|
|
 لا تصدق قبل أن تدخل !!!
|
على لسان شاهد عيان :
لفت نظري منزل ضخم واسع بوسط محافظة الخرطوم حيث ذهبنا لتعزية صديق في وفاة والده ، وجود امرأتين في حالة بكاء وعويل عالى ، وهما تدوران حول المبنى الداخلي . وبالتفرس في وجهيهما وسحنتيهما أيقنت أنهما ليستا من أقارب المرحوم ولا حتى من معارفه ، ولما اشتد بي الشمار سألت عنهما أحد أقارب المرحوم من الشباب ، فقال لي : " ديل يا عمو بكايات يعني ببكن بالقروش ، المستطيع يؤجرهن طوال أيام المأتم ، والعاجز يكتفي باليوم الأول فقط " . لاحظوا العاجز دي
تحضر النائحة إلى منزل العزاء وتطلب الـ CV أي السيرة الذاتية للميت من زوجته أو ابنته الكبرى :
العمر : 70 عاما.
المهنة : ضابط معاش وله وكالة سفر وسياحة.
المستوى التعليمي : دبلوم الحربية ، زائدا بعض الكورسات في الترجمة والحاسوب.
أسماء أكبر الأبناء والبنات : أحمد ، أحلام ، منى ، صفية .
هل قام بأي عمل بطولي : نعم ، محاولة انقلابية فشلت في فترة الرئيس نميري .
تأخذ النائحة المعلومات وتعقد اجتماعا عاجلا بزميلاتها وبعد التداول يخرجن للملأ وهن يرددن :
الليلة ياب دقناً دايره وخدوداً نايره ، وقدرةًً فايره ، وشيكاتاً طايره ـ كتلنا فيك ،،،
الليلة يا أبو أحلام يا الشالوك للصالح العام ، وحكموا عليك بالإعدام ـ مو دايم ـ إلا الله ...
الليلة يا السايق الكراون يا أب مدفعاً هاون ــ وينك لينا؟ إهى إهى إهى إهى
وهنا يهج البيت ويفور بالعويل والنواح ،، وتميل النائحة يساراً ثم تنحني ضاغطة بيدها اليسرى على أنفها ، ثم تنظر إلى ابنة المتوفى الكبرى نظرة ذات فحوى : لقيتيني كيف؟ أو: دا الشغل ..
الليلة يا الساكن ديم لطفي أب كلمةً تشفي ،،،
البجيك بتجبرو ، والواقع بتشيلو ،، يا السايق الباجيرو ـ مو دار عمار ،، إهى إهى إهى إهى
فقدتك السكرتيرة ، والطربيزة المستديرة ، والمرسيدس الخنزيرة ـ خليتنا لى منو؟!
لاحظ العربة قبل دقائق كانت كراون !!!
بعد ذلك تذهب النائحات إلى غرفة قصية حيث يؤتى لهن بالثريد والإدام والزواحف ، والبارد والساخن ، وعند الانتهاء من هذه المأدبة تنقد البنت الكبيرة النائحات مبلغ 300 ألف جنيه وتقول لهن همسا :
ضروري تجو بكره المغرب عشان ناس السعودية والبلد جايين .. كويس !!!
وسلام يا سودان ،،،
|
|
 
|
|
|
|
|
|
|
|
Re: لا تصدق قبل أن تدخل !!! (Re: ابو جهينة)
|
الفاتح وحياتك الكلام ده صاح انا والله بقرأ ومنطط عيونى فوق واحلى حاجة
يعنى نتوقع يكون في الشغلانية زمن اضافي بالاجر ونتوقع كورس ذاتو وبدل سفريه لو الظاهرة مشت علينا في الدندر كمان .
اها يا الفاتح أخوى cv تسلم قبل كم يوم Gلباكيات ديل ؟
واكيد بيكون في حجز وكده .
وبعد شوية يكون فيهن مشهورات بكاهن عاااااااااااالي وغالي زى ندى القلعة
| |
|
|
|
|
|
|
|
|
|
Re: لا تصدق قبل أن تدخل !!! (Re: اساسي)
|
أها والرجال كيف
ماعاوزين ليهم { بكايين } رجال
يعني الواحد يمشي ديوان الرجال ومما يشوف ليهو { عمم } حايمة يقوم { يجعّر } ليهم
ان شاء الله لو بخمسين الف في اليوم أنا رضيان
يعني على الأقل الواحد يتعاقد ليهو مع { كم بكاء } في الخرطوم وبحري وام درمان
ولو ضمنت ليك { خمسة بكيات } يكون دخلك اليومي على الأقل 250 الف
قال استثمار قال !!!
طبعاً سمعت بي صاحبنا من الجماعة المحروقين من النسوان الجميلات
زولك بيشتغل شغل نضيف يوم البكاء
مما يسمع بالبكاء يقوم جاري
اها ما بيمشي على الديوان والصيوان
بس عديل وتوووووش لحد محل النسوان
واي واحدة جميلة يقوم { يقلدها } ويبكي معاها
ونسواننا ماشاء الله طيبة وحسن نية لمن غلط
والواحدة تقوم تبكي ليك معاهو
يقوم يفكها وتجي واحدة شينة عشان تقلدو
طوالي يزوغ منهاحتى لو الميت ابوها
المهم يوم شاف واحدة جميلة جداً وقام قلدها ليك وقعد يبكي
جاء ولد الراجل الميت وقام قال ليهو :
يا عم الزولة دي ماعندها اي علاقة بالمرحوم
قام عمك قال ليهو : يا أخوي الماتوا ليها قبل كدة شوية ؟؟؟؟
قال المرحوم قال !!!
| |
|
|
|
|
|
|
|
|
 Re: لا تصدق قبل أن تدخل !!! (Re: اساسي)
|
| Quote: والله ديل المفروض يتعاقد معاهم شداد والوالي وصلاح ادريس عشان ينوحوا في المصايب الواقعة فينا |
احمممم؛
خلي روحكـ رياضية يا اساسي..
صحي كل زول بهمو..
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
أخى الفاتح الجنيد
صباحك جميل إن شاء الله..
على لسان شاهد عيان :
لو شاهدت إنت مصدق..أما على لسان شاهد عيان...أنا بقرأ بس وما بصدق..وأظن اخونا مصدق من بورداب الريا ض ما بصدق..ولا الصادق المهدى ما بصدق...
