|
ذكريات مدينة.........بروكسل.... بلجيكا
|
أنشر هذه الخواطر القديمة...مرة اخري بعد أن بدأت في نشرها من قبل وشاركتني في البوست الاستاذة مني خوجلي ولم يتم نقل البوست الي الربع الجديد من العام....
أعيد نشر اجزاء منها بناء علي طلب بعض الاصدقاء من بلجيكا لنشرها هنا لما يحتوي علي ذكريات جميلة...وايضا تختلط فيه بعض الحقائق مع بعض متطلبات السرد
تحية لكل الاخوة الذين شاركوا في البوست السابق وهذه دعوة اخري لهم للمشاركة هنا
وايضا تحية وفاء لكل الاحباء السودانيين ببلجيكا
|
|
|
|
|
|
|
|
Re: ذكريات مدينة.........بروكسل.... بلجيكا (Re: yasir Abdelgadir)
|
اخيرا وصلت لمبني السكن...كان مبني يتكون من ثلاث بنايات متشابهة في كل شيئ ..بارتفاع احد عشر طابق لكل بنايه....لدي مفتاح واحد...يفتح كل شيئ..بدءا من الباب الخارجي ..والباب الزجاجي الذي يؤدي للبهو الداخلي...وجدت الكونسرج هناك كان رجلا هذه المره...وكان لطيفا وشهما في نفس الوقت... فقد ساعدني في حمل اثقالي حتي الباب..وكان المقر بالدور الثاني...فتحت الباب...لم تكن بالغرفه ذات الاربعه جدران وسرير ... ..ولا هي بالشقه...تتكون الوحده السكنيه من استقبال به مايشبه المطبخ علي ركن ..ثم طاولة طعام بها ثلاث كراسي{ لا اعلم لماذا ثلاث وليس اربع او اثنان}...ثم جلوس خفيف كنبه صغيره وكرسي مفرد.. امامه طاوله صغيره ...هناك جدار خشبي....علي شكل فاصل ولاينتهي بباب بل يمكنك الدخول الي غرفة النوم علي طول....{دون احم او دستور}...بها سرير لاهو بالكبير ولا بالصغير...اعتقد مخصص لشخص واحد ....ولكن يمكن ان يشيل اتنين {لو النفوس اتطايبت}....توجد طاولة مكتب عليها لمبة قراءه..او اباجوره ...ودولاب الملابس علي الحائط...ثم باب صغير فتحته علي الفور وجدت حماما صغيرا ولكنه نظيف وجميل... لاادري هل شكرت الكونسرج ساعتها ام لا وهل قفل الباب ام تركه مفتوحا...ارتميت علي السرير بكامل ملابسي وحذائي ايضا ...ولم ادر بشيئ بعدها.......
اواصل لاحقا
| |
|
|
|
|
|
|
Re: ذكريات مدينة.........بروكسل.... بلجيكا (Re: yasir Abdelgadir)
|
فتحت عيني ثم اغمضتها ثم فتحتها مرة اخري.....المكان مظلم جدا ولكنه غير مألوف لدي....بدأت اتذكر شيئا فشيئا......ااااااه لقد اطفأ ذلك الكونسيرج الظريف النور....ربما شعر فعلا انني بحاجة للراحة والهدوء....انظر كيف يحترم هؤلاء الناس ادمية الاخرين...حتي ابسط عامل يعرف كيف يعامل الاخرين......من الافضل ان لا اقارن بيننا وبينهم حتي لا اصاب بالاكتئاب....حسنا ولكن اين مفتاح الاضاءة......الله....دي ورطة جديدة...لابد انه بجانب الباب الرئيسي...ولكن اين الباب الرئيسي نفسه...
ظلام ....في ظلام..... في ظلام......
نهضت قليلا ...وحاولت ان ا تلمس طريقي في بطء ...ولكن لافائدة......حاولت ان المس الحائط عسي ولعل ان يكون هناك مفتاح للنور بجانب الحائط كالعادة...خبطة ..خبطتان ...ثلاثة...لافائدة
عندما كنت في مدرسة المزاد الابتدائية ...دعونا ذات يوم للانضمام لفرقة الكشافة بالمدرسة....ذهبت وحضرت يوما واحدا ثم هربت...في ذاك اليوم كان اول درس هو ان الكشاف يجب ان يحمل معه دائما حبلا وكشافة صغيرة تعمل بالبطارية وكنا نسميها البطارية.....انا قلت الناس ديل مجانين ولا شنو...هي كلها العندنا بطارية واحدة وبشيلها ابوي دائما لانو النور بيقطع عندنا كتير... خاصة لما يكون في مطر...او ظهرت عقرب ...اقوم اشيلها انا منو واحيرو...حقو انسي الجماعة ديل.....وفارقتهم فراق الطريفي لي جملو..
الان ادركت اهمية ان يحمل الكشاف كشافة صغيرة.......
طيب والحل شنو الان
فجأة اتي الفرج........
احتاج لدخول الحمام...نعم اتذكر اخر مرة دخلت فيها الحمام كانت في الطائرة...واتذكر جيدا الحمام الجميل الملحق بغرفة النوم...نهضت وفتحته علي الفور..لم اجد عناء في البحث عن الاضاءة فكانت هناك لمبة فنية صغيرة ملحقة بمرأة حلاقة الذقن...سحبت حبلا انيقا صغيرا فأضات اللمبة علي الفور وارسلت ضوءا فسفوريا بديعا...هؤلاء الناس يهتمون بكل شيئ.
انا الان جائع جدا......واحشائي تتلوي...الدنيا برد...واخر وجبة ايضا كانت بالطائرة...قبل اكتر من كم ساعة...علي فكرة كم الساعة الان.....نظرت الي معصمي....الساعة تشير الي الثانية....ولكن صباحا ام مساء...وبتوقيتنا ولا توقيتهم...علي العموم نسيت موضوع الساعة ...وفتحت باب الحمام وعلي ضوء المراة الصغير بدت لي الشقة او الوحدة السكنية ...ونظرت الي باب الخروج ...تأكدت اولا من المفتاح...ثم فتحت الباب...فاجأتني اضاءة الممر القوية جدا.....كيف يكون هذا وبالداخل لايوجد خيط واحد من الضوء...تذكرت حينها داخلية حسيب.. وانه حينما كنا نريد ان ننام كنا نحضر كل الملاءات عندنا لنقفل بها ثقوب النوافذ حتي يختفي بعض الضوء وتظلم الغرفة قليلا لنتمكن من النوم....سبحان الله
| |
|
|
|
|
|
|
Re: ذكريات مدينة.........بروكسل.... بلجيكا (Re: yasir Abdelgadir)
|
عند دخولي من الباب الرئيسي ...لاحظت ان هناك لوبي كبير ناحية اليسار...وكنت اسمع صوت كرة مضرب بصورة متتالية جميلة واحدة قريبة واخري بعيدة...ادركت علي الفور ان هناك من يلعب تنس الطاولة...ولكن الان لااسمع الصوت...لابد ان كل من هناك غائط في النوم....نزلت الي الدور الارضي وانا احاول حفظ طريقي جيدا ...حتي لا اضيع من شقتي..خاصة وانا لا اعرف اين توجد غرفة الكونسيرج فقد التقيته عند المدخل.....
وصلت اخيرا الي اللوبي...كبير وبه مقاعد وثيرة ومتناثرة...اماكن للعب تنس الطاولة..وهناك ايضا طاولة بلياردو...وعلي الركن مايشبه البوفية مكتوب عليه : Snack & Bar,
ولكنه مغلق......توجد ماكينة كهربائية للاغذية المعلبة واخري للمشروبات...اقتربت منهما وجدت في احداها مالذ وطاب من الشيكولاتات والبسكويتات ...ولكن ياحسرة...تعمل فقط بالعملة المعدنية وكل مامعي ورق....حتي اذكر انه عندما اوصلني ليموزين المطار كان العداد يشير الي تسعمائة فرنك...ونقدته ورقة من فئة الالف فرنك ورفضت ان اخذ الباقي ...فنجرية كدا...كان يمكن ان يكون الباقي عملة معدنية من فئة المائة فرنك.ولكن الان لاينفع الندم....
