كتب الكاتب الفاتح جبرا المتوفرة بمعرض الدوحة
|
|
 بقايا ذكريات جامعية - جامعة الخرطوم
|
الصرح العلمي العظيم
اختلف الزمان و بقي المكان و تخرجت اجيال و اجيال و لكل منا ذكرياته الخاصة و العامة فدعونا نلتقي كما التقينا فى اسوارها و فرقتنا دنيانا فلنتعارف لعلنا نقدم القليل لهذا الصرح العظيم معلم الاجيال شكرا لكل من علمني حرف.
جئتها كبرلوم من القاهرة لم يري الخرطوم من قبل كل مايعرفه عن العاصمة رسائل اهل و شوال بلح بيصل عن طريق اسوان كل رمضان و شوق اهل لم نراهم منذ عام ١٩٨٥
ذكريات قادمة
الدفاع الشعبي و جائزة اوسكار فى التمثيل
حافلة واحدة بس فى ميدان ابوجنزير
الكومن روم و البرلمة
التقيكم مجدد ان شاء الله
|
|
 
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
الأخ سيد سلامات
إنها ذكريات ولا ككل الذكريات... من دوشة البرلمة وحتى الخلط في شارع المين والجنكشن وشارع العلوم الآداب... كنا طلبة في الجامعة وليست جامعةالخرطوم فعلى زماننا كانت هنالك جامعة واحدةز.. وكان شعار جامعة حرة أو لا جامعة
الشارع اسمه شارع الجامعة وليس شارع جامعة الخرطومم... والمسجد اسمه جامع الجامعة
وكانت هنالك الفرع والمعهد الفني ومعهد المعلمين العالي
هل سمعتم بالبرلم الذي أكل السمك الفرايد في الفطور باللبن المسكر وكان ظنه أن السمك لقيمات .. البرلوم كان من (إندنا) يعني من كوستي ولا ورا... ناس كتيرة شافت الحوت في سفرة الجامعة... وعن ال special meal نتحدث ... التحلية كريم كرميلا وباسطة وكسترد باللبن...
كان نسكن في لكوندات الجامعة وليس داخليات الجامعة... سرير في الروم سرير في الفسحة...الملاية وكيس المخدة بغيروهم كل سبت وثلاثاء,,, بصرفوا لينا بطاطين كل ما الشتاء جا... بصرفوا لينا تذاكر سكة حديد درجة تانية وبحجزوا لينا عربات خاصة لطلبة الجامعة... لا يسمح الكماسرة بركوب اي شخص بها حتى لو قبل الطلبة بذلك...
رحلات قدوم البرالمة... حفلات استقبالهم... مسابقات ملكة جمال البرلمات.. مابين العلوم والآداب... والأقتصاد... مباريات الطب والهندسة.... ومباراة الطب وشمبات وكانت لها نكهة خاصة... وأغنية السستر جات شيخة الدايات..... ألخ
المهندس إيه زبالة... حتهندس إيه زبالة.... بند الهندي قالوا لغوه... أ ب ت ث
ليالي حلمنتيش وحكاية الحنكوشات والحناكيش ومخترع الكلمة الدكتور ساتي وهو طبيب الآن في بلاد الله الواسعة...
هل نحدثكم عن رحلات الصيف إلى اوروبا والعبد لله زار كل من مصر .. سويسرا.. ألمانيا.. هولندا... بريطانيا... كندا... أمريكا من نيو يورك إلى لوس أنجلوس...ومن شيكاغو إلى نيو اورليانز... وكان لنا وزميل من كلية القانون شرف الصعود على قمة مركز التجارة العالمي World Trade Center والذي فجر في 11 سبتمير كان لنا شرف صعوده في 26 يوليو 1976... وكذلك تمثال الحرية والإمباير ستيت وسيرس في شيكاغو... مش قلنا جامعة حرة أو لا جامعة....
لنا لقاءات إن شاء الله.
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
اعزائى بيكاب وكانتونا
سلام
الحديث عن جامعة الخرطوم حديث ذو شجون وطويل لا ينتهى.. اطول من الف ليلة وليلة.. ليال بلا شهرزاد وشهريار.. ليال النشاط والبركس ومساء الخير وأخر لحظة.. وليالى حلمنتيش.. اراك يا كنتونا غمطتنا حقنا فقد كنت احرر جريدة سلامات الحائطية (وهى تسمية توارثناها عن (اجدادناالقدماء) من قبيلة الحلمنتيش ومنهم دكتور محمد عبدالله الريح.. وكنت اعتقد اننى من اوائل الذين جلبوا اسم حلمنتيش الى جامعة الخرطوم فى عام 1970 ولكنى اكتشفت ان جهابذة سبقونا فى ذلك .. وقمت لفترة قصيرة بتحرير يوميات قهوة النشاط فى صحيفى الرأة العام مع الاستاذ محمد عبدالله الريح (حساس محمد حساس) الذى كان يكتب عن مقالاته الشهيرة ( ثقالات).. وشاركت فى تأسيس هيئة حلمنتيش العليا واذكر ان الدكتور احمد الامين (المتجهجه الاممى) قد اضاف كلمة العليا ثم اخترنا اسماء حلمنتيشية لبقية العقد الفريد دكتور محمد اسماعيل رحمه الله (بروفيسور جاغوم بن بلاع) وشخصى الضعيف (الخيزبون الطرابيشى) وهاشم عبدالرازق (الجحيج بن احيحة المندكلى) ودكتور ساتى ( الفوار الصيدلانى) ودكتور محمد اسماعيل ( تشرطن دهرا) ويوسف احمد أدم ( المتغوبش الخلوى) وعبدالدافع الخطيب ( الحبيب بن الولهان) ومحمد الجالك الصراف (السعسعان بن المشرور) وبروفيسور عبدالفتاح يوسف (الكباس بن العسعس) ود. هدى عصام الدين (الزبرجدانة السفسطائية) وانضم الينا أخرون لاحقاولكن هؤلاء هم مؤسسو هيئة حلمنتيش العليا..
وقد ابتدعنا مصطلحات حلمنتيش الاولى مثل البرليم والبرلومة:
قال جاغوم (ايام المصادرات والتأميمات):
لله درك يا بلومة**** ضنب تكوم كومة كومة
اخشى عليه فى كل قومة*** وبخاف تصادره الحكومة
وقال الحيزبون امام سلالم ال 102:
يا طالع السلالم
قف واجمع البرالم
فالحيزبون قادم
وقال أخر:
برليم.. برليم.. برليم
ترررم... ترررم... تررررم
انا شفت الليلة حلم
برلومة.. تحب برليم
ترررم تررررم تررررم
دة حلم؟ لا حلم!! لا علم!!!
