حضر بدوي سعودي يشتكي من ان تيسه يتعدى ليلاً على أغنامه الحامل وهذا يتسبب كثيراً في اجهاض الأغنام ومن ثم يفقد البدوي الكثير من المواليد ذهب البدوي للصيدلية على أمل أن يجد علاجاً ناجعاً لتهدئة التيس من هذه الحالة المتردية من الشبق وذكر له الدكتور زميلنا هنا بسودانيز أون لاين أنه لايوجد علاج لتهدئة التيس وانما يوجد علاج لزيادة حالته وتصادف أنه تواجد بدوي آخر في نفس المكان وقال للبدوي صاجب المشكلة عندي الحل لقد كان ياسادتي الحل بسيطاً جداً وقال له : اذا اردته ان يترك هذه الحالة فاسقيه من { موية التحلية } وبالفعل أخذ البدوي الماء معه وسقى التيس ومن يومها نامت الأغنام في أمان الله ورعايته لكن المشكلة وين 00 رفض التيس نهائياً بعد ذلك الاقتراب من كل الأغنام !! فقد كان يقضي على اليابس والأخضر ولكنه اصبح مثله مثل الغنماية وحينما ياتون له بغنماية من أجل المعاشرة والتزاوج يصيح ويهرب منها بعد سماعي لهذه القصة حضرت مباشرة وقمت برمي كل جركانات مياه التحلية لم أترك لا أخضر ولا أحمر ومنذ يوم امس وأنا اشرب ببسي فقط حكيت قبل قليل هذه القصة لأحد اصدقائي من السعوديين المتمرسين في تربية الأغنام وقلت له أنني طلقت مياه التحلية نهائياً وبدأت من يوم أمس في شرب الببسي فضحك حتى كاد يسقط وقال لي : لقد كان لدينا بعيراً يهيج كلما رأى ناقة تمر بجواره فاسقيناه قارورة ببسي ومن يومها لم تقم له قايمة !!! أفتونا ياجماعة والله انا محتار جداً منذ الأمس مع العلم انني اشرب في هذا الماء منذ خمسة عشر عاماً فهل سيكون مصيرنا كمصير التيس والبعير ؟ أم أن هذه أضغاث أحلام !!!! أن تفقد أهلك في الغربة فهذا سيتعوض وأن تفقد السعادة والراحة والهناء فهذا سيتعوض هو الآخر أما أن تفقد الأمتعة الشخصية فعليه العوض ومنه العوض !!!!! قال بعير هائج قال !!!!
لمن يودون المشاركة من غير الأعضاء وللذين طلبوا الايميل [email protected]
قال شاي حلبة قال !!! اشترينا الحلبة على الميز واحد عمك معناها عارف الوصفة دي قام مسك الخلاطة وهرس هرسة عدوووووووك تصدق خاتيها في الحقة بتاعت الصاعود كل يوم { يسف } منها شوية نقول ليهو شنو يا عمك عندك شنو بتسف في الحلبة دي كل يوم قال عندو حيرقان لكن يبدو لي أن المصيبة أكبر من ذلك قال حيرقان قال !!! اها الليلة الحقة جاك زوووووووووووول !!! الحلبة وعرفناها البحر شارب موية تحلية وللا شنو ؟؟؟
04-05-2008, 08:23 AM
عمران حسن صالح عمران حسن صالح
تاريخ التسجيل: 11-26-2004
مجموع المشاركات: 10159
الأخ / أبو حراز لك التحية والود طبعاً ضحكت حد الهوس ...وتذكرت آلاف الأمثلة التي تمر علينا هنا (نحن معشر مغتربي آخر الزمان ) .. وبما إني جبان جداً في مثل هذه القصص ولا أقوى على ذكرها هنــا .. إلا أن الأمر فيه الكثير من الإثارة بسبب دوام هذه البلاد وما له من تبعات !!!! تذكرت هذه القصة التي رواها من (أثق) فيه قائلاً : كان يحبها حد (الهوس) .. وكلما مر يوماً وهو هنا يتقلب فوق نار ( العذوبية) يجن جنونه أكثر .. فيركض إلى أقرب مركز إتصالات ويصرف كثيراً في مكالماته إليها .. همساً .. وشوقا ..وحنيناً ... فيجن جنونه أكثر .. المهم وصل حداً لا فكاك منه إلا بالزواج ... تدخل أصحابه من هنا وهناك (ولمو ليهو ) ما يكفي لإتمام هذه الزواج .. سافر ممنياً نفسه بأيام عسل سعيده مع حبيبة عمره ... وشريكة حياته بعد ذلك ... وقد كان له ما أراد فتم الزواج ودخل (عُش الزوجيه ) مُهللاً مكبراً .. في أول ليله دخل على زوجته رافعاً يديه إلى أعلى ( مُشمراً عن ساعديه ) صائحاً .. ( الليلة وووووب .. اليلة ووووووب ) .... وفعل سبع البرمبة ما أراد ... زارعاً في نفس المسكينة زوجته خوفاً وهلعاً لن تنساهو لآخر عمرها ... المهم مرت السنوات وسبع البرمة عاد ومعه ست الحسن والجمال زوجته وبدأ يمارس حياة الغربة دوام ... سهر ... تعب ... وشراب موية التحلية .. إلا أن جاء يوماً من العمل وهو في قمة الإنهاك وعندما إقترب من شقته رأى دخان يتصاعد من سطح شقته ففهم أن زوجته (مبيتة) النية هذه الليلة بعد أن صار (البساط أحمدي طبعاً ) .... تحسس جيبه ليتأكد من وجود (البندول ) .. وفرك عينية أكثر ليزداد إحمرارها ويبدو أكثر تعباً وإرهاقاً ... دخل محدثاً جلبة واضحة ضارباً الباب وراءه بقوة صائحاً في طفله الثاني أو الثالث بلاش إزعاج لأن رأسي سيطير من الصداع .. ودخل غرفته مباشرةً ناوياً على النوم فقط .. ولا شي غير النوم ... ( جاراً بطانيته لآخر مداها ) .. راخياً أذنيه يتصنت وقع خطوات زوجته ... دخلت عليه حبيبة العُمر ودون تردد قامت (بجر) البطانية بكل قواها مرميةً بها على الأرض .. صائحــةً وكلتا يديها إلى أعلى ... اليلة وووووووووووووب .. اليلة ووووووووووووب ... ........... فيا صديقي إن فعلت موية التحلية بنا ما فعلته بالتيس .. فقد صرنا (غنمايات) .... شئنا أم أبينا ....
04-05-2008, 08:47 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
أخي عمران لك التحية والتقدير فيا صديقي إن فعلت موية التحلية بنا ما فعلته بالتيس .. فقد صرنا (غنمايات) .... شئنا أم أبينا
معنى ذلك أن { موية التحلية } مؤثرة جداً صراحة حينما اسافر للسودان اشعر بتحسن في كل أنحاء جسمي كما أنني أنام بكل هدوء ولا تنتابني أحلام وكوابيس مزعجة حتى أن أحد اصدقائي حكى لي قبل قليل بالتلفون أن زوجته لم تنجب منذ فترة طويلة وكانت تشعر بالكثير من الآلام في معدتها غيروا الماء فتغيرت اشياء كثيرة جداً حتى أنها أنجبت بعد غياب طويل
أما أن نتحول الى غنمايات فالرماد كال حماد ان حدث هذا فلا بد ان يذهب الانسان اعتباراً من يوم غد لشراء سبحة طويييييييييييييلة ومن ثم { يحرس } الجامع !!!
قال يحبها حد الهوس قال !!! قلت لي الهوس طار ليهو في راسو !!!!
عثمان دغيس ده كلام شنو ده يا أخوانا ؟؟؟ موية التحلية الواااااااحدة دي ؟؟؟
والسفر بالبحر ؟؟؟
أها أنا الإتنين مسويهن ..!!
والله دقست دقسة كبيرة جداً ياخي واحدة كانت بتكفي
وحكاية قطرك صفر دي حكاية طويلة يبدو لي أنه وصل المحطة !!! قال صفر قال !!!
