منذ أن تم إعلان نتيجة الشهادة الثانوية بالمملكة العربية السعودية "وخصوصاً نتيجة البنات " وجدت أكثر من تهنئة لأكثر من شخص بمناسبة نجاح إما إبنته أو إبنة صديقه أو قريبته .. وكلنا نبارك لهم على هذا النجاح ولا نهضم حقوقهم ولا نقتل الفرحة فيهم ولكن الغريب وعجيب أن كل الأشخاص المباركين النجاح كانوا يكتبون " مبروووووك فلانة الأولى على المملكة " .. ثم يكتب اخر عن واحدة أخرى " إبنة فلان ترفع رأسنا عالياً وتأتي الأولى على المملكة " .. ثم تأتي أخرى لتكتب عن طالبة أخرى " العسولة فلانة الأولى على المملكة " .. ثم اخر ثم أخرى ثم أخر ثم أخرى حتى وجدنا أن الأولى على المملكة من السودانيين فقط تجاوز عددهم العشرة فمن هي الأولى على المملكة يا أخوان ؟؟؟؟؟؟ النجاح باهر والنتيجة مشرفة دي ما فيها كلام لكن حكاية تضخيم الأمور لدرجة نسبها للأولى على المملكة دون توضيح أن النتيجة 100% أحرزها أكثر من عشرين وربما مئة وربما ألف شخص يبقى فيها نوع من مواراة الحقيقة ونوع من التضليل.. والمشكلة الأكبر تكمن في أن هذه النتيجة وإن كانت مشرفة لأولياء الأمور ولكنها تفتح باباً يجعلنا نوافق على كل الإجراءات التي إبتدعها أهلنا في التعليم العالي بعدم قبول الشهادة العربية بدون عمل معادلة لها وإن كنا نثق تماماً في إن مناهج المملكة ودول الخليج عموماً متطورة أكثر بكثير من المناهج في السودان .. ولكن أن يأتي أكثر من عشرين شخص ويحرزون النسبة 100% (ديل البنعرفهم بس فما عارف الما بنعرفهم كم) فهي نقطة توقف .. العجيب وغريب أن هؤلاء من السودانيين فقط فما بالكم من المصريين والأردنيين (وهم الأكثر شطارة من أبناء السودانيين في الخليج) .. يعني بي المييت كده ممكن يكون في أكثر من الف شخص حقيقة ربما أحرزوا النسبة الكاملة .. أما النسبة 99,99 % فحدث ولا حرج وكأنك في إنتخابات لرئيس عربي .. وأما النسبة 9و99% والنسبة 99% فربما نصف الطالبات والطلاب في المملكة أحرزوها !!!!!!! هي معادلة صعبة فلا الطلاب أجرموا في أن أحرزوا هذه الدرجات نتيجة لإجتهادهم ولا وزارة التعليم العالي أجحفت في حقهم لأنهم يتحصلون على بعض الدرجات بصورة ربما فيها نوع من التساهل !!!! الدراسة في دول الخليج فيها نوع من الرفاهية والدلال فلا الكهرباء تقطع ولا المياه تقطع ولا المدارس تأجز لعدم وجود العيش في البوفيه ولا المواصلات صعبة ولا الفصول إنهارت بسبب الأمطار وهذه تعمةوالحمد لله يتمتع بها ابناء الخليج وهي ليست غلطتهم ولكن عليهم أن يعرفوا أنه ولو توفرت لأبناء القرى في السودان نصف م يتوفر لهم فإنهم سيحرزون نسبة 200% مع العلم أن الإمتحانات في السودان (وإن تدهورت كثيراً ) ولكنها تبقى الأصعب نوعا ما والدرجات والتصحيح فيها يختلف كل الإختلاف عن التصحيح والدرجات في الخليج .. زماااااااااان وانا في السودان كل ما أولاد خالي يجو زيارة السودان يقولوا ليك انا جيت الأول وانا جيت الأولى .. جيرانا لمن يجو إجازة برضو أولادهم بيقولوا ليك نحن جينا الأوائل .. تمشي لي عمك تحمد ليهو السلامة عشان جا من السعودية يقول ليك البت جات الأولى والولد جا الأول.. حالياً وبعد أن أتيت انا بنفسي للسعودية وأصبحت شاهد عيان عرفت ليكم وهمة ولدي جا الأول دي .. كل الحكاية إنو من سنة أولى لحددددددددددي سنة رابعة ما عندهم إمتحانات وكلهم بيدّوهم ممتاز .. من سنة سادسة لحدي العالي ديل الواحد لو ما غاب عندو كم درجة وكان رسم ليهو سحابة وقطية عندو كم درجة وكان قال نشيد العلم صاح عندو كم درجة و و و و و و.. الأكذوبة التانية التي أوهمنا بها أنفسنا وصدّقناها حكاية السودانيين أشطر ناس دي !!!!!! كل معارفي في السعودية العندهم أولاد بسألهم بيقولوا لي الأول عندنا يا إما أردني يا إما مصري.. ودي