|
Re: تواصل خريجي مدرسة المؤتمر الثانويه............. (Re: ASHRAF ABUELHASSAN)
|
النصري سلامات
ذكريات الثانوية من اجمل المراحل.. في كل مرة كنت بنتظر اللمح لي اسم أو مداخل لي اي عضو يلمح لي مدرسة وادي سيدناالثانوية بس الظاهر لي مافيش . بالرغم من أنو المؤتمر الثانوية مدرسة الحلة ومرتعنا الخصيب ( للتمر هندي ) ( والصارقيل ) ايام البحر ومغامرات ( ابوطويلة ) الحارث ومجموعة الكلاب المدربه وبالرغم من انو كان طلعت في راس بيتنا ممكن اشوف المؤتمر معظم دفعتي بالمرحلة الابتدائية والمتوسطة درسو الثانوية بالموتمر .. وانا حسع لحدي الآن ( منشن ) علي اتنين ( الموردابي ) وود العباسية ديل مضمونين في الجيب .. والظاهر لي ح ( يخموك ) ساكت ويستلمو منك البوست ..
ASHRAF ABUELHASSAN غايتو يا اشرف انا بقرتح انو اسمك الكامل ( اشرف حسين ابوالحسن ) من بدري اسمك ده جايط لي في راسي وعايز اسالك لكن ما لقيت لي فرصة .. حاول تتذكرني .. واتذكر معاك بالمرة ( المرحوم معتز صلاح الجامعة الاهلية ، ومرتضي إبراهيم ، وناصر آدم ، وعبد الرحيم نورالجليل ، وجعفر عبد الحافظ ،،، وياسر عبد المنعم وعلاءالدين ( بطه ) وديل كلهم دفعة ابتدائي الرشادالابتدائية..
| |
|
|
|
|
|
|
Re: تواصل خريجي مدرسة المؤتمر الثانويه............. (Re: ASHRAF ABUELHASSAN)
|
Quote: لازلت احتفظ بشعر كثيف وبالتفة التي في مقدمة راسي |
انت يا اشرف كضبك ده ما عايز تخليهو ؟؟
تتخيل كنت محتفظ بصورة سنة اولى ابتدائي ،، مناظر غريبه جدا كل الاشكال ما مغريه انو يطلع منها دكتور يا مهندس .. طبعا في الصف الفوق الواقفين بتذكر كان العتاولة بتاعين الكنبه الاخيرة ، فيصل فرج ، ومجدى ابوسبعه بالاضافة لي استاذ عباس ، واستاذ عبد الله ،، بتذكر في اقصى اليسار مرتضي ابراهيم والمرحوم معتز وانت انا علي الناحية الشمال ومعاي طبعا محمد عبد القادر وعبد الرحيم.. طبعا يا اشرف فقدت الصورة في ظروف غامضه جدا .. ياريت لو عندك منها نسخة تكون بالغته..
طبعا مسالة ( الكرش ) ( والشيب ) دي عادية ما تتوتر منها المهم الاخلاق
| |
|
|
|
|
|
|
Re: تواصل خريجي مدرسة المؤتمر الثانويه............. (Re: tmbis)
|
Quote: تتخيل كنت محتفظ بصورة سنة اولى ابتدائي ،، مناظر غريبه جدا كل الاشكال ما مغريه انو يطلع منها دكتور يا مهندس .. |
هذه الصورة يا تمبس مطبوعة في ذاكرتي بشكل غريب وهي موجودة عندي بس مع الاسف في السودان
Quote: طبعا مسالة ( الكرش ) ( والشيب ) دي عادية ما تتوتر منها المهم الاخلاق |
حليل زمن الرشاقة والوجاهة
| |
|
|
|
|
|
|
Re: تواصل خريجي مدرسة المؤتمر الثانويه............. (Re: Osman Malik)
|
الاخ النصري ،،
تحياتنا ،، وفكرة جميلة جدا
انا من خريج المؤتمر ،، وبرضو كان الناظر حسن سلك الله يرحمه وكان
استاذ الانجليزي د. ابو واساذ حامد بتاع الرياضيات ،
انا اتخييل لى دفعة الشباب ناس اشرف ديل لانى برضو من ابو كدوك والمؤتمر،،
لكن يا خوانا سمعته انه المدرسة ح يبيعوها ؟
| |
|
|
|
|
|
|
Re: تواصل خريجي مدرسة المؤتمر الثانويه............. (Re: Elnasri Amin)
|
النصري اخوي
زول قبلوه في المؤتمر لكن حول امدرمان الاهلية ينفع تتواصلوا معاه ولا أنا وعلي الحسن نقوم نعمل لينا بوست ...
الاهلية مدرسة .. انجيلية ايه ؟؟ مع الاعتذار لزملاء الانجيلية خاصة عبده الشيخ الذي هزم هو و ميرغني سكر الاهلية في دورة المدارس( في سبعينات القرن الماضي) بعد أن كنا متقدمين 3 - صفر ... بعد تلك المباراة سجل عبده الشيخ في المريخ وميرغني سكر و مصطفي سيماوي ( من الاهلية) في الهلال ..