الفتوى : تلبس ليك عمة طويلة وتقرأ { الذين اذا اصابتهم مصيبة قالوا انا لله وانا اليه راجعون } وتشوف ليك أكبر جامع وتبدأ تشرح للناس طريقة الصلاة والوضوء والتيمم تعرف الواحد ساعة ما استمتع في الدنيا دي أحسن ليهو يكون زول آخرة ويبني مستقبلوا الديني طوبة طوبة
قبل يومين قرات واحدة عجوز مصرية عمرها 89 سنة بت الذين دي قالت لزوجها عاوزة تحتفل بعيد ميلادها ال 89 على طريقتهم الخاصة يعني سهرة تعيد لهم سيرتهم الأولى وعمك ماشاء الله 96 سنة وأظنوا غرقان في موية التحلية لي حلقو وماعندو { بصارة } لا على اليابس ولا على الأخضر المهم انتظرتو في الغرفة وعمك كان ماشي واتعثر ووقع قبل ما يصلها وصاحبتنا انتظرت وانتظرت ولاحياة لمن تنادي وزولك يئن وماقادر يقوم المهم اتوكأت على العصا وجات شافت المنظر قوم ياحيوان قال ليها والله ماقادر جسمي كلو { مردخ } أها طاااااااااااااااخ وقعت ليك في عمك بالعكاز لحد ماقطعت ليك نفسو ومات في نفس اللحظة 00 الله يرحمو ويحسن اليه !!! قال سهرة خاصة قال !!!
04-05-2008, 08:25 AM
بشير أحمد بشير أحمد
تاريخ التسجيل: 03-21-2008
مجموع المشاركات: 10017
أخي بشير أماني أخبارها شنو ؟؟؟ تعرف صاحبك الدكتور هو الذي استقي منه الفتاوي يعني كل ما يقيف علينا أمر من الأمور الدينية اذهب له وأنا مطمئن لكن خلف السواهي دواهي ياخي انتو محظوظين والله نحن اتعذبنا في الدنيا دي عذاب شديد جداً قرايتنا مع العزابة وشغلنا مه العزابة وساكنين مع العزابة كلية كانت جافة جدا وتفتقر للعنصر النسائي البنغالي تلقاهو فاتح بلف الكلور للاخر فعلاً قبل يومين شربت ماء مع اسرة سودانية وكانت المياه مرة جدا وسألتهم من أين اشتروها وعرفت المحل الذي باع لهم الماء اليوم وأنا أحادثك فقد ارسلت قبل قليل المختصين للكشف على محطة التحلية وبالفعل احضروا لنا عينات واتضح ان نسبة الكلور عالية جداً وقد قمنا باغلاق المحطة ريثما يتم تعديل النسبة المشكلة أن معظم العاملين بمياه التحلية ليس لهم خبرات في وضع المقادير المناسبة والمسموح بها
سمعت بي نكتة الزغرتت بعد اسبوع ؛بعد زوجها جاء من الغربة كتبت عن هذه النكتة هنا كثيراً وقد حكتها لي بوردابية ظريفة جداً بهذا المنتدى الآن تزوجت ولا أدري كيف تسير أمورها اتمنى لها من كل قلبي حياة سعيدة بعيدة عن موية التحلية وهلمجرا
كيف هي كاب الجداد ؟؟ القرية التي يعجبني اسمها كثيراً ويبدوا لي أن أهلها يحملون الكثير من الحب والبراءة
04-05-2008, 09:58 AM
بشير أحمد بشير أحمد
تاريخ التسجيل: 03-21-2008
مجموع المشاركات: 10017
شكراً على المعلومات الجميلة وشكراً لأنك نقلت لنا هذه القرية الوادعة الراقدة بكل اطمئنان اذكر أن اخي سافر اليها مع صديقه كانوا يذهبون مع أحد الأصدقاء من الخرطوم حيث خطب ذلك الصديق فتاة لديكم هكذا هو الجمال والحب يقودك من المنشية الى كاب الجداد قال لي احدهم لقد عذرناصاحبنا حينما كنا نقول له يا اخي بالخرطوم يمر عليك كل يوم خمسة آلاف فتاة وهن يدخلن الى جامعة النيلين الم تجد احداهن لترتبط بها؟؟ وما الذي يهب بك الى كاب الجداد ؟ قال لي بعد ان وصلنا ايقنا تماماً لماذا حضر الى هنا فقد كانت العروس في منتهى الجمال وجهها طفولي كوجه القمر وشعرها المنسكب حتى الخصر يحكي قصة قرية بحالها قصة من الجمال والبراءة والألق أظرف شيء أن كل القادمين من الخرطوم والذين مروا بقرانا المهترئة وباهلها البسطاء كانوا كلما كروا على قرية ويرون أهلها لايقولون لهم { أهل العوض } بل تغيرت الكلمة مع عصر العولمة واصبحت {nile power} !!!
04-05-2008, 10:38 AM
Waeil Elsayid Awad Waeil Elsayid Awad
تاريخ التسجيل: 12-12-2004
مجموع المشاركات: 2843
يا زول أشرب ساكت ... نحن كسودانيين عندنا ( فلاتر ) طبيعية ... حرم موية التحلية لو قارنتها بموية النيل ال كنا بنشربا من النيل مباشرة عز الدميرة .. بتكون موية التحلية عبارة عن بلسم شافي جنبها ...
أها ...
Quote: أما أن تفقد الأمتعة الشخصية فعليه العوض ومنه العوض !!!!!
الأمتعة الشخصية في الغربة تحت مسئولية صاحبها ...
04-05-2008, 11:32 AM
محمد مختار جعفر محمد مختار جعفر
تاريخ التسجيل: 11-15-2005
مجموع المشاركات: 4927
لكن يا أخوى ده شنو الكتبته ده ..؟؟ دعنى أهمس فى أذنك ، أهل الغرب ( الخواجات ) يحسدوننا كثيرا نحن فى الشرق فما بالك بالسودانيين مع إعداد مراسيم الحكاية !!! فما تخاف ... بس عليك بالطازج ، وأبعد من المعلبات ودنيا البيرقر وتوابعه ، تلقى نفسك تنافس الفيلة وقوة أربعين حصان وقيل خمسون ..
تحيتى .. محمد مختار جعفر
04-05-2008, 11:50 AM
هاشم أحمد خلف الله هاشم أحمد خلف الله
تاريخ التسجيل: 01-16-2007
مجموع المشاركات: 6449
ابو حراز بطل جرسة وخليك رِجال موية تحلية بتاعة شنو بالله عليك؟؟؟ شيل الوساوس دي من راسك وحرم عوجة ما تجيك هيع انا ابوك يا أحمد.
نصيحة اخوية :
اكل الطحنية والعسل بدي طاقة جبارة والله العظيم جد وخد عندك كمان ( أم علي ودي اكلة مصرية حلوة ) في الشتاء عليك بالكوارع واكل العتان في الصيف ابعد من التكييف قدر الإمكان وفي الأيام العادية اكثر من اكل الفواكهة والخضروات
راجين شنو تاني ؟؟؟
ما خلاص كفاكم الحصة دي ومن غير قروش كمان
04-06-2008, 07:40 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
Quote: سلام كتير جداً حراز بطل جرسة وخليك رِجال موية تحلية بتاعة شنو بالله عليك؟؟؟ شيل الوساوس دي من راسك وحرم عوجة ما تجيك هيع انا ابوك يا أحمد.
نصيحة اخوية :
اكل الطحنية والعسل بدي طاقة جبارة والله العظيم جد وخد عندك كمان ( أم علي ودي اكلة مصرية حلوة ) في الشتاء عليك بالكوارع واكل العتان في الصيف ابعد من التكييف قدر الإمكان وفي الأيام العادية اكثر من اكل الفواكهة والخضروات
الطحنية والله يمكن نكون ماكلين منها 35 صفيحة من أتينا للسعودية أم علي دي ما جربناها لسه لايكون العتان البيشربن موية التحلية الكوارع فعلاً كلامك فيها صاح لأنو واحد من جماعتنا كان دائماً لو عندو كوارع بيقفل عليهو البيت واليوم كلو ياكافي البلاء ماقاعد يطلع 00 أكيد معناها في سر في الحكاية دي
هنا والله ماتشغل المكيف في الصيف الا تلقى جسمك كلو انسلخ شكراً على الوصفة الطبية لكن بيني وبينك لو موية التحلية دي بتعمل في التيس هذه العمائل فما بالنا نحن البشر يعني لاقدر الله لو المغتربين بالسعودية حصل ليهم الشيء دا الا الواحد بعد كده يخت المدام قدامه ويقعد { يكلكل } فيها!! قال طاقة جبارة قال !!!
