|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: Tragie Mustafa)
|
Quote: لسميه اصدق الدعوات باجازه سعيده بين الاهل وسؤالي اي بقعة في البطانه ذاهبه اليها سميه فانا لي ذكريات كثيره في البطانه منطقة الصباغ و الساده وما جاورهما. |
شكرا اختى التراجي على المداخلة وجميل نعرف انك شرفتي تلك الديار .
الاخت سمية تسكن في قرية ود ساقرتة وهي شرق مدينة رفاعة و في قلب البطانة ومناطقهم تمتد الى ابي دليق وحتى شندى والصباغ و بطانة حلفا في الشمال وكل المقيمين في ارض البطانة لهم ذكريات مشتركة فيا حبذا لو حكيتي لينا ذكرياتك في البطانة يا التراجي .
لك عميق معزتي
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: الطيب شيقوق)
|
شكرا ود شيقوق
Quote: شكرا اختى التراجي على المداخلة وجميل نعرف انك شرفتي تلك الديار .
الاخت سمية تسكن في قرية ود ساقرتة وهي شرق مدينة رفاعة و في قلب البطانة ومناطقهم تمتد الى ابي دليق وحتى شندى والصباغ و بطانة حلفا في الشمال وكل المقيمين في ارض البطانة لهم ذكريات مشتركة فيا حبذا لو حكيتي لينا ذكرياتك في البطانة يا التراجي .
لك عميق معزتي |
اهل البطانه عشت بينهم وعشقت بلادهم ومن دكرياتي نزلت في ابو دليق في ديوان اسرة الوزير ابو حريره وكنا ناس مدن متهورين نسافر بلا مياه معتمدين على اللاندكروزرات لكن اذكر اسة ابو حريره وبعد الضبائح و الكرم اصروا ان يمنحونا قربه بها ماء وفعلا يومها عنها ولولا ماءهم ذلك لهلكنا عطشا.
ساحكي لك في وقتا آخر و انا اهدأ بالا بأذن الله.
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: الطيب شيقوق)
|
Quote: الاخت الاستاذة الاديبة سمية الحسن طلحة تعد العدة هذه الايام للسفر هى وابنائها وبناتها الى السودان . ولا شك اننا سنفتقد اسهاماتها المميزة في هذا المنبر ولكن قطعا ستعود الينا بمزيد من العطاء والابداع انشاء الله . |
إجازة سعيدة بإذن الله و نتمنى لها إقامة طيبة في أرض البطانة أرض الكرم والجود و الناس الأفاضل .. ولماذا لا تساهم الملكة من هناك ألا تغطي شركات الاتصالات السودان كله ؟ نرجو الافادة ........
أصدق الأمنيات لكم جميعا وتمشي وتجي بالسلامة أيتها الملكة أنت وأسرتك الكريمة ..
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: فاروق حامد محمد)
|
Quote: ولماذا لا تساهم الملكة من هناك ألا تغطي شركات الاتصالات السودان كله ؟ نرجو الافادة ........ |
هيييييييييييييييع عشاء البايتات ما بتخاف الله انت ؟ سمية دى بت عز شديييييييييييد ولما تمشى هناك الناس بتماوتوا في اكرامها والله الاجازة كلها ما تاكل وجبة في بيتهم .
بعدين يا الفاروق النت ده نحن هنا الجابرانا عليهو الفياقة سااااااااااى وهموم الغربة . كدى انت جرب امشى السودان والله النت اكان شالو كلب ما تقول ليهو جرت من شدة حلاوة الناس وطيب الناس وطهر الناس وكرم الناس .
عميق محبتي
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: الطيب شيقوق)
|
Quote: بعدين يا الفاروق النت ده نحن هنا الجابرانا عليهو الفياقة سااااااااااى وهموم الغربة . كدى انت جرب امشى السودان والله النت اكان شالو كلب ما تقول ليهو جرت من شدة حلاوة الناس وطيب الناس وطهر الناس وكرم الناس .
|
والله يا ود شيقوق صدقت وفعلا والله الزول هناك ينسى نفسو.
الاخت بت طلحة نتمنى لها اجازة سعيدة بين الاهل والاحباب وان شاء الله ترجع لينا بالسلامة وفى معيتها الكثير.
شكرا ود شيقوق والتحيات الزاكيات بلا حدود
ود النعيم
ــــــــــــــ وبالانابة عن آل ابو حريره الشكر موصول عبرك للاخت تراجى لذكرها مناقب هذه الاسرة الكريمة.
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: الطيب شيقوق)
|
ا ستاذنا الطيب الشيقوق مالك مقلب علينا المواجع . السنه دى اخوك تب مافيه طريقه والله رغم الاخبار المبشره بان البطانه مدقشه بى المطر اليومين ديل وقالو مسعود ايدو كبت فى القصيره اسقتا ودبلك لبس من الخدار واتكسا اتمنى للاخت بت الحسن اجازه سعيده بين الاهل والاحبه ونرجو منها توثيق كل الحاجات الحلوه. وسلامى الى كل الطبيعه هناك سهول وديان حبر غزلان وحنتوت والتبر رويان وعشا الضيفان . والنوق المسدره فى الفيافى كمان والضان والبتكرم منو ضيف الهجعه و يقوم شبعان . درب السلامه اختنا سميه ماتنسى الوصيه تحياتى الى الجميع .