كانت قد راودتني فكرة في زمن سابق أن أكتب عن الاهلية تلك المدرسة العريقة وعن مؤسسيها و الشخصيات المشهورة التي خرجتها و البوست ده سوف يشجع تلك الفكرة خاصة وقد ظهروا اولاد الاهلية ... و كمان ممكن نمجد مدرسة أبوكدوك المتوسطة ... و الرشاد الابتدائية ياتمبس ..
فكرة جميلة فكرة التواصل !!!
سوف " اتاوق" من وقت لآخر ..
خالد
| |
|
|
|
|
|
|
Re: تواصل خريجي مدرسة المؤتمر الثانويه............. (Re: بهاء بكري)
|
يا بهاء بكري
Quote: وطبعا انا دفعتكم لكن زاملت صديقي عمر منصور بالغلط |
طبعا يا بهاء نحن حقو يكتبو لينا مدرسة الرشاد بي اسم ابوى .. لانو كلنان درسنا فيها لما كنت في اولى كان عامر اخوي في تانية وعماد في خامسه وقبليها بي فترة طبعا اتخرج منها عمر وعبد الفتاح ..
عمر طبعا درس في المؤتمر وفي محمد حسين
انا طبعا دفعة عمو صديق الموج وسجيمان
| |
|
|
|
|
|
|
Re: تواصل خريجي مدرسة المؤتمر الثانويه............. (Re: Elnasri Amin)
|
النصرى امين 1978-1981 ابن حيان ,ابن سيناء وابن خلدون اولاد دفعتنا الاصدقاء ياسر و اسامه سلمان جعفر. دكتور عبدالباسط نجم فقرة " لا ياعزوز" فى برنامج جنة الاطفال.... من لاعبى الكره نجم العباسيه حينها سلطان... ما متزكر اى من الاساتذه(خرفنا)
على الحسن منتظرين بوست الاهليه اصلو عندنا فيها حبان كتار جدا
ينوبامر ما اظننا حضرنا الاستاذ حسن سلك لاننا اتخرجنا 81
احمد الريح ممكن تجيب اخوك بس اوع يكون مريخابى
الموردابى واضح من اسمك انك كنت بتفطر فى بيتكم كل يوم
حسام يوسف شكرا للزياره و سنردها انشالله
اشرف حسين اهو من اول يوم قبضت ذميلين
تمبس احنا بنعطبرك من المولفه قلوبهم, بالله هو انتو البتسرقو صارقيلنا.
عثمان مالك احتمال نكون اتقابلنا فى الفسحه او ميدان الفولى بول.
ودالعباسيه ما قلت لينا سنه كم!! اوع تلاوز
خالد الطيب يازول انت ود البيت طالما اسمك نزل فى قبول المدرسه مشكله الاهليه انو فيها سته فصول لكل دفعه بينما المؤتمر ثلاثه فقط
| |
|
|
|
|
|
|
Re: تواصل خريجي مدرسة المؤتمر الثانويه............. (Re: Elnasri Amin)
|
تمبس يالذيذ .......... طبعا انا متذكر لغاية فتاح اخوك والدفعه في الحلة عمر منصور ونادر ابوالجيش ونادر عوض وحسين الحلبي ومحمد طيقور وعفيفي فتح الله واحمد حامد وامين ابراهيم والنزير وكمال محمدين ونزار احمد فضل الله وعبد المنعم انور ومجدي الطيب وامير ابوسليم وعقيل وحسام الصاوي ومعاوية ابوريده وكثيرون برجع ليك لما اتذكر , وانت لانك دغعة صديف الموج ماممكن اتذكرك , وللمعلوميه صديق الموج صديق للوالد ودغعة ابن عمنا حامد الذي نزل المعاش الاجباري من عشرة سنوات ودمت
| |
|
|
|
|
|
|
Re: تواصل خريجي مدرسة المؤتمر الثانويه............. (Re: بهاء بكري)
|
عبده الشيخ الذي هزم هو و ميرغني سكر الاهلية في دورة المدارس
Ya Khalid يا سلام علي الذكريات أنا حضرت هذه المباراة....و ميرغني سكر (نحن بنقول ليه...ميرغني سمبر....و قد إلتقيت به في فرانكفورد--المانيا الغربية في ال80th ....
طبعا في زمنا التحويل من المؤتمر أو الأهلية أو محمد حسين ساهل جدا إذا و جدت واحد يرغب في التحويل.
مع تحياتي
| |
|
|
|
|
|
|
Re: تواصل خريجي مدرسة المؤتمر الثانويه............. (Re: بهاء بكري)
|
بهاء العزيز.. طبعا الشباب ديل فعلا كلهم اولاد الحلة .. وجزء منهم بتذكر فيهو طشاش طشاش .. القاعد فيهم في السودان والبره السودان .. وطبعا احتكاكي الشديد مع نادر ابوالجيش ( ابوالشباب كلهم ) وطيفور طبعا في الكورة وعفيف فتح الله ..
