|
|
 تحية إلى فتحية .. أم مجاهد
|
أنا لا أعرف إذا كان اسمها فتحية أم لا، ولكن أظن ذلك.. على كل حال أحببت أن أسطّر لها تحية خاصة بعد أن قرأت قصيدتها العامية الرائعة في سودانايل..
من وحي الغربة
أم مجاهد/السعودية
[email protected]
حليلوُ سودانَا الزمانْ .. زمن الناسْ جميعا حُنانْ
زمن كل القلوبْ مرتاحه ما ملْيانة بالاحزانْ
زمن بلدنا أمان وناسا حُنان.. وماَ شاغلاهم الدنيـا
بالعِيشه واللُقمــه ومــا طاحناهـمْ الاحـزانْ
زمـن الدمعـه فـي الاجفان
عشـان واحـدْ رجَـعْ لـي امـه ليلـةْ عيـدْ
وليهـــــــو زمـانْ ..... طوّل من الحبّانْ
حليلو سودانا الزمان..
زمـن كـل البيـوتْ مرتاحـهْ وكـل الشوارعْ واحـهْ
مزروعـه بالياسميـــــــــنْ...وبالريحـانْ
زمـن كـل البيوتْ ما بتخـلو من شاعر..أو فنانْ
زمن مـا بنعـرفْ الغربه و الهِجـرةْ ... والأشجـانْ
حليلو سودانا الزمان
زمـن النــاسْ جميعا بسيطـــهْ ...
زمـن الجـارة بتشـحـد الكبريتهْ ...
زمـن الملحــهْ و الطلحـــهْ ...
والكراســه.... وكُـلو بي تعريفهْ
زمـن يـدوك تلاتْ عيشـاتْ ...
ومـن فوقهـا الزيـاده رغيفـهْ ...
أهـ يا سودانا الزمان
زمـن فيـك المعيشـه رخيصه....
مـا اتجهجهنـا فيـك ليـلـه..
وكـانـت حياتنـا ظريفــهْ
لكنـو .. وا..اسفاي....
اتــاري صحيــح الزمــانْ دولاتْ
واتــاري صحيــح السنيــن جولاتْ
زمــن كــل البلادْ خيـــــــــراتْ
مـن بــارا .......للخرطــومْ
ومـن مدني لي سنكاتْ
مـا بنعرف الشيكـاتْ الطايره و الراكاتْ
زمـن كـانت قُروشنـا عُـزاز وبتسـاوي دولاراتْ
مـا جِبْنَـاها مـن غربـه ..ولا شِلْنَاها بالعُملهَ
دي قروش تِجارْ ظاهـراتْ
او في ارضْنَا مزروعاتْ
او بـي عُقولنـا جِبْناَها
وصدرنـا لي كـل الامم
عُلومْ..عُلومْ و صِفـاتْ
صفاتنــا السمحـه موروثه
و بالطيبه مقرونـاتْ
زمـن مـا بنعـرف الازمـاتْ
ومـا وصَفُونَــا بي ارهــاب
ولا حــاجـاتْ
اسـامِي جديده في عالمْنَـــا
مـا معروفــه يـا سـاداتْ
نـاس ارهــاب... وخَطْـــفِ طيــاراتْ
وعُزله ما عِشنَاها في تاريخِنَــــا
ومقاطَعَـــــةْ دولْ جــــارات
واللهِ عشِنـا و شُفْنَا فيـــك ي زمانْ
واتاري صحيـح الزمان دولاتْ
طَارْياهُو سـودانـا الزمانْ...
زمن الجامعـــه بالمجـانْ
والعيشَـه بي قرشينْ ...
والسكـر مِنَ الدكــانْ
زمن ما بنعـرف الصرفــه
والمويـه فــي الخزان
زمن مـافـي زول محرومْ
ولا زولاً مبيتوُ جيعـانْ
زمــــــن الكهربا امْ عمـدانْ
زمـن بلدنـا نظيفه مـا موبوءة
لا بعوضــه ولا ضبــــانْ
زمن متر القماشْ ب ريــال
زمن الساقيه والتربـالْ
زمـن القليلو كثير..