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: أحمد الشايقي)
|
اهي علي احمد النعيم شكرا لمروك وناس ابو حريره ديل ديوانهم ما شفت زيوه الا في لقاءات ملوك السعوديه شفته لما يجبوا لك صالون فيه ما يعادل قريب ال 500 كرسي و الملك يكون قاعد هناك في لقاءه مع ابناء العشائر...هذا شكل صالون ناس ابو حريره فخم ضخم يدل على مكانة الاسره وبرجع لك لتفاصيل اكثر ــــــــــــــ
Quote: وبالانابة عن آل ابو حريره الشكر موصول عبرك للاخت تراجى لذكرها مناقب هذه الاسرة الكريمة. |
واجمل ما بهم اختلاط العلم بالتواضع بالكرم بالبساطه. فكرة القربه كانت رائعه لانه معرفتهم الحقيقيه بالطقس وطبيعة السفر هناك تجعل القربه فعلا افضل وسيله لحفظ الماء اثناء السفر .
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: munswor almophtah)
|
الاخ المنصور
Quote: إجازه سعيده وإقامه آمنه موطمئنه وثواب بحجم السماوات والأرض لمراحمه الأرحام والأصدقاء والجيران وسلامى لك يا شيقوق ولهم وللبطانا.................... |
الاخ المنصور والله حصلت حكاية لبت الخليفة عجيبة بالحيل .
والله مشينا قوم كامل مقدمين بت طلحة للمطار معاها اولادها بسلامتهم ولما وصلنا الكاونتر رجعوها من المطار قالوا ليها تذاكرك بتاعة سودانير ديه ما مبين فيها رقم الرحلة التى تقلك من دبى للسودان وهذا بسبب اخطا ناس سودانير . عطفا نذكر بان الرحلة من مسقط لدبي عن طريق الطيران العماني لتواصل بسودانير من هناك .
الان بت طلحة في مسقط في انتظار اى اشارة من سودانير وربما تاتي بعد ان تنقضى الاجازة في مسقط . على العموم متوقع ان ترفع بت طلحة دعوى قضائية ضد سودانير للمطالبة بالتعويض لا سيما وان بنتها (صفاء) التى تدرس في كلية الهندسة قد تفقد رحلة مع زميلاتها الى ماليزيا يوم غد على حساب الجامعة .
نوافيكم بالتفاصيل انشاء الله
دعواتكم
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: الطيب شيقوق)
|
أيها الأوفياء : الطيب شيقوق ، سوسن عبدالله عبيد ، تراجي مصطفى ، فاروق حامد ، علي أحمد النعيم ، د.عمر ودمحجوب ، ماجدة عوض خوجلي ، أبوالحسين ، علي محمد علي بشير ، خالد المحرب ، إسماعيل عباس ، علاء الدين حيمورة ، أحمد الشايقي ، حاتم هاشم ، منصور المفتاح شكراً لدعواتكم وأمنياتكم وكلماتكم الطيبات ، وأرجو أن تدوم هذه الألفة بيننا ، كما أود أن أعتذر لكل من أخطأت في حقه ، وانا كلي ثقة في تسامحكم أحبتي، فليس بينكم النمام ولا المغتاب ، وأكرر رجائي المحافظة على هذا المنبر الذي جمعنا إلى أن نلتقي في وطن سليم ومعافى بإذن الله.
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: سمية الحسن طلحة)
|
اليكم بعض المشاركات من متابعي سودانيزأون لاين غير الأعضاء الذين يودون بشدة مشاركتكم هذا التواصل والتآلف أيها الودودون ، الرسالة الأولى وصلتنا من / دبي :ـــ دُغشاً بدري عاودني الحنين الزملو تالاكم ضهور القافية ( الزملو تالاكم: الدابة المؤدية لجهتكم) شديت الرسن جفلن حروف أبجد وفضلت ( ما ولا) النافية دودرت النميم الكنت ظانن فيه كارات السوالف وافية يا أبو مروة طالبين لى عفوك والعافية
رسالة أخري من الدبلوماسي الشاعر / بلال قسم الله / السودان طاهرةُ اللسانِ واليدِ * ذاتُ البهاءِ المسعدِ منكِ المدائحُ تجتبى * أيقظتِ قلب الراقدِ بنتُ الكرامِ رجاؤنا * فيضُ الحنانِ المفردِ حركتِ فينا قوافياً * مَسَحّت عناءَ المجهدِ وبقيتِ فينا زهرة * فوحَ العبير الجيّدِ فسلمتِ من كل الأذى * من كلِِ باغٍ معتدِ وطربتِ بالمدح الذي * يصطاد كل شواردي فسُمّية أنتِ التي * من جيلِ دهرٍ واعدِ كرمٌ وإحسانُ معاً * إرهافُ إحساسٍ ندي فالله يبقي ودنا * في الدارِ هذي وفي غدِ وصلاةُ ربي دائماً * ترضي حبيبي وسيدي لبلالَ محمود الهدى * وزبيرَ نسلَ أماجد
ورسالة أخرى من صديقة بمسقط :ـ ياريت الليل علي يطول وما يطلع صباح يومن بودع فيه أجمل زول قد تتباعد الأجساد تظل أرواح على العهد الوثيق موصول وتبقى مكانتك في القلب وطولك مابطاولو الطول وتبقى الذكرى في غيابك أعز حديث وأطهر قول أبثه مع نسيم الجو لذات الشرف مرسول ودعتك الله وأمنتك شفيع الأمة من الهول فما خان الأمانة نبي ولا خان الوداعة رسول
وأعتذر لكل من طلب مشاركتكم برسالته ولم يسعفني زمني بتلبية طلبه بنشرها وفي أمان الله إلى أن نلقاكم بمشيئة الله .