04-06-2008, 07:32 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
أخي : محمد مختار جعفر سلام وشكراً كتير على الوصفة الجميلة المليئة بالألوان العلاقة شنو بين الألوان الطازجة والأطعمة الطازجة ؟؟
حتى { الجداد } رضينا ناكلو قاموا هنا منعوا ذبح الدجاج في المسالخ العادية داخل الأحياء عليك أمان الله تقوم تشتريها من البقالة وتجيبها مكرفسة تكرفس عدووووك تختها في الحلة اربعة ساعات ما تنجض
الاحظ حينما أطون باجازة بالسودان يتحسن وضعي الصحي ولوني واشياء كثيرة لأنني طيلة فترة الاجازة لا اعرف شيء يسمى معلبات
قبل فترة رأيت فيل بأحد حدائق الحيوانات وهو مريض جداً سألنا الحاصل شنو ؟ قالوا زوجته ماتت قبل اسبوع والراجل حالف ما يتناول اي طعام حتى أغروه كم مرة بفيلة صغيرة لتؤانس وحشته شال الموية بخرطومه وكشحها فيها شوف ليك جنس وفاء نحن ياكافي البلاء 00 المرة تموت من هنا وتمشي انت الراجل بقروش الفراش تعرس أختها !!
04-06-2008, 07:19 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
أخي ابوجهينة هل نواصل الشرب على مسئوليتك ؟؟ والله خايفين نسمع كلامك ونقوم نكرطع الموية ونعتمد على الفلاتر المزعومة والواحد في النهاية يرجع السودان ويتفاجأ بان كل محركات بحثه قد تعطلت والله تاني لامنطقة صناعية تجيب فيك خبر ولا أجعص شركة اتصالات تعيد ليك الشبكة !!! اها حاتكون امام خيارين اما تشيل ليك طار وتهيم في بلاد الله الواسعة وتكون مادح ليك حلاقيم واما تكون زي التلفزيون في البيت يطلعوك المغرب 00 ويدخلوك الساعة 11 بالليل !!!
04-05-2008, 12:11 PM
ابوحراز ابوحراز
تاريخ التسجيل: 06-27-2002
مجموع المشاركات: 5515
Waeil Elsayid Awad أها بدينا من هسي نحرس الشفع !!! دا أخير منو موية التحلية !!!! عندنا واحد هنا لا شغل ولا مشغلة 00 جايي مرافق للمدام يشيل الشافع ويقعد يلولي فيهو وبعدين يلبسوا الحفايظ والشافع ياكافي البلاء من يصحى من النوم عايز يدفروه بالعربية وصاحبك كل ماتمشي في شارع تلقاهو يدفر غايتو انا تربية أهل العوض والله لو تديني راتبها كلو ماعندي كلام زي دا لكن ما مشكلة لو ست النفر هرشتك وقالت ليك { نوّم } الطفل
Quote: اها الحالة دى بتظهر بعد كم ؟
في التيس غايتو ظهرت بعد اربعة سقيات مشبعات ونحن ماشاء الله روينا لي حلقنا !!! الله يستر
قال عال العال قال ّ!!!
04-05-2008, 12:22 PM
Waeil Elsayid Awad Waeil Elsayid Awad
تاريخ التسجيل: 12-12-2004
مجموع المشاركات: 2843
Quote: ما سمعت ب(القام زد) ده شراب يصنع من الجنزبيل ما عاوز اشرحو ليك لأنو شرحو واضح من اسمو.
اها { القام زد دا } في ياتو كافتيريا أم هو شراب محلي ؟؟
عندن عزابي كلما تعمل { جنزبيل } في الشاي يوقف لينا في حلقنا ويقول الشاي ماكويس أها الليلة حا اوريهو الرد بتاعك والزول برضو مدة صلاحيتو منتهية وشابكنا الجنزبيل ما كويس
قال زد قال !!!
04-06-2008, 08:03 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
Quote: أبوحراز... أكيد في حاجات تانية مع موية التحلية.. الجو.. سمعنا إنه الجو في ليبيا يساعد على التناسل
أعلى مستوى من الخصوبة..
ناس كثيرة كانت تعاني لما جاءت ليبيا وضعها تحسن.. لذلك دور غربة على ليبيا..
تعرف كمان الحكاية تجيب ليها غربة تاني وفي ليبيا 00 الله يستر ممكن اسافر هناك وتجيك الخصوبة العالية وتأتيك تلك اللحظات الغالية فجأة يقوم صاحبنا القذافي يصدر قرار بطرد الأجانب يعني الفي راسك كلها تطير
Quote: أما نحن توقف لدينا الإنتاج بفعل نضوب الإحتياطيات وبفعل التحات وانتهاء الصلاحية..
تعرف يا المسافر لمن قريت كلامك الأول قلت الزول دا أكيد راقد رز لكن لمن وصلت لهذا الكلام الأخير عرفتك انك { الرز اللاصق في الحلة } ياخي حكايتك بايظة ماقاعد تحضر النشرة الاقتصادية مش شفت كيف الاحتياطي الأمريكي والناس بتعمل احتياطات في سوق الأسهم وهلمجرا
انصحك 00 اعمل ليك سبحة كبيرة واشتغل داعية !!!
04-06-2008, 07:53 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
والله نحن دقسنا دقسة كبيرة جداً ودا الشوت الضفاري الماعندو اي معنى
تعرف دقستنا دي زي دقسة { تيس } طاش ما طاش المدام قالت للمشعوذ انو زوجها ما بيحبها قوم يا المشعوذ أكتب ليها محاية وصاحبتك جات البيت مبسوطة ومزجت المحاية مع الموية عشان يشربها ابو العيال زولك دخل يغير ملابسه جاء التيس شرب الموية كلها
اها { المرأة } كل ما تجي داخلة او مارقة التيس يكورك فيها وسجمي رقدت هبطرش لكن لاحياة لمن تنادي
قال أعوس الكسرة قال !!!
تعرف مرة زرت أحد أصدقائي بمؤسسة الرهد الزراعية طوالي مشينا النادي عشان نعيد بعضا من الذكريات الجميلة ورجعنا البيت عشان العشاء طوالي صاحبك دخل المطبخ زبدأ يرمي في القراصة والمدام قدر الفيل ما شاء الله ماسكة ليك الريموت شيء هيفاء وهبي وشيء نانسي عجرم وشيء فيبفي عبدو وتضحك ومبسوطة 24قيراط وأنا ممحن بعاين في البقرة دي وأخونا جاب القراصة والشعيرية وجهز الكراسي قلت أكيد زولتنا ما حاتاكل بالله اتوهطت في الكرسي وقعدن { تلغف } في الأكل وكمام الحكاية معاها مساخة القراصة ليها حرقتها والشعيرية دي مسيخة وزيتها كتير انا اتنفخت ليك بطريقة عجيبة جدا وكنت عاوز اشيل صحن القراصة واكشحو فيها قام زولك { غمز } اها عرفت صاحبي منتهي الصلاحية سألتو بعد نهاية العشاء الحكاية شنو يامان فقال : والله ياعثمان المدام دي صعبة جداً واقل شيء طوالي تلم فيني { بنية } وخنق } ومرات { تطلع وترتب } وتقول ليهو يلا احسب من 1 - 7 مفروض امضي معاهم يومين اها بعد واطاة الله صبحت عليك أمان الله طلعت بدون اي واحد ما يشعر
قال شعيرية مسيخة قال !!!