بلاي تتذكر عبد المنعم ده كان ( حريف ) كورة كيف ؟؟ يحاورك في كباية شاي
| |
|
|
|
|
|
|
تواصل خرجي مدرسة الموتمر (Re: Elnasri Amin)
|
حليل الموتمر وايام الموتمر
انا اولى على عبداللطيف - تانية طه حسين - ثالثة بن رشد
على ايامنا استاذ ابو واستاذ حبو واستاذنا يوسف الخليفة واستاذ ابوالقاسم
حليل فول عمك نور الدايم في الموردة المواليد حليل الفول مع زجاجة البيزيانوس ودك الحصص من الفطور وزوغة
تيمبس شايفك طوااااالي داكي
بهاء الدين انتا قريبنا بس ما بوريك كيف بس من طرف حاتم محمد محجوب
شباب في زول بيعرف شجرة الصدلنجية
هههههههههههههههه حسن زمراوي بيعرفها
ود العباسية انتا ما دفعتى عديل
| |
|
|
|
|
|
|
Re: تواصل خرجي مدرسة الموتمر (Re: ALMURADABI)
|
يا دفعة اخباركم ،،،
والله تمبس دا بعرفه عديل كدا لكن طبعا هو دخيل على المؤتمر دي يعنى اصحاب ،، اصحاب
اما الموردابى واشرف ديل باين يا شباب نحن كنا دفعة واحدة انا ما بتزكر الفصول
لكن سنه اولى كنت فى البحيري كان من دفعتى ،،
ابوبكر مهدي
حسام شبيكة
ايمن زين العابدين
واولاد بانت والموردة كانوا كمية ،،
وكل الاساتذة الزكرتوهم انا عاصرتهم ،،،
اتذكر مرة كنا فى الفصل الاول او سنه اولى وكنا قاعدين فى الكنبة الاخيرة
انا وحسام شبيكة ومعانا زميلنا حسن الشهير بى دلوكة ،، المهم انا كنت قاعد فى النص
بيناتهم وانا كنت العامل شغب فى الفصل فقام استاذ حامد على ما اذكر اتلفت علينا
وقال لى حسام وحسن اطلعوا برة من الفصل وما تدخلوا لى حصة لحدي نهاية السنة
بدون اي مقدمات طبعا قايلهم هم الكانو عاملين شغب وانا طلعته منها زي الشعرة
من العجين ،،، لكن انتوا قايلين خلونى ؟؟؟
لكم كل التحايا ،،
| |
|
|
|
|
|
|
Re: تواصل خرجي مدرسة الموتمر (Re: ودالعباسية)
|
ود العباسية
Quote: ابوبكر مهدي
حسام شبيكة
ايمن زين العابدين
واولاد بانت والموردة كانوا كمية ،، |
هؤلا اصدقاء وجيران في بانت شرق
Quote: اما الموردابى واشرف ديل باين يا شباب نحن كنا دفعة واحدة |
انت باين عليك الدفعة البعدي ما دفعتي
| |
|
|
|
|
|
|
تواصل خرجي مدرسة الموتمر (Re: Elnasri Amin)
|
ود العباسية انتا الدفعة الورانا
استاذ حامد كان استاذ تدريب على ايامنا نحن درسنا استاذ ابوالقاسم
من العاباسية وين
ناس الرشيد مرجان ومحمد ابوالروس ديل اصحابنا
اشرف ده دفعتى ولا شنو يا ابوالشوش انا دفعة سامي هاشم وياسين احمد عواض ومحمد تاج السر ديل من العباسية يا ود العباسية .
| |
|
|
|
|
|
|
Re: تواصل خرجي مدرسة الموتمر (Re: ALMURADABI)
|
ALMURADABI
Quote: اشرف ده دفعتى ولا شنو يا ابوالشوش انا دفعة سامي هاشم وياسين احمد عواض ومحمد تاج السر |
يا زول انت دفعتي عديل كده وسامي هاشم ده من ابوكدودك المتوسطة صديق واخ عزيز وياسين احمد عواض كان معانا في الكديت ومعاه سامي هاشم محمد تاج السر اخ وصديق عزيز جدا
| |
|
|
|
|
|
|
Re: خريجي مدرسة المؤتمر الثانويه............. (Re: ايهاب مهاجر)
|
الأخ العزيز إيهاب
كان فى دفعتى أخ أسمه إيهاب من أبناء العرضه وأصبح مراجعا قانونيا وتركته فى السودان يعمل فى ديوان النائب العام
أنا فى الدفع التى تلت الاخ النصرى
دفعتنا وقتها أول السودان فى المرحلة المتوسطه وهو الاخ الصديق الفاضل
ومازلت اذكر مجموعة كبيره اخرى من المعليمن
وأهمهم استاذ محمود أستاذ الفنون الجميله
| |
|
|
|
|
|
|
Re: تواصل خريجي مدرسة المؤتمر الثانويه............. (Re: Elnasri Amin)
|
الاخ الفاضل عزيز الظاهر علينا دفعه واحده احنا دخلنا المؤتمر 1978 واتخرجنا منها 1981 و ازكر امتحان الفيزاء لتلك السنه ,فقد كان غايه فى الصعوبه , من ضمن اسئله ذلك الامتحان عن كره دخلت من الشباك و دقت فى الحيطه ثم نزلت فى حمام سباحه ..اوجد البعد البورى للكوره؟؟؟؟ بالله ده كلام !!! امتحان كان شبه مستحيل و اظن المتفوقين فيهو حصلو فقط على 70 فى المئه... دكتور عبدالباسط درس معاى فى سنه اولى و تانيه وفى سنه تالثه مشى فصل مختلف
اذكر من سنه اولى 2 من اولاد توتى اعتقد اسمائهم ابراهيم و عمر ...الغريب فى الامر اننى اذكر ملامحهم جيدا حتى الان...
