السلام عليكم غايتو المنبر ده بقى حاجة عجيبة تغلغل في حياتنا سلباً أو ايجاباً ... لا أدري تخيل بس تتفرج على النيل الأزرق تشوف ود الزومة ... تتذكر جني تسمع عافية حسن .. تتذكر تمبس تشوف قناة الشروق .. تتذكر مرتضى جعفر وهكذا ... ربطنا كل حياتنا بالشخصيات المنبرية التي ندري ، أو لاندري عنها شيئاً ولكنها تحتل حيزاً مقدراً من تفكيرنا سمعت ليكم فضل ايوب امبارح في نجوم الغد المقام بمعرض الخرطوم الدولي وفوراً تذكرت أخونا صلاح عبدالله المليء بإعجاب هذا الواعد وفكرت أن أهديه هذا اللحن وكل الأخوة الذواقة
............................. وما الناس إلا هالك وأبن هالك *** وذو نسب في الهالكين عريق
ياخي كتر خيرك وبارك الله فيك .. وأنا شاكر جداً للهدية الجميلة دي ، والله جات في وقتها تماماً هل تصدق أنو خبر بوستيك ده جاني بمكالمة سريعة من السودان ؟ أحمد الله أن ارتبط تذكرك لنا بحاجة كويسة ، وفضل في نظري زول كويس جداً وجاهز لأن يكون مشروع فنان خطير ، صغير في السن ، وخامة صوت قوية ، وقدرة عالية على التطريب جاكم جاهز ، بس راجي زول يمسّكو الدرب وكالعادة البرنامج ده ما حضرته ، وسمعي لفضل لم يتجاوز الأغنيتين النزلتهم إنت قبل كده هنا .. طبعاً حالة اليأس من كل حاجة في السودان (أظنها عند كل السودانيين) بتخلي الواحد متحفز ومنتظر أي حاجة تطلعو من الحالة دي ، وده الخلاني أنبه الناس لإمكانيات فضل لمن تسمع ليك صوت زي ده ، وانت في الحالة ديك ، بتبقى زي الغرقات اللقى ليهو قشة يتعلق بيها أها ولدنا فضل ده قشتنا ، يا طّلعنا سالمين ، يا فكانا عكس الهوا واستقرينا في القاع وهو على كل حال مكاننا الطبيعي والمتعودين عليه.. أخشى ما أخشاه أن يقف حيث هو ، ولا يجد من يأخذ بيده ، ويكتفى بالغنا في الحفلات ويطلقوا عليه فضل الفنان ، ويبقى زيو وزي أي زول (حامل) هذا اللقب ولا يملك منه شيئاً(الضمير راجع للقب) فضل ده ، على الرغم من أنو ما عندو غنا حقو ، لكن صوتو بديع ، أنا بسمعو ضمن عدد محدد جداً من الفنانين الشباب الأصواتهم فعلاً ممكن تكون إضافة حقيقية لمسيرة الغنا السوداني وأسمع لآخرين (منسيين) والغريبة عايشين!! واحد اسمو سبت عثمان ، وده من النيل الأزرق ، صوتو غريب ، شخصياً بيريحيني راحة السنين بيغني غنا منطقة الانقسنا ، والنيل الازرق، الناس ديل عندهم ايقاعات والحان ما طبيعية والتاني محمد البدري بتاع الشرق ، وده كمان قصة تانية ، يريحك جوه الجوه رغم عدم فهمي لكلام أهلنا البجة ، لكن بكون لاصق له في المكرفون لغاية ما يتنفض ويتخارج وأسمع كل الغنا القديم بلا استثناء ، وده كلو خوفاً من أن يلحق بأذني فيروس غنا الايامات دي وبيني وبينك أهلنا قالو مدارة المؤمن على نفسو حسنة ، وأنا بصراحة خايف على (العدة)
أحمد الله أن لم يخب ظني في فضل ، وقد أحرز المركز الأول في المسابقة (بي حقو) .. أرجو أن لا يخبو نجمه ، مثل كثيرين ، وأن لا تصيبه لعنة (الغرور) التي عادة تصيب صغار الفنانين ، والذين يتقمصون شخصيات (الكبار) ويعتبروا نفسهم وصلوا (الميس) هذه الآفة التي بدأت تتسرب رويداً رويداً لبعض الموهوبين/ات .. والله يكضب الشينة..
02-01-2008, 10:21 PM
Emad Abdulla Emad Abdulla
تاريخ التسجيل: 09-18-2005
مجموع المشاركات: 6751
معاشر السميعة .. الزول و صلاح عبدالله .. يمسيكم بالخير .
فضل أمبارح ما كان موفق .. لا في صوتو ولا في الغنيتين الإختارهم .. يمكن ( إمتى أرجع لأم در و اعودا ) شوية كانت احسن .. لكنه ما كان في أفضل حالاتو .. بعدين مدرسة الجرران و تمويج الصوت السبة بلا سبب دي شنو الطالعة في البلد الأيام دي ؟؟ أنا زول سميع ساكت , لكن فضل كان بيجر نهايات الكلام بشكل مخل و ما في حتتو ..
كدي أفتونا , و قارنو أداؤه أمبارح مع أداؤه المرة الفاتت في الأستديو ..
Quote: فضل أمبارح ما كان موفق .. لا في صوتو ولا في الغنيتين الإختارهم .. يمكن ( إمتى أرجع لأم در و اعودا ) شوية كانت احسن .. لكنه ما كان في أفضل حالاتو .. بعدين مدرسة الجرران و تمويج الصوت السبة بلا سبب دي شنو الطالعة في البلد الأيام دي ؟؟ أنا زول سميع ساكت , لكن فضل كان بيجر نهايات الكلام بشكل مخل و ما في حتتو .. كدي أفتونا , و قارنو أداؤه أمبارح مع أداؤه المرة الفاتت في الأستديو ..
شكرا يا زول .. صلاح عبدالله إزيك ياخ ؟
أها يا عمدة ، ده الكلام الخايفين منو زااااااااتو في الأغنيتين الغناهم ، يمكن يكون ما موفق ، لكن الصوت ياهو زاتو (لغاية الآن) كيف يكون فضل في أفضل حالاتو ، وما لاقي له زول يوريهو الحاصل شنو ؟؟ الولد صوتو جميل ، لكن شايلو وحايم به ساكت ، ما عارف يتعامل معاهو التِجِرجِر (من جرّ يجرُ) والتِمِجمج (من صديق الموج) ديل سببهم إنو الشاب ده محتاج لي زول دارس موسيقى ، أو موهوب جداً ، عشان يساعده في التعامل مع صوتو وده الكنا خايفين منو ، ما يلقى له زول يشتغل به ، ويضيع كما ضاعت حاجات كتيرة كويسة !! فاز وطلع الأول في برنامج نجوم الغد ... وبعدين ؟؟ خلاص وقفنا هنا ؟؟ البرنامج ناقص ، الموهوبين الظهروا في البرنامج ده ناس صغار في السن وممكن جداً يطلّعوا منهم ناس كويسين ، لو لقوا بعض الاهتمام .. عشان كده البرنامج ده مفروض يكون عندو خطة وبرامج واضحة للشباب ديل يمكن من خلالها تنمية وتطوير مواهبهم دي ، أو يلحقوهم بكلية الموسيقى والدراما.. والا ح نفقدهم كلهم ، وح يكونوا غنايين (عاديين)..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
الزوول
Emad Abdulla
فيس بوك
تويتر
انستقرام
يوتيوب
بنتيريست