ادوات النصب : جلابية سودانية ناصعة البياض مكوية بعناية فائقة وبالطبع { شال } موضوع على الكتف زي بتاع ناس الله اكبر !! وطاقية جميلة ومركوب { نمر } على مقاس القدمين بالضبط وحقيبة يد فاقعة اللون تسر الناظرين وبالطبع شوية دراما محبوكة بطريقة تجعلك تضحك وتبكي في آآآآآآآن !!! مكان الاحتيال : باب شريف بجدة وبالضبط قريباً من شارع الذهب الذي يؤدي الى القنصلية السودانية بجدة زمن الاحتيال : بعد صلاة الجمعة مباشرة 00 يعني أنا والحرامي كنا على وضوء !!!! المحتال : شاب وسيم خارجياً اما دواخله فهي مريضة ونتة جداً المحتال عليه : الشيخ ابوحراز !!!!!! الشيخ دي بصراحة تعجبني كثيراً فانا اطرب لسماع الشيخ مصطفى الأمين والشيخ النفيدي والشيخ صلاح إدريس والشيخ جمال الوالي !!! وبكرة غصبا عنكم حانقول الشيخة ندى القلعة !! اها بعد قديناكم بحصة العربي نشوف الحصل شنو ؟؟ قبل ثلاثة سنوات وبأوامر عليا من ست النفر كنت أتحاوم بباب شريف لزوم شراء ثوب لحرمنا المصون { قال شنو قال } لحضور مناسبة زواج صديقتها وعديل كده قالت الثوب السويسري لو ماوصلها معناها انا مابحبها 00 قوم ياحروزة بعوارة السودانيين والشهامة الزائدة عن الحد امشيي { اتضرع } في باب شريف وهناك طبعاً تشوف العجب نسوان سودانيات ماشاء الله كل واحدة {قايدة} ابوالقدح بتاعها قدامها وصاحبنا شايل الأكياس وهي عليك أمان الله تتفزر ولاهاميها أي شيء 00 واحدة قالت عاوزة ثوب سهرة أها اليماني قال ليهم سعره 200 ريال عمك قال السعر غالي وقال للمدام نمشي محل تاني يمكن نلقى أرخص شوية بالله طوالي خلفت { ورك } على { ورك } ومدت ليك بوزها واتحكرت في واطاة الله وقالت مابتطلع الا تشتري من هنا وماهي دقائق حتى خرجت { الضحاكات } غير ماسوفاً عليها وابتسمت المدام وهي تقوم بتجربة الثوب على جسدها بينما البوز هذه المرة كان من نصيب شخص آخر !! هو ابوالقدح بلامنازع بالله عليكم الله هسى دي لو نسوان السودان ديل كلهن اتحكرن وانفشخن في واطاة الله دي واي واحدة مدت بوزها واتكرفست وغلقن عليهن الأبواب واي واحدة قالت لزوجها الليلة من هنا لحد شهر كامل مافي وضوء ولاتيمم الا بشروط اعادة الديمقراطية للسودان وتمكين المراة من كل حقوقها الدستورية وحل مشاكل دارفور وابيي وكاب الجداد والوزير دقس وتوزيع الثروة والسلطة بالله عليكم الله مش كان كل مشاكلنا اتحلت وريحنا نفسنا من وجع الدماغ ووجع { الضهر } فعلنها نسوان جزر القمر قبل كده وحلفن انو واحدة من الجزر لازم تكون تحت سلطة فرنسا وقطعن الموية والنور من أزواجهن الكانوا عايزين الجزيرة تكون في حضن جزر القمر وكان ذلك لمدة شهر كل واحدة تغلق غرفتها عليها وأخيراً انفزر كل الرجال وظلت الجزيرة تحت حماية فرنسا برضو تقول لي نيفاشا !!! المهم نفذنا اوامر الست بسرعة البرق 00 واشترينا الثوب بعدين ياجماعة لماذا بعض النساء يربطن مابين الحب والأشياء المادية يعني لو ما { دقيت } ليها دهب انت مابتحبها لو ماضقت ملاح امها إنت مابتحبها لو ما مليت البيت ملايات انت مابتحبها !!! ولو ما اتفشخرت واتبوبرت انت مابتحبها !!! عندي حكمة كالعادة قمت بتأليفها لوحدي ولكن دائماً ست التفر تقول لي { بلها واشرب مويتها } تقول الحكمة " الذهب لايصنع الحب ولكن الحب يجر الذهب من أذنيه وياتي به " المهم قابلني عند خروجي هذا الشخص المعتوه وقال لي أنه أتى من السودان ويريد الذهاب الى نجران ولايملك مبلغ تذكرة النقل الجماعي وذكر أن معه خمسين ريال ويحتاج الى مبلغ 100 ريال وهذا شيء طبيعي كثيرون منا حينما يحضرون من السودان تواجههم هذه المشكلة ولكن يدفع ضريبة ذلك إخواننا بجدة الذين يعانون كثيراً من هذه المشاكل رغم ان الجاليات الأخرى لاتفعل ذلك وكل واحد منهم يأتي بالمبلغ الذي يوصله الى مكان عمله 0 وبدون أي تردد وبدلاً من مائة ريال اعطيته 150 وانتهت الحلقة الأولى من مسلسل الاحتيال 0 قابلني نفس الشخص قبل سنة ونصف وبنفس السيناريو ونفس النغمة وقلت ربما تكون صدفة أو أن هذا هو النبي { الخدر } الذي يتحدثون عنه ربما ارسله الله لي ليمتحنني به وأعطيته مرة اخرى رغم انه لم يكن معي أي مبلغ وذهب معي بكل جراة الى الفندق الذي أنزل فيه واخذت له مبلغ من الاستقبال !!! وبعدها دخلت الفندق وتوضأت واستقبلت القبلة وبدأت أدعو الله إن كان هذا هو النبي { الخدر } فلا أريد سوى قطعة ارض وبيت والاستقرار بالسودان وأن تسمع ست النفر كلامي باستمرار 00 واهم شيء ناس الجبهة والحركة الشعبية مايحردوا ويخلونا معلقين بين السماء والأرض !! ثم قابلني يوم أمس بعد مضي أكثر من سنة لم ألتقيه وبدأ يحكي في قصة نجران وسفره وأنه مقطوع ويريد أكمال المبلغ فقلت له في سري { والله اليوم مش كان بقيت النبي { الخدر } الليلة كان بقيت نانسي عجرم برضو حاتشوف وسيكون لي معك كلام كثير جداً بعد أن انهى حديثه قلت له : كيف حال السودان في هذه الأيام فذكر لي ان كل شيء على مايرام ولكن يوجد غلاء في الأسعار ؟ طبعاً لكي يطمئن أكثر عملت ليهو فيها عوير وبتاع { ريالة } وكأنني لا اعرفه سألته عن الغربة ولماذا لانفكر في العودة ؟؟ وبدأ يحكي لي عن معاناته وان الرجوع اصبح لابد منه خاصة مع وجود فرص استثمارية كثيرة على حد زعمه !! قال فرص استثمارية قال !! وكان لاينظر الى عيوني بتاتاً بل الى جيبي وكلما أدخل يدي في جيبي وتخرج بيضاء من غير ريالات أجده ينظر الى بامتعاض شديد 0 قلت له ما شاء الله عليك تنفع تكون سيناريست !!! فقال لي : هل اعجبك حديثي ؟ قلت له بالطبع لكن هذه المرة ساتحدث عن غبائك إن سمحت لي فبالرغم من احتيالك المتكرر إلا أنك لاتتفرس جيداً في وجوه الناس ياكافي البلاء لابتفرز اب جضوم من اب كوكة من اب عتلة من أب فركة !! لقد قابلتني ياحيوان قبل ثلاثة سنوات ولهفت مني 150 ريال !!! ثم قابلتني قبل عام { ولغفت } 50 ريال أستلفتها من الاستقبال لأمنحك لها في المرة الثانية لم اعتبر الأمر صدفة بل قلت أنك النبي { الخدر } قد ارسله الله لي ولم أكن أتوقع أنك فرعون سوداني !!! وتأتي اليوم لتكرر نفس السيناريو حتى النغمة لم تغيرها 00 مازالت هي نغمة نجران وقبل أن يقول أي شيء مسكته بقوة وقلت له والله العظيم ياحمار اليوم سأفرج فيك كل خلق الله والله والله اذا لم تديني قروشي القديمة فإن مشكلة كبيرة في انتظارك وبدأ يتلوى وريقه نشف وبدأ يتصبب عرقاً وأخيراً أخيراً طلعت منه بمبلغ 110 ريال !!! قال نجران قال !!!
حكمة اليوم : طبعاً تذهب قروش الإحتيال من حيث أتت فقد التقيت بقريبتين لوالدتي أتين ولم يسافرن منذ الحج ولسانهن بطول سكك حديد السودان ولو كنت اعلم أنهن مازلن بالمملكة لحرمت السفر نهائياً لجدة اشتريت لكل واحدة منهن ثوب ب 55 ريال وكان الله في عون المحسنين 0 قال قروشي القديمة قال !!!
02-09-2008, 12:26 PM
ابو جهينة ابو جهينة
تاريخ التسجيل: 05-20-2003
مجموع المشاركات: 22483
Quote: عزيزي ابوحراز ليس للغباء دخل ، بل هو قلبنا الطيب ، ومحبتنا لفك مصيبة الغير
صدقني هذا القلب الطيب أنهكته مثل هذه الاحتيالات اشاهد كثيراً بالسعودية أن الغالبية العظمى من الشحاذيين يتجهون للسودانيين مباشرة لهذا اختلط الحابل بالنابل ولاتعرف من هو المحتاج ومن هو المحتال هذا القلب الطيب أوقع الكثير من السودانيين في مشاكل كثيرة جداً وبعضهم فقد عمله بسبب ذلك وفي النهاية يضحكون عليه يبدو لي أن الجو المحيط بنا في الوقت الراهن يتطلب الكثير من الحرص والكثير من الحذر في السودان للأسف ظهرت الكثير من صور الاحتيال وشاهدت الكثير من المغتربين وقد وقعوا ضحايا لذلك أنا اصبت بهذه الفوبيا اصبحت أخاف من الكل ولا اثق في الكثير من الناس وذلك لم يتم الا بعد تجارب مريرة جداً كل المشاريع الصغيرة التي قمت بها فشلت تماماً بسبب الثقة الكثير من الناس يحاول أن يستغلفك وعندما غيرت طريقة تعاملي في بداية 2007م تغيرت اشياء كثيرة عندي للايجاب بل وشعرت بالكثير من التقدم في حياتي
02-09-2008, 06:32 PM
ابوحراز ابوحراز
تاريخ التسجيل: 06-27-2002
مجموع المشاركات: 5515
Quote: لكن مثلك عينة يا أبو حراز ... لا تبلو لا تشرب مويتو
تعرف جارتنا متزوجة صائغ والله النسوان عندما يجيبن سيرة هذا المخلوق كل الكلام يكمل فلان بحب مرتو وفلان عمل ليها لكن والله رغم ما اقوله فإنني اعترف أن المراة السودانية أقلهن طلبات يعني الشيء القليل بيرضيها صحيح هناك فلتات وبعضهن بيشوتن ضفاري ولكننا مازلنا أحسن حالاً لكن كيف اشيل باقي قروشي من الزول المحتال دا ؟
02-10-2008, 06:37 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
أذكر وأنا مغادر من جدة مررت على الكيلو { 8 } وهو كوبري مشهور جداً به الكثير من السودانيين بعضهم يعمل والآخر لايعمل وبالطبع توجد الكثير من بائعات الشاي والأطعمة السودانية على مستوى النظافة يعتبر هذا المكان الأسوأ في المملكة قاطبة فالنفايات تحيطه من كل جانب ولكن يمر الانسان به لأنه يرى فيه صورة مصغرة للسودان حيث تشاهد نفس الطبائع وايقاع الحياة الذي تركناه خلفنا أنا اشرب فنجان قهوة وسرعان ما اعود وكثيراً ماكان لعابي يسيل وأنا اسمع ست الكسرة وهي تحكي بنيت بيتي في أمبدة وعرست بناتي وبنيت لي ولدي واشتريت قطعة في صالحة مرات ينتابني احساس بأن الواحد لو اشتغل { كسرة } سوف يختصر الكثير من المشاوير المهم لمحت واحد يعمل في بيع اشرطة الكاسيت وكنت في حاجة لشريطين لأحمد المصطفى ومصطفى سيد أحمد وبالفعل وجدت ضالتي لديه وعندما طالبته بتجربتها تعذر بان البطارية ضعيفة المهم لم تكن سيارتي تبعد كثيرا دفعت له وأخذتها وعندما قمت بتجربتها كانت سيئة للغاية ويبدو لي أنها من نوع الأشرطة التي يتم طباعتها بعيداً عن المصنفات الفنية وعندما ارجعتها له لم يصدق وأخذته معي وقمنا بتجربتها أمامه فاقتنع وارجع لي مادفعته له السؤال : على يعقل أن هذا الشخص لم يقم بتجربة شرائطه قبل عرضها للبيع ؟؟
02-10-2008, 07:21 AM
هاشم أحمد خلف الله هاشم أحمد خلف الله
تاريخ التسجيل: 01-16-2007
مجموع المشاركات: 6449
ابو حراز والله مشتاقين كتير يا زول سلامي وتحياتي لحرمكم المصون ست النفر الإحتيال أصبح حرفة وصنعة واجارنا الله منها وناس جدة بتحبوا وإنشاء الله أمثالك يدخلوا الجنة عديل كده كيتن في ست النفر وطلباتها الكتيرة ومسيخة دي !! بعدين النسعلك صاحبك صديق الموج وين ؟؟؟ اي نعم هو معانا في الرياض لكن ماعارفين طار وين؟؟ يكون ياهو صاحبك ظاتو الإحتال عليك ؟؟ عليك الله بعد غلاء المعيشة وإرتفاع الإيجارات الماهية بقي فيها شنو ؟؟؟ قال توب قال .