حلمان يا اخوى.. اتلم
ترررم ترررم... تررررم
وقال المتجهجه الاممى امام الملآ فى قهوة النشاط:
انا من تجهجه فى النشاط بلا اختلاط
واضاع وقتا فى التكبكب والعياط
حتى وجدتك خلطة مزبوطة قرب النشاط
من فرحتى قطعت من جزمى رباطى
ومشيت حفيانا وبوتى فى اباطى
وقال المتغوبش الخلوى:
انا المتغوبش الخلوى
انا الحامض انا القلوى
...
انا المتغوبش القمصانو شاش
انا الدرش العلم درشا دراش
انا الفلسان تملى وخالى كاش
انا الطالب الدخل للجامعة داش
وكثيرون أخرون ليتنى اجد الوقت لتسجيل بعض قصائدهم الجميلة..
وشكرا..
نورالدين منان
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
(كانت لنا ايام.. في القلب ذكراهأ)
سلام يا ناس (ام نخيل) جملة..
ما دفعني للمداخلة شيئان : الاول : انكم من جامعة عزيزة على القلب..
عزيزة علينا ما بقيت وان جار عليها الزمن..
والثاني ريادة هيئة حلمتيش العليا في مجال الشعر الحلمنتيشي وهذا موضوع اخر ساعود له لاحقا..
حالفني الحظ ان اكون من بين خريجات هذه الجامعة العريقة.. واشكر لها انها مكنتني من زيارة كل من فرنسا التي امضيت بها عاما كاملا وسويسرا وايطاليا.. وهذه اماكن لا اعتقد ان امكانياتي لا السابقة ولا اللاحقة تمكننى من ان (اعتب) على اي بلد منهم..
صحيح ان اللبن على ايامنا في السنة الاولي اربعة مرات في اليوم، وكان بوكس كوسو يتمخطر كل يوم في الشارع الذي يفصل بحر العرب والقانون عن باقي الداخليات.. بس يظهر انو فس سنة تانية اكملنا سنين الرضاع، فتم الفطم وصار اللبن مرتين في اليوم..وبدلا عن ان تغرف بكوزك صار يغرف لك..
درس معظمنا الجامعة (بلاش)..لم نخسر مليما واحدا طيلة الخمسة سنوات التي قضيناها في رحابها..
السبيشال يوم التلاتا والبيض والكبدة والعدس الذي كان احد زملائنا يطلق عليه اسم (ابوقجيجة) لان طبيخه غير الجيد كان يتخلله بعض حبات العدس (ابو جبة)..
وجبات لم يكن معظمنا يتناولها في بيوته..
كان الكشف المجاني على الطلبة في الكلينك يحدد من يحتاج الى تغذية خاصة ام لا.. واصباح التغذية الخاصة الذين يحدد الكشف الطبي انهم يحتاجون الى شوية (ترميم) كان مكونات صوانيهم تختلف عن مكونات صوانينا.. وادوني اضنيكم جاي..انا اول مرة اكل الخيار هناك.. ماشفت في حياتي غير العجور من مكونات السلطة.. مع اني من ريف الخرطوم.. اما المن برا الخرطوم دا ..اسكتوا ساي ..حدث ولا حرج..!
ومن معطشات الجيم كان نصيبنا في الاداب 3.. 2 من اكبر حناكيش العاصمة كانن معانا وواحد حنكوش.. والمين رود كنا ما بندخلو الا لما النور يقطع.. منطقة حناكيش حصرية..
يحكي ان احداهن- والعهدة على الراوي- ذهبت الى عم جمال الله يطراهو بالخير، رئيس السفرة، وقالت له: عم جمال عندك جبنة(كلو معطش طبعا)
فرد قائلا بنفس الجيم المعطشة: لا عند (جحنية) يقصد طحنية..
الحنكوش زميلنا اعتاد يذهب الى ابو ظبي سنويا لتغيير بنطالينه التي لا يكون قد حال عليها الحول ويعتبرها: 0ut of date
وفي احدى المرات سأله بعض الغبش عن الكمية التي تكفيه في السنة.. فرد ببساطة شديدة.. ما كتير 24 بنطلون بس..!
ساعود للحديث عن هيئة حلمنتيش العليا، التي انا من اكثر المعجبات بها.. بس ريادة الشعر الحلمنتيشي في السودان لم تخنى الذاكرة، ليست لها وساعود لاحقا لهذا الموضوع كما اسلفت.. اما في الجامعة، فنعم..
هي الرائدة.. هي الرائدة لا شك ..
الاخ سيد بيكاب مفترع هذا البوست..شكرا لك على هذه اللفتة الجميلة.. لدى تساؤل اخ بيكاب: لماذا جعلت العنوان بقايا ذكريات؟ كأنما الجامعة لم يعد لها وجود..
ماذا لو ظلت الذكريات باقية نغذيها نحن والاجيال القادمة من بعدنا، بذكرياتنا..
(بقايا ذكريات) لها وقع اليم في النفس ..هل انت معي؟
شكرا لكم على هذه السانحة..
قنبوا طولا..
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
الاخ بكاب
لك التحية
وانت تنثر الشئ الجميل عن جامعة الخرطوم
تلك الجامعة كانت ايامك ارو ع من الان...
انا احد خريجى تلك القلعة الرائعة واحد الذين عاشوا فيها اجمل اوقاتهم
بين اسكول وعلوم وشارع المين وهندسة
وشئ من اقتصاد واداب ...
تخرجنا منها العام الفات ولكن الى الان لم ننساه
الى الان لم نرى فيها غير انها القلعة التى خرجت شباب من كل انحاء السودان
تلك القلعة الرائعة لم تكن بالروعة التى تحكون عنها فى ايامكم انما الان تغيرت
ولى عودة عن واقع الجامعة الحالى ...
تسلم
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: عبدالكريم الامين احمد)
|
_______________
الجامعة آداب
وما سواها مهن وحِرف
قالها البروفيسور عبد الله الطيب .. ورددها من ورائه طلاب هذه الكلية العريقة عراقة الجامعة نفسها على مر العصور .. ومختلف الأزمان.
سيد بيكاب (المصري)
ذكرياتي في جامعة الخرطوم لا تنسى .. وأغلبها ذكريات مشتركة. لدي الكثير لأقوله هنا .. ولكن لا أعرف من أين أبدأ .. هنالك أسماء ومواقف وصور تتقافز إلى ذهني ولا أحسن ترتيبها على النسق المناسب. ما زلت أذكر ذلك اليوم الذي رأيت فيه في (لفّة صنقعت) وأتذكر ذلك اليوم وكأنه كان بالأمس .. بتفاصيل وروائحه بكل شيء.
