كتب الكاتب الفاتح جبرا المتوفرة بمعرض الدوحة
|
|
 عمر الفاروق محلّل قناة سودانيز أون لاين الرياضية والأستديو التحليلي السودان - زامبيا
|
طبعاً يا جماعة أي زول قبل ما يقرا كلامي لازم يتخيلني بي الصلعة مجلطة بي الكريم والبودرة في الوش تقول يا غربتي مع الكرفتة العريضة الكاروهات والبدلة إضافة لي قارورة موية صحة وعلبة بيبسي كولا الراعي الرسمي لي انا مع جوال سوداني المرمي في تربيزة التحليل ..
قبل كل شي أنسونا من وهمات غياب 32 عام وطولنا من التنافس ويكفينا اننا تأهلنا والشباب ما قصّروا و و و و و ..
السنغال دي غايبة من كاس العالم عمرها ده كلو وفي الإفتتاح غلبت فرنسا ..
الكاميرون غايبة ليها جغلومية سنة وفي أول ظهور ضربت الأرجنتين بطل الكاس..
نتفق على حاجة مهمة يا شباب :
وصلنا المراحل دي يبقا نكون قدرها والكلام ده للجمهور ولي اللاعبين ولي ماذدا زاااااتو ولي شداد..
لو السودان طيلة ال32 سنة دي بيركض فقط من أجل الوصول للنهائيات وده طموحو فماف داعي للتعب وحرق الأعصاب وشحدة القروش دي !!!
نبدا المباراة :
ومن قولة تيييت وبكل أسف وضح جليّاً إنو مازدا واضع التشكيلة دي من سنة 2007 وما ظنيتو تعب أو إجتهد شديد في توليف طريقة جديدة للعب ولو بنفس اللاعبين ..
أي فريق عايز يكسب يا السي مازدا مفروض يأمن دفاعو ..
وأي تأمين دفاع بيكون بوضع لاعب ليبرو حر خلف المسّاكين ودي ما دايرة درس عصر ..
كل الأهداف اللي ولجت مرمانا بي سبب وقوف اللاعبين في الدفاع على خط واحد خصوصاً ريتشارد وسفاري ..
البيشوف إنو الغلطان علاء الدين بيكون ظلموا لأنو الغلط الأكبر من ريتشارد وسفاري ومن قبلهم مازدا الذي يصر أن يلعب بي المفهوم القديم للمدافعين :
يا سيرباك ميّل يمين مع الباك اليمين ..وإنت يا الأستوبر ميّل شمال مع الباك الشمال ..بس
بالله !!!!!!ياخي تخ !!!!معقولة لسة بنلعب بي الفهم ده ؟
مازدا كضااااااااب وقال انا حا ألعب بي 4-5-1 واللي شوفناهو أمبارح ده 4-4-2
يا حليلك يا مازدا ومقدرات فريقك الحالية تتطلب 3-6-1 لضمان وجود الليبرو في الدفاع مع 2 مسّاكين مع وجود المحاور في الوسط في وجود هيثم والعجب كداعمين للمناورة الهجومية ..
نصيحة ليك يا مازدا في بطولة زي دي ألعب على المرتدات ودرب لعيبتك عليها ووقف ليك مهاجم واحد بس قدام المدافعين وما تشلهت المهاجمين نظام يا طمبل ميّل يمين ويا العجب ميّل شمال ..
وميل يمين ..ميل شمال ..ودوووووور ..ودووووووووور ..ودووووور.. يا لابس البمبي..
المعز محجوب أمبارح كعب ويسأل عن هدفين كان ممكن يشيلهم ويغطي غلط الدفاع لكن ما إنستر والكورتين دخلوا بي كل سهولة ..
نعم أنقذ الفريق من تلاتة أقوان محققة كلن معزم بتاع أمبارح يفتقد للرشاقة واللقطة التلفزيونية اللي شال بيها الكورة بي طرف أصابعينو كتر من الدردقة ساي ..
المعز العرس مؤثر فيهو وترطيبة العرس ظاهرة عليهو وشهر العسل في أسبانيا واضح في الوزن الزائد والسرحان ..
انا مستغرب كيف تسمح لي لاعبك يعرس في الوقت ده !!!
حا تقولوا لي كمان حا تمنعوا العرس حا أقول ليكم مش هو موظف (محترف) ؟ ومش انت لمن تجي تقدم لي إجازة للعرس المدير لو عايزك ما بيديك إجازة ؟ اها ده المفروض يحصل لي معز ..
سفاري يسأل عن الهدف الأول وما تتخلعوا لو جريتو الشريط حا تلقوا الخطأ بدا منو وبي الأصح بدا من مازدا اللي يبدو إنو كان عايز يخلي سفاري شايل محل قلق اللي بيكثر التقدم وبالمناسبة الهجمة بدت من هناك ..سفاري بعد داك تحسن كتير لأنو تخلّى عن الميلان جهة اليمين ورجع لي خانتو المحببة في عمق الدفاع وتفرغ تماماً للمنطقة دي ونجح بعد داك ..