02-10-2008, 09:15 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
Quote: ابو حراز والله مشتاقين كتير يا زول سلامي وتحياتي لحرمكم المصون ست النفر الإحتيال أصبح حرفة وصنعة واجارنا الله منها وناس جدة بتحبوا وإنشاء الله أمثالك يدخلوا الجنة عديل كده كيتن في ست النفر وطلباتها الكتيرة ومسيخة دي !! بعدين النسعلك صاحبك صديق الموج وين ؟؟؟ اي نعم هو معانا في الرياض لكن ماعارفين طار وين؟؟ يكون ياهو صاحبك ظاتو الإحتال عليك ؟؟ عليك الله بعد غلاء المعيشة وإرتفاع الإيجارات الماهية بقي فيها شنو ؟؟؟ قال توب قال .
قلت لست النفر الجنة ان شاء الله مضمونة لأنني واحد من الناس أخذت عذابي بما يكفي في الدنيا والآخرة فقد درست في كلية ابوحراز الزراعية وكانت كلها رجال ودرست بكلية الاعلام بجامعة أم درمان الاسلامية وكلها رجال والآن اعمل بمكتب بالسعودية به ما لايقل عن 462 راجل الا يكفي ذلك لدخول الجنة !!! ؟ هذا غير إنك كل يوم تقوم من الصباح وتشوف قدامك عشرين { شنب } عزابة بمعنى الكلمة والمشكلة وين البتحرق الروح وترفع الضغط اغلبهم ضئيل الشوف يقوم من النوم يشووووووووووووووت كباية الشاي لحد المغسلة وتاني يلحقها يشوتها تشتري الجريدة تقول تقراها بمزاج تجي تلقى صفحة في المطبخ وصفحة في الصالون وصفحة تحت السرير هذا غير انك تلقى قدامك خمسة سفنجات كلها شمال اليمين مشت وين 00 الله اعلم ؟؟ الا يكفي ذلك لدخول الجنة ؟؟؟ طيب تجي ماشي جامع الله عشان تصلي اها يلاقوك { شفع } السعوديين أكل { زق } أو يجيك حجر طائر أو اضعف الايمان يقولوا ليك العبد ماشي يصلي قبل يومين شافعة لابسة الحفائظ لقيت اخوها يضرب فيها مسكت الشافع عشان أحمي البنية الصغيرة قومي فيني يا الشافعة واصرخي { وخر } يعني ابعد وقعدت تبكي سألوها ليش تبكين قالت ليهم ليه السوداني يعيرني !!! والله عمرها لايزيد عن سنتين قال يعيرني قال !!! اليس ذلك كافياً لدخول الجنة !!! ؟ تعرف ناس صديق الموج مدتهم الافتراضية انتهت والله ديل فيهم حلاة احتيال بطريقة ماتتصورها يعني ممكن الأطفال الصغار يقولوا ليهو اشرب اللبن ونوم بدري ياعمو أما لو الحكاية فيها حفلة ميلاد وفالانتاين فالرماد كال حماد زولك من بدري حايطلعوا ليه العنقريب والبطانية
02-10-2008, 12:37 PM
motaz motaz
تاريخ التسجيل: 04-26-2002
مجموع المشاركات: 1412
]motaz كيفك 00 أخبارك شنو يامان والله مشتاقين ليكم كتييييييييييير جدا وبالطبع مشتاقين لكل القراء الذين يضخون المزيد من الدماء في بوستاتنا البسيطة وطبعاً ماشاء الله البوست حتى اللحظة مازال كله رجال وهذا برضو عذاب كافي جداً لدخول الجنة
Quote: وفي الختام الجنة الجنة
ذكرتني امام المسجد عندنا لايمكن أن تخرج من خطبته وأنت مبسوط كل الخطبة سبعة أودية سحيقة في النار زول مابيطمنك نهائي وزي ماذكرت ليكم مرة كان يتحدث عن انو الزول البيلبس السروال القصير بيدخل النار جينا المرة الجاية لابسين سروال طويل برضو قال والذي يلبس سروالاً طويلاً يدخل النار اقسم بالله احترنا معاه انا واحد من الناس قلت ليهو ان شاء الله الجمعة الجاية لاطويل ولاقصير !!!
يا أبوجهينة الملايات ما منها خوف لأنك بتلقاهم قدام هناك فى السودان ،، بس المشكلة شنو ؟؟ تشكيلاتها تكون بعيدة من صيحات الموضة لأنها مخزنة هنالك منذ مجىء زوجتك قبل عشرات السنوات .
