|
|
 نقرشـــــة في وتر الإحتراق ( قصيدة عامية )
|
نقرشة على وتر الاحتراق
«سوما» يا أروع شتيلة
في ربوع روحنا ورباها
يا ينابيع ريد ورقة
غير نحس بالجوف هواها
يا عيون تدفق محنة
ويا غصن مَيَّل تثنى
القلوب بتميل معاها
يا نسيم .. بنفح لطافةْ
يا شفاهـ .. تنضح سلافة
يا مدى الريدة البِذّوب
بالروايع كل شاعر
يا البغيب الطل بدونك
يستقيل نبض الأزاهر
كيف .. جبرتِ القمرة ترتاح ..
لمّأ تمت في جبينك
وكيف رسمتي النيل ملامح
مِن تقاسيم جرح امسك
والصباح الفي عيونك
وكيف دليب «عيادي» مَيَّل
فوق تراب «الكلكة» قبّل
رملة تلبس بعض لونك
وكيف قوام البان تعلم
في النسايم يميس ويبدع
زي غصونك
يا خميلة ..
عابقة بالدهشة وذهولا
أشتهيتك زي جروفنا
لما تشتاق للدميرة
***
اشتهيتك ..
ملكة لي عرش المحنة
ضحكة مِن أعماق وطنا
طفلة بِتاتي وشِتيلهْ
في غصونها نُوار وجنّهْ
«سوما»
يا وجعي الخرافي
يا جرح جوايا خافي
أرخي جفنك في جراحي
مدى ريدك زي نواحي
خلي ليلك يبقى أطول
يِقدر يحضن ليل صباحي
يمكن القمرية تطلع
مِن صفاقة نيل سماحي
يمكن العصفور ينقر
في شبابيك بيت خرابة
يبني .. عشة عشق صافي
يمكن الغابات تسالم
تاني ما تأكل جناها
الزهور تصبح أحنّا
لي فراشاته وشذاها
اشتهيكي وأحس بروحي
في هيامك ياها ياها
زي عيونك في صفاها
زي بدورك في عُلاها
اشتهيتك لحن أخضر
في ملامحو وسم لباكر
سِرت فيكي سنين عذابي
رغم موج العتمة صابر
اشتهيتك .. شهد نظرة ..
مِن مُقل مياس وآسر
بسمة في موسم قواسي
تمحا دمعة ألف شاعر
أو بريق آمال مُرجى
إخضرار ما ليهو آخر
اشتهيتك .. واصطفيتك ..
ماني عارف ..
هل لقيّتك .. ما لقيتك
ماني عارف ماني قادر
سنار
|
|
 
|
|
|
|
فيس بوك
تويتر
انستقرام
يوتيوب
بنتيريست