|
ناس الحاج يوسف ....
|
الحاج يوسف من اعرق أحياء الخرطوم واكبرها مساحة
من الصقعي غربا لحدي عيد بابكر شرقا ومن.....( كل المايقومات) شمال لغاية حدود الجريف شرق و امدوم جنوبا
تعالوا جاي نتونس هنا ونشوف اخبارنا ونناقش همومونا
زز
|
|
|
|
|
|
|
|
Re: ناس الحاج يوسف .... (Re: خالد ماسا)
|
الحاج يوسف من اعرق أحياء الخرطوم واكبرها مساحة من الصقعي غربا لحدي عيد بابكر شرقا ومن.....( كل المايقومات) شمال لغاية حدود الجريف شرق و امدوم جنوبا حبابكم آلا ف ياأهلنا رغم البعاد .. سلمولنا علي جدنا الحاج يوسف ود دهاشة نتابع لأننا في حاجة للتعرف على هكذا عراقة
وتقبلوا أطيب المنى .
| |
|
|
|
|
|
|
Re: ناس الحاج يوسف .... (Re: سمية الحسن طلحة)
|
كنت ساكن الردمية مربع 10 ونادينا اسمه الاتحاد وبعدها سكنت الشقلة جنب الصهريج وكنت من شلة ال بطحان,,محمد عبد الرازق واولاد حاج عبد الله الجعلى وناس ود الضوء ومحطة حافظ عبيد, كانت لنا شلة ظريف, درسنا فى ود السائح الثانوية,,مع عبد الطيف ود الضوء,,ومحمد عبد الرازق,,
اجمل ايامى لما تكون يوم مطرة,,ومافى مواصلات ندقها كدارى للزلط..ونمر بجميع المحطات التقاطع ونقزو,,,جميلة كانت احداث فيضان 88 ولحظات انهيار بيوت الجالوص اذكر كانت عندنا لناجارة زوجها مغترب ,,انكسر المرق فوق بناتها الصغار,,فضربت الثكلى فنطينا عليها الحوش ونحن شلة عذابة,,ودى اول بطولة لفلم هندى اعملها فى حياتى وانا اسى لو عدت للسودان ,,,لازم امشى الحاج يوسف,,واحوم كدارى يا سلام لما نمشى سوق ستة يوم الجمعة وتلقى الشباب يترنمون باهازيج تجلب الزبائن بستة اى حاجة بستة يارب... دلالية والولد فى السعودية تخم... الطبلية ما تخلى فيها شئا بستة اى حاجة بستة
اخر ايامى اشتريت لى مربوع 500 متر فى الشقلة الشرقية مشيت الهند وجيت اجازة لقيت ساكن فيه عسكرى وزوجتو موضع فقلت ليه دا بيتى قال لى انت مشيت وين السنين دى كلها ,,قلت ليه كنت فى الهند, قال لى وتانى جائى ليت الجالوص دا امشى اسكن فى العمارات ما دام درست براء خلى لى البيت دا, انا زول مسكين وعيالى صغار,,قلت ليه بس ادعو لى ربنا يوفقنى وانا بخلى ليك البيت,,اخوى زعل انا كيف اخلى حقى,,,لزول من غرب السودان قلت ليه الزول دا محتاج وانا ما محتاج,,قال لى اسى عندك حق التذكرة عشان ترجع الهند,,صدقونى ما كانت عندى لكن رجعت,,اسى ياربى بكون بتذكرنى او لا عموما انا عافيتو ليه لانو من ناس الحاج يوسف,,, واذكر مرة راكبين البص,,,واحدة ظريفونة قالت نازلة نقزو,,فقام عمنا كبير يردد متين يالله نتهنا ويكون فى نقزو مسكنا,, بجيكم لما اكيد ذاكرتى
امير جابر,,,,ايوة خدمة
الردمية اللفة ,,امشى خطوات اول زقاق على اليمين الزقاق الاول خليه ,,هنا اقف اسال عن اسمى هنا كنت موجود,,,,لسنين اسال حسام احمد بلا ,,ابن عمى ,,
(عدل بواسطة abuguta on 10-31-2007, 08:04 AM) (عدل بواسطة abuguta on 10-31-2007, 08:12 AM)
| |
|
|
|
|
|
|
Re: ناس الحاج يوسف .... (Re: محمد عبد الماجد الصايم)
|
يا سلااااااام عليكم ياخ.. والله تملو العين
اها اخوكم من..