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: abubakr)
|
نتمى ليك إجازة سعيدة يا أختنا سمية تقضينها مع أهل العز في ربوع البطانة الحبيبة وما تقولي الدنيا خريف، وقد أخذت أرض البطانة زخرفها واتزينت، وريحة الدعاش تشد الحيل وترد الروح، والبهائم رتعن، والبهم ينطط من فرط الشبع، ومن بعيد يلوح ليك أسراب الطيور في ألوانها المتعددة، شيء سنبر وشيء رهو، وشيتاً عصافير، وشيتاً ماليهو اسم يبهرك بجمال شكله وعذب تغريده. دي لوحة دايرة ليها زولاً فنان يرسمها وما بينفع التعبير عنها بالكلمات ، ونحنا في انتظار بت الأجاويد عشان تكمل لينا اللوحة بعد عودتها من الإجازة، ويا ود شيقوق من هسي جهز الخيمة وحضر الخرفان وماتنسى تكلم شعراء البطانة عشان القعدة ما بتطيب إلا بحضورهم ، وما أجمل الشعر والنم في البادية والدنيا مغيمة والأجواء خريفية .
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: الطيب شيقوق)
|
أختي سمية
سلام عليك وعلى روحك الكيبة السمحة سلاماً متواتراً من الميلاد حتى آخر العمر المديد ( إنشاءالله).
أختى ستتركين حوارييك كاليتامى ولكن قال أهل الصفة إزدد غِباً تزدد حباً) فوالله نحن نكن لك الود في الحل والترحال .. العودة لأرض الوطن أمر يسر ويُسر له محبيك ولأن لك فيه أمر سعادة وفي ذات الوقت حين يفتقد الحيران الشيخة تصبح الخلوة عجية لطيمة وكذا الحيران ..أعرف أن ودشيقوق ، خالد المحرب ، ماجدة خوجلي ، منصور مفتاح وأنا - في ذيل قائمتهم لقصر قامتي وعنقي - نشعر الآن كم أليم وكم هو مر فراق إنسانة سمحة الخلق ، طيبة المعشر من نسل الذي أدمى طول الُسُرى قدميه في هدأة الليل يتعبد ويتهجد وبتغزل في ليلى .. أسأل الله لك إجازة سعيدة .. وحتى من هناك لا تقطعي الحيران ما أمكن التواصل لك الود والإحترام .. وخالص داعائك
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: Ahmed Yousif Abu Harira)
|
ابو بكر ود يوسف كتر خيرك بالحيل
Quote: يفتقد الحيران الشيخة تصبح الخلوة عجية لطيمة وكذا الحيران ..أعرف أن ودشيقوق ، خالد المحرب ، ماجدة خوجلي ، منصور مفتاح وأنا - في ذيل قائمتهم لقصر قامتي وعنقي - نشعر الآن كم أليم وكم هو مر فراق إنسانة سمحة الخلق ، طيبة المعشر من نسل الذي أدمى طول الُسُرى قدميه في هدأة الليل يتعبد ويتهجد وبتغزل في ليلى .. أسأل الله لك إجازة سعيدة .. وحتى من هناك لا تقطعي الحيران ما أمكن التواصل لك الود والإحترام .. وخالص داعائك |
آآآآآآآآآزول وحياتك بت طلة الفقراء غاروها . على الحلف اسبوعين حايمة بتذاكر سودانير في مسقط ما لقت حد من ناس سودانير عبرها ساااى .
دعواتكم
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: سمية الحسن طلحة)
|
Quote: سلموا لنا على العقاب ونحن فوق دربكم قريبا باذن الله |
الليلة البطانة غاستا النعاعة دور خبر الرحيل أتواعدوبوا جماعة قاصداها أريل الفودة البضوي شعاعا أحمت عيني تغمد عقربا اللطاعة
Quote: الخير على اقدام الواردين يا ود شيقوق ياخوي ...وشوف الماشين منو ومنو؟؟؟ |
Quote: الله ليك ولي ود المحرب إذ اننا ح نخليكم قاعدين "هون" مع ها السمايم والقهابين
|
أختا الشماتة دي كان الله يرفع قدمك ماتبقى عليك الباقية علينا نحنا ، هسع أنا بديت مسدار السفر فوق سودانير الفي مشيها مخالفة ، سوّتلنا حدثة بقت حكاية وسالفة ، سفرأ بيها عقبان منو تايبة وحالفة ... إت جهزت زاملتك خلاس ؟ نوعا شنو ؟ تايوتا هايونداي ولا تايوتا مستوبيشى ؟ زي ماقال أخونا ودسويلم مسجلك دا ناشولان ( ناشونال) ولا ناشو شنو ؟ أها أبدأ مسدارك وتعال لينا للقنيص السنة الجبل حبارو خريف أبوالسعن سرف وجراد ، ربنا يرفع القدم ويوصلنا ويوصلك بالسلامة . طاري جيتنا ساكت غرق البطانة ... كان وصلناهم يبقي كيف ؟
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: abubakr)
|
قيل في أدب الوداع أن به حزن و لوعة ولواعج بالنفس التى وادعت.. وقيل
أن به خوف من مجهول و رجاء للقاء بعد الغياب.. وهكذا نودع الأديبة
والشاعرة سمية الحسن طلحة.. و إسم طلحة يذكرني بآل طلحة أهل أبودليق
و منهم الأستاذ الوزير محمد يوسف أبوحريرة..فلقب الوزير لا يمحى إن كان
الإستوزار قد منح في عهد ديموقراطي ولقامة سطعت مثل أبوحريرة..فذلك
بيت من البيوت التى شرفت السودان..وكيف لا و قد جاء منه النائب
السيد/ محمد الصديق طلحة...و تشرفت الخرطوم يوما بأن كان رئيسآ
لبلديتها أشاع العدل و الطمأنينة في النفوس بعد أن بعثرها آخرون قبله..