زمـن الجنيــه يســاوي ريال ْ
زمن حكامنـــا مـا ِبتْقَاسُـــــــو
بالعِمه .. والســروال ْ
زمن الماقايس كــان ليها ألف ألف مجـالْ
طارياهو سودانا الزمان
زمـن كـان البلـد محبـوبْ
زمـن طقـتْ وحنتوبْ
زمـن جامعــة الخرطــوم
مـا فاكره في الجامعـاتْ
زمن كـل الدروب جامعــــات
فيهـا العالمْ الدوؤبْ
وفيهــا الزارعْ الموهــوبْ
لكنـو...وا اسـفي فـرتْ جميع الناسْ
وخـلوا الدروبْ خاويـــــــاتْ !!!؟؟؟؟؟
طارياهو سودانا الزمان
زمن ما بنعرف المليــونْ
(ولا اتكلمنا بي (اش لونْ
(ولا اتلونا بـي (كم لـــون
وهاجرنـا من دارنــــا
لاجــل اللقمه..و الحيطه.. والماعونْ
(وحكمونــا ناس (كم لون
وهــاجرنــا في الدنيـــــــا
لا خلينا دوحــه ولا جـــده
ونسينــا الحله والكانــونْ
وبِعنــَــا ديــــارنــا
وضهرنـــا كلـو ديـــونْ
واتلموا اخـــوانــــا الكرامْ
ابو شيمــا.. وابـو اينـــاسْ
وقالــوا خــلاص بِقينــــا احســــنْ نـاس
وقالوا مـافي خيــارْ
عيـالنا صغارْ.... ودارنا ودارْ
وجــاهمْ ابـو مجـاهـــد ... المأمون
وقــال ليهم.. قلتـوا فــــي المضمـون
سبحـانوا مولاي القديــر
كيــــف الزول يبيع بلـدو
ويعيــــــش مهيـوْن؟؟؟
الزول عزيـز وسـطْ اهلـو
اكان معدم و اكان مديـونْ
والزول كبير في عين اهلو
اكان عاقلْ و اكان مجنونْ
والزولْ فـي ربـوعْ بلدوُ
لا يخـاف شُرطه ولا قانونْ
لكنو في الغربـــه
عايـــش العمرْ مسجـونْ
وتلقاهـو طـول اليــوم
مـن غيـر سبـب مغبــونْ
وان كترت قروشــو كمان
تزيــــدو همــــــومْ
وان جـــاتو الرســــايل يــوم
... كمــان تزيدوا شجونْ
لا بلــــدو عاجباهــــو
.... لا الهجــــرة مـاسكـاهــو
وعايش العمــــــر محزون
سبحانو مولايــا القديــــر...
كم لي في عبادو شئــونْ
لكني....يا الاخوان انا ليَّ راياً تانْ
ما تقولوا راي (حُرمه) ... وكلام نِسْوانْ
انا شايفاكم جميع اخواناً كِرام شجعانْ
ما فيكم النايمْ الكسلانْ ..
ولا فيكم الرقدْ الفترانْ
انتو اولاد الاُصول
كيفن عاد الاصيل ينهانْ
وباقي الكلام عندي ..
بس ارخو لي انتو اضانْ
قضيتو كم في الغربه
وهاجرتو في البلدانْ
شيدتو كم عماره
وعليتو في البنيانْ
وقومتو كم مشروع
وزرعتو كم فدانْ
وشلتو كم هديه للجار وللعشمانْ
وسددتو كم ديون للعندو و العدمانْ
وزوجتو الشباب جُمله وعمرتو كم دكانْ
والحين بشوف وقت الرجوع قْد حانْ
لانو سنين العمر ضاعتْ وضاع معاهَا زمانْ
في هلولة الغُربه الصارت سين ... وزمان
وكل الحصل فيها.. انك بقيت آله في شكل انسانْ
وباقي الكلام عندي ...بس ارخو لي ءانتو اضانْ
باقي العمر لِمّوُهو قبل العمير كان حانْ
لا تنفع اريتو ... ولا اريتو كان واِنْ كانْ
خلونا نلمْ عزالنا .... ونرجع السودانْ
اصلو الليهو قسمه بياخدها
ان صافوهو الزمان او خانْ
والبيجري جري الوحوش
غير النصيب ما كانْ
أم مجاهد
المملكة العربية السعودية
نوفمبر /1996
|
|
 
|
|
|
|
Yasir Elsharif
ودقاسم
إسماعيل وراق
فيس بوك
تويتر
انستقرام
يوتيوب
بنتيريست