الاخوة الاعزاء من صحفيين ومشجعين هلالاب او مريخاب لكم التحية والتقدير جميعا .. ترددت عدة مرات فى كتابة هذا البوست.. ولكن ..... هنالك سؤال يشغل بالى كثيرا وكلى ثقه ان هناك كثيرون غيرى يتسآلون بتعجب !!!! هل هكذا يكون الولاء للفريق ؟ هل هكذاالروح الرياضية ؟؟ هل هكذا يكون التشجيع؟ والرفع من شأن النفس بتعرية التوأم اوالند ؟ لماذا يااهلنانحن دوما نجهل لغة الحوارالهادىء ونجهل التشجيع الراقى مع احترام مشاعر الغير ؟؟؟؟ (تعبنا من المناقرة بصراحة فى كل شىء ؟) اين النديه الاخويه؟اين الولاء للوطن ؟ يا هلالاب السودان.. واعنى الفئه التى تتنافر مع المريخاب والعكس ايضا هل المريخ هو فريق غريب وليس من قلب الوطن ؟ وهل الهلال كذلك يا مريخاب البلد الواحد؟ هل هكذا تنبشون فى حال بعض مع ذكر اسماء اعلام من الرياضيين الذين رفعوا راية السودان خفاقة فى عالم الرياضة المحلية والعالمية يجمعهم الانتماء الواحد للوطن رغم ميولهم الخاصة للفرق المحلية .. منهم من قد توفاه الله ومنهم من تقدم به العمر ووجب علينااحترامه وتقديره سواء كان لاعبااوحكمااواداريااوصحفيااومن روابط المشجعين .. اين الروح الرياضيه العالية ؟ لماذاتذكرون هفوات الآخر متاجهلين تماما حسناته ؟ بكل صراحة استغرب واشمئز للاسف الشديدمن بعض المهاترات الموجوده بكثرة فى اى بوست رياضى.. حين اسمع فريق الهلال انتصر..اشيل هم الكلام الجاف والجارح من مشجعى الهلال لندهم المريخ .. وبشماته تكسر الخاطر مرتين .؟ تمسخ عليك فوز فريقك البتحبو وتشجعو والعكس ايضا حين ينتصر المريخ... تمنيت يوما من حد مشجعى الفريقين ان يهنىء لآخر بروح رياضية تنم عن محبة اخويه صادقة...والامر من كل هذا وذاك ؟ حين يلعب احد الفريقين ممثلا للوطن .. تجدالند واقفا بالمرصاد مع احباطات وتحديات بالجملة قبل المبارة.. غير مراعى لمعنويات الغير من لعيبه ومدربين وغيرهم من اهلنا الغبش الذين يحبون بطيبة خاطر .. نحن الوحيدون فى العالم لا نفرح لفرح الغير رغم انها لعبة رياضيه مع احترامى لبعض الذين يعانون مثلى .. لكن بصراحة الغالبية اكثر اكرر اين الوطنية ؟ حتى لو لعب الفريق القومى .. تجد مشجعى الفريقين يتصيدون اخطاء اللعيبه من الفريق الند .. والشىء المؤسف الاخوة الصحفيين حالهم حال غيرهم .. لماذا لا توجد مصداقية فى الصحافة ؟؟؟ تلك المهنة الشريفه لماذا الصحفى الهلالابى لا يكتب بصدق عن المريخ؟؟ والعكس صحيح ؟ لماذا تتناقرون كالاعداء ..هل نحن فى معركة وحالة حرب دوما ؟؟ توبوا علينا قليلا من كثرة النقة الما منها فايدة وارحمونا يرحمكم من فى السماء .. لكم العتبى جميعا ... واكرر كل احترامى وتقديرى للجميع عاش فريقا المريخ والهلال شامخان كشموخ بلدى الغالى مع امنياتنا بالنصر والرفعه دوما للرياضة فى شتى انواعها فى سودان الجميع التحية والتقدير لكل رياضى بلادنا الحبيبه وعاش الوطن مرفوع الراس فى كل المحافل والتحية للجميع اسماء / الجنيد مسقط
07-05-2007, 08:14 PM
Abulbasha Abulbasha
تاريخ التسجيل: 02-27-2002
مجموع المشاركات: 805
طبعا يا سوما يا أختي .. إن حلاوة التشجيع الرياضي تتمركز في مشاحنات هلال مريخ برغم أن علاقة اللعيبة مع بعضهم البعض عسل علي لبن لذلك أقترح عليك تكوني موردابية .. وتسدي دي بي طينة ودي بعجينة تحياتي
