|
|
 والله بالغت عديل يا .... خالد عزالدين
|
كتب خالد عز الدين فى جريدة الكابتن بالتزامن مع جردية حكايات
زي التجديد بس اسيك احسن شوية !
في حاجات متشابهة بين فريق اسيك ابيدجان وتجديد كير نوري الطيب عبد الرحمن .. ااي اسيك احسن شوية لكن برضو في شبه كتير !! التجديد من تسعة اصوات في كتلة الممتاز والحكام عندو
صوت واحد واسيك من تسعة نقاط من مباريات الترجي والهلال والاهلي عندو نقطة واحدة .. لكن اسيك احسن شوية ما نقطتو دي جابها خارج ارضو خدمة يمين وعرق جبين والتجديد نقطتو جابها مقعد فاضي وقوانين ! اسيك انهزم في ارضو بصورة غير متوقعة من الاهلي واضعف املو في التاهل .. والتجديد انهزم في ارضو ومن الاهلي برضو ولا شنو يا الفاتح خضر ؟ والارض من الواضح انها ما بتلعب مع اسيك زي التجديد كده مش انهزم في شندي وفي كتلة الممتاز وفي اندية مدني وفي اتحاد مدني وفي بورتسودان وفي نيالا وفي المريخ ! لكن اسيك احسن شوية عشان انهزم بي هدف وحيد في ارضو والتجديد انهزم بهدفين لهدف في بورتسودان وهدفين لهدف في مدني وخمسة اهداف لاربعة في كتلة الاوسط وخمسة واحد في الممتاز .. يعني هنا ممكن تقول دوري الخمسات يا حسن محجوب !
مدرب اسيك هدد بهزيمة الهلال في ارضو وانهزم في الدقائق الاخيرة ومدرب التجديد هدد بهزيمة شداد في اسبوع ولي هسة الدقيقة الاخيرة ما جات !
ضربة يوسف محمد كانت قاضية بالنسبة لي اسيك وضربة 24 القرشي كانت قاضية بالنسبة للتجديد ! لكن اسيك احسن عشان يوسف محمد ما جا من ساحل العاج لكن بتاع القرشي ده جا من كافوري وطوالي ضرب البوري ! مش كده يا نوري !! ؟
ناس اسيك املهم بقي في ايد غيرهم وناس التجديد املهم بقي في ايد غيرهم !! شبه شديد .. يعني اسيك يرجي الاهلي في امدرمان والتجديد يرجا الطريفي في الخرطوم !! برضو شبه مش كلو في العاصمة المثلثة !؟
اسيك الفريق الوحيد الما عربي في مجموعة الثمانية يعني شكلو مشاتر كده .. ووجود ممثل وحيد للتجديد في كتلة الممتاز بين خمسة اتحادات لي شداد برضو مشاتر كده .. يعني ناس الاي ار تي ديل لو عايزين ينقلو الانتخابات من الدوري الممتاز بقولو تابعو مباريات الخمسة الكبار .. اسيك ده ما بجيبو سيرتو ذاتو !! بس اسيك احسن شوية علي الاقل بلعب هوم اند اوي وناس التجديد ديل طوالي لاعبين اوي .. اوي اوي اوي يا بيه !!
اسيك مقتنع انو المركز الاول ده ما عندو فيهو طريقة لكنو ساكي المركز التاني سك شديد .. والتجديد مقتنع انو منصب الرئيس ده ما عندو فيهو طريقة لكنو ساكي الطعن سك شديد !
نتائج اسيك ضعيفة مع فرق الشمال الافريقي ونتائج التجديد ضعيفة خالص مع الشمال ! بس اسيك احسن شوية عشان مميز في الغرب والتجديد لا غرب لا جنوب .. ودوب يا دوب لازم نرضي بالمكتوب علينا يا نوري !!
اسيك عندو رعاية مالية من اندية اوربية والتجديد عندو رعاية مالية من راسمالية محلية .. لكن اسيك احسن شوية عشان مرعي طول الموسم والتجديد رعايتو موسمية !!