لم اضيع الوقت وتوجهت صوب الباب الخارجي...وقفت قليلا عند المدخل...اذا بأثنين طالب وطالبة يتوجهان نحو السكن وهما في حالة رومانسية كاملة....عفوا اخوتي...لست من هواة العكننة...لكني فعلا احتاج لمساعدتكم فأعذروني...اجابتني البنت بأبتسامة : تفضل...سألتها اذا يوجد مطعم قريب من هنا...اجابتني بكل ود...للاسف اليوم الاحد وكل المطاعم القريبة مغلقة...ولكن يمكنك ان تذهب الي الداون تاون مازالت الساعة الحادية عشر والمطاعم هناك تغلق في تمام الثانية عشر...وسألتها تفضلا ..كيف اصل الداون تاون فأجابتني : بانه يمكنني اخذ البص من الشارع خلف المبني مباشرة..فشكرتها بصدق وأسرعت هي لتلحق بصديقها الذي تقدم قليلا دون غيرة...وواصلا ما انقطع من حبل الغرام....
ممتاز...الان لدي معلومتين هامتين...الساعة الان الحادية عشر ..لم اكذب ساعتي التي اشارت الي الثانية ولكنها معذورة فهي لم تصل بعد لمرحلة الحضارة...لم اعدلها وتركتها وشأنها....
ذهبت للشارع الخلفي ...ووجدت يافطة مكتوب عليها
بص...وحمدت الله ان كلمة بص بكل اللغات واحد ....دقائق وحضر البص...وقف امامي بالضبط.....وفتح الباب..استقبلني السائق بأبتسامة وقال: ..بونسوار مسيو... ياسلام بداية جميلة.....ركبت وجلست....قريب من السايق....وفي المحطة الاخري ركبت امرأة ...ويبدو من سحنتها انها عربية مغاربية...ركبت وقالت سلامو عليكو...ورد السائق وعليكم السلام....الله ؟؟.احنا وين ياجماعة.....؟؟؟
واصلوا الحديث ولكن لم افهم اي شيئ منه...هل هذه لغة الطير التي يقولونها؟
وقفت وتوجهت نحو السايق وقلت له ..بالعربية: اريد ان انزل قرب اقرب مطعم....تغير وجه السائق ويبدو انه فهمني....وبعد ثواني اوقف البص وفتح الباب واشار الي بالنزول.....
شنو ياعمك...انت زعلت يادكتور ؟؟؟؟ياخي انا عايز مطعم ...واشرت له بأيدي علامة اكل...
اشار لي بالنزول واشار للجانب الاخر من الطريق...وقال لي:
نو مسيو...با اي سي....لا بوس لا با...اوبوزيت دريكسيون...
شنو ياحبني...هسي ماكنت بتتكلم عربي..... المهم نزلت وسمعته وهو يرددد....لا بورس...لا بورس...لابوس نوميرو نوانانت سانك ..مسيو
نزلت وقطعت الشارع وما هي الا دقائق وحضر بص اخر مكتوب عليه رقم خمسة وتسعون ..ومكتوب بالفرنسي ...لابورس
فهمت ما كان يقصده السائق المغربي...يعني انا ركبت في الاتجاه الخطأ.......معلومة مفيدة...وفي التايم برضو....مكسب
| |
|
|
|
|
|
|
Re: ذكريات مدينة.........بروكسل.... بلجيكا (Re: yasir Abdelgadir)
|
استمتعت جدا بالطريق وانا داخل البص ....في الطريق للسنتر..حتي وصلت للداون تاون وهي اخر محطة في البص...واسم المحطة لا بورس او البورصة ..وفعلا يوجد عند المحطة مبني ضخم وهو عبارة عن اقدم سوق نقد في اوربا.....ماعلينا ...نفتش الان المطاعم...بل الكافتيريات او البوفيهات الصغيرة وانا اعلم تماما بأن بلجيكا بها افخر المطاعم في اوربا ويقصدها فقط المليونيرات...كما علمت قبل مجيئ فقط بأن تلك المطاعم والاماكن الفاخرة توجد في مركز المدينة وبالتحديد في منطقة القراند بلاس
Grand balace
والتي من المؤكد انها علي مرمي حجر مني.....وانا في نفس الطريق الذي نزلت من البص بعد حوالي مائة متر ...شاهدت مطعما صغيرا وجميلا....زجاجه مغلق ومن خلف الزجاج تبدو شاورما جميلة وبجوارها ماكينة قلي بطاطس...هذا تماما ما احتاجه...توجهت نحو الباب الزجاجي...حاولت فتحه فأذا هو مغلق...مرة تانيه ...مغلق...وفي هذه اللحظات اتت نادلة جميلة من الداخل وفتحت فتحة زجاج صغيرة من الباب :
بونسوار مسيو..باردون...سي فيرمير..الي دوزير....ادوما
ادوما شنو...وفيرمير ليييه..ماهو الخير موجود ...وبعدين دا حاتودوهو وين تخللوهو ولا شنو....نظرت الي الساعة وجدتها الثالثة وخمس دقائق بتوقيتنا ...يعني البنية ديك كلامها صاح ..المطاعم دي بتقفل في تمام الثانية عشر....دي برضو من مساوئ الحضارة...حليل ادم بتاع البوفية في داخلية حسيب والرازي...ذلك الكردفاني الطيب.. بعد مانكمل المذاكرة في الكلية نجي الساعة اتنين صباحا نصحيهو عشان نشتري منو زبادي وبسكويت ...ويفتح هو البوفيه بنصف عين مفتوحة واخري مغمضة عشان يلحق ينوم...لانو حايجو يصحوهو بعد شوية كمان ناس النذير انصار السنة لانو بيحبو يشربوا الشا ي باللبن قبل صلاة الصبح...
مافي فائدة قلت اخير اتفسح شوية...سألت اول واحد لاقاني...لا قراند بلاس سلفو بليه...والراجل ماقصر وداني لحدي عندو...حاجة رهيبة...ونسيت كل حاجة...مش الاكل بس يامني.....شيئ رهيب...وقفت زي نص ساعة..وقلت احسن ارجع يمكن البصات ديل يقيفوا ولا حاجة وعندي رجعة بي رواقة للقران بلاس {وكان لدي موعد ثابت كل يوم احد احضر فيه للقراند بلاس واستمتع وايضا كل تمر بي نكبة احضر واتأمل فيه وفي بديع صنعه}...فعلا رجعت محلي القبيل ..وحافظ نمرة البص...خمسة وتسعين...لقيت البص واقف...ركبت مافي غيري انا واتنين افارقة راكبين ورا...اصلوفي كل مدن العالم مافي غير الافارقة بيحموموا زي الدبايب في وقت زي دا ...
ركبت وعيني علي الشارع....بتذكر في بناياتنا ديك ..واول ماظهرن طوالي دقيت الجرس...وصاحبك التقول عارفني ...وقف طوالي...نزلت وتوجهت علي السكن.....