استاذ صلاح الباشا مرحب بيك بعد غياب طال مرورك حقيقى اسعدنى لكن كنت بتمنى بحكم انك كاتب وصحفى ردك يكون واضح وصريح مع دبلوماسيتك المعهوده لكن ما يكون هروب من الواقع الواقع انه اللعيبه فعلا سمن وعسل على قولك لكن التشجيع الفى الساحه الآن وتحديدا فى حوش بكرى ده شىء لا علاقه له بالروح الرياضيه ولا الندية ولا له طعم ولا نكهة التشجيع الرياضى الذى يزيد من قوة الفريقين ديل فاتوا مصارعة التيران عديـــــل كده والله الله يهدى الجميع بس.. شكرا ود الباشا شكرا مقنطرة محنة فى دائرة سنتر الوطن
07-05-2007, 08:46 PM
نصار نصار
تاريخ التسجيل: 09-17-2002
مجموع المشاركات: 11660
طبعاَ انت ارق من من تتحملي هذه الهياج الغير مبرر،، حكمة الله انه زاتو مافي مستوي كروي يفسر هذا التعلق الهستيري من المشجعين... بتموها موية ساكت.. و الله بستغرب من وين بجيبوا القدرة علي هذا الانفعال الهائج؟؟ فالحكاية ما بتستحق ابداَ.. لكن الظاهر هي الفرصة الوحيدة للتنفيس عن المردم من هموم و احباطات.. يعني ترحيل لمشاكل حياتية للرياضة الهي من المفترض انها تهذب النفوس.. واحد كان قدامنا في الجامعة من جماعة الحكومة اتخرج من هنا عينوهوا في سكرتير تالت من هنا و جابوهوا لنا في الهند كيتاَ لينا.. و طبعاَ بقي سكرتير تالت بمهام وزير و عندنا اثباتات لذلك، المهم، عمل لينا ندوة صرح فيها بانه عين سياسياَ و عن الاوضاع في السودان قال انهم سيطروا علي كل شئ الا هلال مريخ!! فمن ناحية ما فدروا علي الفريق و من ناحية خلوهن متنفس للناس ايام التمكين الاولي،، فالشغلانة يا عزيزتي بايظة كلها لا يمكن اصلاح جزء في ظل خراب عام.. ودي
نصار سلامات يااصيل شكرا ملفحه من طيبة اهلنا ومعانيهم النبيلة تسلم على المرور الفرهد جواى بساتين ونوار صدقت والله يا نصار يا خوى حرقان اعصاب وضياع زمن فى نقة لا مبرر لها ومشاحنات لا تودى ولا تجيب ولا ترقى بمستوى الرياضة على الاطلاق نتمنى الرفعه والنصر والفوز دوما لرياضتنا فى كل مكان والتحية للهلال والمريخ ولكل مشجع راقى ووطنى ويا اهلنا شجعوا بروح رياضية وازرعوا الوطنية جرف اخضر قبل كل شىء شكرا نصار شكرا تصفيق من كل المدرجات لطلتك المشرقه
07-05-2007, 10:03 PM
شهاب الفاتح عثمان شهاب الفاتح عثمان
تاريخ التسجيل: 08-28-2006
مجموع المشاركات: 11937
Quote: نتمنى الرفعه والنصر والفوز دوما لرياضتنا فى كل مكان والتحية للهلال والمريخ ولكل مشجع راقى ووطنى ويا اهلنا شجعوا بروح رياضية وازرعوا الوطنية جرف اخضر قبل كل شىء
هذا ما نتمناه وندعوا اليه وكمهتم بالشان الرياضى اود الاشادة بهذا الطرح العقلانى الذى اوردتيه هنا لقد جبل الوسط الرياضى على ( المناكفات ) بمثابة ( بهارات ) للاثارة المطلوبة وهى لا تخرج من اطار الاخوة واحترام الاخر ولكن ليس النيل من الاخر وسحقه بل سحله وتقزيمه ليت كل منا يحب فريقه دون ان يكره الفريق الاخر
سلااااااااااام بى قلدة محنة وشوق اهلنا الاخ الانيق شهاب الفاتح صباحك لمة اهل فى ضل ضحى وونسة حنينه شكرا بحجم فرح الانتصار لمرورك المشرف معك يا شهاب نعم للاعتدال و لا للخصومه . لكن نبرا يا يابا من رفع الضغط عليك الله هو داير ليه رفع .. ما برااااااااهو محكر فى القمه هههههه تسلم يا ود الفاتح وربنا يفتحها عليك وين ما تقبل شكرا قوووووووووون فى الزمن الضايع