ماهر
02-11-2008, 10:07 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
Mahir Mohammed Salih تحياتي من الأعماق مرحب بيك يبدو أنك من الأعضاء الجدد تعرف اول بداية سودانيز كان الترحيب يتم بالأعضاء الجدد بصورة جميلة جداً وفجأة تجد نفسك دخلت في جو سودانيز رويدا رويدا بدأ الترحيب يفتر واقتصر على الترحيب بالجنس اللطيف وكان دخل عضو بشنب والله زول واحد يشتغل بيهو مافي يدخل ويمرق زي دخلت نملة وأكلت حبة وخرجت ما أظنك تكون قريت القصة دي في المطالعة لأنها بتاعت كوامر قديمة آخر شطحات الترحيب كان ب { نسرين سوركتي } وفي النهاية لاشفنا نسر ولانسرين
أها نرجع لموضوع الملايات واحدة عندها مالايقل عن 100 ملاية قومي يابت الحلال وديهم السودان وأحشريهم في نص المخزن الكلام هذا قبل خمس سنوات لاموضة ولايحزنون أها مشت قبل ايام بالله عليك أمان الله لقت وقع فيهن فار لاخلى ليها أخضر ولا أحمر حتى المطرزات قرضهن قرضة السواد قال مطرز قال !!!
سبحان الله اتصل علي يوم أمس شخص من الرياض وذكر لي أنه حدث معه نفس الموقف وآخر من ينبع بالسعودية ذكر أنه حدث له نفس الموقف مما يؤكد أن هذا المحتال كثير التجوال بجدة وأغلب ضحاياه من الذين يقطنون خارج جدة ولأن كثيراً من السودانيين ياتون الى باب شريف فيبدو لي أن هذا الشخص يتابع كل من يأتي لهذا السوق وأحياناً يتجول بقرب الفنادق التي تقع على باب شريف فإذا شاهدك وأنت تدخل الفندق فهنا ينصب اليك الشرك ويعرف أنك ليس من سكان جدة
02-12-2008, 10:47 AM
nile1 nile1
تاريخ التسجيل: 05-11-2002
مجموع المشاركات: 2749
nile1 ماشاء الله اعضاء سودانيز الطاعمين كيف أخباركم العمل كيف وكيف أخبار الرياض والبرد القارس طبعاً كان عندنا برد لدرجة ماتتصورها بالطائف شيء فظيع أخبارك شنو مع الملايات ؟؟ امس أحد أصدقائي متصل من الرياض وهو عضو وقال لي والله نص القروش رايحة في الملايات وموضوعك واقف لي في حلقي قلت ليهو طيب بامكانك أن تشارك وتقول رأيك فقال لي المدام يومياً تدخل الموقع وياويلك لو اتكلمت عن الملايات قلت ليهو طيب دي ملايات أها كيف لو قمت انت رحبت بنسرين سوركتي ؟؟ غايتو بصراحة انا بتكيف جداً للمراة البتنهر راجلها طبعاً نحن بينهرونا لكن يعني مش بالطريقة العنترية نهرات خفيفة وخالية من الكلوسترول
شكراَ ليك كتير أخى أبو حراز ، وحقيقة كنت متابع موضوع نسرين متابعة شديدة قبل أن يمنحنى الباشمهندس بكرى العضوية وكان موضوعاَ شيقاَ ،،، والله الشباب ما قصروا فى تذكيتنا والترحيب بنا لهم ولك الشكر ،،،
أها نساوينا ديل أصلاَ ما بتغلبهم الحيلة ،،، فبعد أن إكتشفوا بأن الفيران لاعب معاهم لعب شديد ويقرض ما يخزنونه من الملايات والتيبان فى الدواليب وشنط الحديد الكبيرة ديل المفتلة بالجنبات بفعل أفاعيل ناس الشحن والجمارك ،، فقد تفتق زهنهم فى إستعمال البراميل الخضراء أب غطاء حديد فى تخزين مكنوناتهم وبذلك جابوا خبر الفيران والمتطفلين .
نحن ناس الشرقية قليلاَ ما يصادفنا مثل هؤلاء الناس وإن ظهروا فإنهم يقصدون رجال الأعمال مباشرة ولكن بعد أن يلبسوا آخر ما أنتجته المصانع السويسرية من الجلاليب والعمم والشالات الترابية وبعضهم يتلفح بعباءة ولا أجعص أمير .
ولكن أحد أصدقائنا قال لنا أمراَ طريفاَ وهو إذا إتصل معك أحد الأصدقاء أو المعارف وبعد السلام والمقدمات أخذ نفساَ بسيطاَ وقال لك بعده : إسمع ... أو .. أقوليك ، فتأكد بأن ما سيلى ذلك من الكلام هو ما شاكلة : يا أخى ما عندك 2000 لحد نهاية الشهر ؟؟ ومنذ ذلك الحين فإننا نعمل حزرنا عندما تصل المكالمة لمرحلة أقوليك .
أها والمناسبة جابت كلام تانى وهو أقرب لطرفة ، واحد جاء قال لزول سلفنى 1000 لحد نهاية الشهر ،، قال ليه : ماعندى مانع لكن تعال بوس يدى فى الأول ،، فزمجر السائل وزبد وقال له ماذا تقصد ؟؟ فقال له : لأنى عارف بعد نهاية الشهر لو جيت بست ليك كراعك زاتها ما ترجع لى قروشى .
خالص مودتى لك ولضيوفك الكرام ،،،
أها نسيت حاجة أخيرة ،،، نحن والله من زمن الكوامر وللللللللللللكن فى أيامها الأخيرة .
ماهر
02-13-2008, 06:53 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
Quote: أها والمناسبة جابت كلام تانى وهو أقرب لطرفة ، واحد جاء قال لزول سلفنى 1000 لحد نهاية الشهر ،، قال ليه : ماعندى مانع لكن تعال بوس يدى فى الأول ،، فزمجر السائل وزبد وقال له ماذا تقصد ؟؟ فقال له : لأنى عارف بعد نهاية الشهر لو جيت بست ليك كراعك زاتها ما ترجع لى قروشى .