اما بخصوص تزكرك لكل هؤلاء الاساتذه فهى معجزه فى نظرى ...بعد 27 سنه و لسه متزكر!!
انا فى انتظار الصوره بس انشالله فيها مجموعه كبيره من الدفعه
والسلام
| |
|
|
|
|
|
|
Re: تواصل خريجي مدرسة المؤتمر الثانويه............. (Re: Elnasri Amin)
|
الأخ العزيز النصرى
يالحبيب والله العظيم ما دفعه واحده ولكن اتعاصرنا فى المدرسه
ولو لم تخنى الذاكره كنت أنت مولع بكرة السلة
لأننا عندما كنا برالمه كنا نتفرج على أبو طالب ورفاقه من طوال الطلبة وهم يدكون ملعب الباسكت دكا
وكنت حينها أنا ميال الى الكره الطائره وذلك لفلسفة كنت أنتهجها وهى تعلم ما لا أعرفه لأننى حينها كنت ألعب كرة القدم ..
أما فى المناشط مع إنى موسيقى وحينها كنت أدرس بقصر الشباب والأطفال إلا أنى فضلت أن أنضم الى جمعية التصوير وذلك للاستفادة من المعرفة..
لن أنسى أستاذ عبدالرحمن عبدالله أستاذ التربية الأسلامية ومقولته الشهيره لاحياة فى الدين
سأنزل لك الصوره خلال اليوم باذن الله وكنت أنا حينها مع أحد الاصدقاء وأعتقد كان عبدالباسط فى ملعب كرة القدم حينما تم التصوير ووقفت مع الدفعة وأعتقد إنها كانت إبن رشد فى ذلك الحين والله أعلم..
بالمناسبة كان من أصدقائى من الدفع الامامى الاخ نادر السكى ووليد محمود وآخرين كنا نذهب للفطور فى المورده واحيانا فى السكى حيث نحظى بكرم نادر علينا وعندما نرجع نقف قليلا على شبابيك بيت الامانة أبوعنجه وفى يوم من الايام رصدنا أحد الاساتذة وكان يوم من الايام التى لا نتمنى أن تعاد..
هناك الكثير من الطرائف وشقاوة الشباب سأحاول تذكرها وسردها
عبدالعزيز خطاب
| |
|
|
|
|
|
|
Re: تواصل خريجي مدرسة المؤتمر الثانويه............. (Re: عزيز)
|
الأخ النصرى لك التحية والود
حاولت كثيرا أن أنظف الصوره ولكن لم أفلح فى ذلك نسبه لطول الزمن وسوء الحفظ وكثر التنقل لقد تركتها خلفى فى السودان ثم أتتنى ضمن مجموعه من الصور فى العام الماضى.. أتمنى أن تتمكن من معرفت بعض الاخوه مع عدم وضوح الصوره..
أخوكم عبدالعزيز خطاب
نعم وجدت مكتوب خلف الصوره ثالثه إبن رشد واستاذ كمال استاذ اللغه الانجليزية
| |
|
|
|
|
|
|
Re: تواصل خريجي مدرسة المؤتمر الثانويه............. (Re: بهاء بكري)
|
الأخ الفاضل بهاء
أكيد سنكون قد تقابلنا
وليد محمود هو الدفعه الامامى وكان زميلى فى قصر الشباب والاطفال وهذا هو سبب قوة العلاقة بيننا فى المؤتمر ونادر كان صديقا له وربما كنت أنت أخى بهاء أحد شلة الفطور لأننى يترأى لى بعض من تلكم الصحبه الطيبة .. ومازلت اذكر نادر فقد كان مجنون فى تصرفاته وسبحان الله قابلته مره بعد سنوات فكان مختلفا تماما ..
قل أخى بهاء من أى حى من أحياء امدرمان وأقول لك دفعتنا من تلكم البقعة الطيبة..