أعزائي ظللت أتابع ما تكتبه سمية من ثلث في الأدب الشعبي {الدوبيت)
وثلث في أدب الكلمة و ثلث في أدب الأخلاق وبقي الثلث الأخير يضئ في الليل
صلاة لا تنقطع للناس و بالناس وبينهما خالق رب للناس يرى ولا يرى {بضم الياء}..
يا راحلآ لأرض البطانة بلغ أهلها كثير السلام فلى فيها صحاب أفتقدهم...
وادعوني مثلكم و لم يؤاذنوني في الرحيل..قالوا شهورآ محدودة و بقيوا
لسنوات..أهاج شاعركم شجونى وهو يلقي قصيدة من أبحث عنه سنينا أنه أبي
و أخي و صديقي{الفرجوني) و الذي طال غيابه عنا العامين فإن لقيتيه
يا سمية فبلغيه السلام و قلى له:
ذكرت غيابك في العيون بتاحت
فاكر دمعتن في يوم وداعك ناحت
يالزول الهميم ترتيب عمايلك فاحت
فاقدين مجلسك و كت المغارب لاحت
***********
أريزونا حرت كايسة المنو بطفيها
الشم كان خوخت لازم النفوس تسليها
بالكلم الجميل والمارقة منك جيها
شاشانا أبدرق بي نظمو كان حاميها
**********
يالهنا يالحبيب مالك عصرت الغيبة
شقيت بالبطانة كايس المرام والصيدة
(راي هوبة) الصعيد الفي (فينكس) منقلبة
شاحد الله الكريم تلقالا نترة وهيبة..
***************
يا سمية هاك قولى الكتير حارياه
درب السلامة عديل للبطانة سماه
بلغي الشاشاى للعارف سطور معناه
كان في (العمارة} الدندر أو في البطانةهناه
العمارة/ عمارة ود البنا في الدندر..
فينكس/ عاصمة ولاية أريزونا الأمريكية وفيها مقام الفرجوني المهجري.
راي هوبة/ شبه الفرجوني حسان إريزونا في مسداره الشهير (شعور بنات
أمريكا} براي هوبة الشتا أي الغزلان حين يحتجبن في فترة الشتاء عن
المراعي في كهوف الجبال..
و أتمنى أن يطيب بك المقام و أن لاتطيل إقامتك في البطانة و يأخذك سحرها
كما أخذ الفرجوني منا..لك التحايا العاطرات و لمتداخلى هذا البوست..
أخوك/ عادل نجيلة/أريزونا
حليلو البسكر كرفنا يوم قالدتنا حروفو
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: abubakr)
|
Quote: ياعرريب انت في قريتكم مافي عمود تلفون ؟؟؟ امشي خت اللابتوب بتاعك تحتو وبعدين سودانيزاونلاين علي طول بتجييك ؟؟ انت بس روح جرب ؟؟ |
انت عارف يا باش ناس سوداتل جونا قبل اربعة سنوات وعملوا البرج العالى بتاعهم في ارض عمنا والغريبة نحن كلنا كنا مبسوطين وعمنا مبسوط شديد وكانت الكرامات وعييييييييييك يا هيصة بمناسبة البرج الطويل ده . وانا قلت ليهم تانى اى حد جايينا غريب وما بعرف الحلة توصفوا ليهو الحلة بالداهيةالطويلةدى .
اها انا جيت راجع من الاجازة ولقيت واحد صديقي في مسقط من اولاد البندر ( ود مدنى ) مبسوط جدا قلت ليهو مالك قال انا بقيت إندى دخل شهرى 3 مليون جنيه وانا سالته قلت ليهو من شنو ؟ قال ديل ناس سوداتل جونا في حلتنا ام سنط ( ديل اهل الفاروق ود حامد) ووقع اختيارهم لارض حقتنا وطلبوا يعملوا فيها البرج وتفاوضنا معاهم واتفقنا على هذا المبلغ .
انا ختيت يدى في راسي وقلت ليهو آآآآآآآآفو افو نحن اتسجمنا مرة واحدة لا طلبنا قرش ولا تعريفة العكس اكرمناهم كرم شديييييييد . قال لى اها خموا وصروا .
