كتب الكاتب الفاتح جبرا المتوفرة بمعرض الدوحة
|
|
 مالك حسين: الوطنى والحركة فى الانتخابات ما بعملوا 15% الترابى صوفى واشتغلت مع نافع شغل امن !!(
|
أنا مدير جامع أمريكي والبترول جابوا نميرى !!
اتونس معاه : خليفة حسن بلة
التقيته ذات مساء في نهايات شهر رمضان المعظم بمباني الاذاعة، وطلبت اجراء حوار معه فوافق بترحاب شديد واعطاني رقم التلفون .. اتصلت به ظهر يوم الاثنين فوافق على ان نلتقي في التاسعة والنصف صباح الثلاثاء بمكتبه .. قلت له في هيلتون ؟ قال لا في مطار الخرطوم .. ذهبت الى هناك في ذات الموعد وقابلته في مدخل المكتب ودلفنا اليه معا .. مكتب بسيط على المنضدة الرئيسية مجلة المحكمة الدستورية الى جانب ساعة مكتب بالاضافة الى جهاز فاكس بدأ يتعامل معه بمجرد دخولنا المكتب ولم تسعفه الشبكة فظل يواصل المحاولات طوال زمن الونسة التي استمرت لمدة ثلاث واربعين دقيقة وثماني وثلاثين ثانية.
* انتو من وين يا بروف ؟
- انا من ود السيد، ونحن من المغاربة اشراف من المغاربة.
* اكيد البدايات هناك ؟
- المراحل الدراسية الابتدائية والمتوسطة في رفاعة شرق النيل والثانوي في مدني الثانوية ثم معهد شمبات الزراعي.
* والجامعة ؟
- البكالريوس والماجستير في باكستان .
* زراعة ؟
- ايوه، وبعدها امريكا للدكتوراة في الزراعة وتطوير الحيوان وفي الاقتصاد.
* لكن عندك علاقة اكاديمية بالقانون ؟
- ايوة سنة 90 نلت ليسانس الحقوق في جامعة بيروت العربية والآن اعد العدة لنيل درجة الدكتوراة في القانون .
* الرسالة بعنوان شنو ؟
- عن التطور الدستوري في السودان والسوابق الدستورية .
* ومن وين نلت درجة البروفسور ؟
- درجة البروفيسورمن جامعة وستمنستر في امريكا سنة 1998م.
* وهل عملت في التخصصات دي كلها ؟
- عملت في مجالات الزراعة والاقتصاد والاستشارات وبرضو في البرلمان في مجلس الشعب القومي من سنة 80 حتي 1985م، والمجلس الوطني والبرلمان الافريقي من سنة 2000 الي 2005م، ومراقب دولي للانتخابات في الدول الافريقية ورئيس البرلمان العالمي لفض النزاعات وعضو لجنة نزع السلاح في جنيف وعضو اتحاد البرلمانات الدولي وعضو في اتحاد البحوث العربية ومدير جامة وستمنستر للتعليم من بعد، والآن اعمل في مجال الاستشارات وفي مجال العمل السياسي في جانب التحليل السياسي والاقتصادي.
* يا بروف عادي جداً تلقى واحد متنوع الاهتمامات، لكن موحد التخصص لكن في حالتك انت متعدد الاهتمامات والتخصصات برضو .. كيف نصنفك؟
- شوف انا خرجت من مجال التخصصات الضيقة الى مجال المعرفة الرحب .. انا الآن اتعامل مع نظريات جديدة للمعرفة واساليبها وكذلك مشغول بتفسير الظواهر المعرفية والعمل من اجل تدبر النصوص ومعرفة جماع العلم وتسخيرالعلم لفهم الظواهرالمختلفة والنصوص، وايضا مهتم جداً بالشؤون الاجتماعية والاقتصادية والسياسية في البلد.
* والتصوف ؟
- طبعا ده عالمي .. التصوف بمعناه العريض الظواهر الكاشفة للغموض والتصوف كسلوك متصل بالمجتمع والتصوف كظاهرة من منبعها في المغرب وارض الرافدين الى السودان محط التصوف الحقيقي .. وما حدث فيه من تطور في الممارسة ومن تجليات والتصوف من اهم اهتماماتي الآن .
