يلا يا اولاد المدارس ...لنلحق اخوننا الصغار في امتحانات الاساس

Quote: السلام عليكم ورحمة الله تعالي وبركاته ............................................ وعليكم السلام ورحمة الله تعالي وبركاته ........................................... جلوس .................................. الما (جاب) رسوم المتحانات منو؟ - انا يا استاز... انا يا استاز......... انا يا استاز (واختلطت الانا حتي لكأنها واحد) ... لاحولا انتو كلكم ما جبتو الرسوم؟ ما كلمتوا ابوكم؟ - ابوني متوفي يا استاز.. استاز انت ابوي ده وين... (كال ابوي كال , ابانا اللزي في السماء بس) , هوي البو... ............................ يا جماعه دي مصيبة شنو دي... (اتحرك استاز عثمان لفصل المعلمات) ست نعمات انت علي ده مش اشطر زول في فصلك؟ - ااي يا استاز عثمان مالو؟ نمرتو ما حلوه في الدين ولا شنو؟ لا لا هو مع الاولاد المادافعين وبالصوره دي ما حا يطلع ليه رقم جلوس - سجمي ........ (بعد تفكير) انا عندي خته مع ناس ست محسن في (المدرسه الخاصه الجمبنا دي) بقبضا وعاد نسوي شنو بدفع ليه,, هي التلتين جنيه شن طعما والله يا استازه ربنا يكتر خيرك.. لكن... التلتين طالب الباقين ديل كيف؟ ............................. ............................... ماظنيت يدفع ليهم زول احن من ناس (ايدينا للبلد) ولا شنو؟؟ اخونا اسامه البلوله عمل (سيرش) في مدرستم بس (قال للدهشه هل اكتفيتي فقالت: هل من عجيب) وطلع بحصيله (صعبه خلاس) حا يعرضا عليكم , لكن مبدئيا (زي في قريشات بدت تتلماء) وبندور المروه انا بقترح نبدا باشتراكات تكون شهريه لكن مبدئيا (نلحق) امتحانات الاساس دي تخريمه: سنه ثامنه وسنه اولي في حته واحده يا جماعه احي (الوعي) التربوي رباح واسامه يدكم معانا بكره احلي اخونا نعيم ادانا فكرة حلوة و احلي ما فيها سهولتا لكل من يحب المساهمة عشان ما يتعب يقوم يحول القروش الداير اساهم بيها في شكل رصيد في رقم سوداني 0122321343 و هو قاعد ابيعو لبتاع الاتصالات و كدة بنكون لميناها بسهولة و سرعة شدييدة نلحق بيها الامتحانات دي

Quote: انا اسامة .. انا المشيت شفت المحن .. انا الشفت استاذ الحاج وهو محتار في رسوم الطلبة الممتجنين بعد اسبوعين .. عارفينو محتار ليه .. عشان ناس المحلية بحاسبوهو بالراس .. و الله العظيم قال لي كدة .. بحاسبوني يا اسامة بالراس .. عندك مية راس تدفع مية الف .. حتى لو كان في من المية ديل تلتين ما قادرين .. ما بهمهم .. برضو دايرين حقهم ولا ما حيمتحنو .. و الاهلو ما قادرين يمشو م زاااتهم المحلية يفتشو طريقة اعفاء .. المحلية ترجعهم المدرسة و تقول ليهم .. لو المدرسة موافقة نحنا ما عندنا مشكلة .. و يجو بعدين .. يعدو الريسين .. اتخيليو .. ********************************** وانا زاااتي السمعت ام سودانية عييييينك عينك كدة و قاااااعدة قدامي بتحكي لي عن ولدها المعوق - شفاه الله - .. و البي سببو هي مأجرة سرير من سراير بيتا لي واحد يفرش فيهو بضاعة و يديها الايجار يوميه عشان تقدر تشتري حفاضات لي الولد .. عارفين الزول دة بديهم كم ..؟ اقول ؟؟؟ طيييييب اقول .. بديهم تلاته جنيه في اليوم ... و ما اظن باقي القصة في ليها داعي .. انا زاتي المشيت مدرسة البنات و قابلت نادية .. عارفين نادية مالا ؟؟ نادية في سنة اولى ابتدائي وبتطلع الاولى على الفصل .. نادية عندها ستة اخوان .. ابوهم هرب من المسؤولية عدييييييييييييييل .. ابوهم هارب من البيت .. متخيلين ؟ هرب الزول دة .. جرى عدييييييييل .. مافي .. بجي كل راس تلاتة شهور كدة تقريبا بسلم .. بشوف الاولاد و بختفي تاني .. جد و الله .. امهم ما شغالة .. وصلت مرحلة انها تجي المدرسة و تعرض خدماتها كخادمة في بيوت المعلمات .. و ما لاقية شغل .. اولادا الكبار التلاته سابو المدرسة .. ببساطة لانهم ما عندهم الحاجات الاساية البحتاجا الطالب .. هدوم .. كراسات .. حق الفطور .. كدة .. ما عندهم .. سابو المدرسة .. منطق .. مش كدة ؟؟؟ عارفين .. المدرسات فجأة اي واحدة جابت طالبة و جات .. مها .. قصتها كدة .. لا ؟؟ دقيقة يا استاذة زينب .. فاطمة محتاجة اكتر من مها .. لا و الله .. سلمى هي المحتاجة .. لا .. هناء .. لا .. سارة .. لا .. هبة .. و هلم جرا .. كنت في الاول مذهول .. بعدين مصقوع .. بعدين ضئيل .. ضئييييل جدا .. ضئيله احلامي قدام مصايب الناس دي .. ضئيل جهدي و فكري و مالي .. ضئيل انا زاتي ياخ .. عشان انا بقدر اساعد و ما كنت بساعد .. و فجأة .. بقيت ما عارف مالي .. و كدة احسن .. عشان ما نجري ورا عاطفتنا و دموعنا .. و نبقى ناس دراميين .. نحنا محتاجين نشوف .. نعرف الحوجة شنو .. و ندفع .. و ندفع .. و ندفع .. قدر البقدرنا عليهو رب العالمين .. جنيه .. اتنين .. مية .. الف .. بقولو .. ليس من راى كمن سمع .. لكن انا متأكد .. لو انا حسيت .. انتو حتحسو .. بس عشان انتو سودانيين .. ما اكتر .. و لو قريت الكلام دا و انت ما سوداني .. نحنا بالنسبة لينا انت سوداني .. لانك جيت هنا و حسيت بينا .. و الاحساس هو اسا كل الدايرين نعملو .. و تصور كيف يكون الحال لو ما كنت سوداني و اهل الحارة ما اهلي ... و انتو اهل حارة .. و الحارة ياها دي .. اديتكم منها جمرة