يستدين منك بنغالي ويقوم بارجاع المبلغ في وقته وكذلك الهندي وكثير من الجنسيات بعض السودانيين تحل ليهو المشكلة وبعدها يويدك في خبر كان عشان كدة مرات الواحد يفكر الف مرة قبل مايقدم على هذه العملية يعني مادام أنت حليت مشكلتي فلابد أن يكون هناك تقدير لهذه الموقف وهذا التقدير يتمثل في ارجاع المبلغ حتى يستفيد منه شخص آخر غيرك واكثر مشاكل الديون تأتي من الأهل والأقارب والله استدان واحد مننا لزواجه مبلغ 2000 ريال حالياً لديه طفلين ولد وبنت والولد دخل الروضة والسنة الجاية سيدخل المدرسة اما الألفين فلم تأتي حتى الآن وست النفر كل يوم تضحك وتقول لي والله صلاد ادريس ماقاعد يعمل عمايلك دي موزع قروشك على الغاشي والماشي
02-12-2008, 12:13 PM
ismeil abbas ismeil abbas
تاريخ التسجيل: 02-17-2007
مجموع المشاركات: 10789
موضوع الهدايا غلبنا 10/صفر وماعرفنا ليهو طريقة للتغيير هسي بالله أهل العوض متين عرفوا حاجة اسمها { فالانتاين } المدام اتصلت يوم 14/2 وانا ماجايب خبر للدنيا قومي ارمي ليك { درابة } وقالت انت زول مامثقف دحين الليلة ماعارف الحاصل شنو انا قلت يمكن في زلازل أو طبقة الأوزون تكون كالعادة ماشة تنقص شوية شوية لحد ما تتلحس اها بعد شد ومد قالت الليلة العالم كله محتفل بالفلنتاين وين الهدايا؟؟ وين الكلام الناعم المعسل الجميل؟؟ الهدايا وخليناها وزهجنا منها الشيء الكلام البسيط ماعايز تقولوا قال فالنتاين قال !!! التغيير تم في امور كثيرة قبل فترة يقولوا ليك فكي يحيى مات تقفل الغرفة عليك وتبكي يومين وتوش تمشي الاتصالات وتتصل وتعزي ناس فكي هارون وفكي أحمد وحاجة فاطمة وبعداك توووووش للبنك تحول ليهم قروش الفراش قروشنا كلها كملت { فواتح }!!! دا غير ناس الصندل والمحلب والقرنفل الواحد { يحمّل } المراة وانت عليك الريحة ذنبك شنو أنا ماعارف ؟؟ قال صندلية قال !!! جففنا كل هذه المنابع من الإرهاب !!!
02-13-2008, 10:54 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
Quote: انا واحد من الناس قلت ليهو ان شاء الله الجمعة الجاية لاطويل ولاقصير !!!
اها بالله إنت لو كنت في مكاني كان حاتسوي شنو ؟؟ جربنا الأبيض ومانفع جربنا الأسود ومانفع قلنا نشوف البمبي
تعرف منذ أن كنت طفلاً كان هناك سؤال يحيرني لماذا أغلب جدودي لايلبسون سراويل كنت مستغرب وأسأل نفسي { اين الحكمة في ذلك } لكن إمام هذا المسجد أجاب على كل تساؤلاتي الآن عرفت لماذا لايلبسون خاصة وأنهم بسطاء وقلوبهم بيضاء وأذكر أن مادحاً حضر الينا ليلاً فذهبنا لهم في بيوتهم وأيقظناهم من النوم ينامون باكراً فلا توجد لدينا في اهل العوض هيفاء وهبي ولافيفي عبدو المهم حضروا وهم يلبسون ثيابهم التي يرمونها على أجسادهم بطريقة عجيبة جداً وتحكروا حول المادح وفجأة سكت المادح عن المديح بعد أن رأى كل هؤلاء القوم لايلبسون اي شيء فقال لوالدي { إنتو جايبني أمدح وللا جايبني { أطهّر } ؟؟ المهم واصل المديح وهو محتار في هؤلاء الناس أتى أحد الأعمام وكان نائماً ولايدري ما الذي حدث فقال للمادح عليك الله امدح لينا { شفيع الأمة } فقال له المادح { يا تو أمة دي ؟؟ ياها أمتكم الكلهم بدون سروايل ديل } قال أمة قال !!!
صديقي ابو حراز ... نكتة صاحبنا بتاع ود مدني من شعبان وانا منتظرك لغاية رمضان ... قلنا شهر البركة يعدي .. قاموا سحبواالماسنجر لك التحية والجنة حلال عليك
Quote: الا يكفي ذلك لدخول الجنة !!! ؟ هذا غير إنك كل يوم تقوم من الصباح وتشوف قدامك عشرين { شنب } عزابة بمعنى الكلمة والمشكلة وين البتحرق الروح وترفع الضغط اغلبهم ضئيل الشوف يقوم من النوم يشووووووووووووووت كباية الشاي لحد المغسلة وتاني يلحقها يشوتها تشتري الجريدة تقول تقراها بمزاج تجي تلقى صفحة في المطبخ وصفحة في الصالون وصفحة تحت السرير هذا غير انك تلقى قدامك خمسة سفنجات كلها شمال اليمين مشت وين 00 الله اعلم ؟؟ الا يكفي ذلك لدخول الجنة ؟؟؟
وهذه بتجعلك من المقربين أصحاب الروح والريحان وجنة النعيم... بختنا يا أبو حراز .... مبشرون بالجنة ... بخٍ ... بخٍ .... مبشرون بها
تخيل كيف يكون الحال لو ما كنت سوداني:
كنت ح تلتزم بالمواعيد..
كنت ح تتصل بالتلفون قبل زيارة أحد في منزله بدري شويه, مش و أنت في خشم الباب...
كنت انتظرت دورك في الصف..
ولم تتفنن في تجاهله أو الوصول إلى مقدمته بأي صورة...
كنت ح تنهر أولادك لما يبهدلوا ليهم بيت زول..
و كنت ح تتردد في أخذهم معاك المرة الجاية لنفس البيت, علشان يبهدلوه مرة تانية...
كنت ح تدفع ال share بتاعك في العشاء الجماعي دون ملاحقة.. أو سك من منظمي المناسبة المتوكحين بالفاتورة...
كنت ح تتردد في إعطاء رقم تلفون أو عنوان شخص ما دون إذنه...
كنت ح تتكلم بلسانك و ليس لسان كل من يحمل الجواز الأخضر..
كنت ح تتوقع يحصل شنو لما ترقد طفلك الصغير, دون بامبرز في سرير في بيت الناس..
