|
|
 الإجتماع التمهيدى الأول لروابط ولاية الجزيرة الكبرى بالرياض
|
*
*
إستضافة جمعية مدنى الخيرية (الأم) أمس الإثنين 10/3/2008م الإجتماع التمهيدى الأول لتكوين منبر/ملتقى/تجمع لأبناء ولاية الجزيرة الكبرى بالرياض - السعودية .
وقد حضر اللقاء جمع من مختلف المناطق أقدرهـ بحوالى (60 - 70) شخص من الجزيرة الخضراء للتشاور و التفاكر حول كيفية جمع كل مواطنى الولاية فى منبر كبير يسع الجميع وفيه تمثيل حقيقى لكل معتمديات الولاية ومن غير إقصاء أو تغييب لأحد . وبالإضافة لحضور ممثلين من أهل الجزيرة بصفاتهم الشخصية نظرا لعدم تكوين روابط فى مناطقهم حتى الآن كان لحضور بعض روابط الجزيرة المكونة أصلا أثرهـ الفاعل فى الإجتماع و الروح الطيبة و الأفكار الجميلة التى سادت الجلسة ، ومن الروابط التى حضرت و بتمثيل رسمى رابطة رفاعة ، رابطة منطقة الحلاوين ، جمعية مدنى الخيرية ، رابطة منطقة المناقل .
وقد تم تكليف عدد(14) شخص من الحضور للإعداد للإجتماع التمهيدى الثانى لتكوين منبر/ملتقى/تجمع لأبناء ولاية الجزيرة الكبرى بالرياض فى الأيام القليلة القادمة لتعميم الفكرة على من لم يحضر الإجتماع التمهيدى الأول حتى يتم تمثيل لكل أهل الولاية الخضراء من خلال تجمع/منبر/ملتقى قوى شفاف شعبى ديمقراطى لولاية الجزيرة الكبرى .
ورحم الله الشريف زين العابدين الهندى حين قال :
مطروحت الجبين من سوبا لي سنار
نيليك من غرامهم لبسوك سوار
اكتفاك موطأة فيها ماء وخضار
ولي عزاز القبايل صرت احسن دار
محصولك دهب مابكيلو بي العبار
مواسمك عدة محسوبات طوال وكتار
ارضك في الجمال محسوبة بي الاشبار
مشكلة بي التراب لكن لجين ونضار
**
ترعك زي بحار لبنان طوال وعدال
واب عشرين افوق ناس بردى في الامثال
لياليك بي القمر رويانه نور وظلال
مطرزة بي النجوم في احتفال وجمال
**
قرآنك بزيم من كنت انتي بلاد
تقايبك تضوي الليل زناد في زناد
ماشقاك ضلال الا انشج وانحاد
وما حال فيك ظلوم الا انكبح وانقاد
عزك من قديم محسوب جدود واحفاد
عمروك الرجال تيلاد قصاد تيلاد
زرعوك بي السلاليك ومنجل الحصاد
جرنك في التقي تمتم قرافة وزاد
**
مبسوطة ومحكرة لاهبك لاتبوب
وقطنك زي لتيب الحقنة خاطي عيوب
معلاق منتنى ولوزا عفى ومكروب
وتيلته طويلة زي خيط الحرير في التوب
**
دواوينك مفتحة لي الضيوف مفروشة
وحلالك مجندرة لاوسخ لاكوشه
شاربة الهمبريب بي الساريات مرشوشة
والعجب الاماسي تقول ليالي الروشة
**
في مدني الكبير نشأة لك الحيثية
فجرتي المواهب ومنبع الوطنية
بذرة مقدسة اتربت على الحرية
من المؤتمر لي الليلة نامية قوية
من يومك كسبتي الكاس وشلتي الراية
وافكار المحافل باقية ليهم تاية
بي التعليم سقوك وشبعوك قراية
وادوك من شبابهم كل حب ورعاية
**
حليل قلب الجزيرة المستقيد النابض
حليل جمعة رجالها وجيل شبابها الناهض
حليل جمع السراة زي الهزبر الرابض
كل واحد على وطنيته عاضي وقابض
**
يا ام الزهور ماتسوي قبض الريح
كان رايك زمان بشفي وبفيد وبريح