المايقوما غرب محطة الصقعي..
ودرست في المايقوما غرب الابتدائية/ وشرق المتوسطة
وود السائح الثانوية...
والبوست ده تاني ...
فوووووووووووق بس
وجاييييكم راجع
| |
|
|
|
|
|
|
Re: ناس الحاج يوسف .... (Re: عمر عبد الخالق سعيد)
|
سمية الحسن
سلام وكلنا اشواق لناس الحاج يوسف
من تجيك ريحة النعناع المخلوط بريحة البان كوكو وتفارق تقاطع الجريف الصقعي ونمره2 وشارع واحد يا تلف يا تمشي عديل لو لفيت مشوااااااار طوييييل وكمان لو مشينا عديل نمرة 2 الردمية اللفة وكمان يا تلف يا تمشي عدييييل 13 وده شارعنا يمينك الاشلاق وشمالك مربع عشرة ومستشفي البان جديد ممكن تلف او نمشي عديل ..... السهريح (ص) ونمرة اتنين الوحدة ومربع خمسة
,,,,ووووو سوق 6 اخر محطة ....
ومن هنااااك عيييييييييييييك .
| |
|
|
|
|
|
|
Re: ناس الحاج يوسف .... (Re: عمر عبد الخالق سعيد)
|
Quote:
الحاج يوسف
كتبها الحلنقي
الحاج يوسف الحاضر والمستقبل
يا الحاج يوسف رمز الهمّة
بندورك ديّمة هناك في القمّة
وتكوني النور يا الحاج يوسف
يوم ما يكون العالم ضَلْمة
وتكوني مثال للعمل الشعبي
بفضل شبابك وقايدة الأمّة
ويجوك الناس ويهاجروا ليك
وتكوني فرج لكل ملمّة
وتقدِّمي للسودان أبنائك
ما انتِ بتحوي معادن جمّة
وكُل المدن الكاينة بحولك
تتخذِكْ مِشعَلْ كشف القمّة
ولمّ الناس تقيف تتساءل
قولي: أنا بشبابي بقيت في القمّة
وزي ما شبابك ليك بِعَمْلُو
بتقدمي ليهم أعظم خدمة
بتقيفي حنينة في يوم يحتاجو
وقفة أُمْ وخالة وعمّة العودة الى الصفحة الرئيسية لنادى القلم السودانى
مع تحيات بكرى ابوبكر |
من نادي القلم السوداني بواسطة الشيخ Google
| |
|
|
|
|
|
|
Re: ناس الحاج يوسف .... (Re: Mohamed Omar Salem)
|
مدينة سانت هوزيه الامريكية المشهورة بولاية كاليفورنيا والتي تعتبر عاصمة التكنلوجيا في العالم لوجود وادي السيليكون بهاو واحدة من اجمل واكبر مدن امريكا يعني اسمها(الحاج يوسف) لان سانت بالاسبانية تعني حاج وهوزيه هو جوزيف بالانجليزية ويوسف بالعربية يعني يا ناس الحاج يوسف عندكم امتداد في كالفورنيا والمعترض يراجع الاسامي .
ارجو ان يقوم الاخوة رواد البوست يإيراد نبذة تاريخية عن الحاج يوسف واعلام مدينة الحاج يوسف مع انزال بعض الصور لمن تيسر معه.
