|
|
 يعيش السمك ... يعيش !
|
موسيقى افتتاحيّة ) ثم ..
" سيداتى آنساتى سادتى ... السادة المستمعون ... اهلا بكم و حلقة جديدة على الهواء مباشرة من برنامجكم الاذاعى الاسبوعى ( كلام والسلام ) ... "
( أصوات تصفيق ثم ) ...
" ضيفنا الليّلة من طراز خاص جدا ... طراز نادر من المسئولين .. يمتلك مقدرة فائقه على لى الإقناع .. وموهبه فذة فى فنون التبرير .. نستضيفه الليلة ليبرر لنا الزيادات المتكررة فى أسعار (الخبز) .. حيّوا معى ضيفنا الليلة : سعادة المسئول (تبرير جاهز) ..
( تصفيق حاد مدو لمدة خمسة دقائق ثم ) ...
- أهلا بيك معانا سعادة المسئول (تبرير جاهز) .. الاذاعة كلها نورت و الله بتشريفكم
للبرنامج ..
- أهلا بيكى ...
( تصفيق حاد جدا ) ..
- الحقيقه تلقينا مكالمات كتيرة بتسأل عن اسباب زياده أسعار (الخبز) المتلاحقة المواطنين بيقولو مش عارفين الاسباب فممكن تشرح لينا الحاصل؟
- اولن بالتبادى حقو المواطنين يعرفو إنو (ليس بالخبز وحده يحيا الإنسان) .. يعنى ممكن (بالكسرة) بالرز ما شرطن الخبز لأنو (الخبز) ده اسعارو بتزيد عالميا ونحنا طبعن جزؤ من العالم وطالما نحن جزؤ من العالم يبقى لازم يزيد عندنا وبعدين هى زيادات طفبفه يعنى ايه لمن (الرغيفاية) تزيد ليها كل شهر شهرين (كم قرش) يعنى !!
- والله كلام حضرتك صاح يعنى شنو قرش قرشين دى إسمها زيادات دى؟ حتى ما بتأثر على المواطنين البيصرفو الحد الادنى من الاجور .. بس سعادتك برضو المواطنين بيشتكو إنو حجم (الرغيف) أصبح صغير شويه وأقل (شافع) ممكن تلاته (عيشات) ما تشبعو
- ده صحيح بس الناس البيقول كده مش مواكبه البيحصل فى العالم .. يا جماعه فى ثورة بتجتاح العالم إسمها (ثورة التصغير) يعنى كل الحاجات البيتم تصنيعها ماشه فى تصغير ..مثلا (أجهزة الكمبيوتر) شوفى زمان إذاى كان حجمها كبير الكمبيوتر الواحد قدر (الأوضه) ودلوقتى بقى صغير فى حجم (الكراسه) .. التلفونات شوفى كانت ضخمة إذاى ودلوقتى حجمها بقى قدر أيه؟ .. الحاجات كلها بتصغر .. طيب الرغيف ده مش حاجه؟ دلوقتى نحنا بنفكر إنو نصنع رغيف (متناهى الصغر) يعنى micro تمشيا مع هذه الثورة
- رغيف micro ده كيف يا سعادتك !
- ده رغيف صغير ما بتشاف بالعين المجرده .. يعنى لازم المواطن وهو رايح ع (المخبز) يكون شايل معاهو (عدستو المكبرة) علشان يشوفو !! حرام يعنى كمان الزول يدفع فلوس فى رغيف وهو مش شايفو !!
- الحقيقة برضو المواطنين بيتسالو عن (معدل النمو الإقتصادى) والصلة بتاعتو بإرتفاع أسعار (الخبز) ؟
- طبعا للأسف المواطن بيفتكر إنو (معدل النمو الإقتصادى) بيتناسب (عكسيا) مع (الأسعار ) يعنى كلما (معدل النمو) يزيد (الاسعار بتنزل) مشكلة المواطن إنو مش مطلع .. مشكلتو إنو ما بعرفش (إقتصاد) .. يا جماعت الخير (معدل النمو الإقصادى) حقو تفهمو إنو (عندنا) بعد ما عملنا ليهو (تأصيل وكده) بقى بيتناسب طرديا مع الاسعار (يعنى المعدل يزيد) وبى وراهو طوااالى (الأسعار تزيد) مال ايه !!
- (تصفيق حاد) هتاف : آآآى ده الشغل ده الشغل .. آآآى ده الشغل
- سعادة المسئول .. أنا مستمتعة جدا بالحوار ، بس المكالمات بتنهال علينا من قبل البرنامج ما يبدأ .. تسمح لنا نستقبل بعضها ..؟..
- OK ..
- آلو .. مين معايا ..؟..
- أنا ( .... ) .. ممكن أكلم حضرة المسئول (تبرير جاهز) ..