قضي لنا السواكب وامسحي التبريح
فاتوك الرجال لسع جناك بصيح
**
مابرضاك الخوف والضياع والحيرة
مابرضاك ليوم تبقى انتي اسيرة
مابرضاك اكلتي الحلوة تنسى مريرة
والتاريخ رهيب مابنسى ليك تسيطرة
**
حاشاك الملامة وما بتسوي العيب
وايدك لسه تجدع من بعيد وتصيب
ويومك في المحاص شايفنو جاي قريب
ودورك بتلعب قبل الشمش ماتغيب
**
اكسري الماين كنار خلي الاراضي تعوم
سويهن بحر من ريبا لي الخرطوم
ولعي في الفبارك غيظ ونار وسموم
خلي الهايفة تنقد والنصيحة قوم
سوي الترعة ساتروالمصارف كوم
سلي سيوفك الجبابه مثلوم
**
اعقب سنجة طوفي بي الدالي والمزموم
روح لي القرابين والسماسم كوم
شوفك كرمك شرف قال لي الردوك ماتلوم
انسى الفاتت ايامك بيجيهن يوم
**
ارفع ساعدك ربك العظيمة بتشوفها
حي ابا القديم وجديد بقت معروفة
قولي لي الشهداء نارنا متلعبة ومكلوفة
لا ماتت ولا غمضوا البقيدو ظروفها
**
ارجينا بنجيك موحدين صادقين
شايلين المدافع وبي السماء طايرين
صواريخنا بتثكل تطرش الاضنين
وفي الجاسر نقيف ليك بي النصر هازين
**
ديل اولاد حشاك لا ارتزاق لا زيف
وديل الكلهم صنديد واصله شريف
وديل دخريك لي سنين الجفاف والحيف
وديل دفقة ينابيعك شهور الصيف
ديل نيلك وقت قطع البرك والقيق
وديل ديم السواري الاصلو ما بتقيف
ديل الرضعوا حر لبنك بدون تحريف
وديل البقعوا في نارك بدون تكليف
ديل اتباشروبك انتي درقة وسيف
وديل اخوان صدق في الله دون تحريف
وديل يا ام عيونك وقلبك الوليف
**
خايضين فيك صحاري تقيد لهيب وشرار
وطالعين فيك جبال عاليات على الطيار
ونعرف ارضك المحبوبة بي الاشبار
وننزل في ربوعك ضحي ونمرق مع الاسحار
ماحجروك علينا حيارى او اغرار
نارك ما انطفأت من يوم رماك الغادر
وسجنك مافضي واهلك عليه تدافر
ولي الموت كمبلو اولادك مغني وشاعر
وكل عام ليك عيد بالدم موشح وظافر
خلي عدوك مجهجه في حكومته وحائر
وقيدك هسه بنكسره ونجدله ضفائر
**
نحن اولادك العارفانه دون تذكار
ونحن الجينا في نسلك من الابكار
ونحن الليلة سمعك في الضلام سهار
ونحن الفجر لي الليل كان قعد كان طار
ونحن نضري ورتابته ونشيلها عصار
ونحن بلابل الحرية تصدح حتى في الاوكار
**
اقول فيك تاني ياست الشرف والطول
وعزك في الارض تريان فروع واصول
ارقدي قفى بنجيك مهما زمانا يطول
ومهما الدهر يردم في حمولنا حمول
ومهما نموت فداك نترامي زول في زول
برضه منيعة انتي على القدر والصول
**
وانتي كبيرة اكبر من صغارة العسكر
وانتي عظيمة مابذلك سلاح البقهر
وانتي قوية لا بتلين ولا بتتكسر
وانتي انوف اشم من بيلا مابتتعفر
قودي لنا الرسنة وخلفي الاشتام
وخنقي لي دلاليكك وصحي النام
ارقصي الفاشر الهضليمه كب ونام
وقولي الليلة شبالكم علي حرام
لما تكسروا القيد اب عشرة اعوام
ولما تقعنوا الكاشفات ورا وقدام
ولما تجيبوا سجانكم خزي ومنضام
ولما اولادي ابقوا جنود ومش خدام
ولكم ودى ،،،،،،،،،،،،،،،
|
|
 
|
|
|
|
Mohamed Abdelgaleel
فيس بوك
تويتر
انستقرام
يوتيوب
بنتيريست