الاتحاد الافريقي صنف اسيك في المركز الثاني والاتحاد السوداني صنف التجديد في المركز الثاني .. لكن اسيك احسن شوية عشان تصنيفو جا بعد انتصارات كثيرة والتجديد تصنيفو جا بعد هزائم كثيرة !
ناس اسيك اتعادلو مع الترجي وناس التجديد اتعادلو مع مدثر علي البشير .. لكن ناس اسيك احسن شوية عشان طلعو فرحانين بعد التعادل وناس التجديد طلعو زعلانين .. وانتو ما عارفين شارع الكاملين .. هي يا ...! الله يا ..! انتو زعلانين نحن فرحانين ..
مجلس اسيك شطب لاعب لضعف الاداء والمفوض شطب طعن التجديد لضعف الحجة .. لكن اسيك احسن عشان جابو لاعب احسن من المشطوب وناس التجديد شطبو ليهم طعن التدريب جابو طعن التحكيم شطبو طعن التحكيم طعنو في شداد ذاتو !
لاعب اسيك لما شطبو اولاد حلتو قعدوا يغنو ليهو .. الشطبو منو يا ناس الشطبو منو .. ولاعب التجديد غنو لي في المفوضية .. الدقو منو يا ناس الدقو منو .. دقو ود حداد يا كمال شداد .. الدقو منو ؟ دقو في الكاملين شفنا ناس ساقطين يا مجدي شمس الدين .. الدقو منو .. دقو في التصويت غير التجديد .. الدقو منو . . دقو في نيالا حالتو بطاله.. الدقو منو .. مافي زول دقا ياناس دقا روحو برا يا ناس ..
واحد ثقيل قال لي خلينا من وجه الشبه بين اسيك والتجديد ورينا وجه الشبه بين طه القرشي و24 القرشي .. انا بحول السؤال للقراء ؟!
وثقيل تاني قال لي ورينا الفريق بين بروفيه شداد وبروفيه نوري !
طبعا في واحد اثقل من الاتنين ديل قال لي ورينا الفرق بين سقوط الخرطوم وسقوط مدني !!!
مدثر علي البشير مرات كده ثقيل عندو نكته بحكيها طوالي بقول فيها انو في واحد ملاكم من اولاد مدني كان بطل مدني في الملاكمة وجا الدورة المدرسية في الخرطوم وناس مدني بشجعو زي تشجيع ناس شداد لي مدني اليومين دي .. الله فوق مدني يا اتحاد مدني .. وصاحبك الملاكم يعمل في حركات بي جاي وبي جاي لكن ملاكم من نيالا اداهو ليك بونيه علي طريقة الشاب بتاع نيالا الضرب الزول في المفوضية .. قام ملاكم مدني وقع في الواطه والعد بدا! واحد اتنين تلاتة اربعة خمسة .. المدرب قال للملاكم ارفع راس مدني يا كابتن ارفع راس مدني يا كابتن .. صاحبك راقد في الواطه قال للمدرب انا قادر ارفع راسي لمن ارفع راس مدني !!
بالمناسبة اول مرة صوت مدثر يكون اجمل من صوت طه ! هم بشابهو لكن مدثر احسن شوية !!
|
|
 
|
|
|
|
|
|
|
|
Re: والله بالغت عديل يا .... خالد عزالدين (Re: Fadl Karrar)
|
حبيبنا فضل شوف دي مقالة تانيه في نفس القصة..
جمهور الهلال بقي يجي المباريات الافريقية بس عشان فيها اثارة ..
الكورة لما تكون من طرف واحد بتكون بايخه .. يعني جمهور الهلال لو في كورة بين مجموعة شداد ومجموعة التجديد ممكن ما يجي يحضرها!
بالمناسبة مباراة الهلال والموردة بكره الجمهور بجي يحضرها عشان فيها نوع من التحدي والموردة في المركز الثالث ورابطة مشجعين الموردة ممكن تجي تهتف ضد صالح! عارفين صالح ما لاعب لكن اهو محاولة عشان الناس تسمع اصوات معارضة .. يعني ناس التجديد ديل عايزين يفوزوا ما عارفين روحهم ساقطين لكن اهو بحاولو يسمعو صوتهم بس كلو سنه عشان الناس ما تنساهم ..!