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: الطيب شيقوق)
|
يقول عاشق البطانة / عبدالله ودالشريقاوي:: زمناً فيك نقاقير والخيول الصاهلة عرابينك مِدَ بِّتة بالحدوب الماهلة ضعن الشوفتو في طيف الحلم مي ساهلة قدلبو الأقنف أب دومتن مِسرّفة باهلة
كانت بيننا السيدة الحكيمة الأستاذة / فواتح نجيلة في مسقط وكم كنت فخورة بالتعرف لفرد من هذه العائلة العريقة آل نجيلة ، ماكنت أظن أن رؤية طيف عادل نجيلة سهلة ولو في الحلم ( كما أضحت شوفة الفرجوني صعبة المنال لكم فهو الآن يكون ضارب الهمبريب على ضهر الأقنف ) ، وإلا لكنت أعلنت السفر منذ أمد ، ولو كنت أعلم أنك تتابع كتاباتي لنمقت الحروف وأعددت مفتخر الكلم ، فلك الشكر علي ذلك ولي الفخر والإعتزاز بذلك ... أولا : الفرجوني من (عمارة البنا ) ضواحي نهر الرهد...رمية حجر من قريتنا (ودساقرته )، وليس من عمارة الدندر .. ( أود أن أخيب آمال الدندري شيقوق ) ... ثانياً : ناس البادية رايهوبن جمالو طبيعي ماهو دلال.وليس ( ميك آب زي ري هوبة أريزونا ) لذلك ما تلوم الفرجوني لوكان البادية أخدتو عنكم .. البادية دي ياود نجيلة فيها العجب العجاب فيها النـّفسهم فوق للسِماك أتعلت فيها العمرو للجار والعشير ماغلت/ط فيها الفارس الفوق الأغر بتفلّت وفيها خيلا ً بـِردن في المحاصة عكلـّت والشاعر البطحاني / الصديق ودالهادي قال فيهم : بريدكم وأجيب ليكم كلامي صحيح بالغينا ً تعرفوا الكلمة بالتـلويح عند الحارة تب مافيكم الزحزيح تـُقال يوم الصدَف ماكم بريشات ريح ( تصغير بِرِش ) والناس ديل مابطيقوا بلد غير البطانة وبشوفوا نفسهم أحسن حالا من الحضر أي أسياد التكـُل ( المطبخ الحديث ): الليلة المبادِر رَزْ رِخِص سيد التـُكـُل سيد البهايم عَزْ شبلولا الشليل عنز القنانة أم حـَزْ رخت قدم الحمام فوق الرفاعي أب جـَزْ يحكى أن حسّان الحد تزوج إمرأة من الحضر تدعى / دُقاقة / وعندما حلّ موسم الخريف طلبت منه أن يخرِّف معهم ، ولكنه عشق هواء البطانة أكثر من عشقه لدقاقة فكان رده على طلب دُقاقة :ـ حليل أهلي العلي جيهة الدِعين نـُزّال أهلي اللي عشاهم لملمولن نال ... ( للوقود ) رزمي الشول بعد سدر العِشا ما زال أحسن من دُقاقة ورِقـّها البِنجال ثالثاً : سأبلغ أشواقك وتحاياك وغناك للفرجوني وسآتيك برد الجواب بمشيئة الله ومع هذا الثلث الأخير أتركك فى رعاية الله إلى لقاء بإذن الله .
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: الطيب شيقوق)
|
الاستاذ مدني العرضى الحسين ينعى سودانير
Quote: بينما كان المسافرون السودانيون بدول الخليج يتظرون قدوم الطائرة الميمونة من الخرطوم على مدى شهر كامل وتتأجل الرحلة كل مرة وأصبح حالهم في المطارات كحال المعلقين في معبر رفح ، فجأة قطع التليفويون برامجه وأطل المذيع برأسه وعلى أنغام موسيقى حزينة وأعلن.
"بسم الله الرحمن الرحيم ، إنا لله وإنا إليه راجعون ، لقد جاءنا الآتي من إدارة سوانير الطيران: أيها المواطنون الثوار الأحرار ننعي لكم طائراً وطنياً من أقوى الطيور وأشجع الطيور ، أنعي لكم من المحيط إلى الخليج الخطوط الجوية السودانية والتي فاضت روحها إلى بارئها عصر اليوم الخميس أثر علة لم تمهلها طويلاً. هذا وسوف يقام العزاء بحي المطار والجزيرة اسلانج وسننقل لكم الآن مراسيم تشييع الجثمان على الهواء مباشرة من حي المطار ومقابر الجريف شرق.
يدخل مذيع الربط. أيها المواطنون السلام عليكم ورحمة الله ، أرى أمامي جمهور غفير من المواطنين جاءوا من كل حدب وصوب للمشاركة في وداع ناقلنا الوطني إلى مثواه الأخير. هذا وقد اصطف أمام السرداق المقامة عدد كبير من النافذين والمسئولين في مجال الطيران لتقبل العزاء ، كما ألاحظ الآن قدوم الأخوة كتاب الأعمدة في الصحف اليومية وبعد تقديم واجب العزاء أخذهم أحد المسؤولين إلى حيث يسجى الجثمان لقراءة الفاتحة وإلقاء النظرة الأخيرة.