ربك رب الخير اول مادخلت السكن ظهر صديقنا الكونسيرج...ياسلااام انا مبسوط منو ...حييتو ووقفت معاهو شوية ...وانا ماشي سألني اذا احتاج اي خدمة....قلت ليهو بس عايز عملات معدنية عشان اطلع بيها شوية سناك من الماكينة...فأشار لي بأن اتبعه...حتي وصل الي اللوبي...وتوجه من هناك الي حمام اللوبي.....ناحية حمام الرجال ..قبل ان يدفع الباب سألني الورقة التي معك من فئة كم...اجبت خمسمائة فرنك بلجيكي..وانا محتار ...الزول دا عايز يعمل شنو في الحمام..دخل واشار الي بالدخول...اذا في ركن من الحمام توجد ماكينة يوجد بداخلها انواع من الواقي الذكري { او الكوندوم كما يقول اخونا هشام هباني }.....عمك ادخل الورقة فدخلت من فتحة صغيرة وداس علي احد المفاتيح ..فنزل صندوق صغير اعتقد ان به واق ذكري واحد...وطلع الباقي كلو عملات معدنية...ناولني العملات ثم الصندوق الصغير: وماذا افعل بهذا ياعمك؟؟.....قال لي خذه ربما تحتاج اليه....جزاك الله خير انا مابحتاج ليهو.....عندها نظر الي وبغمزة عين قال لي خذه للذكري اذن...ومازلت احتفظ به حتي الان كذكري
ذهبت للماكينة واقتنيت مالذ وطاب من بسكويت لو الفاخر وقطعتين من شيكولاتة جوديفا البلجيكية الساحرة وفوقهم علبة فانتا برتقال واحتضنت كنزي الثمين والي غرفتي عديل
| |
|
|
|
|
|
|
Re: ذكريات مدينة.........بروكسل.... بلجيكا (Re: yasir Abdelgadir)
|
الساعة الثامنة والربع صباحا كنت امام مكتب فيكي..وظننت انني حضرت مبكرا بعض الشيئ...ولكنني وجدت فيكي قد حضرت وتنجز في اعمالها ...يوجد زرار عند الباب يجب ان تضغطه لتعلم من بالداخل عن حضورك وانتظارك بالخارج....لم تمض خمس دقائق حتي حضرت الي فيكي بالخارج لتستقبلني بأبتسامة واسعة وتدعوني لدخول المكتب....من الصورة التي رسمتها في ذاكرتي لها بأني توقعت ان تكون سيدة في اوائل الخمسينات من العمر بحسب صوتها ونبرتها الواثقة في التلفون والتي تشوبها بعض الخشونة الذكورية...ولكني وجدتها انسة لم تبلغ الثلاثين وغاية في الرشاقة وذات حضور مقبول جدا...اما عن النبرة في الصوت فلاحظت لاحقا ان هذا من طبيعة المرأة في بلجيكا و المانيا عموما ..لان النساء هنا عمليات جدا ولايلجأن لتغيير الصوت او ادعاء الغنج في غير موضعه...خاصة وان الجمال هنا طبيعي جدا بدون اي رتوش او الوان... اعتذرت لي بشدة بعد ان اخبرتها عن مأسي الامس ...واخبرتها بأنه لاداعي للاعتذار وأن الموضوع عادي ..لكنها اخبرتني بأن ذلك من صميم عملها الذي تأخذ اجرا عليه بأن تستقبل طلاب الدراسات العليا الاجانب من والي المطار وان توفر لهم كل اسباب الراحة وان تحل مشاكلهم حتي يتفرغوا للبحث العلمي....ومكافأة لي ..اوتكفير منها عرضت علي ان تعزمني علي الغداء في مطعم صيني فاخر....ولم استطع رد الدعوة لان تعاليمنا الاسلامية تامرنا بأجابة الدعوة { ماتقوم تجيني تراجي ناطة بي هنا وهجو بي هناك ويقوموا يسحبوا البوست زي ماسحبوا الفات} رافقتني فيكي حيث سجلت للدراسات العليا في مجمع الطب والذي يوجد علي الطرف الاخر من المدينة...واخبرتني بانه يجب علي ان انتقل لسكن الجامعة في المجمع الطبي..لكنني رفضت ان انتقل من شقتي لانها عاجباني جدا....واشارت لبعد المسافة بين سنتر الجامعة والمجمع لطبي..حيث انني سأحتاج الي تلاتة انواع من المواصلات....بص الي بورت دي نامور...والمترو رقم اتنين الي سيمونيز ثم الترام رقم حداشر او البص رقم اربعةعشر الي المستشفي ومجمع الطب...قلت ليها مامشكلة..عادي..متعود علي البهدلة..وهي لو عرفت الحاصل في السودان كانت سحبت كلامها كلو....تذكرت في هذه اللحظة زميلي عادل حسن وكيف كان بيجي من الثورة الحارة واحد وعشرين ويركب شماعة لحدي كلية الطب في شارع القصر.. وبرضو بيحصل المحاضرة الاولي الساعة سبعة صباحا.....
قالت لي : از يو لايك
ولكني شعرت بصدق كلام البنية وعضيت بنان الندم لمن جاء الشتاء الجد جد ...ونزل الصقيع...امانة ما وقع راجل...لكن ...الصقر ان وقع كتر البتابت عيب وان وقع القدر مابينفع الجقليب
قبل ما احكي ليكم سوينا شنو في المطعم الصيني ....
لا اعرف اي شيئ عن الصينيين..ولا عن اكلهم...كل مااعرفه انهم حضروا للسودان لتشييد الكباري وقاعة الصداقة....وماعرفته لاحقا انهم يحبون اكل الكلاب حبا جما ...ومايحلون بمكان الا وتنعدم الكلاب فيه { تأكدت من ذلك لاحقا حيث لايوجد كلاب في حي سوهو معقل الصينيين في لندن ولا في الحي الصيني في وسط واشنطون حيث لم اجد كلبا واحدا اثناء تجوالي المستمر....ونما الي علمي كذلك انهم يحبون الشوربة المصنوعة من عيون الكلاب ....
استقبلنا نادل المطعم الصيني بأنحناءة ..حتي كاد رأسه ان يلامس ركبتيه...وصاحبنا حتي الطاولة التي حجزتها فيكي مسبقا....مطعم مرتب وراق جدا..من فئة الخمس نجوم..ولفت نظري طريقة وضع المناديل والكاسات الفريدة..وتوجد روزة حمراء جديدة في اناء كأسي جميل لكل واحد....جلست وانا صامت وفي ترقب...احضر النادل المينو او قائمة الطعام...كانت ككل شيئ في بلجيكا مكتوبة باللغتين الهولندية والفرنسية...انا لم اتعلم بعد الهولندية {اتقنتها فيما بعد غصبا عني} والفرنسي بتاعي حق علب صلصة تعلمته عندما كنت اذهب يوم الخميس للمركز الثقافي الفرنسي القريب من كلية الطب لاحضرالافلام الفرنسية ملح. تأملت قائمة الطعام وتوقعت ان تكون:
كلاب مشوية كلاب مقلية جرو علي الفحم وربما كلاب مندي ايضا من يعرف
ماذ تريد منير: قادر ..قالت فيكي كما تعودت فيما بعد ان تناديني كذلك
قلت لها لااعرف لا الفرنسية ولا الهولندية لذا عليكي ان تختاري لي...وذكرت لي بأنها تحب المأكولات البحرية...ايوا بس دي ...انا ذاتو عايز دي ان شاء الله ابوجلمبو ذاااتو.. بس بالله ابعدينا عن الكلاب..
طلبت بعض الطلبات من القائمة.. وانتظرنا قليلا نتبادل احاديث ودية حضر العامل واحضر اتنين شوربة..اول حاجة عملتها...قلبت الشوربة فوق تحت بالملعقة يمكن القي عين ولا حاجة ..لكن ربك ستر وطلعت شوربة نباتية بعد ان ظهرت بعض حبات المشروم
| |
|
|
|
|
|
|
Re: ذكريات مدينة.........بروكسل.... بلجيكا (Re: yasir Abdelgadir)
|
صديقي علي الخير
Quote: عدت امس من النادى السودانى فى بروكسل بعد ان قضينا امسية السبت التى كنت تشاركنا امساتها عندما كنت بين ظهرانينا.. ( نافذة السودان ) او قهوة كاريبو كما يسميها البعض |
نافذة السودان..او النادي السوداني...او قهوة كاريبو ببروكسل لها نصيب وافر من الذكريات منذ نشأتها الاولي...سأعود لها بمزيد من التفصيل
| |
|
|
|
|
|
|
Re: ذكريات مدينة.........بروكسل.... بلجيكا (Re: yasir Abdelgadir)
|
ياسر عبدالقادر سلامات
وينك يادكتور والله ليك وحشة
بروكسل مدينة فى الخاطر ..... اجمل ايام كانت بينكم ....
حاج احمد .....الصادق شيخ الدين ...براكة ....عم عبدالرحيم .... خالتى محاسن
خالتى بتول وعم على ....وحسام يوسف .....
ناس جميليين ما حسينا معاهم بالغربة
لكم التحية والاحترام
وينكم
لى عودة
| |
|
|
|
|
|
|
Re: ذكريات مدينة.........بروكسل.... بلجيكا (Re: مريم عزالدين صديق)
|
مدينة بروكسل .... جامعة بروكسل الحرة
اول مرة اسافر لوحدى ... من غير الاسرة ..بعد التخرج مباشرة .. التحقت بالعمل فى مستشفى الزرة قى فسم الفيزياء الطبية ( قسم العلاج بالاشعة والطب النووى والوقاية من الاشعاع ) ومع التطور العلمى ولانه مجالنا دى حساس شديد ومافيه خبرات كافيه فى عالمنا الثالث ..ناس العالم الاول بدونا منح بتاعت تدريب عندهم ... وكنت من المحظوظين بمنحة تدريب لمدة اربعة شهور ونصف فى جامعة بروكسل الحرة...الVUB ..