مودات
| |
|
|
|
|
|
|
Re: ناس الحاج يوسف .... (Re: عمر عبد الخالق سعيد)
|
سلامات يا عمر
زمن طويل خالص و ما عارف من اين البدايه لكن مصير الحى يلاقى...... طبعا زمن طويل من الحاج يوسف و حتى لما عدت كانت الدنيا متغيره و حتى الشوارع و ملامح الناس إتغيرت. أنا عايش بين كندا و امريكا عملى بتطلب اكون دايما فى ترحال و شايف واحد من الاخوان ذكر ٍسان هوسى كاليفورنيا و طبعا ديه صدفه غريبه لقد عيشت و عملت فى تلك المنطقه فى منتصف التسعينات فى Saint Jose and Mountain View and Saint Clara, , وهى من اجمل المدن الامريكيه.
انا ما عارف اخر مره قابلت واحد من دفعتى انا عايش خارج السودان منذ 1987 و دايما اشتاق واحن لهمسه من الوطن حيث الإجتماعيات و المناشط الرياضيه و الحاج يوسف مرتع ايمام الصباء و كانت دايما تجمع الناس مناسبات جميله و انامن محبى الكوره و كان الدورى فى الحاج يوسف عامر جدا حيث المريخ فريق حلتنا و هناك العوده و الامل فريقكم و النضال الخ.
لقد ذكرنى احد الاخوان هنا بصديق و دفعه و هو الفاضل جابر درسنا مع بعض فى الثانوى العام و كان شخصيه ممتازه و سريع البديهه و ما ادرى اين هو الان...!
Quote: شكلك بعيييييييد من الحجيوسف |
ادعوا لينا با العوده للوطن الجميل.
سلامى و اشوقى
| |
|
|
|
|
|
|
Re: ناس الحاج يوسف .... (Re: عمر عبد الخالق سعيد)
|
Quote: حاج يوسف يا .. يعيش
ردمية مربع 16 + امتداد مربع 19 + شارع واحداللفة + مايقوما شارع 9 محطة 9
بس بعيد من ناس خالد ماسا
الصايم |
طــــق خااااااص
لا حولااااا .. " الجامد " والله يا بكري ابوبكر دي بالغت فيها .. يعني هسه
محمد عبد الماجد ده دخل المنبر العام بي " باصويرد" واحد .. المفروض يدخل بي عشرة علي الاقل
ده طبعا يا شباب باعتبارات الوزن ...
بعيد مننا وين .. والله " زمن كنت بقدر اطلع راس بيتنا " كنت بشوف بيتكم
" وري .. وري .. يا مجنق وري " والله زمن يا دفعه
سان جوزيف ويييييي
| |
|
|
|
|
|
|
Re: ناس الحاج يوسف .... (Re: عمر عبد الخالق سعيد)
|
Quote: الحاج يوسف من اعرق أحياء الخرطوم واكبرها مساحة من الصقعي غربا لحدي عيد بابكر شرقا ومن.....( كل المايقومات) شمال لغاية حدود الجريف شرق و امدوم جنوبا |
إبننا عمر تحية ملونة بكل ألوان الدائرة اللونية وبظلال من الود و ( كونتراست ) للتبيين
رغم أنني لست من سكان الحاج يوسف لكنني موقن من أنها وعاء متمدد لأعرق أحياء ومدن السودان .. لأنها مع مثيلاتها إستوعبت تمددات الأسر العريقة في حيازاتها المحدودة فشكلت دوائرة إستوعبت المخزون الزائد من بيت الأسرة الكبيرة ..
وليس منا من يفترض أن لا أثر له هناك .. ففيها تمدداتنا وأرحامنا وأترابنا وجيراننا .. وكثير من الأصفياء ..
بل هي سودان مصغر وسحنات تشكل لوحات رائعة تستحق أخي عمر أن تتحول الى لوحات ليست صامته بل لوحات حية ضاحكة مستبشرة ..
صحيح أننا في مجتمع المغالبة لا نرى كل الجمال وصحيح أننا عند إشتداد الكرب تفوتنا روعة الجمال لكن صورا بديعة لأناس بديعين تتشكل حولنا لترسم لنا الحقيقة المتمثلة في بساطة إنساننا وروعته ..