ريشتارد بيلبد في كتير من الأحيان وعندو حركة كده شابك فيها يشيل ويتكل الكورة على التماس بي سبب وبدون سبب نظام ده مبدأ السلامة !!
علاء الدين جبريل لعب قدر المتاح وأرهق نفسو بي الجري الشديد وتحمل العبء الأكبر في الدفاع لأن معظم الهجوم كان من جهة الشمال ولا يسأل عن الهدف الأول وعن هدف الكورنر ..
بدر الدين قلق هو واحد من نجوم المباراة مع هيثم مصفى وعلاء الدين يوسف وهو اللاعب الوحيد اللي طيلة المباراة بيمرر صاح وبيعكس صاح وبيهدف صاح ..لاعب فيه ملامح إحتراف ولعب بي مسئولية ..
هيثم مصطفى لعب كما لم يلعب من قبل مع المنتخب وربما تكون هي الأجمل له منذ التصفيات ..تمرير وحركة دؤوبة وسيطرة كاملة على الكرة بين رجليه تنويع في التمرير مراوغة جادة ومثمرة ..
أكبر عيوب هيثم تكمن في عدم الإلتحام مع الخصم وضعف القدرة التهديفية والإصرار على لعبة (البليسنق) في التسديد ..لكن هيثم أمبارح أكد فعلاً إنو برنس..
علاء الدين يوسف قلبو حار والوحيد اللي كان بيهدف من أي حتة والوحيد البيقلع الكورة من الأفارقة ديل كان عفار كان قلع عديل كان دق كان إحتكاك ..وعووض البداية الضعيفة لي مجاهد اللي يبدو إنو كان في وادي والمعسكر الإعدادي في وادي ..
اللاعب الأسواء في الدور المنوط به كان عمر بخيت فلا هو كان ساترا للدفاع ولا قالعاً لي كورة ولا داعماً للهجوم ...
لاااااااااااااااااااااايص في النص زي أم العروس تدخل وتمرق في اللا شئ ..
عمر فقد أهم ميزة له وهو خط الدفاع الأول وإراحة عمق الدفاع فأكثر من الإحتكاك غير القانوني ونال إنذار عشوائي ..
حمودة بشير يظهر بين الحين والحين وتسرع في إضاعة هدف مضمون بتسديدة رعناء ..
العجب يتشارك في السوء مع عمر بخيت والضربة الرأسية ما بتشفع ليك يا عجب وبالمناسبة حتى الضربة الرأسية كان في طريقها لخارج الملعب لولا اللقطة التلفزيونية من الحارس ..
العجب لاعب تقيل الحركة ولا يصلح إنو يكون مهاجم صريح فلا كان يطارد المدافعين ولا كان يمرر للاخرين وكان بيلعب على الواقف وأناي في كتير من الأحيان ويبدو إنو نفخات مزمل مؤثرة فيهو وعايز يلعب لصالح الفرد دون المجموعة ..
طمبل بكل صراحة أرهق نفسه قبل المدافعين بالركض خلف الكورة والجري يمين وشمال ..
طمبل بكل صراحة لا يصلح أن يكون المهاجم الأول بالسودان ..فلا يعقل إنو انا بكون بعتمد على مهاجم بيجيب لي قون واحد وبيضييع عشرين قوون..
حراااااااااااااااااااااااااااام يا مازدا تقعد ود زي عبد الحميد السعودي في الإحتياطي !!!!
حراااااااااااااااام طمبل أساسي والسعودي ما في ال16 عديييل !!!
حراااااااااااااام ود زي السعودي ما يشارك من قولة تيييت وتجي تبدا لي بي العجب وطمبل ..
ياخ عيييب لي إنك تبدا بي السعودي وعلاء الدين بابكر ؟؟؟؟
عيبوها ليي عليكم الله ..
أولاد زي اللوز يحاوروك في كباية يقالعوك في الكورة وما بيخافوا من الإحتكاك وعايزين يثبتوا روحهم !!
ديل مهاجمينك يا مازدا ..
وخلّي العجب وطمبل خياراتك البديلة في الشوط الثاني فالعجب وضح إنو لاعب الشوط الواحد ولاعب تعتمد عليهو في تغيير نمط المباراة فعليك أن تستخدمه ككرت بديل..
كرنقو الأفضل في حال الخسارة بفارق هدف لتنشيط الوسط والتسديد من بعيييد ..
ماف أيييييي داعي كان لي مساوي يكون خيار للتغيير..
سودااااااااااااااني ..وخلييييييييييييك سوداني ..