الحقيقة الأردنيين شطاااااااااااااااااااااار والمصريين كمان وينافسهم السودانيين لكن ما حصل سمعت لي أردني معانا في الشغل بالغلط قال لي نحن أشطر ناس ونحن أولادنا بيجو الأوائل ونحن ونحن ونحن .. هو ليس هجوم على ابنائنا من الشهادة العربية ولا هو تكسير لمجاديف ولا هو تبخيس لنجاح ولكن علينا ان نفوق من الغفوة التي غفيناها فوجدنا العالم قد تخطّانا بينما نحن نتحدث عن أمجاد وتاريخ .. تخريمة : انا مقتنع تماااااااااااماً بأن المناهج التي تدرس في الخليج أفضل وأقوى مليون مرة من المناهج التي تدرس في السودان
07-01-2007, 09:51 AM
Mohamed E. Seliaman Mohamed E. Seliaman
تاريخ التسجيل: 08-15-2005
مجموع المشاركات: 17863
Quote: العجيب وغريب أن هؤلاء من السودانيين فقط فما بالكم من ا لمصريين والأردنيين (وهم الأكثر شطارة من أبناء السودانيين في الخليج) ..
الكلام ده بي جيب ليك الزعل ....... أوافقك إنو حكاية السودانيين أكثر ذكاء و شطارة وووووو دع زعم ما عليه دليل.... _______________ تخريمة وندى ومنى السودانيتان هما فقط من أحرز النسبة الكاملة (100%) من مدارس الجامعة الأهلية بالظهران !!
07-01-2007, 09:55 AM
ghariba ghariba
تاريخ التسجيل: 03-09-2002
مجموع المشاركات: 13231
عمر الفاروق سلامات انت مالك مركز على المدارس الحكومية بس؟ موش هناك في حاجة اسمها مدارس انترناشيونال؟ سمح مضيع حقوق اولادنا الاوائل مالك؟ انا ما بقدر افتي في المدارس الحكومية، التي اعرف ان ابناء سودانيين كتار ماخدين البرنجية.. لكن في معظم المدارس الاجنبية، الاوائل سودانيين.. تعرف ليه؟ معظم الطلبة امهاتهم خريجات جامعيات من افضل الجامعات السودانية، ومتفرغات، شئن ام ابين لتدريس ابنائهن.. في المدرسة الاثيوبية، كان اول المدرسة كلها سوداني امه صحفية خريجة اداب الخرطوم.. وفي مدارس اخرى اوائل المدرسة امهاتهم مهندسات وطبيبات. حسب كلام مديرات ومدراء اكثر من ثلاثة مدارس، اكثر الطلاب تفوقا ابناء السودانيين.. واكثر الاسر التي تتابع تعليم ابنائها هم السودانيين..يجوز لطبيعة هذه المدارس التي يسمح فيها للامهات بالمتابعة.. اعرف امهات ممكن الواحدة فيهن تخسر عشرين ريال مشوار بالليموزين للمدرسة اذا اكتشفت ان هناك خطاء في سبيلنغ كلمة واحدة.. وانا منهن. اعرف ان طبيعة الامتحان في هذه المدارس ليس بالتقويم او الترقيم.. وانما نتائج فيها طلاب الشرف الثلاثة الاوائل لكل فصل ابتداء من مرحلة التعليم ما قبل المدرسي وانتهاءاَ بقريد 12.. لذا امتحانات ابنائنا هي امتحانات لنا، والبيت كلو بيكون واقف على رجليهو كاننا في امتحان شهادة سودانية وليس فترة اولي او ثانية ان انتقال من افصل الى الاخر ، في اخر العام الدراسي.. تستعمل هذه المدارس نظام الكورس يونت سيستم، بمعنى تقسم السنة الدراسية الى ثلاثة فترات وكل فترة يسبقها امتحان شهري.. اي ان السنة بها ثلاثة امتحانات وثلاثة اختبارات.. وان المناهج المتبعة هي اما مناهج امريكية او بريطانية.. وبالتالي كل الدراسة باللغة الانجليزية ما عدا اللغة العربية. شفت جنس التعب دا.. ليس في الامر دعاية للمدارس او لابنائنا..وانما تثبيت حق المدارس الانترناشيونال في التناول واثبات حق الاباء في الفخر بابنائهم.. مبروك لكل الناجحين.. وصدقني لو تتبعت صاحبات المائة في المائة ح تلقي ابسط واحدة عندها الناس المتعلمين تمام والمتابعينها صاح.. فتش عن الخلفية التعليمية للاباء والامهات، تكتشف انو الناس ديل صاح في انو اوائل المملكة اكثر من عشرين، او تلاتين زي ما تفضلت. بعدين القاليك منو الاجانب العرب ما بتفشخروا؟ انا عندى جاراتي من مختلف الجنسيات.. والله في الجخ فايتاتننا عديل.. دا كان جخينا.. ويحق لنا الجخ الموهط..