حاول أخي عمر أن تحمل مرسمك ولو في خيالك زحاول أن تؤطر صورة لمشهد تلقائي وتأمل صور الجمال التي يحتويها وقتها لن تحتاج الى شهادة مني لكي أتحدث عن عراقة أحسب أنها في الوجدان وفي عمق أن نكون في السودان ..
مودتي وعاطر تقديري
أخوك الأكبر
..
ÒÒ
|
| |
|
|
|
|
|
|
Re: ناس الحاج يوسف .... (Re: عمر عبد الخالق سعيد)
|
Quote: بل هي سودان مصغر وسحنات تشكل لوحات رائعة تستحق أخي عمر أن تتحول الى لوحات ليست صامته بل لوحات حية ضاحكة مستبشرة ..
|
الاستاذ شكوكو لك فائق الاحترام و التقدير ومنطقة الحاج يوسف سودان مصغر فعلا رغم اني من مواليد الشعبية لكن انتمئ الي الحاج يوسف قلبا و قالبا .....
| |
|
|
|
|
|
|
Re: ناس الحاج يوسف .... (Re: عمر عبد الخالق سعيد)
|
حنك خـــاص لـ الوريف ماسا
يا ماسا ياخي ما تتصلح معاي
أنا هسي صورتي ما ختيتها عشان ما يعرفو اني سمين
هو بكري ذااااااتو تقول عارفني .. عامل لي باسوورد من 15 حرف
مشتاقين يا دفعة أخبار الشباب ؟؟
وررررررررري يا مجنق
| |
|
|
|
|
|
|
Re: ناس الحاج يوسف .... (Re: محمد عبد الماجد الصايم)
|
Quote: مربع 16 تعرف منوا من الشبببباببببب |
أمير جابر كيفنك
ناس 16 الردمية .. نقزو
طارق عبد الوهاب (كيلو) معاوية عبد الوهاب (البيجو) محمود عبد اللطيف (كابو) خالد تري (روسيا) برير النيل و.... كتاااااااار
ولا كيف؟؟
| |
|
|
|
|
|
|
Re: ناس الحاج يوسف .... (Re: محمد عبد الماجد الصايم)
|
يلا تعالوا نتكلم عن الحاج يوسف
مثلا الرياضه وازكر فى مجال الرياضه الوزير السابق وعضو مجلس الثوره العميد ابراهيم نايل ايدام ونسيبه العميه ابراهيم عجبنا والمقدم عبد الباقى الجيلانى بتاع صحيفة القوات المسلحه وعلى متينه وقونديلا
وحيدر طياره وحيدر ديغول وخالد راكوبه ومحمد عبد المؤمن وكمبا لاعب الهلال السابق واحمد ادم ( عافيه ) حارس مرمى الهلال وعلاء الدين جبريل لاعب الهلال ( المعروف بـ على فور ) ويور حارس مرمى الهلال السابق ومقبول مدافع المريخ السابق ومحمد ود الشواطين لاعب التحرير والميرغنى
اما بالنسبه للمايقوما شرق ففيها فريق التضامن وفريق المقاولون العرب
يسكن الحاج يوسف الشاعر تاج السر الحسن وابو ذر الغفارى عبد الوهاب هلاوى حسن عبد الوهاب وراق المجزوب
ومن الفنانيين زيدان ابراهيم وعلى حسين فنان الطمبور عبد الرحيم البركل
وايضا المرحوم المخرج مجدى النور والممثل عبد السلام جلود والممثل محمد صالحين والممثل عثمان رمضان
ومن الصحفيين
عبد الباقى لجيلانى طلحه الشفيع صبرى الشفيع عوض محمد احمد رمضان احمد السيد
ويلا يا شباب الحقونا .. اضيفوا او صححوا معلومات
| |
|
|
|
|
|