كان المفترض ان اسافر يوم 9/9 الكورس حيبدا يوم 13/9 ، ولانى خايفة من المجهول اجلت السفر ليوم 11/9 ... سافرت عن طريق فرانكفورت ... وجيت بروكسل وكانت وكانت احداث 11 سبتمبر ليها سنتين ولسه فى تشدد فى المطارات ..
وصلت بروكسل والمفترض انه المنسق يكون فى انتظارنا انا وزميلى عمر احمد الان هو فى السويد ...له التحية ... ولاننا عدلنا زمن الرحلة لوحدنا المنسق ما انتظرنا فى المطار ...اها نعمل شنو ياخوانا .....
عندنا الخريطة ورقم البص ... تعالوا شوفوا العناء ....تعب شديد ...ارهاق ...جوع ... اللغة مشكلة ياخوانا مافى حد بيتكلم انجليزى .....
لقينا البص ... وصلنا باب الجامعة الساعة 5 مساء ونحن فى المطار من الساعة 11 صباحا ... ومسافرين من اول امس ....
قابلنا المنسق ... سجلنا فى عند مسئولة شئون الطلاب ... مشينا السكن ...كانت الساعة السادسة واربعين دقيقة ....وعند الساعة 7 المفروض نكون فى بفية الزملاء من دول العالم الثالث فى عشاء الافتتاح ....
لقاء جميل وومتع رغم التعي والعناء ....
تعالوا شوفوا بعد اسبوع واحد بقيت سنير فى بلجيكا
قابلت السودانيين الطيييبن
قضيت بينهم عيد الفطر المبارك
حفلة انور ( عقد الجلاد)
زكريات كثيرة وجميلة
لى عودة
| |
|
|
|
|
|
|
Re: ذكريات مدينة.........بروكسل.... بلجيكا (Re: مريم عزالدين صديق)
|
مريم عزالدين صديق
كيفك...وليك وحشة
أخبارك شنو؟؟؟؟؟
Quote: اول مرة اسافر لوحدى ... من غير الاسرة ..بعد التخرج مباشرة .. التحقت بالعمل فى مستشفى الزرة قى فسم الفيزياء الطبية ( قسم العلاج بالاشعة والطب النووى والوقاية من الاشعاع ) ومع التطور العلمى ولانه مجالنا دى حساس شديد ومافيه خبرات كافيه فى عالمنا الثالث ..ناس العالم الاول بدونا منح بتاعت تدريب عندهم ... وكنت من المحظوظين بمنحة تدريب لمدة اربعة شهور ونصف فى جامعة بروكسل الحرة...الVUB ..
كان المفترض ان اسافر يوم 9/9 الكورس حيبدا يوم 13/9 ، ولانى خايفة من المجهول اجلت السفر ليوم 11/9 ... سافرت عن طريق فرانكفورت ... وجيت بروكسل وكانت وكانت احداث 11 سبتمبر ليها سنتين ولسه فى تشدد فى المطارات ..
وصلت بروكسل والمفترض انه المنسق يكون فى انتظارنا انا وزميلى عمر احمد الان هو فى السويد ...له التحية ... ولاننا عدلنا زمن الرحلة لوحدنا المنسق ما انتظرنا فى المطار ...اها نعمل شنو ياخوانا .....
عندنا الخريطة ورقم البص ... تعالوا شوفوا العناء ....تعب شديد ...ارهاق ...جوع ... اللغة مشكلة ياخوانا مافى حد بيتكلم انجليزى .....
لقينا البص ... وصلنا باب الجامعة الساعة 5 مساء ونحن فى المطار من الساعة 11 صباحا ... ومسافرين من اول امس ....
قابلنا المنسق ... سجلنا فى عند مسئولة شئون الطلاب ... مشينا السكن ...كانت الساعة السادسة واربعين دقيقة ....وعند الساعة 7 المفروض نكون فى بفية الزملاء من دول العالم الثالث فى عشاء الافتتاح ....
لقاء جميل وومتع رغم التعي والعناء ....
تعالوا شوفوا بعد اسبوع واحد بقيت سنير فى بلجيكا
قابلت السودانيين الطيييبن
قضيت بينهم عيد الفطر المبارك
حفلة انور ( عقد الجلاد) |
| |
|
|
|
|
|
|
Re: ذكريات مدينة.........بروكسل.... بلجيكا (Re: مريم عزالدين صديق)
|
الاخت مريم
Quote: ياسر عبدالقادر سلامات
وينك يادكتور والله ليك وحشة
بروكسل مدينة فى الخاطر ..... اجمل ايام كانت بينكم ....
حاج احمد .....الصادق شيخ الدين ...براكة ....عم عبدالرحيم .... خالتى محاسن
خالتى بتول وعم على ....وحسام يوسف .....
ناس جميليين ما حسينا معاهم بالغربة |
شكرا ليك وبرغم الفترة القصيرة التي قضيتيها معنا الا اننا احسسنا باننا بنعرفك من زمانودا لاريحيتك وروحك الحلوة وكذلك ايضا كل القروب الجاء معاكم
تحياتي لهم فردا فردا
| |
|
|
|
|
|
|
Re: ذكريات مدينة.........بروكسل.... بلجيكا (Re: yasir Abdelgadir)
|
صديقي علي الخير
Quote: وارجو ان تسمح لى اخى الغالى ياسر ان انقل ما كتبت بقلمك الانيق هذه الذكريات الى لوحة النادى السودانى وربما يشاركك الذكريات بعض من رواده وارجو ان تسمح لى بان اتوقف هنا على امل الكتابة اليك لاحقا لان الليل كاد ان يولج فى النهار .. وللحديث بقية وللذكريات بقية ايضا ولنا عودة وتاكد ان لك قارى يتحرق شوقا لكتاباتك وفى انتظار المزيد من هذا الفيض |
طلبت لك باسورد من الاخ بكري بس ماعارف البوست ضاع وين ان شاء الله بكري يكون شافو
ويا عزيزي انقل ماشئت وانا حااستعين بيك في كتر من الذكريات
تحياتي للمدام
| |
|
|
|
|
|
|
Re: ذكريات مدينة.........بروكسل.... بلجيكا (Re: Abu Mariam)
|
Quote: سلام يا دكتور ياسر
انا متابع ومستمتع جداً
واصل واوع تخلي الناس يخرموا بيك لاتجهات تانية زي بص 95 الركبته داك....تعال احضر الحفلة دي
صادق |
هلا هلا
العمد ظهروا
صادق شيخ الدين ابو مريم حبيب الكل
ازيك يا راجل يا مبدع
ياخوي انت الجايي دا نصو تبعك
اخبارك واخبار الامورة مريم والدكتورة
في الانتظار
| |
|
|
|
|
|
|
Re: ذكريات مدينة.........بروكسل.... بلجيكا (Re: yasir Abdelgadir)
|
Quote: بروكسل المدينة التى نعشقها
تعد بروكسل عاصمة مملكة بلجيكا اهم المدن الاوروبية لوصفها عاصمة اوروبا السياسية بما تضمه من المراكز السياسية لاوروبا، ولموقع بلجيكا الذي يتوسط اهم الدول الاوروبية من ناحية المساحة والسكان مثل فرنسا والمانيا فضلا عن هولندا ولوكسمبورغ وبحر الشمال، بهذا الموقع الفريد والمتنوع جعلها مدينة جاذبة للسياح، وهذا عكس بدوره على تنوع اللغات والثقافات.