كنت ح تلبس حزام الأمان في السيارة..
وكنت امتنعت عن السماح بجلوس طفلك الرضيع في المقعد الأمامي على حجر والده او والدته...
كنت ح تترد في زيارة شخص ما أنصاص الليلي و صابح يوم مدارس و عمل...
كنت ح تخلي الصغار في البيت عندما تكون المناسبة مناسبة كبار...
كنت اتونست بصوت معقول, خصوصا" عندما يكون الطرف الأخر قاعد جنبك في نفس الكنبة.. و يا حبذا عندما يكون الطرف الاخر ساكت...
كنت امتنعت عن التدخين في منزل شخص اخر, او على الاقل استأذنت قبل ما تولع...
كنت ترددت في ارسال حاجات وزنها خمسة كيلو و ما فوق مع كل من تسمع بأنه ماشي السودان...
كنت رجعت القروش الاستلفتها في وقتها, أو في الحقيقة رجعتها و بس..
كنت امتنعت عن زيارة احدهم في مكتبه , للونسه او مناقشة امور لا صله لها بالعمل..
كنت خجلت من عدد المسكولات التي تعملها, مش كمان تقول "شنو يا فردة, خمسه مسكولات ما ترد عليها؟ و الله الفيك اتعرفت".....
02-17-2008, 06:10 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
Quote: نكتة صاحبنا بتاع ود مدني من شعبان وانا منتظرك لغاية رمضان ... قلنا شهر البركة يعدي .. قاموا سحبواالماسنجر
إنت أكيد قاصد النكتة بتاعت المراة التي قالت { والله { نخرة } كلام فاضي ساي } !!! يعني بتوصف في انف زوجها 00 النكتة لو عاوز نقولها حتى لو أنا وإنت لازم الواحد يتلفت يمين وشمال اعمل شنو حظك سيء الماسنجر وقفلوه ان شاء الله لمن يعود الماسنجر ستصلك النكتة عاجلاً اها إنت وهمتك مع بكري ابوبكر بعدين هي من نوع النكت البتخرب الكيبل بتاع الأنترنت الواصل لمنطقة الشرق الأوسط
نرجع لموضوعنا أراك وقد شخصت ظروفنا وحالتنا بطريقة جميلة وكذلك عاداتنا وتقاليدنا يعني نحن لسه محتاجين نغير شوية في بعض العادات والتصرفات عشان نستعدل يعني بعضنا من أهل العوض ناس الخرطوم بيتضايقوا مننا كثير بنمشي لأقاربنا في الخرطوم ولمن نصلهم الساعة 2 بيسألونا فاطرين ؟؟ طبعاً نحن ماشاء الله الصدق كاتلنا طوالي بنقول ليهم لا والله مافطرنا اها كان نشوف ليك البيت كلو { صر } وشو طيب سألتونا ليه ؟؟
02-16-2008, 10:23 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
د 0 مهيرة سلامات وشكرا على المشاركة ورفع المعنويات
Quote: أها ياابحراز شن قولك؟؟ ظهرت حرمة.. لكن كومر!!
عقبان ما يجن البرينسات...العجب كان معاهن نسرين...بوستك دة علا نعلقه فوووووووووق
تعرفي لو دخلت نسرين تاني ماعايزين نشوف اي { كومر } ولا أي { كراكة } حايمة هنا
Quote: أها فتك بعافية ، والوصية فى الذمة قول لست النفر الملايات ختى بينن ( بينهن) صفق النيم العوجة ما بتجيهن، كا خزنتيهن مية سنة، وسلم لى على الجنون والبنيات
والله كلامك صاح فيران هذا الزمن مدلعات أكثر من اللازم يعني مرات تخت ليهو { قطعة جبنة } ياكل نصها ويخلي الباقي يعني ماشاء الله التطور طال كل شيء في السودان زمان الفيران كل شيء يقضن عليه يابس على أخضر هسي أنا من كم يوم كنت مستغرب في الفار { العض } عمنا الترابي لأنو بعض الناس قالوا { الترابي } عض الفار !!!
قال حرمة كومر قال !!!!
02-16-2008, 06:45 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
جميع الأخوة والأخوات المشاركين بالبوست ساعود باذن الله للرد عليكم توجد لدي مشكلة في تصفح الموقع لكم العتبى حتى ترضوا ولكم التحية من الأعماق اخوي الصايم مافي اي مساخة لكن بحب امزح طاعم دي لازم نقولها لناس نايل فالعلاقة قديمة جدا ساعود للرد عليك قال طاعمين قال !!!
تعرف إنت طلعت مفتح كونك عرفت المحتال دة لكين ناس كتار مشت فيهم المكنه زي السلام عليكم ومايبهرك حقيقة وقار الرجل ووجاهته .. في أحد الأعوام قابلت نفس الشخص وهو يحج بيت الله الحرام لا أدري لممارسة هوايته أم إبتغاء وجه الله ..
02-17-2008, 03:14 PM
othman mohmmadien othman mohmmadien
تاريخ التسجيل: 12-13-2002
مجموع المشاركات: 4732
Quote: لكين ناس كتار مشت فيهم المكنه زي السلام عليكم ومايبهرك حقيقة وقار الرجل ووجاهته .. في أحد الأعوام قابلت نفس الشخص وهو يحج بيت الله الحرام لا أدري لممارسة هوايته أم إبتغاء وجه الله ..