واحد ثقيل قال طه علي البشير قالو اده ناس التجديد عشرين مليون واده ناس شداد صوت مدثر! والغريبة الاتنين زعلو منو .. ناس التجديد قالو ما دايرين القروش دايرين الصوت عشان محتاجين ليهو وناس شداد قالو ما دايرين الصوت دايرين القروش عشان منصرفات الاحتفالات كتيرة! ما تعزمو لينا بلاتر ده في الاحتفال يا دكتور..
بالمناسبة ناس شداد كترت ما متأكدين من فوزهم في الانتخابات لمن اختاروا رودلف اندريه لقيادة بعثة الهلال لي ساحل العاج!
الديبة عمل معسكر في الفاشر لي كورة الهلال واحد من ناس الفاشر قال ليهو انت مع التجديد ولا شداد قال ليهو انا ضد عزالدين الصبابي!
انتو عزالدين ده استقال ولا لسه نائم!
اتحاد الخرطوم اختار عشرة عشان يصوتو في انتخابات الاتحاد العام في العشرة ديل في سبعة مع شداد وتلاته مع التجديد .. طبعا محمود صالح ما بنحسبو لانو دخل بالقرعة..
خلي بالك ناس التجديد ديل حظهم كعب في القرعة .. مدثر دخل قرعة ومحمود دخل قرعة و24 القرشي دخل قرعة! اقصد دخل ترعة..
قلت لي حليت الاتحاد ذاتو! والله عندك حق الناس ديل ضربوك ضربة شديدة!
يوم الجمعة في مباراة بالنهار بايخه ونتيجتها معروفة حيلعب فيها شداد ضد التجديد .. وبالليل في مباراة يتوقع ليها تكون صعبة ومثيرة وجميلة بين الهلال والموردةة..
مباراة النهار حتكون من جانب واحد لكن المشكلة في اشاعات تحت تحت كده قالو الجماعة عايزين ينسحبو .. كده ما حلوة يا بروفة!! والله لو انسحبتو تكونو بالغتو ..
طبعا شداد ده جنو ما جن زول ينسحب والله تنسحبو اول قرار حيوديكم لجنة الانضباط!!
اتخيلو عزالدين الصبابي قاعد في لجنة الانضباط .. حظ شنو ده يا ابو العز يعني من شخصية كبيرة في لجنة الاستنئافات لي مستدعَى في لجنة الانضباط .. بالمناسبة قالو قبل كده لما عايزين تحاسبو صلاح ادريس عملت ليك مرافعة مبالغة !! والله بالغت!!
عايز اسأل سؤال ثقيل .. في مباراة الموردة والهلال امين خزانة الموردة ده حيشجع عديل ضد الهلال قدام صلاح ادريس!
معقولة زول داعمك كده يا عزالدين تشجع ضد فريقو .. ما بتجي كمان..
اقول ليك حاجة حقو تنسحبو .. والله لو انسحبتو تكونو بالغتو!!
النور محمد النور وعادل الاحمر وعصام حسين وكمية كده من ناس الصدارة واقفين مع شداد، وطه واقف مع التجديد! في حاجة كده غريبة في الموضوع ده .. ننزل القصة دي في مسابقة .. الجائزة عشرة صناديق بزيانوس تبرع من اسماعيل بزيانوس واسماعيل ذاتو واقف مع شداد وتقول لي سيد المصنع واقف مع التجديد!!
التجديد يعلن عن مؤتمر صحفي اليوم .. التجديد يستبدل المؤتمر الصحفي ببيان صحفي .. في البيان الصحفي التجديد يعلن عن مؤتمر صحفي اليوم .. التجديد يعلن عن تأجيل المؤتمر الصحفي من اليوم الي غد .. غدا التجديد يؤجل المؤتمر الصحفي الي وقت لاحق .. الوقت اللاحق بعد الانتخابات .. التجديد ينتظر نتيجة الانتخابات .. اوعه تنسحبو ..! والله لو انسحبتو تكونو بالغتو!!