*** ياااااااا ملامح الحنين الشوق قمر دورين والود هلال العيد والله وينك يا الحنين نحن ما قررررررررررب يشيلنا السل ( جونو عمان ) هههههه يا حليلك والله ..بركة الجيت وعرفنا اخبارك تحياتى لكل الاهل وتحية خاصة لى ناس البيت .. ورجاااااااء ما تطول الغيبة قلت لى كنت داير تنزل بوست بخصوص ( ادب الاستظراف الرياضى ) يا سلام عليك .. انت زاتك ما رمز وعلم يشار ليه بالبنان كالوالد عليه رحمة الله الاديب الصحفى عمنا حسن نجيلة ربنا يرحمو قدر ما قدم لبلده ويسكنه فسيح الجنان يديك العافيه يا ملامح وبتمنى انه ترجع لينا تانى بى معلوماتك الثرة عن رموز الرياضة من الزمن الجميل وايضا فى انتظار بوست ادب الاستظراف الرياضى وبتوقع انه يكون من اجمل ما نزل فى النصف الثانى من 2007 ملامح شكرا لك بحجم الوطن شكرا كأس ذهبيبه موشحه بعلم الوطن
** الاخ تيتاوى الجميل حبابك وحباب طلتك الجابت خريفنا مبكر احيى فيك روحك الرياضيه واحى فيك تفهمك لهذا الطرح الذى اتمنى ان يثمر ولو قليلا بنتائج تبعد عنا شر العراك اللاعقلانى كما تفضلت وذكرت ان الوسط الرياضى فى الزمن السمح والناس الحاضنه الود جداول محنة ( المناكفة ) عندهم ليها طعم خاص جدا لا تتعدى روح الدعابة والولاء للفريق بدون حقد ولا ضغينه على الخصم ..بل العكس تلك البهارات كانت بمثابة نكهه خاصة جدا لكل منافسه او لعبة سواء كانت وديه او غير ذلك تعرف يا عامر يا خوى الصحفى البليغ والذى يمتهن مهنة الصحافة الرياضيه بشرف وامانه .. يفترض انه يكون حاله حال الحكم الذى يدير المبارة بامانه وصدق دون محاباة .. هكذا حال الصحفى ..لازم يوجه قلمه بكل امانه بغض النظر اى فريق يشجع حيث انك احيانا لا تدرى الى اى فريق ينتمى شكرا تيتاوى بطعم الفوز فى الدقيقه القبل الاخيرة
الاحبة الطيبين شكرا نيلين
07-06-2007, 11:28 AM
معتصم دفع الله معتصم دفع الله
تاريخ التسجيل: 12-18-2003
مجموع المشاركات: 12684
سوما تحياتي .. وألف حمد لله على السلامة والطلة الحلوة .. ليتهم يعون ذلك هذه الظاهرة بدأت في وقت قريب بزيادة عدد الصحف والمطبلاتية من الصحفيين المشجعين .. والعذر للمشجعين والرواد الذين ساهموا في دعم الرياضة بوقفتهم معها فهم ملحها وفاكهتها .. لو نظرنا للصحف الرياضية لوجدنا فيها العجب مهاترات وخلافات لأسباب واهيه لا تخدم الرياضة في شي وراها إداريين لا علاقة لهم بكرة القدم .. هناك أعداد كبيرة من الصحف لدرجة أن القراء أصبحوا يستأجرونها ويتداولونها في ما بينهم وتعود هذه الجريدة أدراجها مساء نفس اليوم .. نتمنى أن يتحلى الرياضيين بروحها السمحة ووقف المهاترات والكتابة عن ما يخدم الرياضة في بلدنا ويطورها .. نعم للتشجيع القوي والمناكفات الظريفة بين الفريقين .. لا للإساءات والعداءات التي تضر بالرياضة ..
شكراً مره أخرى سوما على طرحك لهذا الموضوع الهام والصراع الداير بين الفريقين ..
العزيزه سوما لك كل التقدير يا ستي هو حال عالم المستديره من احتراب و مشاحنات ووووو .... ولولا ذلك لما كان لها طعم .... اما ماهو سيئ فهو عدم التفافنا حول بعض و عدم تكاتفنا ضد الفرق الاجنبيه. مع انه بدأت تتلاشى هذه الظاهره في الاونه الاخيره بفضل بعض الصحفيين الوطنيين ..إلا من بعض الصحفيين والمشجعين..