* اردنا ان تختصر لنا مالك حسين فتوسعت اكثر ؟
- انا بفتكر جماع المعرفة كل لا يتجزأ والانسان الذي يحصر نفسه في معرفة محددة يكون حبس نفسه ..طبيعة شخصيتي تنزع الى جمع اكبر قدر من المعرفة.
* وهل كان هناك نموذج اقتديت به في هذا الضرب من التوسع المعرفي ؟
- النموذج بالطبع موجود لكن كثيرا ما تخطيت النماذج وانا في بدايات حياتي كنت كثير السؤال لدرجة انني ما استسلمت حتي للاشياءالعلمية البحتة.
* واظن لديك قصص في هذا ؟
- اذكر مرة كان يحكي لنا الاستاذ عن عالم تاريخ كتب عن كروية الارض فقلت له .. يعني يا استاذ ديل كانوا بتكلموا عن تاريخ جغرافية الارض فضحك الاستاذ وتبعه التلاميذ زملائى بالضحك وذهبت انا للبحث فوجدت كتاب اسمه (The history
of eaythgeagraphy) يعني تاريخ جغرافية الارض، فأخذته
واحضرته للاستاذ واثناء الحصة قدمته له بعدما قلت له انا داير ارد على ضحكتك وضحكة زملائي ده الكتاب وفعلا اندهش من الكتاب وشهد لي بأنه حيكون عندي مستقبل في البحث.
* الكلام ده كان سنة كم ؟
سنة 1960م وانا في الثانوي العالي ومن الوقت داك قلت انا اصلو ما اترك مجال من مجالات المعرفة الا واطرقه وحتى الآن اتدبر القرآن دون ان يكون معي تفاسير اللهم الا معاني المفردات وكل مرة اطلع بفهم جديد للآية مثلا خلينا نقرأ آية (يتناول مصحف صغير الحجم ويقرأ اية وفسرها لي) .
* طيب يا بروف الشك والاسئلة والتدبر كلها في العلم مقبولة لكنها في الصوفية لا تتوفر للصوفي حيث هناك النهاية عند قول وفهم وقرارات ابونا الشيخ ؟
- ابدا، الشيوخ المتصوفة دائما يطلقوا العنان للمريدين عشان يجتهدوا عكس الآخرين .
* ما اعرفه انا ان هناك في الصوفية ان لا تسأل كثير ؟
- لا لا ... الصوفي فهمه للنصوص غير محدود وهم يعيشوا خارج اطار الصورة والذين يعيشون في اطار الصورة الظاهرة هم العلماءالمنبتين.
* بصراحة كده هل يقبل شيخك انك تجادله في مسألة ما وخاصة انهم يتعاملون بمنطق علم الباطن؟
- علم الباطن هو اكثر علم يعينك على تفسير الظواهر.
* رغم عدم وجود قوانين وقواعد تحكم هذا العلم؟
- دي المنظومة الحرة للتعلم .. شوف اي زول دايرو يتعلم لازم تخليهو حر يستكشف البواطن التي تفسر الظواهر .. الصوفية تسمح لك بولوج الباطن.
* خلينا في الصوفية لسة .. انت ذكرت في البداية ان ارتباطك الواسع بحياة الناس في السياسة والاقتصاد والمجتمع عموما لكننا عندما ننظر للصوفية يتبادر لنا فهم انها تعني الانعزال والانقطاع عن الناس .. كيف يستقيم هذا للبروفيسور مالك حسين ؟
- الصوفية ينعزلوا عشان يجعلوا للمعرفة اسس وأطر، والصوفي ينعزل ليخرج باليقين .
* غالبية المتصوفة غير فاعلين في المجتمع ولا اريد أن اقول انهم خاملين.
- الصوفية كلها حركة .. الصوفية ما فيها خمول الخاملين هم العلماء المرتبطين بفهم النصوص وديل دايما منغلقين تلقاه في نفس مكانه، لكن المتصوف كل مر تلقاه متجدد وكل مرة يأتيك بالعجائب.
* إذن انت لا تري اى عيب في المتصوفة ؟
- العيب في بعض الممارسات لا يعني عيباً في كل الصوفية كأن يخطئ قاضي في فهم وتطبيق القانون هذا ليس عيباً للقانون.
* لذلك كثيراً ما تتصدى للرد على الهجوم على الصوفية واخرها ندوة في مركز راشد دياب عندما انتقدكم د. حسن الترابي.