بالمناسبة قابلت الاخ وليد منذ ثلاثه سنوات هنا فى هولندا وهو قادما من بريطانيا..
تقبل مودتى عبدالعزيز خطاب
| |
|
|
|
|
|
|
Re: تواصل خريجي مدرسة المؤتمر الثانويه............. (Re: Elnasri Amin)
|
الاخ الموج شكرا للدعوه ومننا سمك من السكى الاخوه الموردابى ,بهاء شكرا لحضوركم الكريم
الاخ عزيز اعتقد ثالثه ابن رشد هو فصل بتاع تخصص رياضيات او للمتفوقين علمى ... اذكر ان فصلنا فى سنه تالثه اسمه ابن حيان او ابن سيناء
اما بخصوص الصوره فلم اتعرف على اى طالب فيها لطول المده
انت متاكد ان هذه الدفعه امتحنت الشهاده السودانيه سنه 1981؟؟
| |
|
|
|
|
|
|
تواصل خريجي مدرسة الموتمر الثانوية (Re: Elnasri Amin)
|
الاخ بهاء الدين انا ياني زاتي المعاكم في قطر وينك اخبارك مقطوعة واخبار محمد بكري شنو طمئنا عليك وورينا اخبارك شنو
الاخ عزيز عمر فتح الله ده ود عمي
والله يا عزيز انت قديم جدا من صورتك الابيض واسود دي بالمناسبة دكتور حسن خطاب قريبك بس نحنا جيرانوووو طوالي
ود العباسية انى شكلي بعرفك المهم ناس العباسية بنعرف الرشيد وفتحي وعماد بدوي ( باسوندا) وناجي قدح الدم وحسين مهدي وفيصل وعماد مبارك
| |
|
|
|
|
|
|
Re: تواصل خريجي مدرسة الموتمر الثانوية (Re: ALMURADABI)
|
الأخ الفاضل الموردابى
لك التحية والتقدير
نعم د. حسن خطاب أخى إبن عمى وإبنه إبراهيم ..
تعرف ياموردابى كان أجمل حاجه فى فسحة الفطور هى كوز ليمون من الكشك فى الناصية قريب من جامع الادارسه ما قادر اتذكر أسم صاحب الكشك آن ذاك..
ياسيدى الصوره تمت عبر جمعية التصوير بمدرسة المؤتمر والامكانيات فى ذلك الزمان للجمعية كانت كاميرا من الطراز القديم وورق ومونوتور وتحميض فى معمل المدرسه وكان ذلك للتعلم ..
وكدى ورينا انت دفعى النصرى أم دكتور حسن خطاب إبن عمى..
تقبل الود كله عبدالعزيز خطاب
| |
|
|
|
|
|
|
تواصل خريجي مدرسة المؤتمر (Re: Elnasri Amin)
|
الاخ عزيز
لا دفعت حسن خطاب ولا النصري انا دفعت ابراهيم بس ابراهيم خور عمر وانا المؤتمر
عموما قصة الصورة تبع جمعية التصوير الفتوغرافي لمدرسة المؤتمر قبلناها ومشيناها كدي ورينا صورة تانية ملونة الوقت دااااااااااااااااااك
| |
|
|
|
|
|
|
Re: تواصل خريجي مدرسة المؤتمر (Re: ALMURADABI)
|
المؤتمر من المدارس العريقه ولنا أصدقاء من خريجيها وكذلك أقارب ولكن رغم دراستى بمحمد حسين الا أنالمؤتمر المدرسه الوحيده التى لم يتم لى شرف زيارتها وطالما خرجت النصري وعزوز فهى عزيزه.... مرورا لأداء التحيه لخريجيها وأساتذتها والله يا النصري أنت بار بها قبل الآن لك وللجميع الود والسلام
منصور
| |
|
|
|
|
|
|
Re: تواصل خريجي مدرسة المؤتمر الثانويه............. (Re: Elnasri Amin)
|
Quote: الاخ د. عبدالباسط عزوز ثم أعتقد دكتور طبيب مجاهد |
الاخ عزيز اظنك تقصد الدكتور مجاهد صديق ايوب , وهو اخصائ اسنان وود حلتنا وقد تزاملنا من المرحله الابتدائيه ببيت المال ثم العامه واخيرا المؤتمر النوذجيه.
الاخ منصور شكرا ليك لزيارة حوش المدرسه لاول مره بعد كل هذه السنين..