أسمع الآن وقع أقدام الطالبات في الMain Road وأسمع صيحات الCalling وضحكات العم حسين خفير كلية الآداب وهتافات قادمة من ناحية الميدان الشرقي "مساطر بس .. وما أكتر .. وقاشرين بيها في السنتر" .. و "الصوت صوت غنمي .. كضاب يا عربي"
لها كل التحية هذه الجامعة الجميلة التي ستظل ذكرياتها محفورة في صدور طلابها أينما كانوا وكيفما كانوا .. لقد فرّقتنا هذه الدنيا يا سيّد .. ولكنها تركت لنا بقايا ذكريات . وأنا هنا لأستمع وأستمتع بما سوف تورده من ذكريات ربما كنتُ أنا أحد أبطالها معك..
التحية لك وللأسرة الكريمة
| |
|
|
|
|
|
|
|
|
 Re: بقايا ذكريات جامعية - جامعة الخرطوم (Re: Sayed Bekab)
|
تخرجت من هذا الصرح العظيم ( كلية الآداب) طبعا مافي داعي سنة كم المهم كانت هناك مجلة تسمى
بصمات البرالمة تتابع تحركاتهم الدايشة داخل الحرم الجانعي والداخليات وأذكر أنهم يعرفون
البرلومة شنطتها الجديدة لنج أو ثوبها الما( فشته) ويحاول الجميع ايقاعهم في مقالب كثيرة وقد
كتب أحد الشعراء الحلمنتيشيين قصيدة على لسان واحدة حبت برلوم يقول فيها :
حبيب برلوم وبرضه مهم
ما تحدث الخالة ولا تكلم
كمان العم ...أضرب تل تلل
تلفون وأسكت تم ...
بجدع الكراس وأجيك مارقة
أسيب الهم ...
ونسهر برة طول الليل ...
وظز في الهامي من مارس
ومن أبريل ....
أيضا قال أحدهم بعد أن دسمست إحدى طالبات من كلية العلوم أو ( جنرال سينس)
فايتانا وين مستعجلة
شرط امتحان ما إنت كملتي الحلا
لازم علوم ما ساحرة نايرة ومذهلة
غلطات كتيرة الكومبيوتر بعملا
ما قالوا بعرف كل شيء
ليه ما عرف ست الحلا ؟
مالو العميد مالو البليد
لو رفد المصحح والمعيد
وخلى ست الناس تعيد
إلى أن يقول :
الجامعة بعد كوم رماد
لا تنفع آداب لا اقتصاد
لا فيها طب لا صيدلة يا سيدة لا .
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
سلام يا جماعة جميعا
للتصويب
القصيدة المذكورة اعلاه صاحبها الشاعر الطبيب المعروف عمر محمود خالد، وقد قالها في فتاة الاداب الجميلة(انذاك) سيدة كرار وذلك عقب فصلها من الكلية..
وفيها ابيات لم تظهر.. شطبت لزوم التادب الذي فرضته ظروف وجود الشاعر بالجامعة.. والباقي معلوم:
مالو العميد مالو البليد
لو خلى ست الناس تعيد
وفيها يذكر الشاعر اسمها صراحة
يا سيدة لا
فايتانا وين مستعجلة..
على فكرة صاحبة القصيدة هي شقيقة احد الضباط الذين اعدموا في رمضان..
| |
|
|
|
|
|
|
|
|
|
ها يا سيد (Re: Sayed Bekab)
|
الصرح العلمي العظيم...؟...؟...!...؟
همممم!....
؟
ااااااه !!! جامعة الخرطوم
سيد غالبا ما بتذكرني..لأني كنت برلومة لما إنتا كنت على أعتاب التخرج.. أيها السنير الفوضوي (أكتر سينير فوضجي شفتو في حياتي)
فاكر ميسون وعلياء وزوبا وأميرة وريم و هبة وهالة برلمتك في اداب؟
| |
|
|
|
|
|
|
|
|
 Re: بقايا ذكريات جامعية - جامعة الخرطوم (Re: Sayed Bekab)
|
أنا شاعر في ناس هنا من أيام التركية السابقة ، كل واحد يعرف نفسه دخل الجامعة متين و إتخرج متين !!
أحلي حاجة في حياتي كانت دخولي كلية القانون جامعة الخرطوم ! بعد سنوااااات إيهاب إبني رفض يدخلهاوقال لي ليه داير ترميني ياابوي ؟؟!! ومن بعده إبنتي دينارفضت !! مع إنو أمهم رئيسة شعبة القانون الدولي بالكلية !!
واحسرتااااااه !!
عادل سمير
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
عواطف ما مشكلة سنة تخرجك التحية لك و و لكل من نالوا شرف التخرج من هذا الصرح معك زيدينا من الحلمنتيش شويه و اهديك
كل ما أقبّل وأعاين
mine ألقى عينيك جات في
very good حاجة
fine حاجة
مصنع كنانة ا suger يا
مالية البطانة flour يا
fantastic banana إنتِ
رتينة my eyes إنتِ
مابتجينا where is إنتِ
light إنتِ عينيك فيها
dark night إنتِ شعرك
right إنتِ طبعك كولو
إنتِ نورو my heart إنتِ
البدورو my love إنتِ
more tomorow عايز أشوفك
البدورو my love إنتِ
more tomorow عايز أشوفك
more tomorow عايز أشوفك
more tomorow عايز أشوفك
more tomorow عايز أشوفك
more tomorow عايز أشوفك
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
حتمت ظروف هجرتنا لجمهورية مصر العربية من عدم تواصلي مع الوطن لكن كان الحلم يراودني بالرجوع يوما من جديد .... غلبت علي مراحل دراستي بالقاهرة ذكرياتي فى مدرسة موركة الابتدائية بجريرة صاي الزملاء الداخلية.... صف الفول و العدس ...عنابر النوم.... طابور الصباح و علقه خالي الاستاذ محمد سيد بيكاب عندما يذاع اسماء اوائل الفصل و يكون اسمي ليس من ضمنهم ..... كفاح من سنه اولي كل ما املك هو يومان اقضيهما من اخوتي و امي ...ر سالة عزيزة من والدي المغترب وكيس بلح و شويه منيين للشاي و سلام و دعوات امي لي بالتوفيق وسفر للمدرسة الداخلية هكذا بدات اولي مراحلي الدراسية حتي الصف الخامس و جاءت لحظة الوداع من صاي لحلفا لاسوان للقاهرة الي عالم لا نعلم عنه اي شي و اناس يتحدثون لغة لا نفهم منها غير السلام.
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
يا الله كلام كتيييييييييييييييييييييييييييييييييير
اخونا احمد حماد ادريس العضو الحالي بالمنبر كان في الاقتصاد وانا كنت في القانون وهو انسان صاحب سخرية جميلة سالته ذات يوم ما ذا تكره في الدنيا الرايحة دى ؟ قال لى ثلاثة حاجات:
البرالمة
القرع
شمبات
مودتى
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
الأخ سيد لك التحية والمودة
عارف زمان كان البنات بنتظروا الكيسات وهي جمع كيس أو جكس كما يسمى الآن قدام باب الداخلية
وبعدين بكونن واقفات مسافة طويلة منتظرين الكيس وفي ناس متعودين يشروا كيساتم زي معاوية
يس مثلا فقاموا سموا المكان دا حبل الغسيل من كتر الشر فقام واحد حلمنتيشي قال القصيدة دي
يالغسلتنا وشريتنا
لما نشفنا ليه ما كويتنا
ياالفي كانون هواك حميتنا
لامن زيتنا فاح شميتنا
والبقية تأتي
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
الاخت عواطف ادريس اسماعيل
Quote: فايتانا وين مستعجلة
شرط امتحان ما إنت كملتي الحلا
لازم علوم ما ساحرة نايرة ومذهلة
غلطات كتيرة الكومبيوتر بعملا
ما قالوا بعرف كل شيء
ليه ما عرف ست الحلا ؟
مالو العميد مالو البليد
لو رفد المصحح والمعيد
وخلى ست الناس تعيد
إلى أن يقول :
الجامعة بعد كوم رماد
لا تنفع آداب لا اقتصاد
لا فيها طب لا صيدلة يا سيدة لا . |
اطلب القصيدة كاملة اذا امكن ،،، لي زمن
بفتش عن هذة القصيدة ،،،
خالص شكري
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: samwal ebrahiem)
|
الأخ سمؤل
لك الف تحية
في الحقيقة أتذكر أغلب أبيات القيصدة وأتمنى أن تكون كلها
فايتانا وين مستعجلة ؟
شرط إمتحان ما إنت كملت الحلا
لازم علوم ماساحرة نايرة ومذهله
يا سيدة لا
غلطات كتيرة الكمبيوتر بعملا
يمكن قسى ويمكن نسى
وجاط النمر من أولها
ما قالو بعرف كل شي
ليه ماعرف ست الحلا ؟
مالو العميد ؟ مالو البليد
لو رفد المصحح والمعيد
وخلى ست الناس تعيد
كان بيها كملنا الحلا
فايتاناوين مستعجلة
يا سيدة لا
السلة تبكي مولولة
الليلة صبحت أرملة
حزنت صباحاته
وبنت العناكب مدخلة
ما كنت حاديها كنت
الجمال كنت الحلا
فايتانا وين مستعجلة
ياسيدة لا
الجامعة بعدك كوم رماد
لا تنفع آداب لا اقتصاد
لا فيها طب لا صيدلة
ياسيدة لا
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
الاستاذ محمد النعيم..سلام وسعيدون بالطلة
تعليقا على استفسارك
Quote: الاستاذ/منان.........تحيه
وانا اتابع حــديث ذكـرياتكم الجـميله فى جامعة الخرطـوم
توقفت عند ذكرك للجريدتين{ مساء الخير }و{سلامات} ومـافهمته
من كلامك انهما كانتا إصدارات حلمنتيشيه ..علما ان الاصدارتين
الآن هما اصدارات حائطيه سياسيه تصدرهما الجبهة الديمقراطـية
جامعة الخرطـوم منذ زمن بعيد..فقط اردت حصحصة الانتقال التأريخى
والمـوضوعى لهاتين الحائطـيتين اللتان شكلتا وعى اجيال من طلبة تلكم
الجـامعه فيا استاذ فقط لو استطعت تسليط الضوء التأريخى لهذا الانتقال
فى عجاله ساكون شاكـرا فانا لااريد لهذا البوست الذى يبدو انكـم
اخترتم له شكـل الذكرى الادبيه المرحه ان ينحرف لغير غرضكم واخترتك
انت لانك عايشت تلكم الفتره واقترح ايضا محمد حسبو فى توضيح سريع لانه
فى ظنى لم يكن بعيدا عن هيئة تحرير مساء الخير حديثا
او كل من كانت له علاقه بهما. |
الاستاذ محمد النعيم
سلام
مساء الخير كانت صحيفة الجبهة الديمقراطية وقد قمت بتحريرها اثناء فترة المناضل الراحل الخاتم عدلان وكنت احد خطاطيها.. اما سلامات فقد كانت على زماننا صحيفة حائطية فكاهية مجمدة وقمت بإحيائهامثل صحيفة بصمات (يحررها زراعى زايد بيطرى) وكان يشرف يحررها الكباس بن العسعس (دكتور عبدالفتاح يوسف) وقد علمت ان الدكتور محمد عبدالله الريح (حساس محمد حساس) كان يحرر سلامات قبلنا بكثير (لقيناهو مدير لمتحف التاريخ الطبيعى) واحتضن هيئة حلمنتيش العليا وقدمنا للإذاعة والتلفزيون ومسرح الجزيرة بمدنى ولكن انتشارنا كان من خلال ليالى حلمنتيش الكبرى فى ميدان الباسكت والميدان الشرقى وقهوة النشاط وكلية الطب والزراعة وكلية الطب ولآن الإقبال كان كبيرا ويحضره جمع غفير من خارج الجامعة من الفرع ومعهد المعلمين العالى (كلية التربية) والمعهد الفنى ومن عشاق حلمنتيش من الثانويات فقد كنا نقيم الليالى الحلمنتيشية فى الميادين العامة.. وقد قام الدكتور يوسف فضل ومعهد الدراسات الافريقية والاسيوية بتسجيل معظم القصائد الاولى لشعراء حلمنتيش فى اشرطة ريل لفائدة الدارسين..
بيننا فى المنبر استاذنا وعرابنا الدكتور محمد عبدالله الريح واقترح عليه ان يفتح بابا توثيقيا لهيئة حلمنتيش العليا ومؤسسيهاللفائدة.. واعتقد ان توثيق هذه المرحلة امر هام ويحتاج الى عنوان كبير وخاص بهيئة حلمنتيش العليا ويمكن ان يفرد له الاستاذ بكرى مكتبة خاصة ليكتب فيها شعراء حلمنتيش عن تجاربهم الشعريةوذكرياتهم بطريقة اكثر علمية وادبية..
نورالدين منان
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
| Quote: رحلات الجامعة علي ايامنا و هذه الايام ليست ببعيده |
ابوالسيد
رحلة لي مزرعة ناس مي عاطف في اواخر التسعينات في المنشية قباني,,
ياسر وجلنار ومجاهد والصادق كوكا وجودي وامين جيتار وسارة صلاح وسلمى بابكر..
الذكرى دي انا خلدتها في البوم من 36 صورة..
نص الصور مشويات..
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
الطيب شيقوق
التحية لك و لاحمد حماد و كل خريجي اقتصاد و قانون ..... كانت لنا جولات فى كافتريا اقتصاد و زملاء اعزاء فى هذة الكلية العريقة اذكر منهم عصمت فكري و بكري و جمال اليمني " لاعب فريق اقتصاد لكن بتعب الكورة شديد خلاص و معه تتاها الجماهير جيمي يا جيمي وريهم يا جيمي باليمين ياجيمي و علي الشمال ياجيمي"
ونحن علي عكس احمد حماد كنا نحب البرالمة ونعشق فته القرع فى السوق الشعبي و نفرح لزيارة شمبات و كنا دائما ننتظر فريق شمبات علي ابواب الجامعة وقت دوري الكليات و نحيهم شمباتي باع باع باع
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
دكين
تحياتي ياسلام علي تلك الرحلة كان يوم جميل و بتذكر المراكب و عزف طارق محمود و امين محمد الحسن علي الجيتارو شغب احمد كرار وهاني مالك التقيت مجاهد و كرار و هاني مالك فى زيارتي الاخيرة و برغم انو الزيارة كانت سريعة جدا لكن غمرتي السعادة بلقاء احبائي و ياريت ترسل لي جزء من هذه الصور علي الايميل.
مشويات زمان يا سلام الخرووووف كان معاهو حب و حنان وونسه و ذكريات جميلة مش زي خرفان الزمن ده ههههههه
و التعازي للاخت جلنار بشارة التي فقدت والدها العزيز
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
اوووو اننقا السر عبدالله
مسكاقمي اننقا وييفينا زكرتني برابطه حلفا - السكوت - محس -دنقلا بجامعة الخرطوم و حفلات النادي النوبي و اخوان اعزاء اذكر منهم نزار خليل و عبدلله و رحلات ود العقلي و فناني النوبة .
معكم من اجل تخليد فن الحملنتيش الجميل و يابكري ان شاء الله تكون متابع معانا و تسمح لنا بركن لتوثيق الحلمنتيش
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
عزيزي ابوبكر
تحياتي و ياسلام علي ايامكم نحنا غايتو الباسطة دي حاضرنها لكن كان ياكلها الضبان قبل الطلبةو يا ويلو البجرب قطعة واحدة ملاريا و دك محاضرات اسبوع لكن معكرونة بالبشملي يرطرشني ايلا فى فطور بيوت الحناكيش فى رمضان.
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
يا قريبي| Quote: معكرونة بالبشملي يرطرشني ايلا فى فطور بيوت الحناكيش فى رمضان. |
الباسطا كانت من الابتدائية اما البشملي جامعي !! فطور رمضا في الجامعة كان لا يعلو عليه مما لايلزمنا بافطار خارج الجامعة ..بس القراية كانت كد ونكد وقلة نوم و
suspension و dismissed و repeat وهم كتير وياما شهور ما فطرنا ولا اتغدينا لانو قبل الفطور كان عندنا مدرس مجري ( زي المجري بتاع اولاد بمبة) حصتو الهي قبل الفطور وكان ابخل واحد في الدرجات الارقام العندنا 1 2 3 4 5 6 7 8 9 10 عنده 0و0و0و0و0و0و0و0 و0 10فتخيل كام صفر كنا بناخدو وبالتالي نفسنا تسده اما الغدا فمليون حاجة وحاجة كلها اصفار وما كان في مشهيات عشان كدة ما كنا بنتغدي ...
انتو جيل غلابة ؟؟
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
قريبى ابوبكر لقيت ليك فردة وسط الشفع.. ديل بالنسبة لينا برالم دايشين وما شافو الزمن الزين..
الم يقل الحلمنتيشى بروفيسور جاغوم بن بلاع يصف مولاناقال اسد الخلا الجرجر(الجيم هنا جيم نوبية وهى جيم الجركوك والجاجا - الاكل) مولانا قال:
مما جينا للخرطوم
اكلنا المنقة والاناناس
وخليناهو كد الدوم
دنانير كوم
الى اخر القصيدة
حيث كنا نحلى بالباسطة والكاستر والفواكه وناس الاقاليم كانو يوفرو من البيرسرى لاهلهم الغبش .. وكانت جامعة الخرطوم تقبل اقل من الف طالب فى كل كليات الجامعة سنويا.. وما كان فيها حاجة اسمها شهادة عربية.. ومازالت الاجيال الجديدة تردد ذكريات جيلنا المخضرم.. (جيل السيدة لا) وكان السودان عدم السيدات الجميلات.. وين سيدتكم يا بيكاب؟؟ فى زماننا كان الشاعر الحلمنتيشى يتغزل حتى بباص كلية الزراعة (وكان يسميه باص البنات) وقال يصف البص ولساتكه الجميلة من شدة حبه لبص البنات : حتى اللساتك متحننات!!!!! هل هنالك صورة او خيال حلمنتيشى اجمل من كدة؟؟؟؟
شكرا قريبى الشاب الباشمهندس ابوبكر..
نورالدين منان
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: ابوعبيدة حسن محمد)
|
ابوعبيدة حسن
شوقى ليك .. زى ادارة عمر اومو لى ركن نقاش .. (فّليت تقيل )
اعتقد ان عمر اومو ازيل مع البركس ...
فتلك كانت أولى علامات قيامة الطين فى سياسة الحوجة ..
ولا زلت اتذكر تلك البرلومة التى (دقت الدلجة) امامى بملاريا لعينة وفقر دم ..
كان النهار غائظا" جدا" وكنا امام مدخل الداونتاون نستقى الهواء الرطب من الابتسامات ذات التكييف المزدوج .. وكان تخميس سجارة يكفى الغرض ويعدل الدماغ بالرغم من أن وجبة الغداء فى رحم الغيب.
حين افاقت وجدت نفسها فى مستشفى بحرى .. فتفقدت حاجاتها وكانت قلقة جدا" على تلك الجنيهات القلائل التى تشكن شنطتها بعد وقفتها الطويلة فى صفوف صندوق دعم الطلاب .
وبرضو مشتاقين يابوعبيدة حسن .
بابكر زيكو
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: السر عبدالله)
|
يا نور الدين سمعت المستعرب الخلوى قال شنو:"
زى ما انتو يا الحلوين
خالين بال ومرتاحين
تاكلو رغيف ..وكلو خفيف .. وكلو ظريف
انحن كمان هناك عايشين!
نضرب خدرة بكاتولة
نتمها موية بى دغلوبة ..ناكل لوبا
بليلة فريك.. تخلى الزول يقيف انبوبة
تستفو تب..تبرشمو تب..
توقعو رب
وتبقى انفاسو فيها صعوبة
برضو كمان عايشين
وزى ما انتو يا الحلوين
فى الدور والقصور ساكنين
هناك الناس كمان ساكنين
مافى فيلا .. فى راكوبة
بى شوك الكتر مزروبة
وفى حر الهجير منصوبة
................
..............
وشوف السمحة ديك مخطوبة
قاعدة تفلى فى حبوبة
وتلقى الحاجة بقرقوبها
قاعدة هناك تهز فى روبها
شافع لونو زى الطوبة
فى نص راسه قامت قوبة
شايفو هناك بيقلب هوبة
فى دكة بعر مكبوبة
برضو كمان عايشين
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: munswor almophtah)
|
| Quote: التحية لك و لاحمد حماد و كل خريجي اقتصاد و قانون ..... كانت لنا جولات فى كافتريا اقتصاد و زملاء اعزاء فى هذة الكلية العريقة اذكر منهم عصمت فكري و بكري و جمال اليمني " لاعب فريق اقتصاد لكن بتعب الكورة شديد خلاص و معه تتاها الجماهير جيمي يا جيمي وريهم يا جيمي باليمين ياجيمي و علي الشمال ياجيمي" |
يا حليكم انتو الاتخرجو سنة 2000 ما شفتوا البدع زمان بنحكى ليك طول بالك .
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: الطيب شيقوق)
|
ويقول أحد اللواييق
لو تظلمنى وتنسى هواى
برضوا بحبك زى My Eye
وصولك كيف ومكانك HIGH
تعال أدركنى BEFORE I DIE
كفاى يا قاسى كفاى تعذيب
وداخل قلبى جروحك DEEP
ومن زكراك I CAN'T SLEEP
واصبح شغلى CRY AND WEEP
عملت لحبك FILE
واستعملت معاك EVERY STYLE
دمعى يسيل زى موية ALNILE
وطالب منك JUST SMILE
بحلم بيك أنا DAY AND NIGHT
وانا والنوم دوام فى FIGHT
إنت النور وانت ALIGHT
وتغلط واحلف إنك RIGHT
منصور
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: munswor almophtah)
|
| Quote: اعتقد ان عمر اومو ازيل مع البركس |
بعد التخرج عدت الى الأقاليم من حيث اتيت للعمل وبعد فترة جابتني الظروف بالزقاق بين البركس ومستشفى العيون والا اشوف ليك لوحة مكتوب عليها مجمع الزهراء فيما اعتقد صححونا يا جماعة الذاكرة خفت شوية ،ومن يومها مندهش ودائماً اتسأل هل ذكريات الاجيال الممتدة والمرتبطة بهذا المكان والذي بمثابة سودان مصغر ان تطمر بجرة قلم ؟
وهل عمر اومو نقل مراجع مكتبة المين ولا لسه؟
لمسة وفاء:
ــــــــــــــــــــــــــــــ
صادق التحايا الى العم جمال وعوض الرباطابي بسفرة المين الكانت في البركس
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
Quote: سلامات يالخريجين كلكم بدون فرز
تصدقوا إنه في لغة مشتركة بين خريجي جامعة الخرطوم كلهم منذ أن كانت كلية غردون حتى زمن نميري
وبعد كدا على الدنيا السلام المهم أنا بمشي وزارة الصحة عشان آخد مواضيع للمجلة بتاعتي ومن
الضمن بغشى دكتور سوداني رئيس قسم التحصين الموسع وهو خريج جامعة الخرطوم في فترة الستينات
اسمه عبدالمنعم محمد نور من عبري الزول دا أقول أقعد معاه خمسة دقايق ألقى روحي قعدت خمسة
ساعات كلها ذكريات عن جامعة الخرطوم والبلوم والبرالمة والإكذام هول والرحلات وبصات البنات
كان بص الرحلة اللي مافيه بنات بسموه بص العزابة بعدين تصدقوا إنه في موظفين وموظفات من
الأقاليم سكانين في الجامعة ماكلين شاربين نايميين ومافي زول جايب خبر عشان الزمن كان زين
الحليب من حلة كوكو بالقدور الكبيرة والباسطة بالصواني تلعلب عليها الكدايس قدام السفرة
تصوروا نص طلبة مدرسة الخرطوم القديمة ساكنين في الداخلية في واحد قعد خمسة سنة بعدين
قام العم الطباخ سألو وهو قاعد ياكل في أمن وأمان ياولدي لسة ما اتخرجت ؟ قال ليه ياعم أنايا
دابي دخلت ؟؟؟ زمان الجامعةمجانا وكل شيء من الألف للياء حتى الملايات في الداخلية الرحلات
الداخلية والخارجية لكل بلاد العالم لقد قمنا بزيارة العراق ومصر على حساب الجامعة وقام البعض
بزيارة دول أوربية كان هناك منتدى الفلاسفة بقيادة د. شداد لمناقشة العديد من القضايا وكان
هناك الفن الراقي ممثلا في روابط معجبي الفنانين كمحمد وردي , عثمان حسين , محمد الأمين
كابلي وغيرهم كانت هناك أمسيات حلمنتيشية للحيزبون الطرابيشي د. عمر خالد والمتجهحج الأموي
والمتعورب الخلوي وكانت أسابيع الكليات تحفل بجميع أنواع الأنشطة حتى يأتي مارس شهر الكوارث
فتقام الطقوس وهي عبارة عن مسيرة هادرة تنطلق من الجامعةحتى داخلية الطالبات ليقوم أقدم
طالب ربيتر يعني واحد عاد عشرة مرات ليلقي كلمة ضد الامتحانات ثم يحرق نعش الإمتحانات وسط
هتاف الطلاب وزغاريد الطالبات ومنذ تلك اللحظة تبدأ القراية الجد يعني 15 ساعة في اليوم
في واحد كان بقرا 17 ساعة سموه حامد العود يا سلام ذكريات جميلة أذكر صديقتي وحبيبتي منذ
مدرسة أمدرمان الثانوية رباح داؤود الخليفة أول رئيس لمجلس السيادة كنا دائما نسكن مع
بعض في الداخلية عشان بينا لغة مشتركة وبنات انصار في الوقت نفسه وقد قام أحد الزملاء
بكتابة قصيدة حلمنتيشية في رباح الطويلة الجميلة التي تلبس دائما اسكيرتات فضفاضة القصيدة
إسمها الطاؤوس بحاول أتذكرها ليكم عموما لك تحياتي وآسفة للإطالة بالرغم من إنه وراي شغل
متلتل لكن ذكريات جامعة الخرطوم تعيش في القلب وفي الخاطر |
يالطيب شيقوق يا برلم اس 10 البنية دي من زمن الجامعة دييك مش زمن جامعتك ...لانها ذكرت معالم ات لا بتعرفها ولا شفتها لانو مارس في زمنكم كان بيجي فيي اديسمبر او يوليو ...
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: abubakr)
|
| Quote: يالطيب شيقوق يا برلم اس 10 البنية دي من زمن الجامعة دييك مش زمن جامعتك ...لانها ذكرت معالم ات لا بتعرفها ولا شفتها لانو مارس في زمنكم كان بيجي فيي اديسمبر او يوليو ... |
والله الليلة اما تشد حيلك وترد على الاسئلة او نمشى نخليك لاننا نحن بنحب الشفافية والافصاح .
اول حاجة يا باش هل جكست في الجامعة ؟
هل اتشوكشت في الجامعة ؟
ما هو اطرف موقف مر بيك وانت جاى من البندر برلوم جديد من صقيع الشمالية ام حرا زمهرير ؟
كيف كانت فعاليات مارس شهر الكوارس ؟
ما هي مناسبة يا سيدة لا ؟
نواصل
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: السر عبدالله)
|
| Quote: وثانيا انا متاسف لانى ما صححت الغلطة المطبعية |
عزيزي السر ... صدقني انا لم التفت الي ذلك الا وانه خطا في الكتابة غير مقصود ..فخدمة طويلة في المنتديات جاوزت العقديين تجعلني دائما انحو الي حسن النية اولا فيما يكتب والا فسوف تنقلب منتديات نحاول فيها ان نجمع شتاتنا الي ساحات حرب هي التي شتتنا ...فلا يهمك
كان هنالك ومازال علم وشطارة كثيرة في غير الهندسة والطب وماهي الا رغبات وتطلعات هي التي تفصل بين الميدانيين الشرقي والغربي وليس شطارة نجدها في الغربي فكم من عباقرة ازدحمت بهم الساحة الشرقية وما جاورها ...
مودتي
ابوبكر
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: السر عبدالله)
|
| Quote: اولا يا ابوبكر تحياتى اليك .. وثانيا انا متاسف لانى ما صححت الغلطة المطبعية... لانى بقصد طلاب الهندسة والمعمار ومش كلاب الهندسة والمعمار وطبعا زى ما انت شايف حرف الكاف جنب حرف الطاء وانا رجعت صححت الخطا.. |
| Quote: ومعقول اوصفكم بالوصف ده ونحن كنا بنخاف منكم فى الجامعة لان طالبات الاداب مغرمات بطلاب الهندسة وكانو بيقولوا لينا ياخوى ده كالب هندسة ىعنى حيطلع مهندس وانت يا طالب الاداب حتطلع شنو؟؟ |
فقط من أجل الفرفشة وبرضو مسامحين
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: السر عبدالله)
|
يا ناس جامعة الخرطوم ازيكم
صدقوا كلو يوم بمر علي البوست ده واقول اخش عليهم ببعض الذكريات وطبعا في الاول قلت اشوف الناس ديل ذكرياتهم بتشبه ياتو زمن لقيتها بكل الالوان ماسبقنا وما جاء بعدنا فاطلع منها واقول كدي اصبري شويه وغبت يومين وجيت فوجدت نفسي اليوم وكاني اقطع المسافه مابين اداب واقتصاد مره ادخل بصالة قاعة الون او تو بتاعة اداب ومره من بره والا شنو يا زيكو ويا ابو عبيدة ومن جاء ذكره الاخ عبدالرحمن ياه والله زمان يا جامعة .
اشياء عالقة بالذاكره
هل تصدقوا اني احيانا اجد نفس اردد بدون مناسبة
*الجامعة تدين الممتحنين
*استفتا ظهر بالليل حميدا قام جاري
صبيان بنات شافوا شالوا جدعوا بره
*الله الوطن ياكتيبه اداب بيان بالعمل ياكتيبة اداب
*يا كوزت الجبهة الفاشية دايرالك عرسه جماعيه
*ياكوزالجبهة الفاشية دايرلك بيت وعربية
فالتحية لك اولا واخيرا يا استاذ سيد بيكاب والاخرين
اسماء الأمين
| |
|
|
|
|
|
|
|
|
 Re: بقايا ذكريات جامعية - جامعة الخرطوم (Re: Sayed Bekab)
|
السلام عليكم
الجامعة وروحها المكتبة المين
مدمنة المكتبة وفارها الذي لا يفارقها ابدا
كنت اتجول فيها في كل الاجزاء واقضي كا اوقات فراغي بها
بس الناس هنا دي عجايز حبة
نحنا لا شفنا بطاطين ولا ملايات
العدس والرز وبالتذكرة
جينا في الزمن الغلط
لكن ادمن فيها الدوار
حاليا اتحين الفرص لاستمتع بليمون بيزنس وونسة في اقتصاد او هندسة
اما شمبات فبقت اسمها يباب
احلي حاجات كانت النشاط وبيت القزاز (((كافتيريا في المدخل))))
ناس بيتنا قالوا عيب يا بت تقولي بيت القزاز (((((الكافتيريا مغلقة بالزجاج كانت)))
الجرائد المشهورة للافراد والاحزاب تقراها قبال سبعة صباحا ونحن جاريين علي الاندرلاب 
الايام دي جرائد زاتها مافي
الله يرحم الجامعات
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: عواطف ادريس اسماعيل)
|
ياااه...
يا مغير الاحوال..
من صرح للعلم وحرية التعبير الي مؤسسه تجاريه بائسه ..
تفرض مقاييس تعسفيه للكلام.. الملبس..وابسط حقوق الانسان في مرحلة هامه من حياة طلابها..
الملايات والبطاطين.. التحليه.. والmenu الخطيره دي ماشفناها..
الجامعه قطعا تحوّلت من فندق 5 نجوم.. الى راكوبه في الخريف
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: نجوان)
|
نجوان
ياااااااااااااه
و لنا وقفه مع استغاربك الشديد من حال الجامعة الحالي و حتي الراكوبة كتيرة علي حال الجامعة زمان الراكوبة كانت النسبه لينا و لكل السودان مكان يجتمع فيه الناس لذكر السمح والعديل اما الآن فالراكوبه قصدي الجامعة بقت مرتع للزواج العرفي سبحان الله و الله المعين الغريبة علي ايامنا الواحد لو زملانو شافوه خالط بالليل كان بكون في كلام و اي زول يكون فيك راي لكن هسي زواج عرفي و ما عرفي عديل حمانا الله من شرور انفسنا
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
الاخت حليمة
والباشمهندس ابوبكر وعواطف والسر وأل حلكمنتيش
سلام
صاحب قصيدة( يبكنو البنات فى جامعة الخرتوم) هو المرحوم محمد اسماعيل (بورفيسور جاغوم بن بلاع) وهو نفسه صاحب قصيدة الاستيكة .. وبمناسبة بص البنات وشمبات قال الحيزبون الطرابيشى فى ليلة الزراعة بشمبات:
يا بلوم الاقريكلشة ( Agriculture )
ان قلبى صار هشا
صار قشة
ومن العفصات كش
مثل دمور منشى
مثل زول قفشوه يوم كشة
فارسلى من لحظك القتال رمشا
ودعينى اتفشى
فانا بالحب افطر.. اتغدى.. اتعشى
......
فضلى فى القلب لحظة
فبه روم room وممشى
وكراسى ومقاعد
رش فيها العطر رشا
.......
يا بلومات الزراعة
ان فى قلبى مجاعة
خبروها يا جماعة
يا قلبى صار فى سوق الهوى نهبا مشاعا
ضاع يومى فى اللطاعة
وانا اشرب شايا للمناعة
وانتظارى فى اللكاعة
خبروها بالبتاعة
خبروها يا جماعة
يا جماعة
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
Quote: سيد عبدالرحمن
كلية الآداب
قسم اللغة الانجليزية و الاعلام
دخلت الجامعة سنة ١٩٩٤ و اتخرجت سنة ١٩٩٩/٢٠٠٠
* ما بلاده و الله لكن الجامعة قفلت سنه لانو الجماعة مشو الجنوب و جمدت سنة لظروف خاصة * |
ابو السيد ... نحنا تقريبا دفعة ...
بس انا خريجة اسكول .. ماجستير بنشات آداب حتى اسال مني اميرة الحبر !!
عندي ذكريات شديدة .. شدة .. بس بجيك برواقة .. هسي جيت احجز لي .. مقعد معاكم !!
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: سمرية)
|
الزميلة سمرية
تحياتي لك و البيت بيتك شرفتي و نورتينا يا غالية سكول من ماث اصدقاء عزاز جدا اذكر منهم الامين شيخ الدين و باسل و راشد ابشر و كان عندكم نجمه كده زي البحكي عنها السر عبدالله كانت مزار لكل عاشقي الجمال البرلومي
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: ابوعبيدة حسن محمد)
|
_______________
يا أبو السيد
تتذكر الحنكوشة (هـ.ط) التي أصيبت بتلبك معوي
عندما غيّرت عادتها وأكلت مع الشباب فتّة "البوش"
والله ليها وحشة .. وما عارف ليها رقم تليفون
التحية لأهل الكاملين والهلالية وطيبة الحسناب
والكلاكلات وعطبرة "مدينة الحديد والنار" وكوستي
وأهل الكوستي الجميلين وأبناء طابت والعيلفون
والبُطانة فرداً فرداً أساتذة وطلاب
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: هشام آدم)
|
يا ناس الزمن الجميل .. طبعا متذكرين النجمة ام ضنب وكانت طبعا اجمل طالبة فى الجامعة وكان ابوها مدير الجامعة وطلاب الطب والصيدلة والزراعة بيهاجروا من كلياتهم ويدكوا المحاضرات عشان يجوا كلية الاداب ويدوها طلة .. اما البرالمة فكانت مصيبتهم مصيبة واول ما يعرفوا ان ابوها مدير الجامعة .. جرى من قدامها .. واظن الكثير من الشعر الحلمنتيشى قيل فى حقها..
ومواصلة لشعر جاغوم بن بلاع فى الاستيكة فهذا اخر مقطع فى القصيدة:
ما تخجل وتتعقد
انا اتعقد؟؟
ازح جنبك ..ازيد الخلطة تسبيكة
واقول ليكى ..بى صوتا ندى ورائع
يفيض رقة ومزيكة
من فضلك... ونترجاك
ولو تسمحى..
ترجعى لى الاستيكة
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: رامي يوسف الصديق)
|
الجامعة يا رامى سنة 94 كانت انتهت وفات عليها الفوات والجامعة كانت جامعة صحى صحى حتى عام 1990 وبعد داك بقت جامعة اى كلام والدخول ليها على حسب ما بنسمع بالقروش وليس بالمستوى العلمى ... يعنى العندو قروش يقرا والماعندو يشرب من البحر .. ويا حليل زمن الجامعة كانت بتدينا البيرسرى للشاى والقهوة والسجاير.. ويا حليل زمن الواحد لمن يجى مارى قدام قاعة الامتحانات بالغلط ساكت تمسكو رجفة .. وهسع سمعنا ان الطلبة بيكيسوا قدام القاعة الكانت زمان القاعة الرهيبة .. وسمعنا كمان كلمة يكيس دى قلبوها لى يجكس وما عارفين يجكس يعنى شنو لاننا ما بنعرف غير جكسا الكان بجنن المريخاب
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
ابوعبيدة
التحية لدفعة ٩٤ و اخر سناير حضرناهم فى الجامعة بتذكر من الناس الممكن يكونوا زملائك كمال الطويل من اولاد ود مدني و محمد سعيد ود الكلاكلة الوحدة و عبدالخالق نائب مسجل كليتكم و فؤاد فى لاب كمبيوتر اقتصاد و الزول صاحب الكشك فى مدخل الكلية و الدفاتر الحلوة الملونة.
On a seprate note
عندي ليك سؤال ياريت ترسل لي تلفونك ولا ايميلك علي الماسنجر مشكوور
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
السرعبدالله
بختكم يا ناس الزمن الحلو .... نحنا غايتو علي ايامنا كانو النجوم كتار شي نجم فى السماء و شي نجم مجدوع من شارع الجامعة لمن يصلك يكون جاك التهاب فى الحلق و العيون قفلت " بمبان" و نجم النجوم كانو ناس الحرس ما بتخشي كان ما عملتي كده و سويتي كده زمن كان المفروض يسموهوا بزمن قهر النسوان علي ابواب الكيزان هههه
لكن من نجومنا بت العميدة الجابوها من طب تقرا معانا آداب شان تخلف امها و كانت شاطرة شديد و كاسحانا ضب قراية بس ...... لكن كان جابو لينا بت المدير كان بمنطقا هههههه
| |
|
|
|
|
|
|
|
|
|
Re: بقايا ذكريات جامعية - جامعة الخرطوم (Re: Sayed Bekab)
|
السر عبد الله رزت السودان فى شهر 2 الفات لكن لم استطيع زيارة الجامعة لضيق الوقت حيث كانت زيارتي عابره لمده ٨ ايام لكن علي ما اذكر البركس كان داخلية البنات و المكتبة المين زي ما هي بس فتحوا مركز للانترنت فى الدور العلوي فى نهاية الممر ان شاء الله ترجع و تتذكر ايامكم الجميلة فى القريب .
شباب ارجو تصحيحي !!!
| |
|
|
|
|
|
|
| |
Sayed Bekab
cantona_1
Mannan
السر عبدالله
حليمة محمد عبد الرحمن
اميرة الحبر ادريس
عاصم ابوبكر حامد
عبدالكريم الامين احمد
هشام آدم
Mohamed Elnaem
عواطف ادريس اسماعيل
Adel Sameer Tawfiq
الطيب شيقوق
samwal ebrahiem
abubakr
ابوعبيدة حسن محمد
بابكر عثمان مكي
munswor almophtah
عاطف عمر
اسماء الأمين
نجوان
سمرية
فيس بوك
تويتر
انستقرام
يوتيوب
بنتيريست