04-06-2008, 08:15 AM
ترهاقا ترهاقا
تاريخ التسجيل: 07-04-2003
مجموع المشاركات: 8431
رسالة وصلتني من القاريء المحترم هيثم أحببت أن أنقلها لكم بضبانتها وعبابيرها كلها بطريقتكم ان شاء الله تترنحوا زي ماعاوزين
Quote: التيس يتحول ؟؟؟ From: Haitham Derar ([email protected]) You may not know this sender.Mark as safe|Mark as unsafe Sent: Saturday, April 05, 2008 3:07:30 PM To: [email protected]
الاخ /عثمان ابراهيم (ابو حراز) سلامات وعوافى
يا زول ياتو تيس البيتحول لى غنماية ده ؟
انت شارب ليك حاجة؟(موية تحلية مثلآ) !!! كمية من الوجوه الضاحكة
مع العلم انني اشرب في هذا الماء منذ خمسة عشر عاماً
ياخ انت حكايتك بايظة بعد كده
لكن لو لسه ما اتحولت من تيس وما زلت خايف انا بديك حل من عندى كدى جربو كان نفع معاك واصل فيهو
كل يوم الصباح اشرب ليك عبار من عبابير دينق لمدة 15 يوم وبعد داك ورينى النتيجة
والله عجبنى البوست بتاعك بس نسوى شنو العين بصيرة والايد قصيرة وما زلنا بنحس فى بكرى
لكن الواحد لو شرب ليهو عبارين ومعاها كاسين الا الكلام دا يكون بالنهار لأنو لو شربتهم بالليل والله حكايتك تكون جايطة جداً يعني مابتفرز كاب الجداد من الكلاكلة صنقعت وفي النهاية تشخر وتترك رفيقة العمر تتحسر على اليوم الوقعها في المصيبة دي
بالله اليوم عرفت ليه قريبنا ماقاعد يشرب موية دايماً يقول لينا انا ماقاعد آآآآآآآآآكل كسرة على ريقي يعني أول شيء كان ما ضرب ليهو عبار عبارين لابياكل ولابيشرب وهذا الرجل رغم أنه سكران 24 ساعة لكن عليه كرم عجيب جداً عامل ليهو ديوان وكل الضيوف بينزلوا عنده وهو غائب بيجي كل اليوم المغرب سكران طينة مرة واحد من الجيران اصابته الغيرة قال كيف الزول السكران الحيران دا يعزم الضيوف ونحن نصيحين ماقادرين نعمل اي شيء اها لبد ليهو المغرب عشان يطعنوا بالسكين مشى وراء الحلة وصاحبك كالعادة جاء راجع سكران ويترنح ويقوم ويقع اها مشى عليهو صاحبنا فجأة ظهر ليهو جبل من { الكسرة } ووقف الجبل بينه وبين الرجل السكران الراجل نطق الشهادة ورجع البيت وفي الصباح قابل صاحبنا السكران وقال ليهو والله امبارح قلت الا أطعنك بالسكين قام السكران قال ليهو : لاحول ولافوة الا بالله أوعا أكون اتهجمت عليكم في البيت ؟؟ فقام قال ليهو لا والله عشان الكرم بتاعك اغاظنا وقلنا نتخلص منك لكن فجأة وقف جبل كبير من { الكسرة } وحال بيني وبينك قام السكران قال ليهو والله لو مشيت لي وراء كده المريسة تغرقك لي حلقومك فالرجل كان كريماً ايضا في قعدات السكر وكان يدفع للجميع
نظرية الكاسين دي جايبة حقها لكين لو شالتك نومة واطاتك صبحت .. عليك بوصفة مديدة الحلبة من قهوة الكتيابي بسوق بني مالك وعلى طول من الكورة لل.............
04-06-2008, 05:47 PM
محمد مختار جعفر محمد مختار جعفر
تاريخ التسجيل: 11-15-2005
مجموع المشاركات: 4927
أبو حراز .. سلام كبير وشوق كتير ... أحد الإخوان معى قرا بوستك هذا وضحك كثيرا وقال يكتبو ليك النكته دى ..
( قال فى أحد أيام الصيف ، كانت فى واحدة عاتيه ترقد بجوار بابها فى العصرية ، سمعت منادى يقول نصلح العناقريب .. عناقريب . نصلح العناقريب .. قامت فتحت الباب وقالت ليهو ياراجل ما تطير كده .. حليل الرجال البكسرو العناقريب ... ياحليلهم ... وتحيتى .. محمد مختار ..
04-06-2008, 06:12 PM
هاشم نوريت هاشم نوريت
تاريخ التسجيل: 03-23-2004
مجموع المشاركات: 13622
أخي هاشم تعرف قرات هذا الخبر قبل يومين في جريدة الرياض السعودية زولك دا والله غلب تيس ابوحراز 8/صفر الناس ديل مرات بيشوتوا ضفاري بطريقة عجيبة جداً يعني مش كان بدل حرصه الزائد دا مش كان مفروض يؤجر ليهو رحم كلما ارى الصورة اضحك ولا أدري ماذا ستحمل لنا الأيام القادمة ؟؟
04-07-2008, 07:10 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
أخي محمد مختار التحية لك ولصديقك الذي قرا البوست وشكراً على النكتة اللطيفة يعني رجال هذا الزمن ما شاء الله طلعوا اي كلام عشان كده شايف الجماعة ينهروا فيهم في الشارع وفي البيت لكن بيني وبينك الحكاية زمان لا فيها موية تحلية ولاهمبرقر فالتغذية الطبيعية زي الرضاعة الطبيعية كلاهما يؤدي الى نتائج جيدة بعدين ياخي الناس الكانوا بيكسروا العناقريب كانوا مرتاحين وماعندهم اي ضغوط نفسية ومشاكلهم بسيطة جداً وحلها بسيط شوف نحن الآن بنعيش في أوهام وضغوط وكوابيس بناء البيت والاستقرار وتعليم الأبناء وذهب وملايات ست النفر والعدة كل هذه الأشياء تؤثر سلباً في الانسان والله يستر ما يجينا قانون الخلع والا لوجدت نصف الرجال يتحاومون في الشوارع قال عنقريب قال هو العنقريب دا لو قدرت ركزت فيهو مش أحسن خلي كمان تكسرو ؟؟ والله فعلاً حليل الرجال
04-07-2008, 06:50 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
Quote: نظرية الكاسين دي جايبة حقها لكين لو شالتك نومة واطاتك صبحت .. عليك بوصفة مديدة الحلبة من قهوة الكتيابي بسوق بني مالك وعلى طول من الكورة لل.............
تعرف في الحصاحيصا توجد واحدة تبيع مديدة حلبة بتعملها بطريقة جميلة جداً وهي جميلة لدرجة ماتتصورها توفى زوجها واضطرت للعمل وسط جو مليء بالسماسرة وناس الفارغة والمقدودة أنا زول طبعاً مسكين جداً ويبدو لي أن التوحش الذي نعيشه في السعودية قد أثر علينا كثيراً انا أدخل وأخرج دون أن أقول كلمة واحدة لكن الجماعة والله العظيم واحدين أعمارهم فوق السبعين وأجدهم يتونسوا معاها بطريقة عجيبة جداً وعارفين كل أخبارها وأكلت شنو وشربت شنو والحوامض كيف عمك عندو { دقن } طويلة شايفني كل ما أدخل يقول الزول الظريف دا حا يغير راي البنية دي بس مما أجي داخل تووووووووووووش يدخل ويقول ليها أديني مديدة ويحمّر فيني وما يطلع الا لمن أنا أطلع المهم مرة واحدة بس جمعت كل قواي العقلية والجسدية ورميت ليها { طوبة } اها يا مدام المديدة دي فائدتها شنو للراجل المتزوج ؟؟؟ والله ياعمو المديدة دي بتخلي أعصابك رايقة !!!! قلت ليها : أها أكليها إنتي قال اعصابك رايقة قال !!! المشكلة البتغيظك وين 00 تتونس عادي مع اعمامك الكبار والسماسرة نحن تقول فينا شووووووك !!! وشوف العوارة وين وصلت بينا أول ما وصلت البيت قلت لست النفر الليلة أكلت مديدة ظريفة جدا عند واحدة اسمها 0000 بالله العظيم زولتك انتفضت وقعدت تكورك نهائي تاني ما اسمعك تقول مشيت أكلت عند المرة دي !!! علي بالطلاق تاني بقينا ناس عرديب بس !!!!
04-07-2008, 09:15 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
{1} زول ساكت {2} عمران صالح {3} بشير أحمد {4} وائل {5} أيوجهينة {6} محمد مختار جعفر {7} هاشم خلف الله {8} المسافر {9} أشرف {10} ترهاقا {11} هيثم درار {12} بكري اسماعيل {13} هاشم نوريت الفاتحــــــــــــــــــــــــــــــــــــــة
غايتو بس نسميهو البوست الضكــــــــــــــــــــــر مشاركة رجالية 100% والمحزن أن بعضهم شال الفاتحة مرتين !!! يعني بقية خلق الله كأنهم لايشربون موية التحلية
البقاء لله انا لله وإنا اليه راجعون قال تيس قال !!!