ان المدينة تمتلك سمتين، الحداثة وهذا ما تبوح به لك ابنيتها الشاهقة لمكاتب الشركات والمؤسسات العالمية، والبساطة بما تفصح به الابنية الاثرية واحياؤها القديمة واسواقها، وهناك العديد من الاماكن الترفيهية من الساحات الخضراء الى قاعات المتاحف ودور المسارح السينما والقصور الاثرية والاسواق المتنوعة. المراكز السياسية اهم تلك المراكز المفوضية الاوروبية”الاتحاد الاوروبي “ الذي يتميز بتصميمه الجذاب ذي طابع الفن الحديث ولاهميته السياسية والاقتصادية جعل اغلب الشركات والمؤسسات العالمية تتخذ لها مكاتب من حوله فضلا عن مقر حلف شمال الاطلسي”الناتو “ ومكاتبه الاخرى والبرلمان الاوروبي وهذا التواجد السياسي اسهم بدوره في ارتفاع اسعار الفنادق للحركة التي تشهدها بروكسل من توافد الوفود السياسية، اذ يتعدى سعر الليلة الواحدة 100 يورو لفندق ثلاثة نجوم، وكذلك تمتاز المدينة بوجود العديد من المنظمات الانسانية مثل منظمة العفو الدولية والاتحاد الدولي للصحفيين والجمعيات والنقابات الاخرى ذات العلاقة. السياحة تعد السياحة من اهم المردودات الاقتصادية للمملكة لوقوعها بين اهم العواصم الاوروبية وحلقة الوصل بينها اذ تستطيع التنقل بين باريس وامستردام وحتى برلين خلال ساعات معدودة. من هذه المباني والقصور نذكر السانكونتر”العيد الخمسين “ والذي تم بناؤه في حكم ليوبلد الثاني تخليدا للذكرى الخمسين لاستقلال بلجيكا ومبنى البرلمان البلجيكي في بروكسل والذ تم بناؤه عام 1783 ويضم كل من مجلس الشيوخ البلجيكي ودار مجلس النواب. وكذلك المبنى المرتبط باسم فكتوريا هورتا الذي تحول المنزل الخاص به الى مكان للزيارة والذي يقع في الميدان الكبير او ما يعرف بـ”الجراند بالاس “ الذي يضم بدوره ايضا مبنى بلدية بروكسل وكنيسة القديس ميخائيل وبرج المدينة الذي يعد من التحف المعمارية الذي يعود الى القرون الوسطى ويبلغ ارتفاعه 103 امتار وتحيط بالميدان المحال التي تبتاع الكارات والملابس التي تدل على العلامات البارزة للمدينة والاشياء التذكارية ولا ننسى هنا المحال التي تبيع الحلوى والشوكولاته اذ تعد الشكولاته من اهم المنتوجات الغذائية التي تتفرد بتصديرها ليس للدول الاوروبية فحسب بل لدول العالم المختلفة، وبمسافة بضع امتار عن الميدان يقف النصب البرونزي العالمي”مانكين بيس “ او الصبي الساحر ونافورته الشهيرة. واشير الى بناء الاتوميوم الذي بني عام 1958 وكان مخصصا للمعرض الدولي الاكسبو الذي اقيم آنذاك ويضم 9 كرات تشير الى الدول الاوروبية التي شكلت نواة الاتحاد الاوروبي. التسوق تنفرد بوكسل بمجموعة متنوعة من الاسواق التي يجد فيها المتبضع كل ما يبحث عنه ما يلبي حاجته من الاشياء التذكارية اشهر تلك الاسواق السوق الذي يقع في مدينة روجر او ما يعرف بسوق الشيراتون لقربه من فندق شيراتون، اذ توجد فيه المحال التجارية الضخمة المتخصصة بشتى انواع الملابس والاثاث والعطور ومن اشهر الماركات التجارية المعروفة وكذلك سوق المارشال ويعد من اكبر الاسواق في المدينة وهو ذو طابع عربي الذي يستجيب لجميع الاحتياجات وقد يكون هذا السوق المتنفس الوحيد للعوائل العراقية والعربية بصورة عامة وكما عبرت عنه السيدة ام احمد ان هذا السوق يذكرني بسوق الشورجة في بغداد اذ لا يكاد ان يخلو من اي شيء ابتداء من الخضروات والفواكه بانواعها الى لوازم البيت الى انواع اللحوم وحتى المواد الانشائية.
مع خالص تحياتى
اخوك
على محمد الخير
بروكسل بلجيكا |
| |
|
|
|
|
|
|
Re: ذكريات مدينة.........بروكسل.... بلجيكا (Re: yasir Abdelgadir)
|
أوقفت فيكي السيارة في الباركنق المجاور للخيمة ...ثم ترجلنا حتي مدخل الخيمة...فأشارت لي بالدخول...رفضت وقلت ليها لو ما قلتي لي جوه في شنو ...أطلاقا ما بدخل....أنتي جنيتي ...أنا وراي ناس راجيني.....ضحكت وقالت أطمن ما حيقطعوك جوه...ادخل ...دي خيمة الطلاب الجدد بيعملوها أول السنة وبتستمر لفترة مابين اسبوع او شهر...لحدي ما يقتنعوا انو الطلاب الجدد تم تعديلهم ليدخلوا الحياة الجامعية...قاطعتها هنا ...تعديلهم كيف يعني: قالت لي دا موضوع طويل ...{وقد فهمت لاحقا انو البنت او الولد عندهم بيكونوا ممنوعين من ممارسة حياتهم الجنسية حتي الثامنة عشرو لما يصلوا تمام الثامنة عشر او في نفس يوم عيد ميلادهم الثامن عشر ودا بيصادف غالبا يوم دخولهم الجامعة من ضمن الحاجات البيعملوها انو بيمارسوا حياتهم الجنسية من خلال البوي او القيرل فريند.}..وفي الجامعة اول اسبوع بيكون اسبوع تعارف بتهيأ لهم الجامعة هذا التعارف من خلال الخيمة دي....وبتكون فيها حاجات تانية كأن يلبسوا لبس غريب او يشربوا مشروبات كحولية بكثرة...المهم كل حاجة كانوا محرومين منها بيعملوها حاجة عجيبة ..
وقبل ان ادخل سألتها ...وهل ينطبق الكلام دا علي....
قالت لي : از يو لايك؟؟؟
دخلت برجلي الشمال.....موسيقي صاخبة ...كل الناس اتنين اتنين....ماتعرفش مراة مين في حضن مين.....صناديق مليانة سندوتشات....وبراميل مليانة { عبابير} وبهجات شديدة جدا......
تذكرت هنا اول يوم لي في جامعة الخرطوم ..وكنا في الجامعة المين نقضي سنة البرليم في كلية العلوم ...اول يوم نتعامل فيهو مع بنات كان في اللاب دخل ....امامي زميلي وصديقي عزالدين دبروس...قبل ان يجلس مد يده لبيرته { زميلته التي تجلس جواره في اللاب } ليسلم عليها...فما كانت منه الا ان انتهرته وقالت بصوت عاليي { ما بصافح رجال } اجاب عزالدين : أصبحنا بي الله ...دي بداية شنو دي ؟؟
| |
|
|
|
|
|
|
Re: ذكريات مدينة.........بروكسل.... بلجيكا (Re: yasir Abdelgadir)
|
Quote: ...قبل ان يجلس مد يده لبيرته { زميلته التي تجلس جواره في اللاب } ليسلم عليها...فما كانت منه الا ان انتهرته وقالت بصوت عاليي { ما بصافح رجال } اجاب عزالدين : أصبحنا بي الله ...دي بداية شنو دي ؟؟
|
ستة سنوات فى كلية الطب وعشر سنوات عمل فى المستشفيات وما لاقى عروس السبب جنس ديل
تحياتى
ومتابع بوستك الشيق بصمت
| |
|
|
|
|
|
|
Re: ذكريات مدينة.........بروكسل.... بلجيكا (Re: ombadda)
|
امبدة يا زمل
Quote: ستة سنوات فى كلية الطب وعشر سنوات عمل فى المستشفيات وما لاقى عروس السبب جنس ديل |
لا كدا انت ضربت ال chronicity بالجد.....طيب احنا طفشنا من السودان...انت عذرك شنو
Quote: ...قبل ان يجلس مد يده لبيرته { زميلته التي تجلس جواره في اللاب } ليسلم عليها...فما كانت منه الا ان انتهرته وقالت بصوت عاليي { ما بصافح رجال } اجاب عزالدين : أصبحنا بي الله ...دي بداية شنو دي ؟؟ |
أزيدك من الشعر بيت : عزالدين صديقي هذا كان من اظرف الناس...بعد هذا الموقف اصابته دبرسة استمرت معه الي التخرج و لهذا السبب فقط لقب ب..عزالدين دبروس ..يعني دبروس دا ما ابوهو
واظرف مافي الموضوع ان التفت الي مباشرة بعد ان رفضت تسلم عليه وقال لي :
أنت متأكد ياياسر احنا دخلنا جامعة الخرطوم....ما معهد شروني؟؟؟؟؟
| |
|
|
|
|
|
|
Re: ذكريات مدينة.........بروكسل.... بلجيكا (Re: yasir Abdelgadir)
|
ما ان دخلت ...حتي توقفت الموسيقي.....دقائق مرت ...ثم توجه احدهم نحوي...وتحولت انظار الجميع تجاهي...هذا الذي تقدم نحوي شعرت بأنه زعيمهم او صاحب سطوة عليهم...مرت لحظات صمت...لم ينطق اي احد بكلمه...بعدها زأر زعيمهم بصوت جهوري لا يحتاج لاي ساوند سيستم:
نمبر فير اند ديرتخ
هنا هاجت الخيمة وماجت بصيحات اقل ما فيها انها صيحات مخمورين ماجنة جدا...وتقدم الجميع نحوي وكانت امامي طاولة صغيرة...وضع كل واحد منهم كاس بلاستيك صغيرة مليئة بسائل اظنه بيرة....عددت الكاسات وجدتها تلاتة وتلاتين كاس بالتمام والكمال....وفيكي تحاول ان تتكلم معهم بالفلاماني ولكن يبدو انه لافائدة....ودورت الموسيقي والتف الجمع حولي ...هذا الايقاع قريب جدا من ايقاع السادة السمانية ....اعرفه جيدا حيث انه تجمعنا علاقة نسب ب ال الشيخ قريب الله وكنت احضر بعضا من حولياتهم ...او كي ممكن اقلدهم عسي ولعل انو ممكن يكون لي فكاك منهم.....وجلست اقفز قفزات خفيفة تتزايد قليلا قليلا وانا أردد : لا اله الا الله...لا اله الا الله وصار هؤلاء السكاري يدورون حولي وهم اخر انبساط ..واشعرتهم باني منهم وفيهم حتي اطمأنوا قليلا ورجعت كل شابة لي زولها...فسحبت فيكي من يدها وانسحبت خارجا.....
لاحولااااااااااااااااااا
الحاصل شنو يابت الناس...انا امانة في رقبتك
ضحكت وقالت لي ..كل ما ينضم برلوم جديد ياخد رقم وانت كنت رقم اربعة وتلاتين ....واي واحد يجي جديد لازم يشرب عدد من كاسات البيرة يساوي عدد الطلاب السناير الدخلو قبلو.... يعني انا كنت حاشرب تلاتة وتلاتين عبار بيرة...دينااااااااااااااااااااك وكنت حأطلع كيف.....الا امشي تاتي...تاتي بعدها يافيكي كتر خيرك ياختي لحدي هنا.......وانا ماشي شقتي اصلو راسي لافي من الطيارة...وال جت لاق شغال معاي......والقصة بايظة من غير بيرة
ودعتك الله.....وهي كمان ماقصرت....قالت لي خلينا نشوفك.....وادتني واحدة كدا علي الخد الشمال دوختني زيادة
| |
|
|
|
|
|
|
Re: ذكريات مدينة.........بروكسل.... بلجيكا (Re: سارة عمر)
|
الاستاذة الوجيهة : سارة عمر
Quote: سلامات يا د/ ياسر كيف الحال؟ والاسرة؟ بوست جميل والزول البعيش في اوروبا بكون عنده زكريات جميلة ومجتمع بلجيكا من المجتمعات السودانية المترابطة وذو سمعة في اوروبا تحياتي للأهل بالرياض مع مودتي |
لك من الشوق بحور واشواق
نفتقد اخبارك..سمعت انك في بلاد الفرنكوفون...أتمني اذا كنت لازلت هناك ان تسجلي لنا بعضا من ذكرياتك بحسك الصحفي المرهف...ولا بأس ان نفحتينا في هذا البوست ببعض الاستراحات خفيفة الظل
اذا كنت مازلت هناك سأمر عبر باريس في طريقي لامريكا....ياريت نسعد بشوفتك
لك الود من الجميع
| |
|
|
|
|
|
|
Re: ذكريات مدينة.........بروكسل.... بلجيكا (Re: yasir Abdelgadir)
|
جلست يوما اخرا داخل الغرفة: وعندما هممت بالخروج لاتسكع في المدينة ويمكن اتسحسح شوية..وانا بقفل في الباب صادفت جاري علي الشمال وهو يفتح شقته لاجل الدخول....نظر الي ونظرت اليه...عرفت من سحنته انه شامي او فلسطيني......لم يتردد وصاح:
مرحبا يا زلمي
رددت انا مرحبتين
الاخ من السودان...رددت نعم
رد هو: اهلين...لك شرف يا ميت مرحبا...انا من فلسطين
قلت ليهو ياالفين مرحبا...ماشفتك وانا لي اربعة ايام
معقولة...لك اربعت اياام قالها بلهجة شامية لا تخلو من ميوعة
قلت اي والله اربعة ايام...بس كنت مرهق شوية وفضلت الراحة....
رد هو: لك حد ينام هون...لك صحصح انت بأوربا
سألته وانت ماذا تفعل؟؟؟
رد : انا متلك... لي اربعة ايام ونص...بس مانمت متلك
سألته....وماذا كنت تفعل:
قال شوف يا زلمي : انا جايي هون مبتعث لما جستير في العلوم...حصلت علي منحة من منظمة تمنحها للطلاب الفلسطينيين...لكن بيني بينك { لاحظ عمل البساط احمدي ودخل فيني توووووش...عكس اخونا عوض دوكة داك} انا ماجيت هون عشان دراسة ولا بطيخ....
سألته : أجل ليش جايي....
قال لي ....ياعمي دي طاقة وانفتحت لي ...بدور علي بلجيكية احبها واتجوزها...تقول لي ماجستير وخرابيط
قلت ليهو والله معاك حق
| |
|
|
|
|
|
|
Re: ذكريات مدينة.........بروكسل.... بلجيكا (Re: yasir Abdelgadir)
|
د.ياسر تمسكار
طبعا احسن نحيك بلغتنا ما دام ساقطين بلجيكى وفرنسى
تدكرتك ليلة امس ولا فىها هلال لاعب ةلا حاجة المناسبة ان بنتى عتدها حمة ومشينا المستشفى القريبة مننا فوجدت الطبيب سودانى واسمه ياسر كمان ومن الشمالية,فقلت ياربى ياسر عبد القادر دا تعاقد هنا
دكرياتك جميلة وحلوة,,ومتابعك صدقنى سمعت صوتك شنطتك وانت جاريها فى ذاك الشارع الخالى دكرنى دكريات السد العالى حيت تطلع من الجمرك وانت بتسحب شنطك فى مدرج منحدر نحو الباخرة المتجهة لوادى حلفا نفس المسافة ونفس التعب ومافى ابو مروة لان كل زول فى حالو مخرج
انداح وانشر الافراح تمازج نسائم الصباح مع كلمات فصاح حتما ستشفى الجراح ستكون المفتاح الى عوالم فداح
احمد
| |
|
|
|
|
|
|
Re: ذكريات مدينة.........بروكسل.... بلجيكا (Re: abuguta)
|
الاخ الحبيب : ابو قوتة قنبلة الود الموقوتة
سعدت جدا بمتابعتك لذكريات بروكسل
والبنية سلامتها ...ماتشوف شر ان شاء الله
لحظات بس نستمتع بهزيمة الند التقليدي شوية...ولي عودة فالقادم اثقل just squeeze belts
اعجبني الاندياح في مدخل الخروج
| |
|
|
|
|
|
|
Re: ذكريات مدينة.........بروكسل.... بلجيكا (Re: yasir Abdelgadir)
|
أول أيامي في الكلية....يوم استقبالي احتفائي ترفيهي....شعور مهيب... كل الناس مبتسمة وتحيي في بعض....البروفيسورات وسط الطلبة..لاتكاد تفرق بينهم....هذا بروفيسور فان كامب عميد الكلية ..والعالم المشهور...لكم قرأت له في الصحف الطبية واليومية عن اكتشافاته المذهلة في عالم الطب...انه يمازحني كصديق قديم...بالرغم من انه لم يمض سوي دقائق علي تعارفنا...أشار لي الي رجل بقربنا وقال لي بعد ان ضربه في كتفه مازحا..هل تعرف هذا؟ فاجبت بالنفي...قال لي هذا مكتشف طريقة الانجاب بأستخدام اطفال الانابيب...وحياني الاخير بأصغر أصبع لديه في اصغر اصبع لدي..عجبتني الطريقة فضحكت.....يا للروعة...أنظر لتواضع العلماء...