07-01-2007, 10:05 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
ياخوي عمر ...لمعلوماتك عدد الاؤائل من البنات هو حوالي ال ١٥٠ بنت ..لقيتم في الجريدة حتي ماقدرت اعدهم ..والجايبين ٩٩ ديل حتي مافكرت اعدهم...ملاحظتك في محلها ومافي اب كان عندو الشجاعه يقول العدد كم ...ياخي انت ماعارف انو نحنا عندنا عقده نقص ... .كان مسكت ليك سوداني من اي طرف تلقاو ذي الفضائية السودانية وديك يااحسن ويااشطر شعب ...والموال المابنتهي ده ..عالم عقد!!!
07-01-2007, 10:33 AM
Mohamed E. Seliaman Mohamed E. Seliaman
تاريخ التسجيل: 08-15-2005
مجموع المشاركات: 17863
يا عمر الفاروق هذا الموضوع مهم جدا خاصة فيما يتعلق بقضية معادلة الشهادة العربية والقبول في الجامعات السودانية لعلمك امتحانات الشهادة الثانوية -في السعودية- بالنسبة للبنات مستقلة عن امتحانات الشهادة للأولاد !! وأهم من ذلك كله وأخطر أن الامتحانات في السنوات القادمة لن تكون مركزية بإشراف الوزارة وإنما ستتولاها المدارس !! ___________________
Quote: قريت لي تهنئة في جريدة على ما أذكر ما فيها الإسمين ديل ..
نعم ديل بناتنا يا عمر وهما فعلا تستحقان ذلك كريمتا الأستاذين عبد الرحمن شعيب وإبراهيم الأمين من هيئة التدريس بكلية الهندسة في جامعة البترول
07-01-2007, 10:46 AM
Mohamed E. Seliaman Mohamed E. Seliaman
تاريخ التسجيل: 08-15-2005
مجموع المشاركات: 17863
Quote: لكن في معظم المدارس الاجنبية، الاوائل سودانيين.. تعرف ليه؟ معظم الطلبة امهاتهم خريجات جامعيات من افضل الجامعات السودانية، ومتفرغات، شئن ام ابين لتدريس ابنائهن..في المدرسة الاثيوبية، كان اول المدرسة كلها سوداني امه صحفية خريجة اداب الخرطوم..
طيب والطلاب الباقون أمهاتهم ((أميات)) ساي وللا إيه ؟ عموما المسألة تستحق النوقف والدراسة !! من ناحية فقد ثبت من أحصائية أن نتائج الطلاب السودانيين في الشهادة السعودية ليست عينة تمثل الخصائص الإحصائية لنتائج الشهادة السعودية ( كمجتمع كلي) وهي فرضية كانت أساسا للصيغ المتبعة لمعادلة الشهادة العربية بالسودانية
07-01-2007, 11:16 AM
حليمة محمد عبد الرحمن حليمة محمد عبد الرحمن
تاريخ التسجيل: 11-02-2006
مجموع المشاركات: 4052
Quote: طيب والطلاب الباقون أمهاتهم ((أميات)) ساي وللا إيه ؟
Mohamed E. Seliaman
انا كنت بتكلم عن فئة معينة هن السودانيات، اللي اولادهن زملاء اولادي في المدرسة..ولم اتطرق الي الفئات التانية. وقع ليك كلامي الواضح زي ضوء الشمس دا ولا لا؟
07-01-2007, 10:57 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
يا غريبة : ياخ مبروك للبنيّة والله .. لكن يا ابو صلاح البيشوفك وإنت ساكّي جامعة المغتربين يقول حا تفتح فيها كلية لي بتك .. تقوم تعملا ظاااااااهرة وتودّيها مصر ..؟ ورّطت الناس يا ابو صلاح ياخ
07-01-2007, 11:17 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: لكن في معظم المدارس الاجنبية، الاوائل سودانيين.. تعرف ليه؟ معظم الطلبة امهاتهم خريجات جامعيات من افضل الجامعات السودانية، ومتفرغات، شئن ام ابين لتدريس ابنائهن..