04-07-2008, 01:42 PM
almulaomar almulaomar
تاريخ التسجيل: 07-08-2002
مجموع المشاركات: 6485
الشيخ أب حراز نفعني الله بسكناته وحركاته تقول فض فوك أنك تسكن مع عزابه وأنت في جبال السروات أو جبل طورية حتى على إرتفاع دشليون قدم عن سطح البحر ، وأنت أخي تزوجت ست النفر ومازلت – بإعتبار أنك لم تنزل بوست يوثق طلاقك لها طلقة بينة أو فشنك حتى – وظل زواجكم هذا – اللهم لا حسد – سنين عدا ولكن برغم مازالت تساكن العزابة تطبخ وتنفخ وتكنس وتأكل معلبات وربما تأكل نيم وست النفر في قريتكم الكائنة مكان جميع الكائنات تنتظر قدوم فارسها بفارغ الصبر ، ولكن فارغ الصبر لا يأتي إلا مرة كل عام بحسب عقد عملك فأصبحت جيتك وحضورك للبلد كلام فارغ بحسب قاموس ست النفر وأخواتها الذين إبتلاهم الله بأزواج أدمنوا الغربة فلا هم أقاموا حيث يقمن ولا هن أقمن حيث يقيم بعلوتهن ، وحالة كون جيتك أو من على شاكلتك فارغة لإعتبارات يأتي في مقدمتها الذي يتحلقون حولك منتظرين أن تحكي لهم ألم الفراق وأكل التفاح وحتى شكل المستراح وربما يتقربون إليك زلفى للحصول على عقد عمل أو بيزا كما يدعون ، هذا عدا عن أيامك الضائعة بين الفاتحة والمغتربين وسوف لن تجد ست النفر سوي سويعات قلائل للجلوس مع بعلها وحتى تلك السويعات ربما لا تكون ذات قيمة بإعتبار أنه قد تصادف أن يكون جنابكم في أيام نحس مستمر أى مش في الموود بفعل الجو العام والزحام وحتى الزكام وربما إضراب أصحاب الحافلات أو إنقطاع التيار الكهربائي وذلك أضعف الإيمان. والحال كذلك ربما يكون لمياه البحر دور مؤثر في فحولتكم لكنها قطعاً ليست كل الأسباب فهناك من شرب البحر حتى خلي بلابيطه بره ومع ذلك ظل فحلاً يحاكي تمساح الكرد الذي يشيل بي وكد ويقضي الغرض كما ترنم بذلك المطرب عبد الله عبد القادر البعيو. إذن فلتبحث في أسباب أخرى ولا تسلبط المسألة في موية البحر و موية التحلية ، فكما أخبر شيخنا أبا جهينة الحكاية أكبر من ذلك ، وقوله حق لأنه من جيل عاقر الغربة سنوات طوال عدا عن كونه رجل من قوم يتمثلون بقول الشاعر: مَـلأْنَا البَـرَّ حَتَّى ضَاقَ عَنَّـا وَظَهرَ البَحْـرِ نَمْلَـؤُهُ سَفِيْنَـا وأهو الحكاية برضو جايبه ليها ملح وبحر وسفن عديل كده ، لذلك ما عليك إلا أن تكلم أبا جهينه خليهو يشوف ليك فرقه في مركب فعسي ولعل أن يطمئن قلبكم على فحولتكم المهددة بالإندثار ، وأخوف ما أخافه عليك أن يكون الذي بينك وبين ست النفر مثل حكاية الخروف والذئب والقش والمركب الواحدة التي لا تتسع لأكثر من حاجة واحد معاك وإلا سوف تحصل على مخالفة من شرطة النقل النهري. واحد شيخ أزهري بيقول للناس لازم الراجل المتزوج يبوس يد زوجته عشان يكون في بينكم مودة ورحمة ، نط واحد بتاع مخالفات قال ليهو يا سيدنا الشيخ بس أنا مش متزوج ، قال ليهو الشيخ يبقي تبوس يدك وش وضهر.
04-08-2008, 07:15 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
أخي الملا تحياتي وشكراً كتير على كلماتك الجميلة الطيبة
Quote: الشيخ أب حراز نفعني الله بسكناته وحركاته تقول فض فوك أنك تسكن مع عزابه وأنت في جبال السروات أو جبل طورية حتى على إرتفاع دشليون قدم عن سطح البحر ، وأنت أخي تزوجت ست النفر ومازلت
تعرف كثيراً ما افكر أن اشتغل شيخ والعن الغربة نهائياً 00 وهذه الشغلانة تجلب لك الكثير من الرزق والهم من كل ذلك الجنس اللطيف 00 بعدين دخلها مضمون ومبرشم00 هسي عندنا في ودربيعة فكي اسمو { فكي النسوان 00 يعني لو جيت راجل وضهرك مكسور ماعندو فيك اي شغلة 00
لمن اسأل ست النفر اقول ليها زواجنا استمر كم سنة ؟؟ تقول لي والله انا محتارة كيف صبرت معاك المدة دي كلها 00 وطبعاً للأسف الشيديد مقتنعة بان أحوالنا ما حاتتصلح الا لمن ابوحراز يتلحس 00 وهذا شيء طبيعي في أسرتنا كالعادة يموت الرجال بينما تترمل النساء بعدهم من 50 الى 60 سنة ولكن الشيء المحير أن ظروف العائلة تبدأ في التغيير الايجابي مباشرة 00 طواحين وافران وجزارات والغبشة تروح
Quote: هذا عدا عن أيامك الضائعة بين الفاتحة والمغتربين وسوف لن تجد ست النفر سوي سويعات قلائل للجلوس مع بعلها وحتى تلك السويعات ربما لا تكون ذات قيمة بإعتبار أنه قد تصادف أن يكون جنابكم في أيام نحس مستمر أى مش في الموود بفعل الجو العام والزحام وحتى الزكام وربما إضراب أصحاب الحافلات أو إنقطاع التيار الكهربائي وذلك أضعف الإيمان.
والله فعلاً مجرد سويعات 00 ومرات خلاص تكون جهزت نفسك للوضوء والتيمم فجأة يقولوا ليك بقرة شيخ ادريس وقعت وعاوزين ناس يرفعوها أها تاني تلبس 00 والمشكلة لو البقر خلاك الشفع ما بيخلوك نهائي كان حركت رجلك ساي يقوم الشافع يقول ليك ابوي عاوز موية 00 الشافع ياكافي البلاء مايعطش الا في هذه اللحظات 00 زمان نحن بالله ننوم مع الجداد وختت راسك في العنقريب والله ماتصحى تاني الا بكرة 00 كنت بصحى ايام الطفولة في رمضان مع وقت السحور بالضبط 00 اها هرشوني وقالوا لي عينك تصحى تاني 0
Quote: واحد شيخ أزهري بيقول للناس لازم الراجل المتزوج يبوس يد زوجته عشان يكون في بينكم مودة ورحمة ، نط واحد بتاع مخالفات قال ليهو يا سيدنا الشيخ بس أنا مش متزوج ، قال ليهو الشيخ يبقي تبوس يدك وش وضهر
والله نحن بقت علينا النكتة دي 00 خاصة الواحد لمن يكون في مكان وست النفر في مكان 00 يعني مافي فرق بينك وبين الناس المامتزوجين وأهو نبوس في يدنا من كل الاتجاهات عسى ان يبل ذلك ريقنا ريثما نلتقيها
الغربة لعينة ياأخي الملا عمر 00 لعينة بمعنى الكلمة 00 اما حياة العزابة فتزيدها بؤساً على بؤسها الغربة تصيبك بالتوحد والتوحش والكآبة 00 يعني مفروض كثيرون منا يحجروهم بالمطار لحد مايقابلوا الطبيب النفسي وبعدين يفكوك تمشي على بيتك 00 قال شيخ ابوحراز قال !!! قبل فترة واحدة هنا اشتكت لي بالتلفون وقالت انو زوجها أخذ ابنها لأنها مطلقة وكانت تبكي بحرقة شديدة لأن الطفل عمره عامان وبالصدفة كده قلت لها اقرأي { فرددناه الى أمه كي تقر عينها ولاتحزن " بالله كان بكرة اتصلت وقالت لي الراجل رجع الولد نص الليل بعد ماسافر به لأكثر من 300 كيلومتر والله فعلاً تنجدنا وتلحقنا معليش نسيت اقول ليك أدتني 500 ريال عليك امان الله نشتغل الشهر كلو ومانوفرها
04-07-2008, 03:23 PM
علوبه علوبه
تاريخ التسجيل: 07-27-2002
مجموع المشاركات: 1069
Quote: طيب و لو الغنماية اتبدلت وبقت تيس ؟؟؟؟؟؟؟؟؟؟؟؟؟
حاتكون مشكلة كبيرة زي بتاعت الباحث الذي كان يقوم بتجربة عقار الفياغرا كان يضع اناث الفيران داخل شبك مغلق ويضع الذكور داخل شبك آخر يقوم باعطاء الفياغرا للذكور ومن ثم يفتح لهم الباب المؤدي للإناث ويدون نتائجه المهم 00 في مرة من المرات طلب من مساعده العامل الآسيوي أن يقوم باعطاء الجرعة بعد ثلاث ساعات قام صاحبك أظنه لمافارز الاناث من الذكور وبدل ما يعطي الجرعة للفيران الذكور قوم يا ابن اللذين أعطيها للإناث وما هي لحظات حتى كسرت الإناث السور المحيط بها وهجمت على الذكور وعندها حدث هرج ومرج شديد مما اضطر العالم لإعادة كل أبحاثه من جديد بعينة أخرى من الفئران !!!