ده كلام عجيب ..الفرح يفتعل..إلا الحزن تعبيرو صعب..
مودتى..
إسماعيل محمد احمد عباس.......
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
الاخ الفاتح الجنيد
تحية طيبة ..
و فى السياق
فى مستهل الثمانيات من القرن المنصرم (كلمة فيها ثقل سوداوى يليق بالموضوع) كنا نسكن مجموعة من الطلاب بالقاهرة فى عمارة بالمنيل أمام مستشفى القصر العينى بالمنيل .. و حين كنا نستيقظ مبكرين كنا نسمع عويلا يوميا فى ساعات الصباح الباكر .. يتحول لصياح أسود (يبدأ خافتا بكلمة أشوفه و ينتهى بكلمة يا مستتنى يا حبيبى) ..و كان ينكد علينا الصباح و كنا نتساءل .. دون فتح الشبابيك طبعا ..( لأننا سكننا فى الشتاء) و كان العويل و النحيب واحد مع اختلاف اسماء النداء ، مرة يا مستتنى يا حبيبى صبحى و مرة يا مستتنى يا حبيبى يامرسى و مرة يا حبيبى عبد الفتاح باشا و احيانا مرة يكون سمير ... المهم ..
بدأ الفضول الشديدة يتملكنا و خاصة أننا كنا فى كليات غير الطب .. و بدأنا فى توكيل أخونا د. حسام للتقصى و البحث فى أسباب هذا العويل الاسود ، لأنه كان الوحيد المنضبط فى الذهاب للمستشفى ..
و جاءنا باليقين و هو يضحك ..أن هناك عدد من النسوة يقمن بصفة دائمة حول مشرحة القصر العينى و يقدمن خدمات العويل و النواح و الصوات لأسر المتوفيين و مرافقة الجثامين حتى نقلها .. و يمكن ايضا (خلال مراسم العزاء)..
و متعنا الله و أياكم بالصحة و طول العمر
| |
|
|
|
|
|
|
|
|
|
Re: لا تصدق قبل أن تدخل !!! (Re: اسعد الريفى)
|
يا أم وجنات..والخصل التايهات ..ياحنينة مسختى على البنات
يا السكر كلامك والجميل هندامك يا حليلك وحليلا أيامك
ياعامرة حنية يالهادية ورضية ودايما وفية الله يجازى الحمى النزفية
أهو ههى......هو الرجال بسكلبو كيف يالجنيد ??
أها يا مان...ليقتنى كيف ??..أنفع بكاى ?? خلاس يا حبيب تعال
نرجع السودان ونشتغل "بكايين"..الحكاية فيها دخل رهيب
كان ما غنينا نشبع مقالدة . !!
| |
|
|
|
|
|
|
|
|
|
Re: لا تصدق قبل أن تدخل !!! (Re: Abd Alla Elhabib)
|
Quote: يا أم وجنات..والخصل التايهات ..ياحنينة مسختى على البنات
يا السكر كلامك والجميل هندامك يا حليلك وحليلا أيامك
ياعامرة حنية يالهادية ورضية ودايما وفية الله يجازى الحمى النزفية
أهو ههى......هو الرجال بسكلبو كيف يالجنيد ??
أها يا مان...ليقتنى كيف ??..أنفع بكاى ?? خلاس يا حبيب تعال
نرجع السودان ونشتغل "بكايين"..الحكاية فيها دخل رهيب
كان ما غنينا نشبع مقالدة . !! |
الله يجازى محنك انت يا اب لسان
غايتو بى وصفك ده حقيت لسانك تب
تنفع فى الشغلانه دى انت واب حراز
لوووووووووووووول لكن قلت لى ده اب حراز المستهبل
بعملها حروزة انا بعرفوا كويس .. عندو قصص كتيره زى دى
بس ست النفر قادره عليه كويس
| |
|
|
|
|
|
|
|
|
|
Re: لا تصدق قبل أن تدخل !!! (Re: soma)
|
| Quote: هل قام بأي عمل بطولي : نعم ، محاولة انقلابية فشلت في فترة الرئيس نميري |
والله يا الفاتح ده أظرف موضوع اقراه من زمن طويل ، البلد بقت فيها محن
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
Quote:
من ضمن الأشياء القليلة الصادقة التي تبقتْ في دواخلنا .. هو حزننا ..
حتى الحزن أصبح مأجوراً ؟؟؟
فقد الناس حتى التعبير عن أحزانهم .. فماذا تبقى ؟؟ |
الحبيب ابوجهينة
كل ذلك يندرج تحت طائلة التفرد فى المظاهر ،،،
فالحزن والفرح أصبح أحاسيس تحاك عند الترزى حسب مقاس الجيب !!!
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
Quote:
Quote: Quote: يعنى نتوقع يكون في الشغلانية زمن اضافي بالاجر ونتوقع كورس ذاتو وبدل سفريه لو الظاهرة مشت علينا في الدندر كمان .
اها يا الفاتح أخوى cv تسلم قبل كم يوم Gلباكيات ديل ؟
واكيد بيكون في حجز وكده . |
وبعد شوية يكون فيهن مشهورات بكاهن عاااااااااااالي وغالي زى ندى القلعة |
الطيب : شيقوق
طبعا!!! تتوقع وتجزم كمان ،،،
اولا كلمات الوصف بتكون جاهزة فى شكل كاتالوج ،، فى وصف بكون حار على وزن المعلقات ، ووصف عادى محدود ،،
وفى وصف مقفى ، ووصف منثور ،،،
ووصف إيقاعى ، ووصف موال ،،،
وكلوا محفوظ صم ..
ومجرد مايموت المناح عليه بالموبايل تجيك البكاية هوى بى عربيتها الآخر موديل
تعرض علي ست البكا الكاتالوج وهى تختار حسب الجيب ،،،
وال CV البتاخدو تركبوا فى النص المختار ، والحكاية ما بتاخد ليها وقت
لما الجماعة يرجعوا من الدافنة والناس تتلم ، يكون كل شىء إتسبك ، وصوت النائحات يلعلع فى السماء ،،،
الحكاية Profetional مش أى كلام ،،،
وامكن بعد شوية تيقى أشرطة وسيديات تشيلا معاك الدندر وتفتح ليك محل CD
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
| Quote: وامكن بعد شوية تيقى أشرطة وسيديات تشيلا معاك الدندر وتفتح ليك محل CD |
لا حول ولا قوة الا بالله حيرتنا يا ود الجنيد
بس اوع يكون مع الشغلانية تعلعل بالرماد؟ طبعا الشغلانية مش صوت وبس لازم تكون في حركات والبكاية البتكون مسرحية زى البعيو قطعا بتحرر البكاء .