كنا أربعة وعشرين ....اربعة افارقة ذكور ..وواحدة من نيجيريا..وواحدة جميلة جدا من اثيوبيا...ثلاثة عرب ...روان من سوريا {ولهذه قصة مدهشة سأحكيها بعد قليل}, و مصرية زوجة ديبلوماسي مصري...و الاخر عراقي..جنتلمان ..وانا .....البقية بلجيك...نساء كثر..وعدد محدود جدا من الرجال..
طفنا علي كل اقسام الكلية والمستشفي الجامعي...تعرفنا علي بعضنا....كثير من الشمبانيا ...قليل من البيرة...ولا حظ لي في الاثنتين.....
بدأت المحاضرات من تاني يوم علي طول....مافي لعب..التاسعة تماما كلو داخل القاعة...بدات المحاضرة الاولي ...كانت عن ال
Infectious diseases
جلست الي جانبي روان السورية...جميلة ..في الخامسة والعشرين من عمرها....أنتهت المحاضرة الساعة الثانية عشرة ظهرا...عندما حاولت النهوض...سألتني روان: عن شو كان بيحكي ؟؟؟؟التفت انا...نعم؟؟؟؟تقصدي حاجة معينة...فأجابت لا ..كلو من العنوان.....سألتها: يعني جالسة تلات ساعات ماعارفة عن شو كان بيحكي
ردت : شو ذنبي أذا كان درسونا بالعربي بسوريا
رديت انا : وشو ذنبي انا اشتغل ليك مترجم.....
سألتها : انتي متزوجة....ردت نعم وعندي اطفال
قلت علي الفور: طيب يا اختي مو احسن تجلسي في بيتك وتقدمي الشاي والقهوي لزوجك......مو هيك احسن بدل لا تضيعي وقتك ووقتي
قالت لي لا مو هيك
| |
|
|
|
|
|
|
Re: ذكريات مدينة.........بروكسل.... بلجيكا (Re: yasir Abdelgadir)
|
روزينا...الام سليلة امهرها والوالد من قلب أتينا
تحاشيت النظر اليها والتقاء عيني في عينها.....أعلم أنها كانت تحاول لفت نظري والسلام علي بحكم
الولف والجنس للجنس رحمة....لكن أ،ا الفيني مكفيني
الي ان اتت اللحظة التي كان لابد من الالتقاء و السلام...كنت في الكافتيريا اشرب كوبا من الشاي في الساعة
الثالثة ظهرا في بريك بين محاضرتين...الكافتيريا مليانة ولا يوجد سوي المقعد امامي خاويا...أتت
تحمل كوبا كبيرا جدا {مثل الجك} عندنا مليئا بالبيرة....شكيتك علي الله...دا شنو دا
جلست امامي بالضبط وفي عينيها ابتسامة ولف...وأصلو الولف كتال ...وفعلا كتاااااال زي ما بقول ابو
اللمين
قالت : هلو قلت: هلو
قالت: اي ثنك يو ار فروم سودان؟ قلت : صااااح ..هاو دو يو نو؟ قالت: ات از كلير
وواصلت ايام فروم اثيوبيا
قلت أي نو { أنا عااااارف}
وضحكت: كيف عرفت؟؟؟؟
قلت أنا: في زول يتوه من سماحتكم....؟؟ عجبتها المشاغلة فضحكت زيادة شوية
قالت لي : طيب مادام عارف ليه ماجيت اتعرفت بي من الاول...كنت منتظر المبادرة منك...نحن جيران...وعاداتنا وطبايعنا واحد ..وانت كمان بتشبهنا كتير وكنت فاكراك اثيوبي لوما شفتك بتتكلم مع الاخوة العرب
قلت ليها معاك حق ...
قالت طيب المنعك شنو؟؟
قلت ليها : مابقدر
ليه؟؟؟؟
انا: من غير ليه؟؟؟ واصلت في سري : يابنت الناس ابعدي عني ...انا جايي هنا ادرس وانت سمحة شدييييد ...وأنا فكرتي عن الحبش ما بتتعدي سعد قشرة..ولو قمت صاحبتك معناها يا خسارة عيشنا حياكلو الجداد والحكمة متييق
صمت في صمت
قلت أنا: دي كلها بيرة؟؟؟؟
قالت: أيوة
واصلت : معقولة...بتشربيها كيف شكيتك علي الله
قالت انها متعودة...أصلو ابوها صاحب بار في اديس وهي ذاتها فطموها بالبيرة...
ديناااك أمنا
مازحتني بأنها تعرف قليلا من اللغة العربية
قلت ليها زي شنو يعني؟؟؟
قالت لي : زي : انعل أبوك....وأنعل د......ك
قلت ليها بس خلاص ..يلا نحصل المحاضرة
| |
|
|
|
|
|
|
Re: ذكريات مدينة.........بروكسل.... بلجيكا (Re: yasir Abdelgadir)
|
د. ياسر
سلامات واشتقنا لقصصك دي والله
Quote: طيب اطلع من المطب دا كيف؟؟؟؟؟؟؟عندك طريقة تانية
|
انا ما عندي طريقة أحسن من طريقتك دي
Quote: قالت لي : طيب مادام عارف ليه ماجيت اتعرفت بي من الاول...كنت منتظر المبادرة منك...نحن جيران...وعاداتنا وطبايعنا واحد ..وانت كمان بتشبهنا كتير وكنت فاكراك اثيوبي لوما شفتك بتتكلم مع الاخوة العرب
قلت ليها معاك حق ...
قالت طيب المنعك شنو؟؟
قلت ليها : مابقدر
ليه؟؟؟؟
انا: من غير ليه؟؟؟ واصلت في سري : يابنت الناس ابعدي عني ...انا جايي هنا ادرس وانت سمحة شدييييد ...وأنا فكرتي عن الحبش ما بتتعدي سعد قشرة..ولو قمت صاحبتك معناها يا خسارة عيشنا حياكلو الجداد والحكمة متييق صمت في صمت
|
عليك الله بعد المطب الفوق دا مش أي مطب تاني ساهل ؟؟؟!!!
| |
|
|
|
|
|
|
Re: ذكريات مدينة.........بروكسل.... بلجيكا (Re: yasir Abdelgadir)
|
سلام
بوست جميل جدا من غير مجاملة,,, خفف علي كثير من دبرست الغربة وذكرني بي مواقف كتيرة مرت علي اول
ما جيت البلد دي , اتذكرتا واحد صاحبنا شليق جداو اشتر جدا و الحكاية دايما مدخلة في مواقف محرج ودايما بنكرة
مرة دخل محل و صادف إنو عيد الاب ,, فبعد ما خلص الشوبن ست المحل قالت لية
thank you for shopping and happy father day
طوالى صحبك رد عليها بي إبتسامة كمان
thank you and same to you
طبعا الزولة إتخلعت خلعت السنين و اكيد في سرها بتقول باربي الزول دة شاف علي شنو و هو طلع من
المل ذي الما حصل حاجة
نون
| |
|
|
|
|
|
|
Re: ذكريات مدينة.........بروكسل.... بلجيكا (Re: noon)
|
سلام ومرحب بيك يانون
Quote: بوست جميل جدا من غير مجاملة,,, خفف علي كثير من دبرست الغربة وذكرني بي مواقف كتيرة مرت علي اول
ما جيت البلد دي |
شكرا ليك وأنت زميلة غربة...بس ماوريتينا انتي بتشاركينا المعاناة من وين؟؟؟
وأكيد مرت بيك كتير من المواقف الطريفة والمواقف المبكية في ان ياريت تحكي لينا جزء من تجربتك
, Quote: اتذكرتا واحد صاحبنا شليق جداو اشتر جدا و الحكاية دايما مدخلة في مواقف محرج ودايما بنكرة
مرة دخل محل و صادف إنو عيد الاب ,, فبعد ما خلص الشوبن ست المحل قالت لية
thank you for shopping and happy father day
طوالى صحبك رد عليها بي إبتسامة كمان
thank you and same to you
طبعا الزولة إتخلعت خلعت السنين و اكيد في سرها بتقول باربي الزول دة شاف علي شنو و هو طلع من
المل ذي الما حصل حاجة |
| |
|
|
|
|
|
|
Re: ذكريات مدينة.........بروكسل.... بلجيكا (Re: yasir Abdelgadir)
|
Quote: شكرا ليك وأنت زميلة غربة...بس ماوريتينا انتي بتشاركينا المعاناة من وين؟؟؟ |
from The USA
Quote:
وأكيد مرت بيك كتير من المواقف الطريفة والمواقف المبكية في ان ياريت تحكي لينا جزء من تجربتك
|
أكيد الحكاوي كتيرة,و الجرسة حااصلة بيني و بينك,, ومرة مرة بيكون في بكاء,, لكن مافي حل وذي ما قال صاحبنا امريكا دي ذي يوم القيامة ما بنفعك فيها الا عملك
Noon
| |
|
|
|
|
|
|
Re: ذكريات مدينة.........بروكسل.... بلجيكا (Re: yasir Abdelgadir)
|
أخي دكتور ياسر ... تحياتي و اعجابي بوفائك لهذه المدينة الجميلة ... و احي معك اخي و قريبي الشاب الخلوق الرائع العريس على الخير الذي لم اراه منذ أواخر العام 2000 حين غادر السودان. و عندما عاد للسودان زائراً في العام 2006 كان قد حطت بي الرحال في اسكندنافيا, بعد ذلك صار التواصل بيناتنا هاتفياً ... لكم أعجبني أن رأيت اسمه متزيلاً ذلك السرد المعلوماتي القيم عن بروكسيل, كيف لا و قد تشرب بحبها من قديم الزمان ... فما ورد اسم بلجيكا أو بروكسل في السابق إلا و تبادر الينا ذكرى المرحوم والده محمد الخير, و الآن ارتبط الإسمان به و أخيه يحي الخير .... واصل أخي ياسر و حبذا لو استطعنا ان نجعل علي الخير بيننا فعلى أضافة حقيقية للمنبر ...