كما ألاحظ أن المسؤول النافذ قد دخل في نقاش مع كتاب الأعمدة وأكد لهم أن التقرير عن أسباب الوفاة أشار إلى الوفاة طبيعية ونتيجة لسكتة دماغية ناتجة عن ضغط الركاب وزيادة العفش وأن أي إشاعة عن عدم وجود البنزين أو قطع الغيار بسبب المقاطعة أو الخوف من الحجز بسبب الديون أو وجود خلاف مع المستثمر الجديد لا أساس لها من الصحة. في هذا الإثناء لاحظ المسؤول امتعاضا خفيفاً على وجه أخونا عثمان ميرغني فتوجس خيفة وفي الحقيقة أن الأخ عثمان قبل المجئ إلى العزاء كان قد اتصل بالمهندس الذي أعد التقرير عن سبب الوفاة والذي يختلف تماماً عن الذي ذكره المسؤول النافذ بل ما اشيع هو الحقيقة وقد سلمه ذلك المهندس صورة من التقرير وترجاه ألا يقوم بنشره إلا بعد أن يسافر إلى إحدى دول الخليج بعد أن تسلم عقداً مجزياً خلصه من سيف الخصخصة المسلط على رقابهم. وبالفعل انتحى الأخ عثمان بزملائه جانباً وأخبرهم بموضوع التقرير وكده وطلب منهم عدم إثارة الموضوع في أعمدتهم تقديراً لظروف ذلك المهندس ومن ثم عاد الجميع وجلسوا في الصفوف الأمامية ، وقد تلاحظ أن هنالك اهتمام غير عادي من المسؤولين بكتاب الأعمدة. بعد قليل جاء ممثلوا الخطوط الجوية الأجنبية لأداء واجب العزاء ما عدا طيران الـ pan American لزوم المقاطعة وكده. كما تلاحظ غياب الشريك الأكبر تماماً وذلك من "باب شهر ما عندك فيه نفقه ما تعد أيامه"
أيها المواطنون الآن أرى أمامي عربة تجرها الخيول وبعض منسوبي قوات المطار ويبدو أنه ستكون هناك مسيرة جنائزية تتقدمها الخيول الكويتية التي استجلبت لهذا الغرض مع الألحان الحزائنية ، وقد جاءني الآن على التو خبر مفاده أن التشييع قد تأخر إلى صباح الغد لتوقع وصول عدد كبير من المسئولين في قوات الهجين وأمين عام الأمم المتحدة والرئيس شافيز فإلى الغد.
وفي صباح الغد صدرت جميع الصحف موشحة بالسواد وقد اكتفى كتاب الأعمدة بإشارات خفيفة إظهاراً للحزن. وخوفاًُ من المادة 130 إجراءات التي أطلت برأسها تحسباً لأي انفلات صحفي ففي عمود السوادني كتب عثمان ميرغني ((المرحومة انتحرت أم نحروها)) أما الأخ البوني في عموده خفيف الظل فاكتفى بالآتي:
"مسكنية ماتت لا يدها لا كراعها ودفن الليل أب كراعاً بره والمادايرنا ما إركبنا".
أما الأخ زهير السراج فبعنفوانه الصحفي ومقالاته النارية وكده صدر مقاله بعنوان:
"ما دايرلك الميتة أم تراباً شح ودايرك يوم لقا السحاب إكتح "
أما أستاذنا محجوب في عموده أصداء بالأيام فقد كتب " ليس دفاعا عن سودانير ولكن من كان منكم بلا خطئيئة فليرمها بحجر.
أما عمنا التجاني في عموده بالميدان فكان العنوان : " مشيناها خطى كتبت علينا ومن كتبت عليه خطى مشاها" .
أما الكاتب الجميل حسين خوجلي فكان عنوان عموده في ألوان:
" أذكروا محاسن موتاكم اللهم إن كانت مسيئة فتجاوز عن سيئاتها.
وهذا وقد أجرى التليفويون مقابلات مع بعض الزعماء فكان رد فعلهم كألآتي:-
القائد الأممي: ما قلنا الما بعرف ما تدوه يغرف بكسر الكاس ويعطش الناس.
أما الزعيم التجمعي
فأبرق الإدارة " لكم العزاء ولنا الأسهم
الأخوة المواطنون
نعود مرة أخرى لللنقل لكم مراسيم الدفن وفاصل ونواصل
|
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: Mohamed Abdelgaleel)
|
مرحب العزيز ود العزاز عثمان موسي طرينا المطر أب رزاز وإنتو هناك ياالعزاز بعيدين عن الوطن الله يرد غربتكم .
العزيزة / عقاق أبوحريرة للسمحين معاك ماخليت سماحة شتلات الأماني إنت زهور صباحا عاوزين نحكي ليك ومالاقيين صراحة يالبعد زادني شوقا و ودا ... كلنا دارفور وحملة وليد دارفور أخدتكم عننا.. منورة ياست الكل .
الطائر السواح / رجاء العباسي حمدالله علي سلامة العودة من بلاد الشام تسلمي ياأميرة وشكرا لك على الدعوات ليك السلام ماحن مفارق الأوطان يخضب بنانك حنة وفي الوريد قيطان .