يعني برضو { الاحرام } اصبح وسيلة من وسائل النصب ؟؟ والله مشكلة كبيرة جداً لكن برضو انا محروق على باقي القروش الما اخذتها من هذا المحتال والمشكلة ان هناك بعض الناس محتاجين فعلاً ولكن مثل هذا الشخص يجعلك تفكر الف مرة قبل أن يتشابه عليك البقر
في كيلو { 8 } بجدة وعلى مقربة من مطعم سوداني يتجمع حوله الكثير من السودانيين لو ذهبت الى هناك سوف تقابلك فتاة فلسطينية عمرها لايتجاوز { 18 } عام تصطاد السودانيين بورقة تثبت أن ابيها تحت الغسيل الكلوي وهي مجرمة بكل معنى الكلمة ولم اقل حديثي هذا من فراغ بل بعد تمحيص شديد فقد قابلتني أكثر من ثلاث مرات وأحياناً في اليوم الواحد يمكن أن تقابلك ثلاثة مرات فهي لاتعرف أنها التقتك بالمطعم ام لا المهم أخذت منها الورقة في آخر مرة ودققت في المعلومات التي توضح أن والدها في غسيل منذ عشر سنوات وعرفت المستشفى الذي تدعي أن والدها فيه واتضح انه ليس له اي وجود بالمستشفى حتى أنني قلت للمسئول ربما يأتي لكم هذا المريض يوم الغسيل فذكر لي أنه لايوجد في كشوفات المستشفى نهائياًشخص بهذا الاسم حضرت مرة أخرى وطلبت منها مساعدتها لعلاج والدها لدى أحد معارفي بالشئون الصحية وطلبت مني رقم الموبايل وأعطيتها الرقم وحتى الآن لها فترة طويلة لم تتصل !!!
02-17-2008, 05:47 PM
ابوحراز ابوحراز
تاريخ التسجيل: 06-27-2002
مجموع المشاركات: 5515
كون إنك دخلت في البوست فهذا معناه أنك ستضيف طعماً آخر للبوست المساخة حاشاك ذكرتني عمتنا ولدها اتزوج واحدة وهي بتكره البت كراهية شديدة جداً المهم أنا رجعت من السفر والوالدة أخبرتني بان ابن عمتي تزوج وطلبت مني الذهاب للمباركة لهم لأنها تعرف أن هذه المراة صعبة جدا المراة ليست العروس وإنما { أم } العريس اها مشيت ليهم العصر وسألتها بعد السلام والتحية طبعا عمر وين ؟؟ فردت لي : قاعد جوة مع { الترمس } دي الترمس هي العروس طبعاً تصدق لم تكمل البنت اسبوع واحد على الزواج ولا أدري حتى اللحظة كيف سوف تستحمل الفترة القادمة هذه المراة توفى زوجها من النقة الكتيرة فكل الأطباء أجمعوا ان لامرض لديه وعمنا كان يهضرب طول اليوم بدون اي سبب وقد ذكر لي احد الأقارب أن هذه المراة من نوع النساء اللائي يدخلن أزواجهن الجنة فقلت له يعني عمك الآن يرتع في الجنة فقال لي : ربما يكون في الطابق العاشر إن كان بالجنة عشرة طوابق !!!
بعيداً عن النقة الزايدة انت من ناس الصايم ديمة ؟؟؟
02-17-2008, 06:00 PM
Raja Raja
تاريخ التسجيل: 05-19-2002
مجموع المشاركات: 16054
Quote: وقبل أن يقول أي شيء مسكته بقوة وقلت له والله العظيم ياحمار اليوم سأفرج فيك كل خلق الله والله والله اذا لم تديني قروشي القديمة فإن مشكلة كبيرة في انتظارك وبدأ يتلوى وريقه نشف وبدأ يتصبب عرقاً وأخيراً أخيراً طلعت منه بمبلغ 110 ريال !!! قال نجران قال !!!
هههههههه يا أبو حراز ..
قلت لي (مبروم ما بيلفًش على مبروم؟)
هو شقي زاتو الوقع في إيدك
تحياتي لست النفر.. ستًك
وافر الود
02-18-2008, 03:25 PM
othman mohmmadien othman mohmmadien
تاريخ التسجيل: 12-13-2002
مجموع المشاركات: 4732
othman mohmmadien مجرد مزحة لايوجد اي زعل من سنتين تقريبا حاولت بشتى السبل ان اعطي الزعل تأشيرة خروج نهائي فمعظم اقربائي قتلتهم الحسرة يعني الواحد مرات زعلة ساي تجيب خبرو قلنا يازول شوف طريق تاني ابتسم صحيح مرات تبتسم وتطلع متفائل فجاة يلم بتاع المرور يكرهك حياتك في السودان قلما تحافظ على الابتسامة التي خرجت بها ياليت لو نبتسم دائماً في وجه الآخر
02-19-2008, 10:26 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
رجاء قرات تعليقك على بكري ابوبكر في بوست الخطوبة رديت على الموضوع لكن الرد اختفى فجاة والله كلامك صاح 00 الزول دا فعلاً من 2002 ماقاعد يشجعنا على الزواج 00 بسم الله انا قلت شنو انا اقصد ماقاعد يشجع العزابة على الزواج وشغلو كلو أوامر مرات يشيل الكورة بتاعتو ويطلع ومرات يقول بكرة مافي ماسنجر فجاة يجي يقول لينا بعد اسبوع حانعمل ارشفة ومافي حد ينقل موضوع من الارشيف اها قبل ايام اغلق المنبر يومي الخميس والجمعة ذكرني ناظر المدرسة الابتدائية بتاعنا كان ما بيتسم الا آخر الشهر 00 يوم استلم الماهية اها اليوم داك العاوز إذن والعاوز يسافر والعاوز راحة والبتأخر على المدرسة كلهم يسامحهم لكن لو جيت بعد ثلاثة يوم والماهية اتلحست خلاص قيامتك قامت
Quote: تحياتي لست النفر.. ستًك
قال { ستك } قال كلكن عاملات فيها جندريات لكن الواحدة أول ما تتزوج فإنها تقع في حالة طلاق ليس بينها وبين زوجها بالطبع بل بينها وبين المدرسة الجندرية وتلقى الواحدة بعد كل هذه الفصاحة الغنماية تاكل عشاها
02-20-2008, 06:46 AM
nile1 nile1
تاريخ التسجيل: 05-11-2002
مجموع المشاركات: 2749
Quote: دي معلومه جديده وقيمة جدا بس النيم نجيبه من وين في البلد دي؟؟
اذا مالقيت نيم في الشرقية تحاول تشوف ليك زول ماشي السودان ومن اقرب شجرة يقطع ليك فرعين المهم ماعاوز اتشوبر لازم تجيك د مهيرة وترد عليك لكن والله ذكرتني واحد صاحبنا كان معاكم في الرياض قال لي والله مش { الولادة } دي خليناها وهادا طرفنا منها قلت ليهو يازول بدري عليك ان شاء الله القرار مايكون قرار المدام ؟؟ قال القرار قرار ذاتي !! المهم الزول كرهتو زوجتو من الوحم بت اللذين دي شايفة الهامبرقر والدجاج فرنسي وبرازيلي ووطني والتفاح اللبناني وكل ما تشتهي الأنفس لكن ما بتتوحم إلا على { اللالوب } انh افتكرتها اول مرة بتتوحم على اللاب تووووب وقام قالي لي بالله نجيب ليها لالوب من وين ؟؟؟ اها زولك انصاص الليالي المدام تقوم تستفرغ وتقول ليهو امشي جيب لالوب وهي يقوم يمشي البطحاء ويصحي واحد سوداني من النوم ويأتيها بالخبر اليقين تقوم تضوقها وتجدعها بعد ان يكون صاحبنا قد قطع 120 كلم كمان شوف ليك مساخة حريم لمن تمشي السودان تشوف اللالوب أكوام وشوالات لكن ما بتتوحم عليه قال نيم قال !!!