بالمناسبة المدارس الأجنبية زاااااااااااتا هنا خشم بيوت .. يعني هنا في مدارس أجنبية ما بيدخلوها إلا الناس المقتدرين جدا جدا جدا وفي مدارس للمقتدرين جدا وفي مدارس للمقتدرين ساي وفي مدارس خاصة الواحد مننا بيتعب عشان بس يوفر لي أولادو تعليم خاص مريح .. بالنسبة لبعض المدارس الأجنبية وكما تفضلت مثل المدارس الأفريقية التي تفتحها معظم السفارات والجاليات فهي دون المستوى إذا وضعناها في كفة مع المدارس الخاصة العالمية .. الأسرة بقا عندها هلع بتاع التدريس للمناهج باللغة الإنجليزية وأي مدرسة تقوم بالتدريس باللغة الإنجليزية فهي مدرسة ممتازة ومناهجها مميزة وده الفهم السائد عند الأسر السودانية .. لكني صدقيني يا حليمة المدارس الخاصة زااااااااتا خشم بيوت وناس ناس وناس أنناس وناس خلقوها عشان تعذب الناس.. اما حكاية إنو معظم النوابغ خلفهم نساء متعلمات وجامعيات فدي تحتها خطين كباااار جداً قولي لي كيف..؟؟ المعروف إنو سمعة السودانيين كشطّار جات من الأجيال السابقة لنا وليست الأجيال الجديدة والحديثة .. وبما إنو السمعة دي قدمة يبقا عملوها ناس ليهم فترة طويلة في السعودية .. وبما إنو الإغتراب في السودان في الفترة الأولى ما كان للكوادر المميزة بقدر ما كان للفئة العاملة وربما الكادحة والبسيطة فمعظم الأسر هنا (القديمين منهم) تجدي المرأة لم تكمل تعليمها الإبتدائي ناهيك عن المتوسطة ورغماً عن ذلك جاء ابناء هذا الجيل وبنوا سمعة السودانيين .. وبعدين ليي بس إنتي بتعايني للجهة دي بس ..تعالي وشوفي كمان معظم الجامعيات ديل برضو عندهم أولادهم قمة الفشل سواء على المستوى الأكاديمي أو على المستوى الأخلاقي للأبناء والكفة متعادلة .. أبناء المغتربين فيهم النوابغ والذين يتفوقون حتى في الجامعات السودانية وفيهم الفاشلون الذين يتجولون بين الجامعات بمعدل جامعة كل سنة ..
Quote: في المدرسة الاثيوبية، كان اول المدرسة كلها سوداني امه صحفية خريجة اداب الخرطوم.. وفي مدارس اخرى اوائل المدرسة امهاتهم مهندسات وطبيبات. حسب كلام مديرات ومدراء اكثر من ثلاثة مدارس، اكثر الطلاب تفوقا ابناء السودانيين.. واكثر الاسر التي تتابع تعليم ابنائها هم السودانيين..يجوز لطبيعة هذه المدارس التي يسمح فيها للامهات بالمتابعة..
وفي المدرسة الأثيوبية نفسها ممكن يكون الطيش سوداني وفي مدارس أخرى ممكن يكون في سوداني بتاع مشاكل وبليد وسلوكه زي الذفت ... نحن لسة عايشين في الأكذوبة بتاعت السودانيين أحسن ناس وأشطر ناس ودوماً بيتبادر لي ذهننا كأول سؤال للولد أها جيت الكم ؟؟ ولو قال ليك جيت الخامس شياطين الجن تركبنا وتقول ليهو أها الأول جنسيتو شنو ؟؟ ولو قال ليك أردني ولا مصري عفارتي الدنيا تركبك لأنو إنت قايل بس السودانيين الشطار والمفروض يجو الأوائل والباقين ديل ما عندهم مخ أو عندهم حق الفهم لمنافستك ..
