كتب الكاتب الفاتح جبرا المتوفرة بمعرض الدوحة
|
يا دنيا ليه دايما كده
|
يا دنيا ليه دايما كده كل الظروف متمردة حظ الشقي الما خلّا باب في الدنيا لافي مُحّددة لا طال حلم لا طال نصيب بقراية كوم متعددة
يا دنيا ليه دايما جري ما تقيفي مرة واصبري مستعجلة ولاحقة الشنو ما كوم حصادك مُهتري والفايدة مبلوعة في كروش تاجر ضلال أو مفتري
يا دنيا ليه دايما عذاب أسفار بعيدة واغتراب كان فيها ايه لو خير بلد بالعدل مقسوم بالحساب ما الخير كتير ما بدور سفر وضياع عمر محسوب سراب
يا دنيا ليه دايما حزن دايما دموع وقلوب تئن وسواد كثيف دخان ألم نابع من القلب السِخِن وغراب كلام بوم الفقر ساكن معشعش في البدن
يا دنيا ليه دايما ضلام وغيوم مكدسة ليلا دام وسكون عجيب مبتور لسان محروم بيهمس بالكلام وعيون مقدقدة بالسهر عميانة تسبح في الظلام
يا دنيا ليه ما فيك أمان والظلم آمر في الزمان والخوف دخل نخر العضم والسوس ده هو الندل الجبان والروح مُعّذبة بالسكوت سِكّين عذاب وسياط هوان
يا دنيا ليه دايما كلام ..
|
|
|
|
|
|
|
|
Re: يا دنيا ليه دايما كده (Re: مازن الجمّال)
|
Quote: يا دنيا ليه دائماً كده |
سؤال وجيه والله أخ مازن وعلي وزنها انا أقول ليك
ليه يا زمن تقسي وتجور تترك لهيب الغربة يحرق في الصدور وليه المآسي والحزن تصبح دهور وليه كمان كل الكلام خارج السطور يا زمن ارحم لحالنا وكن صبور خلي الطبيعة تبتسم وتشع بنور ليه كل أحلامنا تتبخر تزول ليه كل أشواقنا كاسيها الذبول لو كنت اعرف من زمان خافي الأمور كان كل بسمه وكل كلمة حب تزول وارجع اقول ليه يا زمن تقسي وتجور تترك لهيب الغربة يحرق في الصدور
شكراً ليك يا مازن حركت فيني بعض المشاعر
| |
|
|
|
|
|
|
Re: يا دنيا ليه دايما كده (Re: هاشم أحمد خلف الله)
|
Quote: ليه يا زمن تقسي وتجور تترك لهيب الغربة يحرق في الصدور وليه المآسي والحزن تصبح دهور وليه كمان كل الكلام خارج السطور
|
ليه يا زمن تقسى وتجور
تهدم حلم يادوب بدا
وتكسر جادر قلبا صبور
ويسيل نزيف جرح الهموم
تسكب عليو ملح الدهور
عاوز تزيد آلامو كم!!
ما كفاية ظلمك ليه جور
...................
الزول الجميل هاشم
مشاعرك النقية ما محتاجة تحريك
سلمت اخي .
| |
|
|
|
|
|
|
Re: يا دنيا ليه دايما كده (Re: مازن الجمّال)
|
يا مازن الجميل ... الدنيا ملاوعة ولذا فهي دنيا وليست عليا ... ملاوعة ومكابسة وجري يقطع النفس وبرضو قي امل وطموح وحب كتير بخلينا نكابس ونلاوع ونجري معاها سوا سوا ...غني للحب والامل وستجد ان الدنيا حتخجل وتبطل تلاوعك .... لك مودتي ابوبكر
| |
|
|
|
|
|
|
Re: يا دنيا ليه دايما كده (Re: abubakr)
|
الأخ الفاضل مازن... عاطر التحايا....
ليس كل ما يتمناه المرء يدركه.... ما أجمل أغانينا السودانية التي تفيض و تعبر عن....يا دنيا ليه دايماً كده!!! لنختار...
في اليلة ديك
في الليلة ديك لا هان علي ارضى واسامحك ولا هان علي أعتب عليك شلت الجراح والابتسامة وكل حرمان اليتامى جيت اهنيك واصافحك جيت اقول مبروك عليك
ومديت يميني بلا كلام ما قدرت قدامك أقيف ورجعت حابس ادمعي في الليلة ديك
في الليلة ديك والناس تشارك فرحتك حسيت باني غيب هناك وغريبة انتي في دنيتك حسيت معاني الفرقة حسيت بالوجود ماخد سواد من حنتك شفت الدموع خلف الرموش مربوطة بي حسرة وضياع ورعشة الكف الخضل مقرونة بي نظرة وداع جابو القدر في سكتك
تقديري
| |
|
|
|
|
|
|
Re: يا دنيا ليه دايما كده (Re: salma subhi)
|
الاخت العزيزة سلمى
تحياتي
Quote: ليس كل ما يتمناه المرء يدركه.... ما أجمل أغانينا السودانية التي تفيض و تعبر عن....يا دنيا ليه دايماً كده!!!
|
شي اكيد وإلا ما كان في حزن ...
وعندك برضو اغنية من الاغاني البتديك نفس التعبير:
ما كنت متصور
في يوم إجيك مغلوب
شايل جرح دنياي
من زولك المحبوب
الدنيا ياما توري
والدهر ياما يقري
لمن تفوت إنت
في الدنيا بس شن لي
أنا كنت فاكرك لي
ناسي الزمن و أحكامو
هم البريد في يومو
ما بدور يشوف قدامو
تاري الزمن بصيبني
منك بعيد يحرمني
يظلم سنينا السمحة
ينسي العذاب البي
صبر السنين الكان
حاضننو في الأعماق
كم بغرو من الناس
بقي لي العزول حراق
أنا خلاس مليتو
قلبي الحزين خليتو
مجبور أسامحك أنا
و أمسح دموع عيني
أنا مابلومك إنت
ما بعاتبك إنت
مهما الدموع تتحدر
تغلبني غصباً عني
البينا أكبر و أكبر
من قلبي ليك إتمني
تسعد و كمان تتهني
باكر تبارك لي
و الحنة في إيدي
أقدار يا نور عيني
و أنا كنت فاكرك لي
................