- انا دائما بقول للترابي انو ما يستعدي عليه الصوفية لان اجتهاداته دي تصوف.
* يعني ممكن تقول د . الترابي صوفي ؟
- مافي كلام هو صوفي في سلوكه واجتهاده وعلمه، واظنه بهاجم ظواهر في الصوفية وليس الصوفية وانا بقول ليك هو صوفي والدليل وقت جاء يكوِّن جبهة الميثاق الاسلامي والجبهة كانت المادة الرئيسية الطرق الصوفية ودعوة الاخوان المسلمين ذاتها تصوف .. حسن البنا كان شاذلي الطريقة وشكل البناء عند الاخوان شكل صوفي من الاسرة والكتائب.
* في قصيدة شهيرة للشيخ فرح ودتكتوك يقول فيها يا واقف عند ابواب السلاطين ارفق بنفسك من هم وتحزين .. كأنه يدعو الناس للبعد عن السلاطين وابوابهم، دعك من ان يكونوا هم ذاتهم سلاطين .. لكن البروف مالك حسين اراد ذات مرة ان يكون سلطانا علينا !!
- في البداية انت عارف يا واقف دي قاصد بيها شنو الشيخ فرح ؟ واقف دي معناها (مرخم) او مرتكن ما عنده شغلة غير الوقوف ده .. ده .. المقصود .. لكن ان تكون متصوف وتكون عندك علاقات مع السلاطين ما فيها حاجة.
* وان تكون متصوف وتترشح لرئاسة الجمهورية كما فعلت انت برضو مافيها مشكلة ؟
- يا ريت البلد دي تكون محظوظة ويحكمها رئيس متصوف .. يا ريت .
* يحصل شنو ؟
- السودان كله حيتبعوا .. المتصوف قطعاً عنده اتباع اكثر من السياسي وبالمناسبة الناخب السوداني صوفي زراعي، ولو اتيح ليهم ينتخبوا مرشحهم حيكونوا هم الاغلبية .
* رغم ان توصيف السياسة انها لعبة قذرة كيف تتقدم ليها وانت زول صوفي ؟
- لا هي قدمت نفسها بالوصف ده لكن ما فيها قذارة ولا شئ .. المتصوفة هم خير من يدير المفاوضات والحوارات ويخلقوا السلام.
* مافي شيوخ طرق صوفية نصحوك ان تبعد عنه السياسة .
- ابداً .
* عجبتهم حكاية صوفي يبقي رئيس جمهورية ؟
- جزء كبير من القادرية والسمانية يتألموا انو انا ما فزت.
* إذن أنت مافزت لاحتمال انو قواعدكم المتصوفة دايرة تجنبك هم السلطة ؟
- لا انا ما فزت لانو الانتخابات ما كانت نزيهة وكل الناس بعرفوا ده .. وهم عندهم ما يبرروا بيهو تزويرهم للانتخابات باعتبار لانفسهم انهم خير من يحكم البلد .. فقه الضرورة يعني.
* كيف بتقرأ شخصية السوداني عموماً ؟
- هو شخص ما بحب بحبسوه في حاجة واحدة او ضيقة هو بطبعه متمرد وشوف الانقسامات البتحدث في الاحزاب اذا حزب الامة او الاتحادي او الشيوعي او المؤتمر الوطني والشعبي وغيرهم ده كله تمرد سوداني.
* المشكلة في السوداني وليست في الاحزاب ؟
- الاحزاب فيها مشاكل، لكن شخصية السوداني ذاتها متمردة على طول .. وبالمناسبة السودانية شخصية متصوفة حتي نقد ده ذاتو حينتهي متصوف .
* اضافة للتمرد ماهي مشاكل السوداني ؟
- الصدق .
* الصدق مشكلة يا بروف ؟
- طبعاً .. اقول ليك كيف الصدق مشكلة بل ومن اكبر المشاكل.. الصدق والانفعال والتجاوب والوفاء دي بتورث الناس الهم في المجتمعات الضالة دي.
* ده بقي تفسير نحنا ناس الظاهر ما بنقدر نستوعبه؟
- بغية مات دونها الانبياء
وهي بكر مكنونة عذراء
وتوالت علي اعتابها الشهداء
ثم اريقت دماء
دي قصيدة فراج الطيب المشهورة وده كلامه في الصدق.