اخى العزيز معتصم دفع الله حبابك ود الفريق والحلة الشوق محنة يعلم الله تسلم انت يا معتصم على الطله وعلى جميل الكلام الزين البوست نعم اخى معتصم ان لبعض الصحفيين وبعض الصحف دور كبير فى التدهور الحالى فى مستوى التشجيع المشبع بالحقد والضغينه ان صح التعبير وهذه الظاهرة مستمره فى تطور خاصة فى المنتديات وفى كل المناسبات الرياضية والنقاش الذى يدور ليس له علاقة باللعبه على الاطلاق .. وعلى مستوى اللعيبه بل الموضوع فات الحد وبدأ البعض فى التدخل بصورة مباشرة فى الحياة الخاصة للغير والادهى من كده انه معظم المعلومات خاطئة مية المية .. وده الشىء المؤسف جدا نعم للتشجيع القوي والمناكفات الظريفة بين الفريقين .. لا للإساءات والعداءات التي تضر بالرياضة .. واضم صوتى لصوتك اخى معتصم شكرا معتصم محكرة فى دائرة النصر دوما
*** اخى حاتم ابراهيم حبابك وحباب طلتك يا هلالابى يا ظريف عارف يا حاتم انا القدامك دى وصاحبة البوست ده هلالابيه حد النخاع .. لكن ما يمنع انه نتناقش ونشجع فريقنا والفريق القومى بنديه وروح رياضيه مشبعه وطنية بدون مهاترات وتجريح .. ولا انت ما معاى ؟ اكيد متفق معانا نحن فى البيت منقسمين فينا المريخ وفينا الهلال لكن صدقنى لما يكون المريخ لاعب مع فريق اجنبى بكون متوره معاه زى توترى تماما مع الهلال وبتمنى ليه الفوز .. وبجى ابارك لى المعاى فى البيت لو المريخ انتصر والله جد التحية والنصر دوما لرموز بلادى الهلال المريخ المورده وشكرا حاتم فرحة نصر
*** سلااااااااااااام يا وليد والله يا وليد لو بقت على المشاحنات والمكاواه الظريفه مالو لكن فى حاجات كده مرات تغيظك .. زى غيظتى انا هسه دى وخلتنى نص الليل انزل البوست ده هههههه لكن على قولك ...... ((اما ماهو سيئ فهو عدم التفافنا حول بعض و عدم تكاتفنا ضد الفرق الاجنبيه.)) ما دى العوجه زاتها يا ود امى شكراااااااا وليد شكرا فرحة بلد الاحبه لكم جميعا كل الود
Quote: نتناقش ونشجع فريقنا والفريق القومى بنديه وروح رياضيه مشبعه وطنية بدون مهاترات وتجريح .. ولا انت ما معاى ؟ اكيد متفق معانا
قطع شك متفق معاك مية بالمية بس حبيت اهظر شوية في مداخلتي الفاتت
.. تعرفي انا لما يحتد النقاش مع اصحابي المريخاب ( الغياظين ) وأحس انو الموضوع قرب يطلع عن حد المعقول بقول ليهم افتراضيين ( جدليين) يعني ما ممكن يحصلوا في الواقع : الأول : انو فجأة صحينا الصباح ولقينا كل لاعبي الهلال انتقلوا للمريخ وحدث العكس أيضا ..ارتدى كل لاعبي المريخ شعار الهلال هل سيتوقف أحدنا عن تشجيع ناديه ؟؟ التاني : انو الهلال اوالمريخ صار يتلقى هزيمة ( 90 / صفر ) في كل مبارياته لموســم كامل هل سنتوقف عن عشقهم ؟؟ إجابتهم في الحالتين بتكون : لا بقول ليهم : وتيّب
( المناكفات ) زي ما قال تيتاوي هي ( بهارات ) بتدي نكهة خاصة للتشجيع بس المعيب والمخجل فعلا واللي يجب التصدي له ( بحزم ) هو ظاهرة (المشجعين) الممتهنين للصحافة ( مزمل أبو القاسم نموذجا ) لانو دي بتوصل ( للمهاترات ) في الصحف .. زي ما حاصل حسع..
مثلا زي موضوع استاد الهلال المهدد بالانهيار العملتو إحدى الصحف مانشيت عريض لو ثبت انو كلام غير ( مؤسس ) مفروض طوالي يتم ايقافها .. ويحاكمو المسؤولين عن نشر الخبر .. ...الخ
دعواتنا للزعيم بالنصر المؤزر في مباراة بعد غد ان شاء الله. .