|
Re: ناس الحاج يوسف .... (Re: على محمد على بشير)
|
كان يسكن الحاج يوسف العم والوالد محمد الصديق طلحه ( ناظر البطاحين ) والقطب الاتحادى الضخم وبيته تحديدا فى دار السلام المغاربه محطة الصقعى ( عليه رحمة الله ) وكان بيته قبله للسياسيين من كل حدب وصوب وهو بيت عز وكرم
| |
|
|
|
|
|
|
Re: ناس الحاج يوسف .... (Re: على محمد على بشير)
|
شارع واحد اللفه
دا حكايه وروايه فى حد زاته سوق وتجمع للرياضيين وموقف للمواصلات
الرياضيين يجتمعون فيه منز الصباح الباكر وتبدأ المناقشات فيه ساخنه وملتهبه بين الهلالاب والمريخاب وهم فى انتظار وصول صحف الصباح وتعلوا صيحاتهم وهم يتجادلون فى ود جميل ويتضاحكون ويتشاغلون وستات الشاى على قفا من يشيل فى اللفه واللقيمات الحاره او قهوة الصباح للزاهبين للعمل بعد ان ادلوا بدلوهم فى النقاش وسوق للخضار ماشاء الله والتكاسى واقفه فى انتظار الزبائن او الطرحه لبحرى او الخرطوم والفوراوى والفول المصلح الحار للفطور
ايام لها ايقاع
| |
|
|
|
|
|
|
Re: ناس الحاج يوسف .... (Re: على محمد على بشير)
|
واضف الى القائمة
ياسر رحمة مدافع الهلال الدولي السابق والشاعر حاج حمد بانقا(سلمى يا ظالمة)
الحكم صلاح احمد محمد صالح(امتداد كوكو) الفنان عبد المنعم النذير المنشد قرشي الطيب(الدبابين اسود الغابه) الطيب مصطفي(بتاع التلفزيون) الفنان هشام عوض
| |
|
|
|
|
|
|
Re: ناس الحاج يوسف .... (Re: على محمد على بشير)
|
سلام من الله يغشى الحاج يوسف وأهلها الطيبين .. وجميع رواد هذا البوست العظيم ..
الحاج يوسف الردمية (2) .. خلف مدرسة ود السائح ( تحديد دكان ود النجومي - تلف يمين رابع ناصية ) ... هذا المنزل هو جواز دخولي إلى الحاج يوسف وأهلها الطيبين .. إمتلكته قبل سنوات ولم أسكنه حتى الآن.. وأمني النفس أن تحط رحالها به ذات يوم .. لك تحياتي أخ عمر .. وياريت لو يمدونا الأخوان بالصور والتوثيق لهذا الحي العريق . أخوكم/ خالد الأرباب
| |
|
|
|
|
|
|
Re: ناس الحاج يوسف .... (Re: Mohamed Omar Salem)
|
Quote: الاستاذ المربى محمد الحبيب حامد رجل كان من اميذ المعلميين و الاستاذ عبدالله الخضر استاذ العربى الشهير و استاذ محمد سعد دياب الشاعر و الاستاذ نصر الدين محمد نصر الدين من المايقوما و إلى ان نعود مع هذه الذاكره التى اتى عليها الدهر |
كلام زي خرا النحل
رجعتونا للقراية أم دق تاني دي عارفا خالد ماسا .. خاصة الأستاذ محمد الحبيب الحامد وأستاذ محمود الله يديهم العافية جميعا
الصايم
| |
|
|
|
|
|
|
Re: ناس الحاج يوسف .... (Re: عمر عبد الخالق سعيد)
|
Quote: ,,,,ووووو سوق 6 اخر محطة ....
