|
|
 خطاب من الحكومة للمواطن .......الفاتح جبرا
|
خطاب من الحكومة للمواطن
عزيزى المواطن:
السلام عليك ورحمة الله تعالى وبركاته:
طبعا ح تندهش جدا من (الخطاب) بتاعى ده لأنك (يا وحش) بتفتكر إنى ما جايبة خبرك وما شغالة بيك شغلة مع إنى شغالة ليك شغل (نضيف) وعاوزاك تجيب شهادة (الأوزو) فى (المواطنة) هو أنا عندى غيرك منو عشان إشتغل بيهو؟ هو انا بدونك يعنى ح (أتحكم) فى منو؟؟ أنا قررت أكتب ليك الجواب ده لأنى (مغتاظة) وزعلانة منك شديد وشايفاك (بتنقنق) كتير ولا عاجبك العجب ولا الصيام فى رجب ومهما أتعب عشان رضاك ألقاك بادى من (الألف)!! غايتو تبدأ من (الألف) من (الكاف) من الياء
لازم تعرف إنى أنا الحكومة ويانى أنا (المسئولة) منك وأوعك تسألنى تقول ليا (الخلاك تبقى مسئولة منى منو؟) عشان (جنس السعالات) دى أنا ما بحبها وبتجيب ليك (الغلط) بس إنت أفهم إنى مسئولة منك .. إنت بس إستمتع بالرحلة ودع (القيادة) لنا!!
أوعك تقول (الرحلة طولت) يعنى شنو 18 سنة فى عمر (الشعوب)؟ ما عندك اهو (الشعوب) الجيرانك دى معظمها حكوماتا قاعدة بى عشرات السنين .. نحنا عندنا هدف معين نعملو وبعدين نقول ليك مع السلامة يا (مواطن) بس إنت ما تستعجل ساكت نحنا هدفنا ننقذك إنقاذ (نوهائى) يعنى الإنقاذ (اللى هو) !! هسع مرات شايفاك قاعد (تنقنق) تحت تحت وتقول (هسع الحكومة دى عملت ليا شنو؟) طيب وكت المسألة جابت ليها (نقة وكلامات) أحسن أوريك عملتا ليك شنو وكت إنت طلعت (أكال ونكار) أولاً بالتبادى أنا وقفت ليك (الحرب) الكانت مشتعلة ليها سنين والكانت بتقضى على الأخضر واليابس وبيموتو فيها خيرة الشباب .. معليش (مصاريف السلام) طلعت أكتر من (مصاريف الحرب) لكن أستحمل معانا ولازم كمان إنت تساهم ببعض (المعاناة) مش أى حاجه عندها تمن؟
والحاجه التانية أنا الحكومة القاعد (تنقنق) فيها دى طلعت ليك البترول من (طقاطيق الارض) وكمان صدرتو ليك وبقيت إسمك (مواطن بترولى) صحى زدت ليك أسعار الوقود لكن ده شىء طبيعى لأنو (الوقود) أسعارو بره زادت وكده ولمن تزيد أسعارو (
بره) لازم تزيد أسعارو (جوه) وما تسألنى تقول ليا طيب (بترولنا) ده أسعارو ما مفروض تزيد فى الحاله دى؟ لأنو السؤال ده بالذات ما عندى ليك ليهو إجابه..
وبعدين أنا وفرت ليك أى حاجة وبقى أى شىء موجود وما فيهو (صفوف) زى زمان قبل ما أجى .. عاوز تشترى (رغيف) أمشى أى (مخبز) رايح تلاقى مش نوع خبز واحد ح تلاقى (أنواع من الخبز)، عاوز (لحوم) ح تلاقيها أشكال وانواع لحوم (بيضاء) ولحوم (حمرا) وشىء سجك وشىء بيرقر وشىء مارتدلا وشىء شنو ما بعرفو داك والعجب لو عاوز تاكل (فواكه) الفواكه مالية السوق والطرقات وبقو (يكوركو) بيها وسط الاحياء زى (النبق واللالوب) زمان .. شىء تفاح وشىء عنب أحمر وشىء عنب أبيض واى فاكهة عاوزها (الحكومة) وفرتها ليك بس إلا تكون (مصدوم) ساكت وما (عندك نفس تاكل)؟ أها فى الحالة دى نسوى ليك شنو؟
بعدين تعال هنا ... شنو بى مناسبة وبدون مناسبة تقول عنى إنى حكومة (جبايات) و(رسوم) و(دمغات) ؟؟ هو أنا القروش دى قاعدة أعمل بيها شنو؟ ما قاعده أشيد ليك بيها (المدارس) و(الشوارع) والمستشفيات وإشترى بيها لى أولادك (الكتب والكراسات) هسع فى ولد فى مدرسة قالو ليهو جيب (كتب) أو جيب (كراسات) .. قروش معليش!!
معليش فى (المستشفيات) عيب نشيل منك قروش آآى ممكن يقولو ليك جيب (قطن) جيب (حقن) جيب (شاش) أصرف الروشتة دى .. ده كلو ممكن لكن يقولو ليك وإنت زول مواطن عيان والمواطن فى ذمة الحكومة (اللى هيا أنا) يقولو ليك (جيب قروش)؟ ده عييييييب وعيب كبير!! وما تنسى إنو (شويتين الجبايات والرسوم والدمغات) دى قاعدين نصلح ليك بيها صحة البيئة الكانت متدنية زمانك دى !! هسع شوف (المطرتين) الآخيرتين ديل لو فتشت العاصمة دى شارع شارع ما ح تلاقى ليك فيها (حفرة واحدة) فيها موية راكدة وما ح تلاقى ليك (ناموساية) واحدة ولا (ضبانة)!!
أنا ما عاوزة أتكلم ليك عن بقية الحاجات التانية الأنا (أنجزتها) أو الأنا (عايزة) أنجزها لأنها كتيرة وح تاخد زمن وأنا هسع مشغولة عندى إجتماع لمناقشة تقرير (لجنة درء الكوارث والفيضانات) عشان كدة بقول ليك مع السلامة ووصيتى الدائمة ليك إنك (تربط الحزام) وتشدو فى وسطك (تمااام) .. وتستمتع بالرحلة وتدع القيادة لنا .. وتقبل سلامى وتحياتى..
مخلصتك
الحكومة
ملحوظة :
معليش الكلام حار عشان أنا (زعلانة) منك شديد !! والمثل بيقول (الما دارك ما لامك) وكده!!
|
|
 
|
|
|
|
Nader Abu Kadouk
فيس بوك
تويتر
انستقرام
يوتيوب
بنتيريست