Quote: اعرف امهات ممكن الواحدة فيهن تخسر عشرين ريال مشوار بالليموزين للمدرسة اذا اكتشفت ان هناك خطاء في سبيلنغ كلمة واحدة.. وانا منهن.
والدة صديقي ليست جامعية بل وربما لم تدرس إلا المحلة الإبتدائية (سنة رابعة بس) ورغماً عن ذلك هي متابعة لبناتها من الدرجة الأولى بل وذهبت لأبعد من ذلك فهي أستاذتهم وتعلمت معهم فهذا حق ليس حصري على الجامعية ولا على التي تدرس الابناء في مدارس خاصة فالمتابعة غير مرهونة بنوع المدرسة ودرجة التعليم..
Quote: انا عندى جاراتي من مختلف الجنسيات.. والله في الجخ فايتاتننا عديل.. دا كان جخينا..
غايتو كان عندك جارتك لبنانية بخخخخخخختك ويا حلاااااااااة الجخ عند اللبنانيين والله يشهيك في الجخ واللخ .. تؤبرني حبيبي مش هيكي رايح يصير .. ورورووووووووووووووووووووووووووووووووووووووووووووك
07-01-2007, 11:25 AM
Mohamed E. Seliaman Mohamed E. Seliaman
تاريخ التسجيل: 08-15-2005
مجموع المشاركات: 17863
Quote: اعرف ان ابناء سودانيين كتار ماخدين البرنجية.. لكن في معظم المدارس الاجنبية، الاوائل سودانيين.. تعرف ليه؟ معظم الطلبة امهاتهم خريجات جامعيات من افضل الجامعات السودانية، ومتفرغات، شئن ام ابين لتدريس ابنائهن.. في المدرسة الاثيوبية، كان اول المدرسة كلها سوداني امه صحفية خريجة اداب الخرطوم ..
07-01-2007, 11:36 AM
حليمة محمد عبد الرحمن حليمة محمد عبد الرحمن
تاريخ التسجيل: 11-02-2006
مجموع المشاركات: 4052
انت صاح في نص كلامك .. وغلط في النص التاني.. لحدي مااجيك راجعة.. شوف اوائل الشهادة السودانية.. مدارس خاصة وامهات متعلمات او خريجات.. امس لم يعد اليوم.. ليش اتقهقرت مدارس الاقاليم؟ ما تقول القروش بس .. نسبة الوعي بين الامهات عالية جدا.. والوعي نوعين.. بجيك راجعة..
07-01-2007, 11:37 AM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
Quote: الأسرة بقا عندها هلع بتاع التدريس للمناهج باللغة الإنجليزية وأي مدرسة تقوم بالتدريس باللغة الإنجليزية فهي مدرسة ممتازة ومناهجها مميزة وده الفهم السائد عند الأسر السودانية ..
معقول يا عمر يصل بيك التعميم الدرجة دي.. معلوماتك دي ما فيها ولا كلمة صاح..
07-01-2007, 11:58 AM
Ali Alameen Ali Alameen
تاريخ التسجيل: 03-09-2007
مجموع المشاركات: 185
كثيرا ما نقراء او نسمع ان سودانياً قد ذهب الي العلاج في احدى العواصم الغربيه فساله الطبيب المعالج من اي بلد انت وعندما يجيبه بلدياتنا بانه من السودان تتسع اعين الطبيب الخواجه من الدهشه و يقول كيف تحضرون الي العلاج عندنا و عندكم الدكتور فلان الفلتكاني ونصدق.....
