تعالوا أسمعوا هذا الصوت العذب ... ومَن حنان هذه ؟ فيديو نادر جدير بالمشاهدة ...

Quote: معتز الحبيب دي بحتّها من وين دي الليلة 4 درامين (أمدرمانات) مرقن يتراقصن مع هذه الألحان أمدرمان التي عاشها الخليل الفرح وامدرمان التي عشقها وهاتان تتقاسمان اللحن والكلمات - المضمون اللفظي والسمعي واللغوي لهذه اللوحة وأمدرمان السبعينات التي احتكرت منافذ الروح إلى كل العوالم وتلك تتبدى في البعد البصري لهذه اللوحة .. الملابس والوجوه والتفف ... الطفولة الطازجة .. حالة كونك تبدأ تجربة الحياة لمرة واحدة فقط .. هكذا حفرت سبيعنات أمدرمان وأمدرمان السبعينات كل الأشياء والمعاني في دواخلناوهكذا انبجست من صخرة الارهاق والتعب والانذهال الان اثنتا عشر دمعة قد علم كل حنين مسكبه وكان هذا الأداء وهذا التسجيل التقاطا بزاوية ما ... لتلك النافذة الوحيدة للحياة وأما الرابعة فهي امدرمان الان وما أدراك ما أمدرمان الان غني يا خليل فرح يرحمنا ويرحمك الله وترنمي يا حنان يشملنا ويشملك بعنايته الخالق المتعال ولله در اختيارك يا قريش

Quote: والله حنان دي تكون إنت وهي دفعة وعزفت وراها .. بطل إستهبال قال من حنان هذه قال

Quote: سلام يا ضلامي .. الله يريحك .. دي ( حنان الصغيرة ) زي ما قال ثابت .. و هي غير حنان إبراهيم السجانة " جارتنا " و تمام زي ما قال ثابت إنها هي الغنت " بفكرك و وعيك يا ريس " . و هي تؤدي الغنية دي على طريقة البلابل .. فقد كن السباقات .. الله يطراهن بالخير . حنان لم تعد صغيرة .. و لم تعد تغني .. و خسرنا نحن . تاني الله يريحك .

Quote: حنان ابراهيم ابوحمامة مركز شباب السجانه اوحر السبعينيات والثمانينيات

Quote: شكرا أخ معتز القريش.... دى ذكريات جميله تثير فى النفس الشجون والتساؤلات...والتفاؤل... انت (عارف) يا أخ معتز نظره سريعه لى صورتك دى الواحد بى يفتكر انك من (الجماعه) وبى يخطب واحده من الخطب الحماسيه اياها...يادوب إكتشفت إنو فى وراك كمانات واكورديون!! البركه فى حنان التى ازالت طشاشى! فتحى البحيرى: لو ما أخاف الكضب فى (درمانه) ناقصه..!

Quote: الحقوق محفوظة لجالب الفيديو في المنبر شكرا معتز

Quote: نعم هي حنان احمد او حنان الصغيرة، جارتنا في امدرمان ودنوباوي، وكانت تغني في جنة الأطفال وقد كان السفاح نميري معجبا جدا بصوتها وتربطة علاقات الجيرة بأهلها وسبق ان منحها جائزة قيمة لا اذكرها الآن في احدى المناسبات .. الملاحظ انه لا توجد محجبة واحدة بين الآئي حضرن التسجيل، لا ادري ان كانت هناك ثمة علاقة ما بين جمال الزمن وطيبة اهله وعفويتهم والحجاب الذي انتشر الآن وانتشرت معه الكثير من الظواهر الإجتماعية السلبية التي عصفت بكل ما هو جميل من قيم الزمن الماضي .. الصاوي

Quote: اكتر من مره قلته ليك انت راجل فنان الموديك تهبش في السياسة والكلام الماجايب همه ده شنو ...؟ كتر من الحاجات دي عشان مانصدق انك ضلالالالالالالالالالالالالالالالالالالالالالامي . تحياتي هارون دياب

Quote: معتز سلامات .. بالإضافة لكلام الشباب,, حنان ابراهيم حالياً تغني مع عبير علي و حياة طلسم على ما أظن كثلاثي ..

Quote: أوعة تبيخا لي وتقول لي عندك ....

لكن جيب تسجيلك نسمعو..
عارف كنت بفكـر أنزلا في بوست منفصل في الأيام الجاية ... انت بتقرا الأفكار ولا شنو؟؟

Quote: لأنه شايف في ناس قالوا دي حنان الصغيرة وقالوا حنان الصغيرة غير حنان ابراهيم

أنا بعرف حنان ابراهيم البتغني مع عبير علي و حياة طلسم بس .. ما عندي فكرة عن حنان الصغيرة ..