ومن هنااااك عيييييييييييييك . |
الأخ عمر أنا ناسي من عييييييك دي ذاتا يعني منهم ولو تلبت بتلِب حارج الكرة الأرضية أنا مامن الحاج يوسف لكن أعتمد علي المرجع علي محمد علي بشير وأبوقوتة أصحاب البطاحين يطلعوا لي أهلي كلهم ساكنين هنا
| |
|
|
|
|
|
|
Re: ناس الحاج يوسف .... (Re: عمر عبد الخالق سعيد)
|
Quote: حنك خـــاص لـ الوريف ماسا
يا ماسا ياخي ما تتصلح معاي
أنا هسي صورتي ما ختيتها عشان ما يعرفو اني سمين
هو بكري ذااااااتو تقول عارفني .. عامل لي باسوورد من 15 حرف
مشتاقين يا دفعة أخبار الشباب ؟؟
وررررررررري يا مجنق |
طـــق خاااص
الوريف ابو " روان " .. غايتو لو دي صورتا الفي البروفايل دي
اها انا بلعتا كلامي .. وانت اضعف مني ظاتو .. ونكلم بكري يعمل ليك باصويرد باللمس بس
| |
|
|
|
|
|
|
Re: ناس الحاج يوسف .... (Re: عمر عبد الخالق سعيد)
|
Quote: أنا مامن الحاج يوسف لكن أعتمد علي المرجع علي محمد علي بشير وأبوقوتة أصحاب البطاحين يطلعوا لي أهلي كلهم ساكنين هنا |
اها يا الملكه بت الحسن طلحه ح اتكلم ليك عن اسره تعتبر علم فى الحاج يوسف
وهى اسرة اولاد الامين كرار وكبيرهم الاستاذ المرحوم احمد الامين كرار نائب الدائره 35 الحاج يوسف رجل علم وتقى وورع ويملك علاقات واسعه مع سكان الحاج يوسف بمختلف ميولهم السياسيه وانا شخصيا كنت وقتها اتحادى ديمقراطى ولكنى كنت املك علاقه طيبه جدا بالرجل ورغم فارق السن فقد كان يعاملنى كصديق وقد بنى هو واخوته مسجد جميل جدا فى قطعة ارض يملكها والدهم ويؤمه خلق كثير من اهل المايقوما
واخوه على الامين كرار استاذ ايضا ورجل خير وبر واحسان ومن اطهر واشرف الناس الذين عرفتهم من الكيزان فحينما كان يتقدم الكيزان فى بداية الانقاذ اقتصاديا وماليا فى فترة ما يعرف بالتمكين كان على الامين كرار يبيع سيارته الوحيده التى يملكها ويمشى على رجليه ورغم ذلك فقد قدم ابنه الملازم عبد الرحمن شهيدا فى حرب الجنوب والحقه بزوج ابنته الضابط فى الجيش ايضا
واخوهم الاخر العميد مهندس عمر الامين كرار قائد الدفاع الشعبى والذى توفى فى حادث طائرة السلام وهو على فكره يا سميه اخواله ال الشلهمه بابرق ومنهم فى المايقوما على الشلهمه صديق الشلهمه ومحمد طه ومحمد احمد وعثمان الشلهمه
واخوهم الاخر المهندس مصطفى الامين كرار قدم ايضا ابنه شهيدا فى حرب الجنوب وهذه الاسره لها صلات قربى بال ود العطايا ولكنى نسيتها مع طول الغربه
ولا انسى من البطاحين المؤثرين سياسيا فى الحاج يوسف العم محمد الصديق قدور القطب الاتحادى البارز وصديق ابو المعالى ( صديق فرن ) والعم حاج موسى ( كبجه ) وود العطايا والشيخ احمد على الامام
| |
|
|
|
|
|
|
Re: ناس الحاج يوسف .... (Re: على محمد على بشير)
|
Quote: خالد عبدالعذيذ محمد ناشد من مربع 5, لعب فى كوبر و كان راجل فنان و شاعر و ملحن وعازف إمتهن القانون و عمل فى مهنت القانون و اخير المحاماه. و هو رجل خلوق و يشهد له بذلك.