اقول ليكم حاجة خلو زيكو يجي يشيل ليكم الكورة!!
ولا خلو الادارة المركزية تقطع ليكم الكهرباء..
لا لا عندي فكرة خلو ناس النادي السوري يعملو حفلة بالنهار ويقفلو الشارع..!
شارع !! ناس الغرب والجنوب ديل المطرة ما وقفتهم .. سيول ما رجعتهم..
قلت لي اسامه عطا المنان عامل مشكلة مع طارق عطا وطارق عطا زعلان من معتصم جعفر ومعتصم جعفر ضد شداد وشداد عايز مجدي يسقط ومجدي واقف ضد الطريفي والطريفي مع التجديد .. وبعد ده كلو عايزين تنسحبو !! والله لو انسحبتو تكونو بالغتو..
سألت صديقي عبد الغفار وهو هلالابي علي السكين فقلت له انت مع منو .. قال انا جني ما جن الحمام الميت.. طوالي عرفتو مع منو!!
في وجه شبه بين مجموعة شداد والهلال .. الهلال اصلو ما بتغلب في ارضو ومجموعة شداد اصلو ما بتتغلب في ارضها .. العايز يغلب الهلال إلا يلعب معاه بره السودان والعايز يغلب شداد إلا يلعب معاه برا السودان .. حقو تلعبو معاه في الانتخابات الافريقية لأنو العربية ذاتها مع عبد المجيد عبد الرازق ده ما عندكم فيها سكه!
الهلال من الفين وواحد ما اتغلب في ارضو لكن اتعادل كم مرة وناس مجدي ديل من 2001 ما اتغلبو في ارضهم لكن اتعادلو كم مرة..
رأيكم شنو يا معتصم عشان الناس ديل ما ينسحبو نغشهم بتعادل سريع كده بعد داك نغلبهم غلب شديد .. والله لو انسحبتو تكونو بالغتو!
الطريفي الصديق قالو ليهو ابقي مع التجديد قال فترت والله يا جماعة .. تعبت والله .. صدقني ما بقدر اعيد اعذرني ما بقدر اعيد .. خليك معانا يا الطريفي .. يا اخوانا انا ما بشر .. قدروا موقفي عايز افرح شويه كمان!! يا اخوانا عشان الطريفي ده يفرح شويه .. انتو ما تنسحبو .. والله لو انسحبتو تكونو بالغتو..
رأيك شنو تجمدها !! جمدها والله التجميد مع الخريف ده بكون مبالغه!
هاك الهتاف ده .. التجديد مع التجميد!! ما لذيذ .. طيب قولو .. التجميد مع التجديد .. ثقيل مش كده ..
جمدوا .. اجلو ..اطعنو بس ما تنسحبو والله لو انسحبتو تكونو بالغتو ..
الوزير يعلن حل اتحاد 24 قرشي .. بسيطه بس انتو ما تنسحبو والله لو انسحبتو تكونو بالغتو ..
الواحد بقي ممكن يقول بي ثقة انو قودوين عندو قون في كل كورة .. وشداد عندو صوت في كل اتحاد ..
ناس مدني قالو لي الملاكم الوقع وما قدر يرفع راسو ولا راس مدني اسمو .. خدوري .. انا قلت ليهم اسمو خدوري ولا .. «...وري».
امبارح حكيت ليكم قصة عن مدني .. الليلة عايز احكي ليكم قصة عن الخرطوم .. ولا اقول ليكم خلوها بكره بعد المؤتمر الصحفي للتجديد .. هو المؤتمر الصحفي ده فيهو شنو يا خالد .. والله انا ما عارف بس خايف الناس ديل ينسحبو .. والله لو انسحبتو تكونو بالغتو!
في زمن بلولة وبعد مجهود جبار اتحاد الخرطوم انقسم وفي سته منو صوتو لصالح كمال شداد .. وفي زمن مدثر علي البشير وبدون مجهود جبار اتحاد الخرطوم حيصوت لي شداد !!
بلولة عامل فيها بطل عشان صوت لي شداد من اتحاد الخرطوم وهو ما عارف انو الموضوع ده كترت ما ساهل «دولي» عايز يصوت لي شداد !!