مرحبا اخى حاتم تسلم يا ذوق على روح الدعابة والوضوح وكتر الف خيرك على المرور الذى اسعدنى جدا ادرى تماما انك كنت بتمزح فى المداخلة الاولى ويا ريت تشجيعنا كلنا يكون بمستوى الابتسامه اللطيفه وعجبنى جدا كلامك عن الفريقين وضحكتنى بى كلمة جدليين افتراضيين وجهة نظرك سليمه مية بالميةويا ريت الكل يفكر بى عقلانيه طبعا اكيد فى ناس زيك وزى تيتاوى الظريف لكن الله يكفينا شر الهجائم والرجائم قلت لى فى صحيفة كتبت انه استاد الهلال مهدد بالانهيار ؟ عجبى والله!!!! طيب الناس دى بسمحوا ليها تسرح وتمرح كده ليه ؟ والله صدق اخونا نصار لما قال لى دايرين يشغلوا العالم بى حاجات تانيه تلهيهيم عن الوجع الموكر.. ربنا يكون فى العون بس لكن يفترض فورا ادارة الهلال تحقق مع تلك الصحيفة ما ينتظروا لما يتأكدوا كلامهم مؤسس ولا لا ... قلوبنا مع الهلال فى مبارته القادمه وان شاء الله يا حاتم اجى ابارك ليك هنا بس جهز لى علبة حلااااااوة كبيره ولا اقول ليك ورينى بس كيف بتخت الوشوش دى عليك الله (انت زاتك غياظ ) قاعد تغيظنى لما تخت لى وش ضاحك وانا غالبنى اختو ليك.. شكرااا اخى حاتم شكرا مارقه من الجوف
07-07-2007, 05:51 AM
ALGARADABI ALGARADABI
تاريخ التسجيل: 12-30-2004
مجموع المشاركات: 5236
يا سومة ياختي المنبر ده بالنسبة لينا مسطبة دكان ناصية أو عمود نور نجي بعد الكورة نتناكف تحتو ونحاول نبخس انجازات بعض لكن القلوب عامرة بالمحبة فعندك مثلا أنا أحب المريخاب الصهاينة الأتية أسماؤهم: راكوبة سامي عبد الوهاب شهاب الفاتح
بالله وصلي ليهم المحبة دي لكن برضو كاويهم شوية بالوصافة المستمرة أربعة سنين
القرضابى سلامات يا لون النيل حبابك وانت موشح بالازرق كده اديت البوست نكهة النصر يا ريت لو كل البشريه بتجى تنتكل على عامود النور وتتناكف زيك بى حنيه يا القرضابى يا خوى لكن البوست ده اتفرد للبعد الآخر من المناكفة لكن والله ضحكتنى بى صهاينه دى .. دى ريدة شنو دى يابا تسلم والله يا ظريف احكى ليك قصة تربطنا علاقة وطيدة جدا بالاخ التاج محجوب لاعب الهلال وكابتنه والفريق القومى سابقا وبالاخ الحنين عمر العلمين لاعب المريخ والاتنين اصحاب وجيران فى السودان واولاد حتة واحده لكن طبعا التاج عجوز (( ما يقوم يسمعنى ) المهم نتونس ونتكاوى لما يكون فى مبارة .. اطلاقا ما حسينا يوم انه ده هلالابى وده مريخابى بالعكس عمر ده مرات بتكلم عن نقاط معينه فى الهلال بشفافيه جدا وبمدح فى كثير من اللعيبه ومستواهم وايضا الاخ التاج محجوب .. وادرى تماما مدى العلاقه البتربطهم بى كثير من لعيبة الفريقين لكن ناس حوش بكرى ديل واقصد بعضهم الله يديهم روحك اللطيفه دى يا القرضابى يا خوى وكتر الف خيرك على الطلة الصباحية دعواتنا مع فريقنا الغالى وكل فرق البلاد نتمنى يرفعوا راية الوطن عاليه خفاقة شكرا القرضابى شكرا 3/صفر للهلال مع الترجى
07-07-2007, 08:49 AM
الطيب شيقوق الطيب شيقوق
تاريخ التسجيل: 01-31-2005
مجموع المشاركات: 28804
. شكرا سوما على كلامك الطيب وحلاوة الفوز جااااهزة دائما ومنتصرين ان شاء الله ضاقت جنبات قلعة طلعت فريد امبارح وحضر تمرين الهلال زهاء الـ 30 ألف هلالي غايتو ربنا يستر وما يطلع كلام المريخابي الحاقد صحيح ..طبعا الموضوع ( اقصد نشر خبر الاستاد المهدد بالانهيار ) سيأخذ طريقه للمحاكم ..
سلاااااااااااااااام ود شيقوق الرجل الانسان الذوق وينك يا الحنين يعلم الله الشوق طاير لا فوق يفتش ليك فى كل البكانات وانت تراكا قاعد بهناك وسط الترع وين الحى بيك البركه البقيت طيب لكن ده بالغ البكره ملاح القرع ملاح القرع حلااااااتو بالكسرة المره وشن جاب لى جاب قول ليه ونسة ناس الكورة المسيخ فيها جنس النقة البتحصل فى حوش بكرى ده .. والله امسخ من الحميض بتعرف الحميض ؟ كدى قول لى انا غايتو بريد ونسة الكورة من الناس الظراف زى ناس تيتاوى وحاتم الما غتيت شكراااااا ود شيقوق قدر الطيبه الساكناك يا ود الطيب شكرااا أردب محنة
*** حاتم يا طويل البال يعلا مقامك يا يابا ويعظم شانك لكن ما قلبتها حصة جغرافيا عديل كده عينى بارده وما شاء الله قرررربت القى الكنز بتاع حصة الجغرافيا داك لكن كدى النجرب فيك انت نشوف تعليمك ده جاب فايدة ؟ اجشششششش يا يمهحال السرور والخاتر المجبور عاد تانى يا حاتم جاك بلا برد ليك برا سبب امانه ما ارص ليك الوشوش دى كلها هيـــــــع اخو البنيات لى حدهن فتك بى وش زى ده
07-07-2007, 07:02 PM
