|
|
 (من دفتر قصائد الثانوي)..خليهم يقولوا...!
|
جميلة هي أيام الثانوية العليا..و أصبحت ذكريات بعيدة الزمن..لكنها قريبة إلي القلب والخاطر ..لما أحتوته من جمال
وبراءة..
كنت في كل موقف يحدث أحاول أن أكتب شيء ما ..مرات بعيش دور شاعر..ومرات أدوار تانية كتيرة..
المهم ..مرة حكت لي (حبيبتي أيامها)..أنهم (يقولون عننا كيت وكيت)..زعلت خصوصا وأن الكلام من ناس بنعرفهم..
ويحسبون كأصدقاء..
كتبت يومها :
خليهم يقولوا
وما تهتمي بيهم
ديل حساد غرام
وباين في وشيهم
لكن ما منهم..
من الحال العليهم
خليهم يقولوا
ودايما طنشيهم..
***********
الحب البينا عذري
وفوق كل الظنون
مهما قالوا عنو
محال في يوم يهون
عشناهو بسعادتو
وفي لحظات شجون
يحفظ ريدنا الله
من شر العيون
***********
مما عرفتهم..
ديل دايما كده
كل ما يشوفو زهرة
مبللة بالندي
حولها طاف فراش
ينصبوا مصيدة
***********
حبنا نحنا واااضح
وفي ضوء النهار
وده السبب الحقيقي
الكتر للشمار..
بسأل الله حائر
في السر والجهار
ليه يا ربي ناس
بتحب الدمار؟
*********
خليهم يقولوا
وما تهتمي بيهم
الذكرني ليها الليلة..إني إتفرجت علي صور قديمة الصباح..وورق ودفتر قديم (فيهو بلاوي كتيرة) كانت من بينها ..المهم ضحكت كتير لما إتذكرتها..
ونسمع منكم ذكريات شبيهة..
خالد
|
|
 
|
|
|
|
فيس بوك
تويتر
انستقرام
يوتيوب
بنتيريست