ات عارف ربما كمان تجى شركات تتعاقد على تصوير المجاملين بالليل لانو في ناس مستهبلين بقولوا لسيد البكاء نحن جينا بالليل وما شفتنا هو يكون ما جاء ولو صاحب البكاء النوع البعرفه انا يقوم يمشى يقلب ليك الصور عشان يثبت لفلان ده انو ما جاء اصلا .
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
أخي الحبيب الفاتح ..
تحياتي وسلامي ..
سمعت بهذا الكلام وعجبت له ..
عجيب أمر أهل بلادي حتى الحزن والدموع بقى بشتروهن ..
الواحد كان ممكن يصدق الكلام دا حين يشاهد فيلم سوداني يصور هذه الواقعة بعد 20 أو 30سنة من الآن ولكن في هذا الوقت والناس تعيش حالة بؤس وفقر وحزن شي لا يصدق ..
غايتو المرحوم الله يرحمه ..
وأهله نشيل عليهم الفاتحة ..
| |
|
|
|
|
|
|
|
|
|
Re: لا تصدق قبل أن تدخل !!! (Re: معتصم دفع الله)
|
| Quote: والله ديل المفروض يتعاقد معاهم شداد والوالي وصلاح ادريس عشان ينوحوا في المصايب الواقعة فينا |
أساسى
دى والله اتقطعت فيها ،،،
لكن بينى وبينك ننوح على شنو والا على شنو !!!
الناس صوتها بح من كترة البكاء عشان كده بقت البكايات موضة ،،،
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
Quote: ود الجنيد سلام
عارف زى ديل والشكية لى الله بكونن فرحانات بالحمى القلاعية
وحايمات بالمستشفيات يحصن فى عدد المرضى الحالتهم متأخرة
يعنى منو البحتضر ومنو الحمتو خفيفة
ولو وصل الحال لى جنس ده .. ممكن يحصل دفع مقدما
ورشاوى لعديمى الضمير
لشنق ما تبقى من رقاب
اعوذ بالله من ماآل اليه الحال فى بلد الغلابه
انا خايفه تانى بلد المليون ميل مربع
يتغير اسمو لى بلد المليون شهيد
وكر علينا يا يابا اهى اهى اهى
لوووول الجنيد شر البلية ما يضحك ويبكى فى الحالة دى |
دى حال الدنيا ام قدود ياسوما ،،، ماتبكى ياختى
ياهو ده زاتو المثل البقول " مصائب قوم عند قوم فوائد "
لكن بينى وبينك الناس العندهم كنجالات دايرين كده ،،،
" العندو مال ومحيرو ، يشترى حمام ويطيروا "
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
Quote: أها والرجال كيف
ماعاوزين ليهم { بكايين } رجال
يعني الواحد يمشي ديوان الرجال ومما يشوف ليهو { عمم } حايمة يقوم { يجعّر } ليهم
ان شاء الله لو بخمسين الف في اليوم أنا رضيان
يعني على الأقل الواحد يتعاقد ليهو مع { كم بكاء } في الخرطوم وبحري وام درمان
ولو ضمنت ليك { خمسة بكيات } يكون دخلك اليومي على الأقل 250 الف
قال استثمار قال !!! |
أبو حراز حبابك
الشغلة دى ياخوى دايره ليها صوت رقييييق ، وحنيييين
عشان يقطع قلوب الناس ، ويخجهن خج ،،،
تجى تجوعر إنت تطير الناس من بيت الفراش ،،،
Quote: طبعاً سمعت بي صاحبنا من الجماعة المحروقين من النسوان الجميلات
زولك بيشتغل شغل نضيف يوم البكاء
مما يسمع بالبكاء يقوم جاري
اها ما بيمشي على الديوان والصيوان
بس عديل وتوووووش لحد محل النسوان
واي واحدة جميلة يقوم { يقلدها } ويبكي معاها
ونسواننا ماشاء الله طيبة وحسن نية لمن غلط
والواحدة تقوم تبكي ليك معاهو
يقوم يفكها وتجي واحدة شينة عشان تقلدو
طوالي يزوغ منهاحتى لو الميت ابوها
المهم يوم شاف واحدة جميلة جداً وقام قلدها ليك وقعد يبكي
جاء ولد الراجل الميت وقام قال ليهو :
يا عم الزولة دي ماعندها اي علاقة بالمرحوم
قام عمك قال ليهو : يا أخوي الماتوا ليها قبل كدة شوية ؟؟؟؟
قال المرحوم قال !!! |
الشغلة الاولى ما عندك ليها طريقة ، إلا التانية ممكن ، بس خليك شايل نعلاتك فى إيدك ،،،
الله يجازى محنك ،،، ضحكتنى ...
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
اتنين ماشين في الشارع سمعوا مرة تكووورك وتبكي بحرقة
قاموا جروا فتحوا الباب ودخلوا عليها
لقوا راجله ميت وهي تكورك :
حليلوا ال كان بخــري الناس صيح خرااي
حليلوا الكان بخــري الناس صبح خراي
الجماعة قاموا بالواجب حتي الدفن
رجعوا يسالوا عن الراجل الفارس ال دفنوا ده منو ؟
قالوا للولية انتي راجلك ده كان شغال شنو ؟
قالت ليهم : كان في حياته الله يرحمة بتاع عيفونة وبلاعات
| |
|
|
|
|
|
|
|
|
|
Re: لا تصدق قبل أن تدخل !!! (Re: عبد المنعم سليمان)
|
Quote: أخى الفاتح الجنيد
وانت صباحك جميل إن شاء الله..
على لسان شاهد عيان :
لو شاهدت إنت مصدق..أما على لسان شاهد عيان...أنا بقرأ بس وما بصدق..وأظن اخونا مصدق من بورداب الريا ض ما بصدق..ولا الصادق المهدى ما بصدق...
ده كلام عجيب ..الفرح يفتعل..إلا الحزن تعبيرو صعب..