|
ياربى دا خو عارف ويسرى وناشد الذين كانوا يسكنون الشعبيه بحرى من قبل وامهم من جنوب السودان ان كانوا هم فانى اعرفهم جيدا وازكر انهم كانوا يسكنون بالقرب منا بالشعبيه بحرى وازكر وفاة والدهم عليه رحمة الله وقد التقيت يسرى كثيرا فى الحاج يوسف وقد كان عازف جيتار متميز وعبد العزيز كان رجل خلوق فعلا لو صدف انه الذى اعرفه
ومن الراضيين ايضا صلاح جوزيف وكان لاعب بالتحرير ويعمل بالنسيج السودانى ودرب فريق الحاج يوسف
| |
|
|
|
|
|
|
Re: ناس الحاج يوسف .... (Re: على محمد على بشير)
|
مطعم بانقا فى شارع واحد
مطعم بانقا فى شارع واحد من اشهر المطاعم التى تقدم عشاء فى الحاج يوسف ومشهور بالشيه ويؤمه خلق كثير من كل انحاء الحاج يوسف وخاصه سائقى سيارات الاجره
فوال عبيد بالردميه ايضا عبيد مشهور بالفول فى شارع الردميه وزبائنه كتار جدا وكان من مشاهير الفوالين فى الردميه وفوله له طعم خاص ونكهه خاصه والرجل كان يتعامل مع الناس بصوره راقيه جدا
لا اعرف هل المطعمين موجودين الى الان ام اصبحا نسيا منسيا
| |
|
|
|
|
|
|
Re: ناس الحاج يوسف .... (Re: على محمد على بشير)
|
مخبز مربع تلاته
وهو يقع بالقرب من ميدان الرابطه وقريب من مستشفى الكمبونى وان لم تخنى الزاكره هو اول مخبز الى فى الحاج يوسف وايام ازمة الخبز الطاحنه كان الناس ينومون امامه حتى الفجر ليظفروا بخبز ساخن يقيم اودهم حتى نهاية اليوم وقد لعب ذلك المخبز دورا بارزا فى تلك الازمه وامد الناس بالخبز بلا توقف ولكل مناطق الحاج يوسف وازكر فى تلك الفتره ولطول الوقت الذى يقضيه الناس امام المخبز نشأت كثير من قصص الحب بين الجنسين غير المغازلات البريئه والصداقات التى نشأت امام المخبز واستمرت بعدها لزمن طويل او لا زالت شخصيا تعرفت على كثير من الشباب فى تلك الفترع وعن قرب واستمرت علاقتى بهم الى الان
| |
|
|
|
|
|
|
Re: ناس الحاج يوسف .... (Re: على محمد على بشير)
|
مستشفى البان جديد بالحاج يوسف
بدأ هذا المستشفى متعثرا جدا ورغم ضخامة المساحه التى كان يشغلها هذا المستشفى والمبانى الضخمه الا ان خدماته كانت اشبه بخدمات المركز الصحى ويقال الان اصبح يتبع لمامون حميده واصبح مستشفى خمسه نجوم وبه اخصائيين وكافة التخصصات الطبيه وعنابر جيده وخدمات طبيه ممتازه
| |
|
|
|
|
|
|
Re: ناس الحاج يوسف .... (Re: على محمد على بشير)
|
وعلى زكر مامون حميده والبان جديد
اضف الى الفنانين الفنان محمد حميده فردة الثنائى الوطنى ويسكن شارع واحد والفنان عز الدين عبد الماجد كان يسكن الحاج يوسف ايضا
ولا انسى ابن المايقوما الجميل .. الفنان صديق الفاضل
| |
|
|
|
|
|
|
Re: ناس الحاج يوسف .... (Re: على محمد على بشير)
|
حامد كوبر لاعب المريخ السابق ايضا يسكن الحاج يوسف الردميه اخر محطه وعائلته تسكن المايقوما