| |
|
|
|
|
|
|
Re: ذكريات مدينة.........بروكسل.... بلجيكا (Re: غباشي)
|
الاخ غباشي
Quote: أخي دكتور ياسر ... تحياتي و اعجابي بوفائك لهذه المدينة الجميلة ... و احي معك اخي و قريبي الشاب الخلوق الرائع العريس على الخير الذي لم اراه منذ أواخر العام 2000 حين غادر السودان. و عندما عاد للسودان زائراً في العام 2006 كان قد حطت بي الرحال في اسكندنافيا, بعد ذلك صار التواصل بيناتنا هاتفياً ... لكم أعجبني أن رأيت اسمه متزيلاً ذلك السرد المعلوماتي القيم عن بروكسيل, كيف لا و قد تشرب بحبها من قديم الزمان ... فما ورد اسم بلجيكا أو بروكسل في السابق إلا و تبادر الينا ذكرى المرحوم والده محمد الخير, و الآن ارتبط الإسمان به و أخيه يحي الخير .... واصل أخي ياسر و حبذا لو استطعنا ان نجعل علي الخير بيننا فعلى أضافة حقيقية للمنبر ... |
شكرا جزيلا للمداخلة ..وكما ذكرت عائلة علي الخير لها تاريخ مع مدينة بروكسل منذ والدهم رحمه الله مرورا بالاخ الحبوب جدا يحي ادريس الرجل الفاضل المضياف له ولاسرته اطيب تحية فقد امضيت معاهم فترة من انضر فترات حياتي ستظل محفورة ابد الدهر...أما أخي وصديقي العزيز علي الخير فقد عاصرنا معا اوقاتا جميلة في بروكسل بحكم تقارب السن والثقافة وستكون هناك العديد من احداث ثذه الذكريات معه ..لو الله مد في العمر
لك التحية مجددا
اواصل
| |
|
|
|
|
|
|
Re: ذكريات مدينة.........بروكسل.... بلجيكا (Re: yasir Abdelgadir)
|
دخلنا الي الشقة التي تسكنها روزينا في سكن المستشفي التابع للجامعة ..استقبال انيق يدل علي ان سكن البنات علي اختلاف اجناسهن دائما ما يختلف عن سكن الاولاد...جلسنا علي الطاولة نتجاذب اطراف الحديث انا وتريزا بينما روزينا تعد في الزغني امامنا...أدهشني جدا معرفة تريزا باللغة العربية بطلاقة....وعندما سالتها أن كانت قد عرجت علي الخرطوم او كسلا او حتي القلابات ..أوالفشقة { وهذه سمعتها بكثرة مؤخرا }...أجابت بالنفي القاطع وانها لم تزر السودان بتاتا بل درست في مدرسة خاصة بالمسلمين بجوار منزلهم في اديس وكان يدرس فيها اللغة العربية الي جانب بقية المواد...وأخبرتني بما عقد لساني من الدهشة بأنه كان يدرس القران في المدرسة ...بل وهي المسيحية تحفظ عدة سور من القران....وأخبرتني بقصة طريفة هي انه اجريت لهم مسابقة في القران تبرع بها شيخ مسلم والجائزة فيها هي عبارة عن رحلة للعمرة..ففازت هي بالمرتبة الاولي ..وعندما ارادوا ان يعطوها الجائزة وهي تذاكر العمرة سألها الشيخ عن اسمها فأجابت : تريزا فقال لها الشيخ :
لم اعرف مسلمة اسمها تريزا
فقالت له: انا لست مسلمة بل مسيحية فصاح الشيخ:
Whattttttttt???????t
فطارت منها الرحلة للسعودية
وضحكت انا كثيرا ...ونظرت لروزينا فأذا بها تغرف بكمشة كبيرة من شوال شيئا احمر اللون وتكب في حلة الزغني علي النار.زفسألتها ما هذا؟ أجابت: هذه شطة الزغني
نعم..؟؟؟؟ دي كلها شطة وحتكبيها في الحلة..وذهبت فرأيت ان الحلة قد تحول لونها للاحمر بفعل الشطة...قلت لها علي الفور يا اما تعملي لي حلة تاني ولا من هنا علي القراند بلاس عدل
قالت: ياخي شفت ليك زغني من غير شطة
قلت ليها لكن ما شطة مساطيل زي حقتكم دي ..كبي حاجة معقولة...ملعقة ملعقتين ..لكن بالكمشة؟؟؟؟؟
فضحكت هي وعملت لي زغني اخر في طوة صغيرة وكان من اجمل ما اكلت
ثم اتبعته بمشروب احمريشبه ا لكركدي ..سالتها عنه فقالت : انه واين؟؟؟فأعتذرت
ورددت هي : واين ...واييييييييييييين؟؟
قلت: لا واين ولا روني....انا والله رأسي دا مكنتو خفيفة جدا والبيبسي في تلتلة...تقولي لي واين؟؟؟
| |
|
|
|
|
|
|
Re: ذكريات مدينة.........بروكسل.... بلجيكا (Re: yasir Abdelgadir)
|
Quote: تلفت يمنه ويسرة لا يوجد احد عربي { وخصوصا مافي سوداني} يلا ياعم أديها بنزين.. فبدات أنطط مع الجماعة
أن شاء الله ما حد حوش..وأتخيلت انو شرحبيل بيغني :...لف يمين ..ولف شمال ...ودور ودور وأوعي توقف
|
ياسر
الظاهر بعد الحفلة الكاربة دي مشت نومتا و ما صحيت الا الليلة
دة كلام دة و الجمهور منتظر
| |
|
|
|
|
|
|
Re: ذكريات مدينة.........بروكسل.... بلجيكا (Re: yasir Abdelgadir)
|
والاتبلبل يعووووم...وهادي عووووومة
بعد ما خلصت عرضة وخواضة وعوم...مشيت عليها طوالي ..وأستقبلتني بأبتسامة عريضة ومشجعة...وكانت ذكية فتحاشت الحديث عن موضوع الرقيص والبهدلة واستقبلتني بروح سودانية بحتة...أما أنا فرديت الجميل بافضل منه وأبديت أعجابي بزيها السوداني وكون انها سودانية أصيلة ومتمسكة بزيها حتي هنا...وتغزلت كثيرا في ثوبها......أمتصت حديثي بحرفنة وأدارت دفة الحديث...وعلمت انها ليست طبيبة ولكنها حضرت لدراسة اخري..ومن احضرها هنا صديقاتها وعرفتني علي بعضهم....وأنتهت السهرة علي احسن مايكون ولم يعكرها سوي المشوار الذي ينتظرني حتي مكان سكني ...والمشوار الابعد الي باريس
وما ادراك ما باريس
للحديث بقية ولكنها أصبحت الان....حتي الغد....لاواصل ايها الاعزاء
| |
|
|
|
|
|
|
|