* واخري ؟
- الانفعال الممكن يصل في احايين لابعد من حجم المشكلة.
* اتكلمت عن نميري سابقا بأنه من اقوي الرؤساء في السودان.
- نعم .
* طيب لو كنت مكانه كنت حتصدر ياتو قرار من قراراته ؟
- بتفق معاه في نهج القيادة الرشيدة واتفق معاهو في تطبيق القوانين الاسلامية وبرضو كان بشرك معاهو السوادنيين كلهم بلا لون ولا عرق ولا صحبة وفي دي مافي زول عملها الا هو وعبود. الانسان عندهم بالكفاءة فقط.
* كان ممكن تؤيد اعدام محمود محمدطه ؟
- لا لا أويده .... دي من اخطاء نميري حمل عليها واجبر عليها.
* ليه ؟
- هو شخص ناهز الـ 75 عام وثانيا كان يجب ان يناقش في مساحة عامة ويجيبوا ليهو اهل علم ومعرفة ما يجيبوا ليهو ناس دون المستوى .. بعدين نعدموا ليه من شاء فليؤمن ومن شاء فليكفر .. ربنا قال كده .
* ومن اخطاءه تاني شنو ؟
- انو سافر في وقت البلد في حالة اشتعال ولو كان هو موجود شخصيته كانت قضت على التمرد وعلى المظاهرات.
* يعني انت ما كنت داير مايو تسقط ؟
- انا بفتكر انو سقوط مايو خسارة كبيرة على الشعب السوداني.
* رغم ما تحقق الآن في الانقاذ من بترول ؟
- مين الجاب البترول ؟ البترول جابو نميري .
* بقولوا بترول نميري كان في قزازة جوة مكتبه ؟
- لا قزازه ولا حاجة بل 43 بير محفورة ومنقبة وهسة شغالة بتنتج وهو الحدد مسار الانابيب والمصافي وكله.
* انا من قبيل بفتش في اتجاهك السياسي لكن الآن ممكن نسألك هل انت مايوي؟
- انا ما مايوي حتي صلتي بي مايو ما كانت كبيرة انا زول سياسي.
* يعني ما عندك اتجاه سياسي ؟
- ابداً انا مستقل .. كنت في البداية حركة اسلامية زمان لكن ما عندي حزب الآن وما حأكون في حزب.
* ولا حنعمل حزب ؟
- ولا حأعمل حزب. انا بتكلم عن الاغلبية الصامتة التي لم تمارس حقها بعد.
* ماذا عن السيد الصادق المهدي ؟
- والله ياخي الصادق شخص عف اللسان واليد، لم تحم حوله شبهة فساد في المال العام وهو انسان موضوعي وعلمي ومؤهل.
* مؤهل يحكم السودان ؟
- مؤهل يحكم لكنه غير موفق في المنظومة التي يحكم بها .. يعني ما موفق في اختيار الناس المعاه وهو فشل لهذا السبب .
* هل ممكن يحكم السودان تاني ؟
- عنده فرصة لكن مؤتلف .. لوحده لا .
* والمؤتمر الوطني ما عنده حظ ؟
- في انتخابات حرة لا .
* ولا الحركة الشعبية ؟
- لا الحركة الشعبية كلها 5% من الشعب السوداني لانها مختلف عليها في الجنوب والحركة الشعبية والمؤتمر الوطني الاثنين ما بعلموا 15% في احسن الاحوال. نحنا محكومين بالاقلية يا مولانا.
* طيب ما دام كده، ليه الاحزاب دي خايفة من الانتخابات؟
- لانو ما عندها امكانيات .. الامكانيات كلها عند المؤتمر الوطني.
* عندك رأي في كفاءة من يدير المؤتمر الوطني؟
- هم اكفاء لكن طرحهم غير كفء.
* دي ما فاهمها ؟
- سيطروا على الحكم وعملوا اقصاء للآخرين هم عندهم كفاءة مافيها شك لكن اشتغلوا بي فقه الضرورة.
* رأيك في الرئيس عمر البشير ؟
- هو شخصية تنزع للوفاق وهذا ما يعجني فيه، لكن يتجاذبوه الآخرين الذين لا يريدون الوفاق.
* باختصار منو البعجبك في المؤتمر الوطني ؟
- البروفيسور ابراهيم احمدعمر مافي شك انه مميز اذا في الحكم او خارجه .. شجاع في التصدي ونهجه علمي وكذلك عبد الباسط عبد الماجد .