Quote: اسمها حنان احمد وتلقب بحنان الصغيرة بدأت بجنة الاطفال وركن الاطفال بالاذاعة ومن اغنياتها المشهورة للاطفال ** انا طالبة شاطرة شطارة ** وغنت اجمل الكلمات والالحان للام ** امى يا اجمل نغمة بقولا ** تركت الغناء فى سن مبكرة اما حنان ابراهيم فهى حنان السجانة ( مركز شباب السجانة ) صوت جميل وامتداد لجيل الفلاتية ومنى الخير

Quote: ده الكلام المظبوط 100% بس السؤال التانى المهم صاحب الفديو الألى منزلو (محمى) من Embed فى الربك ده http://www.youtube.com/watch?v=bvZ6HDA6xtE جبت برنامجك المضروب داك الإشتغل يومين ووقف وسجلتو بإسمك ده شغل هكر على حقوق الآخرين ولا شنو يا مولانا

Quote: معتز الفنان الفيديو ده لقيتو وين؟؟؟ اوعي تكون شغال في الامن ( الغنائي)...!!!!!!! والله ذكرتنا ايام زمان ...زمن العيش بي كيس المخدة ... والفول بالجك....واللبن بي البستلة......هسة كلو بقي كيس جيلاني......! قلت لي ما بتعرف حنان؟؟؟؟؟ طيب بتعرف خليل فرح من وين؟؟؟؟؟؟؟ تشكرات افندم

Quote: شكرا يامعتز يافنان لقطة من الزمن الجميل ... هي حنان احمد وكانت تلغب بحنان الفزاري .لان بابا الفزاري هو مكتشفهاوتبناها بل اعطاها بعض الالحان .. وحنان ابراهيم زميلتنا بمركز شباب السجانه تسكن ابوحمامه وشقيقة توفيق ... تغنت مع الراحل الفنان حيدر حدربي اه يا حبيبي ما تحن علي واحن عليك ...(لمني الخير وعبدالحميد يوسف رحمهما الله) الاخ عبدالدائم سيداحمد كلامك صحيح 100% اوفيت .. عل العجوز رأفت (خلي) كان ساكن في الاتجاه التاني من ابوحمامه وكاتل حفلاتها.... لكم مني كل الحب والوداد

Quote: شفت كيف يا ظلامي لما تكون فنان ؟؟؟؟

Quote: أخي معتز زمان قلتإ إنو أمير الظلام شايل ليهو بطارية... ومره مره كشافه .... تسلم يا أمير

Quote: دي ( حنان الصغيرة ) زي ما قال ثابت .. و هي غير حنان إبراهيم السجانة " جارتنا "

Quote: وفي السنوات الفاتت بتخيل لي ظهرت في التلفزيون كم مرة حتى في عيد من الاعياد كان في حلقة عن غنا البنات غنت فيه هي وزهريمان وسميره دنيا وحتى كمان هي غنت اغنية بلال تزورني مره زماااااااااااااااان كان بجيبوها في جنة الاطفال لابسة لبس المدارس الزمان داك اخدر مع كولة ( لياقة ) بيضا كبيرة والله اعلم

Quote: بعدين أخدر مع كولة ده شنو ؟؟ لبني يا حسنين .. لبني . و ما تلخبطونا أكتر من كده .. أبو السياسة زاتو ياخ .

يهونده الكضبن كاضب

الكانو بلبسوا لبني بي كحلي ديل نحن الاولاد

كنا بنلبس قميص لبني وردا كحلي وشده او كبك كحلي بي ابيض

لكن البنات كانو بلبسن فستان اخدر كولاته كباااااااااااااااار وبيض وبسرحن ضفيرتين في اخرهن شريط ابيض وبتمسن بالكركار