مودتى..
إسماعيل محمد احمد عباس....... |
الحبيب اسماعيل
نهارك أجمل يارب ،، مشتاقون والله
ده السودان ياسمعة ، بلد التناقضات ، مافيهو شى مستحيل ، ومافيهو ما ممكن ، ومافيهو شى ما بتصدق ،،،
خليك صدِّيق ،، هو الشفناهو شوية يا خوى ،،،
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
Quote: يا أم وجنات..والخصل التايهات ..ياحنينة مسختى على البنات
يا السكر كلامك والجميل هندامك يا حليلك وحليلا أيامك
ياعامرة حنية يالهادية ورضية ودايما وفية الله يجازى الحمى النزفية |
عبد الله الحبيب
إزيك يا عريس نص كم ،،،
إنت تاريك ما ساهل ،،،
تنفع مؤلف مناحات ،،،
يعنى ما عندك مشكلة ، ترجع السودان وتقعد تألف ، والبكايات يلحنن ويردحن ،،،
وبعدين يدنَّك الفيهو النصيب ،،،
وليك على ، عندى زول فى لجنة المصنفات بحفظ ليك حقوق الملكية الفكرية بتاعتك ،،،
بس ما تنسانى ،،، لوووول
| |
|
|
|
|
|
|
|
|
|
Re: لا تصدق قبل أن تدخل !!! (Re: ابو عثمان)
|
الاستاذ الفاتح
صباحك عسل
الحقيقة من شدة ما المقال عجبنى قمت نقلت المقال لمنتدى www.abritabag.net وهو موقع نوبى يضم مجموعة مستنيرة جدا من النوبيين والنوبيات ، وربما كانت لهم ردود وتساؤلات
يلا ابقى عشرة وإنكرب معاهم
وأدناه المداخلات
--------
الاستاذ:عوض سالى
دى اتقطع فيها الفاتح الجنيد واحسنت فى نقلها يا ساطور لا تستبعد اى شئ فى ظل الاوضاع
الحاليه ..الاغنياء سيزدادون غنى ..والفقراء فقرا ..وكل الظواهر السلبيه من المجتمعات
الاخرى ستنتقل الى السودان ..هذه الظاهرة طبعا من مصر كما نعلم جميعا ..والزواج العرفى
واشياء كثيرة ...
لك التحيه .....
اخوك ..سالى ...
الاستاذة ميساء
فعلا مقال جميل شديد ، عارف ظهرت في الخرطوم موضة مكاتب تاجير ناس للمناسبات
يعني ما على الشخص الا انه يحدد المطلوب : ناس لتسخين البكا
او تاجير ناس لسيرة عرس
وزي ما قلت بس سيرة ذاتية فيها تفاصيل والباقي المكتب متكفل بيهو
تخريمة : بالجد عجبتني حكاية : هل قام باي عمل بطولي
ويا ابو احلام الشالوك للصالح العام
الباشمهندس ابوغازى
العزيز أحمد ساطور .. تحياتي لك
مظهر من مظاهر البرجوازية .. ومظهر من مظاهر النفاق الذي استشرى وسط المجتمعات السودانية .. كيف ولماذا تختفي القيم والأخلاق الجميلة في سوداننا .. إستبدل الصالح بالطالح ( كما في الصالح العام) وكذا الشهد بالعلقم.. لا أدرى من أين تاتي إلى السودان هذه الظواهر العجيبة ومن المسئول عنها ..
الاستاذة: بنت الشيخ
لا حول ولا قوة إلا بالله ،،، عندنا في السودان!! سبحان الله!! أنا كنت قايلة الظاهرة دي في مصر بس ، حيث أنني حضرت برنامح تلفزيوني عاملين فيه لقاء مع نائحة مصرية ، سبحان الله وتقسم إنو ده ما نفاق وهي بتكون متأثرة فعلا !!
الاستاذة : منار محسوب
عزيزى ابو حميد .... ذكرتنى بجابينو بالطيارة و بايعنو بالخسارة ....
مقال رائع جدا و بيأكد انو الفلوس هى ست الدوووووس تتكلم و تمشى و تجرى و تحزن ليك و تفرح ليك ...... مقال بيحكى عن زمن كذب اى شىء ....
فقدتك السكرتيرة ، والطربيزة المستديرة ، والمرسيدس الخنزيرة ـ خليتنا لى منو؟!
[مولانا المحامى عبدالهادى الزبير
أنتو في دا ولا الفقران فقران ميتة وحياة يعني حتى دي بالفلوس؟؟؟؟ غايتو أنا لو مرضت حكتب في وصيتي (لابد من إحضار نائحة دولية). وهكذا تتهاوى القيم في سودان الجن في ظل حكومة السجم.
الاستاذ: دهب احمد خيرى
والله يا ود ساطور أنا ما قادر اصدق الحكاية دى خالص.يعنى ابوى لو مات، أنا أجيب نسوان ما عندهن أى صلة بينا و لا حزنانات و لا أى حاجة، و أقعد أتفرج عليهم بيبكوا أبوى بالكذب و التمثيل مقابل القروش ؟كيف بنت الميت ترضى بإهانة أبوها بالصورة دى؟ دى مش معناها :نحن ما قادرين نبكى ابونا (كويس) و محتاجين مساعدة ناس يظبطوا لينا بكا أبونا ؟!!
ياخواننا الحكاية ما ممكن تحصل كلو كلو .
الاستاذة ميساء
العم العزيز دهب
تحياتي
والله للاسف بقت بتحصل عادي جدا ، وده كلو ضمن المظاهر ، ومش ماجورين للبكا والنواح بس بل الامر بيشمل سيرة العرس كمان
يعني اذا اهل العرس ما عندهم ناس او عاوزين يكبروا كومهم ، بياجروا ناس يكونوا ليهم بص سيرة بالمواصفات العاوزينها
الاستاذ: الطاهر محمد احمد بدر
الاخ / احمد ... عوافى
لعل الاخ ود الجنيد قد صاغ هذه القصة على سبيل الفزلكة المسرحية او فنتازيا واردة الحدوث لمعالجة ظواهر اجتماعية اى بمعنى المبالغة فى التسليط والتصوير الجيد باستعارة بعض من المقاطع الحياتية الحقيقية لاضفاء روح المعقولية لمزيد من لفت الانتباه والنظر لبعض جوانب الظاهرة الموجودة اصلا من قبيل دموع التماسيح والتمثيل الرخيص بوضع اليد ومحاكاة النحيب اما ان تكون قصة حقيقية فانا اعضد ما ذهب اليه الاخ دهب من نفى ان تكون القصة حقيقية ...