شكرا اختي سلمى على المداخلة الجميلة .. وياريت لو تمدينا بالمزيد
| |
|
|
|
|
|
|
Re: يا دنيا ليه دايما كده (Re: مازن الجمّال)
|
اجتزبتني الكلمات الرائعه ومن قبلها اسم الجمال
ود مدني ود أزرق جامع شاطوط شارع سنكات جبرونا الشانزليزيه - التاج طعمية - ناس قاسم فرنساوي - دكان معتصم بتاع العطور - طاحونه عمك الريح الكوافير - دي معالم من مدينتي واخر معلم وابرزها لوجاز التعبير مازن الجمال
لك الود ابن مدينتي
ــــــــــــــ انت ما بتعرفني زمان بس من الليله عرفتني؟؟
| |
|
|
|
|
|
|
Re: يا دنيا ليه دايما كده (Re: ممدوح أبارو)
|
Quote: لك الود ابن مدينتي
|
يا سلام عليك يا ود حلتي
شارع البحيرية وبقالة الحجر ومظلة الحجر ومدرسة ودازرق
ياخ اكيد من الليلة بعرفك تب تاني
____________
ممدوح يا جميل
مودة بحجم اشتياقي لودأزرق
| |
|
|
|
|
|
|
Re: يا دنيا ليه دايما كده (Re: مازن الجمّال)
|
Quote: يا دنيا ليه دايما كده كل الظروف متمردة حظ الشقي الما خلّا باب في الدنيا لافي مُحّددة لا طال حلم لا طال نصيب بقراية كوم متعددة
يا دنيا ليه دايما جري ما تقيفي مرة واصبري مستعجلة ولاحقة الشنو ما كوم حصادك مُهتري والفايدة مبلوعة في كروش تاجر ضلال أو مفتري
يا دنيا ليه دايما عذاب أسفار بعيدة واغتراب كان فيها ايه لو خير بلد بالعدل مقسوم بالحساب ما الخير كتير ما بدور سفر وضياع عمر محسوب سراب
يا دنيا ليه دايما حزن دايما دموع وقلوب تئن وسواد كثيف دخان ألم نابع من القلب السِخِن وغراب كلام بوم الفقر ساكن معشعش في البدن
يا دنيا ليه دايما ضلام وغيوم مكدسة ليلا دام وسكون عجيب مبتور لسان محروم بيهمس بالكلام وعيون مقدقدة بالسهر عميانة تسبح في الظلام
يا دنيا ليه ما فيك أمان والظلم آمر في الزمان والخوف دخل نخر العضم والسوس ده هو الندل الجبان والروح مُعّذبة بالسكوت سِكّين عذاب وسياط هوان
يا دنيا ليه دايما كلام .. |
حرام يامازن تعمل كدا تلوع قلوبنا بي الشكل دا
يا الحبيب أضحك لها تبتسم لك أحملها كلمة طيبة يا طيب بين جنبيك تأتيك راكعة أنت بحر للمعاني الطيبة لا تستكين لعنادها إستبشر خير يا وجه الخير
لك مني أجمل المودة وجد القصيدة حلوة
| |
|
|
|
|
|
|
Re: يا دنيا ليه دايما كده (Re: خالد علي محجوب المنسي)
|
Quote: أحملها كلمة طيبة يا طيب بين جنبيك تأتيك راكعة أنت بحر للمعاني الطيبة |
الزول النقي
خالد
صدقني لو ما الضحك والابحار في عالمكم الجميل ده الواحد كان طق ليو عرق زمان
سعيد بوجودي معاكم يا خالد وممتن جدا لبكري ابو بكر انو عرفني بيكم
لذلك ربنا يخليكم لي ياخي
| |
|
|
|
|
|
|
Re: يا دنيا ليه دايما كده (Re: مازن الجمّال)
|
يا دنيا ليه دايما عذاب أسفار بعيدة واغتراب كان فيها ايه لو خير بلد بالعدل مقسوم بالحساب ما الخير كتير ما بدور سفر وضياع عمر محسوب سراب
أخ من الجزء دا اصابني في مقتل ..
مازن الجمال خالص تقديري
| |
|
|
|
|
|
|
Re: يا دنيا ليه دايما كده (Re: الطاهر عثمان)
|
Quote: كان فيها ايه لو خير بلد بالعدل مقسوم بالحساب ما الخير كتير ما بدور سفر وضياع عمر محسوب سراب
|
يا نيل ياراقى يا بطل
ياخى كل الروعه لك وللقصيد. وليه ما نحلم وتتمدد فى الدنيا امانينا...
| |
|
|
|
|
|
|
Re: يا دنيا ليه دايما كده (Re: سميح جمال)
|
ونحلم بي سحاب ومطر
بيغسل في ذنوب الخلق
ويروي حقول ملانة شدر
وكل ما الرعدة تضرب فوق
يزيد في قوته ويكتر
سحاب مليان يكون أسود
سواد قلب العلينا حجر
وتنزل صاقعة مرة ومرة
تختف روحه ليها تجر
تنضف كل خوازيقنا
وتسفك لي دماهم صر
-----------------
سميح يا نبيل
كل المودة والحب ليك يا جميل
| |
|
|
|
|
|
|
|