هل تصدق يامنصور كنا نذهب للمدرسه يوميا عن طريق"ياعم قدام" لمدة ثلاث سنوات كنا نخرج من بيوتنا و نعرف ان احدهم سيتوقف وياخدنا لمدارسنا..لم يخيب ظننا ابدا ..كان هناك دائما ابن الحلال الكريم الذى يتوقف ليحملنا فى "بوكسيهو".....لكثرتنا كنا نصطاد البكاسى والبرنسات
الاخ الموردابى خليك ماسك الورديه لغاية ما اجيك
| |
|
|
|
|
|
|
Re: تواصل خريجي مدرسة المؤتمر الثانويه............. (Re: Elnasri Amin)
|
الأخ العزيز النصرى لك الود والتحية
Quote: الاخ عزيز اظنك تقصد الدكتور مجاهد صديق ايوب , وهو اخصائ اسنان وود حلتنا وقد تزاملنا من المرحله الابتدائيه ببيت المال ثم العامه واخيرا المؤتمر النوذجيه. |
الموجود فى الصورة الأخ دكتور جهاد الغزالى وهو تؤأم الأخ عبدالباسط ورفاق كانا لا يفترقان ولقد أسعدنى الحظ اليوم بأتصال من الأخ دكتور جهاد الغزالى من سويسرا فى طريقة الى أستكهولم حيث يقيم منذ سنوات .. كما أفادنى بأن الاخ دكتور عبدالباسط مستقر فى نيوكاسل منذ زمن ووعدنى بالتواصل بيننا جميعا..
أقترح أخ النصرى أن نضع عناويننا الالكترونية هنا فى هذا البوست وأرقام التلفونات حتى يسهل التواصل وتمتين العلاقات .. لأننا إلتقينا فى زمن كان زاهيا ورديا طيبا والفكرة كانت تفترش الاحلام والمستقبل..
كم أنا سعيد بسماع صوت الأخ دكتور جهاد وكم أنا سعيد بهذا البوست الوطن الذى التقينا فيه مجددا
عبدالعزيز خطاب هولندا - أمستلفين MAXHAVELAARLAAN 33 1183LL AMSTELVEEN HOLLAND
[email protected] 0031.20.6474608 منزل 0031.6.33970493 محمول
| |
|
|
|
|
|
|
Re: تواصل خرجي مدرسة المؤتمر (Re: ALMURADABI)
|
رحم الله الاستاذ حسن
خريج الموتمر دفعة 88-89
That is all I can keep in with in Arabic -so my apology- i
Osman Malik, salamat I hope and the family are doing great.
Hassan Zumraw (Mawlana) is that you AbuMustafa...I hope
The rest of the guys it is nice to hear from all of you
Mouiz Hashim
AlMutamar 89 U of K 95 Bradley 99
| |
|
|
|
|
|
|
Re: تواصل خريجي مدرسة المؤتمر الثانويه............. (Re: Elnasri Amin)
|
سلام يا شباب المؤتمر الراقيين وطبعا مستغربين الجابني شنو هل كنت دفعة استثنائية ابدا والله بس جيت اسلم علي قريبي عزيز وياعزيز ربما لم نتقابل ولكن اناتواتية واعرف أن الخطاطيب أهلي وجدي لامي من أهل توتي ببيت المال المرحوم الأستاذ ابراهيم علي ابراهيم يعني النصري بقي دفعة ونسيب كمان أتمني أن تتاح لنا الفرصة للقياء والتواصل انشاء الله
| |
|
|
|
|
|
|
Re: تواصل خريجي مدرسة المؤتمر الثانويه............. (Re: suhair elsheikh)
|
أختى وقريبتى سهير لك التحية والود فى كل يوم يزداد شرفى وسعادتى فى هذا الوجود لأننى أضيف يوميا لخزينة معارفى وعائلتى وصداقتى وزمالتى أناس رائعون وأعلام خفاقة.. تحياتى لك وللأميرين والملكة المتوجة ووالدهم الكريم والأمنيات الطيبة .. وأشكر مرورك الطيب على هذا البوست الذى نثر فيه عطرا وجمالا وأرجو التواصل لصلة الرحم التى حبانا بها الله تقبلى تحياتى وأسرتى سحر والشباب رزين ويزن أخوك عبدالعزيز خطاب
| |
|
|
|
|
|
|
Re: تواصل خرجي مدرسة الموتمر (Re: ALMURADABI)
|
قريبى الموردابى لك التحايا والود
مشاغل الدنيا وسباق الزمن هما ما أبعدانى لوقت عن النت وكلما وجدت سانحة يسابقنى الشوق للتواصل عبر هذا البوست السكن ..
لك ولكل الاحباب والود والتقدير
يا موردابى خلاص مسألة البنطون قالوا زمنو ولا والمسألة بقى فيها كبرى وطائر كمان يعنى بقى عندنا معلم من معالم نيويورك .. عقبال أبراج تجارة عالمية فى توتى
| |
|
|
|
|
|
|
Re: تواصل خرجي مدرسة الموتمر (Re: ALMURADABI)
|
انا درست في المؤتمر 91-94 اذكر اولى بابكر بدري (ابو الفصل محمد عباس الحلفاوي فيزياء) ويليام انجليزي ابو القاسم رياضيات ثانية مهدي حامد كنان رياضيات سيف الشهير ب زيكو ومشجع المريخ المتعصب (دين) حسن لوز استاذ عبدالرحمن ثالثة شوقي ابو الفصل نوريجا (محمد الحسن بتاع الانجليزي)
اذكر من الرفاق صالح ميرغني غسان الفاتح شريف محمد شريف علي ناصر البكرى اشرف الجقر محمد حلاوة مهند (الوجيه وده كل المدرسة عارفاه ) مهند (ده كان صاحبي وبعرفو انا)
ولي عودة
| |
|
|
|
|
|
|
Re: تواصل خريجي مدرسة المؤتمر الثانويه............. (Re: Elnasri Amin)
|
سلام ابوالزفت ومرحب بيك فى بوست الموتمر.. حليل ايام المؤتمر وحليل تلك الايام الطيبه... لمده ثلاته اعوام كنا نستخدم"ياعم قدام" ولم نتاخر يوما.. كنانتجمع جوار منزل اسماعيل الازهرى ولاتمر دقائق الا ونجد احد الطيبين ياخدنافى طريقه الى المدرسه....