وكان يملك مطعم صغير داخل بيته يقدم عشاء شهى جدا من فول وكبده وكوارع ولا اعرف الان لازال هناك ام رحل
| |
|
|
|
|
|
|
Re: ناس الحاج يوسف .... (Re: على محمد على بشير)
|
Quote: ياربى دا خو عارف ويسرى وناشد الذين كانوا يسكنون الشعبيه بحرى من قبل وامهم من جنوب السودان ان كانوا هم فانى اعرفهم جيدا وازكر انهم كانوا يسكنون بالقرب منا بالشعبيه بحرى وازكر وفاة والدهم عليه رحمة الله وقد التقيت يسرى كثيرا فى الحاج يوسف وقد كان عازف جيتار متميز وعبد العزيز كان رجل خلوق فعلا لو صدف انه الذى اعرفه |
السلام عليكم ياعلى:
نعم خالد عبدالعذيذ اخو عارف و يسرى و ناشد و فعلا كانوا فى الشعبيه, و خالد عمل فى القضاء و احيل للصالح العام فى زمن (الطوفان) و حاليا يعمل فى المحاماه. خالد كان لاعب متميز لعب فى كوبر و افتكر إحدى فرق كسلا و هو عازف و فنان و رسام و ملحن ما شاء الله كان راجل موهوب بمعنى الكلمه و ذو خلق عالى.
| |
|
|
|
|
|
|
Re: ناس الحاج يوسف .... (Re: عمر عبد الخالق سعيد)
|
عمر عبد الخالق الحكاية شنو ياخي
لا أنت لا ناس الحاج يوسف الناس دي مساهرة في حفلة المريخ ولا شنو
كل مرة أنا أمشي أجيب البوست ده من آخر محطة؟؟
أنا في شارع واحد .. كل يوم أمشي لحدي الكرتون أجيب البوست وارجع كداري
اتصلحو معانا يا ناس سان جوزف
فوووووووووووق
| |
|
|
|
|
|
|
Re: ناس الحاج يوسف .... (Re: عمر عبد الخالق سعيد)
|
عمر سلامات
نعم كان الزنجى اخو اخوان و شهم و من السباقين فى الواجب. ولكنه ظاهره تستحق الدراسه. لقد شهدت له مواقف كثيره و اجمل موقق كان موقعت مربع 5 , كانت ندوه سياسيه فى المسجد 20 من الكيزان ضد الزنجى و إستعملت كل الاسلحه المحظوره ضده من طيران مدفعيه ثقيله لكنه هذمهم هذيمه نكراء و شتت فلولهم وادمى وجوههم... زغرد له النساء....و الله كان لوحده و اعذل و لكنه كان 1000 رجل. و اذكر كان الناس بتتندر عليهم بيقول 500 كوز ماتوا و عشره الف جرحوا.....
تحياتى و اشواقى
| |
|
|
|
|
|
|
Re: ناس الحاج يوسف .... (Re: نها محسن أبورأس)
|
بالله كل الناس الحلوين ديل من الحاج يوسف؟..ما شاء الله العدد ماش في زياده وكل يوم يظهر عضو جديد من تلك الديار العامرة باهلها. شكرا يا عمر لكونك بادرت بتعريفنا عليهم..
يلا طيب اعملوا رابطة ابناء الحاج يوسف بسودانيزاونلاين..
| |
|
|
|
|
|
|
Re: ناس الحاج يوسف .... (Re: عمر عبد الخالق سعيد)
|
Quote: عمر عبد الخالق الحكاية شنو ياخي
لا أنت لا ناس الحاج يوسف الناس دي مساهرة في حفلة المريخ ولا شنو
كل مرة أنا أمشي أجيب البوست ده من آخر محطة؟؟
أنا في شارع واحد .. كل يوم أمشي لحدي الكرتون أجيب البوست وارجع كداري
اتصلحو معانا يا ناس سان جوزف
فوووووووووووق |
أها المره دي جبتو من قريب داردوق تاني شوفو البجيبو ليكم منو
| |
|
|
|
|
|
|