أخى الكريم محمد عبد الجليل أنت تعنى لي الكثير في هذا المنبر والمنبر بدون رجاحة عقلك وثقلك لايسوى جناح بعوضة ، أمثالك أوتاد ومراسي لا ثبات لنا بدونها .. تقبل الله منك صالح الدعاء ويبلغ سلامك وتحاياك لأهل البطانة .
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: abubakr)
|
Quote: اها كان بناتي قالن لي اشرح الفوق دة اسوي شنو ؟ اكون ساقط فصيح ودارجي ؟
|
سلام على أبي بكر وبناته بلا إنفصام .. لنا عظيم الشرف بإنضمام هذه النخبة إلينا ، ونشرح كلام البدو لبناتك ولو كان فينا أبكم لأستنطقناه لهن ... : الليلة المبادر رز : يعني الشاعر المطر البدرى ، رز: من الرزيز أي صوت الرعد رخص سيد التكل سيد البهايم عز : سيد التكل المقصود به الحضري المقيم الذي له تكل أو مطبخ ثابت لايترحل ، وسيد البهايم المتجول مع بداية المطر يعتز بحالته تلك شبلولا الشليل عنز القنانة أم حز : أن تشبل الشىء هو أن تعلقه أو توصله بآخر كما نشبل الزمام ( الذي يستخدم زينة للأنف ) بالرشمة ( وهي سلسلة تخفف ثقل الزمام على أنف العروس وتعلق أو تشبل في الأذن أو الرأس ) الشليل : زينة تعلق علي الناقة التي تحمل هودج الحسناء ، وتصدر صوت شليل ( تكشكش ) مع حركة سير الدابة عنز القنانة أم حز : وصف الحسناء التى شُبِل لها الشليل ، بالعنز أي الصيدة التى ترعي بمنطقة القنانة ،والحز سواء في العنق ( الجيد ) أو الأيادي دليل العافية والصحة التمام رخت قدم الحمام فوق الرفاعي أب جز : هذه الحسناء وضعت قدمها الذي هو قدم حمام فوق أجمل وأكثر الإبل أصالة ألا وهو الرفاعي ... ولكم أطيب المنى .
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: abubakr)
|
Quote: ودساقرتة دي ياأبو عبدالله بوستك دا مابصلا فوق ضهر غوغل إلا فوق ضهر العنافي الماصع ، وهاكم صورة من هناك علي لسان عبدالله ود المرضي :
المحريب فتق وسيد الضعاين يكش يقرقر كيرو يمصع وفوق قفاه يرش اللرض خدرا والسما فوقا باهل بش والسعن أب ودع لا النافلة ستو تخش
عرب الفي المقاطع بشبه الجديان توتلوا فوق ضهور من مسيَل الوديان عدّوا الضحوة عذّيل في البقر والضان ألبل راتعة شول تتمارح الحيران |
آآآآآآآ بت طلحة ود ساقرتة دى مكمنة في خراشة ؟
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: salma subhi)
|
Quote: شكرا للفزع .. ولكن المتعارف عليه أن مكان الكمين بهذا الوصف هو : الخشّة بضم الخاء وتشديد الشين .. وهي الأشجار الكثيفة .. أنسب مكان للكمين .. وقدتغنى خلف الله حمد ب /أسد الخشش الضرية ، الكابي فوق الولية ، ياليلة ، ودالعز والبنية.. كما أن البلتب هو البتق بضم الباء وتشديد التاء .. وهو فعلا الشجيرات الصغيرة ولاتصلح للكمين بل لرعي المواشى الصغيرة أغنام وأبقار اللبن بجوار القرية ، وكذلك كحطب للوقود . |
والله يا بت طلحة انت عجيبة ومرجع حقيقي في طبيعة بيئة البداوة انا بالجد متوقع يكون تعقيبك بهذا الشكل - لم يكن امتحان من قبلي ولكنها سذاجتي المتعمدة للتنقيب عن مواطن الابداع فيكم .
لك اطيب المنى
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: الطيب شيقوق)
|
سمسمة !!!
تروحي وترجعي بالسلامة ,,,
أهدي إليك هذه الأبيات ..
أخاف أن تمطر الدنيا , ولست معي
فمنذ رحت , وعندي عقدة المطر ..
كان الشتاء يغطيني بمعطفه
فلا أفكر في برد , ولا ضجر
وكانت الريح تعوي خلف نافذتي
فتهمسين " تمسك .. هاهنا شعري .."
والآن أجلس , والأمطار تجلدني
على ذراعي , على وجهي , على ظهري
فمن يدافع عني , يا مسافرة ؟
مثل اليمامة بين العين والبصر
وكيف أمحوك من أوراق ذاكرتي ؟
وأنت في القلب مثل النقش في الحجر
أنا أحبك .. يا من تسكنين دمي
إن كنت في الصين أو كنت في القمر
ففيك شيء من المجهول أدخله
وفيك شيء من التاريخ والقدر ..