* وعلي عثمان محمد طه ؟
- هو رجل صديقي وانا شايف انو مؤهل لقيادة ومخاطبة الشعب وهو اصلاً قائد اسلامي شعبي فاز في البرلمان في كل العهود ورئيس لاتحادالطلاب وعنده شخصية مقبولة بس قفل نفسه في العمل الداخلي وهو عف جدا .
* هل مازالت عندك رغبة تحكم السودان ؟
- هي ليست رغبة انما مقتضيات تقتضيها الظروف.
* نمشي للجانب الاقتصادي .. بداية انت زول من منطقة ود السيد وصوفي وعلاقتك واسعة مع الناس زي ما بتقول، لكن رغم ده يكون مكتبك في هيلتون او في اماكن مقفولة ؟
- الفكرة كلها هي اني انا بقعد في المكان بعقلي وليس بجسمي، لكن لو جيت لمكاتبي كلها للبسطاء من الناس، مثلا انا اقمت في هيلتون 15 سنة اقمت فيه الصلاة والشعائر وجلسات المديح ودخلوه كل الفقراء واصحاب الحاجات لدرجة انو ناس هيلتون زاتهم قدموا لي شكاوي من نوعية الناس البجوني .. انا يا مولاي مربوط بالناس .. وفي النهاية دي ما قلت ليك انا بسخر المكان لخدمة عقلي وليس جسدي عشان كده ما عنده سطوة على لاني ما بفتش عن مكان مريح لجسدي.
* عندك علاقات مع منظمات او جمعيات عالمية وغربية ؟
- كتير.
* منظمات ليها علاقة بالقانون وحقوق الانسان؟
- كلها ومن ضمنها جمعيات حقوق الانسان والقانون يعني اى واحد من الجمعيات دي يجي السودان يقابل الرئيس او اى زول في الدولة لازم بعدهم يقابلني انا .
* ليه ؟
- لانهم بعرفوني بالاضافة لي اني ما معارضة .
* وعندك علاقة مع النظام ؟
- طبعا عندي علاقات شخصية كمان مع عدد منهم .. مثلا اخرهم عبد القادر محمد زين وزير الدولة للثقافة والشباب والرياضة رجل صديق.
* وممكن تتعاون معاهم ؟
- طبعا بل وحصل كمان .. انا اتعاونت مع د . نافع في اوائل التسعينات في عمل أمني عالمي ومعانا د. مصطفي عثمان.
* أمن عالمي ؟
- ايوه هناك أمن عالمي.
* انا شايف وراك لوحة مهداة لك من الدفعة الاولي للدارسين باكاديمية الأمن العليا ؟
- انا استاذ فيها على فكرة .. واستاذ مميز كمان .
* خلينا نطلع من الحتة دي سريع ونرجع للمنظمات الاجنبية .. هل صحي وراها اجندة شريرة ؟
- طبعا ليس بالضرورة ان تكون كلها خير وقطعا تحمل بين طياتها شر .
* لكنك عضو في كثير منها كما قلت ؟
- ايوة وايه المانع .. انا مع انو الزول يمشي اماكن الشر عشان يدفع الشر وما بتسمع بالمثل السوداني الجبان «ابعد عن الشر وغنيلو» .. لا انا بمشي مع الشر واغنيلو لغاية ما اقلبو خير.
* هل في نشاط للماسونية في السودان ؟
- في .. ياخي في نشاط لاى حاجة في السودان .. في نشاط للماسونية وللشيعة وللصهيونية وللـ (C.I.A) .. العالم اصبح قرية.
* لازم السودان ده يكون فيه الجنوب ؟
- شوف يجب ان الجنوب ما ينفصل لكن لو بقت في ضرورة ينفصل خلاص ينفصل .
* الأقل مشاكل شنو ؟
- سودان فيه الجنوب وبمشاكله .. بصراحة كده العنصر العربي ممتحن في هذا البلد مع انو عبءالتنمية والاقتصاد والبناء في السودان الحديث ده كله قام عليه.
* قرايتك للأزمة الاخيرة بين الشريكين ؟
- انا كنت متوقعها من البداية وما حتنتهي لان الاتفاقية غير قابلة للتنفيذ لانها مليانة تفاصيل فيها ثمانية الف وسبعمائة مفصل، وكما قال علي عثمان الشيطان يسكن في التفاصيل.