ذكرنى هذا بنكتة يحكى ان امراة سافرت لثلاثة اشهر وعندما عادت كانت جارتها قد توفى زوجها والبكا برد وفات الاربعين فاذا بها تتفاجأ بجارتها الغائبة وهى تنوح صائحة مائجة قالدة لها نص الحوش والسكاليب تجيب الرايح فاستدعت حزنها الذى مر عليه الكثير وبكت حتى جفت دموعها ...واصبحت بعد البكية الاولى تصبر فى جارتها التى تستمر بنفس الحماس وما اجدى معها التصبير ودعوات الاستغفار وواصلت بنفس الحماس لاكثر من عشرة دقائق وهى قالدة لها وعندما ملت فكت نفسها ودفرت جارتها قائلة " زحى منى كدى يا ختى انتى ممغوصة من شيتن تانى"
وليس ببعيد عن ود الجنيد هذا التصوير الدرامى الفنان بس كتر البهارات شويتين وممكن تكون زوجته الشاعرة سوما اعطته بعض المقاطع الشعرية المحشوة هنا ...وهى تصلح اسكتش تجريبى لكوميديا تلفزيونية فى رمضان القادم لاننا لا نلوك الكوميديا السودانية الا فى رمضان !!!.
عاطر التحايا ابو حميد ... دمت بخير –
[الاستاذة :منار
انتو يا جماعة مستغربين ليه الحاجة دى حاصلة فى المجتمع السودانى و بقت لزوم ديكور كثير من المشاعر ... ما سمعتو بالبكا كان كيف .... حار .... فى ناس عندهم الوصيف فى البكاء اهم شىء و البوبار جزء اساسى ... فيا ود بدر الكلام من الواقع و مافيه اى شمار او توم من سوما .... بس انت تكون ما حضرت ليك حاجة زى دى او فى مجتمعنا لسع بنبكى باحاسيس و حزن حقيقى و مش مأجور ......
البجيك بتجبرو ، والواقع بتشيلو ،، يا السايق الباجيرو ـ مو دار عمار ،، إهى إهى إهى إهى
[الاستاذ حاتم جيلى
الحاجات دى واقصد البكايات ممكن تحصل لكن فقط فى العمارات & الطائف & الرياض & الصافيه والمنشيه وبس !!!!!!!!!!1
ونحنه عندنا البكى حقيقى فى اطراف العاصم
الاستاذة حنان محمد خليل
كنا نسكن فى عابدين بشارع على عبد اللطيف .......وكان من علامات الشارع رجل متأنق يلبس البدلة السوداء والكرافتة دائمآ.. وطوال اليوم يمسك فى يده منشة عتيقة يتنافس حذائه وشعره المصبوغ بلمعان غريب وكأن كلاهما مدهون بالفازلين....هذا الرجل هو حمدى الحانوتى .....وكان له فلسفة ان المظهر المتأنق يجلب الزبون!!!!!!!!!!ولا ادرى كيف يأتى الزبون اليه وهوميت ........وهذا الرجل كان لديه اقسام .من خشبه الميت وهى درجات الى الغطاء الذى يطرح على الخشبة من فوق وهو ايضآ متنوع ما بين (كفرتايه ) قديمه متسخه .....الى (الكرانيش) الستان الخضراء التى اشبه ب(كوشة العروسين) وهذا التنوع ليظهر مدى ثراء المتوفى .او عمر المتوفى ان كان شاب اوعجوز.....وفى حالة الثراء كان هناك ايضآ الندبات وحاملى البخور بالزى الموحد لهم وايضآ حاملى الزهور ولابد ان يكونوا من الشباب ...
ثم بعد ذلك يأتى دور الصيوان ...ان كان من الاغنياء جدآآآآآ او المشاهير فيكون فى مسجد عمر مكرم ذو القاعتين الحريمى والرجالى ونعى طويل بلأهرام تحديدآ مع اضافةاشخاص مهمين حتى ولواقارب من الدرجة العاشرة .......او يكون ثرى على قد حاله فيكون صيوان الشوارع وهو ايضآ درجات........
وبعد ان هجمت العامة والغوغاء اثرياء الحرب على مسجد عمر مكرم تحولوا للحامدية الشاذلية ولكن مع اضافة تصوير الفيديو ...ويا حبذا (عزومة ) بعض الفنانين او نواب المجالس المشاهير وهم يعزون اهل المرحوم ليتم التوثيق بالصوت والصورة ....
هذا فى مصر...ولكن موضة الندبات منتشرة ايضآ فى وسطنا النوبى !!!!!!! فكثيرآ ما نجد فى البكيات ان الحديث يدور حول فلانة التى بكت وقلبت الدنيا ...انتظروا فلانة دى اللى بتدى البكى قيمة ببكاها
الاستاذ عبدالرحمن بدر
أنا عايز أعرف ليه النسوان بيعملوا كده؟؟
يا دهب أخوي إنت ما قريت المداخلات في بوست المفلسين ؟؟يعني ما براي .. والباقين الما كتبوا أي شيء حالتهم زي حالتنا لكن بكابروا ساكت ...
__________________
| |
|
|
|
|
|
|
|
|
|
Re: لا تصدق قبل أن تدخل !!! (Re: ترهاقا)
|
Quote: لا حول ولا قوة الا بالله حيرتنا يا ود الجنيد
بس اوع يكون مع الشغلانية تعلعل بالرماد؟ طبعا الشغلانية مش صوت وبس لازم تكون في حركات والبكاية البتكون مسرحية زى البعيو قطعا بتحرر البكاء .
ات عارف ربما كمان تجى شركات تتعاقد على تصوير المجاملين بالليل لانو في ناس مستهبلين بقولوا لسيد البكاء نحن جينا بالليل وما شفتنا هو يكون ما جاء ولو صاحب البكاء النوع البعرفه انا يقوم يمشى يقلب ليك الصور عشان يثبت لفلان ده انو ما جاء اصلا . |
أكيد الشغل الحى بكون نضيف يا شيقوق ،،، وحقو غالى طبعا ...
