مشينا في دربا سوا اخدر ورانا ونصه ليل واسع مسفلت بالظنون مترقباو كل العيون مشتوله في جانبو الهواجس مرصوف مظنه "لافتة طريق" في اوله مكتوب عليها كن .. او لا تكون لامعة ومضيئة مستلفها نورها من المعاناه والشجون حفر المكائد في كل حته المطبات الشرك كم من غرام في نصه اعياه التعب فقام برك وكماً حبيب اول ملف فزه انسرق وانا يا هواي شاقي الدرب زي خاطراً برق راكب براق امالي والشوق لي مطيه لا راجي من الريد جزا ولا عطيه يكفيني بس نظرة رضا من الصبيه
07-30-2007, 02:14 PM
almulaomar
almulaomar
تاريخ التسجيل: 07-08-2002
مجموع المشاركات: 6485
وليد طريقك مسدود مسدود قف قبل متابعة السير قف للتفتيش منطقة عسكرية ممنوع الإقتراب والتصوير
الريدة ما بالغصب. حفر الظنون والمطبات إقتضتها ضرورات المنطق التبريري الذي يعوج العديل ويعدل الأعوج ، فلمن تلقي ليك لافته مكتوب عليها "نعمل لأسعادكم ونأسف لإزعاجكم" مع تحيات أو بدون تحيات حا تتخم في الموضوع وتصدق وباين عليك صدقتهم ، وبي كده حا تأكلها في حنانك وما بتشتكي حتى لو غيرت ركب ومساعدات من كترة الحفر وتواصل الليل بالنهار مشي كداري في طريق الشوق وتفوت الناس المشو قبالك وقالو مشينا مشينا مشينا ولمن تتعب تتوهط تحت ضل شجرة وتشخبط في الأرض بي غصن ناشف وأثناء تفكيرك وأنت سارح من أمبارح يجيك خاطر يقول ليك "الحب ليس راوية شرقية بختامها يتزوج الأبطال" وتتذكر كل الأفلام الهندية الدخلتها في حياتك وتعيد الكره مليون مره.
07-31-2007, 09:41 AM
وليد محمد المبارك
وليد محمد المبارك
تاريخ التسجيل: 12-04-2004
مجموع المشاركات: 26313
طريقي زراعي ومفتوح للاخر وانا قطعت الدقداق والمطبات والان اسير على المسفلت والممهد منه ،الذي على جنباته استراحات ومطاعم وكافتريات تسهل الحياة الشاقة بالنسبة للتفتيش فانا احمل بطاقة مكتوب عليها " الرجاء تسهيل مهام حاملها " وعن المنطقة العسكرية الممنوع تصويرها فانا من قرر هذا المنع
يا صديقي ، انعم بريدتي نعمة ما بعدها نعمة .. ناتجها سيحفظ جيناتي ويحمل اسمي الى المستقبل .. يا صديقي اظنك من رواد الفنان المرهف المغفور له ان شاء الله " هاشم ميرغني " ، تحفظ الاسبوع بتمامه ، وتبكي حين الزفاف ..
فعشان كده بقول ليك يا فرده
ربنا يعوضك .... الله في
07-31-2007, 02:08 PM
almulaomar
almulaomar
تاريخ التسجيل: 07-08-2002
مجموع المشاركات: 6485
قالوا يا وليد فلان داك ما بدور يسمع كلمة فردة مش عشان هي من لغة الرندوك الشعبية التي أفرزتها عمليات التهميش والهجرة القسرية لأى حته حول العاصمة القومية لكين لأنو بحب التيم ويرك واللعب الجماعي وما بتعجبو مهارات بيليه أو ريفالدو لو ما وظفت في فريق ، وبشوف برضو إن أس البلاء في بلادنا هو اللعب الفردي أو الإستعراضي في شأننا كله. فكلو عاوز يسرق كلو حتى أصبح الغنا غنا والما غنا يجي بي هنا (نسخة بعد التعديل). الدرب ربما ينشحط أخي وليد بالقدر الذي تقول فيهو اللمبه بق وتبقي فوانيس البندر سهرانه حتى ساعات الصباح الأولي ، الطريق الزراعي أكثر أمناً من اسفلت البنادر ففي تلك الطرق برغم وعورتها للمتحنكشين صدق وأمن وأمان ، أما المسفلت أو شارع الزفت فغالباً ما تكون بين مطرقة العسس وشرههم اللامتناهي لأكل أموال الناس بالباطل وسندان التهور في القيادة. أنصحك وأنا البكوس هداي أن لا تساسق كثيراً بالدريب زراعي كان أم مسفلت فهناك ناس ما عندها غير الشمار والشمشره وبرضو ما تبقي تقييييل لمن تشرب موية الغسيل فالتقل صنعه ولابد أن تتقن فنها ،الريدة الكتيرة بتبقي شقاوة وبتأكد إنه كل شئ زاد عن حده إنقلب لي ضده بس هنا الريدة ما ليها حد عشان كده أعجبني قول على ود الناير بعد نقله إلى لغة الفرنجه: Love never has to have a happy end, because love never has to end at all أها ده قول ود الناير إنت قولك شنو
08-03-2007, 03:05 PM
وليد محمد المبارك
وليد محمد المبارك
تاريخ التسجيل: 12-04-2004
مجموع المشاركات: 26313
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة