|
|
 بيتنا زمان..
|
الحبيبين كيفنكم
جيت جري من المدرسة لابس الرداء الكحلي والقميص اللبني... وكتين وصلت مربعنا لقيت قندران ابوي واقف..
قلت في نفسي يا ربي يكون كان شاحنلو فتريتة ولا عيش. باقي الحمام أليلي من امبارح ما رميتلو شيتا ياكلو..
والجداد تراهو ياكل في نوار القش مع الغنم في المراح المن تالا ناس أم النصر..
طلعت في الترلة لقيتلكم الفتريتي مشتتة مالي الدنيا... واااااجيدلي يبقالي مع راس القندران بملالي شوال... يعني سبوعين والحمام أليلي ياكل ويحمد ربه..
جريت سلك الباب ودخلت رميت الخُرتايي في عنقريب في البرندة وشلتلي جردل ومقشاشة وأمي صاقعالي: انت متين جيت لامن داير تمرق تاني
قلتلا: ماني مارق شي داير احصل اسقي الغنم واشتت العيش للحمام والجداد... باقي الجدادي البُني تكضكض باقيلي دايري تركض
خميت يا الحبان الفتريتي وبقيت امشي وأجي لامن مليتلي شوال وتكلتوا جنب المراح أليل الغنم.. وشلتلي طرادة من أمي ومشيت علي موسى بتاع القش
وقلتلو: بي طرادة يا عم موسى لكن شوفلي الفيهو النوار فشان الجداد خليتو يكاكي داير يرمي البيض في الزير المكسور في الركن.. عمنا موسى ضحك وربطلي القش
وجيت مخمخمو وماشي أغني.. لاقتني خالتي بثينة قالتلي ما شوفتة جمال يجي يجيب القش للغنم ديل.. قلتلا خليتو يلعب في كورة الشراب جنب المدرسة
قالتلي: الله يقلعوا الولد دة من هو يرضع في شطري معذبني.... ضحكت ومشيت خليتها..
بالله الغنم ديل شافني بس بقن يكوركن.... ميع ميع ميع ميع وانا صاقعلهن: أصُبرِن اللملا الجردل موية فشان تشربن وتاكلن..
صنقعت علي الغنمايي السوداء وقلتلا: ان بقيتي ما تقلتي شي الشهر دة ابوي بيمسكك يبيعك لي عبد الجبار الجزار.. وأنا طالع حدرت للتيس الكبير..
دخلتلن المويي وشريتلهن البرسيم وجاء الجداد وسطن يكاكي وياكل في النوار لكن الجداد البنيي ما جات طالعي والديك اللحمر وعندو ريشايتين صُفُور واقفلها في خشم الزير
يمد في جناحو مع رجلو اليمين ويكاكي زي صفاقين عثمان اليمني وكتين يهيجوا... قلتلو: اييي الخرابي باقيلي ركضت خلها لا تكسر علينا البيض أمش علي التانيات
طلعت لي برج الحمام ومليت الكوريي فتريتة... لقيت الضكر البني علي الرقيطة قاعد فوق الصفيحي وشغال يسوي في «غووووووغ غوووووووووغ غووووغ»
قتلو أصبر الزغاليل خلاص كبرن وباقيلي أمي آآآبتفويتن الجمعة دي وبعداك أن بقيت داير تدخل علي مرتك أدخل..
صنقعت علي الحمامة الرمادية لقيت معاها الضكر أليلا يغوغي ويرفع وينزل في جناحو ويزغد فيها باقي ليهن تلاتة ايام من شلنا زغاليلم...
قلت كدي شتَتلم الفتريتي بالله جوا ينطايروا من الصفايح زي قِطيع الصبيط في حش التمُر...
نزلت مشيت شلتلي جردل ومشيت جنب بيت عمنا مكاوي باقي الايام دي يبيضوا في بيتهم مليت جردلي رملة وجيت داخل الأوضة ألتنا
فرشت الرملة تحت عنقريبي وسويتها مدورة... امي جات داخلي قالتلي انت قاعد تصوت في شنو.. قلتلا الجدادي البُنيي ركضت وداير أجيبها هني
قالتلي: يا ولدي بتوســـخ علينا الاوضة وأخواتك يقومن ينقنقن... قلتلا: يمة البرد هناك وإن بقيت ما شفتلا بُكانا سخن البيض دة آآآبيفقس شي.. بشوفلي دبارة أربطها بيها في كراع العنقريب
مشيت نقلت البيض من تحتها في الزير وجبتو ختيتو في الرملة وقبضت الجدادي جبتها ختيتها في الاوضة وقفلت الباب فشان ألقالي دبارة أربطها بيها... ما لقيت غير تِكي قديمي ألت أبوي
جيت مسكتها ربطها مع كراع العنقريب المن تالا مخدتي فشان من تصبح وافتح عيني أقوم أتبنها وأشوف إن بقى فقست البيض...
ليلي ونهاري من مراح الغنم لي برج الحمام لي الجدادي الراكضي وبالليل وكتين امي تجي تمسحني بالجلسرين وكتين أقولها ماني داير اتمسح..
تقولي: شوف وشك كله مليان قشروب ورجلينك ديل دمهن والله ما تتمسح اشيل الجدادي دي ارجعها للزير وسط المراح...
باقي عارفاني مستني متين تطلع السواسيو... اسكت اتمسح بي جلسرين الجن دة وادنقر راسي من العنقريب واقعد اتونس مع الجدادي:
باقيلي ليكي مدة ما شربتي.. امشي أملالي كوز صلصة موية واخته جنب راسها وتقوم كدي تنقدني في اصبعي واقعد أضحك..
.....
|
|
 
|
|
|
|
|
|
|
 Re: بيتنا زمان.. (Re: ادريس خليفة علم الهدي)
|
متعة يا ود جبريل ما بعدها متعة
أما هنا
دخلتلن المويي وشريتلهن البرسيم وجاء الجداد وسطن يكاكي وياكل في النوار لكن الجداد البنيي ما جات طالعي والديك اللحمر وعندو ريشايتين صُفُور واقفلها في خشم الزير
يمد في جناحو مع رجلو اليمين ويكاكي زي صفاقين عثمان اليمني وكتين يهيجوا... قلتلو: اييي الخرابي باقيلي ركضت خلها لا تكسر علينا البيض أمش علي التانيات.
دي هنا تصوير ديجيتالي
واصل ..
تحياتي
| |
|
|
|
|
|
|
|
|
|
Re: بيتنا زمان.. (Re: ابو جهينة)
|
Quote: متعة يا ود جبريل ما بعدها متعة
أما هنا
دخلتلن المويي وشريتلهن البرسيم وجاء الجداد وسطن يكاكي وياكل في النوار لكن الجداد البنيي ما جات طالعي والديك اللحمر وعندو ريشايتين صُفُور واقفلها في خشم الزير
يمد في جناحو مع رجلو اليمين ويكاكي زي صفاقين عثمان اليمني وكتين يهيجوا... قلتلو: اييي الخرابي باقيلي ركضت خلها لا تكسر علينا البيض أمش علي التانيات.
دي هنا تصوير ديجيتالي
واصل ..
تحياتي |
اوووووه الريس ابو جهينة
تعرف يا حبيب حركة الديك كانت بتكيفني شديد خلاص
بتحس بيه مسيطر على الجكس حقه
| |
|
|
|
|
|
|
|
|
 Re: بيتنا زمان.. (Re: طارق جبريل)
|
طارق
سلامات
مما الجدادة تركض وتسوي كت كت انا بقعد احسب في الخمستاشر يوم عشان تفقع
لكن كمان عندي شفقة شديدة نقرة البيضة كدي تاني انا شغلي الشاغل اشوف السوسيو
امشي الزير اشرب موية واجي راجع والجدادة تسوي كت كت كت ادخل ايدي واخد نقدتني واطلع البيضة
وتكون لسع البيضة ما انفقشت بس اياها النقرة اللولة اقوم يا سيد اللمتني ليك اساعد سوسيوي شوية
اقرف البيضة بسيييط واخت البيضة تحت الجدادة وامش واجيهو راجع متلاعب ليس الا ما موضع مطامع
لكن يا حسرة يموت السوسيو اللول غالبا جراء هذه الشفقة الشديدة واشيل السوسيو واسوي ليهو ود ابقرعة قوم ارعى ولا حياة لمن تنادي
| |
|
|
|
|
|
|
|
|
|
Re: بيتنا زمان.. (Re: عبدالله ود البوش)
|
يا طارق
سلامات تاني وتالت وطوالي سداري
مرات بكون نايم بالليل وفجأة اقوم ناطي لاني عرفت جدادتي فقعت
قول لي عرفتها كيف ؟
حاجة غريبة خلاص بالممارسة ياخي وات زول بطري
شفت كيف الجدادة لحظة تفقع بيضة واحدة صوتها بتغير
طوالي بدل ما كان كك كك كك ساعة الركضان ابقى كتتتت كتتتت كتتت عشان تعلم السواسيو اكل العيش
بعدما ما تكسرو ليهن .... حاجة عجيبة
خرا حمام خرا جداد خرا حمام خرا جداد ..... يلتف الساعد بالساعد ... طفولة شقية
.
.
.
يا طارق نبه القاري الكريم لفروق اللهجة عشان ما اتجهجه
| |
|
|
|
|
|
|
|
|
|
Re: بيتنا زمان.. (Re: ادريس خليفة علم الهدي)
|
Quote: حق لود البوش أن يرتع في ضل ود جبريل
|
بهايمنا برتعن لكن يا ادريس ما شايف ضل كلو كلو محل الرتعان دا مافي شدر
ناس الصعيد محل ارتعن بهايمنا مافي شدر كلو كلو يا ادريس
لكن برتعن واطقن الجرة في الحر سااااااهي وراعيهن اغني
.
.
ود الباع جملو يا ادريس كان سارح ببهايمو بين تقنت القطن واب عشرين التلات النايم
البهايم شبعت ورتعت جا فوقو ود الضواها كورك فوقو يا عيفة يا تليفة البهائم دي كان دخلت
القطن المرشوش ادنرين امس القريبة دي بتلحقا الغتس
.
.
خلاهو بعد مشى منو بعيد بحيث انو يصعب رجعو
عووووووووك قول حرقتك الرتعة دي ساهي
.
.
النصيحة السرحة وسط الحواشات مضرة لكن كمان الجهلا بدورو اللبن واللبن عند سيد اللبن
وسيد اللبن بدور مفتاح بيت اعرس فيهو والرواعية تفكيرن كلو عرس ...
ود الباع جملو دا دائما يرسم في بيت عرسو في شارع المفتش يرسم البيت والتكل وبيت الجداد يا طارق
مهم خلاس عند ود الباع جملو وقبل ما يكمل احلامو موريس المفتش يدهس احلام ود الباع جملو
بيت العروس والعروس بخورسا والحسرة الشفع اشيلن في عجاجو واقوم
اخلي ليك ود الباع جملو اكورك
عااااك يا الكارب صليبو اسوي واسوي لامك
قابضا ساعد اليسرى بكف اليمنى شان اعسر ملولحا بها في اشارة خبيثة جدا
| |
|
|
|
|
|
|
|
|
|
Re: بيتنا زمان.. (Re: عبدالله ود البوش)
|
الاخ طارق و ضيوفه الكرام
لكم التحايا و التقدير
و العجب لامن البابور تصفر و هى داخلة على المحطة الواحد يجرى على الكفاى و يختف ليه فروجة و الله ديك و جرى على المحطة
تكون واقف كدة يجيك واحد من البحارة و يديك عشرة و الله خمستاشر قرش تختهن فى جيب الساعة و العجب كان بقن اشلان عشان يكشكشن
تمشى تتبختر و تغشى الدكان تشترى طحنية و تجى تقعد فوق القوز تاكلها
لك الشكر
| |
|
|
|
|
|
|
|
|
|
Re: بيتنا زمان.. (Re: حيدر بشير)
|
نرجو وضع هوامش للترجمه والشرح للناطقين بغيرها والمولودون خارج السودان 
..............
متعه في السرد واستخدام العاميه يا ود جبريل
| |
|
|
|
|
|
|
|
|
|
Re: بيتنا زمان.. (Re: حيدر بشير)
|
Quote: الاخ طارق و ضيوفه الكرام
لكم التحايا و التقدير
و العجب لامن البابور تصفر و هى داخلة على المحطة الواحد يجرى على الكفاى و يختف ليه فروجة و الله ديك و جرى على المحطة
تكون واقف كدة يجيك واحد من البحارة و يديك عشرة و الله خمستاشر قرش تختهن فى جيب الساعة و العجب كان بقن اشلان عشان يكشكشن
تمشى تتبختر و تغشى الدكان تشترى طحنية و تجى تقعد فوق القوز تاكلها
لك الشكر
|
يا سلااااام يا سلااااااااااام
حليل الزمان وحليل الهجيري وكفاي الجداد
ود بشير نعلك طيب
| |
|
|
|
|
|
|
|
|
|
Re: بيتنا زمان.. (Re: عبدالله ود البوش)
|
Quote: معليش يا طارق
جاني احساس باني خسيت البوست دا
واصل ياخي حروفك المدهشة الناس في انتظارها
تحياتي وتقديري
|
يا حبيب الكع الكع بس
ما تكتر النضم شي
ابقى داخل
| |
|
|
|
|
|
|
|
|
|
Re: بيتنا زمان.. (Re: عبدالله ود البوش)
|
Quote: بهايمنا برتعن لكن يا ادريس ما شايف ضل كلو كلو محل الرتعان دا مافي شدر
ناس الصعيد محل ارتعن بهايمنا مافي شدر كلو كلو يا ادريس
لكن برتعن واطقن الجرة في الحر سااااااهي وراعيهن اغني
.
.
ود الباع جملو يا ادريس كان سارح ببهايمو بين تقنت القطن واب عشرين التلات النايم
البهايم شبعت ورتعت جا فوقو ود الضواها كورك فوقو يا عيفة يا تليفة البهائم دي كان دخلت
القطن المرشوش ادنرين امس القريبة دي بتلحقا الغتس
.
.
خلاهو بعد مشى منو بعيد بحيث انو يصعب رجعو
عووووووووك قول حرقتك الرتعة دي ساهي
.
.
النصيحة السرحة وسط الحواشات مضرة لكن كمان الجهلا بدورو اللبن واللبن عند سيد اللبن
وسيد اللبن بدور مفتاح بيت اعرس فيهو والرواعية تفكيرن كلو عرس ...
ود الباع جملو دا دائما يرسم في بيت عرسو في شارع المفتش يرسم البيت والتكل وبيت الجداد يا طارق
مهم خلاس عند ود الباع جملو وقبل ما يكمل احلامو موريس المفتش يدهس احلام ود الباع جملو
بيت العروس والعروس بخورسا والحسرة الشفع اشيلن في عجاجو واقوم
اخلي ليك ود الباع جملو اكورك
عااااك يا الكارب صليبو اسوي واسوي لامك
قابضا ساعد اليسرى بكف اليمنى شان اعسر ملولحا بها في اشارة خبيثة جدا
|
هييييييييييييييييع الكع الكع
| |
|
|
|
|
|
|
|
|
|
Re: بيتنا زمان.. (Re: عبدالله ود البوش)
|
Quote: يا طارق
سلامات تاني وتالت وطوالي سداري
مرات بكون نايم بالليل وفجأة اقوم ناطي لاني عرفت جدادتي فقعت
قول لي عرفتها كيف ؟
حاجة غريبة خلاص بالممارسة ياخي وات زول بطري
شفت كيف الجدادة لحظة تفقع بيضة واحدة صوتها بتغير
طوالي بدل ما كان كك كك كك ساعة الركضان ابقى كتتتت كتتتت كتتت عشان تعلم السواسيو اكل العيش
بعدما ما تكسرو ليهن .... حاجة عجيبة
خرا حمام خرا جداد خرا حمام خرا جداد ..... يلتف الساعد بالساعد ... طفولة شقية
.
.
.
|
تعرف يا ود البوش الجدادة لمن تحس انه ساكني البيض خلاص بقوا مارقين التون بتاع الكتكتة بيتغير
وأول سوسيوة تطلع دي يا زول بتخل الكتكتة راقدة خل
خصوصا لو في حب عيش جنبها وقاعدة تدرش فيهو وتخته للسوسيو
الله ياخي علي عوالم السواسيو دة ياخي
Quote: يا طارق نبه القاري الكريم لفروق اللهجة عشان ما اتجهجه
|
يا حبيب انا بكتب باللهجة الشايقية وبحاول اشكل الحروف
بس ان بقى مافي شيتا مفهوم بنشرح
| |
|
|
|
|
|
|
|
|
|
Re: بيتنا زمان.. (Re: عبدالله ود البوش)
|
Quote: طارق
سلامات
مما الجدادة تركض وتسوي كت كت انا بقعد احسب في الخمستاشر يوم عشان تفقع
لكن كمان عندي شفقة شديدة نقرة البيضة كدي تاني انا شغلي الشاغل اشوف السوسيو
امشي الزير اشرب موية واجي راجع والجدادة تسوي كت كت كت ادخل ايدي واخد نقدتني واطلع البيضة
وتكون لسع البيضة ما انفقشت بس اياها النقرة اللولة اقوم يا سيد اللمتني ليك اساعد سوسيوي شوية
اقرف البيضة بسيييط واخت البيضة تحت الجدادة وامش واجيهو راجع متلاعب ليس الا ما موضع مطامع
لكن يا حسرة يموت السوسيو اللول غالبا جراء هذه الشفقة الشديدة واشيل السوسيو واسوي ليهو ود ابقرعة قوم ارعى ولا حياة لمن تنادي |
اندااااااااح يا ود البوش النبي فيك اندااااااااااح ياخي
| |
|
|
|
|
|
|
|
|
|
Re: بيتنا زمان.. (Re: طارق جبريل)
|
| Quote: اندااااااااح يا ود البوش النبي فيك اندااااااااااح ياخي |
ود جبرين انا ماداير تخسم .... براي بندح تور اندح
بتعرف ود العرب البتكل فوق الشعب لقولة فلان كعب ؟
.
.
كدي اول حاجة بتشكل الحروف كيف ؟
لانو كلامي دا واحد من اتنين يا عروبي يا كمان ببقى للتانيين كلام الطير في صقيعة سلامة
.
.
ات واصل يا طارق وانا بعمل ليك فاصل غنائي بين الحين والاخر
.
الجداد لمن اشوف او اسمع حاجة غريبة بقوم اكاكي كاك كاك كاك كاك
عمنا اب سروال ( اسمو اب سروال عشان مابلبس سروال ) ترجم هذه الصيحات بالاتي :
قال الجداد بقول :
الجداد شقاوتو شقاوة كاك كاك كاك
الضيف البجي اضبحولو الجداد الجداد شقاتو شقاوة كاك كاك
الشافع الببكي اسكتو بجنا الجداد ( مع انو الشافع الببكي بندقو عشان اسكت )
الجداد شقاوتو شقاوة كاك كاك
وذلك بنغمة موسيقية مموسقة لا ادري ان كنت اوصلتها بهذه الحروف المعولقة
ام غتست السوسيو في تيبار العجين
.
.
يا ود جبرين ياخي السوسيو دا يطلع من البيضة جميل وقيافة وايضا كذلك في ايامه الاولى
ولكنه عند خروجه للشارع العام والتعاطي مع الحياة يصبح مسخا ممسوخا
هل هذه حالة جميع السواسيو ام انه حالة استثنائة يتميز بها السوسيو السوداني
ياخي السينات دي سجت سنوني سج مع المعذرة للقاري الكريم من هكذا سجا مسجوجن
| |
|
|
|
|
|
|
|
|
|
Re: بيتنا زمان.. (Re: ادريس خليفة علم الهدي)
|
| Quote: سؤال لي عمي ودالبوش .... دحين التيس كان اتهور ... الغنماية بولدوها كيف ؟ |
ادريس ولدي ( يا ورور ) مع احترامي ليك لكن لفضك عاجز
اسع البلم الجن علي السرحة شنو ؟
التيس كان اتهور العنز بتلد العجب امو يا ادريس
هههههههههههههه
.
في حلتنا عندنا تيس اسمو الترابي لمن مات ستو ضربت السكلي والردحي و قالت الترابي مات
الجماعة دخلتن خلعة
.
.
ادريس اقول ليك حاجة اقرأ واسكت ... ما تشوت ضفاري وتخرب الرصة
وتبقى زي ديك العدة الراكي في الكربيتة كان خلوهو بكسر العدة وكان نهروهو بكسرا
| |
|
|
|
|
|
|
|
|
|
Re: بيتنا زمان.. (Re: طارق جبريل)
|
Quote: ادريس اقول ليك حاجة اقرأ واسكت ... ما تشوت ضفاري وتخرب الرصة
وتبقى زي ديك العدة الراكي في الكربيتة كان خلوهو بكسر العدة وكان نهروهو بكسرا |
عمي ود البوش
كيف ما أديكن عليكم ... ات عارف ود أخوك زول سعية
مرة جاني ضيف فجاءة .. قمت علي الكر سحبت لي ديكين .. لاقتني حبوبتي رحمها الله قالت لي يا الهوين بتكرم ضيفك بالطير
أمشي علي الزريبة شوفلك عبلوق.
خارج النص:
كان ما اديكنت عليكم يا الحبان اديكن علي منو؟
| |
|
|
|
|
|
|
|
|
|
Re: بيتنا زمان.. (Re: معتز مقبول)
|
Quote: اها ما تلعلع ساااااي ..
جهزت الحولي لام الاولاد...
كلامك حلو والله...
كل سنه وانت طيب |
ود المقبول كيفنك ابوي
ياخي حولي شنو ياخي مع الفلسة دي
ما تخليك محضر خير ياخي
| |
|
|
|
|
|
|
|
|
|
Re: بيتنا زمان.. (Re: ادريس خليفة علم الهدي)
|
| Quote: كان ما اديكنت عليكم يا الحبان اديكن علي منو؟ |
ات يا ود اخوي مبطر وعلي كيفك تديكن بس ما تتيس
وكان درتا تقرم تقرم وكان درت تجغم تجغم
خرتايتك ملانة بصل وسعنك ملان قام زت
وتنقز على كيفك
بس ما تتعولق
| |
|
|
|
|
|
|
|
|
|
Re: بيتنا زمان.. (Re: عبدالله ود البوش)
|
ود جبريل المسخوت ...
Quote: صنقعت علي الغنمايي السوداء وقلتلا: ان بقيتي ما تقلتي شي الشهر دة ابوي بيمسكك يبيعك لي عبد الجبار الجزار.. وأنا طالع حدرت للتيس الكبير..
|
أها ..... وفهمك؟
| |
|
|
|
|
|
|
|
|
|
Re: بيتنا زمان.. (Re: محمد أبوالعزائم أبوالريش)
|
Quote: والديك اللحمر وعندو ريشايتين صُفُور واقفلها في خشم الزير
يمد في جناحو مع رجلو اليمين ويكاكي زي صفاقين عثمان اليمني وكتين يهيجوا |
معرِّش يا قريبي معرِّش
ــــــــــ
بس أوعى تقول لي الحُمارة كمان كانت بتمـchـِّـك
| |
|
|
|
|
|
|
|
|
|
Re: بيتنا زمان.. (Re: علاء الدين يوسف علي محمد)
|
بوست للمتعة
للفرجة بس
اى محاولة غير كدة
(الترابى) بيرجع ليكم
(متأبطا شرا)
وصفاقين اليمنى لمن يهيجوا
امانة (الجداد ما بيرقد خل )
* شبق الجروف البكر للأمطار حتى تصل فى القيعان رقرقة السراب !!!!
| |
|
|
|
|
|
|
|
|
|
Re: بيتنا زمان.. (Re: منصور عبد الرازق)
|
Quote: بوست للمتعة
للفرجة بس
اى محاولة غير كدة
(الترابى) بيرجع ليكم
(متأبطا شرا)
وصفاقين اليمنى لمن يهيجوا
امانة (الجداد ما بيرقد خل )
* شبق الجروف البكر للأمطار حتى تصل فى القيعان رقرقة السراب !!!!
|
اووووووه منص شخصيا
زارتنا البركة يا حبيب
يا عزيزي انها ذكريات الصبا في مراتعها هناك.. هنااااااااك
| |
|
|
|
|
|
|
|
|
|
Re: بيتنا زمان.. (Re: طارق جبريل)
|
المشوطن ود جبرين
الرباية دي أبداً ما كانت بتظبط معانا
مش قاليك في بيوت كدي السعاية ما بتنفع فيها
أها
عِلا الجداد دا
يا اخي والله قصتو قصة
ومتابعتو متعة بالصح
هاك حكاية ود البرير دي قزقز بيها
فيها جداد وفيها حكم
الدفء الماكر
الطيب برير يوسف
برغم أنّ كلّ شيء كان يبدو طبيعيًّا جدًّا..
إلا أن حدسها كان يقول لها بغير ذلك..
لكن لم يكن أمامها غير الإذعان.. والمُضي في الطريق إلى غايته المرسومة.
حاولت أن تقصّ من أجنحة أحلامها المحلّقة في فضاءات لا يحتملها الواقع..؛
ركّزت كلّ اهتمامها في الاستفادة من الموارد المتاحة لتبدأ أولى خطوات الحياة.
ضاقت الصدفة الجيرية بها..؛
أو ضاقت هي بمسرحها المحدود..
لا يهم..
المهم أنّ ساعة الخروج قد دنت..
حطّمت القشرة دون أي إحساس بالامتنان..
ثم أطلّت برأسها الصغير..
وأطلقت صوت نداء خافت لأمٍّ محتملة
لم يكن ثمة رد أو جواب..
غير صدى صوتها مرتدًا إليها من جنبات الصندوق الحديدي..
أكملت إخراج بقية جسدها.. وهزّته برغبة المتحفّز للحياة
ثم أطلقت نداءات متصلة لهذه الأمّ الصماء..
لا أحد في الجوار يستجيب..
تلفّتت حولها..
هالها منظر الصفار الواهن من زغب الريش الذي غطى المساحة
وكلُّ صغير ينادي لامٍّ لا ترد في هذا "الميتم الكبير"..
لم يطل مكوثها كثيرًا..
يد غليظة كانت تطاردها من بين من تطارد
ساد هرج كثير.. احتجت فيمن احتج من فرط الخوف
لكن الاحتجاج لم يمنع الأصابع من نقلها إلى كرتونة كانت في الانتظار
ثم أودعت إلى "ملجأ" لا يغيب عنه الضوء..
ولا يعرف الظلام..