عشان كده السيديات دى ممكن تستعملوها عندكم هناك فى الدندر ...
لأنكم ناس ما تغيانين ،، وما بتقدرو على حق البكايات ،،،
زى ناس الجنيد كدى ....
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
Quote: أخي الحبيب الفاتح ..
تحياتي وسلامي ..
سمعت بهذا الكلام وعجبت له ..
عجيب أمر أهل بلادي حتى الحزن والدموع بقى بشتروهن ..
الواحد كان ممكن يصدق الكلام دا حين يشاهد فيلم سوداني يصور هذه الواقعة بعد 20 أو 30سنة من الآن ولكن في هذا الوقت والناس تعيش حالة بؤس وفقر وحزن شي لا يصدق ..
غايتو المرحوم الله يرحمه ..
وأهله نشيل عليهم الفاتحة .. |
معتصم الرجل الشفاف
مودة بالكوم
الدهشة يا معتصم أن مثل هذه الاشياء تحدث كما قلت فى زمن تعيش الناس فيه حالة
بؤس وفقر ،،،
لكن الناس التغيانين يحشو كيف ،،،
ما لازم يعملوا حاجات زى دى خارقة للعادة عشان الغلابة ديل ينبهطوا،
ويفتحوا خشومهم وما يقفلوها ،،، وده قمة المتعة عندهم طبعا ،،،
والسيرة تكون على كل لسان ،، حتى لو بالشين ،،،
وسلام يا سودان
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
بوست فعلا له معنى..
وأقترح أن تدرس مادة النواح والثكلى فى معهـد الموسيقى والمسـرح، حتى يتم تأهيل
وتدريب هـذه الفئـة التى تعتمـد حتى الأن على الموهبـة.
والموهبـة يجب أن تصقل بالتدريب والعلم، فتكون الخريجـة لهـا شهـادة معترف بهـا
من المعهـد، تخصص نواح، حتى يحق لهـا مزاولـة مهنـة العويل والبكاء..
وتدفع ضريبـة للحكومـة عن كل وقيـة دموع تبيعهـا..
كما يحق لهـا أن تطالب بإعفاءات ضريبيـة عندما تشترى أى مواد تسـاعـد على البكاء
وتقويـة الحبال الصوتيـة بإعتبارهـا أدوات شغل..
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
هاهاهاهاهاهاهاهاها
أخي الكريم الفاتح
يديك ألف عافية ...والله لي زمن ماضحكت كده...
لكن الحاجة البتحز في نفسي إنو الظاهرة الغريبة دي موجودة في السودان ...الله يكفينا شر الظواهر الدخيلة...
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
Quote: أكيد الشغل الحى بكون نضيف يا شيقوق ،،، وحقو غالى طبعا ...
عشان كده السيديات دى ممكن تستعملوها عندكم هناك فى الدندر ...
لأنكم ناس ما تغيانين ،، وما بتقدرو على حق البكايات ،،،
زى ناس الجنيد كدى |
والله يا ود الجنيد انا امبارح ضربت خماسي في سداسي وغيرت راي لان عرفت ليك البكايات ديل عندنا ما بجن لانو ناس التحصيل بعذبوهم في السكة الا اكان يجن هابرات بطريق الشرق الجديد يعني بام ضوا بان والهلالية ورفاعة بس اوعى يكون الشارع بمر بالسيال والدخاناب يعني ناس مضوى جعفر مضوى اسد البطانة وكده .
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
Quote: الاستاذ الفاتح
صباحك عسل
الحقيقة من شدة ما المقال عجبنى قمت نقلت المقال لمنتدى www.abritabag.net وهو موقع نوبى يضم مجموعة مستنيرة جدا من النوبيين والنوبيات ، وربما كانت لهم ردود وتساؤلات
يلا ابقى عشرة وإنكرب معاهم
وأدناه المداخلات |
الحبيب ترهاقا
يصابح وشك الدنيا ،،،
كتر خيرك كتير والله ،،،
وشكرى وتقديرى بلا حدود لكل الافاضل المتداخلين ، وودى أن أتجاوب معاهم مباشرة ،
ولكن فيك الخير ما بتقصر ، وإنت الواجب سيدو ...
عميق محبتى
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
Quote: بوست فعلا له معنى..
وأقترح أن تدرس مادة النواح والثكلى فى معهـد الموسيقى والمسـرح، حتى يتم تأهيل
وتدريب هـذه الفئـة التى تعتمـد حتى الأن على الموهبـة.
والموهبـة يجب أن تصقل بالتدريب والعلم، فتكون الخريجـة لهـا شهـادة معترف بهـا
من المعهـد، تخصص نواح، حتى يحق لهـا مزاولـة مهنـة العويل والبكاء..
وتدفع ضريبـة للحكومـة عن كل وقيـة دموع تبيعهـا..
كما يحق لهـا أن تطالب بإعفاءات ضريبيـة عندما تشترى أى مواد تسـاعـد على البكاء
وتقويـة الحبال الصوتيـة بإعتبارهـا أدوات شغل.. |
تعرف يا ابو الريش ،،،
رغم أن البحصل ده غريب فى نظرنا ومستنكر ، لكن لو أخدناهو من ناحية تانية بنلقاهو نوع من ثقافة الوطن ، وتراث تم إحياؤه من جديد ،،،
زمان كان البكاء على الميت ليهو طقوس معروفة ، وتمارس باعتبارها عرف وتقاليد لا غبار عليه ،،،
مثلا : الوصف ، والضرب على الصدور ، وكيل التراب على الراس ، كان موجود
وباسلوب إيقاعى .
كان بجيبو طشت ملان موية ، ويكفو فوقو تلاتة قرعات بأحجام مختلفة ..
يقعدن تلاتة نسوان كل واحدة ما سكه ليها عودين ..
يقومن يالضربن على القرعات ديل بشكل موزون ...
تطلع نغمات إيقاعية منتظمة ذات أصوات مختلفة حسب حجم القرعة ..
يقومن يقية النسوان كل واحدة تربط توبها فى نصها ..
وتكشف صدرها ..
وتكيل قبضتين تراب على راسها..
ويتجمعن فى شكل دائرى حول النسوان البضربن فى القرع ..