هاشم أحمد خلف الله هاشم أحمد خلف الله
تاريخ التسجيل: 01-16-2007
مجموع المشاركات: 6449
اخوى هشام خلف الله ود الفريق والحلة يعلم الله عجبتنى الطلة صح لسانك يا ود الاجاويد يا ريت والله يرتقى شعبنا ويتعلم لغة الحوار والتشجيع الهادف والنقد البناء يسمع منك ربك العباد ويديم علينا النصر دوما والله يهدى الجميع كتر خيرك اخوى هاشم وياها المحرية فيك ربنا ينصر هلالنا ومريخنا وكل السودان يا رب
شكرا اخوى هاشم شكرا بكل الوان الطيف
** القرضابى حبابك من تانى ههههههه عجبك درس العصر حق حاتم ده انت فى اللون الازرق ولا الوشوش انا عاد ما حلفت الا ارص ليكم الوشوش دى فى مناسبة ولا غيرها والعجب كان الهلال بكره غلب التوانسه ديل ايــــــك بعمل ليكم حفلة زار هنا ودعتكم الله
عارفة يا اسماء المناكفة دي في الكورة هي اكتر حاجة بتدي للكورة طعم واكيد مرات بيحصل تعصب شديد مرات كتيرة لما اسمع مناقشات حول الكورة دايرة في اي حتة ، تلقي فجأة حصل توحد بين الناس حتى لو ما بيعرفوا بعض ، والنقاش يكون مسخن على اساس وفهم شديد يحير ذاتو خاصة بالنسبة لينا الما ضليعين شديد في المفاهيم الكروية بالجد بحب اسمع مناقشات الكورة دي ، بس طبعا ما يكون فيها تعصب وانفعال زايد مع انه دي ذاتها مرات بتديها تحابيش ظريفة
عاوزة تشوفي الانفعال الجد جد والمناكفة الشديدة شوفي المصريين ، ديل ممكن يضاربوا بسبب الكورة مما ممكن جدا ان يؤدي لحدوث جريمة
مايا الحبيبه مشتاقين يا حنينه وين الحى بيك خلاص ؟ حاربتى مسقط وناسها ما تطولى الغيبه عليك الله صاح يا مايا المناكفه الظريفه بتدى التشجيع نكهة احلا لكن نحن هنا بنحتج على الاسلوب الما مهذب من قبل البعض يعنى مستحيل تحسى بى رغبه فى سماع النقاش الدائر بين اتنين والمداخلات زاتها مرات بتطلع من جو الكورة كلنا بنادى بى احترام الغير والتشجيع الراقى اما فيما يتعلق بى اخوتنا المصريين .. تصرفهم اكيد مستنكر ومرفوض البصل حد المضاربه ده نحن ما دايرين نقتدى بيهم ..لانه تصرفهم ده اكيد ما سليم واكيد عندنا فئه مثلهم .. عفانا الله من هذا التصرف الشنيع وتسلمىىىى يا ستى على الطلة دعواتك معنا لفوز الهلال اليوم ربنا ينصره وينصر كل الرياضة فى بلادنا الحبيبة
سلااااام بى قلدة محنة الاخ العزيز ملامح تسلم على الطلة يا ود القبائل المى خمج طلتك دائما بتدينااحساس باللمه .. ضحكتنى شديد بنكتة القطب المريخى الراحل شاخور عليه رحمة الله.. يا رييت لو رابطة مشجعى الزمن ده اقتدوا بى جيل شاخور وغيرهم من عمالقة الذوق الرياضى الرفيع..
الاخت مايا الحبيبه هى مايا تانيه يا ملامح .. اما مايا التى تعنى موجوده معنا بمسقط وهى بالف خير الحمد لله وان شاء الله سلامك يصل تسلم كتير اخوى ملامح وشوقنا نحن زاتو مطر يعلم الله تحياتى عبرك للعقاب بدون فرز شكرا محنة
الأستاذه/ سوما تحية طيبة انا بعذرك لأنك لا تحيطين بما يدور جيدا فى الوسط الرياضى!! صديقى الذى اعتبره أخى الذى لم تلده أمى ينتمى الى جيل اصلاء المريخ ويحب المريخ أكثر من حبى للهلال .. كنا نذهب سويا يوما لحضور تمرين الهلال وفى اليوم الثانى نذهب لحضور تمرين المريخ. كرة القدم لن تكون حلوة وممتعه ونحن نحاول اضفاء الوطنيه والقوميه عليها وأن يشجع الهلالابى المريخابى أو العكس .. كرة القدم حلوه وممتعه حينما يتمنى المريخابى هزيمة الهلال فى اى مباراة حتى لو كانت ضد اسرائيل والعكس !! لكن بدون تآمر أو خبث أو مكر .. للاسف الآن ظهر وسط المريخ صحفيون مريخاب "جدد" يتأمرون على الهلال، يكشفون اسراره للأندية الأجنبيه بدعوى حرصهم على مصلحة الهلال، يحرضون لاعبيه للتمرد عليه، يشككون فى نزاهتهم وأخلاصهم حتى يكرههم جمهورهم!! وللأسف هولاء الصحفيين المنتمين لفصيلة المريخاب الجدد يجدون تقديرا ومودة من كثير من المريخاب، بينما الشرفاء والنزهاء من الصحفيين لا يجدون ربع ذلك التقدير والأحترام. نحن فى الهلال لا نحترم الصحفى الهلالى غير الشريف المتواطئ حتى لو حقق لنا نصرا على المريخ، فالنصر عندنا لا قيمة له الا اذا كان فى ميدان الشرف والبذل والعطاء، لا على طريقة "قودين" ولدنا .. ومعز "حقنا" وهو لا زال يرتدى شعار الهلال !!