* وبعد كل هذا هل انت متفائل لمستقبل السودان سياسيا واقتصاديا ؟
- طبعا .. متفائل جداً ويجب كلنا ان نكون متفائلين .
|
|
 
|
|
|
|
|
|
|
 Re: مالك حسين: الوطنى والحركة فى الانتخابات ما بعملوا 15% الترابى صوفى واشتغلت مع نافع شغل امن (Re: Nasr)
|
هذا الدعى من اكبر رموز الفساد فى البلد
فى عهد نميرى كان معروفا بتأييده لتسلط نميرى ومشاركته فيه
وهو اخ مسلم معروف منذ الثانوى العالى ومتشدد فى اخوانيته
ومحاولته لجعل نفسه بدون تنظيم هذه لن تجوز على احد ، ومحاوله للتغطيه وذر الرماد فى العيون
فى اوائل التسعينات وفى عهد الانقاذ تقدم المفتشين الزراعيين بمشروع الجزيره اخصائيى مكافحة الآفات بمذكره احتجاج على رسو عقد مكافحة الآفات ورش القطن على شركة هذا المدعو وذلك بالمخالفه للشروط والاسسس السليمه لرسو العطاء ولأن شركته اصلا غير مستوفيه للشروط الفنيه المطلوبه للمكافحه من توفر للطائرات ومن توفر الادويه المناسبه من ما نتج عنه ان اصيب القطن بأمراض وآفات قللت الانتاج وتضرر المزارعون اضرار بليغه واصابتهم خسائر جسيمه من هذا الفساد ، لكن بالطبع كان وراءه الحكومه الانقاذيه بكل قوتها وسطوتها وهو احد رموزها الاساسيين .
| |
|
|
|
|
|
|
|
|
|
Re: مالك حسين: الوطنى والحركة فى الانتخابات ما بعملوا 15% الترابى صوفى واشتغلت مع نافع شغل امن (Re: محمد شريف)
|
برضو وقفت عند وصفه للترابي بأنه صوفي!!
بعدين دي ما تحته خط:
Quote:
* في قصيدة شهيرة للشيخ فرح ودتكتوك يقول فيها يا واقف عند ابواب السلاطين ارفق بنفسك من هم وتحزين .. كأنه يدعو الناس للبعد عن السلاطين وابوابهم، دعك من ان يكونوا هم ذاتهم سلاطين .. لكن البروف مالك حسين اراد ذات مرة ان يكون سلطانا علينا !!
- في البداية انت عارف يا واقف دي قاصد بيها شنو الشيخ فرح ؟ واقف دي معناها (مرخم) او مرتكن ما عنده شغلة غير الوقوف ده .. ده .. المقصود .. لكن ان تكون متصوف وتكون عندك علاقات مع السلاطين ما فيها حاجة. |
Quote:
* كان ممكن تؤيد اعدام محمود محمدطه ؟
- لا لا أويده .... دي من اخطاء نميري حمل عليها واجبر عليها.
* ليه ؟
- هو شخص ناهز الـ 75 عام وثانيا كان يجب ان يناقش في مساحة عامة ويجيبوا ليهو اهل علم ومعرفة ما يجيبوا ليهو ناس دون المستوى .. بعدين نعدموا ليه من شاء فليؤمن ومن شاء فليكفر .. ربنا قال كده . .. |
لو كان متصوفا صادقا لقال هذا الكلام لنميري.. ولكنه على العكس ذهب إلى الأستاذ محمود حاملا رسالة من أحد شيوخ الطرق الصوفية ومن بعض قادة مجلس الشعب ينصحونه فيها بالتنازل.. ولكن الأستاذ محمود قال له بأن يقول لناس مجلس الشعب بأن يتركوا له قضيته وقال له أن يقول لذلك الشيخ بأن لا يأتي لزيارة الأستاذ، بل يذهب للنميري ويقول له بأنك زيفت الشريعة..
وحتى الآن يرى مالك حسين أن من حسنات نميري تطبيق الشريعة؟؟!! دي صوفية شنو دي.. دا استهبال..
| |
|
|
|
|
|
|
| |
Nasr
wadalzain
Yasir Elsharif
فيس بوك
تويتر
انستقرام
يوتيوب
بنتيريست