سلام يا اسماعيل ياخى انت ذاكرتك حديديه عديل كده.. انت بتتزكر حاجات عمرها 30 سنه... كبرنا يا اسماعيل...
من القائمه بتاعتك اظن اننى اتزكر عباس حبيب الله(لم اعلم انه توفى) عليه رحمه الله ..اظن انه كان يمثل فى برنامج جنه الاطفال.. طبعا ازكر سكسك جيدا لا اذكر أشرف بكار مصطفى يحي عباس بشير عمر بشير السنهوري
اظن اننى اتزكر عثمان حسن (وكان نحيف) وجنى وشاطر وشيطان
من جانبى اذكر احمد المرضى المشاغب من ودالبنا كباشى وليدعمر الملازمين زهيرعوض الفنان عبدالحميدنجدى ودالبنا اسامه وياسر سلمان جعفر عبدالماجد الدنقلاوى سوق الشجره مامون قيلى دكاكين الطاهر خالدعباس النعيم حطب بيت المال عبدالله حسن(جارنا الحيطه بالحيطه) وليدابوشمه سوق الشجره عماد وديدى البحر اهو انا كويس اهو
اما قائمتك بتاعت المؤتمر فانا اذكرهم جميعا النصرى احمد على النصرى (اسمه ده عامل لى قلق) مجاهدصديق ودحلتنا الرجل المهذب (وعدنى بكشف اسنانى قبل عشرين عام ..لم اقابله اثناء زيارتى الاخيره شمس الدين اخوه محمد معانا هنا ..اسماعيل حامد كان يناديه "يا شمش" عمر محمد نور اخونا ياسر كان يقول ليهو شعرك زى الجبص علي زين العابدين بتزكره طشاش طشاش جهاد الغزالي معانا فى البورد حسن عثمان عبد الجليل ياسلام على حسن عثمان قمه التهذيب والسلوك
| |
|
|
|
|
|
|
Re: تواصل خريجي مدرسة المؤتمر الثانويه............. (Re: إسماعيل حميم)
|
ياسلألألألألألألألألألألألألألألألألألألألأم يا اسماعين. والله العظيم زكرتنى باصدقاء سقطو تماما من زاكرتنى بسبب الزاكره الخربه.. ابدا بعباس عابو.. اتزكره تماما ..كانه يقف امامى الان ... كان يظهر فى برنامج جنة الاطفال فقره الحجاى.. فعلا كان شخصيه مرحه و مشاغب درجه اولى ..كان له طرق عجيبه فى "الترديف" ....طبعا نسيت الحاجه دى!! الترديف هو وضع شئ تحت الرداء لمنع الام الجلد.. ومواد التجديد غالبا كتاب واحيانا قطع قماش.. الظريف انه عند الجلد يصدر صوت مختلف ويطالب بعض الاساتده العكاليت الطالب المجلود باخراج الردفه من تحت الردا.... انا شخصيا لم اردف كثيرا ..مره ردفت بكتاب الانجليزى بتاع Man and the Pan وهو صغير الحجم ..والنتيجه الكتاب "اتعشكب" بعد ال 15 جلده.... تحياتى لعباس باعو اينما كان..
عبدالمنعم بشير هو فرده من 1980 حتى الان ..وقد خرجنا من السودان بالتنسيق مع بعض ..يعمل الان مهندس اد الدنيا عند الخطوط القطريه وقد قمت بزيارته اثناء زيارتى لقطر فى فبراير الماضى...