راجع الماسينجر
04-08-2008, 08:26 AM
محمد الأمين موسى محمد الأمين موسى
تاريخ التسجيل: 10-30-2005
مجموع المشاركات: 3470
الأخ الفاضل أبو حراز... بعد قراءة هذا البوست الاستراتيجي، اتصلت بالأهل في غرب كردفان ووصيتهم يلقو لي موية المطر! وفي انتظار وصول القرب والجركانات، حاشرب من البحر!
04-08-2008, 09:37 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
كان شربت موية البحر بتيقى زي أحمدي نجاد 00 أظنو غرقان لي حلقو
آآآآآآآآآآآآآآه من كردفان ومياهها الغير آسنة ياليت كل المياه كمياه كردفان الصافية والنقية كقلوب اهلها كردفان الأنثى التي ترقد كل يوم على الرمال تتمدد عارية في منتصف الليل بعد ان ينام الولاة وشرطة النظام العام تتمدد من أجل أن يأتيها القمر ويعلن عقد قرانه عليها في غياب المأذون فياتيها الطلق يازول والله جغمة واحدة من المياه التي ترقد داخل شجر التبلدي تعيدك لسيرتك الأولى أما ذلك { الجمام } الذي تزيحون عنه ذرات الرمال الذهبية طعم مائه كطعم الماء المذكور في سورة محمد 00 ماء غير آسن !!!! بالله زودني بما ياتيك وأمنحني قربة تعينني على الحياة لكن لا انصحك بمياه البحر وان كان لامحالة مستعجل فافعل مثلي فمنذ يومين وبيتنا قد امتلآ بالحلبة
04-08-2008, 09:44 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
Quote: وبالصدفة كده قلت لها اقرأي { فرددناه الى أمه كي تقر عينها ولاتحزن " بالله كان بكرة اتصلت وقالت لي الراجل رجع الولد نص الليل بعد ماسافر به لأكثر من 300 كيلومتر والله فعلاً تنجدنا وتلحقنا معليش نسيت اقول ليك أدتني 500 ريال عليك امان الله نشتغل الشهر كلو ومانوفرها
يا أب حراز والله وبالله المرأة دي داقسه لو حللتها من ناحية صحيحة تلقي الراجل زهج من بكاء الطفل والبامبرز والبزه وتوابع المشاكل التي من شدة صعوبتها أصبحت الجنة تحت أقدام الأمهات. لكين أسهل حاجة تضحك على الناس لأنو الزمن ده صاحب الحاجة أصبح أرعن حتى بعد أن يدركها فأي واحد في أى ركن ممكن يكون فكي.
04-09-2008, 09:58 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
Quote: لكين أسهل حاجة تضحك على الناس لأنو الزمن ده صاحب الحاجة أصبح أرعن حتى بعد أن يدركها فأي واحد في أى ركن ممكن يكون فكي.
ابتلى السودان بالكثير من المشعوذين الذين لم يتركوا شيئاً لم يعالجوه والمشكلة والطامة الكبرى ايمان البعض بهؤلاء المعتوهين وفي كل يوم يظهر مشعوذ جديد ومن ثم تتكشف الاعبيه بعد حين ويصل الهوس بالبعض منا الى تصديق هؤلاء وأكيد تذكر قصة المشعوذين الذين حينما يسلمون عليك يقضون على اليابس والأخضر وكل واحد يقول ليك لو سلمت عليهم فإنك ستظل كهذا التيس الذي شرب الماء واعرف كثيراص من الأزواج أخذوا نساءهم معهم وكل من يقابلهم في الخرطوم لايسلمون عليه بل يتركون ست النفر هي التي تسلم المشكلة ظهرت صواريخ مضادة لهذه الصواريخ فبعد انتشار الشائعة ظهر احدهم وهو يقول للناس أنه سيعيد كل انسان الى سيرته الأولى أما الإعادة فهي كمان بشروط اعادة الارسال فقط والدخول للشبكة بكبلغ مليون جنيه اعادة الارسال والاستقبال خمسة مليون وله في خلقه شئووووون
04-10-2008, 01:32 PM
almulaomar almulaomar
تاريخ التسجيل: 07-08-2002
مجموع المشاركات: 6485
الشيخ أب حراز بيقولوا – وما تسألني هم منو – إنه الحياة بصفة عامة والحياة الزوجية أو حتى العلاقة بين الجنسين أياً كان شكلها أو مسماها تعتمد أو ترتكز على أربعة أركان زيها وزي أى أوضه جالوص ، لا تستقيم أو تقاوم المطر والأعاصير والكتاحة إلا بإستقامة هذه الأركاب الأربعة وهي الحالة الجسمانية: هذه الحالة يظهر التحول فيها بصورة كبيرة في مغتربي دول الخليج ، فتمتد الكرش أمام الرجل بالقدر الذي يصبح عليه من الصعوبة بمكان أن يسوق ليهو كورولا أو حتى هونداي إكسنت ناهيك عن ركشة أو أمجاد. الحالة الشعورية: يعني لازم تكون في المود ، وهي حالة كما تفضلت وأبنت في معرض ردكم يتم جهجهتها بحاجات كتيرة ومسيخة أقلها الكديسه لمن تكركب في المطبخ محدثة ضوضاء تتمني معاها لو عندك صاروخ كروز بشرط أن يكون كاتم للصوت لتتخلص من جميع القطط والكدايس. الحالة العقلية: لا تعليق الحالة النفسية وهي حالة مهمة جداً خاصة إذا كان صاحبها على مشارف مرحلة أن تحاول أن تولع سجارة والسجارة الأولى لم تطفئها بعد. وقد رأيت أن هناك حالات كثيرة أهملها العلم ولم يتطرق لها عامداً متعمداً أو سهوا ، وفي الحالتين لابد من تبيانها للناس فهناك على سبيل المثال الحالة الكلبية والحالة القردية وسوف أعود لتناولها بالتفصيل إن كان لابد من ذلك. كمان يا أبو حراز يمكن للتيس أن يتحول إلى عنز والعنز أيضاً أن تتحول إلى تيس لذلك لابد من Breaking the ice وتثقيف الناس جنسياً حتى يعرف كل من طرفي العلاقة ما له وما عليه. === بالمناسبة يا أب حراز أفضل أنواع الدجل والشعوذة هو المعني بعلاقة الرجل بالمرأة من أيام عرق المحبة وفقيري أعزم لي وعمل ليها عمل أو عملت ليهو عمل لغاية المصافحة التي تخليك أباطك والنجم وطالما في تشفير أكيد في فك تشفير وفي تهكير كمان
04-13-2008, 07:28 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
أخي الملا ياخي مرات الحالة الجسمانية تكون تمام والحالة النفسية 100% والحالة القردية فعالة جداً بامكانك ان تنط وتقفز كما تريد لكن المشكلة تكون الحالة المادية صفر وهذه تؤثر سلباً على العلاقة يعني كل شيء يكون تمام وتكون جاهز لأداء سباق الخمسة آلاف متر والمائة متر حواجز فجأة تقول ليك { بكرة دق لي دهب } اها ياويلك لو قلت قروش ماعندي فجأة تقبل منك على الحيطة وتتكرفس اها تاني والله لامرحلة قردية ولاثعلبية ماتنفع انصح جميع الأزواج بان لايتناقشوا في اي موضوع الا بعد الانتهاء من سباق الضاحية لكن رغم ذلك أخي الملا فإن المراة السودانية عموماً هنية ورضية وترضى بالقليل ليس ذلك ضعفاً في سقف الطموح بل لأنها تربت على ذلك بس لو خلن { صرة } الوش ماعندهن اي مشكلة تاني !!!