انهمكت في الأكل بشراهة حتّى تغطّي على أحزانها..
وكتعويض نفسي لفقد أمها التي لم ترها مطلقًا
وكذلك كانت تفعل زميلاتها الأخريات..
نمت بينها وبين بعض القريبات منها علاقات عابرة..
كثيرًا ما كانت تنتهي إلى شجار حول المنافسة على الطعام برغم كثرته..
كانت متعجّبًة من قدرة هذا الطعام على ملء جسمها بهذه الطريقة المغرية..
كم وقفت أمام الأخريات وعرّت فخذيها في استعراض لا يخلو من إثارة..
وتبرّج غير حميد..
أحدهم كان يرقب هذا "النمو" بعين لا تخلو من مكر!!
***
دنت لحظة الخروج الثاني..
لكن خروجها هذه المرة كان على غير ذلك الخروج..
شيء ما كان يحرضها على عدم الاستجابة..
طافت بخاطرها صور "أخريات" خرجن ولم يعدن..
ما أُشيع عن "نهايتهن" كان أمرًا مفزعًا بالنسبة لها..
ولهذا لم يكن أمامها غير المقاومة..
قفزت قفزات متتالية وهي تتحاشى الإمساك..
منقارها لم يكن حادًّا بما يكفي ليمنع اليد من تطويقها أخيرًا..
دفعت برجليها في الهواء دفعات متصلات.. مصحوبة بصراخ واهن
لم تفلح في الخلاص..
انتهى بها الحال في صف طويل من طابور "الذبح الجماعي"..
أدارت عينيها في الأجساد المعلّقة..
كل العيون كان يملؤها الفزع..
رائحة الموت كانت تملأ المكان..
الصراخ كان يصم الآذان..
التوسلات ذهبت أدراج الريح
كانت المسافة قصيرة جدًّا بين رأس يطيح..؛
جلد يسلخ..؛
وجسد يتكوّم في كيس يفاخر بجودة المنتج
ويحرص على إظهار "المفاتن".. من الصدور والأفخاذ
غضت طرفها.. في خجل حزين عندما بانت لها عورات زميلاتها من خلف الأكياس
لم يكن ثمة ساتر يحجبها عن رؤية الدم المراق..
رأت خاتمتها في مرآة العيون المثبتة دون حراك في الرؤوس الملقاة تحتها..
عند ذلك تسرّب إليها يقين مفخخ ملؤه الخضوع والخنوع..
فانكفأ صوتها إلى داخلها بما يشبه العزاء..؛
استجابت لنداء الموت الغامض دون مقاومة هذه المرة وهي تهمس:
- "ما أقسى الذبح الذي لا ستر فيه"..
غير أنّها حينما قدّمت رأسها للحز..
لم يكن يؤلمها.. ويخزها بالندم..
غير استجابتها البلهاء لذلك "الدفءالماكر"!!
http://sudanyat.org/vb/showthread.php?t=21702
طبعاً ما تستغرب اللغة اللطيفة معاك اليومين دي
داخل علي طمع وكدا
فأفهمونا الله يرضى عليكم
ههههههه
| |
|
|
|
|
|
|
|
|
|
Re: بيتنا زمان.. (Re: بله محمد الفاضل)
|
Quote: طبعاً ما تستغرب اللغة اللطيفة معاك اليومين دي
داخل علي طمع وكدا
فأفهمونا الله يرضى عليكم
ههههههه |
وانا اقول الخرابة دة ماله يملس في الكلام كدي
| |
|
|
|
|
|
|
| |
طارق جبريل
ادريس خليفة علم الهدي
ابو جهينة
عبدالله ود البوش
نوفل عبد الرحيم حسن
عبد الدائم سيد أحمد
محمد أبوالعزائم أبوالريش
علاء الدين يوسف علي محمد
منصور عبد الرازق
خدر
بله محمد الفاضل
فيس بوك
تويتر
انستقرام
يوتيوب
بنتيريست