وبنغمة متماشية مع ايقاع القرع يرددن .. حى ووب حى ... حى ووب حى ... حى ووب حى
ومعاها نقزة كده لى فوق ...
الشغلانه دى بتكون بى إخلاص شديد .. وتنافس فى كسب رضى ست البكاء بإظهار قمة الحزن على الميت ...
إذن اقتراحك هو امتداد وتطوير لهذا الإرث ...
زى ما طورنا أغنية الحقيبة من صفقة ورق ، قمنا دخلنا عليها المزيقه الحديثة ،،،
وطلعت روعة ... أثنِّى ...
| |
|
|
|
|
|
|
|
|
 Re: لا تصدق قبل أن تدخل !!! (Re: الفاتح الجنيد)
|
سلامات الفاتح ود الجنيـد ومرحبا بيك في المنبر.
المفترض تطور معهم الشغلة ويكون فيها فيديو كليب لأهل المرحوم خارج السودان ترسل لهم في شكل سي دي. وبرضو امكانية عمل بروفة امام المرحوم قبل موته حتى يقوم المرحوم بالتعديلات اللازمة لكيفية البكاء والعويل عليه ....
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
| Quote: كدي تخيل بالله ياالفاتح لو النائحة المستأجرة حفظت ال cv ومشت بيت البكا الغلط. |
تعرف يا مرتضى ،،،
الحكاية دى وارده ،،،
لأن الايام دى كل شارع بتلقى فيهو صالون عزاء ...
مرحوم مات بالملاريا ،، والتانى بى الحمى القلاعية ، والتالت بى فشل كلوى
والرابع بى سرطان ، والخامس فوتو فيهو البنج مع انو عملوا ليه عملية لوز
والسادس مات فى حادث فى شارع مدنى ، والسابع فى صمة خشمو طب ساكت من الهم العليهو
والتامن ،،، والا أسكت عد ...
لكن لو ده حصل ، الحكاية بتمر عادى ، أهل المره بفتكروها من أهل الراجل ،،،
وأهل الراجل بفتكروها من أهل المره ... والا شنو ؟؟؟
لكن ست البكاء الاصلية بتكون بتبكى على غياب البكاية ما على قريبها المات ،،،
بس الشغلانه أكيد بتكون مقننة ..
فيها حقوق ، وفيها إلتزامات ، وفيها شروط جزائية ،،،
مثلا لو البكاية جات متأخرة ، بعد الناس ما صفصفو ست الوجعه تعمل شنو ؟؟؟
تبقى عليها وجعتين ، ميته وخراب ديار !!!
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
Quote: الاخ الفاتح
شكرا للبوست ...ماذا يبقي بعد الاحساس حتي ده ممكن يبقي مصطنع!!وربي لاتمحنا لا تبلينا!! |
أختى سوسن
الاصطناع بقى حرفة فى السودان ،،،
يعنى الاصلى غير مرغوب فيه ،،،
ماشا عكس !!!
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
Quote: هاهاهاهاهاهاهاهاها
أخي الكريم الفاتح
يديك ألف عافية ...والله لي زمن ماضحكت كده...
لكن الحاجة البتحز في نفسي إنو الظاهرة الغريبة دي موجودة في السودان ...الله يكفينا شر الظواهر الدخيلة... |
صحيح شر البلية ما يضحك ،،،
الله يحفظك من بلاوى الدنيا ،،،
عميق مودتى اختى نها ،،،
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
Quote: سلامات الفاتح ود الجنيـد ومرحبا بيك في المنبر.
وبرضو امكانية عمل بروفة امام المرحوم قبل موته حتى يقوم المرحوم بالتعديلات اللازمة لكيفية البكاء والعويل عليه .... |
تشكر على الترحيب د. فيصل
تعرف كلامك ده ممكن يحصل لأنو أى زول يدخل المستشفى مفروض يكون عارف
ما بطلع منها على رجليه الزمن ده ،،،
والاعمار بيد الله ،،،
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
Quote: الفاتح سلام
تعرف زمن الدهشة فات زمااااا بالنسبة لي
بقيت متوقع اي حاجة ...لكن تصل المرحلة دي ...ما اظن...
عشنا وشفنا |
أخوى إدريس البدرى
إنت قلتها بى عضم لسانك ، ليه ما تصدق دى !!!
فى البحصل فى السودان خليك مؤمن ،،،
إنشاء الله تعيش كتير وتشوف كتير ،،،
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
الأستاذ الفاضل الفاتح الجنيد...
كل التحايا العطرة....
| Quote: وسلام يا سودان ،،، |
وأنا أقول وعلى الدنيا السلام ياسودان....
أفي المشاعر وبالذات اللحظات المؤلمة والحزينة تمثيل سبحان الله !!!
كل يوم نسمع العجب العجاب!....الى أين ننتهي لا أدري؟
تقديري سيدي الفاضل....
| |
|
|
|
|
|
|
|
|
|
Re: لا تصدق قبل أن تدخل !!! (Re: salma subhi)
|
Quote: وأنا أقول وعلى الدنيا السلام ياسودان....
أفي المشاعر وبالذات اللحظات المؤلمة والحزينة تمثيل سبحان الله !!!