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: Rabab Elkarib)
|
الاخت الكريمة رباب الكارب
Quote: ودارنا ترحب بك فى اى وقت اذا سمحت ظروفك
'يوم الثالث من اغسطس يقدم عمل مسرحى على خشبة ذلك المسرح' |
الاخت سمية معكم الان في السودان وسوف تبلغ بندائكم وحتما انتم معشر الكارباب متميزون بالحضور ولذا كانت الدعوة في وقتها للاخت سمية التى عهدنا في مسقط ثاقبة الفكر ومجيدة لحديث المنابر سواء في ادب البطانة او الادب الروحي .
ظني انك من اسرة آل الكارب مؤسسة مذاهب الفكر والقانون والسياسة في السودان .
لك منى اطيب المنى
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: Rabab Elkarib)
|
الاخت الكريمة رباب الكارب
Quote: ودارنا ترحب بك فى اى وقت اذا سمحت ظروفك
'يوم الثالث من اغسطس يقدم عمل مسرحى على خشبة ذلك المسرح' |
الاخت سمية معكم الان في السودان وسوف تبلغ بندائكم وحتما انتم معشر الكارباب متميزون بالحضور ولذا كانت الدعوة في وقتها للاخت سمية التى عهدنا في مسقط ثاقبة الفكر ومجيدة لحديث المنابر سواء في ادب البطانة او الادب الروحي .
ظني انك من اسرة آل الكارب مؤسسة مذاهب الفكر والقانون والسياسة في السودان .
لك منى اطيب المنى
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: الطيب شيقوق)
|
Quote: الاخت سمية معكم الان في السودان وسوف تبلغ بندائكم وحتما انتم معشر الكارباب متميزون بالحضور ولذا كانت الدعوة في وقتها للاخت سمية التى عهدنا في مسقط ثاقبة الفكر ومجيدة لحديث المنابر سواء في ادب البطانة او الادب الروحي .
ظني انك من اسرة آل الكارب مؤسسة مذاهب الفكر والقانون والسياسة في السودان .
لك منى اطيب المنى |
تحياتى اخ الطيب
ودهنى اشكرك على نبيل كلماتك فى حق اسرتنا
تعرفت انا على سمية هتا فى المنبر وخبرت حبها للشعر والكلام
وتعرفت هى عل صلحة الكارب شقيقتى 'رحمها الله رحمة واسعة' فاحبتها واحبت شعرها..
وددت لو زارت سمية المسرح بحنتوب..
تنويه/ الثان من اغسطس (الخميس) اول نشاط مسرحى متكامل
لك ودى / رباب
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: Rabab Elkarib)
|
الاخت رباب بنت الكارب
Quote: ودهنى اشكرك على نبيل كلماتك فى حق اسرتنا
تعرفت انا على سمية هتا فى المنبر وخبرت حبها للشعر والكلام
وتعرفت هى عل صلحة الكارب شقيقتى 'رحمها الله رحمة واسعة' فاحبتها واحبت شعرها |
..
كيف لا اختى الرباب وانتم مظهر من مظاهر الحضارة ليس في مدنى فحسب وانما في ربوع بلادنا ولا غرو فامين والتيجاني من الذين اعرفهم فقط من هذه الاسرة قامتان شامختان وتاجا وقار يتلألآن في هامة الوطن .
احيي يا رباب اخى بكرى ابو بكر الذى صنع لنا سبل التواصل والتعارف عبر هذه النافذة الاسيرية .
لك منى اطيب المنى
شيقوق
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: Rabab Elkarib)
|
الاخت رباب بنت الكارب
Quote: ودهنى اشكرك على نبيل كلماتك فى حق اسرتنا
تعرفت انا على سمية هتا فى المنبر وخبرت حبها للشعر والكلام
وتعرفت هى عل صلحة الكارب شقيقتى 'رحمها الله رحمة واسعة' فاحبتها واحبت شعرها |
..
كيف لا اختى الرباب وانتم مظهر من مظاهر الحضارة ليس في مدنى فحسب وانما في ربوع بلادنا ولا غرو فامين والتيجاني من الذين اعرفهم فقط من هذه الاسرة قامتان شامختان وتاجا وقار يتلألآن في هامة الوطن .
احيي يا رباب اخى بكرى ابو بكر الذى صنع لنا سبل التواصل والتعارف عبر هذه النافذة الاسفيرية .
لك منى اطيب المنى
شيقوق
| |
|
|
|
|
|
|
Re: الملكة سمية الحسن طلحة من مسقط الى ارض البطانة لقضاء اجازتها السنوية دعواتكم لها بالسلامة (Re: Rabab Elkarib)
|
الاخت رباب بنت الكارب
Quote: ودهنى اشكرك على نبيل كلماتك فى حق اسرتنا
تعرفت انا على سمية هتا فى المنبر وخبرت حبها للشعر والكلام
وتعرفت هى عل صلحة الكارب شقيقتى 'رحمها الله رحمة واسعة' فاحبتها واحبت شعرها |
..
كيف لا اختى الرباب وانتم مظهر من مظاهر الحضارة ليس في مدنى فحسب وانما في ربوع بلادنا ولا غرو فامين والتيجاني من الذين اعرفهم فقط من هذه الاسرة قامتان شامختان وتاجا وقار يتلألآن في هامة الوطن .
احيي يا رباب اخى بكرى ابو بكر الذى صنع لنا سبل التواصل والتعارف عبر هذه النافذة الاسفيرية .
لك منى اطيب المنى
شيقوق
| |
|
|
|
|
|
|
|