04-11-2008, 01:11 PM
عصام الجيلي عصام الجيلي
تاريخ التسجيل: 04-07-2008
مجموع المشاركات: 579
ياجماعة الواحد يغيب شوية عن البورد يجي يفتش للتيس ومايلقاه الحكاية شنو كل واحد يقابلنا نسأله وين التيس ؟؟ واحد قال يمكن يكون مع الغنم في الزريبة قلنا ليهو تيسنا ماعنده اي موضوع مع الغنم نفتش ونفتش بعد صعوبة لقيناه في الصفحة الخامسة !!! حكتك يارب زمان تنزل ليك بوست يقعد في الصفحة الأولى خمسة يوم هسي ياكافي البلاء الا تدفر وتجيب ناس يدفروا معاك واذا مشيت شربت ليك جرعة موية تحلية الرماد كال حماد ياجماعة بعد كدا الواحد الا يربط بوستو بي حبل اها بعد لقينا تيسنا حا اعود للرد عليك ياعصام
04-15-2008, 07:22 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
البدوي دا لو جاء سألني أنا من العلاج كنت قلت ليه عن الطريقة الـ قاعدين نسويها نحنا في تيوسنا
عارف بنعمل شنو .. الطريقة ياخي أسهل مما تتوقع تقوم تجيب ليك حبل وتربط بيه التيس .
عارف تربطو وين ؟؟؟؟
أيوااا طيب كويس إنك عارف .
وكان شلت منك الهم الـ إنت شايلو دا
يا زول قبل كده سجيمان عندو حمارة ربطها بالليل الصباح مالقاها سأل منها قالوا ليهو مشت لي حمار العمده الربط انواع واشكال مرات واحد يقول ليك المشعوذ ربط الزوجين 00 حركات عجيبة جداً قابلني راعي اغنام يوم امس وقفت معه وسألته عن الموضوع وأكد لي ذلك بل قال ان البدو أحياناً يقومون باحضار الكلور طازج لإعطائه للإبل المتمردة
يازول انا { دقة } قديمة عارف كل شيء لكن ما بحب اشوت ضفاري !!! الزمن دا لو ما كنت تفتيحة بربطوك وتروح فيها !!! الحكاية لو بقت على التيس هينة
عندنا مدير مدرسة عمل عملية في غنماية ربط تيسك دا ولايساوي شيء معاه زولنا وجد الغنماية داخلة جوة البيت وتاكل في الدقيق مفروض ينهرها ويضربها لكن قام { قطع } أضنين الغنماية والله الغنماية دي شكلها اصبح كئيب جداً واصيبت كما يقال بانهيار عصبي وحتى في حلتنا كلها الناس بقوا يعرفوها { غنماية المدير غنماية المدير } لكن أجمل شيء الحرامية صاروا حذرين جدا من سرقتها لكن حكمة ربك بعد ثلاثة سنوات قاموا ليها الأضنين مرة تانية قلت ليها اها تاني أمشي { سفي } ليك دقيق مدير اها المرة دي لو عملتيها بيقطعوهن ليك مع راسك الماكن دا قال أكاد اجزم قال !!!
والله من أجمل وأظرف وأخف البوستات !!! أنا حأرشحه لي جائزة أفضل بوست
تعرف ذكرتني النكتة بتاعت عمك مريخابي كان عامل اتفاق مع زوجته إنو كل ما المريخ يغلب يحتفلو احتفالية خاصة ... المهم الدوري وقف والفترة طالت وقومي يالمرة أسمعي إنو المريخ غلب وهاك يا الدخان والذي منو .... صحبك جا داخل البيت لقى في كمين بتنصب وقام سأل المرة قال ليها إنشاء الله خير يا طير!! قالت ليه مش المريخ غلب أمبارح!!! قام هاج ليك فيها وقال ليها يا ولية هويييييييييي ده مريخ كوستي!! رأيك شنو في الغنماية ده!
يا زول في الخليج ده ياما حنشوف !!!
لك التحية
أمير
04-19-2008, 09:58 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
أخي أمير شكراً لك ولمساهمتك الجميلة وشكراً على الإعجاب بالبوست البسيط وهكذا حظي فإن كل المعجبين بكتاباتي من الرجال وهذا شيء مفرح ولكنه مؤلم
نكتك لطيفة وقد سألتني عن رأيي في الغنماية
والله بصراحة زولك ده غلب تيسنا 10/صفر !!!! اليوم آمنت بان ناس المريخ ايضاً راقدين رز وتشوف الواحد وهو بيشجع وبيهتف بالطول بالعرض مريخنا يهز الأرض تقول الزول ده يهز اليابس والأخضر لكن هو مهزوز 00 فكيف له باليابس والأخضر ؟؟
ذكرتني احد أعمامنا مدة صلاحيتو منتهية من جميع النواحي وساكن ولاحراك له منذ أكثر من سبعة أعوام وكل محركاته النفاثة والميكانيكية تعطلت الى حد ركبتيه وكذلك جميع بخاخاته قد اصابها الصدأ ولاتعمل منذ فترة طويلة ولكن لديه كبرياء وغطرسة في الفاضي يتطلع الى أشياء أكبر منه وكلما يكون بالتلفزيون ويشاهد مذيعة جميلة يقول { آآآآآآآآآآآآآآه } يتأوه كل اليوم ويوح وكأنه قد أكل شطة مخلوطة بالفلفل الأسود مرة زولك يعاين في هيفاء وهبي ويتنفس بعمق فقلت له ما رأيك لو وافقت بالزواج منك فقال لي : والله ياولدي دي أنا كلها ما بقدر عليها 00 بس كفاي اصبعها قلت ليهو ياسجم الأصبع حاتودي فين ؟؟ قال لي : ياخي مالك ومالي 00 ان شاء الله اعلقو في سقف البيت
قال مريخ كوستي قال !!!
04-19-2008, 03:16 PM
almulaomar almulaomar
تاريخ التسجيل: 07-08-2002
مجموع المشاركات: 6485
أب حراز صرة الوش دي ليست فقط في نساءنا بل في الجنسين نساء ورجال وصرة الرجال عادة ما تكون شينة شناة شديدة خاصة إذا كان الصاري قصد الراجل أصلع أو مشلخ أو شنبو نصر رباط. وصرة الوش دي ما دايره تجهجه الموضوع ده وإن كانت الصرة في حد ذاتها بحاجة إلى بوست ناصيه لأنها فعلاً موضوع يحتاج للنقاش والتباحث حوله. == عبد الله عبد القادر البعيو يغني الما عندو القرش ، الكورس وراهو يردد القيريييييييييش بي جره كده تقول سمك قرش ، وتاني يلعب ليك حواجبينو ويقول الما عندو القرش ، والكورس يعيد الجره البايخه تاني أها نفضل على الحال ده يجي لغاية ما يحن علينا البعيو ويقول: من البنات يتغبن تحرقو العبره ويتعوض دموعو الكبن يعني ما عندك قروش لملم كرامتك وزح بعيد ما يكشحوها ليك والكلام لي ست الودع. القروش يا أب حراز ما كل حاجة صحيح ده كلام مثالي وجميل لكين الحب براهو ما بيأكل عيش ، يعني لازم نساعدو بي جكه. المهم يا أب حراز تعطل الحرارة وطشاش الشبكة يلعب الغذاء والجو والحالة النفسية دور كبير فيهما عشان كده حتى لو صدرنا ليك مويه من النيل الأزرق أو نهر عطبره حا تحتاج تتعامل مع باقي الحاجات من فول علب لي بيض فقيه لي مرقة ماجي ورز بسمتك والجداد المكرفس بلا برد غير الأجواء الغائمة. أها والحال كذلك لابد أن تعمل كشف دوري يعني ما لغاية ما تقع بب وتتعطل كل اللغات وبعد داك تقوم تفتش في الدكاتره .