كل يوم نسمع العجب العجاب!....الى أين ننتهي لا أدري؟ |
العزيزة سلمى صبحى
عميق ودى
المصيبة أن السودان اصبح بكامله مسرح ،،،
والممثلون فيه أكثر من المشاهدين ،،،
أيام العزاء إتقلصت وبقت يوم واحد فقط ،،،
وعما قريب تسمعى أن العزاء يقى بال ( Masseges )
الزمن بقى محسوب بالمادة ، الدقيقة الضايعة فى العزاء لها كلفتها ،،،
بخلاف المظاهر ، قد يكون تأجير البكايات الهدف منه السترة ، وعدم شيل الحال ،،
لأنو الاحساس بالألم إنعدم ، والعواطف أصبح ماليها مكان ،،
فلازم يعوضوا ده بالبكايات ،،،
| |
|
|
|
|
|
|
|
|
|
Re: لا تصدق قبل أن تدخل !!! (Re: الطيب شيقوق)
|
الشيقوق الحبيب ،،،
حليل لمن أهلنا ناس العرب اليافوق يجوك شى بالحمير ، وشى الجمال ، وشى باللوارى الاوستن والسفنجة والبى إم سى ، وشى بالواطه ،،
شيبا وشبابا ، رجالا ونساءاً ،،،
فرادى وجماعات ، وزرافات ،،،
الحروم يكيلن التراب من الشارع فوق رؤوسهن ،،،
والسكلى يشق الحله ،،،
يتكسرو فوق الفراش كان عشرة يوم كان شهر ،،،
والحلة كلها القريب والبعيد ينوموا فى بيت البكاء فى الواطه مدة الفراش ،،،
ويجوك ناس الحلة بى شاى الصباح من صلاة الفجر ، وعمدان الفطور اللقمة ، والغداء بى ملاح الويكة والشرموط ،،، والميسور الحال يجي شايل ملاح قرع ، أو بامبى ،،، ( آخر مرة أكلت بمبى متين؟؟ )
تجى آخر الزمن تقول لى العزاء بال Masseges
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
| Quote: والحلة كلها القريب والبعيد ينوموا فى بيت البكاء فى الواطه مدة الفراش ،،، |
بس يا الفاتح اخوى في واحدين رمت بتكسروا ليك في الراكوبة وبيخلفوا كراع في كراع وغير جيب يا ولد شاى وجيب يا ولد قهوة ما عندهم حاجة ومرات لم يجوا ضيوف من الوجهاء برضه بخلي الشاى وبجي بتشاور في الونسة .
هيييييييييييع نحن البنكرم الدابة قبال سيدها
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
الأخ/ الفاتح الجنيد تحية طيبة
صدقنا من العنوان أليس المؤمن بصديق ؟
لك كل التحية وأنت تنقل لنا إفرازات هذا الزمن الردئ ، فإنعدام الصدق يتجلى حتى فى المآتم ، لآ أعرف أصحاب أهل البكاء المعنيين ولكنه الخواء والفراغ مؤكد أنهم قضوا أوقاتهم فى جمع المال وقطعوا كل صلاتهم بأهلهم وأحبابهم ومجتمعهم وهمو الآن يضيعون أموالهم فى قتل الوقت ومحاولة التغطية على قطعهم لصلاتهم والشو أب .
يا لها من مفارقة فقد إشتكى قديما بعض الصحابة للرسول صلى الله عليه وسلم من أنه " ذهب أهل الدثور بالنذور " والآن أريتنا بما ذهبوا.
لك التحية مجددا فقد آثرنا أن تكون تحيتنا لكم بالمرور عليكم فى داركم.
لك كل الود
أخوك/ أبوبكر
| |
|
|
|
|
|
|
|
|
|
Re: لا تصدق قبل أن تدخل !!! (Re: أبوبكر أبوالقاسم)
|
| Quote: فقد آثرنا أن تكون تحيتنا لكم بالمرور عليكم فى داركم. |
فتوحي
الزول الكتب الكلام الفوق ده سرك وقريبك وجديد لنج في المنبر العام ومن بورداب مسقط وحياتك تحييهو وتسلم عليه بالانف زى اهلنا العمانيين .
هيييييييييييييييع اوع الزوغة
| |
|
|
|
|
|
|
|
|
|
Re: لا تصدق قبل أن تدخل !!! (Re: الطيب شيقوق)
|
Quote: الأخ/ الفاتح الجنيد تحية طيبة
صدقنا من العنوان أليس المؤمن بصديق ؟
لك كل التحية وأنت تنقل لنا إفرازات هذا الزمن الردئ ، فإنعدام الصدق يتجلى حتى فى المآتم ، لآ أعرف أصحاب أهل البكاء المعنيين ولكنه الخواء والفراغ مؤكد أنهم قضوا أوقاتهم فى جمع المال وقطعوا كل صلاتهم بأهلهم وأحبابهم ومجتمعهم وهمو الآن يضيعون أموالهم فى قتل الوقت ومحاولة التغطية على قطعهم لصلاتهم والشو أب .
يا لها من مفارقة فقد إشتكى قديما بعض الصحابة للرسول صلى الله عليه وسلم من أنه " ذهب أهل الدثور بالنذور " والآن أريتنا بما ذهبوا.
لك التحية مجددا فقد آثرنا أن تكون تحيتنا لكم بالمرور عليكم فى داركم.
لك كل الود
أخوك/ أبوبكر |
الاخ العزيز ابوبكر ،، تحية وتقدير
أسعدنى كثيرا مرورك الكريم ،،،
وشكرا على هذه الاضافة ،،،
وهلا ومرحبا بيك مجددا فى المنبر قلما بارزا ،،،
ومنتظر مرورك فى بيتنا عدييييييل بالباب .... /B]
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
Quote: فتوحي
الزول الكتب الكلام الفوق ده سرك وقريبك وجديد لنج في المنبر العام ومن بورداب مسقط وحياتك تحييهو وتسلم عليه بالانف زى اهلنا العمانيين . |
الشيقوق
هو فى أجمل من سلامنا !!! حضنه قوية لمن عضامك ترطرط !!!
حاجه تفك الفلايت ،،،
تقول لى سلام بالانف !!!
| |
|
|
|
|
|
|
|
|
|
Re: لا تصدق قبل أن تدخل !!! (Re: الفاتح الجنيد)
|
| Quote: هيييييييييييع نحن البنكرم الدابة قبال سيدها |
الشيقوق
إنتو من البنتظرو الضيوف يجو بى حميرهم للفاتحة
أول ما الضيف ينط من ضهر الحمار يقوم واحد من الجنيات يمسك الحمار من رقبتو
ويسوقو يعلِّق ليهو بى برسيم قبل سيدو مايشيل الفاتحة
وويلو كان إتأخر ، نهره واحدة تخلى شعر جلدو يقوم صوفه صوفه ...
| |
|
|
|
|
|
|
| |
الفاتح الجنيد
يازولyazoalيازول
ابو جهينة
الطيب شيقوق
اساسي
ابوحراز
Abd Alla Elhabib
A.Razek Althalib
ismeil abbas
اسعد الريفى
ترهاقا
المسافر
معتصم دفع الله
عبد المنعم سليمان
ابو عثمان
Abureesh
Tragie Mustafa
محمد المرتضى حامد
نها محسن أبورأس
إدريس البدري
salma subhi
أبوبكر أبوالقاسم
فيس بوك
تويتر
انستقرام
يوتيوب
بنتيريست