و في ايام الاعياد يفاجئنا التلفزيون و الاذاعة باستضافة شخص مغمور معروف فقط لدى ذويه و يعرف الينا على اساس انه عالم الذره و الفيزياء و الاستنساخ و الفضاء الشهير و انه قد اخترع الانتستالين و الكيمراكلين و الجيماتيكما وهوصاحب نظرية اذدهار الاوهام في بلاد العوام و هو مؤلف كتاب " السير على الماء و كيفية استثمار عقول البسطاء" و الان يقضي اجازة العيد بين الاهل و الاحباب بالسودان فمرحباً به................... و نصدق تفتح الصحف السودانيه لتجد ان الفنان السوداني الشاب قد احرز المركز الاول في السباق الوهمي لافضل اغنية عربيه في صفحة الجريمه تجد عنوان يقول في جريمة غريبة على المجتمع السودانى............ ونصدق تصحو من النوم و تفتح الراديو لتسمع من يقول ان السوداني مبدع ولكن تنقصه الامكانيات تغلق الراديو و تنام الى ان تتوفر الامكانيات تفتح الراديو لتسمع ايها الناس نحن من نفرُ عمروا الدنيا حيث ما قطنوا وتنظر الي النيل فتجده يقسم بلدنا الى نصفين دون ان تمتد اليه يد ربما لاننا اكثر الناس امانه فالسوداني امين و لا يمكن ان ياخذ قطرة ما حتى ينطق النيل ويسمحه له بذلك تستمع الى جعفر ميرغني و يخبرك ان ملتفي البحرين المذكور في قصة موسى و الرجل الصالح كان هومقرن الخرطوم و تسمع علامه اخر يقول ان هجرة الصحابه الي الحبشه كانت الى دنقلا ونصدق هذا الكلام ليست للتشكيك في مقدراتنا كسودانيين و لكنها دعوة لمناقشة صريحة ونقد الذات
07-01-2007, 01:30 PM
مهيرة مهيرة
تاريخ التسجيل: 04-28-2002
مجموع المشاركات: 948
Quote: و إنت مالك ؟؟؟؟؟؟ الحشرك شنو؟ تكون إمتحنت معاهم و قديت؟
علاء الدين يوسف ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ يا ربي ده يكون علاء الدين لاعب الهلال الجبناهو من المريخ ؟؟؟؟؟ يا ربي؟؟؟؟ علولو اب شعراً ملولو ... لالالالالالالالالا يبدو أن الكاميرا الخفية عادت من جديد ..انا قلت العنصرية ؟؟؟ قلت الكاميرا الخفيييييييييييية إزييك يا شايقي يا وهم ... أها ما كتبت ليك قصيدة لسة ؟؟؟ يا زول حبابك وحباب العنصرية معاك والله .. أحب العنصرية وأمووووووووووووووووووت في أوزون انا .. أها يا علولو ما قلت ليك وقفوك من شغلك ولا لسة ؟؟ عشان انا جاي أقوم أجيب ليك فيزا بتاعت توصيل بيتزا عندنا هنا في بيتزا هوت .. أحب البيتزا وأموووووووت في التكسي انا ..
07-01-2007, 05:35 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: كان مسكت ليك سوداني من اي طرف تلقاو ذي الفضائية السودانية وديك يااحسن ويااشطر شعب
المشكلة إننا بنهضم حقوق الشعوب الأخرى كمان .. ويا دنيا ما فيك إلا انا.. قد يحدث ويتفوق سوداني في مجال ما ويكون مفخرة لنا ولكن لا يعقل ان نكون في كل شئ كل شئ نحن الأوائل بينما بلدنا في المؤخرة .. تحياتي..
07-01-2007, 08:50 PM
عمران حسن صالح عمران حسن صالح
تاريخ التسجيل: 11-26-2004
مجموع المشاركات: 10159
هوي يا عمر الفاروق الدنيا موت في كجبار ... وشكلة في أبيي ... وولبد دارفور بي غادي داير الفزعة ... ما تقعد تصرفنا عن القضايا الأساسية (وتبرانا) ... ...........
في السلكـ : ما تتلمَ على أخوك بالليل نغني ... هوييييييييي يا ليلي ...
07-01-2007, 08:50 PM
خضر الطيب خضر الطيب
تاريخ التسجيل: 06-24-2004
مجموع المشاركات: 10185
Quote: كل الحكاية إنو من سنة أولى لحددددددددددي سنة رابعة ما عندهم إمتحانات وكلهم بيدّوهم ممتاز ..
ودا
Quote: من سنة سادسة لحدي العالي ديل الواحد لو ما غاب عندو كم درجة وكان رسم ليهو سحابة وقطية عندو كم درجة وكان قال نشيد العلم صاح عندو كم درجة و و و و و و..