واحد قال لي الصوت بقي بي كم ؟ قلت والله ما عارف لكن صوت مدثر ده بكون بي عشرين مليون ! قال لي ليييه؟ قلت ليهو عشان مدير اذاعة بس.. ما تفهمونا غلط!!
دخل مباراة الهلال الاخيرة 297 مليون .. يعني كده لو عايزين نجيب بيهو اصوات غالية زي صوت مدثر ده بجيب لينا كم صوت..
عبد المجيد منصور اده صوتو لي شداد؟ شداد ضحك وقال لي عبد المجيد انت عايز تبقي لي ناس التجديد ديل ولا شنو .. الناس المعاهم كلهم صوتهم زي صوتك ده!! عبد المجيد زعل وقال لي شداد طيب انا فكري معاك .. شداد ضحك وقال ليهو كده في اختلاف؟!!
ولا خلاف فإن الهلال الكبير لا يهزم علي ارضه .. مباراة الموردة دي حتكون المائة ولا اكتر من كده شويه ..
واحد غالاااط قال ناس الهلال ما وصلو الرقم مائه .. قلنا الغلاط في شنو شوف نحن اتغلبنا من منو وورينا .. من مباراة الموردة في موسم 2001 ما اتغلبنا ومن مباراة الزمالك تاني ما اتغلبنا .. عشان نساعدك كمان عندنا 26 مباراة دولية ما اتغلبنا .. بالمناسبة انا ممكن انشر مباريات الهلال بالتفصيل لكن عايزين شوية اثارة كده الناس تتناقش برضو .. يعني لو نشرنا المباريات تاني الناس ديل يقولو شنو .. خليهم زي الانتخابات يقولو التجديد فائز التجديد معاه 41 اتحاد نحن سألناكم قلنا ليكم الاتحادات دي شنو؟ بس انتو ما تنسحبو لو انسحبتو تكونو بالغتو!!
| |
|
|
|
|
|
|
|
|
|
Re: والله بالغت عديل يا .... خالد عزالدين (Re: Rakoba)
|
راكوبة الخريف قال
كلو بي تمنو
الله يعلم يا راكوبة البدفع العربات منو ؟؟؟
إنت لو ما عارف أنا ممكن أديك خيارات
1/ الملحن علي أحمد
2/ صلاح إدريس
3/ الأرباب
يا زول غمض بس وأعمل يا إيدي شيليني ختيني
ما ح تجلي كلو كلو
وبعدين يا راكوبة إنت مع منو؟؟
جمال الوالي
ولا مزمل أبو القاسم
وخلي بالك مزمل دا ما بيعرف التكتح ولو مغالطني أسألو عن باولينو
| |
|
|
|
|
|
|
|
|
|
Re: والله بالغت عديل يا .... خالد عزالدين (Re: Fadl Karrar)
|
اخي فضل ... تعرف انه السبب الرئيسي في سقوط التجديد هم ولدكم بتاع بري الرشيد علي عمرو ياسر عبدالفتاح و كمال حامد و مزمل ابوالقاسم ,,,,,,,,, الاربعة ديل مما ناصروا التجديد عرفتهم ساقطين ,,, الرشيد و ياسر شقشقة ضد شداد عشان ولي نعمتهم ضد شداد ,,,,,,,,, مزمل ضد شداد مما بقي صحفي عشان شداد مابديه فرصة ينظر ذي ما بينظر في المريخ////////اما كمال حامد فلانه شداد جرده من كل مناصبه الكسبها باسم الاتحاد السوداني ,,,,,,,,, الغريبة لمن اعلنوا النائج و لا واحد من ديل ماكانوا موجودين و من بدري اتضايروا و لموا جدادهم اسف تجديدهم ,,,,,,, شداد الرجل الوحيد في السودان الموجود في المكان الصاح .
| |
|
|
|
|
|
|
| |
Fadl Karrar
Rakoba
abdulgafar mohd saeed
فيس بوك
تويتر
انستقرام
يوتيوب
بنتيريست