنبي ـ _______________________
| |
|
|
|
|
|
| |