ابو السياسة وامها كمان

Quote: تسلم يا القريش وأنت ترمي بواحدة من روائع الجميل المرهف خليل فرح التي سكب فيها كل دموعه درراً ... فكانت الناعي لفراق صديق غالي من بين الأحباب والأهل والأم أمدرمان تظهر في القصيدة الثقافة العالية والأطلاع الغير محدود المعرفة للخليل يا جميـل يـا نـور الشقايـق أملأ كأسـك واصبـر دقايـق مجلسك مفهـوم شوفـه رايـق عقـده ناقـص زول ولا تـام أنظر كم الأبداع * الضوء عندما يأتي من شق يكون مركز وقوي وتلحظه عيان اكثر من الضوء في الفضاء * كيف كان يستمهله للبقاء حتى لو دقائق معه تحلو الجلسة والسمر وبدونه ينفرط العقد وفي رواية آخرى عدّو ناقص زول ولا تام من علايل ابوالروف لي المزالق من فتيح لي الخور للمغالق قدله يا مولاي حافي حالق بي الطريق الشاقي الترام فكان نذر عليه ان بقى الصديق أن يمشي بتلك المناطق كما فعل المحرم لبيت الله الحرام حافي ومقصر شعره وهنا يظهر تدينه وورعه وكذلك في الابيات التالية يـا دهـر أهوالـك تسـارق منها كم كـم شابـت مفـارق ما علينا الفـات كلـه فـارق رقنـا ولـه نعـيـد الـمـلام المصائب تأتي مسارقة أي دون أخاطر سابق ومنها ماتشيب له الروؤس من فراق حبيب وصديق وغالي لكنه يرجع مقدر لقضاء الله وقدره وحكمته في سنة الحياة ( ما علينا الفات كلو فارق ... رقنا ولا نعيد الملام ) .. فكانت قمة الإيمان بقضاء الله وقدره ... وتتجلى ايمانته في الابيات التالية يا بـلادي كـم فيـك حـاذق غيـر الهـك مــا أم رازق نعم الرازق والحافظ هو الله ( والزارعنا غير الله اللجي يقلعنا ).. ( وأعلم يا بني أن الأمة لو اجتمعوا على ان ينفعوك بشئ لن ينفعوك ألا بما كتب الله لك ولو أجتمعوا على ان يضروك بشئ لن يضروك ألا بما كتب الله لك رفعت الأقلام وجفت الصحف ) .. ( الزارعه الله في الحجر بتقوم ) أين مني الفـي زهـوه باسـق في شبابه نقـي مـن مفاسـق بين ثيابـه البيـض المناسـق حولـك اشبـه رتـل الحمـام كان وصف الحبيب الصديق المفارق وقد قلل ودلل فهو طويل زاهي وكان في شبابه متحفظ ورع متدين ماهو فاسق .. حلي ابيض من دواخله وثوبه وهو يسير حولك كما رتل الحمام البيض زهز ونضارة وشفافية ضمير ابيض كما شخب الحليب يرهج في الكبابي صفائاً يعجز اللسان من تفنيط حلو كلام الخليل وهناك ابيات يرقص لها القلب طرباً ويعجر اللسان من تفنيطها فهي تداعب الأحساس وما داعب الأحساس قسى على العقل ترجمته لكنه ينشي ويطرب ونرقص له طربا جزاك الله كل خير القريش على هذه اللفتة البارعة لقصيدة تعتبر من شواهد الشعر الخليلي ولك التحية والتقدير

Quote: يهونده الكضبن كاضب الكانو بلبسوا لبني بي كحلي ديل نحن الاولاد كنا بنلبس قميص لبني وردا كحلي وشده او كبك كحلي بي ابيض لكن البنات كانو بلبسن فستان اخدر كولاته كباااااااااااااااار وبيض وبسرحن ضفيرتين في اخرهن شريط ابيض وبتمسن بالكركار ابو السياسة وامها كمان

يا وليد يا أخي انت زول شاب
ما تغالط العجايز ناس عماد عبد الله ديل
لكن غلاطكم لذيذ كله (كولا) و (شدة) و (كبك)
ذكرتونا الزمن الجميل ، زمن هذا التسجيل

تسلموا الاتنين ...

Quote: الضلامي معتز ............ سلام العمدة جاك من الاخر ...... دي حنان الصغيرة بت امدرمان (الهجرة ) ودي دفعة عديل يامان واخوك كان معجب ومكسر من وقتها ........ شكرا علي هذا الاهداء وبالله لو عندك حاجة ليها تاني نزلها

Quote: ياسلااااااام دي خنان رالكانت بتغني في ركن الاطفال ولكن التسجيل قديم جدا بس العاجبني انو صوتها ما اتغير تسلم ياصديقي

Quote: حنان الصغيرة معرفتي بها خلال التلفزيون فقط .... أما حنان أبراهيم فهي شخصية أخرى، ظهرت في الدورة المدرسية سنة 1976 .. وصراحةً كدة وقتها عزفت معاها. إختفت بعدها فترة لتظهر باسم حنان السجانة. لم أتمكن من مشاهدة الفيديو، ولكني أعرف أن حنان ابراهيم تغني أغنية ماهو عارف قدمو المفارق، كما غنت مع حيدر حدربي (آه يا حبيبي).

ابو الريش يا عجوز

انت بتعزف من الوقت داك ؟؟؟

تسلم يا عمو على المرور والمشاركة