دا منهج كويث جدا البدي درجات على الفاضي دا , مليان بالحيل ياعمر
وبرضو مقتنع
Quote: انا مقتنع تماااااااااااماً بأن المناهج التي تدرس في الخليج أفضل وأقوى مليون مرة من المناهج التي تدرس في السودان
بالله شوف تماما دي جاريننننننننننننننها كيف , العن ابو الانجليزي ياشيخ
07-02-2007, 12:13 PM
علاء الدين يوسف علي محمد علاء الدين يوسف علي محمد
تاريخ التسجيل: 06-28-2007
مجموع المشاركات: 19580
التحية للجميع التهاني للجميع وكذلك كل الامنيات الصادقات لابنائنا بالتفوق ونيل الدرجات سواء ان كانو ابناء مغتربين او اولاد ستات بيوت غير جامعيات ... والتفوق نعمة من الله سبحانه وتعالى وليست منة من الاباء والامهات بقدر ما هو جهد مبذول ومشاركة حقيقية بين افراد الاسرة بغض النظر عن مستوى التعليم والتأهيل والاغتراب الاخت حليمة اخذت الموضوع من جانب واحد وكأن للتفوق شروط وادوات منها الام الجامعية والمدارس الخاصة والاغتراب .. ربما لبعض من توفر لديهم بعض من تلك ... فرص في تفوق ابنائهم.. ورغم ذلك كما اشار بعض الاخوة المتداخلين نتائج بعض ابنائهم واخفاقاتهم واردة !! وهنالك في المقابل امثلة حية من بين ابناء المغتربين لم تتوفر لديهم كل تلك الشروط او بعضها لكنهم احرزوا درجات التفوق . وايضاهنالك مفارقة عجيبة عندما يعتقد الكثيرون بان ابناء المغتربين ينالون تلك الدرجات ويتفقون على اقرانهم بسبب الراحة وماهم فيه من نعيم!! فبالعقل والمنطق .. لا يمكن ان يكون ابناء المغتربين( السودانيين) اللذين يتفوقون على اقرانهم الطلبة من ذوي الجنسيات الاخرى في مجتمعات المملكلة العربية السعودية بالذات يكونون مرفهين ومنعمين اكثر من غيرهم . واذا كانت لتلك الفرضية مكان في عالم التفوق لكان نتائج ابنائنا اتت في ذيل القائمة.. نعم هنالك مدارس خاصة ودرجات اهتمام المدارس الخاصة بالطلاب اعلى من غيرها من المدارس الحكومية. ولكن لا يعني هذا بالضرورة عدم تفوق ابناء من يدرسون في المدارس الحكومية.ولا يجدون فرص التدريس الخاص والمدرسين الخصوصيين .. وهنالك اسرة متعلمة ودرجات اهتمام الاسرة بابنائها وامنياتهم بتفوقهم ومتابعتهم تكون اكثر .وايضا ذلك لايحرم على الاقل امنيات الاسرة بتفوق ابنائها وبذل ما في وسعهم لتفوق ابنائهم .. وهنالك من بين الطلبة من لديه رغبة ومتابعة باجتهاد وامنيات ومنافسة واساليب ودوافع واشياء كثيرة تدخل في المعادلة.. لايمكننا ان نأخذ ببعضها نترك بعضها الاخر..
وقفة اخيرة من الملاحظ في الفترة الاخيرة اقدام الكثيرين .. بل اعتقادهم في المدارس الخاصة والمدرس الخصوصي بصورة زايدة عن الحد المقبول ..بل كادت ان تلغي دور الطالب في البحث والتحصيل وبذل الجهد المطلوب. وكنت قد اشرت فيماسبق وفي مواضيع كثيرة الى ذلك من واقع تجارب شخصية.ولست هنا للتفاخر بقدر ما اريد ان اثبت بالراهين الدامغة صحة ادعائي .
المهم ليست المشكلة في الوسائل التي تودى الى التفوق.. ولكن المشكلة في الاوعية التي يمكنها ان تستوعب هذا او ذاك التفوق .. ويوفر لهم بعض من الوسائل المناسبة التي ترضي طموح الابناء المتفوقين !!! واباؤهم .. وبالذات امهاتهم لو كانوا من فئه المتفشخرات!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر الفاروق
Mohamed E. Seliaman
ghariba
حليمة محمد عبد الرحمن
Mohd Ibrahim
وليد محمد المبارك
Ali Alameen
مهيرة
عمران حسن صالح
خضر الطيب
welyab
فيس بوك
تويتر
انستقرام
يوتيوب
بنتيريست