07-13-2007, 11:30 AM
keiga2000 keiga2000
تاريخ التسجيل: 05-11-2002
مجموع المشاركات: 4119
والله المناكفات موجوده في الاحياء في العائلات في المدارس في الغربة دي طبعا المناكفات الرياضية وحتى في الجامعات وايام دوري الكليات كانت تكون هنالك مناكفات بين الكليات ناس الطب مامقتنعين بناس الهندسة وناس الهندسة مامقتنعين بناس الزراعة وناس الزراعة مامقتنعين بناس البيطره عشنا هذه الاشياء ايام الدراسة الجماعية وحتى في الاحياء كنا بعد كل هلال مريخ نتقابل في ناصية دكان ونتناقش
لكن هنالك بعد المحسوبين على الاخلاق الرياضية الذين يغضبون ويشتمون باساليب جبانه وكلام فارغ وهذين هم المحسوبين على الرياضة
نحن اناس لاترضينا هزائمنا خاصةمن الدول المجاورة مثلا مثل مصر وغيرها من دول المغرب العربي ودول الخليج لاننا نعاني كذلك من مناكفاتهم بعد المباراه
فهم يعرفون ان هذا الفريق سوداني مايعرفون مريخ او هلال المهم هزيمة الفريق السوداني لذلك لايرضينا ذلك فقط من باب المداعبة والمناكفه البتجينا من هؤلاء الاخوه نتفشى في اصحاب الهزيمة ونزيد الطين بله لكن هذه مناكفه القصد منها تحسين الوضع في المستقبل ونحن ما اظن في لاعبي كتار يدخلون المنابر ويقروء الانتقادات التي توجه لهم
الخلاصة المناكفه من الناس الحلوين حلوه وبروح رياضية ومهما الواحد ناكف لهزيمة ندنا الهلال فالقصد منها مناكفه رياضية وليس بالفهم الذي يفهمه بعض المحسوبين على الرياضة ويطلع ويسئ ليك باسلوب جبان كانه يعرفك من سنين لذلك وحسب البوستات بتعرف الاخوان الرياضين وبعض المحسوبين عليهم
فهنالك هلالين محبوبين ليناكمريخاب من ناحيتي
معتصم دفع الله ابوقوته ابراهيم علي المهندس احمد الريح (شيخ الهلالاب) وبقية لم تزعفني الذاكره (وخاصة واليوم جمعة والامةمجتمعة)
يعطيك العافيةاختنا سوما وسلمي لي على عمر العلمين
مع تحياتي
ابومصطفى
07-13-2007, 11:39 AM
ALGARADABI ALGARADABI
تاريخ التسجيل: 12-30-2004
مجموع المشاركات: 5236
وبمناسبة شاخور دي أحكي ليك نكتة تانية سمعتها عن شاخور: قالو جاهو مشرف المناشط قال ليهو جماعة رفع الأثقال ديل عندهم مشاركة وعايزين قروش... شاخور قال ليهو ديل بجيبو قون في الهلال؟؟؟ فأجابه بالنفي فرد عليه شاخور: والله كان شالو استاد المريخ ده في روسينهم ماعندي ليهم تعريفة!!!