- اتفضل .. معاك سعادة المسئول (تبرير جاهز)
- السلام عليكم يا سعادتك..
- أهلا بيك ..
- نحنا والله فى كل المنظمات القاعديه والوحدات الاساسية واللجان الشعبية والهيئات المعتمديه سعداء جدا يا مولاى بسماع صوت حضرتك .. وسعداء اكتر لهذا التوضيح (العلمى) الإقتصادى الذى تفضلتم به من أجل تنوير المواطنين بالأسباب التى دعت إلى إرتفاع سلعه الخبز .. ايه يعنى لما الخبز يرتفع كل شهر شهرين دى فى بلاد تانية بيرتفع سعرو فيها كل خمسه دقائق يعنى تكون ماشى على الطابونة شايل ليك جنيه علشان تشترى أربعه رغايف لمن توصل تلاقى الرغيفه عملت جنيهين .. !!
- متشكر جدا .. بالله كلم الشعب الفضل ده !!
- ( المذيعة ) : و معانا اتصال أخير .. آلو .. مين معايا ..
- ( صوت جاد ) : أنا وأحد من مواطنى البلد دى .. أكلم المسئول ده لو سمحتى؟
- أرجو مراعاة آداب الحوار يا أخ .. اسمو سعادة المسئول ..
اتفضل اتكلم ..
- يا سعادة المسئول ..
- أنا سامعك ..
- الرغيف يا سعادتمك عرفناهو زاد عالميا ذى ما قلت أها باقى الحاجات دى زادت ليه؟
- ذى شنو؟
- ذى شنو كيف ؟ أنا أمبارح مشيت النيل (أشرك) قمت قبضت ليا سمكة قلت خلاص فرجت أمشى (أحمرا) نتعشى بيها أنا والاولاد .. وديتا للمرا قلت ليها حمريها قالت ليا : (زيت مافى إنت ما عارف رطل الزيت بقى بى تلاته ألف والدقيق ذاتو زادوهو)؟
- (المذيعه) : أها وعملت شنو؟
- قلت ليها طيب خليك من الزيت والدقيق قطعى ليكى فيها (بصلة) وأعمليها لينا شوربه قالت ليا (أجيب ليك بصل من وين ما عارف الربع عمل ستة تالاف)
- وعملت شنو؟
- أعمل شنو شلت السمكة ورجعتها البحر تانى أول ما دخلت قامت غطست فى المويه قامت طلعت تانى ومعاها سمك كتير قعدو يهتفو ... تعيش الحكومة .. تعيش الحكومة تعيش تعيش تعيش !! بالله دا إسمـ... ورررررررررررر .. ( انقطع الخط ) ...
- ( المذيعة تبادر بالكلام ) : يظهر ان الخط انقطع .. معليش ، واضح انو دى حكايه المواطن ده ألفها براهو ساااكت وعشان كده الخط انقطع
- (تلتفت للمسئول) : أشكر سعادتك جدا على وقتك الثمين الأديتو لينا و على سعة صدرك و تقبلك لكل الآراء و الرؤى اللى عرضناها على سعادتك فى حلقه الليلة ..
- العفو ..
( تصفيق حاد جدا ) ..
- أعزائى المستمعين .. كانت هذه حلقة الليلة من برنامجكم الاسبوعى ( كلام والسلام) ، ولنا لقاء آخر ف الاسبوع المقبل ان شاء الله .. كانت معكم ( حنان تحت التمرين ) و المخرج ( عبده الأونطجى ) .. و السلام عليكم و رحمة الله و بركاته ..
( تصفيق حاد جدا ) ..
( تختتم البرنامج ، بينما الميكروفون مفتوحا و البث لا يزال مستمرا و هى لا تلاحظ و تهتف ) : Sorry يا سعادتك .. المكالمة الأخيرة بتاعت المواطن بتاع السمكه دى جات غلط و الله .. دى غلطة (الحمير) القاعدين هناك فى السويتش و ..
- ( صوت يأتى من بعيد ) : يا أستاذه نحنا لسه ع الهوا ..
- ( تشهق ) : سجمى كان كده !.
( موسيقى ختام البرنامج ) ..
|
|
 
|
|
|
|
|
|
|
|
Re: يعيش السمك ... يعيش ! (Re: الفاتح يوسف جبرا)
|
ما قصر كتر خيره برضو القدم تفسير وما ف=قال ليهم أكلو كيك
أستاذ الفاتح
سرد قمة فى الإبداع وإختار أسامى مناسب لكتير من البرامج البتتقدم فى التلفزيون
تعيش الحكومة تعيش تعيش
مودتى
سمكة
| |
|
|
|
|
|
|
| |
الفاتح يوسف جبرا
sama7
محمد عبد الماجد الصايم
فيس بوك
تويتر
انستقرام
يوتيوب
بنتيريست