فاصل طوييييييييييييل ونواصل
|
|
 
|
|
|
|
|
|
|
|
Re: عمر الفاروق محلّل قناة سودانيز أون لاين الرياضية والأستديو التحليلي السودان - زامبيا (Re: عمر الفاروق)
|
عمر الفاروق ازيك
دا اتصال من السودان
انا ما بعرف احلل و لا بعرف الفرق بين 3-5-2 او 4-4-2
يعني معرفتي بالخطط زي معرفة صاحبنا القال المريخ صعد لدور ال 18
لكن الشي الاتضح لي انو ماذدا نجح ان يخسر ب 3 اهداف و دي نتيجه تجعله يبدو افضل من استاذه اوتفستر الذي خسر بالاربعه و هو يقود اسود الكاميرون
خطة مازدا كانت لو طلع لاعب من المريخ يخش لاعب من الهلال و العكس
عشان كدا ما كان قادر يطلع علاء جبريل عشان يدخل كرنقو و لا انا غلطان
غايتو اعزروني انا ما بعرف كوووووووووره لكن ناس الرياضيه اف ام شحنوني شحن ما عادي و قالو لي لازم اقيف مع صقور الجديان
| |
|
|
|
|
|
|
|
|
|
Re: عمر الفاروق محلّل قناة سودانيز أون لاين الرياضية والأستديو التحليلي السودان - زامبيا (Re: عمر الفاروق)
|
كلامك سليم يا عمر السودان كان ممكن يطلع بي نتيجه افضل كتير حتي ناس اليورو سبورت اتحسروا علي النتيجه وقالوا النتيجه ما عادله والسودان هو الافضل واشادوا كتير بي هيثم مصطفي بالذات
| Quote: علاء الدين جبريل لعب قدر المتاح وأرهق نفسو بي الجري الشديد وتحمل العبء الأكبر في الدفاع لأن معظم الهجوم كان من جهة الشمال ولا يسأل عن الهدف الأول وعن هدف الكورنر |
لكن مع احترامي لي رايك علاء الدين اتسبب في الهدف التاني وكان بامكانو ابعاد الكره بكل سهوله قبل خروجهاللكورنر ودي نفس غلطه سفاري في الهدف الاول
| |
|
|
|
|
|
|
|
|
|
Re: عمر الفاروق محلّل قناة سودانيز أون لاين الرياضية والأستديو التحليلي السودان - زامبيا (Re: عمر الفاروق)
|
مشكلتنا الأساسية هي اللياقة البدنية يعني إذا عاوزين نكسب في المستقبل لازم نجيب شباب الواحد فيهم لو ضرب الحيطة يرميها مش زي الجماعة وزن الريشة ديل. لا بد أن نعترف أن اللياقة البدنية هي 60% والباقي مهارات عشان كده لازم نجيب ناس عتاولة ونفرغهم للكورة بس وندربهم تدريب مكثف جداً ونتعاقد مع مدرب عالمي زي مدرب السنغال الزمان داك. طريقة إختيار اللعيبة مازالت طريقة تقليدية وعقيمة جداً ولازم نغيرها تماماً.
أنا امس شفقت على مدربنا محمد عبدالله مازدا لأنه قرب ينفجر من الزعل وهو سيد العارفين الكورة غالب ومغلوب.
تحياتي
| |
|
|
|
|
|
|
|
|
|
Re: عمر الفاروق محلّل قناة سودانيز أون لاين الرياضية والأستديو التحليلي السودان - زامبيا (Re: عمر الفاروق)
|
الأخ معاوية :
| Quote: لكن مع احترامي لي رايك علاء الدين اتسبب في الهدف التاني وكان بامكانو ابعاد الكره بكل سهوله قبل خروجهاللكورنر |
طالما الكورة طلعت كورنر فدي هجمة جديدة ومنفصلة ..اللاعب السوداني مسالم جداًًَ في الكورنر ..ما شافو الخواجات ديل في الكورنر العفار والضرب والخنق قبل تنفيذ الركنية ؟
ما بدافع عن علاء الدين فهو من أكتر لاعبين الهلال الما بيطمنوك في الهلال خليك من القومي ..
لاعب رجافة وكبكابة وباصو بيجهجه كيانك ..
خانتو دي كان بيلعب فيها الثعلب وعبد السلام حميدة ..
هيييييييه زمن..
| |
|
|
|
|
|
|
|
|
|
Re: عمر الفاروق محلّل قناة سودانيز أون لاين الرياضية والأستديو التحليلي السودان - زامبيا (Re: عمر الفاروق)
|
عمر الفاروق
مبروك ال New Look ال... إجباري!
بقيت تشبه -من نظرة من رأس البيت لى زول ماشي في الشارع- كل من:
عباس الجيلي، وغاندي عصام، و... شخصي الضعيف 
___________________________
عارف يا عمر: الدليل على صعوبة مهمة مازدا هو العدد الكبير جدا من التشكيلات
التي يقول أصحابها إنها كانت الأنسب!
أنا -طبعا- لا أدافع عن مازدا، لكن أود لفت الانتباه لأنه اختار ما يراه مناسبا من
بين "خـزعـمـية" خيار، وأعتقد إنو انتقاد طريقة اللعب وتنظيم اللاعبين يسبق
التشكيلة في الأولويات مع قناعتي بارتباط كل هذه العناصر.
| |
|
|
|
|
|
|
| |
عمر الفاروق
Ali Alameen
Maawya Hussein
إدريس البدري
معتصم محمد صالح
Mohammed Haroun
فيس بوك
تويتر
انستقرام
يوتيوب
بنتيريست