طارق عبدالعظيم .."اظن" اننى اتزكره بصوته المبحوح.. كمال جابر طشاش طشاش ..ازكر الاسم ولكننى اتزكر الشخصيه
صديق دقة ..كان يسكن سوق الشجره..لونه فاتح.. نحيف لكنه مفتل ويعتبر اقوى اولاد الدفعه.. اظنه كان الالفه لفترات طويله
ابراهيم الزيات ود حلتنا ..بيتو قصاد مدرسه بيت المال الابتدائيه للبنات عندى قصه مع ابراهيم ده غريبه جدا.. اثناء جلوسنا لامتحان الشهاده الابتدائيه 1975 ..كان الامتحان ساهل جدا بالنسبه لى ..قمت بتهور بمحاوله مساعده ابراهيم فى الامتحان ..اكتشف المراقب الفلم ولكنه بذوق طلب منا عدم تكرار ذلك فى المستقبل...كانت لحظات قاتله..اووووف
ياسر معاذ كيف ياخ....ياسر معاذ حسن السراج والده كان صاحب مدارس النصر او التقدم كان يسكن الملازمين قصاد ميدان البحيره.. كان "منتهى" فى كره القدم مابيعرف يشوف الكوره... ربنا يطراه بالخير
محمد الطاهر قرافي ..محمد الوجيه ود الملازمين ..درس معانا فى المؤتمر وقد استغربت وقتها عدم دخوله جامعه الخرطوم فهو كان الطبه المميزين.. اظن انه درس فى انجلترا
صديق الغول متزكره طشاش طشاش مع انو ولد حلتنا فى بيت المال تحت
خالد حسين الغول (كرف) الانجليزى لاعب الكوره المعروف ...كان قد احترف اللعب لفتره.. لكنه اصيب بكسر مما اجبره على الاعتزال عندها.. ازكره جيدا ..
محجوب سلطان طشاش طشاش بس الاسم ما غريب على
عبدالقادر عجباني والله عبدالقادر ده لا بتزكره ولا بتزكر اسمه( معزره ليهو اذا كان بيقرا البوست ه) ..طش تماما من زاكرتنى...
ايضا من بيت المال العامه::: خالد عباس النعيم حطب (درس فى الهند) سمعت انه كان من قيادات اتحاد الطلاب هناك
وليد ابوشمه بيت المال سوق الشجره ودكاكين الطاهر كان صاحبى شديد لغايه ما اتطالعنا فى سنه تالته وكانت معركه بين عملاقين ..اتقطعت فيها القمصان
سيداحمد الازهرى واخوه بكرى سيداحمد كان ختمى درجه اولى ولا يفوت اى حوليه
فترت ..بجيك راجع
| |
|
|
|
|
|
|
Re: تواصل خريجي مدرسة المؤتمر الثانويه............. (Re: Elnasri Amin)
|
انا درست في المؤتمر 91-94 اذكر اولى بابكر بدري (ابو الفصل محمد عباس الحلفاوي فيزياء) ويليام انجليزي ابو القاسم رياضيات ثانية مهدي حامد كنان رياضيات سيف الشهير ب زيكو ومشجع المريخ المتعصب (دين) حسن لوز استاذ عبدالرحمن ثالثة شوقي ابو الفصل نوريجا (محمد الحسن بتاع الانجليزي)
اذكر من الرفاق صالح ميرغني غسان الفاتح شريف محمد شريف علي ناصر البكرى اشرف الجقر محمد حلاوة مهند (الوجيه وده كل المدرسة عارفاه ) مهند (ده كان صاحبي وبعرفو انا)
ولي عودة
| |
|
|
|
|
|
|
Re: تواصل خريجي مدرسة المؤتمر الثانويه............. (Re: Khalid Merghani)
|
النصرى أخوى........انت شن جابك للبرنســات ديل......لمن نحن كنــا فى أم درمان الاميرية سنة 76 انت كنت بتقرأ فى المؤتمر..و البوست دهــا تؤثيق فخلى الكضب.
فى عهدنــا 1978-1981 كان من يدخل مدرســة المؤتمر لابد أن يدرس الجامعة الا من منعته ظروف قاهرة عن ذلك....المؤتمر كانت قبلة السياسة و الاقتصاد و الثقافة و الرياضة وكانت تزهو بالعلماء فى كل المجالات...وهم طلبة يقيمون الاسابيع الثقافية و الاجتماعية و الجمعيات الموسيقية و الثقافية والمسرحيات وكانوأ اسرة واحدة...
لدى من الصور عن المؤتمر و طلبتهــا وخاصة دفعة 77-78 مالم يتصوره عقل وخاصة أن أخى سامى هو من خريجى المؤتمر فى عام 78 و كان رئيس جمعية التصوير بالمدرسة واذكر من الشباب الذين عاشوا معنا و احببناهم الاخ الشاعر المعروف: يوسف عبدالقادر الحبوب و الفنان التشيكلى أحمد الجيلى...
من رغب فى هذه الصور..اتمنى أن يتصل بى على الايميل:
[email protected]
وسوف انسق مع اخى ســامى وهو موجود فى السودان.....
بالرغم من اننى لم ادرس فى المؤتمر لكننى لم أغب عنها يومــاً وانا طالب بالموردة الابتدائية و الاميرية أمدرمان(1976-197....قولوا ماشــاء الله هاهاهاهاها
من اشهر ايام المؤتمر عندما زارهــا سئ الذكر الرئيس نميرى فى نهاية عام 1977 فى احتفالاتها باليبويل الذهبى......صديق
| |
|
|
|
|
|
|
|