Quote: الأخ أبو حراز
إنت من زمن الرياض؟؟ أنا لي أربع سنوات في الشرفيه....مش قلت ليك؟؟؟ صرف النظر عن المساكين رحمه....يا...جعيص إنت
ما قلت لي مشيت الشرقية !! هسي كان دي نسرين سوركتي رحلت من الرياض كان عرفنا زمااااااااااااااان
بس عارف لو اتكرر عليك نفس الموقف حتلقا نفسك اتصرفت بنفس الطريقة مش سذاجة لاسمح الله او جهل ، لكن الانسان السوداني بطبعه حنين وبيتاثر بسرعة للمواقف اللي بيشوف فيها انسان في حالة انقطاع مادي حتى لو كان بيكذب
المهم ما فضلت قروش اشتريت لست النفر توب ؟؟
02-20-2008, 11:39 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
Quote: بس عارف لو اتكرر عليك نفس الموقف حتلقا نفسك اتصرفت بنفس الطريقة مش سذاجة لاسمح الله او جهل ، لكن الانسان السوداني بطبعه حنين وبيتاثر بسرعة للمواقف اللي بيشوف فيها انسان في حالة انقطاع مادي حتى لو كان بيكذب
فعلاً كلامك صحيح 100% كمان نحن بالذات في اهل العوض ولا بنتلفت لمن يلاقيك واحد عاوز مساعدة ويمكن بعض الناس اعتبروها سذاجة لكن نسوي شنو
مرة يمكن قلت ليكم والدي كان ماشي يتعالج في الخرطوم وكان شايل القروش معاه أها بالله كل مايلاقي واحد يقوم يدخل يدو في جيبو ويديه منها وكل مايشوف واحد يبكي او واحدة تطلع ليها ورقة طوالي يقوم يديهم اها في النهاية قلعت منو القروش قلت ليهو ياحاج بالطريقة دي ما حايفضل ليك قرش واحد تتعالج بيهو
Quote: المهم ما فضلت قروش اشتريت لست النفر توب
لو ما فضلت قروش لازم تتسلف عشان تشتري التوب وبعد دا كلو يا قالوا ليك اللون ماكويس يا انو الخامة رديئة دا لو ما ادوك شوية { صرة } ولوية بووووووووووووز
قال حنين قال !!! حنينات بس مع الشحاذين لكن كأزواج ماعندكن أي حنية { وش مصرور ومكرفس } !!!
02-20-2008, 01:15 PM
ABUHUSSEIN ABUHUSSEIN
تاريخ التسجيل: 08-14-2002
مجموع المشاركات: 39330
Quote: قال لي أنا جاي من الدمام و عايز أسافر السودان عايز حق المواصلات لي جده!!!!
تعرف لكن الزول دا خماك خمة بطالة جداً ويمكن غلب المحتال بتاعي 10/صفر زول ماشي السودان وعاوز حق المواصلات !!!؟؟ يعني حتى الواحد لمن يكون عاوز يحتال ما يعرف يحبك التمثيلية بطريقة مقبولة
بعدين واحد في المدينة من السهولة يجد حق المواصلات تعرف لو حبس المقابر كان سافر لحد بوركينا فاسو هناك الناس أمام مقبرة حمزة وخديجة وغيرهم من الصحابة يبكون بعمق وقد فعلها بعض البنغالة حينما باعوا تراب هذه المقابر للزوار فقد قاموا بتعبئة التراب في أكياس صغيرة وباعوا الكيس الواحد بعشرة ريال وحينما تأتي يقنعونك بان هذا تراب حمزة وهذا تراب من السيدة خديجة وأذكر حينما تم القبض عليهم ذكروا أن مبيعاتهم من تراب المقابر تجاوزت ال 300 الف ريال شوف بالله الى اين وصل الاحتيال والى اين وصلت سذاجة الناس ؟؟؟
02-25-2008, 10:17 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
كنت مع أحد الأصدقاء يوم أمس وذكر لي أنه قرأ البوست وقال لي لقد قابلني هذا الشخص قبل عامين وذكر أنه يود الذهاب لخميس مشيط وليس نجران وقال أنه قابله قبل شهرين تقريباً وذكر له أنه يود السفر الى خميس وقال لي لقد تعرفت علي بسرعة وعندما طلب مني ذلك قلت له : عيب عليك هذا لايتماشى معنا كسودانيين عليك أن تحترم عقلياتنا وان تحترم الدولة التي قدمت منها والدولة التي انت فيها الآن وذكر لي أن الأمر لم يتوقف على ذلك فأثناء نقاشه شاهد أحد اعضاء السفارة وذكر لي أنه ذهب لإخطاره بالأمر ولكن صاحبنا اختفى في الزحام وهذا بالطبع لايعفينا ولايعفي السفارة من متابعة هذا الشخص حتى لايحتال على البقية وكذلك حتى لايتشابه علينا البقر فبعض السودانيين يكون محتاج فعلاً وتتقطع به السبل ولكن مثل تواجد هذا الشخص يجعلك تفكر الف مرة قبل ان تدخل يدك الى جيبك
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ابوحراز
ابو جهينة
رقم صفر
هاشم أحمد خلف الله
motaz
nile1
ismeil abbas
nazar hussien
محجوب البيلي
مهيرة
othman mohmmadien
محمد عبد الماجد الصايم
Raja
ABUHUSSEIN
فيس بوك
تويتر
انستقرام
يوتيوب
بنتيريست