*** الاخ تاج السر حسن حبابك والف مرحب بيك تحت نيمتنا الوريفه بى قلوب ناسها الزيكم تسلم كتير وكتر الف خيرك على الطلة يا ود البلد امكن تقول ماعندى معرفة جيدة بالوسط الرياضى لكن قدر معرفتى بالاخوة من لاعبى كرة القدم فى الهلال او المريخ او نقول المنتخب القومى تربط بينهم بالمحبه والود وصلة اعمق من ذلك لكن ما يكتب هذة الايام فى الصحف وفى المنتديات يخليك تضايق وتنفر من بعض المحسوبين على الرياضة كما ذكر اخونا كيجا فيا اخى الكريم .. المناكفات الظريفه والتشجيع للفريق بعمق المحبة بدون جرح مشاعر الاخر . ابدا ما مرفوض. بالعكس ده ملح الطعام لو صح التعبير هنا طرحى عن الفئه البسيطه من مشجعين وصحفيين من الطرفين . يجب ان نقف فى وجوههم بشدة للرقى بالمستوى المحترم للتشجيع واللايق . بدون تشدد يؤدى الا عدم الاحترام وشكرا اخى تاج السر شكرا مارقة من الجوف والف مبروووووووووووك فوز الهلال العظيم ومزيدا من الانتصارات ان شاء الله
*** العزيز كيجا ... وينك يا ابو مصطفى والله الشوق ممتد و جارف... اكبر من المسافة بين شندى والقضارف كيفنك يا الحنين وكيف الاهل كلهم لهم جميعا السلام والاحترام عجبتنى طلتك بعد غياب انا معاك اخى ابو مصطفى عن كلامك فيما يتعلق بالمناكفات الظريفه اللطيفه بالعكس بتخلى الواحد ينتشى و ينفعل لكن فى حدود لامعقول والتشجيع يحلى الفوز بطعم خاص لكن بدون جرح مشاعر او التدخل فى حياة الاخرين وخصوصيتهم بصورة واضحه ولا علاقة لها بنتيجة الفريق ولا التشجيع بصراحة طرحى للموضوع ده بعد معناة شديده من التجريح من بعض الكتاب فى الصحف او المنتديات كما اسميتهم محسوبين على الرياضة كلامك فى محلو ..لكن الفئه دى لازم تحارب .. حتى لو كانت صحيفه معروفة لازم الناس تقيف فى وجة الحق والقلم الصريح الصادق ما اجمله والنقد البناء مطلوب والتشجيع بتعصب وبدون تجريح ايضا مطلوب التحية ليك اخوى ابو مصطفى ولكل الذين ذكرتهم ولكل الاخوة الرياضيين تحاياك وصلت للاخ الشفيف عمر العلمين وببلغك سلامو الكتير وشكره وتقديره عارف يا ابو مصطفى الاخ عمر غير لعبو الجميل فى كرة القدم كان وما زال مبدع فى حاجتين الرسم والعزف يرسمك بى قلم الرصاص فقط .. لما تشك انه دى رسمه ولا صورة حقيقيه ؟ ما شاء الله وعينى بارده والعجب لو اضفى على اللوحه الوان وبعزف عدة آلات موسيقيه ببراعه مثال الاورغ والاكورديون والايقاع ( الطبله وغيرها من ايقاعات الخبت العجيب لووول) اى مقطوعه موسيقيه ببرع فيها هاااااااااااااااادىء جدا رغم انه بكاوى ووخلوووووق جدا بس عندو عيب واحد فترنى وتعبنى وقطع قلبى بى حوامة السوق لى شراية شبكه ليه للعرس .. 3 مرات يا كيجا يا اخوى اشترى ليه شبكة العروس لما اتصل اقول ليه اها خطبت ؟يقول لى لسه.. بعد مدة يرجع من السودان حانف وشو ويقول لى الشبكه هديتها لى صاحبى 3 مرات بالطريقه دى لامن قربت أاجر لى زول يصاحبوا ويرجع لى الشبكه تانى نحكى ليك النكتة دى .. عن بدر الدين شنا وعمر العلمين عمر عندو ساعة يد مستطيلة بيضاء لكن كبيره جدا هو ما شاء الله يدو زاتها كبيره .. لكن الساعه كانت حجمها ظاهر كبير كانوا قاعدين يتغدوا .. فجأة بدر الدين شنا لاحظ للساعه قال ليه انت يا عمر الساعه دى بتلبسها بالنهار وبتعلقا فى الحيطه بالليل ؟؟ عمر ده قررررررررب يشرق من الضحك الله يديهم العافية الاتنين ويجيب لينا لاعب عبقرى زي عمر تانى قريب يا رب ولك منى الشكر والاحترام محكر فى الدواخل شكرا ضل راكوبه *** القردابى حبابك يابا والله ضحكت من الاعماق لما ناس البيت قالوا لى مالك بتضحكى براك قولى بسم الله الله يرحم عمنا شاخور ويسكنه فسيح الجنان ويديك انت الصحه والعافية ويسعدك قدر ما بتضفى علينا البسمه يا حنين اخوى القردابى شكرا نيلين
07-16-2007, 08:54 PM
waleed dawash waleed dawash
تاريخ التسجيل: 06-04-2007
مجموع المشاركات: 1541
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Abulbasha
نصار
شهاب الفاتح عثمان
عامر تيتاوى
معتصم دفع الله
waleed dawash
ALGARADABI
الطيب شيقوق
هاشم أحمد خلف الله
keiga2000
فيس بوك
تويتر
انستقرام
يوتيوب
بنتيريست