من وحي محاولة القيامة الأخيرة!! ( يا بت يا شجرة)

قبل مداينك ما تبقي طشاش ونبعك قبال ما ينشف حلق الناس
العاشوا عطاش وقبل ما يفارق خد الوردة فراش ... كانت قصة
قصة زول في دربك ماش ..... قصة شوقاً أبي ينحاش
اصلوا الدنيا
كدة من اول
لو صدقت الفرّة الفي وش الزمن الكشّر بي مأساتو
تبقي مجرّد زول ممسوخ في فكرة انك زول وبعيش وسط الناس
والخوف
الهردت خشمك قولة أنو الفال
مساحة حلم وحقيقة
الهردت غنواتك معني نشازك في تقييمك للانسان الساكن فيك
في يوم بشبه شكل الريح الزعلان من نسمة عزك البقاية وطن
لي قصيدة

سرحن عيني في حس فرحة حسك بي جياتي
ومرقت عليك جوة الصحرة
لقيتك مخرج من الحزن الفي جواي ومدخل ليك
الشمس الجرحت خدي وسقتني الحر
الحر البلهب شبح سراب العالم هاوية
والناس السكنوا هناك كانت عطشانة
رويانة وعود ما طرحت ضو لا هزمت فيني النو

شفتك شجرة
في عمق الصحرة واللا ضل
شجرة كبيرة
وخضرة
تسر الناظرين
زي البقرة
سكنتك فيك يا ضل
يا بنت يا ضل
ولما لقيتك انت شرختي سراب الكون بي المطرة
رويت بي شوفتك زي ما شبعت عيني بي نضميك انشودة
يا بنت يا شجرة

لقيت الغصن الطالع من كبدك جوة
سرق النوم من عينوا الوعي وحتي اليقظة الاّه من شوقك ليها
ونزلت تفاحة
يا تفاحة
شكلك زي العايزة تمرقي خطانا بعيد من حواء
وادم يا حبان راقد في نص شوال التوت وجمبوا الغصن العريان مكسوف
ونامت أجفاني شوية كتير
وحتي كمان يا دنيا حلمت
وغنيت
لو تغرس بزرة بتنبت شجرة بتكبر شجرة
وشجرة وشجرة شجرتين شجرة بتصبح غابة!!

كانت خضرااااااااااء..!
معني خضارك فيني العالم لما يكون في الدنيا ضمير
ضمير العالم بنتاً شجرة
بحبك شجرة ويوم ما خنتك لا خنتيني
بتعرفي كنتك وما كنتيني
ولسة بتحلم بي الغابات حواء
مناها تعود لي شجرة وشجرة وتطرح تفاحة
بدل ما تطرح قابيل وهابيل
وبنت الجيران

وتصبح مشكلة لي اتنين ما عرفوا نهاية سعيدة
الا لمن شافوا اخر حلقة من مسلسل هاشم في العيد
أييييييييييييييك
هاشم في العيد؟؟
العيد دة منو دة يا هاشم؟ والله كان طيب هاشم يا زولة
بحلم بالعيد وشكل العيد وصوت االذان
لكن يوم عيدي يا شجرة
ما كورك أذان
لا صلي الناس لاضقنا حلاوة
وبرضو بنحلم بيك يا شجرة

ومرت أزمان وفاتت دنيا الناس في زحمة شارع مسكون بي وجعك
اأأأأأأأأأأأأأأأأأأأأأاه الوجع الوجع الهم يا أنتي
يا أنتي الوجع الهم الكعب الموت للدنيا
مرت أزمان والدنيا لسة موعد ويقظة ونعاس وجوطة وبس
جيت من اخر ميناء مودع لي الربان
تاني السجان؟
لا
المرة دي لازم امشي هناك للواحة
اقضي الليل في حضن الشجرة
جيت ومادي عشمي بمارس كيف تشحد ضل
لقيتك يا اّه من شوفتك
نفس المعلم الكان جايبني عليك يا سمحة
سحابة بخيلة ولفحة حر
وصحرة كبيرة ونخلة هناك في نص الوادي
زمان وصوها ولاد الحلة
لو جاك الزمن الشين يا نخلة
اوعي تفارق منك تمرة اوعي تدلي سبيطة وسعفة
والنخلة كانت حافظة وصية ناس الحي
زي ما وصوا جدودنا ولادنا علي الدم ومهيرة وعزة
ما خانت اصلوا كلام ووصية
وين الشجرة
؟

ما شايف شجرة ولا مرقت تضحك تفاحة
لقيت الفاس في باقي الضل الفضل شاحب
واقف عابس زي ما كانت عابسة الغيمة
وحالفة عديل ما تنزل قطرة فال لا يفرح شفع لا أطفال

بكيت الشجرة
بكيت الضل والمني والخضرة
وتاني بغني
وتاني بغني
لو تغرس بزرة بتنبت شجرة
وشجرة وشجرة وشجرة شجرتين شجرة
بتبقي حرررررررييييييييييييييييقة