04-22-2008, 07:48 AM
almulaomar almulaomar
تاريخ التسجيل: 07-08-2002
مجموع المشاركات: 6485
أب حراز يا أخوي أتيتك من النت بخبر يقين عليك بالملوخية مفروكة كانت أم مفرومة بي رز ولا بي كسره إن شاء الله تشربها المهم خدره فقد أثبت علماء المركز القومي للبحوث بأم الدنيا أن "الملوخية" لها العديد من الفوائد الصحية، حيث تقوي القلب والنظر وتزيد الفحولة ، وأنت معني بالأخيرة فقرط على كده. لكين يا أب حراز المشكلة في أن البحر يفصل بينك وبين ست النفر لذلك تكون الخطورة إذا كنت بكامل أهليتك وأنت تعيش مع عزابه حياة كما فصلتها تتراوح بين قراية الجرايد ولعب الكوتشينه وغسيل العدة ونصيحتي لك أن تواصل في الشرب من مياه البحر حتى يبقي بينك وبين الإجازة مقدار شهرين كاملين وعندها ألحس الملوخية وأعمل منها أيس كريم كمان ، بس لو الإجازة إتلغت أو تأجلت شيل شيلتك. ودا كلام الدكتور بي ضبانتو تحتوي الملوخية على كميات عالية من فيتامين "أ" ومادة الكلوروفيل الخضراء مقارنة بالخضروات الأخرى كالخس والجرجير والسبانخ وتعمل تلك المادة وفيتامين "أ" على مقاومة التجلط بالدم وكعامل مؤكسد للشوارد الحرة الطليقة بالجسم، ومن شأن هذه السيولة التي تحدث بالدم بعد أكل الملوخية أن تزيد من معدل تدفق الدم بالاعضاء التناسلية. وهي نفس الطريقة التي تعتمد عليها التركيبات الكيماوية للأدوية المنشطة جنسياً، وفضلاً عن كل ذلك فإن الملوخية تزيد من إفراز هرمون الذكورة "تستستيرون" وهرمون الانوثة "بروجستيرون" اللذين تفرزهما الغدد الجنسية، ومن شأن ذلك أن يؤدي الى زيادة الرغبة الجنسية لدى الرجال والنساء أيضا، ولذلك تعد الملوخية منشطا جنسيا قويا وتغني عن الحاجة الى اللجوء للمنشطات الجنسية لعلاج الضعف او البرود الجنسي. وبرضو تقول لي ما بيأكل الملاح أخدر
04-22-2008, 09:23 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
بالله الملوخية تعمل العمائل دي كلها الآن عرفت لماذا يقومون بتنشيفها في الجزيرة يعني شوية كده الناس ديل كان عملوها اقراص على طريقة الفياجرا ان شاء الله يسموها {ملاخيا } وبيني وبينك لا أحب الملوخية المفروكة حتى في واحدة في بروفايل { الشايقي } لمن اشوفها يومين ماقاعد آآآآآآآكل لكن شوف ليك قلة ادب { بحب الملوخية المفرومة } الأولى فيها شوية عوارة يعني قدر ماتحاول تلاويها مابتدخل خشمك باخوي وأخوك وكالعادة لازم تسيل يمين وشمال زي الشعاب والأدوية بتاعت الجماعة اياهم في النشرة الجوية
والله من يوم بوست التيس ده نزل مانمنا من الاتصالات والوصفات واحد قبل ايام قال عليك ب { الدوم } مشنا جدة الكرنتينة نفتش يومين يادوبك لقينا دومتين عليك أمان الله زي الحجر الا جبنا لينا فرار اها العزابة ماصدقوا كل واحد خمش ليهو خمشة من الدوم وانتظرنا النتيجة لكن عليه العوض ومنه العوض والله مافي تغيير الا في الخشم كمان { لم } فينا فلاتي قبل اسبوع قال عليك ب { ابو الرقيع } الخفاش تقبضوا أول شيء بالليل وتجي تسلقوا في موية وبعدين تنشفو وتطحنو وتضيف عليه قال زيت زيتون وخل وتشرب كل يوم عصير ابورقيع المركز هسي قلنا نتصل على أخونا الدكتور محمد عبد الله الريح ونسألو هل المصيبة ده سام أم غير سام وعلى ضوء النتيجة نتخذ التدابير اللازمة اما في المدينة التي نعيش فيها فقد اختفت قوارير المياه الكبيرة المسماة { العين } فمنذ انزال البوست ترك الكثير من العزابة مياه التحلية العادية أمس والله انا شايل القارورة القديمة ومشيت اكثر من 20 سوبر ماركت عليك أمان الله ولا { قطرة } مافي
04-22-2008, 11:28 AM
almulaomar almulaomar
تاريخ التسجيل: 07-08-2002
مجموع المشاركات: 6485
أب حراز يا أخوي أقول ليك ملوخية تقول لي أبو الرقيع ، هو أبو الرقيع دا لو بتقدر تقبضو ما تلعب حارس مرمي وتبطل الإغتراب ، وإنت عارف ماهية القون عندنا أكبر من ماهية محلل النظم عندكم ، لا تقول لي آي تي ولا أى إتش ولا سيستم أناليزيس ولا سيستم داون دي كورة وفي ناس مهووسه بيها الواحد تلقاهو مصنقر من الساعة واحده الضهر ما عندو غير جرائد وكيسين تمباك وتسالي وقصب وبعضهم بيكون شايل راديو عشان يسمع الكورة طيب إنت خاشي فيلم كابوي ما هي قدامك دايره ليها إذاعه كمان. المهم أنسي أبو الرقيع ده لأنو حتي لو ما كان سام شكلو بشع وبيساهر بيك وصعب برضو إنك تقبضو ==== قلت لي قوارير مفردها قارورة ، وفي بعض أمصاركم قرشه ، يعني بتاع القزاز عندنا يعتزل ، لا لمن تكون كبيرة ممكن يقول الجركان أو الجركانات والباقات (باقات الزهور) لكين يقول القارورة المعاهو قوارير ولا قارورات على وزن جركانات.
04-23-2008, 07:19 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
أخي الملا والله حكاية حارس مرمى دي شيء جميل ورائع يا أخي والله نحن ضيعنا زمنا في الاغتراب قبل فترة حارس مرمى نادي شهير اتسرق من سيارتو 175 مليون جنيه معناها في البنك في 200 مليون وفي البيت قدرها مرتين ياحليل زمن الكورة كنت لاعب كورة ممتاز واتكسرت اليد اليمنى وأكلنا حمام ودجاج ماكان ليتوفر لنا لولا هذه اليدالمكسورة وبعد ذلك واصلنا اللعب لكن حينما تكون من أهل العوض وأهل بلة فليس من السهولة الوصول للأستاد واللعب امام الجماهير يا اخي شغلانيات كثيرة أهم من مليون شهادة والله اعرف واحد شغال بشوي لحمة بس وهو ما بيشتريها لكن بيعملها على طريقة سوق الناقة وتعرف الزبائن منو ؟؟؟؟ عساكر { الكشة } والسماسرة والله نحن نمر عندهم الواحد كأنه حالبين ليهو ليمونة في خشمو بس تفتح الخشم وتقفلو وتتحسر على ايامك وقرايتك الفاضية مرة واحد من الأنصار قال لينا لو دخلتو حزب الأمة كلكم بنعطيكم أراضي في الخرطوم يازول انا بعد اشتريت الجلابية أم { 8 } جيوب تاني رجعتها للترزي لإعادة صياغتها هسي لو دخلنا لينا حزب او نادي كانت حياتنا كلها اتغيرت يعني على الأقل لو ماعندك اي شيء بس تقول { الله أكبر } في اليوم خمس مرات وبالتالي يمكن تكون زول جنة وفي كل الأحول انت ماخسران أكثر سؤال يؤرقني مع ست النفر الى متى تنصلح حالنا والواحد يضمن أكل عياله وينفشخ في واطاة الله دي 00 كثيراً ما اتوقع أن يأتيني الخرف المبكر وفي هذه الحالة الله يستر لأن خرف المغتربين يقال أنه صعب جداً وكل مغترب رجع البلد واصابه الخرف اصبح يقابض يمين وشمال والله عندنا واحد ماخلى ولاكيس حايم في الأرض باقي ليك نحن حانكون أحسن منو وللا أحسن منو
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ابوحراز
زول ساكت
عمران حسن صالح
بشير أحمد
Waeil Elsayid Awad
ابو جهينة
محمد مختار جعفر
هاشم أحمد خلف الله
هيع انا ابوك يا أحمد.
المسافر
Ashraf El Bagir
ترهاقا
هاشم نوريت
علوبه
محمد الأمين موسى
عصام الجيلي
فيس بوك
تويتر
انستقرام
يوتيوب
بنتيريست